Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 11-й де́нь.
Слу́жба преподо́бному и богоно́сному отцу́ на́шему Михаи́лу Кло́пскому, и́же въ Вели́комъ Новѣ́градѣ.

НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифонъ.] На Го́споди воззва́хъ: пое́мъ стихи́ры на 8, гла́съ 2. Подо́бенъ: Кíими похва́льными вѣнцы́.

Кíими смире́нными устна́ми воспое́мъ преподо́бнаго, ревни́теля проро́комъ, апо́столомъ и му́ченикомъ, а́нгеломъ сожи́теля, чистоту́ душе́вную и серде́чную соблю́дшего отъ пеле́нъ, безъ нея́же никто́же у́зритъ Бо́га, весе́ліе земли́ Россíйскія, о Самоде́ржцѣ Благочести́вомъ Импера́торѣ вели́каго ко Христу́ моле́бника, преди́внаго въ чудесѣ́хъ, и Христа́ ра́ди всю́ жи́знь свою́ му́ченически сконча́вшаго?

Пріиди́те, Россíйстіи собо́ри, псало́мски воспле́щемъ рука́ми, печа́льныхъ утѣ́ху, и отча́янныхъ засту́пника, богоно́снаго отца́ Михаи́ла воспои́мъ, боже́ственнаго Христо́ва смире́нія ревни́теля, похвалу́ Вели́каго Нова́града, и всея́ Россíйскія земли́ удобре́ніе, и христіа́номъ всѣ́мъ вездѣ́ промы́сленника, и моли́твами свои́ми подаю́щаго мíру ве́лію ми́лость.

Ины стихи́ры, гла́съ 4. Подо́бенъ: Да́лъ еси́ зна́меніе.

Да́лъ еси́ зна́меніе* боя́щимся Тебе́, Го́споди,* благоче́стія наказа́теля,* возсту́пльшаго на разу́мный сто́лпъ,* преподо́бнаго Михаи́ла,* пра́вдою и му́жествомъ укра́шена,* цѣлому́дрена вои́стинну и добродѣ́тельми превосходя́ща.* Тѣ́мъ мы́ Тебѣ́, Христе́, воспѣва́юще, глаго́лемъ:* моли́твами преподо́бнаго Михаи́ла* спаси́ ду́ши на́ша. [Два́жды.]

Да́лъ еси́ зна́меніе* боя́щимся Тебе́, Го́споди,* со́лнца свѣтлѣ́йша просвѣще́на душе́ю* и Боже́ственными блиста́ніи Россíйскую зе́млю просвѣща́юща,* Михаи́ла вседо́бляго, и преподо́бнаго,* тму́ нече́стія отгоня́ща,* вѣ́рнымъ засту́пника, и помо́щника въ бѣда́хъ и печа́лехъ,* и я́ко отечестволю́бца, и предста́теля,* и моли́твенника о душа́хъ на́шихъ.

Благоуха́етъ ра́ка* честны́хъ твои́хъ моще́й,* богоно́сне Михаи́ле:* Святы́я бо Тро́ицы селе́ніе и благоуха́ніе бы́лъ еси́,* и словесы́ твои́ми богодохнове́нными лю́ди удиви́лъ еси́,* и Россíйскую зе́млю облагоуха́лъ еси́.* И ны́нѣ мо́лимъ тя́:* помяни́ вся́ ны́,* вѣ́рою па́мять твою́ почита́ющія,* ко Го́споду дерзнове́ніе я́ко стяжа́въ, богоно́сне.

Сла́ва, гла́съ 4:

Подоба́етъ Вели́каго Нова́града наро́домъ богоно́снаго Михаи́ла вездѣ́ имѣ́ти, я́ко нѣ́кую у́тварь ца́рскую и сокро́вище некра́домо, всѣ́мъ подаю́ща здра́вія оби́льно бога́тство, всю́ Россíйскую зе́млю во еди́нство совоку́пльша. Къ нему́же возопіе́мъ: преподо́бне о́тче, о ми́рѣ и устрое́ніи всего́ мíра моли́ся и о спасе́ніи ду́шъ на́шихъ.

И ны́нѣ, пра́здника.
[Зри́:] Аще ли внѣ́ попра́зднства: Пое́мъ богоро́дичны во все́й слу́жбѣ свята́го.
Вхо́дъ. Проки́менъ дне́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Егда́ Боже́ственное свы́ше зва́ніе пріи́де на тя́, богоно́сне Михаи́ле, тогда́ си́лою Бо́жіею обрѣ́лся во оби́тели Святы́я Тро́ицы, всѣ́мъ вѣ́рнымъ на по́льзу бы́лъ еси́. Боже́ственное Христо́во смире́ніе возлюби́въ, Ду́ха Свята́го имѣ́я въ се́рдцы твое́мъ, и любо́вію серде́чною подвиза́вся, и тѣ́ло твое́ удручи́въ посто́мъ и бдѣ́ніемъ, ра́дуяся, преподо́бне, вопія́лъ еси́: сла́ва, Человѣколю́бче, Твоему́ смотре́нію!

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Егда́ оте́чества, преподо́бне, удали́лся еси́, тогда́ яре́мъ Госпо́день на ся́ возложи́лъ еси́, и, кре́стъ тво́й взе́мъ, послѣ́довалъ еси́ Христу́, и во юро́дство во́лею преложи́лся еси́ Христа́ ра́ди, и жесто́кое житіе́ на земли́ показа́лъ еси́, и мно́ги си́мъ удиви́лъ еси́. Отону́дуже дарова́нія чуде́съ отъ Христа́ пріи́мъ, ра́дуяся, вопія́лъ еси́: сла́ва, Человѣколю́бче, Твоему́ смотре́нію!

Сти́хъ: Честна́ предъ Го́сподемъ сме́рть преподо́бныхъ Его́.

Егда́ умо́мъ возлетѣ́лъ еси́ отъ земны́хъ на небе́сная, тогда́ невозвра́тнымъ путе́мъ упра́вился еси́ въ Ца́рство небе́сное, е́же и получи́лъ еси́. И та́мо со а́нгелы водворя́яся, предстои́ши Святѣ́й Тро́ицѣ во мно́зѣ дерзнове́ніи и, ра́дуяся, вопіе́ши: сла́ва, Человѣколю́бче, Твоему́ смотре́нію!

Сла́ва, гла́съ 6. Самогла́сенъ:

Преподо́бне о́тче богоно́сне Михаи́ле, во всю́ зе́млю изыдо́ша вѣща́нія твоя́ и въ концы́ вселе́нныя житія́ твоего́ исправле́нія; тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія полки́ разруши́въ, а́нгельскимъ чино́мъ присовокупи́лся еси́, и́хже житію́ я́вѣ поревнова́лъ еси́. Дерзнове́ніе имѣ́я ко Го́споду, ми́ръ испроси́ душа́мъ на́шимъ.

И ны́нѣ, пра́здника.

Тропа́рь преподо́бнаго, гла́съ 8:

Иже на земли́ Христа́ ра́ди во́лею въ бу́йство преложи́вся, мíра сего́ красоты́ отню́дъ возненави́дѣлъ еси́ и, плотска́я игра́нія увяди́въ посто́мъ и жа́ждею и на земли́ лега́ніемъ, отъ зно́я же и сту́дени, отъ дождя́ и снѣ́га и отъ про́чія возду́шныя тя́гости никогда́же уклони́лся еси́, ду́шу же очи́стилъ еси́ добродѣ́тельми, я́ко зла́то въ горни́лѣ, о́тче преподо́бне богоно́сне Михаи́ле, и ны́нѣ на небесѣ́хъ предстои́ши престо́лу Пресвяты́я Тро́ицы. Но я́ко имѣ́я дерзнове́ніе мно́гое, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, праздника, [гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.]


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Посто́мъ и воздержа́ніемъ и на земли́ лега́ніемъ увяди́лъ еси́ плотскíя стра́сти, ду́шу же просвѣти́лъ еси́ и на небесѣ́хъ отъ Христа́ вели́ко воздая́ніе воспрія́лъ еси́. Тѣ́мже, благоугоди́въ Бо́гу, досто́инъ сосу́дъ чуде́съ и по кончи́нѣ яви́лся еси́, всѣ́мъ исцѣле́ніе подае́ши, вѣ́рою притека́ющимъ къ моще́мъ твои́мъ, Михаи́ле преподо́бне. Моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее въ страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Тве́рдаго адама́нта, столпа́ непоколеби́ма вра́жіими прило́ги, богоно́снаго Михаи́ла пѣ́сньми почти́мъ, терпѣ́ніемъ бо вои́стинну посрами́вша проти́внаго врага́, и безъ вѣ́сти сотво́рша, и ны́нѣ моля́щася о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе, сла́ва Твоя́, Богоро́дице, во всѣ́хъ простре́ся ко спасе́нію ду́шъ на́шихъ.

По поліеле́и сѣда́ленъ, гла́съ 8. Подо́бенъ: Прему́дрости.

Госпо́день яре́мъ на ся́ взе́мъ, мона́шествующихъ яви́лся еси́ сто́лпъ и утвержде́ніе и ко Святѣ́й Тро́ицѣ ве́лій моле́бникъ: Христо́вы бо возжелѣ́въ Боже́ственныя за́повѣди, и дѣ́ломъ соверши́лъ еси́, преподо́бне. Тѣ́мже къ ре́вности а́нгельскаго житія́ воздви́глъ еси́ вся́, е́же единому́дренно сла́вити Христа́ Бо́га, богоно́сне Михаи́ле. Его́же моли́ грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Пречи́стая Дѣ́во, Ма́ти Христа́ Бо́га, души́ моея́ стра́сти лю́тыя исцѣли́, молю́ся, и проще́ніе да́руй мои́хъ прегрѣше́ній, я́же безу́мнѣ содѣ́явъ, ду́шу мою́ оскверни́хъ и тѣ́ло окаля́хъ, окая́нный. Увы́ мнѣ́! Что́ сотворю́ въ ча́съ о́ный, внегда́ а́нгели ду́шу мою́ разлуча́тъ отъ убо́гаго моего́ тѣлесе́? Тогда́ помо́щница мнѣ́ бу́ди и предста́тельница: Тебе́ бо и́мамъ наде́жду, ра́бъ Тво́й.

Степе́нна, 1-й антифо́нъ 4-го гла́са. Проки́менъ, [гла́съ 4]: Пра́ведникъ, я́ко фи́никсъ, процвѣте́тъ,* я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего [процвѣту́тъ]. Вся́кое дыха́ніе... Сти́хъ: Хвали́те Бо́га во святы́хъ Его́... Ева́нгеліе отъ Луки́, зача́ло 24.

По 50-мъ псалмѣ́ стихи́ра самогла́сна, гла́съ 6:

Преподо́бне о́тче богоно́сне Михаи́ле, во всю́ зе́млю изыдо́ша вѣща́нія твоя́ и въ концы́ вселе́нныя житія́ твоего́ исправле́нія; тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія полки́ разруши́въ, а́нгельскимъ чино́мъ присовокупи́лся еси́, и́хже житію́ я́вѣ поревнова́лъ еси́. Дерзнове́ніе имѣ́я ко Го́споду, ми́ръ испроси́ душа́мъ на́шимъ.

Кано́нъ преподо́бному Михаи́лу, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Отъ ю́ности, преподо́бне, сосу́дъ избра́нный бы́лъ еси́ Пресвяты́я Тро́ицы, чистоты́ ра́ди житія́ твоего́ благоро́діе оста́вивъ, мона́шескій чи́нъ воспрія́лъ еси́, и, кре́стъ тво́й взе́мъ, Христу́ послѣ́довалъ еси́, и Того́ ра́ди во юро́дство преложи́лся еси́, и вѣнце́мъ отъ Него́ вѣнча́лся еси́, богоно́сне о́тче.

Вся́ умудря́ющему Бо́гу моли́ся, преподо́бне, о рабѣ́ твое́мъ, да отве́рзетъ моя́ устна́ недосто́йная и да подви́гнетъ мо́й язы́къ ко́сный, тѣсноту́ же и худогла́сіе, о́тче, да разве́рзетъ дѣ́йствомъ Свята́го Ду́ха къ пѣ́нію чуде́съ твои́хъ.

Богоглаго́ливымъ проро́комъ то́ченъ и богови́дцемъ апо́столомъ нра́вомъ уподо́бився, и́же до тре́тіяго небесе́ возше́дшаго услы́шавъ, глаго́люща: мы́ юро́ди Христа́ ра́ди. И ты́, преподо́бне, сія́ услы́шавъ, юро́дъ на земли́ бы́лъ еси́ Христа́ ра́ди, безче́стіе и укори́зны претерпѣ́въ, че́сти въ Ца́рствіи небе́снѣмъ сподо́бился еси́.

Богоро́диченъ: Мои́хъ прегрѣше́ній, Влады́чице, плени́цу расто́ргни, Твоего́ Сы́на и Бо́га моля́щи, и томя́щій мя́ грѣ́хъ, Приснодѣ́во, низложи́, я́ко да воспѣва́ю Тя́ всегда́, Всенепоро́чная, Тобо́ю спаса́емь.

Кано́нъ другíй преподо́бнаго Михаи́ла, его́же краегране́сіе у червле́ныхъ слове́съ: [Въ ца́рство благочести́ваго христолюби́ваго царя́ Іоа́нна всея́ Россíи самоде́ржца, повелѣ́ніемъ влады́ки (и) благослове́ніемъ Мака́рія, святѣ́йшаго архіепи́скопа богоспаса́емыхъ градо́въ Вели́каго Новагра́да и Пско́ва, благода́рное сіе́ пѣ́ніе принесе́ся всепреподо́бному Михаи́лу Кло́потъ христолюби́вому руко́ю пресви́тера Иліи́]. Гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Въ Ца́рство небе́сное у́зкимъ и приско́рбнымъ путе́мъ по за́повѣди Влады́ки своего́ Христа́, преподо́бне о́тче Михаи́ле, ше́дъ, широ́кій и простра́нный пу́ть возненави́дѣлъ еси́. Распросте́ршійся мра́къ ума́ моего́ отжени́, да возмогу́ ма́лое сіе́ моле́ніе принести́ въ пресвѣ́тлую па́мять твою́.

Благочести́ваго ко́рене пресвѣ́тлая о́трасль, всю́ мы́сль твою́ Бо́гу возложи́лъ еси́ отъ младе́нства и, кре́стъ тво́й взе́мъ, невозвра́тнымъ путе́мъ Тому́ послѣ́довалъ еси́, и, по апо́столу, духо́вную му́дрость стяжа́въ, е́же е́сть бу́йство Христа́ ра́ди, вся́чески отрѣва́я отъ себе́ тщесла́віе.

Христолюби́ваго царя́ въ жи́зни се́й богомо́лецъ бы́лъ еси́: ны́нѣ предстоя́ Святѣ́й Тро́ицѣ во мно́зѣ дерзнове́ніи, моли́ся, преподо́бне о́тче, о держа́вѣ его́, изба́витися отъ нахожде́нія иноплеме́нныхъ вели́кія Россíи христолюби́вымъ лю́демъ, пѣ́снь Бо́гу возсыла́ющимъ.

Іоа́нна, списа́вшаго Лѣ́ствицу, нра́вомъ уподо́бился еси́, мона́шескій чи́нъ возлюби́въ, на безстра́стія го́ру возше́дъ, и сего́ ра́ди невозбра́ненъ восхо́дъ къ небеси́ обрѣ́лъ еси́ и, въ небе́сная врата́ дости́гъ, въ го́рнѣмъ Іерусали́мѣ всели́лся еси́, идѣ́же веселя́щихся всѣ́хъ жили́ще, пѣ́снь Бо́гу возсыла́ющихъ.

Тро́иченъ: Рече́нія Боже́ственная и проро́чествія, я́же издре́вле по́мняще я́вѣ, Богонача́льное Естество́ еди́нственное сла́вимъ, Присносу́щное, Безнача́льное, въ Тре́хъ Ли́цѣхъ: Отцѣ́, и Сы́нѣ, и Ду́сѣ содѣ́тельное, всеси́льное.

Богоро́диченъ: Неискусобра́чно Христа́ родила́ еси́, е́же по на́мъ, на́съ ра́ди воспріе́мша естество́, Пречи́стая, и непрело́жна во обою́ пребы́вша. Его́же моли́ непреста́нно грѣхо́въ мои́хъ дарова́ти и искуше́ній избавле́ніе.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Ка́меню вѣ́ры, Петру́ апо́столу уподо́бився, распя́лся еси́ мíрови во все́й жи́зни твое́й, преподо́бне Михаи́ле, и, но́ги твоя́ невозвра́тно къ небе́сному ше́ствію упра́вивъ, го́рняго Іерусали́ма дости́глъ еси́. Со святы́ми предстоя́ Святѣ́й Тро́ицѣ, моли́ о на́съ Еди́наго Человѣколю́бца.

Иліину́ ре́вность воспріе́мъ, преподо́бне, не возмого́ша бо ни преще́нія, ни моле́нія согрѣша́ющихъ тебе́ увѣща́ти, е́же тѣ́хъ, непреподо́бнѣ содѣ́янныхъ, не облича́ти, не предста́лъ еси́ у́бо, сіе́ творя́, до́ндеже коне́чнѣ о́ныя испра́вилъ еси́.

Храни́тель бу́ди вели́кія Россíи христолюби́выхъ люде́й, богоно́сне о́тче Михаи́ле, избавля́я враго́въ наше́ствія, гла́да же и па́губы, да твои́ми моли́твами ко Христу́ Бо́гу изба́вльшеся, тебе́ вси́ я́ко засту́пника почита́емъ.

Богоро́диченъ: Во ины́хъ жена́хъ ма́ти, до́ндеже дѣ́ва, не позна́ся, ни ма́ти по рождествѣ́ дѣ́вствовати сподо́бися, на Тебѣ́ же, Дѣ́во, обоя́ устро́ишася. Тѣ́мъ весе́ліемъ ду́ха воспѣва́ю: нѣ́сть непоро́чны, па́че Тебе́, Влады́чице.

Инъ.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Всея́ Россíи ве́лій чудотво́рецъ, преподо́бне, бы́лъ еси́ и проро́ческаго вели́каго да́ра сподо́бился еси́, сказа́въ безвѣ́стная и та́йная. Изба́ви ны́ отъ та́йныхъ прегрѣше́ній и помышле́ній лука́выхъ, да чи́стымъ се́рдцемъ Христу́ возопіе́мъ: я́ко нѣ́сть свя́тъ, па́че Тебе́, Человѣколю́бче.

Самоде́ржца, — ре́клъ еси́, — благочести́ваго вели́каго кня́зя во́ли покори́теся, — проро́чески вѣща́въ, блаже́нне, — о му́жіе Вели́каго Нова́града! Та́ко бо подоба́етъ, и та́ко угоди́ся судьба́мъ Бо́жіимъ бы́ти: а́ще же не послу́шаете, злѣ́ поги́бнете. Еже и бы́сть отъ Бо́га на́мъ въ наказа́ніе.

Повелѣ́ніемъ Влады́ки Христа́, о́тче, послѣ́дствуя, кро́токъ и смире́нъ и всѣ́мъ вся́къ бы́лъ еси́ подо́бникъ, вселе́нныя учи́телю, и предъ кня́зи, не стыдя́ся, е́же о благоче́стіи и е́же судьба́мъ Бо́жіимъ го́дѣ, предвари́въ бу́дущее, я́сно сказа́лъ еси́.

Благослове́ніемъ твои́мъ то́щія жи́тницы испо́лнилъ еси́ жи́та, и ктому́ про́чее не истощи́шася; и оляденѣ́вшія иногда́ люде́й ни́вы душе́вныя очи́стилъ еси́ и плодоно́сны сотвори́лъ еси́, и непло́дный у́мъ мо́й плодоно́сенъ сотвори́.

Тро́иченъ: Отъ Еди́наго Отца́, я́ко отъ ума́ рожде́ннаго Сло́ва, и Ду́ха, происходя́ща неизглаго́ланно, по коему́ждо помышле́ніи и пи́сменными уче́ніи пости́гше, Еди́наго Бо́га Трисо́лнечнаго почита́емъ.

Богоро́диченъ: Хра́мъ яви́лася еси́ чи́стъ, Дѣ́во Ма́ти Марíе, вся́ всеси́льно и мудрососта́вльшаго Христа́ и въ чину́ поло́жшаго и нося́щаго. Его́же ми́лостива мнѣ́ сотвори́ ма́терними Твои́ми моли́твами.

Сѣда́ленъ, гла́съ 8. Подо́бенъ: Прему́дрости.

Отъ земны́хъ на небе́сная помы́сливъ и дѣ́ломъ соверши́въ ко Христу́ любо́вь, и, подо́бно мо́лніи, отъ восто́ка до за́пада восходя́щей ско́ростію, я́ко и́ный Авваку́мъ, о́тче, несе́нный а́нгеломъ съ пи́щею въ Вавило́нъ прекорми́ти Даніи́ла проро́ка, въ ро́вѣ затворе́на, дости́глъ еси́, преподо́бне, оби́тели Святы́я Тро́ицы, и промышля́лъ еси́ въ жи́зни се́й о поле́зныхъ мно́жественныхъ, и, а́лчущія ду́ши накорми́въ мона́ховъ пи́щею неги́блющею, въ Ца́рствіе небе́сное руково́ждствовалъ еси́, идѣ́же пра́ведно пресвѣ́тлымъ вѣнце́мъ вѣнча́лся еси́, блаже́нне. И ны́нѣ, о́тче Михаи́ле, моли́ Христа́ Бо́га согрѣше́ній оставле́ніе дарова́ти пра́зднующимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Пѣ́снь воспѣ́лъ еси́ Бо́гу безпреста́ни и слу́хъ тво́й къ Нему́ приклони́лъ еси́. Яко имѣ́я дерзнове́ніе мно́го, и моли́твами твои́ми, о́тче, совѣ́тующихъ на Правосла́віе мы́сли и совѣ́ты разори́, и Благовѣ́рнаго Импера́тора на́шего вооружи́ на ва́рвары побѣ́дою, и междоусо́бныя бра́ни умири́.

Яко со́лнце, отъ восто́ка возсія́въ во оби́тели Святы́я Тро́ицы среди́ мно́жества мона́ховъ, просвѣти́лъ еси́ су́щія во тмѣ́ невѣ́дѣнія и юро́дъ бы́лъ еси́ Христа́ ра́ди, хотя́ утаи́тися. Не бо́ укры́ется, рече́, гра́дъ, верху́ горы́ стоя́, ни вжига́ютъ свѣти́льника и подъ спу́домъ полага́ютъ.

Яко пресвѣ́тлое свѣти́ло, возсія́лъ еси́, и, я́ко фи́никсъ, въ дому́ Святы́я Тро́ицы проро́чески процвѣ́лъ еси́, богоно́сне Михаи́ле, и, я́ко денни́ца, предъ Со́лнцемъ пра́вды, Христо́мъ, просія́лъ еси́, и жи́ву же́ртву са́мъ себе́ Влады́цѣ прине́слъ еси́, о́тче преблаже́нне.

Богоро́диченъ: До́брыхъ всѣ́хъ обнажи́хся и лежу́ въ зло́бѣ: но, Ро́ждшая Обле́кшаго въ нетлѣ́ніе вся́, дре́вле во тлю́ па́дшія, и мене́ ны́нѣ пре́жними украси́ и вторы́хъ изба́ви, Богоневѣ́сто.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Мака́рія Вели́каго, па́че естества́ а́нгельское житіе́ на земли́ пожи́вшаго, сего́ посту́ и бдѣ́нію, и на земли́ лега́нію, и про́чимъ добродѣ́телемъ, о́тче Михаи́ле, поревнова́лъ еси́ и, я́ко со́лнце, въ Россíйстѣй земли́ возсія́лъ еси́, моли́ о на́съ Еди́наго Человѣколю́бца.

Святѣ́йшаго архіепи́скопа Евѳи́мія поуче́ніемъ и духо́внымъ наказа́ніемъ вельми́ внима́я, но скрыва́яся юро́дствомъ Христа́ ра́ди въ жи́зни се́й, блаже́нне, ра́зума духо́внаго испо́лненный, Христу́ взыва́лъ еси́: си́лѣ Твое́й сла́ва, Человѣколю́бче.

Богоспаса́емыхъ христолюби́выхъ люде́й и мона́ховъ мно́жества ра́дости испо́лнилъ еси́ и духо́внаго весе́лія твои́мъ ди́внымъ и чрезъесте́ственнымъ, я́ко во еди́номъ часѣ́ прихожде́ніемъ во оби́тель Святы́я Тро́ицы, богоно́сный Михаи́ле, Христу́ взыва́я: си́лѣ Твое́й сла́ва, Человѣколю́бче.

Градо́въ высоча́йшаго Вели́каго Нова́града наро́ди моли́твенника тя́ те́пла иму́ще, и ско́раго помо́щника, и я́ко стѣ́ну тве́рду, и забра́ло необори́мо, и воево́ду крѣ́пка и непобѣди́ма, мо́лятъ: не забу́ди моли́твенникъ твои́хъ, избавля́я ны́ отъ вся́кія ну́жды и печа́ли.

Тро́иченъ: Содержи́тельная всѣ́хъ су́щихъ, Неви́димая, Всеще́драя, Благоутро́бная, Человѣколюби́вая, Тро́ице Честна́я и Богонача́льная, не забу́ди мене́, Твоего́ раба́, Бо́же, вконе́цъ, ниже́ разори́, и́же завѣща́лъ еси́ Твои́мъ рабо́мъ завѣ́тъ за неизрече́нную ми́лость.

Богоро́диченъ: Кра́сную Тя́, Всечи́стая, еди́ну обрѣ́тъ отъ вѣ́ка добро́ту Іа́ковлю, Пребезнача́льное Сло́во и всели́ся въ Тя́ благоутро́бія ра́ди, обнови́ человѣ́ческое естество́. Его́же моли́ непреста́нно отъ вся́кія мнѣ́ изба́витися ско́рби.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Хода́тай непреста́ненъ, о́тче, бу́ди о на́съ ко Пресвятѣ́й Тро́ицѣ съ ли́ки святы́хъ, и́хже ты́ жи́тельству поревнова́лъ еси́. Моли́ся, мо́лимъ тя́, о ми́рѣ и о устрое́ніи всего́ мíра, да ти́хо и безмо́лвно житіе́ поживе́мъ въ вѣ́цѣ се́мъ и въ бу́дущемъ жи́знь вѣ́чную получи́мъ.

Преподо́бне о́тче Михаи́ле, въ по́стницѣхъ вели́къ бы́въ во оби́тели, идѣ́же мона́шеское житіе́ проходи́лъ еси́, еди́нощи въ седми́цѣ вкуша́я хлѣ́ба и воды́ съ воздержа́ніемъ, и всю́ жи́знь твою́ та́ко сконча́лъ еси́.

Во́лею, преподо́бне, преложи́вся во юро́дство Христа́ ра́ди, ско́рби и бѣды́ претерпѣ́лъ еси́, поруга́нія, и укори́зны, и доса́ды. Му́ченицы бо въ ма́лѣ вре́мени Христа́ ра́ди пострада́ша, ты́ же, о́тче, всю́ жи́знь твою́ му́ченически сконча́въ, и того́ ра́ди сугу́бу мзду́ на небесѣ́хъ воспрія́лъ еси́.

Богоро́диченъ: Упра́ви у́мъ мо́й, Влады́чице, тружда́ющійся въ пучи́нѣ скорбе́й и потопля́емый наше́ствіемъ тлетво́рныхъ страсте́й. Спаси́, Богоро́дице, къ Тебѣ́ прибѣга́ющаго: ины́я бо по́мощи, Чи́стая, ра́звѣ Тебе́, не зна́емъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Вели́каго Нова́града наро́ди, въ пречестну́ю па́мять богоно́снаго отца́ Михаи́ла моли́твы со слеза́ми пролива́юще, глаго́лютъ: о пречестны́й о́тче, я́коже не да́лъ еси́ въ расхище́ніе оби́тели, та́ко и оклевета́ющія на́съ смири́ и пути́ на́ша напра́ви, мо́лимся!

Іоа́нна Крести́теля у́зкимъ и приско́рбнымъ путе́мъ ходи́ти произво́лилъ еси́, жесто́кое на земли́ житіе́ пожи́въ, я́ко безпло́тенъ, во юро́дство преложи́лся еси́ Христа́ ра́ди. Его́же моли́, преподо́бне, во тмѣ́ грѣха́ низлежа́щаго мя́ воздви́гнути.

Преподо́бно и свя́то на земли́ житіе́ пожи́въ, посто́мъ и бдѣ́ніемъ, и на земли́ лега́ніемъ, и про́чими добродѣ́тельми мона́шеское житіе́ проше́дъ, о́бразъ бы́лъ еси́ яре́мъ Госпо́день на ся́ взе́мшимъ и Христу́ послѣ́довавшимъ, пу́ть мо́й напра́ви, молю́ся.

Ско́ростію, богоно́сный о́тче, явля́яся, отъ бѣ́дъ избавля́я, подо́бяся свѣтоза́рному со́лнцу, на безмѣ́рной высотѣ́ сія́ющу и обходя́щу всю́ вселе́нную во еди́номъ дни́, ты́, преподо́бне, па́че человѣ́ка въ жи́зни се́й Бо́гу, су́щему въ вы́шнихъ, тва́рь всю́ созда́вшему, послужи́лъ еси́.

Тро́иченъ: Дрема́ніемъ отягче́на мя́ грѣхо́внымъ и порѣва́ема въ со́нъ сме́ртный, я́ко Человѣколюби́вая, и Всеблага́я, и Всеми́лостивая, Богонача́льная Тро́ице Свята́я, уще́дри и возста́ви мя́.

Богоро́диченъ: Ма́ти Дѣ́во Отрокови́це, Пречи́стая, Всенепоро́чная, Богоблагода́тная, Твои́ми моли́твами Сы́на и Бо́га и Го́спода ми́лостива сотвори́ мнѣ́ и страсте́й и прегрѣше́ній Твоего́ раба́ изба́ви вско́рѣ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Ны́нѣ честны́я мо́щи твоя́, лежа́ще во оби́тели Святы́я Тро́ицы, въ не́йже еще́ въ жи́зни се́й мно́го потруди́лся еси́, врачева́нія мно́гая источа́ютъ съ вѣ́рою приходя́щимъ. Тѣ́мже мо́лимъ тя́, о́тче: и душе́вныя стра́сти, и неду́ги исцѣли́ тебе́ сла́вящихъ.

Бе́здна, грѣхо́въ испо́лнена, а́зъ, и твоя́ моли́тва, я́ко кади́ло благово́нно, испра́вися предъ Бо́гомъ. Ны́нѣ молю́ тя́, преподо́бне о́тче: бе́здну грѣхо́въ мои́хъ истреби́, и буя́ющее мо́ре зла́го пія́нства изсуши́, и напое́ніе гнѣ́вное отжени́, цѣлому́дренный у́мъ, богоно́сный Михаи́ле.

Да́ждь ми́, Христе́, ра́зумъ терпѣ́нія, е́же не осужда́ти согрѣша́ющихъ киче́ніемъ фарисе́йскимъ, но, я́ко мытаре́во, мое́ покая́ніе пріими́ и, я́ко блу́днаго сы́на, Бо́же, ве́чери Твоея́ досто́йна мя́ яви́ моли́твами преподо́бного Михаи́ла.

Богоро́диченъ: Обветша́вшія ны́ го́рькимъ дре́ва пре́жде вкуше́ніемъ и па́дшія поползе́ніемъ, Пречи́стая, обнови́ла еси́, Зижди́теля ро́ждши, Сло́во Ѵпоста́сное, Дѣ́во Ма́ти Влады́чице.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Васи́лія Вели́каго поуче́ніе въ се́рдцы твое́мъ воспрія́лъ еси́, бу́рею грѣха́ не погрузи́вся и въ ти́хое приста́нище дости́гъ Ца́рствія небе́снаго, кора́бль душе́вный съ некра́домымъ бога́тствомъ соблю́лъ еси́, о́тче, и на́съ отъ сме́ртныя глубины́ возведи́.

Благода́рное сіе́ пѣ́ніе, приноси́мое тебѣ́, не пре́зри, о́тче, но па́че пріими́ и ра́дости духо́вныя испо́лни на́съ, да безъ закоснѣ́нія поклони́мся ра́цѣ, идѣ́же лежа́тъ честны́я мо́щи твоя́, исцѣле́ніе всѣ́мъ да́рующе.

Принесе́ся моли́тва твоя́ и сле́зы къ Бо́гу, я́ко благоуха́нный ѳиміа́мъ и же́ртва непоро́чна и благопрія́тна, и мене́ не забу́ди хода́тайствомъ твои́мъ ко Пресвятѣ́й Тро́ицѣ, и да́ждь ми́лость ненави́дящимъ мя́ и вражду́ющимъ ми́, и отъ сме́ртныя глубины́ изба́ви ны́.

Всепреподо́бному житію́ поревнова́лъ богоно́сныхъ отце́въ, отъ вѣ́ка богоуго́дно пожи́вшихъ, о́тче Михаи́ле, и во юро́дствѣ Христа́ ра́ди всю́ жи́знь твою́ му́ченически сконча́вый, бу́йство нелѣ́пое отъ мене́ отжени́.

Тро́иченъ: Вседержи́телю Бо́же и Еди́не Неопредѣле́нный, всели́ся въ мя́ за неизрече́нную ми́лость, Трисо́лнечный Влады́ко, и озари́ мя, и вразуми́, я́ко Благоутро́бенъ.

Богоро́диченъ: Хра́мъ яви́лася еси́ Бо́га Невмѣсти́маго, Пречи́стая, хра́мъ и мене́ Того́ покажи́ Боже́ственныя благода́ти, Пресвята́я Влады́чице, Твои́ми мольба́ми и соблюди́ невреди́ма.

Конда́къ, гла́съ 8. Подо́бенъ: Взбра́нной.

Ду́ха Свята́го си́лою уподо́бился еси́ богоглаго́ливымъ дре́внимъ проро́комъ, сказа́въ безвѣ́стная и та́йная, и е́же го́дѣ судьба́мъ Бо́жіимъ въ сбытіе́, и и́на мно́га чудеса́ о Христѣ́ сотвори́въ, и лю́ди удиви́въ, торжествова́ти устро́илъ еси́ вопію́щія: сла́ва Бо́гу, прославля́ющему святы́я Своя́.

Икосъ:

Уподо́бился еси́ проро́ку Авваку́му, о́тче, восхище́нъ си́лою Бо́жіею, я́ко на о́блацѣ, отъ дале́че страны́, и обрѣ́лся еси́ во оби́тели Святы́я Тро́ицы. Онъ бо отъ Іерусали́ма а́нгеломъ несе́нъ бы́сть съ пи́щею въ Вавило́нъ и та́мо прекорми́ Даніи́ла проро́ка и вселе́нную удиви́, ты́ же лю́ди твоя́ возвесели́лъ еси́ чуде́съ дѣ́йствомъ, и мно́жество мона́ховъ твоему́ житію́ удиви́шася, и послѣ́дствующихъ тебѣ́ прекорми́лъ еси́ я́дію неги́блющею, но пребыва́ющею въ жи́зни вѣ́чнѣй, вопію́щія Бо́гу: сла́ва Прославля́ющему святы́я Своя́.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Богопроти́вніи лю́діе ерети́ческая му́дрствующіи, зло́бою содержи́ми, распыха́хуся сердцы́ свои́ми, ви́дяще на́съ, почита́ющихъ честны́я мо́щи твоя́ и благода́рственно Христу́ взыва́ющихъ: Сы́й благослове́нъ и препросла́вленъ.

Свѣ́тъ трисія́ненъ Пребоже́ственныя Тро́ицы въ се́рдцы твое́мъ жили́ще Себѣ́ содѣ́ла. Отту́ду напо́лнився Ду́ха Свята́го, богоно́сне о́тче, ерети́ческое ополче́ніе омрачи́лъ еси́, просвѣти́лъ же еси́ собо́ръ правосла́вныхъ, вѣ́рою Христу́ Бо́гу пою́щихъ: Сы́й благослове́нъ и препросла́вленъ.

Сокруши́, преподо́бне Михаи́ле, мы́шцы враго́въ мы́сленныхъ, востаю́щихъ на мя́, и лу́ки и́хъ сломи́, и стрѣ́лы притупи́ моли́твами твои́ми, я́ко дерзнове́ніе ве́ліе имѣ́я къ Бо́гу, да возмогу́ пѣ́ти: Сы́й благослове́нъ и препросла́вленъ.

Богоро́диченъ: Пе́щь прообразова́ше Твое́ Рождество́, Всенепоро́чная, отроко́въ бо не опали́, я́коже бо ни ложе́снъ Твои́хъ о́гнь Боже́ственный. Тѣ́мже мо́лимъ Тя́: огня́ вѣ́чнаго изба́ви на́съ, Дѣ́во Богома́ти Влады́чице.

Инъ.

Ирмо́съ: На по́лѣ Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́йже три́ о́троки пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Михаи́ла, вели́каго архистрати́га, первостоя́теля престо́лу Пресвяты́я Тро́ицы, тезоимени́тство стяжа́въ, всѣ́мъ небе́снымъ невеще́ственнымъ си́ламъ сообща́ешися, преподо́бне о́тче, съ ни́ми Христу́ взыва́я: отце́въ Бо́же, благослове́нъ еси́.

Кло́потъ де́монскій креста́ зна́меніемъ нея́вственъ сотвори́лъ еси́, и клоко́щущееся мо́ре жите́йское волна́ми суе́тъ скорѣ́е еле́нскія бо́рзости прескочи́лъ еси́, и въ пру́дныхъ мѣ́стѣхъ грѣха́ не потопи́лся еси́, богоно́сный о́тче, поя́ Христу́: отце́въ Бо́же, благослове́нъ еси́.

Христолюби́вому кня́зю, прише́дшу во оби́тель Святы́я Тро́ицы и мы́сль свою́ исповѣ́давшу ти́, е́же воздви́гнути хра́мъ Святы́я Тро́ицы во оби́тели твое́й, ему́же, о́тче, я́сно сказа́лъ еси́: а́ще сотвори́ши сіе́, вся́кое жела́ніе благо́е получи́ши, е́же и бы́сть. Тѣ́мже Христу́ взыва́лъ еси́: отце́въ Бо́же, благослове́нъ еси́.

Ско́ръ помо́щникъ бы́лъ еси́, преподо́бне, еще́ въ жи́зни се́й во оби́тели Святы́я Тро́ицы: дале́че бо въ мо́ри купцу́ съ корабле́мъ потопля́ему и тебе́ призва́вшу на по́мощь, и, я́ко мо́лнія, ско́ростію по вода́мъ ходя́, сего́ изба́вилъ еси́ отъ потопле́нія.

Тро́иченъ: Умъ нерожде́нный Оте́цъ, и отъ Него́ Сло́во ро́ждшееся, и Ду́хъ Боже́ственный, непости́жнѣ исхо́денъ сы́й, Бо́же Единонача́льне Трисо́лнечне, пою́ Тебѣ́: благослове́нъ еси́, Бо́же оте́цъ на́шихъ.

Богоро́диченъ: Умерщвле́нъ бы́хъ, Пречи́стая, грѣхо́внымъ я́домъ напое́нъ, и притека́ю къ Тебѣ́ вѣ́рою, ро́ждшей Нача́льника живота́: Твои́ми моли́твами раба́ Твоего́ оживи́ и искуше́ній и страсте́й изба́ви, Еди́на Чи́стая.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Приноси́маго тебѣ́ моле́нія, преподо́бне о́тче Михаи́ле, отъ мно́жества твоему́ житію́ послѣ́дствующихъ не пре́зри, но, со усе́рдіемъ пріи́мъ, вся́ ны́ спаси́, Христу́ вопію́щія: благослови́те, вся́ дѣла́ Госпо́дня, Го́спода.

Имѣ́я Ду́ха Свята́го въ се́рдцы твое́мъ, я́ко еди́нъ богоглаго́ливыхъ дре́внихъ проро́къ, бу́дущая явле́нно человѣ́комъ сказа́лъ еси́, и въ настоя́щее сіе́ вре́мя да́руй Благочести́вому Импера́тору на́шему на ва́рвары побѣ́ду, богоно́сне о́тче.

Отъ земны́хъ къ небе́снымъ оби́телемъ пресла́вно возше́лъ еси́, богоно́сне о́тче Михаи́ле, и та́мо, преподо́бныхъ че́сти сподо́бився, предстои́ши Святѣ́й Тро́ицѣ и зри́ши Неизрече́нная, и́хже о́ко не ви́дѣ, и у́хо не слы́ша, и на се́рдце человѣ́ку не взы́де, я́же угото́ва Бо́гъ лю́бящимъ Его́.

Богоро́диченъ: Вели́кому та́инству рождества́ Твоего́ кто́ не удиви́тся, Богоро́дице, или́ кíй язы́къ земны́хъ, или́ у́мъ безпло́тныхъ изрещи́ возмо́жетъ? Па́че бо естества́ и смы́сла, Богоро́дице, Зижди́теля всѣ́хъ родила́ еси́.

Инъ.
Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Волну́ющійся мо́й у́мъ нелѣ́пыми страстьми́ и помышле́ніи исцѣли́, преподо́бне, и коле́блющееся се́рдце мое́ утверди́, и смуща́ющія вѣ́тры ду́шу мою́ утиши́, да сла́влю Христа́, Содѣ́теля всѣ́хъ во вѣ́ки.

Руко́ю содержа́щаго всю́ тва́рь Бо́га и человѣ́ка созда́вшаго, честнѣ́йша всея́ тва́ри, за́повѣди, преподо́бне, соверши́лъ еси́, богоуго́дно на земли́ жи́знь твою́ живя́ и во юро́дство Христа́ ра́ди во́лею преложи́вся, го́рдость и тщесла́віе отъ себе́ отри́нулъ еси́, пѣ́снь воспѣва́я Содѣ́телю всѣ́хъ во вѣ́ки.

Пресви́тера ди́внаго о́наго во у́жасъ приве́лъ еси́ твои́мъ ди́внымъ и чрезъесте́ственнымъ прехожде́ніемъ во оби́тель Святы́я Тро́ицы. О, чу́до! Ка́ко обрѣ́лся еси́ вну́трь хра́ма, со вся́кимъ утвержде́ніемъ заключе́на, Ду́ху Свято́му сія́ дѣ́йствующу?

Иліи́ огнено́сному, изря́дному проро́ку, огнедохнове́нному уму́, начерта́вшему Тро́ическую си́лу, уподо́бился еси́, преподо́бне о́тче Михаи́ле, благоче́стія ре́вностію вся́чески, и па́ки во юро́дство Христа́ ра́ди преложи́ся, но добродѣ́тель утаи́тися не возмо́же.

Тро́иченъ: Господонача́ліе Безнача́льное, Всеси́льну, и Пребла́гу, Совершеннонача́льну, Благодѣ́йственну, Неопредѣ́льну, Ви́ну невино́вну, твори́тельну, Присносу́щну, Промысли́тельну и Спаси́тельную всѣ́хъ Еди́ницу по Существу́ и Тро́ицу Ли́цы, сла́влю Тя́, Бо́же мо́й, вѣ́рно во вѣ́ки.

Богоро́диченъ: На земли́ возсія́ Невече́рнее Со́лнце Рождество́мъ, е́же изъ Тебе́, дѣ́вственнымъ, Пречи́стая Влады́чице, и человѣ́ки изба́ви отъ и́дольскаго помраче́ннаго мра́ка. Тѣ́мже и ны́нѣ мя́ па́че того́ Богонача́лія озари́ луча́ми и соблюди́ Твоего́ раба́.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Пахо́мія Вели́каго чи́ну а́нгельскому и житію́ подража́въ, равноа́нгельно во оби́тели Святы́я Тро́ицы пожи́лъ еси́, тѣ́мже и равноа́нгельну по́честь отъ Бо́га сподо́бился еси́ прія́ти. Мы́ же вси́ благоче́стно тя́ ублажа́емъ, богоно́сне о́тче Михаи́ле.

Путе́мъ ходя́, веду́щимъ въ Ца́рство небе́сное, преподо́бно на земли́ житіе́ пожи́лъ еси́ и, въ бу́йство Христа́ ра́ди во́лею преложи́вся, мра́зомъ и зно́емъ и на земли́ лега́ніемъ, алка́ніемъ и жа́ждею тѣ́ло твое́ удручи́лъ еси́, ду́хъ же возвесели́лъ еси́. Тѣ́мже тя́ вси́ благоче́стно ублажа́емъ.

Моле́ній и пѣ́ній гла́сы услы́ши, богоно́сне о́тче Михаи́ле: къ вѣ́рѣ же и любви́ вонми́ Вели́каго и Христолюби́ваго Импера́тора на́шего [и́мярекъ] и христолюби́выхъ люде́й и, я́ко отечестволю́бецъ, побори́ враги́, о́тче, вою́ющія на ны́, свы́ше благода́тію покрыва́я хва́лящія тя́.

Богоро́диченъ: Исцѣли́ла еси́ сокруше́ніе, Всенепоро́чная, и дре́внія стра́сти земны́хъ, Бо́га поро́ждши, Царя́ Христа́, поне́сшаго пло́тію неду́ги на́ша, тѣ́мже Тя́ вси́ ро́ди, Дѣ́во Влады́чице, ублажа́юще, Богоневѣ́сто, велича́емъ.

Инъ.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Мы́сленное мо́ре страсте́й успи́въ поще́ніемъ и чу́вственныя воды́ разлива́нія мно́га, е́зера Ильме́ня сверѣ́по волну́емы во́лны и жестокодыха́ющія вѣ́тры сло́вомъ укроти́лъ еси́, на пу́ть ми́ра напра́ви ны́.

Жи́лами слове́съ твои́хъ удави́лъ еси́ змíя, хва́лящагося ве́сь мíръ поглоти́ти, и те́плыми слеза́ми твои́ми къ Бо́гу о́гненное его́ дыха́ніе погаси́лъ еси́, и безъ вѣ́сти сотвори́лъ еси́, того́ зія́нія, преподо́бне, изба́ви и на пу́ть мíра напра́ви ны́.

Яко Моисе́й богови́децъ, чудодѣ́йствуя, преподо́бне, моли́твою во́ду изъ земли́ изве́лъ еси́, я́же, я́коже рѣка́, оби́льно всю́ оби́тель напая́ше, и съ пли́нѳами и ка́меніемъ ладіи́, плову́щія на созда́ніе це́ркве Святы́я Тро́ицы, въ ти́хое приста́нище приве́лъ еси́, и на пу́ть ми́ра напра́ви ны́.

Преподо́бне богоно́сне о́тче Михаи́ле, я́коже не да́лъ еси́ муже́мъ кро́ве и льсти́ въ расхище́ніе оби́тели, въ не́йже мона́шеское житіе́ проходи́лъ еси́, та́ко оклевета́ющія на́съ смири́, и грѣхо́вную печа́ль отжени́, и сердца́ на́ша ра́дости испо́лни, и на пу́ть ми́ра напра́ви ны́.

Тро́иченъ: Еди́но Госпо́дство и Трисія́нное, еди́нственное Богонача́ліе Трисо́лнечное, пѣвцы́ пріими́ Твоя́ боголѣ́пно, и прегрѣше́ній изба́ви и искуше́ній лю́тыхъ, и вско́рѣ ми́ръ пода́ждь человѣколю́бно и Це́рквей соедине́ніе, и на пу́ть ми́ра напра́ви ны́.

Богоро́диченъ: Во утро́бу, Христе́ Спа́се мо́й, дѣ́вственную всели́вся, яви́лся еси́ мíру всему́ богому́жно, Неизмѣ́ненъ, Неслія́ненъ вои́стинну, и обѣща́лъ еси́ всегда́ съ Твои́ми рабы́ бы́ти я́вѣ. Тѣ́мже Тебе́ Ро́ждшія моли́твами ми́ръ мíру Твоему́ устро́й и на пу́ть ми́ра напра́ви ны́.

Свѣти́ленъ. Подо́бенъ: Проро́цы.

Пресвѣ́тлый свѣти́льникъ неугаси́мый, отъ восто́ка мы́сленнаго Со́лнца, Христа́, я́ко свѣтоза́рная луча́, возсія́въ, мра́чную страну́ на за́падѣ и сѣ́верѣ просвѣти́лъ еси́ свѣ́тлостію слове́съ и добродѣ́тели дѣя́ніемъ, Ему́же не преста́й моля́ся, е́же въ ми́рѣ сохрани́ти, Михаи́ле преподо́бне, па́мять твою́ почита́ющія. [Два́жды.]

Сла́ва, и ны́нѣ, пра́здника или́ богоро́диченъ:

Прему́дрость Ѵпоста́сную, и Пресу́щное Сло́во, и Врача́ всѣ́хъ ро́ждшая, Всечи́стая Богоро́дице, гное́нія и я́звы исцѣли́ ду́шъ на́шихъ и сохраня́й невре́дны вся́каго враго́въ нахо́да всегда́ Тя́ моля́щія, Засту́пнице мíра Блага́я.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Въ не́мощнѣмъ тѣлеси́, я́ко безпло́тенъ,* усе́рдно тебе́ сама́го Бо́гу возложи́въ,* преподо́бне Михаи́ле,* всю́ жи́знь твою́ му́ченически Христо́вы ра́ди любве́ сконча́лъ еси́,* плотскíя стра́сти препобѣди́лъ еси́* и ве́лій чудотво́рецъ бы́лъ еси́.* Того́ ра́ди зове́мъ Христу́:* спаси́, Бо́же, ду́ши на́ша, я́ко Благоутро́бенъ.

О, пресла́внаго чудесе́!* Испо́лнено стра́ха и ра́дости духо́вныя* мона́ховъ мно́жество* въ прехожде́ніе богоно́снаго отца́ Михаи́ла:* я́ко бо мо́лнія, восходя́щи отъ восто́ка до за́пада,* обрѣ́теся во оби́тели Пресвяты́я Тро́ицы,* во хра́мѣ, со вся́кимъ утвержде́ніемъ заключе́ннѣмъ и неразруши́мѣмъ.* Сему́ дивя́щеся, зовя́ху Христу́:* спаси́, Бо́же, ду́ши на́ша, я́ко Благоутро́бенъ.

О, пресла́внаго чудесе́!* Во́льнымъ юро́дствомъ твои́мъ Христа́ ра́ди* соверши́ся духо́вная му́дрость въ тебѣ́, о́тче Михаи́ле.* Нищету́ Христо́ву возлюби́въ, яре́мъ Госпо́день на ся́ взя́лъ еси́,* посто́мъ и бдѣ́ніемъ тѣ́ло твое́ удручи́лъ еси́* и на высоту́ добродѣ́телей возше́лъ еси́,* высоту́ Христо́вы та́йныя добро́ты зри́ши.* Того́ ра́ди зове́мъ Христу́:* спаси́, Бо́же, ду́ши на́ша, я́ко Благоутро́бенъ.

О, пресла́внаго чудесе́!* Яко дѣ́йствомъ Свята́го Ду́ха* высо́кая и ди́вная проро́ческая вѣща́нія,* преподо́бному и богоно́сному отцу́ Михаи́лу* безвѣ́стная и та́йная откры́шася* и е́же го́дѣ судьба́мъ Бо́жіимъ, и мно́гимъ бы́сть во спасе́ніе.* О, каково́ дарова́ніе на́мъ дарова́ся!* Его́же ра́ди, Христе́,* спаси́, Бо́же, ду́ши на́ша, я́ко Благоутро́бенъ.

Сла́ва, гла́съ 5, Самогла́сенъ:

Боже́ственнымъ огне́мъ разжиза́емь и свѣ́томъ просвѣща́емь Пресвяты́я Тро́ицы, му́дре, предочи́стилъ еси́ себе́, богоно́сне Михаи́ле, воздержа́ніемъ и чистото́ю, и вра́жія побѣди́лъ еси́ совѣ́ты и кова́рства, и, на ре́вность боже́ственную подви́гнувъ съ собо́ю мона́ховъ мно́жества, преоби́дѣти привре́менная увѣща́лъ еси́. Тѣ́мже въ славослове́ніи тебе́ ублажа́емъ: моли́ся, преподо́бне, еди́ному Сердцевѣ́дцу, Христу́ Бо́гу, да пощади́тъ ду́ши на́ша.

И ны́нѣ, богоро́диченъ, гла́съ то́йже:

Стра́шно, и пресла́вно, и ве́ліе та́инство: Невмѣсти́мый во чре́во вмѣща́ется, и Ма́ти по рождествѣ́ Дѣ́ва па́ки пребы́сть, Бо́га бо роди́, изъ Нея́ воплоще́нна. Тому́ возопіе́мъ, Тому́ пѣ́снь рце́мъ, со а́нгелы воспѣва́юще: свя́тъ еси́, Безнача́льный Бо́же, Иже на́съ ра́ди вочеловѣ́чивыйся, сла́ва Тебѣ́.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна [отъ кано́на пра́здника, пѣ́снь 6-я на 4 и] свята́го пѣ́снь 6-я же на 4. Проки́менъ, [гла́съ 7]: Честна́ предъ Го́сподемъ* сме́рть преподо́бныхъ его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ къ Кори́нѳяномъ, зача́ло 131. Аллилу́ія, [гла́съ 6]: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. [Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


МОЛИТВА
Преподо́бному отцу́ на́шему Михаи́лу Кло́пскому.

О, преподо́бне и преблаже́нне о́тче на́шъ Михаи́ле! Ты́, возжела́въ усе́рдно ше́ствовати во слѣ́дъ Го́спода на́шего Іису́са Христа́, вся́ плотска́я мудрова́нія отри́нулъ еси́; ты́ оте́чество свое́, ро́дъ и вре́менное благоро́дство и земна́го ца́рствія наслѣ́діе оста́вивъ, мона́шества и юро́дства пу́ть ко спасе́нію и къ наслѣ́дію Ца́рствія небе́снаго предызбра́лъ еси́. Прише́дъ же ди́внѣ во оби́тель [сію́] Пресвяты́я Тро́ицы, въ не́й трудолю́бно и богоуго́дно подвиза́яся, по премно́гу ко устрое́нію ея́ споспѣшествова́лъ еси́ и, отъ всѣ́хъ бѣ́дъ, отъ гла́да, вра́жіяго нахожде́нія, и о́гненнаго запале́нія, и вся́каго зла́ о́ную сохраня́я и защища́я живу́щихъ въ не́й и къ не́й притека́ющихъ, пути́ Госпо́дню поуча́лъ еси́. Ты́ и ны́нѣ, Пресвятѣ́й Тро́ицѣ со всѣ́ми святы́ми предстоя́ и непреста́нно насыща́яся зрѣ́нія Божества́ Трисвѣ́тлаго, помина́й, мо́лимъ тя́, чту́щихъ святу́ю па́мять твою́, не премолчи́, уго́дниче Христо́въ, ко Го́споду моля́ся, да Онъ, благода́тію Свое́ю пріосѣня́я святу́ю чудесы́ твои́ми просла́вленную оби́тель [сію́], въ не́й живу́щихъ и тружда́ющихся, ку́пно же и и́мъ благодѣ́ющихъ, та́кожде и всѣ́хъ притека́ющихъ къ освяще́нной ра́цѣ твое́й, и мо́щи твоя́ уста́ми и се́рдцемъ лобыза́ющихъ, здра́вы и невреди́мы сохрани́тъ и отъ вся́кія напа́сти свободи́тъ, подая́ путеше́ствующимъ въ пути́ благоспѣ́шество, боля́щимъ здра́віе, печа́льнымъ утѣше́ніе, си́рымъ, вдови́цамъ и всѣ́мъ напа́ствуемымъ ско́рое заступле́ніе и вспоможе́ніе, и отъ вра́жіихъ навѣ́товъ тве́рдое огражде́ніе и защище́ніе. Не преста́й же моля́ся и о Христоимени́той Держа́вѣ Благочести́вѣйшаго Вели́каго Госуда́ря на́шего Импера́тора [имярекъ], я́ко да, твои́мъ предста́тельствомъ и моли́твами сохраня́еми, вси́ возмо́жемъ по́двигъ тече́нія небла́зненно соверши́ти, сла́вяще Святу́ю Тро́ицу: Отца́ и Сы́на и Свята́го Ду́ха, и твое́ заступле́ніе, ны́нѣ и при́сно и во вѣ́ки вѣко́въ. Ами́нь.

Источникъ: Слу́жба преподо́бному и богоно́сному отцу́ на́шему Михаи́лу Кло́пскому. — СПб.: Въ Сѵнода́льной Тѵпогра́фіи, 1875. — 42 с.

/ Къ оглавленію раздѣла /


Наверхъ / Къ титульной страницѣ

0