Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 11-й де́нь.
Преподо́бнаго отца́ на́шего Ѳеодо́сія, о́бщихъ житíй нача́льника.

ВЕЧЕРЪ,
Блаже́нъ му́жъ.., 1-й антифо́нъ. На Го́споди воззва́хъ: пое́мъ стихи́ры на 6, гла́съ 5. Подо́бенъ: Преподо́бне о́тче.

Преподо́бне о́тче богоно́се Ѳеодо́сіе, вельми́ подвиза́лся еси́ въ привре́меннѣй жи́зни, въ пѣ́ніихъ, и поще́ніихъ, и бдѣ́ніихъ о́бразъ бы́въ твои́мъ ученико́мъ; ны́нѣ же лику́еши со безтѣле́сными, Христа́ непреста́нно славосло́вя, отъ Бо́га Бо́га Сло́ва и Изба́вителя, подкло́ньшаго главу́ Предте́чи и освяти́вшаго естество́ водно́е. Того́ моли́, Тому́ помоли́ся, преподо́бне, дарова́ти Це́ркви единомы́сліе, ми́ръ и ве́лію ми́лость. [Два́жды.]

Преподо́бне о́тче богоно́се Ѳеодо́сіе, обрѣ́тши, я́коже жела́ше, чи́стую твою́ ду́шу, Ду́ха благода́ть Всесвята́го въ тя́ всели́ся, я́ко Пречи́стый Свѣ́тъ, Его́же дѣ́йствомъ свѣ́тло укра́шенъ, Христа́ непреста́нно славосло́виши, во двою́ существу́ Еди́наго Сы́на, креща́емаго руко́ю Предте́чевою и свидѣ́тельствованна гла́сомъ Отчимъ. Того́ моли́, Тому́ помоли́ся, преподо́бне, дарова́ти вселе́ннѣй единомы́сліе, ми́ръ и ве́лію ми́лость. [Два́жды.]

Преподо́бне о́тче богоно́се Ѳеодо́сіе, лѣ́потно сподо́бился еси́ блаже́нныя жи́зни, чистото́ю и посто́мъ сію́ обрѣ́тъ, жи́въ бо, преста́вился еси́ къ го́рнѣй жи́зни, всѣ́мъ ра́доватися ре́къ и со безпло́тными Христа́ непреста́нно славосло́вя, отъ Дѣ́вы несказа́нно пло́ть пріе́мшаго и пото́пльша на́ша грѣхи́ креще́ніемъ въ струя́хъ Іорда́нскихъ. Того́ моли́, Тому́ помоли́ся, свя́те, дарова́ти вселе́ннѣй единомы́сліе, ми́ръ и ве́лію ми́лость. [Два́жды.]

Сла́ва, гла́съ 2:

Преподо́бне о́тче, я́ко гра́дъ жива́го Бо́га, возвесели́ша свяще́нную твою́ ду́шу рѣ́чная стремле́нія, воды́ оставле́нія проше́дшаго Іорда́нъ и всѣ́мъ конце́мъ благоче́стія сло́во источи́вшаго Христа́ Бо́га на́шего, Его́же моли́, всеблаже́нне Ѳеодо́сіе, спасти́ся душа́мъ на́шимъ.

И ны́нѣ, гла́съ то́йже:

Преклони́лъ еси́ главу́ Предте́чи, сокруши́лъ еси́ главы́ зміе́въ, прише́дъ въ струи́, просвѣти́лъ еси́ вся́ческая, е́же сла́вити Тя́, Спа́се, Просвѣти́теля ду́шъ на́шихъ.

Проки́менъ дне́, и чте́нія.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 4. Творе́ніе Іо́сифово. Подо́бенъ: Да́лъ еси́ зна́меніе.

Ви́дѣлъ еси́, ка́ко обложи́хся твои́мъ о́бразомъ,* его́же созда́хъ,* па́че ума́ смири́вся, — Госпо́дь рече́, —* что́ у́бо стра́нно, дру́же,* а́ще и подклоня́юся десни́цѣ твое́й,* я́коже еди́нъ отъ твои́хъ клевре́тъ,* и одѣва́юся, обнаже́нъ, вода́ми?* Обнаже́нныя бо хощу́ одѣ́яти, я́ко Благоутро́бенъ,* въ нетлѣ́ніе вѣ́чное.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Яви́ся воплоща́емь,* но утро́ба Тя́ прія́тъ,* неопа́льна пребы́вши,* пе́щь бо издале́ча сію́ образу́етъ,* не опали́вша отроко́въ.* Азъ же, сѣ́но сы́й,* на Огнь ка́ко положу́ дла́нь, Влады́ко?* Его́же трепе́щутъ небе́сная и земна́я вся́,* Іису́се Всеси́льне,* Спа́се ду́шъ на́шихъ.

Сти́хъ: Что́ ти е́сть, мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Ты́ Мя въ вода́хъ Іорда́нскихъ омы́й,* скве́рны отню́дъ не иму́ща, — Госпо́дь рече́, —* и оскве́рншееся естество́ человѣ́ческое* преступле́ніемъ Ада́ма,* омы́вшеся, но́во бу́детъ.* Мнѣ́ бо креща́ему,* обновле́ніе всѣ́мъ человѣ́комъ* водо́ю и Ду́хомъ быва́етъ.

Сла́ва, гла́съ 8. Студи́тово:

Мона́ховъ мно́жества, наста́вника тя́ почита́емъ, о́тче на́шъ Ѳеодо́сіе: твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви поми́ловатися душа́мъ на́шимъ.

И ны́нѣ, гла́съ то́йже:

Ангельская во́инства ужасо́шася о ви́димѣмъ, дне́сь во Іорда́нѣ на́гу стоя́щу Ти́, Спа́се, въ вода́хъ и пречи́стый ве́рхъ Тво́й прекло́ншу крести́тися отъ Іоа́нна. Тебѣ́ бо, обнища́вшу во́лею, мíръ обогати́ся: Го́споди, сла́ва Тебѣ́.

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Ѳеодо́сіе о́тче на́шъ, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника. И обы́чныя каѳи́смы.

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Іису́съ Нави́нъ во Іорда́нѣ рѣцѣ́, преводя́ лю́ди и Бо́жій киво́тъ, сѣннопи́шетъ бу́дущее благодѣ́тельство: о́бразъ бо на́мъ возображе́нія и начерта́ніе нело́жно порожде́нія, та́инственное прехожде́ніе обои́ми сѣннопи́шетъ Ду́хомъ. Христо́съ яви́ся на Іорда́нѣ освяти́ти во́ды.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Единоче́стное Сло́во Отцу́ и Ду́ху, воплоще́нно за милосе́рдіе и креща́емо, а́нгельстіи ли́цы ви́дѣвше, трепета́ху, и Іорда́нъ рѣка́, устыдѣ́вшися и убоя́вшися, возврати́ся вспя́ть, на́съ возводя́ къ высотѣ́ спасе́нія, страстьми́ истлѣ́вшія.

Сла́ва, и ны́нѣ, то́йже.

По поліеле́и сѣда́ленъ, гла́съ 3. Подо́бенъ: Боже́ственныя вѣ́ры.

Къ боже́ственнѣй высотѣ́ твоя́ воздѣ́въ ру́ки, сто́лпъ, преподо́бне, свѣтоно́сенъ яви́лся еси́, моли́твенными заря́ми сія́я: къ небеси́ бо впери́въ мы́сль и неизглаго́ланныхъ бы́въ прича́стникъ, ве́сь облиста́лъ еси́, Христа́ Бо́га моля́ дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника. Подо́бенъ: Дѣ́ва дне́сь.

Влады́ка дне́сь на Іорда́нъ пріи́де, кре́щся въ вода́хъ отъ боже́ственнаго Предте́чи. Свы́ше же Оте́цъ свидѣ́тельствоваше: Се́й е́сть Сы́нъ Мо́й, о Не́мже благоволи́хъ, и Ду́хъ яви́ся стра́ннымъ ви́домъ голуби́нымъ надъ Ни́мъ.

Степе́нна, 1-й антифо́нъ 4-го гла́са. Проки́менъ, гласъ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безпоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ пра́здника со ирмосо́мъ на 8, гла́съ 2.
Пѣ́снь 1.

Ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Утру я́вльшуся человѣ́комъ свѣтоно́сну ны́нѣ изъ пусты́ни, къ вода́мъ Іорда́нскимъ, Царю́ преклони́лъ еси́ со́лнца Твою́ вы́ю, ли́ка мра́чна родонача́льника исхи́тити, скве́рны же вся́кія очи́стити тва́рь.

Безнача́льне, струя́мъ спогре́бшася Тебѣ́, Сло́ве, но́ваго прево́диши, истлѣ́вшаго ле́стію, Сего́ несказа́нно отъ Отца́ пріе́мъ гла́съ держа́венъ: Се́й возлю́бленный, ра́венъ же Мнѣ́ Отрокъ естество́мъ.

И свята́го на 6. Ѳеофа́ново. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Яко му́дръ чинонача́льникъ на́шъ, о́тче Ѳеодо́сіе, боголѣ́пно пѣ́снь предначни́ прише́дшему во всемíрное спасе́ніе Христу́ Бо́гу и всесвяту́ю па́мять твою́ съ Собо́ю просла́вльшему.

Изъ пусты́ни Предте́ча Христо́въ, отъ Ааро́новы Елисаве́ти прозябы́й, пріи́де; въ купѣ́ли же Ѳеодо́сій роди́вся Ду́хомъ, пустыннограждани́нъ бы́сть, Іису́су послѣ́дствуя.

Кре́щшуся въ струя́хъ Христу́, изра́ильтескаго собо́рища потреби́ся шата́ніе, въ Це́ркви же равноа́нгельно жи́тельство насади́ся, е́же неукло́нно соверши́лъ еси́, всеблаже́нне Ѳеодо́сіе.

Общникъ стра́сти бы́въ, о́тче, поще́ніемъ на́съ ра́ди на Крестѣ́ Пригвожде́нному, досто́йно сообра́зенъ бы́лъ еси́ Того́ воскресе́нія и снаслѣ́дникъ бы́лъ еси́ сла́вы, Ѳеодо́сіе.

Богоро́диченъ: Отрокови́цъ боже́ственный ли́къ боже́ственнѣйше въ Тя́ до́брую имену́ютъ, Богоро́дице Влады́чице, добро́тами укра́шенную Божества́: добротвори́тельное бо Сло́во па́че сло́ва родила́ еси́.

Катава́сія: Глубины́ откры́лъ е́сть дно́...

Пѣ́снь 3.

Ирмо́съ: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Умерщвле́ніе пе́рвѣе насади́вый тва́ри, звѣ́ря злодѣ́йственнаго вообра́жься въ естество́, омрача́ется плотски́мъ прише́ствіемъ: у́тру я́вльшуся, прирази́вся Влады́цѣ сокруши́ти свою́ вражде́бную главу́.

Влече́тъ къ себѣ́ Богозда́нное естество́, утро́бы мучи́теля, погребе́нное предѣ́лы; ражда́ется па́ки земноро́дныхъ Обновле́ніе, дѣ́ло держа́вно соверша́я Влады́ка: пріи́де бо, то́е очи́стити хотя́.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Вода́ми покрыва́я превы́спренняя, Госпо́дь тѣле́сно одѣ́яшеся въ струи́ Іорда́нскія, въ Не́мже утверди́ся се́рдце мое́.

Свѣ́тъ во Іорда́нѣ Боже́ственный возсія́вый, прозябе́ніе су́щимъ на земли́ богода́нное, благослове́нія и произволе́нія блага́го проявля́етъ тя́, Ѳеодо́сіе.

Оста́вилъ еси́ мíръ и я́же въ мíрѣ, преподо́бне, бы́вшему обнаже́нію Влады́чню подо́бяся на Іорда́нѣ, Ѳеодо́сіе.

Кре́стъ Спа́совъ на ра́мена взе́мъ, поте́клъ еси́ на гро́бъ Его́, я́коже еле́нь на исто́чники водны́я спаси́тельныя, всеблаже́нне Ѳеодо́сіе.

Богоро́диченъ: Чи́ны ужасо́шася а́нгельстіи, Всечи́стая, и человѣ́ческая устраши́шася сердца́ о рождествѣ́ Твое́мъ. Тѣ́мъ Тя́, Богоро́дице, вѣ́рою почита́емъ.

Катава́сія: Крѣ́пость дая́й царе́мъ на́шимъ Госпо́дь...

Конда́къ пра́здника, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Сѣда́ленъ свята́го, гла́съ 8. Подо́бенъ: Прему́дрости.

Воздержа́ніемъ, и болѣ́зньми, и моли́твами ду́шу твою́ украси́въ боголѣ́пно, бы́лъ еси́ соприча́стникъ му́ченикомъ, блаже́нне, и чуде́съ вои́стинну да́ры прія́лъ еси́, е́же исцѣля́ти неду́ги вѣ́рою чту́щихъ тя́. Тѣ́мже и де́моновъ отгоня́я мно́жества, подае́ши исцѣле́нія человѣ́комъ благода́тію, богоно́се Ѳеодо́сіе, моли́ Христа́ Бо́га грѣхо́въ оставле́ніе пода́ти пра́зднующимъ вѣ́рою па́мять твою́. [Два́жды.]

Сла́ва, и ны́нѣ, пра́здника, гла́съ то́йже:

Іорда́нъ струя́ми слу́житъ, и Іоа́ннъ простира́етъ ру́ку тлѣ́нную, я́вльшуся Тебѣ́, Неви́диме, пло́тію ко креще́нію. Но о́въ у́бо возвраща́шеся вспя́ть стра́хомъ, о́въ же а́біе держа́ше съ тре́петомъ Тя́, Нетлѣ́ннаго. Вои́стинну Агнецъ Бо́жій, Исто́чникъ присноживо́тный, исто́чники же, и моря́, и человѣ́ки освяти́въ: Тро́ица бо просія́, свы́ше Сы́на Тя́ имену́етъ Роди́тель, и Святы́й Ду́хъ снизхо́дитъ.

Пѣ́снь 4.

Ирмо́съ: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

По́сланъ отъ Отца́, всесвѣ́тлое Сло́во, но́щи отгна́ти зломра́чное стремле́ніе, и искорени́ти гряде́ши человѣ́ковъ грѣхи́, сы́ны же привлещи́, Твои́мъ Креще́ніемъ, Бла́же, свѣ́тлый отъ стру́й Іорда́нскихъ.

Са́мое прови́дѣвъ нарече́нное Сло́во, я́сно проповѣ́дникъ вопіе́тъ тва́ри: Се́й пре́жде мене́, вторы́й пло́тію сообра́зенъ, просія́ Боже́ственною си́лою вражде́бный на́шъ отъя́ти грѣ́хъ.

Па́жить у Себе́ животво́рну нося́, уловля́етъ зміе́въ, гнѣ́здамъ натека́я мно́гими сѣтьми́, низлага́я, Богъ Сло́во, запина́етъ же уязви́вшаго всемíрный ро́дъ, сего́ потре́бль, избавля́етъ тварь.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Въ вода́хъ главы́ зміе́въ сокруши́лъ еси́, и Ду́хомъ, Сло́ве Бо́жій, обнови́лъ еси́ всего́ мя, человѣ́ка. Тѣ́мъ вопію́ Ти: сла́ва си́лѣ Твое́й, Го́споди.

Прекло́ньшему главу́ Предте́чи, уподо́бився Христу́ покоре́ніемъ и изря́днымъ смире́ніемъ, о́тче Ѳеодо́сіе, на добродѣ́тели возше́лъ еси́ сто́лпъ непоколеби́мый.

Дѣ́вѣ и Ма́тери послужи́въ Христа́ Бо́га, непобори́му благода́ть прія́лъ еси́ Ду́ха, о́тче Ѳеодо́сіе, и враги́ неви́димыя низложи́лъ еси́.

Волхво́въ тя́ сла́вный верте́пъ пріе́мый, дароно́сца показа́ на́съ ра́ди кре́щшемуся Христу́, вѣ́ру, Ѳеодо́сіе, и съ наде́ждею любо́вь принося́ща.

Страстьми́ Влады́ки Христа́ укрѣпля́емь, со́вѣстію любе́зною претерпѣ́лъ еси́ муче́ніе, о́тче Ѳеодо́сіе, съ те́мнымъ боря́ся міроде́ржцемъ.

Богоро́диченъ: Зачала́ еси́ во утро́бѣ Твое́й безсѣ́менно Го́спода и Сего́ родила́ еси́, воплоще́нна, спаса́ющаго мíръ моли́твами Твои́ми. Тѣ́мже Ти́ зове́мъ: ра́дуйся, Приснодѣ́во Влады́чице.

Катава́сія: Услы́шахъ, Го́споди, гла́съ Тво́й...

Пѣ́снь 5.

Ирмо́съ: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Ви́дѣвъ Зижди́тель во мра́цѣ прегрѣше́ній плени́цами неизбѣ́жными его́же вообрази́ пе́рсты, поставля́етъ на обою́ ра́му, воздвигъ горѣ́, ны́нѣ во многотеку́щихъ вода́хъ омыва́я студа́ дре́вняго Ада́мова зла́го нра́ва.

Со благоче́стіемъ притеце́мъ прилѣ́жно ко исто́чникомъ пречи́стымъ тече́нія спаси́тельнаго, Сло́во усмотря́юще отъ Нетлѣ́нныя, почерпа́ла принося́ще жа́жди Боже́ственныя, мíра сла́достнѣ исцѣля́я неду́гъ.

Инъ.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Возже́гъ у́мъ, Иже на́съ въ вода́хъ Обнови́вшаго, му́дрѣ утверди́лъ еси́, низве́рженный поще́ніемъ, повѣ́шеньми тѣ́ло, всеблаже́нне Ѳеодо́сіе.

Житіе́ при́сно сме́рти положи́въ поуче́ніе, отыти́ же тща́вся къ Явльшемуся на́съ ра́ди пло́тію, себѣ́ сотвори́лъ еси́ гро́бъ, Ѳеодо́сіе.

Сме́рть Христо́ву во́льную тво́й учени́къ сла́вный Васи́лій, о́тче Ѳеодо́сіе, подража́я, но́вый обновля́етъ гро́бъ, ра́дуяся.

Богоро́диченъ: Се́ во утро́бѣ, Богоро́дице Всечи́стая, Христа́ Бо́га па́че сло́ва имѣ́ла еси́, я́коже Иса́ія прорече́, па́че естества́ же Сего́, Богороди́тельнице, родила́ еси́.

Катава́сія: Іису́съ, живота́ Нача́льникъ...

Пѣ́снь 6.

Ирмо́съ: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Отъ глуби́ннаго льва́, тревече́рній стра́ннѣ проро́къ во вну́треннихъ валя́яся, а́біе произы́де, пакибытія́ спасе́ніе отъ змíя человѣкоубíйцы всѣ́мъ предъявля́я въ послѣ́дняя лѣ́та.

Отве́рсту не́бу всесвѣ́тлыхъ писа́ній, учени́къ зри́тъ отъ Отца́ посыла́емый, пребыва́ющъ же Ду́хъ на Пречи́стѣмъ Сло́вѣ, наше́дъ я́ко го́лубь неизрече́ннымъ о́бразомъ, лю́демъ же явля́ется, прише́дшимъ ко Влады́цѣ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Нетлѣ́ніе на́мъ дарова́лъ еси́, Христе́, въ воскресе́ніи Твое́мъ, тѣ́мже Васи́лій, сла́вный уго́дникъ Тво́й, и у́меръ, я́коже жи́въ, явля́ется.

Очища́яй мíръ креща́ется, мене́ ра́ди Бо́гъ человѣ́къ по мнѣ́ бы́въ, Его́же во дву́хъ естества́хъ, Ѳеодо́сіе блаже́нне, проповѣ́далъ еси́.

Сла́дость весе́лія Христу́ Бо́гу, мѵроно́сицъ сле́зы обра́щшему въ ра́дость, Ѳеодо́сіе, то́ки сле́зъ твои́хъ иска́паша.

Богоро́диченъ: Милосе́рдія Твоего́ сподо́би мя́, Яже Ми́лостивѣйшаго Сло́ва Ро́ждшая, Свое́ю кро́вію отъ тли́ человѣ́ки Изба́вльшаго.

Катава́сія: Гла́съ Словесе́...

Конда́къ, гла́съ 8. Подо́бенъ: Взбра́нной.

Насажде́нъ во дво́рѣхъ Го́спода твоего́, преподо́бными твои́ми добродѣ́тельми красно́ процвѣ́лъ еси́ и умно́жилъ еси́ ча́да твоя́ въ пусты́ни, сле́зъ твои́хъ ту́чами напая́емая, стадонача́льниче Бо́жій Боже́ственныхъ дворо́въ. Тѣ́мже зове́мъ: ра́дуйся, о́тче Ѳеодо́сіе.

Икосъ:

Человѣ́къ у́бо естество́мъ бы́лъ еси́, о́тче, но яви́лся еси́ сограждани́нъ а́нгеловъ: я́ко бо безпло́тенъ, на земли́ пожи́въ, му́дре, плотско́е все́ промышле́ніе отве́рглъ еси́. Тѣ́мже и отъ на́съ слы́шиши: ра́дуйся, отца́ благочести́ваго о́трасле; ра́дуйся, ма́тере благоговѣ́йныя вѣ́твь; ра́дуйся, пусты́нный граждани́не всекра́сный; ра́дуйся, вселе́нныя свѣти́льниче многосвѣ́тлый; ра́дуйся, я́ко отъ ю́ности послѣ́довалъ еси́ Христу́; ра́дуйся, я́ко увяди́лъ еси́ плотскíя сла́сти; ра́дуйся, мона́шествующихъ хода́тай спасе́нія; ра́дуйся, уныва́ющихъ о́бразъ утѣше́нія; ра́дуйся, мно́гія отъ ле́сти изба́вивый; ра́дуйся, то́ки чуде́съ да́руя; ра́дуйся, о ни́щихъ попече́ніе сотвори́вый; ра́дуйся, на́шъ предста́телю и изба́вителю. Ра́дуйся, о́тче Ѳеодо́сіе.

Пѣ́снь 7.

Ирмо́съ: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Тебе́ живопису́ющій ассирíйскій пла́мень ужа́сенъ поставля́еши, въ ро́су преведе́нъ; тѣ́мже вода́ ны́нѣ, я́коже пла́мень, одѣва́яй, вре́дную зло́бу, Христе́, прикрове́нную опаля́етъ, отъ поползнове́нныя стези́ призыва́ющи.

Раздѣ́льшуся Іорда́ну дре́вле, по су́ху прехо́дятъ лю́діе Изра́ильстіи, Тебе́, Держа́внѣйшаго, содержа́ща тва́рь некосни́тельнѣ, ны́нѣ въ вода́хъ напису́ющіи, къ нетлѣ́ннѣй и поле́знѣй стези́.

Вѣ́мы, пе́рвѣе всепа́губный пото́пъ ми́лостивно Тя́ всѣ́хъ во тлю́ привести́, о, тревели́кія сотворя́я и стра́нная́ Ны́нѣ же пото́пльша, Христе́, грѣ́хъ за благосе́рдіе и человѣ́ческое спасе́ніе.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Струю́, попаля́ющую грѣ́хъ, и пла́мень, ороша́ющь человѣ́ческій ро́дъ, Го́споди, во Твое́мъ креще́ніи совокупи́въ, Сло́ве Бо́жій, превозноси́мый Бо́же, благослове́нъ еси́ и препросла́вленъ.

Пе́щь Сотво́ршему Іорда́нъ, тебе́ сама́го, я́ко кади́ло, всесоже́глъ еси́, преподо́бне, и пла́мень небе́сный, нело́женъ о́бразъ Боже́ственнаго манове́нія пріе́мъ, хра́мъ водрузи́лъ еси́, ду́шъ спаси́тельный.

Твои́ми воево́дствы Моисе́ева повину́ются, благода́ти я́вльшейся, преподо́бне: враги́ бо неви́димыя низложи́въ, гра́дъ небе́сный наслѣ́дуютъ твои́ лю́діе, всехва́льне.

Струя́ми Погре́бшему грѣ́хъ тебе́ сама́го обита́лище сотвори́лъ еси́, Ѳеодо́сіе, богоуго́дное, хра́мъ созда́въ, приноси́ти непреста́нную пѣ́снь законоположи́лъ еси́ многоязы́чными гла́сы.

Отроко́въ подража́я дерзнове́ніе, мучи́теля огнедохнове́нное преще́ніе укори́лъ еси́, му́дрѣ предста́тельствуя по Це́ркви Христо́вѣ, о́тче Ѳеодо́сіе, ея́же ра́ди во́льно яви́ся пло́тію распина́емый.

Богоро́диченъ: Всечи́стое зача́тіе, нетлѣ́нное рождество́ Ты́ Еди́на показа́ла еси́, Дѣ́ва пребы́вши: Бо́га бо зачала́ еси́, надъ всѣ́ми Су́щаго, Чи́стая, Человѣ́ка бы́вша вѣ́рныхъ на спасе́ніе и избавле́ніе.

Катава́сія: Юноши благочести́выя...

Пѣ́снь 8.

Ирмо́съ: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

Тріе́ богови́дніи, во огни́ ороша́еми, озаря́ющеся треми́ всесвѣ́тлѣ святы́нями, я́вѣ показова́ху Превы́шнее Естество́ смѣше́ніемъ человѣ́ческимъ, огнепаля́щее росо́ю ми́лостивно вся́ку па́губную ле́сть.

Да убѣли́тся вся́кое земно́е естество́, отъ паде́нія ны́нѣ на не́бо возводи́мо, Имже бо вся соблюда́ются, Сло́вомъ, теку́щими струя́ми омы́вшеся, прегрѣше́ній пре́жнихъ убѣже́, пресвѣ́тло измове́но.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Пе́щь иногда́ въ Вавило́нѣ струи́ Іорда́нскія изобрази́, Боже́ственнымъ Креще́ніемъ проти́вныя опаля́ющи, вѣ́рныя же ороша́ющи, пою́щія: благослови́те, вся́ дѣла́ Госпо́дня, Го́спода.

Тѣле́сныхъ страсте́й предызше́дъ пре́жде отше́ствія, Ѳеодо́сіе, отъ нѣ́дръ земны́хъ во́дъ изыма́я, ю́ноши явля́ешися, зову́щу: благослови́те, вся́ дѣла́ Госпо́дня, Го́спода.

Бы́сть твои́хъ ру́къ благослове́ніе, во струя́хъ креща́ющагося Христа́ Боже́ственнѣйшее повелѣ́ніе, невла́жнѣй земли́ ро́днѣйшая вода́ и грѣ́ющее со́лнце: зерно́ бо во многопло́денъ кла́съ пшени́цы безсѣ́менно пита́шеся.

Во мра́къ мы́сленный Свѣ́та Боже́ственнѣйшаго ты́ вше́дъ, Ѳеодо́сіе, и скрижа́ли пе́рстомъ Бо́жіимъ написа́въ се́рдцу твоему́, благоче́стія уче́нія прине́слъ еси́ ученико́мъ твои́мъ, кни́гу жи́зни, всеблаже́нне.

Вѣ́ру тве́рду кровоточи́выя, о́тче, подража́вши жена́, ру́бищу косну́вшися, я́коже тма́, су́щимъ въ тебѣ́ просвѣще́ніемъ неду́гъ отгна́ся, бы́лъ бо еси́ избра́нія сосу́дъ я́вльшемуся Христу́.

Тро́иченъ: Тя́, изъ Бо́га Бо́га ви́дѣвше, тѣле́снѣ я́вльшагося Христа́ неизглаго́ланно, позна́хомъ у́бо Неви́димаго Отца́ Твоего́ и Ду́ха Твоего́ Свята́го, зову́ще: благослови́те, вся́ дѣла́ Госпо́дня, Го́спода.

Богоро́диченъ: Ты́ Отцу́ Неразлу́чнаго, во утро́бѣ богому́жно Жи́тельствовавшаго, безсѣ́менно зачала́ еси́ и несказа́нно родила́ еси́. Тѣ́мъ Тя́ спасе́ніе всѣ́хъ на́съ вѣ́мы.

Катава́сія: Та́йну пресла́вную...

Пѣ́снь 9.

Ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

Увѣ́дѣхомъ Моисе́ю купино́ю явле́нная, гряди́, стра́нными уста́вы содѣ́ланная: я́ко бо спасе́ся, Огнь нося́щи, Дѣ́ва, Свѣтоно́сна ро́ждши Благодѣ́теля, во Іорда́нскихъ же струя́хъ явле́нна.

Помазу́еши, соверша́я человѣ́ческое существо́, Царю́ Безнача́льне, Ду́ха обще́ніемъ, струя́ми чи́стыми отмы́въ и тмы́ крѣ́пость же посра́мль возвы́шенную, ны́нѣ въ безпреста́ннѣмъ возда́ти житіи́.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Собо́ры проповѣ́далъ еси́, богому́дре Ѳеодо́сіе, честны́хъ равночи́сленны Ева́нгелій Христо́выхъ, произволе́ніемъ кро́вь му́ченическу пріе́мъ ре́вностію, и му́ченикъ безъ кро́ве благоче́стія яви́лся еси́.

Су́дъ непра́веднаго пра́ведно осуди́, за твое́ изгна́ніе прогна́вшъ и ху́льными устна́ми нечести́вую ду́шу изъе́мшъ, жи́зни же лиши́вшъ жи́зни врага́, преподо́бне.

Твоя́ помина́юще уче́нія, Ѳеодо́сіе, во двою́ существу́ Христа́ проповѣ́даемъ, двѣ́ во́ли вѣ́дуще, есте́ственны, и дѣ́йственны, и самовла́стны, въ Бо́зѣ, кре́щшемся пло́тію.

Тезоиме́нно дая́ніе бла́го отъ Отца́ свѣ́товъ, ду́шъ и тѣле́съ вра́чь бы́лъ еси́, снѣ́дь оби́льна и питіе́, и́же во гла́дѣ та́ющихъ и жа́жди, и наги́хъ одѣя́ніе, и па́дающихъ исправле́ніе.

Не преста́й ста́до твое́ назира́я, о́тче преподо́бне, и, твое́ помина́я обѣща́ніе, е́же я́ко наде́жди ко́твы непрело́мны привяза́хомъ ка́меню, ко Христу́ хода́тая тя́ иму́ще, Ѳеодо́сіе.

Тро́иченъ: Еди́ницу Тричи́сленную, Тро́ицу Единосу́щную правосла́вно пою́ще, вѣ́рніи, просла́вимъ, несѣко́мо Пребоже́ственное Естество́ Трисія́нное, невече́рнюю Зарю́, еди́ну нетлѣ́нную, Свѣ́тъ на́мъ возсія́вшую.

Богоро́диченъ: Яко у́тро обрѣла́ся еси́ ра́ннее въ жите́йстѣй но́щи, дѣ́вства заря́ми облиста́ющи, Восто́къ Со́лнца мы́сленнаго пра́вды на́мъ я́вльшая, Богома́ти Всечи́стая.

Катава́сія: Недоумѣ́етъ вся́къ язы́къ...

Свѣти́ленъ. Подо́бенъ: Посѣти́лъ ны́.

Очи́стихомся свѣ́тло, Христе́ мо́й, очище́ніемъ Твои́мъ и ны́нѣ пра́здничною ра́достію, Ѳеодо́сія честна́го па́мятію, обогати́хомся, тѣ́мже мона́шествующихъ веселя́тся чи́ни. [Два́жды.]

Сла́ва, и ны́нѣ, пра́здника:

Въ ра́біи о́бразѣ прише́лъ еси́, Сло́ве, и креще́нія, Безлѣ́тный, я́ко Человѣ́къ про́сиши. Ужасе́ся земля́ и не́бо, и а́нгельстіи чи́ни, и водно́е естество́. Предте́ча же, убоя́вся, стра́хомъ и ра́достію служе́ніе соверша́ше.

На хвали́техъ стихи́ры на 4, гла́съ 5. Подо́бенъ: Ра́дуйся.

До́мъ высо́кихъ добродѣ́телей предустро́ивъ тебе́ сама́го, Ѳеодо́сіе, въ Боже́ственнѣмъ Богоро́дицы сподо́бился еси́ хра́мѣ обита́ти и се́й посѣща́ти, Бо́жію бо свѣ́тлость зрѣ́ти возлюби́лъ еси́, и́стинныя же ны́нѣ сѣ́ни благолѣ́піе и неизрече́нную зри́ши красоту́, ю́же у́бо основа́ Вы́шній, преподо́бне, и вселя́етъ преусе́рдно къ Нему́ взира́ющія. Того́ моли́ низпосла́ти душа́мъ на́шимъ ве́лію ми́лость.

Болѣ́зньми по́стническими тебе́ сама́го очи́стивъ, подража́тель бы́лъ еси́, всеблаже́нне, твоего́ Влады́ки, и́бо кра́я ри́зы твоея́ прикосну́вшейся неду́гъ исцѣли́лъ еси́, гла́домъ та́ющія въ пусты́ни напита́лъ еси́, отъ неистощи́маго подая́ сокро́вища, я́ко тезоимени́тъ Бо́жія дая́нія бы́въ, вѣ́ру же правосла́вную проповѣ́далъ еси́, преподо́бне, мучи́теля неи́стовство въ ничто́же вмѣни́въ, Христа́ моля́, подаю́щаго мíру ве́лію ми́лость.

Пла́мень къ Бо́гу неукло́нный, и разжже́нныя, и те́плыя любве́ вже́гъ, съ небесе́ воспрія́лъ еси́ сія́ніе, благоволе́ніе Боже́ственное тебѣ́ возвѣща́ющее, хра́мъ святѣ́йшій добродѣ́тели наказа́ніе созда́ти и ду́шъ попече́ніе. Его́же наче́нъ, благоче́стно соверши́лъ еси́, идѣ́же и многострада́льное лежи́тъ тѣ́ло твое́, положе́ньми чи́стыми, всеблаже́нне, преизя́щно почита́емо. Христа́ моли́ низпосла́ти душа́мъ на́шимъ ве́лію ми́лость.

Вои́стинну да́же до ски́ніи чу́дныя, да́же до до́му Бо́жія, Ѳеодо́сіе, проше́лъ еси́ ра́дованіемъ и весе́ліемъ души́, идѣ́же гла́съ, о́тче, пра́зднующихъ, кра́снаго слы́шати хотя́й и сла́дкаго пѣ́нія, и неизрече́нныя душесла́дости, и утѣше́нія бы́въ въ прича́стіи, блаже́нне, ея́же са́мыя жела́я, пло́ть умертви́лъ еси́, ю́же и получи́лъ еси́, Боже́ственною пра́вдою украша́емь, Христа́ моля́ душа́мъ на́шимъ да́ти ве́лію ми́лость.

Сла́ва, гла́съ 2:

Добродѣ́телей лѣ́ствица, о́бразъ показа́ся на земли́ та́йно, сего́ восхва́лимъ, я́ко по́стниковъ удобре́ніе, пости́вся бо и́стинно, я́коже вели́кій Анто́ній, безмѣ́рное смире́ніе показа́въ, и, упа́съ лю́ди своя́ благоче́стно, во огра́ду святу́ю всели́, идѣ́же ли́къ а́нгельскій пребыва́етъ. Прилѣ́жно вопіе́мъ ти́: не забу́ди и ны́нѣ ста́да твоего́, всеблаже́нне Ѳеодо́сіе, но моли́твами твои́ми ко Го́споду спаси́ на́съ, мо́лимся.

И ны́нѣ, гла́съ то́йже:

Дне́сь Христо́съ на Іорда́нъ пріи́де крести́тися, дне́сь Іоа́ннъ каса́ется верху́ Влады́чню: си́лы небе́сныя ужасо́шася, пресла́вное ви́дяще та́инство, мо́ре ви́дѣ и побѣже́, Іорда́нъ, ви́дѣвъ, возврати́ся. Мы́ же, просвѣ́щшеся, вопіе́мъ: сла́ва яви́вшемуся Бо́гу, и на земли́ ви́дѣнному, и просвѣти́вшему мíръ.

Славосло́віе вели́кое. По трисвято́мъ тропа́рь свята́го. Сла́ва, и ны́нѣ, пра́здника. Ектеніи́ и отпу́стъ.



НА ЛИТУРГІИ,

Блаже́нна отъ кано́на пра́здника, пѣ́снь 6-я на 4 и свята́го пѣ́снь 6-я же на 4. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Кори́нѳяномъ, зача́ло 176. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 150 – 159.

/ Къ оглавленію раздѣла /


Наверхъ / Къ титульной страницѣ

0