Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 10-й де́нь.
Преподо́бнаго отца́ на́шего Маркіа́на, пресви́тера и иконо́ма Вели́кія це́ркве.

[Зри́:] Возслѣ́дованіе преподо́бнаго Маркіа́на пое́тся на повече́ріи.

Кано́нъ, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Струя́ми погре́бшему грѣ́хъ Христу́ прилѣпля́яся, неосла́бными манове́ніи изсуши́лъ еси́ пото́ки страсте́й, богому́дре Маркіа́не.

Христо́съ, креща́яся, очища́етъ истлѣ́вшее страстьми́ на́ше неможе́ніе, Ему́же угоди́лъ еси́, Маркіа́не, прилѣ́жнымъ, о́тче, воздержа́ніемъ.

Богоро́диченъ: Дѣ́ва пребыла́ еси́ по рождествѣ́, Бо́га бо родила́ еси́, Его́же вели́кій Предте́ча во Іорда́нскихъ струя́хъ крести́ съ тре́петомъ мно́гимъ, Пречи́стая Влады́чице.

Пѣ́снь 3.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, Иже надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Іорда́нскія струи́, Го́споди, низше́дъ, освяти́лъ еси́ дне́сь и, я́коже да́ръ и честно́е и кра́сное приноше́ніе, прія́лъ еси́ сла́внаго Маркіа́на сла́вити Тя́.

Облага́яй не́бо о́блаки, Госпо́дь оде́ждею облече́ тя свяще́нною, священнодѣ́йствующа, и а́нгеломъ говѣ́йною, я́ко а́нгела, на земли́ съ пло́тію пожи́вшаго.

Анастасíи богому́дрыя свяще́ненъ хра́мъ созда́лъ еси́, украси́въ свяще́нными и честны́ми возложе́ньми, сего́ ра́ди съ не́ю, Маркіа́не, всели́лся еси́.

Богоро́диченъ: Грѣ́хъ пра́отца Иже изъ Тебе́ рожде́йся, Приснодѣ́во, во Іорда́нстѣй рѣцѣ́ потопля́етъ, я́ко Благоутро́бенъ. Его́же Предте́ча крести́ти повелѣ́нъ бы́въ, спря́ташеся.

Пѣ́снь 4.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ — позна́ешися, внегда́ пріити́ вре́мени — пока́жешися. Сла́ва си́лѣ Твое́й, Го́споди.

Игра́йте, го́ры, лику́йте, хо́лми: Іису́съ креща́ется, Еди́нъ чи́стый, преподо́бнаго па́мять уясни́вый, Имже де́моновъ вся́ ле́сть омрачи́ся и вселе́нная просвѣти́ся.

Умертви́въ воздержа́ніемъ плотскíя сла́сти, боже́ственнымъ твои́мъ проглаго́ланіемъ оживи́лъ еси́ мертвецы́, въ погребе́ніе облобыза́я, о́тче, и а́біе умре́ти повелѣва́я, до́ндеже пріи́детъ всѣ́хъ о́бщее воскресе́ніе.

Житіе́ твое́, добро́тою Боже́ственныхъ добродѣ́телей укра́шено, уясня́етъ вѣ́рныя, моще́й же твои́хъ ра́ка облиста́етъ лучи́ чуде́съ вѣ́рою приступа́ющимъ, о́тче, и вѣ́рою восхваля́ющимъ тя́.

Богоро́диченъ: Исто́чникъ Ты́ спасе́нія родила́ еси́, Христа́, освяща́ющаго исто́чники креще́ніемъ, Его́же Іорда́нъ ви́дѣвъ, возврати́ся стра́хомъ, Іоа́ннъ креща́яй ужасе́ся, Чи́стая Дѣ́во Всепѣ́тая.

Пѣ́снь 5.

Ирмо́съ: Тво́й ми́ръ да́ждь на́мъ, Сы́не Бо́жій, ино́го бо, ра́звѣ Тебе́, Бо́га не зна́емъ, и́мя Твое́ имену́емъ, я́ко Бо́гъ живы́хъ и ме́ртвыхъ еси́.

Зміе́въ ты́ сокруши́лъ еси́ главы́ креще́ніемъ, Го́споди Бо́же Всеси́льне, вла́сть да́вый и си́лу Маркіа́ну боже́ственному на де́монскія ле́сти.

Расточи́лъ еси́, разда́въ ни́щимъ твое́ имѣ́ніе, богому́дре всеблаже́нне, тѣ́мже твоя́ пребыва́етъ па́мять во вѣ́ки и пра́вда.

Умири́лъ еси́ смуще́нія страсте́й по́мыслъ, преподо́бне, хра́мъ же созда́лъ еси́ Боже́ственнаго ми́ра, имену́емый въ хвалу́ Госпо́дню, Иже всѣ́хъ ми́ра.

Богоро́диченъ: Дѣ́ва по Рождествѣ́ яви́лася еси́ вои́стинну, Чи́стая, Бо́га бо родила́ еси́, Его́же Іоа́ннъ въ вода́хъ Іорда́нскихъ омыва́етъ на обновле́ніе мíра.

Пѣ́снь 6.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́ и спаси́ мя, Спа́се мíра, зову́ща: сла́ва Тебѣ́.

Пото́къ сла́дости подая́ на́мъ, Іорда́нскими струя́ми крести́ся Христо́съ, Иже дне́сь преподо́бнаго просвѣти́ успе́ніе.

Мѵрополо́жница мы́сленная моще́й ра́ка яви́ся твои́хъ, свяще́нне Маркіа́не, источа́ющи чуде́съ мѵ́ро къ тебѣ́ притека́ющимъ.

Мѵродохнове́нными моли́твами отгна́лъ еси́ огня́ клоко́чущаго стремле́ніе, спа́слъ еси́ хра́мъ невреди́мь, его́же созда́лъ еси́, богоблаже́нне.

Богоро́диченъ: Дѣ́ва дои́ши Пита́теля всѣ́хъ, Его́же Предте́ча ви́дѣвъ, взыгра́ся, вопія́: Избавле́ніе и Спасе́ніе всѣ́хъ яви́ся.

Сѣда́ленъ, гла́съ 8. Подо́бенъ: Прему́дрости.

Писа́нія отъ младе́нства свяще́нная испыту́я, богоно́се Маркіа́не, боже́ственнѣ просія́лъ еси́ благоче́стія, Сы́на бо и Сло́ва, Отцу́ Единосу́щна и Боже́ственному Ду́ху, проповѣ́далъ еси́, Сопресто́льна. Тѣ́мже Аріево и Македо́ніево нече́стіе обличи́лъ еси́ и вѣ́ру уясни́лъ еси́, правосла́вно сла́витися. Моли́ Христа́ Бо́га грѣхо́въ оставле́ніе пода́ти чту́щимъ съ любо́вію па́мять твою́.

Пѣ́снь 7.

Ирмо́съ: Су́щимъ въ пещи́ отроко́мъ Твои́мъ, Спа́се, не прикосну́ся, ниже́ стужи́ о́гнь. Тогда́ тріе́ я́ко еди́нѣми усты́ поя́ху и благословля́ху, глаго́люще: благослове́нъ Бо́гъ оте́цъ на́шихъ.

Жи́зни наста́ исто́чникъ, вода́ми омыва́ющій прегрѣше́нія на́ша, Бо́жіе Единоро́дное Безнача́льное Сло́во, Ему́же благоугоди́ Маркіа́нъ сла́вный, прело́жься къ Нему́.

Благомо́щными бдѣ́ніи вои́стинну успи́лъ еси́ стра́сти неудободе́ржныя души́ и, усну́въ во глубоча́йшей ста́рости, блаже́нне, къ Свѣ́ту отше́лъ еси́, я́ко дне́ сы́нъ и Христо́въ служи́тель.

Ору́жіе, е́же дре́во жи́зни храня́щее, плещи́ тебѣ́ да́руетъ, му́дре. Тѣ́мже ра́дости ра́йскія наслажда́ешися, воспѣва́я Вино́внаго спасе́нія на́шего, Маркіа́не свяще́нне.

Богоро́диченъ: Не опали́въ Твои́хъ ложе́снъ, Христо́съ ражда́ется, Чи́стая, изъ Тебе́ боголѣ́пно, Его́же ви́дѣвъ, Іоа́ннъ вопія́ше: Іису́съ креща́ется, спасе́ніе вѣ́рныхъ и избавле́ніе.

Пѣ́снь 8.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Человѣ́ки породи́лъ еси́ креще́ніемъ Твои́мъ, Бо́же Многоми́лостиве, дне́сь отъ земли́ къ неизрече́ннѣй сла́вѣ пріе́мый уго́дника Твоего́, Маркіа́на боже́ственнаго.

Ца́рскою ви́дяще тя́ лю́діе свяще́нніи оде́ждею облече́на, внегда́ священнодѣ́йствовати, удиви́шася, о́тче, и согла́сно Христа́, всѣ́хъ Царя́, воспѣ́ша, всеблаже́нне.

Воздержа́ніе стяжа́лъ еси́ и непреста́нную моли́тву, вознося́щее смире́ніе, и любо́вь и́стинную, и безстра́стіе, о́тче, сего́ ра́ди Христо́съ благода́ть тебѣ́ подаде́ чуде́съ во вѣ́ки.

Богоро́диченъ: Вмѣща́еши Невмѣсти́маго, Дѣ́во, па́че ума́, Его́же имѣ́я Предте́ча крести́ти, ужаса́яся и трепе́ща, вопія́ше: Огнь сы́й, Христе́, не опали́ мене́, любо́вію пою́ща Тя́.

Пѣ́снь 9.

Ирмо́съ: Живопріе́мный исто́чникъ приснотеку́щій, свѣтоно́сный свѣти́льникъ благода́ти, хра́мъ одушевле́нный, сѣ́нь пречи́стую, небесе́ и земли́ простра́ннѣйшую, Богоро́дицу, вѣ́рніи, велича́емъ.

Торжеству́йте дне́сь, человѣ́цы, рѣ́ки и го́ры, игра́йте: Іису́съ креща́ется, Спа́съ яви́ся и спрославля́етъ Свои́мъ явле́ніемъ Маркіа́на свято́е преставле́ніе.

Жела́ній кра́йнѣйшее дости́глъ еси́, отрѣши́вся у́зъ тѣле́сныхъ, богоно́сне преподо́бне, зря́ свѣ́тлости святи́телей, проро́ковъ и апо́столовъ, съ ни́миже на́съ, чту́щихъ тя́, помина́й.

Богоро́диченъ: Но́сиши Бо́га на руку́, пита́ющаго Богодѣ́льною си́лою вся́ческая, Его́же ви́дѣвъ Предте́ча, креще́нія прося́ща, недоумѣва́етъ у́жасомъ, Богороди́тельнице, и исполня́етъ со стра́хомъ повелѣ́нное.

Стихи́ры, гла́съ 1. Подо́бенъ: Всехва́льніи.

Отче свяще́ннѣйше, твоего́ житія́ свѣтлостьми́ вселе́нная просвѣти́ся, и омрачи́ся де́монская ле́сть, неду́зи отгоня́ются то́чію прикоснове́ніемъ ра́ки твоея́: Боже́ственная бо благода́ть, твоя́ мо́щи осія́вши, страсте́й рѣши́тъ омраче́ніе.

Отче досточу́дне, хра́мъ себе́ сотвори́лъ еси́ Присносу́щнаго Божества́, хра́мы же воздви́глъ еси́ свяще́нныя Боже́ственнѣй Тро́ицѣ на похвале́ніе, ме́ртвыя же возста́вилъ еси́ глаго́ломъ и ми́лостивенъ стяжа́лъ еси́ нра́въ, разда́лъ еси́ бога́тство прося́щимъ со усе́рдіемъ.

Наготу́ проси́вшаго я́вѣ, о́тче, покры́лъ еси́, на́гъ са́мъ входя́ во хра́мъ святы́й, Боже́ственною же оде́ждею тя́ Христо́съ облече́, Боже́ственная соверша́юща та́инства, ея́же удиви́шася добро́тѣ ви́дѣвшіи и Бо́жія тя́ позна́вше уго́дника.

Сла́ва, и ны́нѣ, гла́съ то́йже:

Бою́ся Твоего́ прише́ствія, Христе́, оба́че повелѣ́нію Твоему́ не проти́влюся, ра́бъ Тво́й, се́ ру́ку мою́ простира́ю со стра́хомъ: ви́жду бо Свята́го съ высоты́ сходя́ща Ду́ха, Влады́ко, Твоего́ Единоче́стнаго и Отцу́ Безнача́льному Сопресто́льна, свидѣ́тельствующа Тя́, пло́тію креща́ема.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 134 – 136 об.

/ Къ оглавленію раздѣла /


Наверхъ / Къ титульной страницѣ

0