Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 10-й де́нь.
Иже во святы́хъ отца́ на́шего Григо́рія, епи́скопа Ниссíйскаго. И преподо́бнаго Дометіа́на, епи́скопа Мелити́нскаго.

[ВЕЧЕРЪ,]
На Го́споди воззва́хъ: стихи́ры свята́го Григо́рія, гла́съ 5. Подо́бенъ: Преподо́бне о́тче.

Преподо́бне о́тче, свяще́ннѣйше Григо́ріе, тро́сть, испо́лнена Утѣ́шителя дыха́нія, и язы́че яснѣ́йшій благоче́стія, свѣти́льниче многосвѣ́тлый Боже́ственныя зари́, проповѣ́дниче и́стины, основа́ніе богосло́вія, исто́чниче догма́товъ высо́кихъ, наказа́ній пото́че медото́чныхъ, цѣвни́це боговѣща́нная, пѣ́сньми богопи́санными наслажда́ющая вѣ́рныхъ мы́сли, Христа́ моли́, Христу́ помоли́ся, всему́дре, въ струя́хъ Іорда́нскихъ обно́вльшему мíръ, спасти́ ро́дъ на́шъ.

Преподо́бне о́тче, всече́стне Григо́ріе, сѣки́ра, сѣку́щая еретико́въ стремле́нія, обоюдоо́стрый мечу́ Утѣ́шителя, ору́жіе, посѣка́ющее прелюбодѣ́йная сѣ́мена, о́гнь, хвра́стныя е́реси попаля́ющій, и лопа́та, вои́стинну земледѣ́лательная, е́юже тя́жкое и ле́гкое уче́ній благоразсужда́ется, и мѣ́рило, извѣ́ства вся́ пра́вящее ко стези́ спасе́нія, Христа́ моли́, Христу́ моли́ся всегда́, во струя́хъ Іорда́нскихъ назда́вшему мíръ, спасти́ ро́дъ на́шъ.

Преподо́бне о́тче, всеблаже́нне Григо́ріе, уста́, источа́ющая блаже́нныя гла́сы, отъ неоску́дныхъ спасе́нія че́рплющая и Боже́ственныхъ исто́чниковъ, словеса́ же моли́твы всѣ́мъ сказу́я, пра́вило, пра́вящее къ добродѣ́тели, и́же видѣ́ньми Боже́ственными просвѣще́нъ, заре́ю осія́емь Тро́ицы несозда́нныя, Ея́же и побо́рникъ непобѣди́мь бы́лъ еси́, Христу́ моли́ся, Христа́ моли́, всему́дре, въ струя́хъ Іорда́нскихъ назда́вшаго мíръ, спасти́ ро́дъ на́шъ.

Ины стихи́ры Дометіа́на, гла́съ 1. Подо́бенъ: Всехва́льніи му́ченицы.

Иже зе́млю истреби́ти* пе́рвѣе запрети́въ всю́* и изсуши́ти мо́ре хваля́йся,* наруга́емь вѣ́рными, показа́ся,* я́ко пти́ца дне́сь* и посмѣя́тельнѣйшъ кома́ръ:* ему́же суди́ся ви́дъ,* я́коже нѣ́кое страши́лище,* и попра́вся Христо́вымъ уго́дникомъ.

Дометіа́нъ на́съ, вѣ́рніи,* созыва́етъ дне́сь* къ трапе́зѣ богоуго́днѣй,* къ сему́ сни́демся* благоду́шія нра́вомъ* и спра́зднуимъ ему́* того́ исправле́нія,* моля́ще Спа́са ду́шъ на́шихъ* ми́ръ мíрови дарова́ти.

Возрасти́лъ еси́ тала́нтъ Христо́въ,* да́нный тебѣ́, всече́стне,* сугу́бою благода́тію,* я́ко ра́бъ и́скренній.* Тѣ́мже слы́шиши:* благíй ра́бе, бу́ди тебѣ́,* я́ко и́стинну благо́му уго́днику,* и ны́нѣ вни́ди въ ра́дость Го́спода твоего́,* трудо́въ пріе́мъ воздая́нія.

Сла́ва, гла́съ 4:

Прему́дрости сло́во твое́ украси́въ добродѣ́телію непоро́чною, преудо́бренъ во обои́хъ бы́лъ еси́, Ниссíйскій Григо́ріе, боговѣща́ннымъ твои́мъ гла́сомъ украша́я и веселя́ лю́ди разу́мно, Тро́ицы Единобо́жное прему́дре излага́я. Тѣ́мже и правосла́вными иноплеме́нныя е́реси побѣди́въ, держа́ву вѣ́ры въ концѣ́хъ воздви́глъ еси́. Христу́ предстоя́ съ невеще́ственными служи́тели, и душа́мъ на́шимъ испроси́ ми́ръ и ве́лію ми́лость.

И ны́нѣ, гла́съ то́йже:

Трепета́ше рука́ Крести́телева, егда́ пречи́стому Твоему́ верху́ косну́ся. Возврати́ся Іорда́нъ рѣка́ вспя́ть, не дерза́ющи служи́ти Тебѣ́: я́же бо устыдѣ́ся Іису́са Нави́на, ка́ко Творца́ своего́ устраши́тися не имя́ше? Но все́ испо́лнилъ еси́ смотре́ніе, Спа́се на́шъ, да спасе́ши мíръ явле́ніемъ Твои́мъ, Еди́не Человѣколю́бче.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пѣ́ніе новолѣ́пное* да пое́тъ вся́ тва́рь* отъ Дѣ́вы ро́ждшемуся Христу́* и кре́щшемуся* во Іорда́нѣ дне́сь.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Труба́ проро́ческая,* Предте́ча да вопіе́тъ:* сотвори́те Го́споду,* кре́щшемуся въ струя́хъ,* плоды́ изря́днѣйшихъ дѣя́ній.

Сти́хъ: Что́ ти е́сть, мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Возсія́ сро́дный съ высоты́* Боже́ственный Ду́хъ* въ ви́дѣ голуби́нѣ,* зри́мь несказа́нно,* ны́нѣ Христу́ притече́.

Сла́ва, гла́съ 4:

Житіе́ боже́ственно испра́вивъ, видѣ́ніемъ дѣя́ніе уясни́лъ еси́, богоявле́нне Григо́ріе, му́дрость бо возлюби́въ жела́ніемъ боже́ственнымъ, изъ у́стъ Ду́ха благода́тію обогати́лся еси́ и, я́ко со́тъ ме́да, сла́дость твои́хъ слове́съ иска́пая, при́сно весели́ши ра́зумы боже́ственными Це́рковь Бо́жію. Тѣ́мже на небесѣ́хъ святи́тельски водворя́яся, о на́съ непреста́нно моли́ся, соверша́ющихъ па́мять твою́.

И ны́нѣ, гла́съ то́йже:

Тебе́, въ Ду́сѣ и огни́ очища́юща грѣ́хъ мíра, зря́ Крести́тель гряду́ща къ себѣ́, ужаса́яся и трепе́ща, вопія́ше, глаго́ля: не смѣ́ю держа́ти ве́рхъ Тво́й пречи́стый, Ты́ мя́ освяти́, Влады́ко, Боже́ственнымъ явле́ніемъ Твои́мъ, Еди́не Человѣколю́бче.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ, пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
По 1-й стихоло́гіи сѣда́ленъ, гла́съ 3. Подо́бенъ: Дѣ́ва дне́сь.

Влады́ка дне́сь на Іорда́нъ пріи́де, крести́вся въ вода́хъ отъ боже́ственнаго Предте́чи. Свы́ше же Оте́цъ свидѣ́тельствоваше: Се́й е́сть Сы́нъ Мо́й, въ Не́мже благоизво́лихъ. И Ду́хъ яви́ся стра́ннымъ ви́домъ голуби́нымъ надъ Ни́мъ.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Богоявле́нія вре́мя, Христо́съ яви́ся на́мъ во Іорда́нѣ рѣцѣ́. Пріиди́те, почерпе́мъ, вѣ́рніи, во́ду оставле́нія грѣхо́въ на́шихъ: Христо́съ бо пло́тію пріи́де, овча́те ища́, звѣрьми́ похище́ннаго, и, обрѣ́тъ, введе́, я́ко Благоутро́бенъ, въ ра́й па́ки. Христо́съ яви́ся на Іорда́нѣ и мíръ просвѣти́.

Сла́ва, и ны́нѣ, то́йже.

Кано́нъ пра́здника на 6, и святы́хъ два́.

Кано́нъ пра́здника, гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.

Инъ кано́нъ свята́го Григо́рія, гла́съ 5.
Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Бе́здна сы́й прему́дрости, и ра́зума сокро́вище, и самобла́гости Исто́чникъ сы́й, дае́ши ми́, Христе́, сла́вныя Твоея́ Це́ркве пѣ́сньми свѣти́льника пѣ́ти Григо́рія.

Пріими́ учи́телей, Григо́ріе, свѣ́тлое удобре́ніе, о́тче, убо́гое пѣ́ніе твое́й приноси́мое отъ любве́ па́мяти, въ не́йже Христа́ на́мъ уми́лостиви.

Обрѣ́те очище́ну свяще́нную твою́ ду́шу отъ страсте́й тимѣ́нія Сія́ніе непристу́пное. Тѣ́мже, я́ко всели́вся въ тя́, о́тче, свѣ́тъ тя́ показа́, науча́юща земны́я концы́.

Сло́вомъ, священнотаи́нниче, бога́тымъ же и му́дрымъ, честну́ю Це́рковь богосло́вити научи́лъ еси́ Еди́ницу Тричи́сленную и Тро́ицу Сопресто́льну и Единоче́стну, о Григо́ріе!

Богоро́диченъ: Вѣ́ра да вмѣня́ется еди́на, а не показа́ніе су́щихъ па́че ума́ чуде́съ, Богороди́тельнице Дѣ́во, Твои́хъ, и́бо Непостижи́маго Бо́га Сло́ва родила́ еси́, обле́кшася въ человѣ́чество.

Инъ кано́нъ Дометіа́на, гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая, проти́вныя сотре́, изра́ильтяномъ пу́ть глубины́ новосодѣ́лавшая.

Воста́нія пло́ти, и страсте́й наше́ствія, богопрія́тне, и востаю́щую въ души́ мое́й укроти́ бра́нь, въ ми́рнѣ, о́тче, устрое́ніи соблюди́.

Жела́ніемъ и любо́вію неукло́нною Вы́шнѣй прему́дрости прикосну́вся, пло́ть покори́лъ еси́ и су́щая земна́я оттря́слъ еси́, преподо́бне, и Бо́гъ и́стинно въ прича́стіи бы́лъ еси́.

Дометіа́нъ чу́дный, пома́лу отъ земли́ возвыша́емь, пріи́де отъ си́лы худы́я къ соверше́ннѣй си́лѣ и восхожде́нія въ се́рдцы положи́.

Богоро́диченъ: Вода́ми омочи́въ пло́ти, е́же прія́тъ Госпо́дь смѣше́ніе, отъ Твои́хъ содѣ́ла дѣ́вственныхъ крове́й человѣ́чество, ко ополче́ніемъ проти́внымъ непобо́рно.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Пло́ти у́бо влады́цѣ уму́ взыгра́нія, Всецарю́ же у́мъ покори́лъ еси́. Тѣ́мже, непреткнове́нно пу́ть за́повѣдей проше́дъ, ты́ Тро́ицы оби́телище бы́лъ еси́ лѣ́потно, Григо́ріе.

Подо́бно я́ростное у́бо на змíя души́ вооружи́лъ еси́, всеблаже́нне, жела́ніе же Бо́гу все́ ку́пно просте́ръ, къ недомы́сленнѣй и неизмѣ́ннѣй добро́тѣ впери́лъ еси́, преподо́бне.

Дѣя́нію видѣ́ніе, о́тче, приложи́лъ еси́, тѣ́мже о́бласть Це́ркве тебѣ́ принося́, вруча́етъ Христо́съ, ю́же у́бо непоро́чно я́ко неботаи́нникъ упра́вилъ еси́ изря́днѣйшій, всеблаже́нне Григо́ріе.

Проходя́ добродѣ́телей предѣ́лъ, Григо́ріе, и восхожде́нія въ се́рдцы твое́мъ ты́ полага́я, отъ земли́ взя́лся еси́ непреста́ннымъ тече́ніемъ къ небе́сному жи́тельству пре́жде отъ пло́ти изше́ствія твоего́.

Богоро́диченъ: Ты́, Ма́ти Бо́жія, несочта́нно родила́ еси́ изъ нетлѣ́ннаго Отца́ Возсія́вшаго безъ болѣ́зней ма́тернихъ. Тѣ́мже Тя́, Богоро́дицу, воплоще́ннаго ро́ждшую Сло́ва, правосла́вно проповѣ́дуемъ.

Инъ.

Ирмо́съ: Еди́не Вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й: одушевле́нный хра́ме неизрече́нныя сла́вы Твоея́, Человѣколю́бче.

Въ крѣ́пости свое́й вра́гъ преве́тхій, твоея́ души́ не могíй крѣ́пости поколеба́ти, ухищря́етъ во вре́мя твоего́ разрѣше́нія та́йнами пти́цъ худы́хъ низложи́ти.

Велехвале́ніемъ свои́мъ пра́ведно изничто́жествуется пріуязвле́ніемъ змíй окая́нный, и въ ви́дъ пе́сіихъ му́хъ преврати́ся не́мощію множа́йшею, и подъ нога́ми лежи́тъ пра́ведныхъ кра́сными, попира́емь.

Богоро́диченъ: Изъ Тебе́ рожде́йся безъ сѣ́мене Сы́нъ Превѣ́чный, Дѣ́во Ма́ти, мíръ обнови́, сокрове́ннаго змíя вода́ми въ креще́ніи Свое́мъ умертви́въ Госпо́дь и тлѣ́нія человѣ́ки изба́вивъ.

Конда́къ пра́здника, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Конда́къ Григо́рія, гла́съ 2. Подо́бенъ: Въ моли́твахъ.

Це́ркве Боже́ственный іера́рхъ и прему́дрости честны́й тайноглаго́льникъ, Ниссíйскій бо́дрый у́мъ, Григо́рій, со а́нгелы ликовству́я и наслажда́яся Боже́ственнымъ свѣ́томъ, мо́лится непреста́нно о всѣ́хъ на́съ.

И сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственное осія́ніе наслѣ́довалъ еси́, житіе́ невеще́ственно пожи́въ, тезоимени́тнымъ свяще́нствомъ просія́лъ еси́, преесте́ственно бо уясни́въ уче́ньми, правосла́віемъ мíръ утверди́лъ еси́, о́тче преподо́бне. Христа́ Бо́га моли́ дарова́ти на́мъ ве́лію ми́лость.

Сла́ва, и́нъ сѣда́ленъ Дометіа́на, гла́съ 1. Подо́бенъ: Ка́мени запеча́тану.

Свяще́нства украша́емь, о́тче, пома́заніемъ богода́ннымъ, уясни́лъ еси́ сіе́ боже́ственными добро́тами добродѣ́телей и боже́ственнымъ ко Христу́ повинове́ніемъ и, сконча́въ твое́ тече́ніе, на небесѣ́хъ вопіе́ши со а́нгелы: сла́ва благоутро́бію Твоему́, Спа́се, сла́ва Ца́рствію Твоему́, сла́ва смотре́нію Твоему́, Еди́не Человѣколю́бче.

И ны́нѣ, пра́здника, гла́съ и подо́бенъ то́йже:

Іису́су ро́ждшуся отъ Дѣ́вы Марíи и во Іорда́нѣ кре́щшуся отъ Іоа́нна, Ду́хъ сни́де на Него́, зри́мый въ ви́дѣ голуби́нѣ. Сего́ ра́ди проро́къ со а́нгелы глаго́лаше, зовы́й: сла́ва прише́ствію Твоему́, Христе́, сла́ва Ца́рствію Твоему́, сла́ва смотре́нію Твоему́, Еди́не Человѣколю́бче.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Яко сто́лпъ, ви́дѣнъ бы́лъ еси́ всесвѣ́телъ житіе́мъ же и сло́вомъ, те́плою правосла́вія, Григо́ріе, разжже́нъ ре́вностію, Но́ваго Изра́иля предводя́.

Благода́ть пріи́мъ духо́вную, ве́тхаго зако́на раздра́лъ еси́ оде́жду писа́нія и сокрове́нную добро́ту на́мъ ра́зума откры́лъ еси́.

Всѣ́хъ добродѣ́телей ви́ды Христо́съ показу́я блаже́нствы, Григо́ріе, тебѣ́ ввѣ́ри, я́ко служи́телю Сло́ва, простра́нно сказа́ти конце́мъ.

Богоро́диченъ: Безъ смѣше́нія у́бо зачала́ еси́ нерастлѣ́нно во утро́бѣ, и пре́жде болѣ́зни родила́ еси́, и по рождествѣ́ Дѣ́ва, Бо́га пло́тію ро́ждши, сохрани́лася еси́.

Инъ.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Зако́нъ благода́ти показа́лъ еси́ бы́ти сѣ́нь, су́щимъ въ зако́нѣ Бо́жіи евре́емъ чту́щимъ, му́дре, и Ева́нгеліе и́стиннаго богоявле́нія та́инство, Христу́ взыва́я: сла́ва си́лѣ Твое́й, Го́споди.

Облиста́въ, я́ко звѣзда́ отъ восто́ка многосвѣ́тлая, Це́рковь просвѣща́еши, проповѣ́дая Христа́, му́дрыми показа́ньми всеблагоче́стно пра́вды Со́лнца, Тому́ взыва́я: сла́ва си́лѣ Твое́й, Го́споди.

Зло́бы вся́кія отто́ргнувся и любве́ вре́менныя, о́тче, со тща́ніемъ, и просвѣти́лъ еси́ свѣ́томъ оте́чества твоего́ концы́, му́дре, и си́мъ бога́тство одожди́лъ еси́ оби́льнѣйшимъ бога́тства коли́чествомъ.

Богоро́диченъ: Сло́во, я́ко Бо́гъ сы́й Неви́димый, пріи́мъ отъ Жены́ человѣ́чо естество́ ви́димо, соверша́етъ и очища́етъ въ рѣцѣ́, Иже грѣха́ чу́ждій, па́дшаго очища́я прегрѣше́нія.

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Ты́, я́ко о́гнь, попали́лъ еси́ ересе́й терноно́сная плете́нія слове́съ, вѣ́рныхъ же умы́ просвѣти́лъ еси́, блаже́нне, тайново́дче Григо́ріе.

Евно́міево ты́ изобличи́лъ еси́ беззако́ніе и сего́ словеса́ неудобоизбѣ́жная, сѣте́й же пру́гла зѣ́льная, я́ко паучи́нная тка́нія, разори́лъ еси́.

Обличи́лъ еси́, всеизря́днѣйше, безбо́жнѣйшаго Македо́нія, Боже́ственный Ду́хъ безсту́дно укори́вшаго, я́ко неприча́стна сему́ су́ща, Григо́ріе.

Богоро́диченъ: Ты́, пра́вду же и избавле́ніе на́мъ ро́ждши — Христа́ — безсѣ́менно, свобо́дно содѣ́яла еси́ отъ кля́твы, Богоро́дице, естество́ пра́отца.

Инъ.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія правосла́вно пою́щихъ Тя́.

Призрѣ́ на зе́млю Влады́ка тва́ри, и сея́ поколеба́шася, богому́дре, основа́нія и лю́тѣ сотрясо́шася, тебѣ́ же душе́внаго му́жества, о́тче, отъ моли́твы не уклони́.

Не терпѣ́лъ еси́ ху́лящихъ слы́шати, сла́вне, на Высоту́ и глаго́лати непра́вду безу́мныя, но тѣ́хъ обрати́лъ еси́ па́стырскимъ твои́мъ жезло́мъ и неду́жное исцѣли́лъ еси́.

Еди́но естество́ во Христѣ́ иму́щимъ проповѣ́дати, богоглаго́ливе, ника́коже попусти́лъ еси́ сло́жное, но тѣ́хъ улови́лъ еси́ уче́ній твои́хъ мре́жею и къ свѣ́ту возве́лъ еси́.

Богоро́диченъ: Услади́ во́дъ го́ресть со́лію Елиссе́й. Тво́й же, Богома́ти, Сы́нъ и Бо́гъ, кре́щся въ водѣ́, грѣха́ го́ресть и болѣ́знь отъя́тъ.

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Смире́нное мудрова́ніе стяжа́въ, всѣ́мъ же кро́токъ боре́цъ показа́лся еси́, Григо́ріе, проти́ву тща́щимся, ума́лити сла́ву Христо́ву.

Аріево отчужде́ніе Тро́ицы, сло́вомъ бога́тнымъ де́рзостное раздѣле́ніе, Григо́ріе, и всеконе́чно низложи́лъ еси́ мудрова́нія.

Неуче́нно соедине́ніе Тро́ическое смѣше́ніе му́дрствуя, тобо́ю Саве́ллій обличи́ся богобо́рецъ, Григо́ріе всеблаже́нне.

Богоро́диченъ: Дѣ́ва роди́ и, ро́ждши, пребы́сть чиста́, на рука́хъ Нося́щаго вся́ческая я́ко вои́стинну, Дѣ́во Ма́ти, носи́вши.

Инъ.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Изба́вишася, я́ко отъ сѣ́ти, преподо́бне, сме́ртныя бѣ́дствующіи лю́діе, и страсте́й мно́жество дале́че моли́твами твои́ми отгна́ся, и́бо са́ми пе́рвіи тя́ имѣ́ша засту́пника.

Потреби́лъ еси́ моли́твою, всему́дре, стремле́ніе неду́га, къ Дѣ́вѣ и Ма́тери Изба́вителя ско́ро прите́къ, не бо́ стерпѣ́лъ еси́, я́ко па́стырь сы́й, бѣ́дствующей па́ствѣ пренебрега́тися.

Богоро́диченъ: Ужасо́шася а́нгельстіи чи́ни, зря́ще Неви́димаго, изъ Дѣ́вы ро́ждшася пло́тію и невеще́ственно сла́вимаго, въ рѣцѣ́ крести́тися приходя́ща.

Конда́къ, гла́съ 1. Подо́бенъ: Ли́къ а́нгельскій.

Окомъ душе́внымъ бо́дрствуя, святи́телю, бо́дръ па́стырь яви́лся еси́ мíру, и жезло́мъ му́дрости твоея́, и те́плымъ предста́тельствомъ твои́мъ вся́ отгна́лъ еси́ злосла́вныя, я́ко во́лки, невре́дно соблю́дъ ста́до, Григо́ріе всему́дре.

Икосъ:

Лѣ́ностію окая́нный отпадо́хъ и къ сме́рти усну́хъ, но я́ко па́стырь бо́дрѣйшій возви́гни мя́, о́тче, и стра́сти моя́ успи́, злѣ́ му́чащія мя́, я́ко да, воста́въ, чи́стѣ воспою́ твое́ свѣтоно́сное преставле́ніе, е́же Влады́ка вселе́нныя просла́ви досто́йно, я́ко раба́ вѣ́рнѣйшаго, я́ко учи́теля всему́драго, я́ко дру́га и таи́нника и я́ко строи́теля Свои́хъ преда́ній, и́хже до́брѣ сохрани́лъ еси́ пома́заніе нескве́рно, Григо́ріе всему́дре.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси́ вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Жела́ніемъ соедини́вся Трисо́лнечнаго Божества́ сія́нію, Григо́ріе, всѣ́мъ, я́ко зерца́ло, сія́я, блиста́еши свѣ́та зари́.

Сокро́вище — словеса́ твоя́ оте́чески оста́вилъ еси́, обы́чай души́ очище́ніе и ра́зума исполне́ніе вѣ́рою пѣснопою́щимъ: Бо́же, благослове́нъ еси́.

Пе́рваго Ума́ и вино́вна, Отца́ возвѣсти́лъ еси́, Сло́ва у́бо Роди́теля, ку́пно же Производи́теля Ду́ха, Тро́ицу пѣснопоя́: Бо́же, благослове́нъ еси́.

Богоро́диченъ: Еди́ну у́бо Ѵпоста́сь во двою́ естеству́, Всенепоро́чная, родила́ еси́ воплоще́нна Бо́га, Ему́же вси́ пѣснопое́мъ: Бо́же, благослове́нъ еси́.

Инъ.

Ирмо́съ: Тебе́, у́мную, Богоро́дице, пе́щь разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Нело́жное вѣ́рнымъ соверши́ся обѣтова́ніе проявле́нно: боже́ственный бо Дометіа́нъ благода́ти сподо́бися рѣши́ти неду́ги и отгоня́ти де́моны, хва́льнаго провозвѣща́я Бо́га препросла́вленнаго.

На земли́ съ на́ми бы́въ и пло́тски пожи́въ, подаде́ послѣ́довавшимъ Ему́ и возлю́бльшимъ Его́ чудодѣ́йствія благода́ти, хва́льный отце́въ Бо́гъ и препросла́вленный.

Злочести́выя низложи́ е́реси боже́ственный Дометіа́нъ Севи́рова уче́нія, и непрело́жную вѣ́ру и Правосла́вную боголѣ́пно назна́мена, хва́льнаго возвѣща́я Бо́га и препросла́вленнаго.

Богоро́диченъ: Оте́ческаго не отступи́ естества́ Боже́ственное Сло́во, вопло́щся изъ Дѣ́вы: Ту́ю бо извѣ́стно соблюде́, пребы́вшу нескве́рну въ рождествѣ́, и пріе́млетъ е́же отъ Отца́ свидѣ́тельство Христо́съ, препросла́вленный во вѣ́ки.

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Всю́ зарю́ Утѣ́шителеву, блаже́нне, прія́лъ еси́ наше́дшую, зовя́, преподо́бне: вся́ дѣла́, Го́спода по́йте и превозноси́те во вся́ вѣ́ки.

Истека́ютъ на́мъ по Боже́ственному сло́ву Христо́ву изъ чре́ва твоего́ рѣ́ки ра́зума: вои́стинну бо исто́чника непреста́нна благода́ть показа́ мíру тя́, о́тче, во вѣ́ки.

О, чу́дныя бра́тскія дво́ицы, пло́тію же сро́дныя и боже́ственныя мудрова́ніемъ! Сію́ чту́ще, Васи́лія досто́йно вку́пѣ съ Григо́ріемъ почти́мъ во вѣ́ки.

Свѣ́тъ мы́сленный, въ тя́ всели́вся, о́тче, свѣщу́ тя негаси́му мíрови поста́вилъ е́сть, Еди́наго Свѣ́та пою́ща, Трисо́лнечна и Боже́ственна, Его́же превозно́симъ во вся́ вѣ́ки.

Богоро́диченъ: Тебе́, па́че ума́ Богому́жнымъ сло́вомъ ро́ждшую Го́спода и дѣ́вствующую, вся́ дѣла́, досто́йно благослови́мъ и превозно́симъ во вся́ вѣ́ки.

Инъ.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Превше́лъ еси́ ве́сь зако́нъ естества́ человѣ́ча, Бо́гу же прилѣпи́лся еси́, богоглаго́ливе, жела́ній Кра́йнѣйшему, поя́ Ему́: благослови́те, вся́ дѣла́, Го́спода и превозноси́те во вся́ вѣ́ки.

Услы́шавъ Боже́ственныя за́повѣди, расточи́лъ еси́ оби́льно бога́тство тре́бующимъ благопокоре́нія по́мысломъ, вопія́, досточу́дне: благослови́те, вся́ дѣла́, Го́спода и превозноси́те во вся́ вѣ́ки.

Исцѣле́ній, Дометіа́не, неоску́денъ бы́лъ еси́, источа́я пи́во, исто́чникъ, и пото́къ сла́дости, и рѣка́ ми́ра, вопію́щимъ: вся́ дѣла́, Го́спода по́йте и превозноси́те во вся́ вѣ́ки.

Богоро́диченъ: Въ пещи́ Тя́ обра́зно прописа́ша о́троцы, Дѣ́во, и въ купинѣ́ прообрази́ Моисе́й, и Дави́дъ зря́ Тя, ро́ждшую Младе́нца безму́жно, Го́спода сла́вы, Его́же превозно́симъ во вся́ вѣ́ки.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Инъ.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Исправле́ній же и слове́съ твои́хъ блиста́нія, Григо́ріе, восхвали́ти у́мъ не могíй я́вѣ на́шъ, исповѣ́дуетъ побѣжде́ніе благопохва́льно, твое́ же возвѣща́етъ па́че си́лы похвале́ніе.

Таи́нниче небе́сныхъ изря́днѣйше, Тро́ицѣ ны́нѣ предстоя́ со апо́стольскимъ ли́комъ и проро́ческимъ, му́чениковъ же, и пра́ведныхъ, и патріа́рховъ, помяни́ на́съ, воспѣва́ющихъ твою́ па́мять, Григо́ріе.

Назира́еши свы́ше, защища́я ны́нѣ, святи́телю Це́ркви Христо́вы, побѣ́ды да́руя Вѣ́рному Импера́тору, и рабо́тное сокруши́ и́го, твоя́ спаса́я пѣвцы́ моли́твами твои́ми, Григо́ріе.

Богоро́диченъ: Яко ро́ждши, Всечи́стая, тва́ри Содѣ́теля, по всему́ Рожде́ннаго но́сиши нача́ло, неоску́дное иму́щи вели́чіе и преесте́ственное. Тѣ́мже, Рождеству́ Твоему́ покланя́ющеся, Тя́ сла́вимъ.

Инъ.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Уста́вилъ еси́, о́тче, жела́нія любле́ній, удержа́въ соверше́ннѣйшее, и прія́ша тя́ патріа́рховъ селе́нія и пра́ведныхъ и преподо́бныхъ чи́ни, съ ни́миже мо́лиши о на́съ Вседержи́теля.

Имя́ше, я́коже имѣ́ніе че́стно, твое́ оте́чество, тѣ́ло твое́ многострада́льное скры́вшее свои́ми нѣ́драми, сла́вне, ма́терскими устреми́вшееся движе́ньми: тобо́ю бо наслажда́тися чужди́мъ не терпя́ше.

Гряди́ по́мощь бы́ти мнѣ́ въ напа́стехъ житія́ и обстоя́ніихъ, и утиши́ воздвиза́ющуюся бу́рю на мя́ страсте́й, и въ ти́хо приведи́ приста́нище вѣ́тромъ, о́тче, моли́твы твоея́.

Богоро́диченъ: Стоя́ше да́же до Тебе́ сме́рть, е́же по на́мъ бы́ти, за е́же спасти́ ны, Пресу́щне Сы́не Бо́жій, благоволи́вшаго изъ безму́жныя Ма́тере, и вода́ми ны́ очи́стити, и огне́мъ Боже́ственнымъ креще́нія.

Свѣти́ленъ. Подо́бенъ: Посѣти́лъ ны́.

Па́стыря до́браго, Григо́рія всему́драго, Ниссе́евъ предсѣда́теля, Васи́лія прему́драго единонра́внаго бра́та по пло́ти, пра́зднственными пѣ́сньми просла́вимъ вси́.

Сла́ва, и ны́нѣ, пра́здника.

Яви́ся Спа́съ, благода́ть и и́стина, во струя́хъ Іорда́нскихъ и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ны́нѣ стра́нно Спа́съ* человѣ́комъ да́руетъ очище́ніе,* кромѣ́ изваря́я огня́* и назида́я ду́ши* безъ сокруше́нія.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Во́ду боже́ственныя жи́зни* отъ исто́чниковъ спаси́тельныхъ,* лю́діе, съ весе́ліемъ* почерпи́те усе́рдно* ду́шъ на избавле́ніе.

Сти́хъ: Что́ ти е́сть мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Пріи́де Просвѣще́ніе,* Благода́ть яви́ся,* Избавле́ніе наста́,* мíръ просвѣти́ся,* лю́діе, ра́дости испо́лнитеся.

Слава, гласъ 1:

Пра́выя вѣ́ры до́блій подви́жниче, спострада́вый, я́ко до́бръ во́инъ Христа́ Бо́га, и Воево́дѣ угоди́вый: подвиза́йся и ны́нѣ по Це́ркви до́брымъ по́двигомъ, соблюда́я ю́ твои́ми догма́тами на недви́жимѣмъ основа́ніи, Григо́ріе.

И ны́нѣ, гла́съ 8. Іоа́нна мона́ха:

Го́споди, испо́лнити хотя́, я́же уста́вилъ еси́ отъ вѣ́ка, отъ всея́ тва́ри служи́тели та́йны Твоея́ прія́лъ еси́: отъ а́нгелъ — Гавріи́ла, отъ человѣ́къ — Дѣ́ву, отъ небе́съ — звѣзду́ и отъ во́дъ — Іорда́нъ, въ не́мже беззако́ніе мірско́е потреби́лъ еси́, Спа́се на́шъ, сла́ва Тебѣ́.


НА ЛИТУРГІИ,

Блаже́нна, отъ кано́на пра́здника пѣ́снь 5-я, со ирмосо́мъ на 4 и свята́го пѣ́снь 6-я, на 4. Проки́менъ, [гла́съ 7]: Честна́ предъ Го́сподемъ [сме́рть преподо́бныхъ его́]. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ къ Кори́нѳяномъ, зача́ло 151. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Матѳе́я, зача́ло 34 отъ полу́. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 134 – 145.

/ Къ оглавленію раздѣла /


Наверхъ / Къ титульной страницѣ

0