Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 9-й де́нь.
Свята́го му́ченика Поліе́вкта.

[ВЕЧЕРЪ,
На Го́споди воззва́хъ:] стихи́ры пра́здника, гла́съ 8. Подо́бенъ: Го́споди, а́ще и на суди́щи.

Го́споди,* а́ще и Іоа́нну предста́лъ еси́* на Іорда́нѣ я́ко Человѣ́къ,* но не отступи́лъ еси́ отъ престо́ла,* со Отце́мъ сѣдя́й,* и, кре́щся на́съ ра́ди,* мíръ свободи́лъ еси́* отъ рабо́ты чужда́го,* я́ко Ще́дръ и Человѣколю́бецъ.

Го́споди,* а́ще и Іорда́нскими вода́ми* обложи́лся еси́ я́ко Человѣ́къ,* но свидѣ́тельствовался еси́ свы́ше* сни́тіемъ Ду́ха,* и гла́съ Оте́чь Сы́на Тя́ свидѣ́тельствова,* но яви́ся и пода́ждь нетлѣ́ніе* душа́мъ на́шимъ.

Го́споди,* Ты́, отъ Отца́ пре́жде вѣко́въ* рожде́йся непремѣ́нный,* прише́лъ еси́ въ послѣ́дняя лѣ́та,* и зра́къ раба́ прія́лъ еси́,* и о́бразъ Тво́й* я́ко Зижди́тель обнови́лъ еси́,* крести́вся бо, дарова́лъ еси́ нетлѣ́ніе* душа́мъ на́шимъ.

Ины стихи́ры свята́го, гла́съ 1. Подо́бенъ: Небе́сныхъ чино́въ.

Дави́дски я́ко изъ ро́ва страсте́й Христо́съ* и отъ бре́нія тимѣ́нна,* и́дольскія ле́сти возведе́ тя, му́чениче,* поста́ви бо на ка́мени но́ги твоя́* и Своего́ позна́нія та́инственно.* Его́же моли́ спасти́ся на́мъ.

Ниже́ сопру́жницы твоея́ жела́ніе,* ни ча́дъ любле́ніе,* ниже́ твое́ досто́инство,* ниже́ бога́тство стяжа́ній и имѣ́ній* твое́ крѣ́пкое души́ поколеба́ша* отъ вѣ́ры и́стинныя су́щія во Христа́,* всеблаже́нне Поліе́вкте.

И пре́жде благода́ти,* му́чениче, твоего́ страда́нія* пра́вды дѣ́лы вои́стинну украси́лся еси́.* Тѣ́мже по си́хъ свидѣ́тель вѣ́ренъ* сподо́бился еси́ бы́ти Христо́въ,* твое́ю кро́вію крести́вся* въ сме́рть Его́ благоче́стно.

Сла́ва, гла́съ 1. Византíево:

Ангельская во́инства дне́сь лику́ютъ въ па́мяти му́ченика Поліе́вкта, и человѣ́ческій ро́дъ вѣ́рно торжеству́етъ и ра́достно вопіе́тъ: ра́дуйся, всехва́льне, и́же многоплете́ннаго веліа́ра ловле́нія побѣди́вши и побѣ́ды вѣнце́мъ отъ Христа́ вѣнча́выйся; ра́дуйся, во́ине вели́каго Царя́ и Спа́са на́шего, тре́бища и́дольская разори́вый; ра́дуйся, му́чениковъ удобре́ніе. Моли́ изба́вити отъ вся́каго преще́нія вѣ́рою соверша́ющія присночестну́ю па́мять твою́.

И ны́нѣ, гла́съ 2:

Дне́сь небесе́ и земли́ Творе́цъ прихо́дитъ пло́тію на Іорда́нъ, креще́нія прося́, Безгрѣ́шный, да очи́ститъ мíръ отъ ле́сти вра́жія. И креща́ется отъ раба́ Влады́ка вся́ческихъ и очище́ніе водо́ю ро́ду человѣ́ческому да́руетъ. Тому́ возопіи́мъ: явле́йся Бо́же на́шъ, сла́ва Тебѣ́.

На стихо́внѣ стихи́ры, гла́съ 6. Подо́бенъ: Тридне́венъ.

Предста́лъ еси́ на вода́хъ всѣ́мъ, Непостижи́мый, Предте́чи преклони́лъ еси́ главу́. Мíръ освяти́въ, рабо́ты изба́вилъ еси́ креще́ніемъ Твои́мъ, Безгрѣ́шне.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Сы́на возлю́блена Оте́цъ отъ вы́шнихъ дре́вле и Ду́хъ свидѣ́тельствова, Христе́, Имже Тро́ическое та́инство позна́ся, во Іорда́нѣ кре́щшуся Тебѣ́.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

Освяти́лъ еси́ во́ды, Спа́се, Іорда́нскія вся́ и естество́ водно́е, я́ко Бо́гъ. Тѣ́мже и сла́витъ явле́ніе Твое́ ро́дъ человѣ́ческій и воспѣва́етъ.

Сла́ва, и ны́нѣ, гла́съ 4. Космы́ мона́ха:

Одѣва́яйся свѣ́томъ, я́ко ри́зою, на́съ ра́ди по на́мъ бы́ти сподо́бился е́сть, во струи́ одѣва́ется дне́сь Іорда́нскія, не Са́мъ сія́ ко очище́нію тре́буя, но на́мъ Собо́ю устроя́яй порожде́ніе. О, чудесе́! Безъ огня́ изваря́етъ, и назида́етъ безъ сокруше́нія, и спаса́етъ въ Него́ просвѣща́емыя Христо́съ Бо́гъ и Спа́съ ду́шъ на́шихъ.

Тропа́рь, гла́съ 4:

Му́ченикъ Тво́й, Го́споди, Поліе́вктъ, во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, тропа́рь пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
[На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.]

По 1-й стихоло́гіи сѣда́ленъ, гла́съ 4. Подо́бенъ: Вознесы́йся.

Щедро́тами Твои́ми, Бо́же, умоле́нъ, заблу́ждшее и поги́бшее взыска́лъ еси́ за милосе́рдіе ми́лости Твоея́, Человѣколю́бче. Тѣ́мже прише́лъ еси́ на Іорда́нъ, сказа́въ та́инство Святы́я Тро́ицы. И, воспѣва́юще, зове́мъ вѣ́рно: прише́лъ еси́ и яви́лся еси́, Свѣ́тъ непристу́пный.

Сла́ва, и ны́нѣ, то́йже.

По 2-й стихоло́гіи, сѣда́ленъ, гла́съ 8. Подо́бенъ: Свирѣ́лей па́стырскихъ.

Яви́ся на́мъ всѣ́хъ Влады́ка во струя́хъ та́инственно Іорда́нскихъ очи́стити вся́къ грѣ́хъ, я́ко Ми́лостивъ и Пребла́гъ. Вся́ тва́рь да игра́етъ, я́ко креща́ется Христо́съ Госпо́дь, благоволи́вый спасти́ я́ко Бо́гъ ро́дъ человѣ́ческій.

Сла́ва, и ны́нѣ, то́йже.

Кано́нъ пра́здника со ирмосо́мъ на 8 и свята́го на 4.

Кано́нъ пр́аздника, гла́съ 2.
Пѣ́снь 1.

Ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Утру я́вльшуся человѣ́комъ свѣтоно́сну ны́нѣ изъ пусты́ни, къ вода́мъ Іорда́нскимъ, Царю́ преклони́лъ еси́ со́лнца Твою́ вы́ю, ли́ка мра́чна родонача́льника исхи́тити, скве́рны же вся́кія очи́стити тва́рь.

Безнача́льне, струя́мъ спогре́бшася Тебѣ́, Сло́ве, но́ваго прево́диши, истлѣ́вшаго ле́стію, Сего́ несказа́нно отъ Отца́ пріе́мъ гла́съ держа́венъ: Се́й возлю́бленный, ра́венъ же Мнѣ́ Отрокъ естество́мъ.

Кано́нъ свята́го, его́же краегране́сіе: Твою́ пода́ждь ми́, му́чениче, моли́твенную благода́ть. Ѳеофа́ново. Гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Многоже́ланныя пи́щи насыща́емь, и блаже́нныя зари́, сла́вне, исполня́емь, и а́нгельскаго ли́ка удостоя́емь, тво́й благохва́лящія пра́здникъ, Поліе́вкте, спаса́й, Го́споду пою́щія: сла́вно бо просла́вися.

Свѣтоно́сная и благознамени́тая па́мять твоя́, свѣ́та Боже́ственнѣйшаго полна́, возсія́, просвѣща́ющая свѣ́тло вѣ́рою воспѣва́ющія тя́, до́блій во́ине Христо́въ Поліе́вкте всеблаже́нне, Го́споду пою́щія: сла́вно бо просла́вися.

Вжиля́емь крѣ́постію Ду́ха и Боже́ственною си́лою, блаже́нне, одѣ́явся, изше́лъ еси́ тве́рдо къ боре́нію го́рдаго и, сего́ крѣ́пко низложи́въ, усе́рдно взыва́лъ еси́: Го́споду воспои́мъ, сла́вно бо просла́вися.

Богоро́диченъ: Воплоще́ннаго, пе́рвѣе Безпло́тнаго, Дѣ́во Богоро́дице, родила́ еси́, Всенепоро́чная и Всечи́стая, я́вѣ Дѣ́ва пребы́вши, бога́тствомъ благоутро́бія на́съ ра́ди обнища́вшаго и спа́сшаго Тому́ зову́щія: сла́вно бо просла́вися.

Пѣ́снь 3.

Ирмо́съ: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Умерщвле́ніе пе́рвѣе насади́вый тва́ри, звѣ́ря злодѣ́йственнаго вообра́жься въ естество́, омрача́ется плотски́мъ прише́ствіемъ: у́тру я́вльшуся, прирази́вся Влады́цѣ сокруши́ти свою́ вражде́бную главу́.

Влече́тъ къ себѣ́ Богозда́нное естество́, утро́бы мучи́теля, погребе́нное предѣ́лы; ражда́ется па́ки земноро́дныхъ Обновле́ніе, дѣ́ло держа́вно соверша́я Влады́ка: пріи́де бо, то́е очи́стити хотя́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Измѣни́лъ еси́ мудрова́ніе къ благоче́стію, свы́ше сподо́бився боже́ственнаго зрѣ́нія Спа́сова, Поліе́вкте.

Побѣ́ды жела́яй, вся́ оплева́лъ еси́, сла́вне, я́же на земли́, и небе́снаго наслѣ́дія сподо́бился еси́.

Сла́вы жела́я, я́же па́че ума́, устреми́лся еси́ терпѣли́вно и и́дольское безсла́віе низложи́лъ еси́.

Богоро́диченъ: Напра́ви моя́, Влады́чице, стопы́, да къ Твоему́ Сы́ну похва́льнымъ жи́тельствомъ пойду́.

Конда́къ, гла́съ 4. Подо́бенъ: Яви́лся еси́ дне́сь.

Спа́су прикло́ншу во Іорда́нѣ главу́, сокруши́шася зміе́въ главы́. Поліе́вктова же глава́ отсѣ́кшаяся льсти́ваго посрами́.

Икосъ:

Во Іорда́нѣ рѣцѣ́ Зижди́тель вся́ческихъ, главу́ преклони́въ, креще́ніе пріе́млетъ и, зміе́мъ главы́ неви́димо сокруши́въ, си́лу подаде́ человѣ́комъ на велему́дреннаго, пе́рвѣе въ раи́ запе́ншаго Ада́му снѣ́дію дре́ва и сме́рть нане́сшего ему́ безъ наде́жды. Тѣ́мже страда́лецъ ны́нѣ Поліе́вктъ, ласка́ньми жены́ не преклони́вся, пострада́ тве́рдо, просте́ръ главу́, е́йже, отсѣ́кшейся, льсти́ваго посрами́.

Сѣда́ленъ, гла́съ 5. Подо́бенъ: Собезнача́льное Сло́во.

Яко до́бръ во́инъ Христа́, всѣ́хъ Бо́га, благода́тію Сего́ укрѣпля́емь, всего́ преложи́лъ еси́ себе́ въ любо́вь Его́ Неа́рхомъ, вѣ́рнымъ во́иномъ, и́же съ тобо́ю, му́дре. Тѣ́мже, зако́нно пострада́въ, досто́йно вѣнча́лся еси́ отъ Го́спода, му́чениче Поліе́вкте.

Сла́ва, и ны́нѣ, пра́здника:

Іорда́нскими струя́ми обло́жся, Иже свѣ́томъ пресла́вно одѣва́яйся, въ ни́хже Ада́мово естество́ обнови́лъ еси́, сокру́шшееся злы́мъ преслуша́ніемъ, Сло́ве Бо́жій. Тѣ́мже Тя́ восхваля́емъ и свято́е Твое́ вси́ славосло́вимъ явле́ніе.

Пѣ́снь 4.

Ирмо́съ: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

По́сланъ отъ Отца́, всесвѣ́тлое Сло́во, но́щи отгна́ти зломра́чное стремле́ніе, и искорени́ти гряде́ши человѣ́ковъ грѣхи́, сы́ны же привлещи́, Твои́мъ Креще́ніемъ, Бла́же, свѣ́тлый отъ стру́й Іорда́нскихъ.

Са́мое прови́дѣвъ нарече́нное Сло́во, я́сно проповѣ́дникъ вопіе́тъ тва́ри: Се́й пре́жде мене́, вторы́й пло́тію сообра́зенъ, просія́ Боже́ственною си́лою вражде́бный на́шъ отъя́ти грѣ́хъ.

Па́жить у Себе́ животво́рну нося́, уловля́етъ зміе́въ, гнѣ́здамъ натека́я мно́гими сѣтьми́, низлага́я, Богъ Сло́во, запина́етъ же уязви́вшаго всемíрный ро́дъ, сего́ потре́бль, избавля́етъ тварь.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Благочести́вымъ исповѣ́даніемъ, всеизря́дне, Влады́цѣ са́мъ себе́ приве́лъ еси́, е́же за Того́, сла́вне, заколе́ніе любо́вію пріе́мъ и поро́ка вся́каго свобо́денъ бы́въ. Отсю́ду Спа́су взыва́еши: си́лѣ Твое́й сла́ва, Человѣколю́бче.

Сла́дость благоче́стія услади́ся тебѣ́, впери́лся еси́ Боже́ственною любо́вію, чи́стымъ и свѣ́тлымъ жела́ніемъ уя́звенъ и любо́вію распала́емь вы́шняго Ца́рствія, пѣснопое́ши Влады́цѣ: си́лѣ Твое́й сла́ва, Человѣколю́бче.

Преесте́ственнымъ единому́дріемъ связа́вся Неа́рху, сего́ же глаго́лы огласи́вся ко благочести́вѣй вѣ́рѣ Тро́ичестѣй, богому́дре му́чениче Поліе́вкте, вои́стинну многожела́нныя и любе́зныя сподо́бился еси́ му́чениковъ свѣ́тлости.

Му́ченическимъ сочи́слився во́инствомъ, Ца́рство прія́лъ еси́ недви́жимое, новозакла́вся, въ сіе́ вше́лъ еси́, еще́ кро́вемъ ка́плющимъ. Взя́лся же еси́, прему́дре, въ ра́дость непремѣ́нную, и Свѣ́тъ невече́рній, и вели́кія сла́вы получи́въ.

Богоро́диченъ: Уподо́бився су́щимъ на земли́, Небе́сный небе́сныя сія́ содѣ́ла и, пострада́въ естество́мъ стра́стнымъ, Боже́ственнаго безстра́стія прича́стіе дарова́. Сего́ у́бо Ро́ждшую, Неискусобра́чную Отрокови́цу Богоро́дицу вѣ́дуще, сла́вимъ.

Пѣ́снь 5.

Ирмо́съ: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Ви́дѣвъ Зижди́тель во мра́цѣ прегрѣше́ній плени́цами неизбѣ́жными его́же вообрази́ пе́рсты, поставля́етъ на обою́ ра́му, воздвигъ горѣ́, ны́нѣ во многотеку́щихъ вода́хъ омыва́я студа́ дре́вняго Ада́мова зла́го нра́ва.

Со благоче́стіемъ притеце́мъ прилѣ́жно ко исто́чникомъ пречи́стымъ тече́нія спаси́тельнаго, Сло́во усмотря́юще отъ Нетлѣ́нныя, почерпа́ла принося́ще жа́жди Боже́ственныя, мíра сла́достнѣ исцѣля́я неду́гъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Да присносу́щное получи́ши наслажде́ніе, блаже́ннѣйше, кра́сная житія́, и естества́ сво́йство, и сла́дость, и сла́ву, и жи́знь са́мую презрѣ́лъ еси́ и наде́жды твоея́ не погрѣши́лъ еси́.

Тайнонауче́нъ бы́въ Боже́ственнаго о́браза Боже́ственнымъ та́йнамъ, тве́рдымъ умо́мъ къ соверше́ннымъ подвиго́мъ отлучи́лся еси́ и, побѣдоно́сецъ я́влься, нетлѣ́нныхъ сподо́бился еси́ вѣнце́въ, Поліе́вкте.

Безбо́жнѣйшую че́сть, естество́мъ ненавистозло́бное имѣ́я мудрова́ніе, благоче́стно отри́нулъ еси́ и бо́ги су́етныя низве́рглъ еси́, благоче́стія ре́вностію разже́гся и усе́рдія богодохнове́ннаго испо́лнився, пресла́вне.

Богоро́диченъ: Рече́нію Твои́хъ усте́нъ, Пречи́стая, послѣ́дующе, Тя́ ублажа́емъ: съ Тобо́ю бо вои́стинну вели́чія сотвори́въ, Госпо́дь возвели́чи Тя́ и и́стинную Бо́жію Ма́терь, ро́ждся изъ утро́бы Твоея́, показа́.

Пѣ́снь 6.

Ирмо́съ: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Отъ глуби́ннаго льва́, тревече́рній стра́ннѣ проро́къ во вну́треннихъ валя́яся, а́біе произы́де, пакибытія́ спасе́ніе отъ змíя человѣкоубíйцы всѣ́мъ предъявля́я въ послѣ́дняя лѣ́та.

Отве́рсту не́бу всесвѣ́тлыхъ писа́ній, учени́къ зри́тъ отъ Отца́ посыла́емый, пребыва́ющъ же Ду́хъ на Пречи́стѣмъ Сло́вѣ, наше́дъ я́ко го́лубь неизрече́ннымъ о́бразомъ, лю́демъ же явля́ется, прише́дшимъ ко Влады́цѣ.

Инъ.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Чи́на а́нгельскаго удосто́ился еси́, досточу́дне му́чениче, а́нгельскую ре́вность я́вѣ показа́въ, съ ни́ми у́бо прилѣ́жно, блаже́нне, моли́, изба́витися отъ напа́стей воспѣва́ющимъ тя́.

Усну́лъ еси́ любе́знѣ, страда́льче, до́лжнымъ сно́мъ, отсѣ́кшейся главѣ́ мече́мъ, многострада́льне, и ны́нѣ на небесѣ́хъ жре́бій нетлѣ́ненъ наслѣ́довалъ еси́, съ му́ченики водворя́яся.

Сообра́зенъ и о́бщникъ страда́ній Спа́са бы́лъ еси́, на́съ ра́ди стра́сть кре́стную подъе́мшаго, и ны́нѣ, блаже́нне, съ Ни́мъ, я́коже обѣща́, ца́рствуеши во вѣ́къ безконе́чный.

Богоро́диченъ: Иму́щи милосе́рдіе, я́ко ро́ждши человѣколю́бное Сло́во, спаси́ ны ну́жднаго и лю́таго обстоя́нія: Тя́ бо еди́ну, вѣ́рніи, Всечи́стая Влады́чице, Предста́тельницу непобѣди́му стяжа́хомъ.

Конда́къ, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Пѣ́снь 7.

Ирмо́съ: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Тебе́ живопису́ющій ассирíйскій пла́мень ужа́сенъ поставля́еши, въ ро́су преведе́нъ; тѣ́мже вода́ ны́нѣ, я́коже пла́мень, одѣва́яй, вре́дную зло́бу, Христе́, прикрове́нную опаля́етъ, отъ поползнове́нныя стези́ призыва́ющи.

Раздѣ́льшуся Іорда́ну дре́вле, по су́ху прехо́дятъ лю́діе Изра́ильстіи, Тебе́, Держа́внѣйшаго, содержа́ща тва́рь некосни́тельнѣ, ны́нѣ въ вода́хъ напису́ющіи, къ нетлѣ́ннѣй и поле́знѣй стези́.

Вѣ́мы, пе́рвѣе всепа́губный пото́пъ ми́лостивно Тя́ всѣ́хъ во тлю́ привести́, о, тревели́кія сотворя́я и стра́нная́ Ны́нѣ же пото́пльша, Христе́, грѣ́хъ за благосе́рдіе и человѣ́ческое спасе́ніе.

Инъ.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Показа́лъ еси́, Влады́ко, Твоему́ рабу́ си́лу Твою́, сего́ ра́ди преусе́рдно къ подвиго́мъ пріи́де самозва́ненъ и, побѣдоно́сецъ бы́въ, поя́ше: благослове́нъ Бо́гъ оте́цъ на́шихъ.

Сла́вный и всезнамени́тый пра́здникъ тво́й, му́чениче, возсія́, явле́нія бо твоего́ Влады́ки свѣ́тъ прино́ситъ и озаря́етъ вѣ́рою зову́щія: оте́цъ на́шихъ Бо́же, благослове́нъ еси́.

Бога́тство некра́домо, пребыва́ющее обрѣ́лъ еси́ досто́инство и неотпа́дающе, но во вѣ́ки пребыва́ющую прія́лъ еси́ сла́ву, поя́, чу́дне: благослове́нъ Бо́гъ оте́цъ на́шихъ.

Богоро́диченъ: Безнача́льному Роди́телю Спребыва́ющаго при́сно Разумѣва́емаго заче́нши, Дѣ́во, воплоще́нна Сы́на родила́ еси́, за е́же спасти́ вѣ́рою зову́щія: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

Тріе́ богови́дніи, во огни́ ороша́еми, озаря́ющеся треми́ всесвѣ́тлѣ святы́нями, я́вѣ показова́ху Превы́шнее Естество́ смѣше́ніемъ человѣ́ческимъ, огнепаля́щее росо́ю ми́лостивно вся́ку па́губную ле́сть.

Да убѣли́тся вся́кое земно́е естество́, отъ паде́нія ны́нѣ на не́бо возводи́мо, Имже бо вся соблюда́ются, Сло́вомъ, теку́щими струя́ми омы́вшеся, прегрѣше́ній пре́жнихъ убѣже́, пресвѣ́тло измове́но.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Священнодѣ́йствуется дне́сь многомоле́бная па́мять твоя́, му́чениче страстоте́рпче Христо́въ Поліе́вкте: Христу́ бо благоуго́дна и прія́тна же́ртва бы́лъ еси́, закла́вшемуся тебе́ ра́ди и поже́ршуся. Его́же о́троцы благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Страда́льческое сопротивле́ніе, страстоте́рпче, да́же до кро́ве показа́въ на земли́, Поліе́вкте, въ черто́гъ многосвѣ́тлый на небесѣ́хъ всели́лся еси́, твои́хъ крове́й кре́щся ба́нею и поя́ Влады́цѣ: свяще́нницы, воспо́йте, лю́діе, превозноси́те во вся́ вѣ́ки.

Умерщвле́нную паде́ньми ду́шу мою́ возста́ви, му́ченическимъ твои́мъ дерзнове́ніемъ объе́мъ, Боже́ственнымъ повелѣ́ніемъ причита́я, сла́вне, достолѣ́пно къ добродѣ́тели обраща́я вопію́щую Влады́цѣ: свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Ра́дуйся, Ея́же ра́ди обрѣто́хомъ ра́дость вѣ́чную; ра́дуйся, Евину печа́ль разрѣши́вшая, Ада́мово сѣ́тованіе въ свѣ́тлость обрати́вши; ра́дуйся, Бо́га воплоще́нна ро́ждшая, Дѣ́во Богоро́дице, вѣ́рныхъ Предста́тельнице, Тя́ превознося́щихъ во вся́ вѣ́ки.

Пѣ́снь 9.

Ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

Увѣ́дѣхомъ Моисе́ю купино́ю явле́нная, гряди́, стра́нными уста́вы содѣ́ланная: я́ко бо спасе́ся, Огнь нося́щи, Дѣ́ва, Свѣтоно́сна ро́ждши Благодѣ́теля, во Іорда́нскихъ же струя́хъ явле́нна.

Помазу́еши, соверша́я человѣ́ческое существо́, Царю́ Безнача́льне, Ду́ха обще́ніемъ, струя́ми чи́стыми отмы́въ и тмы́ крѣ́пость же посра́мль возвы́шенную, ны́нѣ въ безпреста́ннѣмъ возда́ти житіи́.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Пріиди́те, у́бо боговѣнча́ннаго, мучениколю́бцы, воспои́мъ му́ченика, его́же спросла́ви свѣтоиме́ннымъ Свои́мъ Вы́шній явле́ніемъ, и честны́мъ дне́мъ почествова́, и вѣнча́, и боже́ственными добродѣ́тельми украси́.

Струя́ми му́ченическихъ излія́вшихся твои́хъ крове́й удави́лъ еси́ вражде́бнѣйшаго, зло́бу содѣ́лавшаго, Це́рковь же Христо́ву напая́я, уясни́лъ еси́, богоблаже́нне, вѣ́рою тя́ при́сно блажа́щую.

Бу́ди ми́, му́чениче, помо́щникъ, отъ напа́стей мя́ разли́чныхъ избавля́я и обстоя́ній, у́зъ же рѣша́ е́реси и лю́тыя свобожда́я темни́цы моли́твами твои́ми, воспѣва́ющаго тя́ мы́слію чи́стою, пресла́вне.

Богоро́диченъ: Зако́на же и проро́ковъ Главу́, Христа́, и полноту́, Всечи́стая, родила́ еси́, за благоутро́біе безмѣ́рныя пучи́ны вочеловѣ́читися на́съ ра́ди изъ Тебе́ благоизво́лившаго и спа́сшаго вѣ́рою Тя́ при́сно велича́ющія.

Свѣти́ленъ свята́го. Подо́бенъ: Ду́хомъ во святи́лищи.

Многожела́нное стяжа́въ отъ души́ многожела́нныя бога́тство небе́сное, о Поліе́вкте блаже́нне, и сла́ву, и свѣ́тлость, въ Бо́зѣ бы́въ, и вѣне́цъ Боже́ственный прія́лъ еси́ отъ руки́ Вы́шняго съ му́ченическими ли́ки, я́ко му́ченикъ и́стиненъ.

Сла́ва, и ны́нѣ, пра́здника:

Въ ра́біи о́бразѣ прише́лъ еси́, Сло́ве, и креще́нія, Безлѣ́тный, я́ко Человѣ́къ про́сиши. Ужасе́ся земля́ и не́бо, и а́нгельстіи чи́ни, и водно́е естество́. Предте́ча же, убоя́вся, стра́хомъ и ра́достію служе́ніе соверша́ше.

На стихо́внѣ стихи́ры, гла́съ 6. Подо́бенъ: Ангельскія предыди́те си́лы.

Скажи́ и рцы́, о проро́че Иса́іе! кто́ е́сть, зовы́й въ пусты́ни? Что́ вопіе́ши: почерпи́те у́бо во́ду чисти́тельну съ весе́ліемъ? Се́ Іоа́ннъ, креща́яй въ пусты́ни и возопи́вый: Христо́съ гряде́тъ, благослове́нъ, явле́йся Бо́же на́шъ, сла́ва Тебѣ́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

О, па́че ума́ и неизрече́ннаго благоутро́бія! Ка́ко Творе́цъ тва́ри преклоня́етъ Пречи́стый и Боже́ственный ве́рхъ, креще́ніемъ о́бразъ смире́нія вводя́ въ Него́ просвѣща́емымъ? Въ Не́мже пое́мъ: благослове́нъ, явле́йся Бо́же на́шъ, сла́ва Тебѣ́.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

Наслажде́ніе живо́тно отъ пото́ка Іорда́нова источи́ся на́мъ креще́нія благода́ть, и́мже просвѣти́вшеся креще́ніемъ, глаго́лемъ: сла́ва Явльшемуся въ мíрѣ и живо́тъ на́мъ Пода́вшему. Въ Не́мже пое́мъ: благослове́нъ, явле́йся Бо́же на́шъ, сла́ва Тебѣ́.

Сла́ва, и ны́нѣ, гла́съ и подо́бенъ то́йже:

Яко вредя́щихъ земны́хъ отве́дшеся, пріиди́те мы́сленно, очи́стимъ чу́вства и, Христа́ ви́дѣвше, пло́тію креща́ема отъ Іоа́нна Предте́чи, вси́ съ ни́мъ, пѣсносло́вяще вѣ́рно, возопіе́мъ: благослове́нъ, явле́йся Бо́же на́шъ, сла́ва Тебѣ́.


НА ЛИТУРГІИ,
Блаже́нна пра́здника, пѣ́снь 4-я [обои́хъ кано́новъ], на 6.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 116 – 123.

/ Къ оглавленію раздѣла /


Наверхъ / Къ титульной страницѣ

0