Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 9-й де́нь.
Слу́жба и́же во святы́хъ отца́ на́шего Фили́ппа, митрополи́та Моско́вскаго и всея́ Россíи, но́ваго исповѣ́дника.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Въ небе́сныя оби́тели* всели́вся, Фили́ппе святи́телю,* и со а́нгелы предстоя́ престо́лу Христо́ву,* я́ко и́стиненъ архіере́й и страда́лецъ,* моли́ прегрѣше́ній на́мъ разрѣше́ніе дарова́ти* и душа́мъ на́шимъ ми́ръ и ве́лію ми́лость. [Два́жды.]

Кро́тко царя́ умоля́я* и дерзнове́нно поуча́я,* е́же нераздѣ́льну бы́ти его́ ца́рству,* Фили́ппе святи́телю,* душе́вную бразду́ отъ грѣ́хъ очища́я* и, я́ко сѣ́мена, Бо́жіе сло́во влага́я,* я́же и на́мъ возраща́еши* ко спасе́нію ду́шъ на́шихъ.

До́мъ духо́вныхъ добродѣ́телей бы́лъ еси́,* святи́тель и исповѣ́дникъ и́стиненъ показа́вся,* въ тебѣ́ бо жили́ще, я́ко въ честнѣ́мъ хра́мѣ,* Христо́съ Себѣ́ сотвори́.* Моли́ся, о́тче, пода́ти всѣ́мъ на́мъ вѣ́чное спасе́ніе* и душа́мъ на́шимъ ве́лію ми́лость.

Сла́ва, гла́съ 6:

Святи́телей удобре́ніе и отце́въ красоту́, о земли́ Россíйстѣй моле́бника вели́ка, соше́дшеся дне́сь, о празднолю́бцы, пѣ́сненными похвала́ми воспои́мъ, глаго́люще: ра́дуйся, святи́телю Фили́ппе, тве́рдый у́ме, благода́тію и и́стиною освяще́нный, отню́дуже и прія́телище бы́лъ еси́ Пресвята́го Ду́ха. И ны́нѣ съ первосвяти́тели предстоя́ престо́лу Христо́ву, моли́ся о душа́хъ на́шихъ.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ Ду́ха Свята́го* яви́лся еси́, святи́телю,* вну́трь имѣ́я сло́во прему́дрости,* Фили́ппе блаже́нне,* о на́съ моли́ся Христу́ Бо́гу.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Звѣзду́ Россíйскую* пѣ́сньми восхва́лимъ,* я́ко заря́ми, вся́ просвѣща́ющу* въ нощи́ невѣ́дѣнія,* къ свѣ́ту богоразу́мія осіява́ющу.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

До́мъ Ду́ха Свята́го бы́лъ еси́,* благода́тію испо́лненъ* Боже́ственныхъ уче́ній,* и́миже напоя́еши мíръ,* прему́дре Фили́ппе.

Сла́ва, и ны́нѣ, богоро́диченъ, гла́съ то́йже:

Ра́дуйся, Марíе Богоро́дице, Хра́ме неразруши́мый, па́че же святый́, я́коже вопіе́тъ проро́къ: свя́тъ хра́мъ Тво́й, ди́венъ въ пра́вду.

[Тропа́рь пи́санъ на вели́цѣй вече́рни.]



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ.., стихи́ры на 8: пра́здника 3 и свята́го 5.
Стихи́ры святи́теля, гла́съ 5. Подо́бенъ: Ра́дуйся, живоно́сный.

Ра́дуйся, свяще́нная главо́,* чи́стый сосу́де Свята́го Ду́ха,* святи́телю Фили́ппе,* богодохнове́нный орга́не,* благоче́стія пучи́но неисчерпа́емая,* церко́вное украше́ніе,* Ца́рствующаго гра́да Москвы́ вели́кое удобре́ніе,* Россíйское утвержде́ніе,* оби́димыхъ засту́пниче,* апо́столовъ ревни́телю,* нра́вы подо́бниче Златоу́стому,* му́жественно положи́лъ еси́ ду́шу твою́ за па́ству твою́,* Христа́, и́стиннаго Архипа́стыря, подража́я,* Его́же, моли́ дарова́ти душа́мъ на́шимъ* ми́ръ и ве́лію ми́лость. [Два́жды.]

Ра́дуйся, златоза́рная уста́,* богопѣ́снивая ла́стовице, преподо́бне,* сто́лпе Правосла́вія непоколеби́мый* и гра́да на́шего стѣна́ необори́мая,* прибѣ́жище скорбя́щихъ,* обурева́емыхъ приста́нище ти́хое,* всѣ́хъ притека́ющихъ къ тебѣ́ защи́тниче отъ бѣ́дъ и скорбе́й* и подуща́телю къ ре́вности пѣ́ній боголѣ́пныхъ,* му́ченикомъ и исповѣ́дникомъ подо́бниче,* равностоя́телю святы́хъ а́нгелъ,* апо́столовъ единонра́вне,* Христа́ непреста́нно моли́,* дарова́ти душа́мъ на́шимъ* ми́ръ и ве́лію ми́лость.

Ра́дуйся, свяще́нная главо́,* святи́телю Фили́ппе,* я́ко многосвѣ́тлое со́лнце,* озаря́еши всю́ду уче́ніи твои́ми* и упа́слъ еси́ ста́до твое́ на па́житѣхъ духо́вныхъ,* незы́бленъ, я́ко на ка́мени основа́нъ тве́рдѣмъ.* Тѣ́мже и му́жествомъ твои́мъ царя́ удиви́лъ еси́,* я́рость его́ на кро́тость преложи́ти моля́,* ку́пно и претя́,* за е́же непра́ведно престо́ла и па́ствы тя́ лиши́въ, о́нъ* посла́ Тфе́ри гра́да въ монасты́рь, нарица́емый Отрочь,* идѣ́же непра́ведно сме́рть прія́лъ еси́,* моля́ся о убива́ющихъ тя́ и глаго́ля:* Го́споди, не поста́ви и́мъ въ грѣ́хъ сего́!* Тѣ́мже отъ Христа́ Бо́га вѣне́цъ тебѣ́ дарова́ся, блаже́нне,* Его́же моли́ дарова́ти душа́мъ на́шимъ* ми́ръ и ве́лію ми́лость.

Ра́дуйся, по́стническихъ подвиго́въ носи́вый ле́гкій яре́мъ,* Тро́ицы чи́стый до́ме,* благово́нный сосу́де,* церко́вное утвержде́ніе,* апо́столовъ сопресто́льниче,* святи́телемъ удобре́ніе,* сла́ва му́чениковъ* и преподо́бныхъ украше́ніе,* пра́вило добродѣ́телей извѣ́стное,* смире́нія свѣ́тлая высото́,* оби́димыхъ засту́пниче,* ни́щихъ пита́телю.* Христа́, блаже́нне, моли́* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 8:

Ра́дуйся и весели́ся, сла́внѣйшій гра́де Москва́, свѣ́тло торжеству́й, Христо́ва Це́ркви, совоку́пльшися, лику́й, богосо́бранная па́ство: дне́сь созыва́етъ на́съ архипа́стыря всемíрное торжество́. Пріиди́те, у́бо свѣ́тло пра́зднуемъ въ па́мять его́, глаго́люще: ра́дуйся, святи́телю богому́дре, и́же, я́ко броне́ю, му́жествомъ духо́внымъ вооружи́лъ еси́ себе́ и непослу́шающія тя́ обличи́лъ еси́ необинове́нно да́нною тебѣ́ отъ еди́наго Бо́га вла́стію; ра́дуйся, скорбя́щимъ душе́ю боже́ственное утѣше́ніе, и оби́димымъ защи́тниче, и всѣ́мъ вѣ́рнымъ благоути́шное приста́нище. Тѣ́мже, обстоя́ще всечестну́ю твою́ ра́ку, любе́зно облобыза́емъ, святи́телю Фили́ппе: тобо́ю про́симъ получи́ти Боже́ственнаго человѣколю́бія и твои́ми моли́твами мíру ми́ръ дарова́ти и душа́мъ на́шимъ ве́лію ми́лость.

И ны́нѣ, пра́здника.
Вхо́дъ. Проки́менъ дне́. И чте́нія.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

Прему́дрости Соломо́новы чте́ніе. [Главы́ 10, 6, 8 и 9.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

На литíи стихи́ры, гла́съ 1:

Лѣ́потно оте́чества твоего́ не оста́вилъ еси́, о́тче Фили́ппе, но возврати́лся еси́ въ Ца́рствующій гра́дъ Москву́, въ не́мже, Ду́хомъ Святы́мъ освяти́вся, бы́лъ еси́ архіере́й и па́слъ еси́ па́ству твою́ многотру́дно, за ю́же мно́гая озлобле́нія, и безче́ствованія, и изгна́ніе претерпѣ́лъ еси́ и пострада́лъ еси́ ея́ ра́ди да́же до сме́рти, и ко Христу́ пресели́лся еси́, ра́дуяся. Ны́нѣ же па́ки Це́рковь ви́дѣвши тя́ въ себѣ́, возвесели́ся въ возвраще́ніи твое́мъ, я́ко бо да́ръ многоцѣ́ненъ, пріе́мши оста́нки твоя́, зове́тъ Влады́цѣ: моли́твами, Христе́, архіере́я Твоего́ да́руй лю́демъ Твои́мъ прегрѣше́ній проще́ніе и ве́лію ми́лость.

Гла́съ 2:

Ангелъ земны́й, небе́сный человѣ́къ, рачи́тель Боже́ственныя сла́вы, земны́хъ же презира́тель яви́лся еси́, стра́сти покори́въ и пло́ть порабо́тивъ ду́ху, апо́столовъ сострада́льче, страстоте́рпцевъ единонра́вне, благоре́вностно, Фили́ппе, Христо́въ зако́нъ исполня́я, ду́шу твою́ за лю́ди положи́лъ еси́. И ны́нѣ предстоя́ Христо́ву престо́лу, моли́ся о на́съ, ча́дѣхъ твои́хъ.

Сто́лпъ непоколеби́мь Христо́вы Це́ркве, о́тче, бы́лъ еси́: боже́ственною бо ре́вностію разже́гся, дерзнове́нно непра́ведное начина́ніе пра́ведно разоря́еши, царя́ же и лю́ди науча́еши апо́стольскимъ и оте́ческимъ преда́ніемъ послѣ́довати, и отъ раздѣле́нія ца́рства и зла́го начина́нія преста́ти повелѣва́еши, и преще́ньми по вла́сти, отъ Бо́га да́ннѣй тебѣ́, му́жественнѣ запреща́еши, непокоря́ющія же ся твоему́ пра́вому уче́нію суду́ Бо́жію предае́ши. Того́ ра́ди я́ко и́стинный па́стырь положи́лъ еси́ ду́шу твою́ за па́ству твою́, подража́телю и́стиннаго Па́стыря Христа́. И ны́нѣ, архіере́е Фили́ппе, моли́ спасти́ся всѣ́мъ, любо́вію чту́щимъ свяще́нную па́мять твою́.

Сла́ва, гла́съ 4:

Подоба́етъ Ца́рствующему гра́ду Москвѣ́ Фили́ппа вездѣ́ имѣ́ти архіере́я, я́ко нѣ́кую у́тварь ца́рскую и сокро́вище некра́домо, всѣ́мъ подаю́ща бога́тство спаси́тельное исповѣ́данія и вся́ собира́юща къ соедине́нію пѣ́сней боголѣ́пныхъ. Къ нему́же возопіи́мъ: святи́телю и исповѣ́дниче, моли́ Христа́ Бо́га о душа́хъ на́шихъ.

И ны́нѣ, пра́здника.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Свѣти́льниче Фили́ппе,* удобре́ніемъ боголѣ́пныхъ добродѣ́телей* обита́лище пречи́сто Всесвята́го Ду́ха* и нетлѣ́нно сокро́вище бы́лъ еси́,* всѣ́мъ подаю́щее бога́тство неистощи́мое,* свѣ́тлыми дыха́ніи слове́съ твои́хъ,* я́ко у́тварію злато́ю, украша́еши:* проро́чески бо изы́де вѣща́ніе* твои́хъ исправле́ній, о́тче святи́телю.

Сти́хъ: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ.

Свѣти́льниче слове́сный,* язы́че благонаказа́тельный,* богозна́менный гла́съ вѣща́нія* уче́ній твои́хъ, святи́телю,* весьма́ подвиза́яся къ ре́вности боголѣ́пнѣй,* апо́столовъ бы́лъ еси́ подража́тель, богому́дре.* Тѣ́мже, ре́вностію царя́ удиви́въ,* Христо́ва Ца́рствія наслѣ́дникъ яви́лся еси́,* Его́же моли́ спасти́ся душа́мъ на́шимъ.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

Пріиди́те, Россíйстіи собо́ри,* дне́сь честно́е святи́теля торжество́* благоче́стно пѣ́сньми почти́мъ:* то́й бо вои́стинну Свята́го Ду́ха осія́ніе* отъ ю́ности сподо́бися прія́ти,* воздержа́ніемъ тѣ́ло свое́ удручи́въ,* и душе́вною чистото́ю* Свѣ́та Трисо́лнечнаго заря́ яви́ся,* и ны́нѣ мо́лится о чту́щихъ его́.

Сла́ва, гла́съ 6:

Яко свѣтоза́рная звѣзда́, во гра́дѣ на́шемъ Москвѣ́ возсія́лъ еси́ уче́ньми слове́съ твои́хъ, всеблаже́нне Фили́ппе приснопа́мятне: ты́ бо прему́дрый проповѣ́датель показа́лся еси́ и прее́мникъ благоче́стія яви́лся еси́, царя́ и лю́ди твоя́, пасо́мыя тобо́ю, утвержда́я и́стиннымъ уче́ніемъ Христо́вымъ, е́же въ любви́ и соедине́ніи нераздѣ́льнѣмъ пребыва́ти. По преставле́ніи же твое́мъ чи́стое и нетлѣ́нное тѣ́ло твое́ честнѣ́й и многослову́щей оби́тели, въ не́йже духо́вно породи́лся еси́, я́ко у́тварь многоцѣ́нну, пре́далъ еси́. Отту́ду же по мно́гихъ лѣ́тѣхъ въ Ца́рствующій гра́дъ возврати́вшася, ублажа́емъ тя́ со псалмы́ и пѣ́сньми и святу́ю и всечестну́ю пра́зднуемъ па́мять твою́.

И ны́нѣ, пра́здника.

На благослове́ніи хлѣ́бовъ: тропа́рь, гла́съ 8:

Первопресто́льниковъ прее́мниче, сто́лпе Правосла́вія, и́стины побо́рниче, но́вый исповѣ́дниче, святи́телю Фили́ппе, положи́вый ду́шу за па́ству твою́, тѣ́мже, я́ко имѣ́я дерзнове́ніе ко Христу́, моли́ за Импера́тора правосла́внаго, за гра́дъ же и лю́ди, чту́щія досто́йно святу́ю па́мять твою́. [Два́жды.]

И тропа́рь пра́здника. [Еди́ножды.]



НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, свята́го. И ны́нѣ, пра́здника.

По 1-й стихоло́гіи сѣда́ленъ, гла́съ 1:

Кро́вь твоя́, му́дре, вопіе́тъ отъ земли́, я́ко Авелева, но́вый исповѣ́дниче, святи́телю Фили́ппе, я́рости бо царе́вы не убоя́лся еси́, му́дрѣ того́ поуча́я и суему́дренная сверѣ́пства облича́я. Сего́ ра́ди всели́лся еси́ въ небе́сный черто́гъ Христа́ Бо́га на́шего. [Два́жды.]

Сла́ва, и ны́нѣ, пра́здника или́ богоро́диченъ:

Всѣ́хъ Творца́, Бо́га и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ заче́нши, нетлѣ́нно родила́ еси́, Его́же сла́вяще, Тя́ воспѣва́емъ, Дѣ́во, я́ко пала́ту Всецаря́ и мíра спасе́ніе.

По 2-й стихоло́гіи сѣда́ленъ, гла́съ 5:

Преподо́бне и треблаже́нне, священноисповѣ́дниче Фили́ппе, па́стырю до́брый, Началопа́стыря Христа́ уго́дниче, положи́вый ду́шу твою́ за лю́ди Моско́вскаго наро́да, па́ствуемаго тобо́ю, тѣ́мже и ны́нѣ, о́тче на́шъ, святи́телю Фили́ппе блаже́нне, испроси́ у Го́спода, е́же дарова́ти на́мъ ве́лію ми́лость. [Два́жды.]

Сла́ва, и ны́нѣ, пра́здника или́ богоро́диченъ:

Ди́вно чу́до зача́тія и неизрече́ненъ о́бразъ рождества́ Твоего́ въ Тебѣ́ позна́ся, Дѣ́во Чи́стая, удивля́етъ мо́й у́мъ и ужаса́етъ по́мыслъ, сла́ва Твоя́, Богоро́дице, по всѣ́мъ простре́ся, ко спасе́нію ду́шъ на́шихъ.

По поліеле́и сѣда́ленъ, гла́съ 8. Подо́бенъ: Прему́дрости.

Проповѣ́дуетъ, о́тче, тебе́ ны́нѣ Россíйская митропо́лія, ю́же отъ болѣ́зней и скорбе́й избавля́еши, богоблаже́нне Фили́ппе, а́нгеловъ собесѣ́дникъ яви́вся. Тѣ́мже, со апо́столы и му́ченики лику́я, помо́щникъ быва́еши въ ско́рбехъ, всеизря́дне, пла́чущихъ утѣше́ніе, па́стырь и наста́вникъ заблу́ждшихъ, Фили́ппе блаже́нне. И на́съ твои́ми моли́твами изба́ви отъ бѣ́дъ и моли́ся Христу́ Бо́гу, да оставле́ніе пода́стъ вѣ́рою и любо́вію чту́щимъ святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Небе́сную две́рь и киво́тъ, пресвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 24.

По 50-мъ псалмѣ стихира, гласъ 8:

Апо́столовъ ревни́теля, Фили́ппа, преблаже́ннаго отца́ и учи́теля, соше́дшеся, восхва́лимъ, глаго́люще: ра́дуйся, святи́телю, тве́рдый умо́мъ, благода́тію и и́стиною, освяще́нне, отню́дуже и прія́телище бы́лъ еси́ Ду́ха Всесвята́го. И ны́нѣ со архіере́и предстоя́ престо́лу Христо́ву, моли́ся при́сно о рабѣ́хъ твои́хъ.

Кано́нъ пра́здника со ирмосо́мъ на 6 и святи́теля на 8, гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Агнче Бо́жій и Сло́ве, свѣтозаре́ніемъ Свята́го Твоего́ Ду́ха мра́чному уму́ моему́ свѣтоно́сную лучу́ низпосли́ и сло́во ми́ вдохни́ восхвали́ти, его́же Са́мъ избра́лъ и прія́лъ еси́, ве́рхъ страда́льца свяще́ннаго Фили́ппа.

Благода́ть, свя́те, Боже́ственную рабу́ твоему́ у Бо́га испроси́ и разумѣ́нія мою́ испо́лни ду́шу восхвали́ти житіе́ твое́, Фили́ппе святи́телю, и́мже вся́ удиви́лъ еси́, подвиза́вся, Го́споду поя́: сла́вно бо просла́вися.

Вели́кихъ добродѣ́телей свѣтозаре́ніемъ сія́юща твоя́ дѣ́тели, преподо́бне: удиви́шася бо ца́ріе крѣ́пкому твоему́ му́жеству, я́ко въ наказа́ніи къ ни́мъ язы́къ тво́й не ослабѣ́, и Го́споду поя́ше: сла́вно бо просла́вися.

Богоро́диченъ: Глаго́лы богоглаго́ливыхъ проповѣ́дниковъ, о Тебѣ́, Богома́ти, испо́лнишася: се́ бо родила́ еси́, Дѣ́во, мла́до Отроча́, Ада́ма дре́вняго старѣ́йшо и сопресто́льна Роди́телю, мíра всего́ на спасе́ніе и тлѣ́нія измѣне́ніе.

Катава́сія пра́здника.

Пѣ́снь 3.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Добродѣ́телей на го́ру восте́клъ еси́ и во мра́къ видѣ́нія вше́лъ еси́, святи́телю Фили́ппе, и позна́лъ еси́, ели́ко вмѣ́стно, Непостижи́маго естество́мъ, просвѣще́нія испо́лненъ бы́въ, о́тче, прія́лъ еси́ Боже́ственную благода́ть.

Еди́наго Бо́га добро́тою ища́ и еди́ну Его́ получи́ти сла́ву жела́я, блаже́нне, сла́ву и че́сть земна́го пребыва́нія я́ко преходя́щую оста́вилъ еси́ и я́ко уго́дникъ просія́лъ еси́ всѣ́хъ Влады́ки Христа́.

Жела́ніемъ Ду́ха пло́ти жела́ніе увяди́лъ еси́ и себѣ́, блаже́нне, обручи́лъ еси́ сожи́тельницу — чистоту́, отъ нея́же ча́да тебѣ́ роди́шася — вся́ добродѣ́тели, присносла́вне, ча́до тя́ содѣва́ющія невеще́ственнаго Свѣ́та.

Богоро́диченъ: Змíя мы́сленнаго умертви́ла еси́, умертви́вшаго Ада́ма въ раи́ и Евѣ прама́тери содѣ́лавшаго печа́ль, Жи́знь прозя́бши, Дѣ́во Чи́стая, отъ тлѣ́нія на́съ свободи́: Бо́гъ бо изъ Твои́хъ ложе́снъ проше́дъ неизрече́нно.

Конда́къ и и́косъ пра́здника.
Сѣда́ленъ, гла́съ 8. Подо́бенъ: Прему́дрости.

Яко апо́стола избра́ннаго тезоимени́тъ, о́тче, и подража́тель, бѣды́ претерпѣ́лъ еси́ и гоне́нія, ре́вность вообража́я проро́ка Иліи́ и Крести́теля, му́жески обличи́лъ еси́ беззако́ннующія и престо́лъ, ввѣ́ренный тебѣ́, до́брѣ упра́вилъ еси́, ра́вное о́ныхъ тече́ніе сконча́въ. Яко ми́лоть, тѣ́ло твое́ на земли́ оста́вилъ еси́, испуща́еши, я́ко мѵ́ро, благоуха́нія арома́тъ и, я́ко до́ждь, излива́еши благода́ть духо́вну, напоя́я та́йно бразды́ серде́цъ на́шихъ. Фили́ппе святи́телю, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца дои́ши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Зло́бою дви́жиміи на тя́, незло́биваго а́гнца, я́ко ди́віи звѣ́ріе, воста́ша: словесы́ твои́ми, я́ко остно́мъ, срѣ́чеми, не терпя́ще, я́ростію поощря́хуся, святи́телю богому́дре.

Имѣ́я тя́ засту́пника мíръ ве́сь и помо́щника въ напа́стехъ, я́ко бо побо́рникъ вѣ́ренъ и ско́рый предста́тель къ твое́й па́ствѣ прири́щущія напа́стей и бѣ́дъ изыма́еши, свяще́нными твои́ми моли́твами.

Испо́лнивъ до́брыя по́двиги, тезоимени́те, жела́ннаго, богому́дре, сподо́бился еси́ безсме́ртія, идѣ́же, ра́дуяся, вѣне́цъ побѣ́ды взя́лъ еси́ и вопіе́ши: сла́ва си́лѣ Твое́й, сла́ва, Христе́, прише́ствію Твоему́.

Богоро́диченъ: Крѣ́пость всѣ́хъ враго́въ низложи́, Ма́ти Бо́жія, оскорбля́ющихъ воспѣва́ющія Тя́, я́ко ро́ждшая Го́спода сла́вы, невреди́мо Твое́ ста́до спаса́й отъ злы́хъ прираже́ній, я́ко да по до́лгу Тя́ ублажа́емъ.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Яко луча́ пра́вды Со́лнца, яви́ся мíру свѣтлостьми́ добродѣ́телей, предста́тельство твое́, святи́телю Фили́ппе, разоря́ющее о́блакъ наше́дшихъ бѣ́дъ; тя́ и ны́нѣ пою́щія въ ми́рѣ сохрани́, и просла́ви я́ красото́ю, и просвѣти́.

Ме́чь обоюдоо́стръ язы́къ тво́й показа́ся, въ Христо́въ стра́хъ вооружи́вся, блаже́нне, разу́мно изобличи́въ нача́льствующія, во свидѣ́тельство Христа́ Всецаря́, вино́вна на среду́ приводя́, и боже́ственныя Его́ ученики́.

Но́въ яви́лся еси́ ре́вностію, я́коже вторы́й Моисе́й, не зна́меніи стра́шными удивля́я, но Боже́ственныхъ слове́съ уче́ніи наставля́я къ ти́хому приста́нищу но́ваго Изра́иля, отъ страсте́й Еги́пта изводя́.

Богоро́диченъ: Облакъ разу́мный Тя́ имену́емъ, изъ Тебе́ бо Христо́съ возсія́, Всенепоро́чная, и простра́ннѣйшу Тя́ небе́съ показа́, Того́ бо неискусому́жно родила́ еси́, Чи́стая, воплоще́нна за милосе́рдіе неисповѣди́мое.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же свя́зана мре́жами вра́жіими, я́ко отъ тли́ о́наго, спаси́.

Промышле́ніе о́бщее творя́ о пасо́мыхъ тобо́ю, е́же бы́ти и́мъ душе́ю и се́рдцемъ еди́но сла́внѣ, во Христо́вѣ еди́нѣй вѣ́рѣ пребыва́ющимъ, язы́ческія же отрѣва́лъ еси́ обы́чаи и раздѣле́нія бѣжа́ти, му́дре, научи́лъ еси́.

Ре́вностію Христо́вою поостри́вся, я́рость самодержа́внаго на кро́тость преложи́ти тща́лся еси́, и къ преще́ніемъ царе́вымъ непрекло́ненъ отню́дъ бы́лъ еси́, я́ко Христо́выхъ за́повѣдей дѣ́латель, и показа́лся еси́ я́ко крѣ́покъ хра́брникъ, за па́ству твою́ пострада́въ да́же до сме́рти, ра́дуяся.

Свѣтоно́сную лучу́, сія́ющу во мра́цѣ житія́ су́щимъ, святи́телю Фили́ппе, ви́димъ тя́, и я́ко свѣщу́ неугаси́мую, невеще́ственному пріобщи́вшагося Свѣ́ту и вся́ освѣща́юща концы́, тму́ неразу́мія отъе́млюща.

Богоро́диченъ: Тя́ иногда́ написа́ скрижа́ль богообра́знѣ во проро́цѣхъ Моисе́й, свѣ́щникъ же Свѣ́та, и сѣ́нь, и же́злъ процвѣ́тшій, Всенепоро́чная, и ста́мну, ма́нну нося́щую, и лѣ́ствицу, е́юже возведо́хомся отъ земли́ къ высотѣ́.

Конда́къ, гла́съ 3. Подо́бенъ: Дѣ́ва дне́сь.

Правосла́вія наста́вника и и́стины провозвѣ́стника, Златоу́стаго ревни́теля, Россíйскаго свѣти́льника, Фили́ппа прему́драго восхва́лимъ, пи́щею слове́съ свои́хъ разу́мно ча́да своя́ пита́юща: то́й бо язы́комъ хвале́нія поя́ше, устна́ма же пѣ́ніе вѣща́ше, я́ко таи́нникъ Бо́жія благода́ти.

Икосъ:

Пріиди́те, любострада́льцы, пѣ́ніемъ и пѣ́сньми духо́вными па́мять священному́ченика соверша́юще, боже́ственнѣ возвесели́мся: вре́мя на́шего весе́лія и натрижне́нія наста́, въ не́же пріе́млемъ страсте́й разрѣше́нія да́ръ. Яко бо сто́лпъ, о́гненъ яви́ся попаля́ющъ беззако́ннующихъ главы́, вѣ́рныхъ же просвѣща́ющъ ду́ши уче́ньми богоразу́мія и въ боже́ственный гра́дъ го́рній Іерусали́мъ, я́ко друга́го Изра́иля, вводя́щъ, я́ко учени́къ Бо́жія благода́ти.

Пѣ́снь 7.

Ирмо́съ: На по́ли Деи́рѣ иногда́ мучи́тель пе́щь поста́ви на муче́ніе богоно́сныхъ, въ не́й же тріе́ о́троци пѣсносло́вяху Еди́наго Бо́га, тро́ично воспѣва́ху, глаго́люще: отце́въ Бо́же, благослове́нъ еси́.

Укра́шенъ боголѣ́пно Го́споду предста́лъ еси́ добродѣ́тельными по́двиги, вѣне́цъ же нося́ страда́нія, испещре́нъ кро́вными ка́плями, святи́телю Фили́ппе. Тѣ́мже соверша́ющія свѣтоно́сную па́мять твою́ при́сно помина́й и пою́щія: оте́цъ на́шихъ Бо́же, благослове́нъ еси́.

Фараони́тъ мы́сленныхъ враго́въ ополче́нія, блаже́нне, избѣ́гъ, легко́ преше́лъ еси́ къ го́рнимъ, та́мо водворя́яся, идѣ́же по́честь сла́вы получи́въ терпѣ́ніемъ, во свѣ́тѣ пра́ведныхъ, въ ра́дованіи святы́хъ, воспѣва́я: оте́цъ на́шихъ Бо́же, благослове́нъ еси́.

Хва́лятъ тя́, блажа́ще любо́вію, прити́чущіи къ ра́цѣ твое́й, блаже́нне, въ не́й бо, мо́щи твоя́ цѣлу́юще, оби́льно благода́ть пріе́млютъ: прикоснове́ніемъ бо вре́дъ оче́съ исцѣли́лъ еси́ и болѣ́знь зубо́въ облегчи́лъ еси́ пою́щихъ: оте́цъ на́шихъ Бо́же, благослове́нъ еси́.

Богоро́диченъ: Отъ любве́ душе́вныя вопію́ Ти, Влады́чице: пресвѣ́тлаго Со́лнца о́блаче, спаси́тельная две́ре, небе́сная врата́, лѣ́ствице мы́сленная, всѣ́хъ христіа́нъ мольбу́ пріими́, Тя блажа́щихъ, наде́жду ду́шъ на́шихъ, и Сы́ну Твоему́ зову́щихъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Покрыва́яй вода́ми превы́спренняя своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Цѣли́ши незави́стно вѣ́рно призыва́ющія тя́: я́ко предста́въ, а́біе разсла́блена возста́вилъ еси́ и стра́ждущему ятро́ прикоснове́ніемъ ручны́мъ уврачи́лъ еси́, уны́ніемъ скорбя́ща явле́ніемъ твои́мъ въ ра́дость претвори́лъ еси́, при́сно дѣ́йствуя вся́, блаже́нне, всѣ́мъ во вѣ́ки.

Че́сть многоцѣ́нную твоему́ верху́, страда́нія вѣне́цъ, я́ко побѣдоно́сцу, живоно́сною десни́цею Зижди́тель возложи́, всеблаже́нне, тѣ́ло же твое́ соблюде́ невреди́мо отъ боко́въ землены́хъ, испуща́ющее благоуха́нія арома́тъ. Си́це тя́ просла́ви Подвигополо́жникъ во вся́ вѣ́ки.

Шата́нія и бра́ни междоусо́бныя укроти́, и сверѣ́пѣющія во́лки на ста́до твое́, блаже́нне, я́ко и́стинный па́стырь, моли́твъ твои́хъ па́лицею дале́че отжени́, и Импера́тору на́шему ски́птры держа́вно устро́й, и воста́нія язы́ковъ покори́, да я́ко предста́теля тя́ воспѣва́емъ во вѣ́ки.

Богоро́диченъ: Щито́мъ вѣ́ры хра́мъ Тво́й святы́й, Богоро́дице Дѣ́во, сохрани́, и въ не́мъ славосло́вящія Тя́ ку́пно сла́вы Твоея́ сподо́би, и нахожде́нія ва́рварскаго и томле́нія и́хъ изба́ви ны́, ума́ на́шего во́лны сверѣ́пыя укроти́ моли́твою Твое́ю, Всепѣ́тая.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Еди́но естество́ Тро́ицы богосло́вилъ еси́, су́етнымъ же поуча́ющіяся смѣ́ло, всему́дре, обличи́въ и боже́ственными наказа́ніи твои́ми вѣ́рныя увѣща́въ, му́дре, укрѣпи́лъ еси́, а́нгеловъ сожи́телю, святи́телю Фили́ппе, па́мять твою́ пра́зднующія въ ми́рѣ соблюди́.

Юношамъ нѣмова́ніе сро́дно присвое́ніе быва́етъ, но отце́мъ любе́зно вои́стинну; ты́ же, о́тче, пріими́ на́ше сіе́ благодаре́ніе, не я́ко досто́йно и́стинно твоея́ хвалы́, но я́ко отъ усе́рдія тебѣ́ приноси́мо, не бо́ мо́жемъ лѣ́потно хвали́ти тя́ и велича́ти.

Яко апо́столовъ сопресто́ленъ и му́чениковъ слико́венъ, святи́телемъ равноче́стенъ, страстоте́рпче Фили́ппе, предста́тельствомъ твои́мъ пою́щія тя́ въ ми́рѣ сохрани́ и правосла́внаго Импера́тора на́шего ро́гъ возвы́си, ва́рварская же сверѣ́пства низложи́, да, ра́дующеся, пое́мъ тя́, велича́юще.

Богоро́диченъ: О, Свѣ́та прія́телище, Богора́дованная Влады́чице, святи́телемъ вои́стинну утвержде́ніе и преподо́бнымъ всѣ́мъ похвало́! Спаси́ ны отъ бѣ́дъ и обстоя́ній и язы́ковъ наше́ствія, воспѣва́ющія, Тя́, Многопѣ́тую.

Свѣти́ленъ. Подо́бенъ: Посѣти́лъ ны́.

Ревни́телю цѣлому́дрія, отъ ю́наго воспита́нія, святи́телю Фили́ппе, потща́лся еси́, за и́стину укоря́емь и изгна́нъ бы́ти и тоя́ ра́ди сме́рть го́рькую подъя́лъ еси́; и ны́нѣ, на небесѣ́хъ предстоя́ престо́лу Святы́я Тро́ицы, при́сно о на́съ моли́ся, вѣ́рою и любо́вію соверша́ющихъ па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Щедро́ты Твоя́, Бо́же, на лю́ди Твоя́ низпосли́ моли́твами Пречи́стыя Твоея́ Ма́тере и всѣ́хъ святы́хъ и ра́ди святи́теля Твоего́ Фили́ппа да́руй на́мъ ве́лію ми́лость.

На хвали́техъ стихи́ры, гла́съ 4. Подо́бенъ: Яко до́бля.

Тече́ніе соверши́лъ еси́* и вѣ́ру соблю́лъ еси́,* святи́телю блаже́нне Фили́ппе,* сего́ ра́ди Христо́съ тя́ вѣнча́* свѣ́тлымъ вѣнце́мъ пра́вды* и украси́ твое́ исповѣ́даніе, досточу́дне.* Тѣ́мъ, небе́сное наслѣ́діе пріе́мь,* Спа́су моли́ся* о воспѣва́ющихъ па́мять твою́. [Два́жды.]

Фили́ппе блаже́нне,* исповѣ́дниковъ подража́телю,* те́плѣ хва́лящимъ тя́ предста́тель бу́ди,* и отъ вся́кія бѣды́, грѣха́ же и бу́ри* и страсте́й мучи́тельства, о́тче, изба́ви ны́,* я́ко му́ченикъ неосла́бленъ* и святи́тель богопрія́тенъ.* Дерзнове́ніе имѣ́я ко Христу́ Бо́гу,* моли́ся о воспѣва́ющихъ па́мять твою́.

Фили́ппе святи́телю,* разу́мнаго свѣ́та заря́,* церко́вное свѣти́ло,* архіере́йская красото́,* мона́шескаго по́стническаго жи́тельства и́стинное пра́вило,* на́шъ же засту́пникъ те́плый показа́лся еси́,* свобожда́я отъ губи́тельства лука́выхъ,* моли́ся, о́тче,* о пою́щихъ па́мять твою́.

Сла́ва, гла́съ 6:

Ты́ еси́ па́стырь до́брый и учи́тель изря́дный, святи́телю Фили́ппе, тя́ всегда́ восхваля́юще, вопіе́мъ: тобо́ю Бо́гъ украси́ це́рковь Ма́тере Своея́, и тѣ́ло твое́, за па́ству твою́ во изгна́ніи пострада́вшее, многолѣ́тно же въ земли́ сокрове́нное, престо́лу твоему́ возврати́, и лю́ди твоя́ возвесели́; тѣ́мже моля́ся не преста́й о хва́лящихъ и чту́щихъ па́мять твою́, прося́ оставле́нія грѣхо́въ и спасе́нія душа́мъ на́шимъ.

И ны́нѣ, пра́здника.
Славосло́віе вели́кое. [Ектеніи́.] Отпу́стъ. И ча́съ 1-й.



НА ЛИТУРГІИ,

Блаже́нна отъ кано́на пра́здника, пѣ́снь 4-я и свята́го пѣ́снь 6-я. Проки́менъ, гла́съ 1: Уста́ моя́ возглаго́лютъ [прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй]. Апо́столъ ко Евре́емъ, зача́ло 335. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 123 – 132 об.

/ Къ оглавленію раздѣла /


Наверхъ / Къ титульной страницѣ

0