Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 8-й де́нь.
Преподо́бнаго отца́ на́шего Гео́ргія Хозеви́та. И преподо́бныя Домни́ки.

[ВЕЧЕРЪ,]
На Го́споди воззва́хъ: стихи́ры преподо́бнаго, гла́съ 4. Подо́бенъ: Яко до́бля.

Твоея́ души́ краегра́дія помысло́въ* не поколеба́ша прило́ги, блаже́нне:* ты́ бо, я́коже забра́ло, предложи́въ* тве́рдое твое́ поще́ніе,* соблю́лъ еси́ тебе́ сама́го* отъ лю́таго борца́ неуя́звлена* и невре́дна весьма́* и предста́лъ еси́ Влады́цѣ всѣ́хъ,* побѣди́тельно вѣнча́емь.

Долѣлежа́ніемъ та́емь,* и слеза́ми дручи́мь,* и всено́щными стоя́ніи изнуря́емь,* мона́ховъ бы́лъ еси́ о́бразъ велича́йшій,* и о́бщее пра́вило,* и хвалы́ вѣне́цъ.* Вся́къ бо ви́дъ добродѣ́телей испра́вилъ еси́,* и вы́шняго Ца́рствія наслѣ́дникъ яви́лся еси́,* му́дре, воздержа́ніемъ.

Ни пути́ долгота́ возмо́же,* ниже́ мѣ́стъ же́стость* разсла́бити, преподо́бне,* теплоту́ къ Бо́гу ше́ствія твоего́,* и та́мо у́бо бы́въ,* и на мѣ́стѣхъ возвесели́вся,* идѣ́же но́ги ходи́ша Бо́га на́шего,* не неради́лъ еси́ отню́дъ,* до́ндеже дости́глъ еси́* воздержа́ніемъ и болѣ́зньми* и къ Сіо́ну небе́сному.

Ины стихи́ры преподо́бныя, гла́съ то́йже. Подо́бенъ: Да́лъ еси́ зна́меніе.

Серде́чное жела́ніе явля́ющи слеза́ми,* умиле́ніемъ, сла́вная,* зе́млю омочи́ла еси́* и власы́ оте́рла еси́ Христо́во подно́жіе,* помышля́ющи же и Того́ я́ко прису́ща ви́дящи,* Его́же возлюби́ла еси́* и стопа́мъ послѣ́довала еси́ мы́слію,* видѣ́ньми же боже́ственнѣйшими* твою́ ду́шу просвѣти́ла еси́.

Отъ за́падовъ возсія́ла еси́* къ восто́ку, всеблаже́нная,* я́ко звѣзда́ свѣтлѣ́йшая,* луча́ми блиста́ющи* твои́хъ добродѣ́тельныхъ дѣя́ній, преподо́бная,* и просвѣти́ла еси́ вѣ́рныхъ мы́сли* сія́ніемъ чуде́съ твои́хъ.* Тѣ́мже тя́ блажи́мъ* и твою́ па́мять почита́емъ,* Христа́ велича́юще,* че́стно тя́ просла́вльшаго.

Уязви́вшися жела́ніемъ Христо́вы любве́,* о Домни́ко всехва́льная,* Тому́ послѣ́довала еси́,* отве́ргшися тлѣ́нныя сла́вы,* и плотски́хъ сласте́й,* и вся́каго житія́ ина́го наслажде́нія.* Тѣ́мъ тя́ всели́ въ свѣтлѣ́йшій черто́гъ* Іису́съ Человѣколю́бецъ* и Спа́съ ду́шъ на́шихъ.

Сла́ва, и ны́нѣ, гла́съ 1:

Облага́яй не́бо о́блаки струя́ми одѣва́ется дне́сь Іорда́нскими, и мои́мъ очища́ется чище́ніемъ мíра взе́мляй грѣ́хъ, и отъ сро́днаго свы́ше свидѣ́тельствуется Ду́ха, Сы́нъ, Единоро́денъ Сы́й вы́шняго Отца́. Къ Нему́же возопіи́мъ: явле́йся и спасы́й на́съ, Христе́ Бо́же на́шъ, сла́ва Тебѣ́.

На стихо́внѣ стихи́ры, гла́съ 6. Подо́бенъ: Ангельскія предыди́те си́лы.

Свѣ́тлый и просвѣща́яй человѣ́ки, Свѣ́тъ самосія́нный Ты́ сы́й, Іису́се мо́й, въ струя́хъ Іорда́нскихъ кре́щся, весьма́ просія́лъ еси́, Свѣ́те, Единосу́щный Отцу́ Твоему́, Имже вся́ тва́рь просвѣ́щшися, Христе́, зове́тъ Тебѣ́: благослове́нъ, явле́йся Бо́же на́шъ, сла́ва Тебѣ́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Яко дово́льно насы́титися Боже́ственныя сла́вы, пріиди́те мы́сленно, очи́стимъ чу́вствія и, Христа́ ви́дѣвше, пло́тію креща́ема и льсти́ваго сокруша́юща главу́, ра́достно пѣсносло́вяще, Тому́ возопіе́мъ: благослове́нъ, явле́йся Бо́же на́шъ, сла́ва Тебѣ́.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

Водо́ю живи́тельною Ты́ напая́еши, Іису́се мо́й, въ рѣцѣ́ Іорда́нѣ благоутро́біемъ, на́съ, изгорѣ́вшія жа́ждею, Человѣколю́бче, я́ко отъ исто́чника Твоего́ напи́вшеся безсме́ртнаго и свѣтоно́снаго, Христе́, пое́мъ: благослове́нъ, явле́йся Бо́же на́шъ, сла́ва Тебѣ́.

Сла́ва, и ны́нѣ, гла́съ 2:

На Іорда́нстѣй рѣцѣ́ ви́дѣвъ Тя́ Іоа́ннъ, къ себѣ́ гряду́ща, глаго́лаше: Христе́ Бо́же, что́ къ рабу́ прише́лъ еси́, скве́рны не имы́й, Го́споди? Во и́мя же чіе́ Тя́ крещу́? Отца́? — но Того́ но́сиши въ Себѣ́. Сы́на? — но Са́мъ еси́ воплоти́выйся. Ду́ха Свята́го? — И Сего́ вѣ́си дая́ти вѣ́рнымъ усты́. Явле́йся Бо́же, поми́луй на́съ.

Тропа́рь пра́здника, гла́съ 1:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.


НА УТРЕНИ,
На Бо́гъ Госпо́дь: Тропа́рь пра́здника, три́жды.

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Іису́съ Нави́нъ во Іорда́нѣ рѣцѣ́, преводя́ лю́ди и Бо́жій киво́тъ, сѣннопи́шетъ бу́дущее благодѣ́тельство: о́бразъ бо на́мъ изображе́нія и начерта́ніе нело́жно порожде́нія, та́йное прехожде́ніе обои́ми сѣннопи́шетъ Ду́хомъ. Христо́съ яви́ся на Іорда́нѣ освяти́ти во́ды.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Свирѣ́лей па́стырскихъ.

Креща́ется Христо́съ, просвѣща́я мíръ. Съ высоты́ Оте́цъ свидѣ́тельствова, глаго́ля: Се́й е́сть Сы́нъ Мо́й, о Не́мже благоизво́лихъ, Того́ послу́шайте. Се́й е́сть, просвѣща́яй вселе́нную благоутро́біемъ Свои́мъ, крести́выйся и спасы́й я́ко Бо́гъ ро́дъ человѣ́ческій.

Сла́ва, и ны́нѣ, то́йже.

Кано́нъ пра́здника со ирмосо́мъ на 6, гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.

И святы́хъ два́ на 8. Кано́нъ преподо́бнаго, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Отверзе́ніе у́стъ да́ти мнѣ́ благода́ть моли́ прему́дрости, Гео́ргіе, нача́ло Іису́са, я́ко да воспою́ твою́ па́мять по досто́инству, неразу́мный, пѣ́сньми боже́ственными, ра́дуяся.

На земли́ пожи́лъ еси́, я́ко безпло́тенъ, сла́вне, совокупи́лся же еси́ отсю́ду безпло́тнымъ лико́мъ, Безпло́тнаго пѣ́сньми трисвяты́ми поя́ и пріе́мля Сего́ осія́ніе.

Мíръ преоби́дѣлъ еси́ премíрными мы́сльми твои́ми, пости́вся же въ мíрѣ, идѣ́же воспита́ся Христо́съ, отше́лъ же еси́ къ нетлѣ́нному мíру, лико́мъ совокупи́вся перворо́дныхъ, му́дре.

Богоро́диченъ: Отве́рзъ уста́ моя́, Чи́стая, предвозглаго́лю воспѣ́ти Тя́, Му́дрость ро́ждшую Ѵпоста́сную, но, я́ко нечи́стъ, Всечи́стую я́ко лѣ́по пѣ́ти Тя́ не могíй, прошу́ по́мощи.

Инъ кано́нъ преподо́бныя, его́же краегране́сіе: Доброотрокови́цу ны́нѣ честву́ю Домни́ку. Іо́сифъ. Гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Боже́ственнымъ жела́ніемъ ду́шу, сла́вная, впери́вши, плотска́я ловле́нія прелетѣ́ла еси́. Тѣ́мже молю́ тя: уловле́на мя́ сѣтьми́ зміи́ными твои́ми моли́твами, всему́драя Домни́ко, изба́ви.

Послѣ́довала еси́, ра́дующися, Христу́, въ слѣ́дъ Сего́ ходи́вши свяще́ннаго законоположе́нія, всечестна́я, и дѣ́въ чино́мъ сочи́слилася еси́, я́ко дѣ́ва и непоро́чная. Тѣ́мже тя́ почита́емъ, вѣ́рою соше́дшеся, досточу́дная.

Дрема́ніемъ зло́бы ника́коже, сла́вная, воздрема́вшися побдѣ́ла еси́ свѣтоза́рными дѣя́ньми и къ Свѣ́ту невече́рнему отшла́ еси́, отону́дными свѣтлостьми́ облія́на, и просвѣща́еши пою́щія тя́.

Богоро́диченъ: И пре́жде рождества́ нетлѣ́нна, Чи́стая, и по рождествѣ́, Ма́ти Бо́жія, преесте́ственно пребыла́ еси́. Тѣ́мже, Тя́ пожела́вши, Боже́ственнымъ Ду́хомъ Домни́ка въ слѣ́дъ Тебе́ нетлѣ́нна приведе́ся, Всецарю́, Сы́ну Твоему́, Чи́стая.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Омы́ваяся слеза́ми твои́ми, отъ бре́нія мірска́го пло́ть очи́стилъ еси́ и, я́коже струя́ми рѣ́чными, си́ми де́моновъ полки́ по́стнически потопи́лъ еси́.

Преподо́бнѣ, непоро́чнѣ и пра́веднѣ житіе́ преше́лъ еси́, му́дре, къ сему́ и болѣ́зньми по́стническими неболѣ́зненную жи́знь наслѣ́довалъ еси́, богоблаже́нне Гео́ргіе.

Объе́мся боже́ственнымъ жела́ніемъ, всеблаже́нне, къ мѣ́стомъ Сіо́нскимъ отше́лъ еси́ и та́мо пребы́лъ еси́ да́же до сме́рти, всему́дре, изнуря́я болѣ́зньми пло́ть твою́.

Богоро́диченъ: Твоего́ пѣсносло́вца заблу́ждша, Отрокови́це, къ пути́ покая́нія напра́ви, я́же Сло́во ро́ждшая, мíра очища́ющаго грѣхи́, Богоневѣ́сто.

Инъ.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Пла́ватели, въ мо́ри обурева́емыя, спасла́ еси́, еле́й со благослове́ніемъ пусти́вши въ мо́ре и преложи́вши въ тишину́, Домни́ко, обурева́ніе.

Невеще́ственными сія́ющую тя́ луча́ми а́нгелъ свѣтови́дѣнъ возвѣсти́ іера́рху, прише́дшую къ Ца́рскому гра́ду Боже́ственнымъ манове́ніемъ.

Вѣ́триломъ окриле́на воздержа́нія, дости́гла еси́ въ безстра́стія, сла́вная, приста́нища. Приста́нище же была́ еси́ во глубина́хъ зло́бы попо́лзшимся.

Богоро́диченъ: Укрѣпи́, Дѣ́во, не́мощь мою́, си́лу, Вы́шняго ро́ждшая, е́же бы́ти всѣ́мъ, подаю́щую и Домни́ки па́мять возвели́чившую.

Конда́къ преподо́бнаго, гла́съ 4. Подо́бенъ: Яви́лся еси́.

Яви́лся еси́ свѣти́ло пресвѣ́тлое, Гео́ргіе, озаря́я Боже́ственными заря́ми вѣ́рно зову́щія ти́: моли́ о на́съ Влады́ку Христа́, я́вльшагося во струя́хъ и просвѣ́щшаго земноро́дныя.

Сѣда́ленъ, гла́съ 5. Подо́бенъ: Собезнача́льное Сло́во.

Мно́гаго въ поще́ніи и сла́внаго небе́снаго граждани́на, и вѣ́рныхъ моли́твенника воспои́мъ ны́нѣ и велича́емъ, и́бо Благоизво́лившему взы́ти на Кре́стъ потща́ся угоди́ти болѣ́зньми непоро́чными вои́стинну и сла́внымъ свои́мъ житіе́мъ.

Сла́ва, преподо́бныя, гла́съ 4. Подо́бенъ: Ско́ро предвари́.

Пло́ть распя́ла еси́ со страстьми́ и все́ любле́ніе ко Христу́ имѣ́ла еси́, Домни́ко, Жениху́ твоему́ нетлѣ́нному. Сего́ ра́ди прія́ла еси́ вѣне́цъ и а́нгельскимъ лико́мъ сочи́слилася еси́, преподо́бная, моля́щися Тому́ прилѣ́жно о чту́щихъ тя́.

И ны́нѣ, пра́здника, гла́съ то́йже:

Струи́ освяти́лъ еси́ Іорда́нскія, держа́ву сокруши́лъ еси́ грѣхо́вную, Христе́ Бо́же на́шъ, приклони́лъ еси́ Себе́ дла́ни Предте́чевѣ и спа́слъ еси́ отъ ле́сти человѣ́ческій ро́дъ. Тѣ́мже Тя́ мо́лимъ: спаси́ ду́ши на́ша.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Поще́ньми, я́ко снѣдьми́, любоче́стно пита́яся, ду́шу твою́, блаже́нне, ны́нѣ веселя́шуюся, предста́вилъ еси́ Творцу́ всѣ́хъ, призва́вшему тя́ къ вы́шнѣй Боже́ственнѣй сла́дости, ра́дующася.

Не́бо нѣ́кое яви́лся еси́, дѣя́ньми, я́ко звѣзда́ми, укра́шенъ, нося́, я́коже со́лнце, Го́спода, твою́ ду́шу, я́ко луну́, озаря́юща и показу́юща Своея́ сла́вы прича́стника.

Влады́ка, съ небесе́ на́съ ра́ди сше́дъ, Сіо́нъ обрѣ́те Боже́ственное вои́стинну жили́ще, идѣ́же все́лься ты́ жела́ніемъ, я́коже лѣ́ствицею, къ вы́шнему возше́лъ еси́ Сіо́ну, въ се́мъ до́льнемъ пожи́въ.

Богоро́диченъ: Сѣдя́й въ нѣ́дрѣхъ присносу́щно Роди́вшаго неопи́санно на Твои́хъ объя́тіяхъ яви́ся ны́нѣ, опи́санно сѣдя́, Ро́ждшую Тя́ показа́въ по рождествѣ́ Приснодѣ́ву и и́стинно нетлѣ́нну.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Облиста́ла еси́ просвѣще́ніе врачева́ній, отгоня́щи страсте́й омраче́ніе и де́моновъ полки́, вся́ же просвѣти́ла еси́, благоче́стно къ тебѣ́, Домни́ко, приходя́щія.

Жени́хъ тя́, Ца́рь Небе́сный, сла́вная, прославля́етъ предъ ца́рствующимъ на земли́, удивля́ющимся твоему́ нескве́рному житію́ и чудесе́мъ.

Услы́шатель моли́твъ твои́хъ сы́й, Госпо́дь, я́вѣ прозна́менуетъ твое́ мѣ́сто, въ не́мже учи́лище воздви́гла еси́, ду́хи лука́вствія, Домни́ко, отгна́вши.

Богоро́диченъ: Умерщвле́нія ри́зъ Ада́мъ совлече́ся Боже́ственнымъ Рождество́мъ Твои́мъ и во оде́жду облече́ся, Еди́но, ю́же истка́ во утро́бѣ Твое́й, Сло́во воплоща́емо.

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Удиви́шася а́нгели и все́ преподо́бныхъ сосло́віе, вои́стинну непреста́нное болѣ́зней твои́хъ зря́ще и житія́ жесто́кое: ты́ бо, я́ко безду́шный болѣ́знуя ка́мень, сконча́лъ еси́ добродѣ́телей исправле́ніе.

Вся́ку просія́ у́бо ду́шу вели́кій, вся́ исполня́я свѣтоли́тія и тмы́ свобожда́я страсте́й, я́коже чистѣ́йшее и ны́нѣ со́лнце, испуща́я спаси́тельное движе́ніе.

Оте́чества устрани́лся еси́ твоего́, му́дре Гео́ргіе, па́че подоба́ющихъ житію́ Христа́ возлюби́въ устра́ньшагося человѣ́комъ. Тѣ́мже бы́лъ еси́ Тому́ досто́инъ, го́рнія удостоя́емь благода́ти.

Богоро́диченъ: Украси́ла еси́, Чи́стая, Ты́ человѣ́ковъ исполне́ніе: Ты́ бо яви́лася еси́ простра́ннѣйши небе́сныя широты́, ро́ждшая Бо́га Сло́во, я́ко ко́жу, небеса́, Отрокови́це, просте́ршаго и земны́я возсозда́вшаго.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Зе́млю воздѣ́лавши и ра́ломъ моли́твъ сѣку́щи душе́вную бразду́ многопло́дну, пожа́ла еси́ пло́дъ въ Боже́ственныхъ жи́тницахъ, чи́стая, соблюда́емь.

Просвѣща́ющи чи́стый тво́й по́мыслъ, сія́ніе Вседѣ́тельнаго Ду́ха показу́етъ да́льная, я́ко бли́зъ, и бу́дущихъ предглаго́летъ сбытіе́.

Си́ла Ду́ха священнодѣйстви́теля тя́ сотворя́етъ ма́стію богодѣ́тельною служе́нія, па́ствити свяще́нныя ду́ши повелѣва́я, Домни́ко богому́драя.

Богоро́диченъ: Свята́го Го́спода, Господороди́тельнице, всѣ́хъ родила́ еси́, Его́же отъ души́ Домни́ка жела́ющи, страстьми́ тлѣтво́рными облада́вши, Дѣ́во, пою́щи Тя́.

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Возопи́лъ еси́ къ Бо́гу съ непреста́нными слеза́ми, и житія́, я́ко отъ ки́та, лю́таго тя́ спасе́ къ небу́рнымъ и приснотеку́щимъ исто́чникомъ обоже́нія.

Четвероуго́льну добродѣ́телей ли́къ тя́ поста́ви стѣ́ну, блаже́нне, мы́сленныхъ враго́въ не боя́щася верхострѣля́ній, я́ко крѣ́покъ бо, побѣжда́еши искуси́теля.

Яко овча́, въ Хози́въ честны́й прите́клъ еси́, дѣя́ніи же, я́ко жезло́мъ, подпира́яся, къ Еде́му напра́вилъ еси́ того́ вруче́ныя о́вцы.

Богоро́диченъ: Всели́ся я́ко Человѣ́къ во утро́бу Твою́ Госпо́дь, человѣ́ка мя́ нетлѣ́нныхъ се́лъ сподобля́я, презира́я моя́ дѣя́нія беззако́нная, Чи́стая, и прегрѣше́нія.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Свяще́нное проро́чество воздви́гла еси́ Боже́ственнаго Заха́ріи, проро́ка богому́драго, съ ни́мже во хра́мѣ святѣ́мъ лику́еши, Домни́ко богому́драя.

Струя́ яви́лася еси́ исцѣле́ній оби́льна, отмыва́ющи пла́мень страсте́й и источа́ющи свяще́ніе спаси́тельное, господоиме́нная дѣ́во всехва́льная.

Яко добру́, я́ко красну́, я́ко че́стну, я́ко дѣ́вства заря́ми сія́ющую, тя́ Жени́хъ Госпо́дь Себѣ́ совво́дитъ, сла́вная.

Богоро́диченъ: Мене́ ра́ди по мнѣ́ бы́сть Младе́нецъ Всесоверше́нный, обновля́я мя́, обветша́вшаго страстьми́, Тебе́ ра́ди, Всесвята́я Богоневѣ́сто.

Конда́къ пра́здника, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси́ вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Не вда́лъ еси́ себе́, болѣ́зньми изнуря́емь поще́нія, сатани́нскимъ помысло́мъ: у́мъ бо нескита́теленъ къ могу́щему спаса́ти Го́споду ты́ стяжа́въ, вся́къ прило́гъ оттря́слъ еси́.

Низулежа́ньми, бдѣ́ньми и поще́ньми твоя́ вся́ умертви́лъ еси́ у́ды, я́же на земли́, и ны́нѣ нетлѣ́нную и неболѣ́зненную жи́знь живе́ши, блаже́нне, о на́съ моля́ся, пою́щихъ тя́ съ любо́вію.

Присносу́щаго Гро́бъ возжела́лъ еси́ кра́йнѣ ви́дѣти и поклони́тися, му́дре, и, та́мо бы́въ, изво́лилъ еси́ преподо́бно воздержа́ніемъ соумертви́тися, преподо́бне, за милосе́рдіе Умертви́вшемуся.

Богоро́диченъ: Не послужи́ша тва́ри, и́же Творца́ Тя́ позна́вшіи Ро́ждшую, но Бо́га и́стинна, изъ Тебе́ возсія́вшаго Сло́ва, вѣ́дуще, Отрокови́це, зову́тъ: отце́въ Госпо́дь и Бо́гъ, благослове́нъ еси́.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Умъ тво́й, воззрѣ́ньми су́щими къ Бо́гу обожа́емь всегда́, богови́дѣнъ бы́сть. Отсю́ду уклони́лася еси́ ми́лованія плотска́го, пою́щи, богому́драя: Сы́й благослове́нъ и препросла́вленъ.

Та́инства Боже́ственная тебѣ́ открыва́етъ Бо́гъ Пресу́щный, въ тебѣ́ почива́яй: ви́дѣла бо еси́ прише́дша свята́го а́нгела и освяти́вша, честна́я, во́дъ естество́ Ду́хомъ.

Хра́мъ Боже́ственнаго Ду́ха бы́вши, во хра́мѣ святѣ́мъ су́щи, услы́шала еси́ гла́съ, уча́щій тя́ Боже́ственнымъ та́йнамъ, и е́же отъ тѣлесе́, честна́я, отше́ствіе ца́рствующаго.

Богоро́диченъ: Крѣ́пость моя́, и пѣ́ніе, и спасе́ніе е́сть Госпо́дь, Иже Тя́, Ма́терь Всечи́сту и Невѣ́сту неневѣ́стну предызбра́въ. Его́же о рабѣ́хъ Твои́хъ при́сно не преста́й моли́ти, Чи́стая.

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Отню́дъ дрема́нія твои́мъ вѣ́ждамъ, ниже́ сна́ твои́мъ очесе́мъ, о́тче, да́лъ еси́, до́ндеже сотвори́лъ еси́ мѣ́сто, уго́дно тебе́ сама́го, и селе́ніе Вседержи́теля, Его́же вся́ пою́тъ дѣла́ и превозно́сятъ во вѣ́ки.

Обрѣ́лъ еси́ возме́здіе трудо́въ безмѣ́рныхъ, всеблаже́нне, ра́й, его́же предугото́ва того́ жела́ющимъ отъ души́ Госпо́дь, о́бщее ца́рство зову́щимъ непреста́нно: по́йте и превозноси́те Его́ во вѣ́ки.

Обрѣ́те оби́тель Хози́вская тя́ пра́вило и извѣ́стнѣйшій о́бразъ, вся́къ проше́дша добродѣ́тельныхъ дѣя́ній ви́дъ, преподо́бныхъ похвало́, му́дре Гео́ргіе. Тѣ́мже пожи́вше боже́ственнѣ, съ тобо́ю игра́ютъ во вся́ вѣ́ки.

Богоро́диченъ: Яви́ся про́стъ Боже́ственнымъ естество́мъ, изъ Тебе́, Богороди́тельнице, вои́стинну сло́женъ за неизрече́нную ми́лость Свои́мъ Божество́мъ, пло́ть отъ крове́й Твои́хъ пріе́мъ. Тѣ́мже Тя́, Богоро́дицу, вѣ́дуще, пѣсносло́вимъ во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Укра́шена добродѣ́тельми и чуде́съ ря́снами упещре́на, къ кра́сному черто́гу Царя́ Христа́, Домни́ко, востекла́ еси́, пою́щи и превознося́щи Его́ во вѣ́ки.

Послѣ́довавши Христу́, я́ко Па́стырю чи́сту, а́гнице свята́я, къ небе́снѣй огра́дѣ, въ не́йже назнамена́нныхъ ове́цъ соводворе́ніе е́сть, съ ра́достію всели́лася еси́, преподо́бная.

Манове́ніемъ Бо́га вседѣ́тельнымъ отложе́ніе увѣ́дѣвши твоего́ тѣлесе́, ра́достну хвалу́ чистѣ́йшею душе́ю всѣ́хъ вино́вному приноси́ла еси́, Ему́же тво́й, чи́стая, въ руки́ преложи́ла еси́ ду́хъ.

Богоро́диченъ: Пресу́щественный Бо́гъ существу́ется на́съ ра́ди отъ Твои́хъ крове́й, истлѣ́вшее существо́ обнови́ти хотя́ за милосе́рдіе, Дѣ́во, и ми́лость, препросла́вленный во вся́ вѣ́ки.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Вся́кую сла́дость житія́ оплева́лъ еси́ вы́шнія ра́ди сла́дости, жесто́кому бо пребыва́нію па́че сла́дкаго житія́ поревнова́лъ еси́ и страсте́й потща́лся еси́ угаси́ти пе́щь мно́гими твои́ми слеза́ми, Гео́ргіе, мона́шествующихъ честно́е украше́ніе.

Ны́нѣ я́ко вои́стинну предъ Бо́гомъ стои́ши, всему́дре, Ему́же воздержа́ніемъ присво́итися пе́рвѣе потща́лся еси́ и Того́ явле́ній наслажда́ешися я́вѣ. Тѣ́мже всѣ́мъ дава́й, чту́щимъ тя́, просвѣще́ніе и Боже́ственныхъ прича́стіе.

Взя́лся еси́ къ Свѣ́ту незаходи́мому, сла́вне, тмы́ житія́ изба́вився, и Вседержи́телю и Трисо́лнечному Свѣ́ту предстои́ши съ вы́шними чи́нми, и отону́дныя наслажда́ешися испуща́емыя свѣ́тлости, блаже́нне, и на́съ озаря́еши, пою́щихъ тя́.

Богоро́диченъ: Всего́ мя́ Бо́гъ обожи́ти хотя́, ве́сь едини́тся Тебѣ́, и непости́жное всѣ́мъ та́инство новодѣ́йствуется: ражда́еши, Дѣ́ва нетлѣ́нна, и пло́ть ви́дится Бо́гъ. Его́же чту́ще, Тя́ ны́нѣ блажи́мъ, Марíе, я́коже Сама́ прорекла́ еси́.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Свяще́ннѣйшіи ли́цы, въ честнѣ́мъ твое́мъ успе́ніи начина́юще, Боже́ственнѣй твое́й души́, зря́щимъ яви́шася свяще́нными пѣснопѣ́ніи, въ мѣ́сто, путеводя́ще тя́ селе́нія чу́днаго, идѣ́же шу́мъ пра́зднующихъ, сла́вная.

Яко лозы́ Боже́ственныя благора́сленнѣйшая розга́ я́вльшися, умиле́нія на́мъ Боже́ственныя израсти́ла еси́ гро́зды, источа́ющія вино́ исцѣле́ній, Домни́ко, и ду́ши, и сердца́ вѣ́рно чту́щихъ тя́ веселя́щее.

Тѣле́сныхъ страсте́й, и душе́вныхъ скве́рнъ, и вся́каго вра́жія навѣ́та изба́ви ны́ моли́твами твои́ми, къ покро́ву твоему́ любо́вію прибѣга́ющія, Домни́ко, и тво́й пра́здникъ соверша́ющія, боже́ственный и честны́й.

Яко со́лнечную лучу́, озаря́ющую мíръ, я́ко невѣ́сту Христо́ву предо́бру и я́ко го́рлицу любоче́стну, я́ко ма́слину, я́ко ке́дръ, я́ко су́щу избра́нну голуби́цу, восхваля́емъ тя́ вси́, Домни́ко господоимени́тая.

Богоро́диченъ: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростію Твое́ю обличи́ мене́. Мо́литъ Тя́ Дѣ́ва, Тя́ ро́ждшая, Христе́, и а́нгелъ мно́жества, и преподо́бныхъ чи́ни.

Свѣти́ленъ пра́здника. Подо́бенъ: Посѣти́лъ ны́.

Яви́ся Спа́съ, благода́ть и и́стина, во струя́хъ Іорда́нскихъ и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

Сла́ва, и ны́нѣ, то́йже.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ве́ліе и стра́шно* та́инство соверша́ется:* Влады́ка бо всѣ́хъ человѣ́ковъ* на очище́ніе всѣ́хъ* руко́ю раба́ креща́ется.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Свы́ше Оте́цъ вопія́ше:* Се́й е́сть Сы́нъ возлю́бленный Мо́й,* вода́ми Іорда́нскими* пло́тію ны́нѣ креща́емый.

Сти́хъ: Что́ ти е́сть, мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Чи́ни а́нгельстіи,* ви́дѣвше Влады́ку,* уподо́бльшася рабу́* и вода́ми креща́ема,* пою́ще, дивля́хуся.

Сла́ва, и ны́нѣ, гла́съ то́йже. Самогла́сенъ:

Ви́дѣша Тя́ во́ды, Бо́же, ви́дѣша Тя́ во́ды и убоя́шася: къ Твое́й бо сла́вѣ противозрѣ́ти херуви́ми не мо́гутъ, ниже́ взира́ти серафи́ми, но, со стра́хомъ предстоя́ще, о́віи у́бо но́сятъ, о́віи же сла́вятъ си́лу Твою́. Съ ни́миже, Ще́дре, возвѣща́емъ хвалу́ Твою́, глаго́люще: явле́йся Бо́же, поми́луй на́съ.


НА ЛИТУРГІИ,
Блаже́нна пра́здника, пѣ́снь 1-я обои́хъ кано́новъ на 6.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 106 об. – 116.

/ Къ оглавленію раздѣла /


Наверхъ / Къ титульной страницѣ

0