Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія во 8-й де́нь.
Слу́жба свято́му священному́ченику Иси́дору и и́же съ ни́мъ седми́десяти и дву́мъ му́ченикомъ, во Юрьевѣ, гра́дѣ Ливо́нстѣмъ, за Правосла́віе пострада́вшимъ.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8: пра́здника 3 и му́чениковъ 5.
[Стихи́ры пра́здника, гла́съ 2:

Изба́вителю на́шему, отъ раба́ креща́ему и Ду́ха прише́ствіемъ свидѣ́тельствуему, ужасо́шася, зря́ще, а́нгельская во́инства. Гла́съ же съ небесе́ принесе́ся отъ Отца́: Се́й, Его́же Предте́ча руко́ю креща́етъ, Сы́нъ Мо́й е́сть возлю́бленный, о Не́мже благоволи́хъ. Христе́ Бо́же на́шъ, сла́ва Тебѣ́!

Іорда́нскія струи́ Тебе́, Исто́чника, прія́ша, и Утѣ́шитель въ ви́дѣ голуби́нѣ схожда́ше: приклоня́етъ ве́рхъ Приклони́вый небеса́. Зове́тъ и вопіе́тъ бре́ніе Зижди́телю: что́ ми повелѣва́еши, я́же вы́ше мене́? Азъ тре́бую Твоего́ креще́нія. О, безгрѣ́шный Христе́ Бо́же на́шъ, сла́ва Тебѣ́!]

Стихи́ры му́чениковъ, гла́съ 8, самогла́сенъ:

Что́ ва́съ нарече́мъ, святíи, я́ко де́моновъ полки́ сокруши́сте и стрѣ́лы и́хъ притупи́сте крѣ́пкимъ свои́мъ страда́ніемъ отъ мучи́телей? Вы́ бо небоя́зненно стоя́сте за Правосла́вную вѣ́ру Христо́ву, за ню́же тѣлеса́ своя́ на му́ки му́жески отда́сте, святíи му́ченицы, се́дмьдесяте со двѣма́, и со учи́телемъ свои́мъ Иси́доромъ, и страда́ніемъ свои́мъ, честнíи, святу́ю Це́рковь Христо́ву возвесели́сте; на́съ же, неду́гующихъ грѣхми́, изцѣли́те, му́ченицы боже́ственніи, я́ко иму́щіи дерзнове́ніе ко Го́споду, отъ раба́ креще́ніе пріи́мшему. [Два́жды.]

Что́ тя́ имену́емъ, свяще́нниче до́блій Иси́доре? Ты́ бо приве́лъ еси́ Христо́ви по́лкъ му́ченикъ, и съ ни́ми просла́вилъ еси́ пра́вую оте́ческую вѣ́ру предъ суему́дрыми лати́ны, и стра́нная уче́нія и льсти́вая увѣща́нія и́хъ отве́рглъ еси́ си́лою Христа́, креще́ніемъ во Іорда́нѣ главы́ зміе́въ сокруши́вшаго, Иже и да спасе́тъ на́съ и очи́ститъ грѣхо́въ на́шихъ мно́жество, Свои́хъ му́ченикъ мольба́ми, я́ко Ще́дръ и Человѣколю́бецъ. [Два́жды.]

Что́ ва́съ нарече́мъ, святíи добропобѣ́дніи му́ченицы Христо́вы со свяще́ннымъ учи́телемъ ва́шимъ Иси́доромъ? Вы́ бо, зако́нъ Госпо́день непоро́чно сохра́ньше, благоче́стная христіа́нская служе́нія соблюдо́сте и го́рдыхъ мучи́телей посрами́сте си́лою во Іорда́нѣ крести́вшагося Христа́ Спа́са на́шего. Его́же моли́те, му́ченицы Госпо́дни, изба́витися на́мъ тмы́ кромѣ́шныя и огня́ гее́нскаго и спасти́ся душа́мъ на́шимъ.

Сла́ва, гла́съ 5:

Ра́дуйся, свяще́нниче Бо́жій Иси́доре, до́блій та́йнамъ Христо́вымъ служи́телю: единоревни́тельный собо́ръ седми́десятъ со двѣма́ имы́й съ собо́ю, я́ко звѣзда́ пресвѣ́тлая, на тве́рди церко́внѣй возсія́лъ еси́ и Тро́ицу Единосу́щную и Нераздѣ́льную, Отца́, Сы́на и Ду́ха Свята́го, отъ Отца́ исходя́щаго, я́сно проповѣ́далъ еси́ предъ вражде́бнымъ би́скупомъ и мно́гимъ наро́домъ, облича́я лати́нскую вѣ́ру. Сего́ ра́ди и тѣлеса́ ва́ша свята́я, му́ченицы Христо́вы, предана́ бы́ша быстри́намъ рѣ́чнымъ и па́ки изнесе́на бы́ша Бо́жіимъ про́мысломъ на су́шу, ду́хи же ва́ша Христо́съ упоко́и во оби́телехъ небе́сныхъ. И ны́нѣ, святíи му́ченицы, за Правосла́вную вѣ́ру уме́ршіи, моли́теся Христу́ Бо́гу спасти́ся душа́мъ на́шимъ.

И ны́нѣ пра́здника, гла́съ 2:

[Приклони́лъ eси́ главу́ Предте́чи, сокруши́лъ eси́ главы́ зміе́въ. Прише́дъ въ струи́, просвѣти́лъ eси́ вся́чeская, е́же сла́вити Тя́, Спа́се, Просвѣти́теля ду́шъ на́шихъ.]

Вхо́дъ. Проки́менъ дне́. Парімíи святы́мъ.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры пра́здника, гла́съ 4, самогла́сны:

[Одѣва́яйся свѣ́томъ, я́ко ри́зою, на́съ ра́ди по на́мъ бы́ти сподо́бился éсть, во струи́ одѣва́ется дне́сь Іoрда́нскія, не Са́мъ си́хъ ко очище́нію тре́буя, но на́мъ Собо́ю устроя́яй порожде́ніе. О, чудесе́! Безъ oгня́ изваря́етъ, и назида́етъ безъ сокруше́нія, и спаса́етъ въ Него́ просвѣща́eмыя Христо́съ Бо́гъ и Спа́съ ду́шъ на́шихъ.

Тебе́, въ Ду́сѣ и oгни́ очища́юща грѣ́хъ мíра, зря́ Крести́тель гряду́ща къ себѣ́, ужаса́яся и трепе́ща, вопія́ше, глаго́ля: не смѣ́ю держа́ти ве́рхъ Тво́й пречи́стый, Ты́ мя освяти́, Влады́ко, Боже́ственнымъ явле́ніемъ Твои́мъ, Eди́не Человѣколю́бче.

Пріиди́те, подража́имъ му́дрыя дѣ́вы, пріиди́те, сря́щимъ я́вльшагося Влады́ку, я́ко пріи́де, я́ко Жени́хъ, ко Іоа́нну. Іoрда́нъ, ви́дѣвъ Тя́, убоя́ся и пожда́. Іоа́ннъ вопія́ше: не смѣ́ю держа́ти верха́ Безсме́ртнаго. Ду́хъ низхожда́ше въ ви́дѣ голуби́нѣ освяти́ти во́ды, и гла́съ съ небесе́: Се́й éсть Сы́нъ Мо́й, прише́дый въ мíръ спасти́ ро́дъ человѣ́ческій, Го́споди, сла́ва Тебѣ́.

Креща́ется Христо́съ и восхо́дитъ отъ воды́, совозво́дитъ бо съ Собо́ю мíръ и зри́тъ разводя́щаяся небеса́, я́же Ада́мъ затвори́ себѣ́ и су́щимъ съ ни́мъ, и Ду́хъ свидѣ́тельствуетъ Божество́, Подо́бному бо предти́четъ и гла́съ отъ небесе́: отту́ду бо свидѣ́тельствуемый, Спа́съ ду́шъ на́шихъ.

Трепета́ше рука́ Крести́телева, егда́ пречи́стому Твоему́ верху́ косну́ся; возврати́ся Іорда́нъ рѣка́ вспя́ть, не дерза́я служи́ти Тебѣ́. Яже бо устыдѣ́ся Іису́са Нави́на, ка́ко Творца́ своего́ устраши́тися не имя́ше? Но все́ испо́лнилъ еси́ смотре́ніе, Спа́се нашъ, да спасе́ши мíръ явле́ніемъ Твои́мъ, Еди́не Человѣ́колюбче.]

Сла́ва, гла́съ 2:

Пріиди́те, мучениколю́бцы, наслади́мся мы́сленно духо́вныя дне́сь трапе́зы, ю́же на́мъ предложи́ша тріе́ и се́дмьдесятъ му́ченицы Госпо́дни; вы́ же, страстоте́рпцы Христо́вы, со а́нгелы ду́хомъ водворя́ющеся, проси́те Христа́ Спа́са дарова́ти грѣхо́въ оставле́ніе на́мъ, ва́шу честну́ю па́мять соверша́ющимъ вѣ́рно.

И ны́нѣ пра́здника, гла́съ 8:

[Дне́сь вся́ка тва́рь просвѣща́ется, дне́сь вся́чeская веселя́тся, небе́сная вку́пѣ и земна́я, а́нгели и человѣ́цы смѣша́ются, идѣ́же бо Царе́во прише́ствіе, и чи́нъ прихо́дитъ. Теце́мъ у́бо на Іoрда́нъ и ви́димъ вси́ Іоа́нна: ка́ко креща́етъ Ве́рхъ Нерукотворе́нный и Безгрѣ́шный? Тѣ́мже, апо́стольскій гла́съ припѣва́юще, согла́сно возопіе́мъ: яви́ся благода́ть Бо́жія спаси́тельная всѣ́мъ человѣ́комъ, озаря́ющи и подаю́щи вѣ́рнымъ ве́лію ми́лость.]

На стихо́внѣ стихи́ры святы́мъ, гла́съ 4. Подо́бенъ: Яко до́бля въ му́ченицѣхъ.

Многообра́зными преще́ніи гнѣ́вный мучи́тель угрожа́ше ка́знемъ злы́мъ преда́ти тѣлеса́ ва́ша, богомы́сленніи му́ченицы, вы́ же не отверго́стеся Правосла́вныя Христо́вы вѣ́ры, но претерпѣ́ли есте́ темни́чная страда́нія и воспрія́ли есте́ го́рькую сме́рть, ожида́юще бу́дущаго воздая́нія и безсме́ртныя сла́вы.

Сти́хъ: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ].

Чу́дніи, боже́ственніи, прему́дріи страстоте́рпцы пѣ́сньми свяще́нными да почту́тся, Правосла́віе бо предъ враги́ свяще́нно проповѣ́давше, нечести́вую угаси́ша ле́сть свои́ми страда́ніи и сла́ву прія́ша неувяда́емую.

Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь.

Мучи́теля беззако́нна, беззако́нно повелѣва́ющаго исповѣ́дати непра́вую вѣ́ру, блаже́нніи му́дріи, посрами́сте, му́ченицы великоимени́тіи, и, пострада́вше терпѣли́вно, вѣнцы́ исплето́сте побѣ́дныя, о мíрѣ моля́щеся.

Сла́ва, гла́съ 4, самогла́сенъ:

Несы́тною ко Христу́ любо́вію ды́шуще, Правосла́вія не отверго́стеся, святíи му́ченицы, се́дмьдесяте со двѣма́, и со учи́телемъ ва́шимъ, свяще́ннымъ Иси́доромъ, и разли́чныя оби́ды и поноше́нія претерпѣ́сте, о Христѣ́ укрѣпля́еми, и мучи́телей де́рзость низложи́сте, святíи, и, непрекло́нно вѣ́ру Христо́ву сохра́ньше, на небеса́ преста́вистеся ко всѣ́хъ Творцу́, за Него́же и пострада́сте. Тѣ́мже, дерзнове́ніе иму́ще къ Нему́, проси́те дарова́ти душа́мъ на́шимъ ми́ръ и ве́лію ми́лость.

И ны́нѣ пра́здника, гла́съ 6:

[Дне́сь вся́ка тва́рь просвѣща́ется, дне́сь вся́чeская веселя́тся, небе́сная вку́пѣ и земна́я, а́нгели и человѣ́цы смѣша́ются, идѣ́же бо Царе́во прише́ствіе, и чи́нъ прихо́дитъ. Теце́мъ у́бо на Іoрда́нъ и ви́димъ вси́ Іоа́нна: ка́ко креща́етъ Ве́рхъ Нерукотворе́нный и Безгрѣ́шный? Тѣ́мже, апо́стольскій гла́съ припѣва́юще, согла́сно возопіе́мъ: яви́ся благода́ть Бо́жія спаси́тельная всѣ́мъ человѣ́комъ, озаря́ющи и подаю́щи вѣ́рнымъ ве́лію ми́лость.]

Тропа́рь, гла́съ 2:

Страстоте́рпцы Госпо́дни блаже́нніи, Правосла́вную вѣ́ру Христо́ву со дерзнове́ніемъ проповѣ́дасте и на суди́щи уче́нія враго́въ непра́вая обличи́сте, того́ ра́ди и вве́ржени бы́сте, святíи, во глубину́ рѣ́чную, ду́ши же ва́ша всели́шася въ небе́сныя кро́вы, идѣ́же со святы́ми предстоя́ще престо́лу Царя́ всѣ́хъ Бо́га, моли́теся Ему́ за Благовѣ́рнаго Импера́тора на́шего и за вся́ правосла́вныя лю́ди, по́двиги ва́ша че́стно почита́ющія.

Сла́ва, и ны́нѣ, пра́здника:

[Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.]


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, му́чениковъ. И ны́нѣ, пра́здника.

По 1-й стихоло́гіи сѣда́ленъ, гла́съ 4. Подо́бенъ: Яви́ся дне́сь.

Честну́ю тве́рдь церко́вную, я́ко звѣ́зды вели́кія, просвѣща́ете при́сно и вѣ́рныя озаря́ете, му́ченицы боже́ственніи, Христо́вы во́ини. [Два́жды.]

Сла́ва, и ны́нѣ, пра́здника, [гла́съ 3. Подо́бенъ: Красотѣ́.

Явльшуся Тебѣ́ во Іорда́нѣ, Спа́се, и кре́щшуся Тебѣ́ отъ Предте́чи, Христе́, возлю́бленный Сы́нъ свидѣ́тельствованъ бы́лъ еси́, тѣ́мже и Собезнача́ленъ Отцу́ яви́лся еси́, Ду́хъ же Святы́й на Тя́ схожда́ше, Имже и просвѣти́вшеся, вопіе́мъ: сла́ву Бо́гу, Су́щему въ Тро́ицѣ.]

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Му́жественнымъ по́мысломъ преше́дше муче́ніе, чу́дніи страстоте́рпцы, сквозѣ́ рѣ́чную глубину́ проидо́сте и премину́сте ко спасе́нія широтѣ́, наслѣ́діе пріи́мше небе́сное Ца́рство, въ не́мже твори́те о на́съ боже́ственныя мольбы́, добропобѣ́дніи му́ченицы. [Два́жды.]

Сла́ва, и ны́нѣ, пра́здника, гла́съ 5. Подо́бенъ: Собезнача́льное Сло́во.

[Іорда́нскими струя́ми обло́жся, Иже свѣ́томъ пресла́вно одѣва́яйся, въ ни́хже Ада́мово естество́ обнови́лъ еси́, сокру́шшееся злы́мъ преслуша́ніемъ, Сло́ве Бо́жій. Тѣ́мже Тя́ восхваля́емъ и свято́е Твое́ вси́ славосло́вимъ явле́ніе.]

По поліеле́и сѣда́ленъ, гла́съ 8:

Ведо́ми бы́сте свя́зани отъ враго́въ и въ темни́цу затворе́ни, вѣ́рою соблюда́еми, непобѣди́ми пребы́сте и, отрѣши́вшеся тѣле́съ, святíи, боже́ственнымъ жела́ніемъ я́вѣ облеко́стеся. Тѣ́мже, я́ко свѣти́ла, просія́сте въ мíрѣ, вѣ́рныя просвѣща́юще Ду́ха благода́тію. Страстоно́сцы му́ченицы, моли́те Христа́ Бо́га согрѣше́ній проще́ніе дарова́ти чту́щимъ любо́вію святу́ю па́мять ва́шу. [Два́жды.]

Сла́ва, и ны́нѣ, пра́здника, гла́съ 4. [Подо́бенъ: Удиви́ся Іо́сифъ.

Пріиди́те, уви́димъ, вѣ́рніи, гдѣ́ крести́ся Христо́съ, да послѣ́дуимъ про́чее ко Іорда́ну рѣцѣ́, ко гла́су вопію́щаго въ пусты́ни, и уви́димъ та́мо Содѣ́теля Ада́мова, дла́нію ра́бскою рукополага́ема за благоутро́біе неизрече́нное, и къ Нему́ велегла́сно возопіи́мъ: прише́лъ еси́ и яви́лся еси́ во Іорда́нѣ освяти́ти во́ды.]

Степе́нна, 1-й антифо́нъ 4-го гла́са. Проки́менъ, гла́съ 4: Воззва́ша пра́ведніи, и Госпо́дь услы́ша и́хъ,* [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Вся́кое дыха́ніе... Ева́нгеліе [Матѳе́я, зача́ло 36].

По 50-мъ псалмѣ́ стихи́ра, гла́съ 2:

Пріиди́те, возра́дуемся Го́сподеви въ па́мять страстоте́рпецъ, о празднолю́бцы! Пріиди́те, воспои́мъ я́сно, восхваля́юще страда́льцы Христо́вы, лжи́вая мудрова́нія и вра́жескую ле́сть отве́ргшія и пра́вую вѣ́ру Христо́ву посредѣ́ суди́ща небоя́зненно проповѣ́давшія. Тѣ́мже, о всеблаже́нніи и многострада́льніи, непре́станно моли́теся о душа́хъ на́шихъ.

Кано́нъ пра́здника со ирмосо́мъ на 6 и му́чениковъ на 8:

[Кано́нъ пра́здника, гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.]

Кано́нъ святы́мъ му́ченикомъ, [гла́съ 1].
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Безпеча́льную жи́знь наслѣ́довасте, святíи му́ченицы Христо́вы, се́дмьдесяте со треми́, и ра́дости духо́вныя исполня́еми при́сно, вся́ку печа́ль, молю́ся, отжени́те отъ души́ моея́, я́ко да, ра́дуяся, сла́влю свяще́нное ва́ше страда́ніе.

Новоявле́нныя звѣ́зды бы́сте, му́ченицы Христо́вы, предводи́мыя достосла́внымъ, крѣ́пкимъ во уче́ніи и терпѣ́ніи, свяще́ннымъ Иси́доромъ, тѣ́мже мо́лимъ вы́: тму́ грѣхо́вную отжени́те отъ серде́цъ на́шихъ, добропобѣ́дніи му́ченицы Христо́вы.

Разжже́нніи Боже́ственными у́гльми Свята́го Ду́ха, страда́льцы, до́блестнымъ страда́ніемъ просія́сте, святíи, и стрѣ́лы сокруши́сте вся́ дре́вняго змíя, льсти́ваго борца́.

Тро́иченъ: Тро́ице Единосу́щная, Отче, Сло́ве и Ду́ше Святы́й, Тя́ вѣ́рно сла́вимъ, я́ко Творца́ всѣ́хъ, и Тебѣ́ вопіе́мъ благоче́стно: Тро́ице Свята́я, спаси́ ны, Бо́же, моли́твами Твои́хъ страда́лецъ.

Богоро́диченъ: Две́рь Боже́ственныя сла́вы — Ты́ еси́, Пречи́стая Госпоже́, покая́нія ми́ две́ри отве́рзи, Влады́чице, отъ вра́тъ а́довыхъ исхити́, молю́ся, смире́нную мою́ ду́шу, я́ко да по до́лгу сла́влю Тя́, те́плую Засту́пницу мою́.

Пѣ́снь 3.

[Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ:]

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Двиза́ше всю́ зло́бу льсти́вый вра́гъ, со святы́ми боря́ся, и побѣжда́шеся отъ ни́хъ, зря́ тѣ́хъ непобѣжда́емыхъ, поне́же Бо́жія си́ла помога́ше и́мъ, тѣ́мже Боже́ственныя свѣ́тлости яви́шася о́бщницы, богоблаже́нніи.

Злому́дренный би́скупъ ва́съ восхотѣ́, святíи, отто́ргнути отъ пра́выя вѣ́ры и ко своему́ лжемудрова́нію присоедини́ти и опрѣсно́чному служе́нію, вы́ же противуста́сте ему́, святíи, я́ко до́бліи во́ини, и си́лою Христо́вою побѣ́ду взя́сте на́нь.

Тро́иченъ: Свѣ́тъ Оте́цъ, Свѣ́тъ Сы́нъ, Свѣ́тъ Ду́хъ Святы́й Утѣ́шительный, я́ко отъ Со́лнца бо Еди́наго Тро́ица сія́ющи, Боже́ственно озаря́етъ и соблюда́етъ ду́ши на́ша святы́хъ му́ченикъ мольба́ми.

Богоро́диченъ: Дѣ́во Ма́ти Пречи́стая, я́же Бо́га вопло́щшая, гла́сы пріими́ вопію́щихъ Ти́ всегда́ и на́съ изба́ви отъ разли́чныхъ искуше́ній вра́жіихъ.

[Конда́къ пра́здника, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.]

Сѣда́ленъ, гла́съ 5:

Сія́етъ дне́сь па́мять страстоте́рпцевъ Твои́хъ, Го́споди, седми́десятъ со двѣма́ и со священнонача́льникомъ и́хъ Иси́доромъ, я́ко звѣ́зды, просія́вшихъ и мра́къ заблужде́нія прогна́вшихъ отъ вѣ́рныхъ Бо́жіимъ посо́біемъ; и́мутъ бо дерзнове́ніе ко Го́споду, Ему́же и предстоя́тъ, моля́щеся о всѣ́хъ на́съ, честна́я страда́нія и́хъ вѣ́рно почита́ющихъ. [Два́жды.]

Сла́ва, и ны́нѣ, пра́здника, [гла́съ 4:

Струи́ освяти́лъ еси́ Іорда́нскія, держа́ву сокруши́лъ еси́ грѣхо́вную, Христе́ Бо́же на́шъ, приклони́лъ еси́ дла́ни Себе́ Предте́чевѣ и спа́слъ еси́ отъ ле́сти человѣ́ческій ро́дъ. Тѣ́мже Тя́ мо́лимъ: спаси́ ду́ши на́ша.]

Пѣ́снь 4.

[Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ:]

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Страда́льцы святíи, се́дмьдесяте со двѣма́, и, я́ко го́лубь чи́стый, Иси́доре, учи́телю и́стинныя вѣ́ры Христо́вы, ва́съ поколеба́ти не возмо́же вселука́вый отъ боже́ственнаго стоя́нія, но са́мъ паде́ся злы́й.

Страстоте́рпцы сла́вніи и страда́льче до́блій, Иси́доре блаже́нный, приведы́й Го́сподеви ли́къ му́чениковъ, вы́ бо уме́ты вмѣни́сте вся́ кра́сная мíра, да обря́щете Христа́ Бо́га на́шего — и́стинную Красоту́ и некра́домое Бога́тство.

Тро́иченъ: Тро́ицу Ли́цы, Еди́ницу о́бразомъ, благоче́стно сла́вимъ, Бо́га и́стинна, Его́же пою́тъ а́нгельская и арха́нгельская чинонача́лія, я́ко тва́ри Влады́ку, и человѣ́цы, вѣ́рно покланя́ющеся при́сно.

Богоро́диченъ: Воплоща́ется отъ чи́стыхъ крове́й Твои́хъ Госпо́дь, покая́ніе чту́щимъ Тя́ подава́я, Всепѣ́тая, Твои́мъ благи́мъ хода́тайствомъ, я́ко Благоутро́бенъ и Еди́нъ Человѣколю́бецъ.

Пѣ́снь 5.

[Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ:]

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Во́дъ духо́вныхъ испо́лнишася тріе́ и се́дмьдесятъ, въ во́ду вве́ржени бы́вше, святíи, за всѣ́хъ Живота́ — Христа́ Царя́, и Боже́ственнымъ манове́ніемъ изнесе́на бы́ша честна́я тѣлеса́ и́хъ на су́шу, и пре́лести изсуши́ша му́тныя пото́ки си́лою Бо́жіею, и вѣ́рныхъ сердца́ напои́ша.

Вельми́ подви́гшеся ре́вностію, боже́ственніи му́ченицы, и о Христѣ́ укрѣпля́еми, враго́въ Правосла́вныя вѣ́ры посрами́сте и зако́нъ лати́нскій и лжи́вая уче́нія попра́сте, святíи, и ни во что́же вмѣни́сте. Му́ченикъ моле́ніемъ, Сло́ве Бо́жій, вели́кихъ му́къ изба́ви на́съ, вседуше́вно свята́я муче́нія и́хъ ублажа́ющихъ.

Тро́иченъ: Пренача́льное и Присносу́щное Еди́но Божество́ славосло́вяще, поклони́мся въ Тріе́хъ Ли́цѣхъ естество́мъ Нераздѣ́льному и сла́вою Равноче́стному, я́коже боже́ственніи му́ченицы проповѣ́даша.

Богоро́диченъ: Дѣ́во, въ жена́хъ Благослове́нная, Твоя́ ми́лости пода́ждь лю́демъ Твои́мъ, страстоте́рпцевъ Христо́выхъ моле́ніемъ, Ми́лостиваго бо яви́лася еси́ Ма́ти.

Пѣ́снь 6.

[Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ:]

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Что́ на́мъ мно́гая словеса́, я́же глаго́леши, би́скупе, непра́выя вѣ́ры побо́рниче, и обѣща́емая, я́же предлага́еши? — свяще́нный Иси́доръ со дружи́ною свое́ю глаго́лаше къ мучи́телю, — сія́ вся́ на́мъ же́лчи горча́йша, но твори́, е́же хо́щеши, о суему́дренне.

Ва́съ, честнíи страда́льцы Христо́вы, Ду́хъ Святы́й укрѣпи́, и всели́ся въ ва́съ бога́тно, и терпѣ́ніе дарова́ ва́мъ проти́ву жестокосе́рдыхъ враго́въ, Его́же си́лою мно́гія томле́нія и му́ки претерпѣ́сте, святíи, отъ неправовѣ́рныхъ. Тѣ́мже и Христо́съ ва́съ вѣнча́ десни́цею Свое́ю бога́тою, за Него́же и пострада́сте.

Тро́иченъ: Оте́цъ, Сы́нъ и Ду́хъ Пра́вый, Тріѵпоста́сная Еди́нице и Нераздѣли́мая Тро́ице, поми́луй покланя́ющіяся Боже́ственнѣй держа́вѣ Твое́й.

Богоро́диченъ: Витíйствующая уста́ не возмо́гутъ повѣ́дати Твое́, Отрокови́це, та́инство: Несказа́ннаго бо ражда́еши и на руку́ Свое́ю но́сиши руко́ю Содержа́щаго вся́ческая.

Конда́къ, гла́съ 4:

Му́ченикъ Христо́выхъ ли́къ пѣ́сньми почти́мъ, пострада́вшихъ крѣ́пко Христо́вы ра́ди вѣ́ры и́стинныя и вра́жію горды́ню до конца́ низложи́вшихъ. Озари́вшеся бо благода́тію Несозда́нныя Тро́ицы, сла́вніи, со священному́ченикомъ Иси́доромъ пострада́вшіи, я́ко звѣ́зды, сія́ете во все́мъ мíрѣ, и ны́нѣ мо́литеся Христу́ непреста́нно, и на́съ защища́ете отъ вражде́бныхъ язы́къ наше́ствія, неусы́пніи моли́твенницы о душа́хъ на́шихъ.

Икосъ:

Прему́дрый Зижди́тель, Влады́ка и Госпо́дь виногра́да мы́сленнаго, я́коже пресвяты́ми усты́ въ при́тчи виногра́да глаго́летъ, во единонадеся́тый ча́съ дѣ́лавшимъ да́руетъ бога́тую мзду́; и ны́нѣ, дѣ́лы извѣсти́въ въ при́тчи кры́емое, священноучи́теля Иси́дора и и́же съ ни́мъ по́лкъ страда́лецъ се́дмьдесятъ со двѣма́ показа́ свѣ́тлы му́ченики и во́ины преизря́дны. Преда́нія бо и зако́ны лати́нскія попра́вше, до́бліи, и ненави́стниковъ пра́выя вѣ́ры ужаси́вше крѣ́пкимъ противле́ніемъ свои́мъ и терпѣ́ніемъ, подо́бни бы́сте пе́рвымъ страда́льцемъ, святíи му́ченицы. Тѣ́мже Христо́съ ва́съ вѣнча́ нетлѣ́нными вѣнцы́ въ кро́вѣхъ небе́сныхъ, идѣ́же му́ченичестіи ли́цы веселя́тся. Вы́ же защища́йте на́съ отъ вражде́бныхъ язы́къ наше́ствія, неусы́пніи моли́твенницы о душа́хъ на́шихъ.

Пѣ́снь 7.

[Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ:]

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

Истинніи му́ченицы, и́стиннаго Христа́ Бо́га на́шего страда́льцы, тріе́ и се́дмьдесятъ, взыва́ху къ мучи́телемъ свои́мъ: біе́ніе, и о́гнь, и ины́я му́ки гото́ви есмы́ сла́дцѣ подъя́ти за пра́вую вѣ́ру Христо́ву. И ра́достно поя́ху: а́ще Бо́гъ по на́съ, никто́же на ны́, благослове́нъ Бо́гъ оте́цъ на́шихъ.

Зубы́ скреже́щуще убíйственніи лю́діе и, я́ко звѣ́ріе, восхи́тивше богоявле́нники, въ темни́цу вмета́ху и вода́мъ предая́ху, му́ченицы же ра́достно поя́ху: благослове́нъ Бо́гъ оте́цъ на́шихъ.

Тро́иченъ: Просла́вимъ Тро́ицу Нераздѣ́льную, воспои́мъ Еди́но Божество́, со Отце́мъ Сло́во и Ду́ха Всесвята́го.

Богоро́диченъ: Благослове́нъ еси́, Бо́же, Иже во чре́вѣ Дѣви́чи всели́выйся и спасы́й человѣ́ка, препѣ́тый и превозноси́мый во вѣ́ки.

Пѣ́снь 8.

[Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ:]

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Хва́лящеся я́звами Христо́выми, къ вѣ́чнымъ востеко́сте оби́телемъ, священному́чениче Иси́доре и и́же съ тобо́ю собо́ръ му́ченическій, во оде́жды одѣ́яни убѣле́нныя, и свѣ́тло Царе́ви си́лъ предстоите́, съ му́ченики взыва́юще: благослови́те, вся́ дѣла́ Госпо́дня, Го́спода.

Страстоте́рпцы, му́ченицы Христо́вы, се́дмьдесяте со треми́, пла́мень вра́жескія зло́бы попра́сте Бо́жіимъ посо́біемъ, безчеловѣ́чныхъ мучи́телей посрами́сте и вѣнцы́ нетлѣ́нными отъ Христа́ вѣнча́стеся, непобѣди́міи, воспѣва́юще: благослови́те, вся́ дѣла́ Госпо́дня, Го́спода.

Яко земля́ жа́ждущая, му́ченицы блаже́нніи, прія́сте уче́нія отъ медото́чнаго язы́ка Иси́дора свяще́ннаго и вложи́сте въ ду́ши своя́, я́коже нѣ́кую сла́дость Боже́ственную, и отъ сего́ принесо́сте Подвигополо́жнику Христу́ кла́съ стори́чествующь, пою́ще: благослови́те, вся́ дѣла́ Госпо́дня, Го́спода.

Тро́иченъ: Да пое́тся Трисвяты́й, Оте́цъ и Сы́нъ и Ду́хъ Святы́й, Нераздѣ́льная Еди́ница, Еди́но Божество́, держа́щее дла́нію всю́ тва́рь во вся́ вѣ́ки и на́съ назира́ющее ми́лостію Свое́ю бога́тою, пою́щихъ: благослови́те, вся́ дѣла́ Госпо́дня, Го́спода.

Богоро́диченъ: Изъ Тебе́ Бо́гъ возсія́, Всепѣ́тая Дѣ́во, и богоразу́міемъ просвѣти́ омраче́нныя лю́ди, и на́съ отъ истлѣ́нія къ жи́зни небе́снѣй возведе́, пою́щихъ: благослови́те, вся́ дѣла́ Госпо́дня, Го́спода.

Пѣ́снь 9.

[Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Инъ:]

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Пло́ть свою́ преда́вше ра́намъ и го́рькимъ темни́цамъ за Всевы́шняго Царя́ и Го́спода, неуя́звленну спасли́ есте́ ду́шу, страстоте́рпцы Госпо́дни блаже́нніи со треми́ се́дмьдесяте, и Боже́ственныя сла́вы прича́стницы бы́ти сподо́бистеся, всечестнíи му́ченицы.

Невече́рняго Свѣ́та — Христа́ — звѣ́зды на земли́ со пресвѣ́тлымъ Иси́доромъ свяще́ннымъ яви́стеся, блаже́нніи, и всѣ́мъ человѣ́комъ озаря́ете ду́ши, призыва́ющимъ ва́съ съ вѣ́рою и почита́ющимъ святу́ю па́мять ва́шу.

Па́мять свѣтоза́рную ва́шу и честну́ю почита́юще и ра́дующеся ду́хомъ, мо́лимся: блаже́нный Иси́доре, до́блій учи́телю, съ пострада́вшими съ тобо́ю му́ченики, вся́ правосла́вныя лю́ди сохраня́йте невреди́мы, и Импера́тора на́шего ски́петръ и во́и утверди́те, непобѣди́міи му́ченицы Христо́вы.

Тро́иченъ: Тріѵпоста́сное Естество́ и Нераздѣ́льную сла́ву, въ Божествѣ́ Еди́нѣмъ пое́мую непреста́нно на небеси́ и на земли́, Тро́ицу Неразлу́чную просла́вимъ, съ Сы́номъ Отцу́ и Ду́ху покланя́ющеся благоче́стно, да изба́вимся муче́нія о́гненнаго предста́тельствомъ страстоте́рпцевъ, проповѣ́давшихъ Святу́ю Тро́ицу.

Богоро́диченъ: Благослове́нную Марíю, Госпожу́, и Бо́жію Ма́терь, и Дѣ́ву, пріиди́те, вси́ вѣ́рніи, любо́вію непреста́нно восхва́лимъ, Ея́же ра́ди обрѣто́хомъ вѣ́чное ра́дованіе.

Свѣти́ленъ. Подо́бенъ: Пло́тію усну́въ.

Свѣ́ту Невече́рнему — Христу́ — предстоя́ще съ ли́ки му́ченическими, блаже́нніи страстоте́рпцы Госпо́дни, се́дмьдесятъ со треми́, воспѣва́ющихъ ва́съ спаса́йте моли́твами свои́ми, святíи. [Два́жды.]

[Сла́ва, и ны́нѣ,] богоро́диченъ:

Незаходи́маго Свѣ́та носи́ла еси́, Приснодѣ́во Ма́ти Марíе, просвѣща́ющаго сѣдя́щихъ во тмѣ́ невѣ́дѣнія, Сы́на Твоего́ и Бо́га на́шего.

На хвали́техъ стихи́ры [на 4], гла́съ 8. Подо́бенъ: О, пресла́внаго чудесе́!

Му́ченицы Христо́вы прехва́льніи, гони́телей стремле́нія и ну́ждную сме́рть ни во что́же вмѣни́сте, и, благоде́рзостно ополчи́вшеся, мужему́дренно къ боре́ніемъ побѣдоно́сною сла́вою одѣ́ястеся, и причто́стеся всѣ́мъ пра́веднымъ, съ ни́миже ва́съ, всегда́ хва́ляще, ублажа́емъ. [Два́жды.]

Му́ченицы Христо́вы преблаже́нніи, на водно́е потопле́ніе са́ми себе́ преда́сте, и зе́млю тѣлесы́ ва́шими освяти́сте, и возду́хъ просвѣти́сте восхожде́ніемъ къ небесе́мъ; ны́нѣ же живете́ на небесѣ́хъ во свѣ́тѣ невече́рнемъ, о на́съ всегда́ моля́щеся, богови́дцы.

Му́ченицы Христо́вы непобѣди́міи, му́къ разжже́ніе росо́ю Боже́ственныя благода́ти безъ вре́да проидо́сте, и на водѣ́ поко́йнѣ жи́ти сподо́бистеся, вѣнцы́ побѣ́ды пріе́мше; тѣ́мъ, ра́дующеся дне́сь, пра́зднуемъ святу́ю ва́шу па́мять, Христа́ сла́вяще.

Сла́ва, гла́съ 8:

Во́инствовавше Христу́, я́же на земли́ кра́сная оста́висте, и, кре́стъ на ра́мена взе́мше, му́къ ра́ди многоплете́нныхъ Тому́ послѣ́довали есте́, и предъ мучи́тели мно́гими не отверго́стеся Его́. Ангелы вѣнцы́ побѣ́дными главы́ ва́ша увязо́ша, дерзнове́нніи душе́ю, свѣ́тло въ черто́гъ небе́сный внидо́сте. Тѣ́мже, дерзнове́ніе иму́ще ко Спа́су всѣ́хъ, моли́теся о душа́хъ на́шихъ.

И ны́нѣ пра́здника, [гла́съ 2:

Дне́сь Христо́съ на Іoрда́нъ пріи́де крести́тися, дне́сь Іоа́ннъ каса́ется верху́ Влады́чню. Си́лы небе́сныя ужасо́шася, пресла́вное ви́дяще та́инство. Мо́ре ви́дѣ и побѣже́, Іoрда́нъ, ви́дѣвъ, возврати́ся. Мы́ же, просвѣ́щшеся, вопіе́мъ: сла́ва яви́вшемуся Бо́гу, и на земли́ ви́дѣнному, и просвѣти́вшему мíръ.]

Славосло́віе вели́кое. Ектеніи́ и отпу́стъ. Ча́съ пе́рвый.



НА ЛИТУРГІИ,

Блаже́нна пра́здника, пѣ́снь 4-я и святы́мъ пѣ́снь 6-я. Проки́менъ, [пра́здника, гла́съ 4: Благослове́нъ гряды́й во и́мя Госпо́дне, Бо́гъ Госпо́дь и яви́ся на́мъ. Сти́хъ: Исповѣ́дайтеся Го́сподеви, я́ко Бла́гъ, я́ко въ вѣ́къ ми́лость Его́. И святы́мъ, гла́съ то́йже: Святы́мъ, и́же су́ть на земли́ Его́, удиви́ Госпо́дь вся́ хотѣ́нія Своя́ въ ни́хъ. Апо́столъ, святы́мъ, къ Ри́мляномъ, зача́ло 99. Аллилу́ія, пра́здника, гла́съ 4: Принеси́те Го́сподеви сы́нове Бо́жіи, принеси́те Го́сподеви сы́ны о́вни. Сти́хъ: Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. И святы́мъ, гла́съ то́йже:] Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ. Ева́нгеліе Луки́, зача́ло 106. Прича́стенъ пра́здника: Яви́ся благода́ть Бо́жія спаси́тельная всѣ́мъ человѣ́комъ. И святы́мъ: Ра́дуйтеся пра́ведніи о Го́сподѣ, пра́вымъ подоба́етъ похвала́].

Источникъ: Слу́жба свято́му священному́ченику Иси́дору и и́же съ ни́мъ 72-мъ му́ченикомъ, во Юрьевѣ, гра́дѣ Ливо́нстѣмъ, за Правосла́віе пострада́вшимъ во 1472 году́. — Пе́рвымъ тисне́ніемъ. — СПб.: Сѵнода́льная Тѵпогра́фія, 1897. — С. 3-26.

/ Къ оглавленію раздѣла /


Наверхъ / Къ титульной страницѣ

0