Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 8-й де́нь.
Слу́жба преподо́бному отцу́ на́шему Григо́рію, чудотво́рцу Пече́рскому.

ВЕЧЕРЪ,
Блаже́нъ му́жъ, 1-й антифо́нъ. На Го́споди воззва́хъ: стихи́ры на 6, гла́съ 1. Подо́бенъ: Прехва́льніи му́ченицы.

Отче Григо́ріе,* ты́, Дави́дскимъ глаго́ломъ внима́я,* не да́лъ еси́ тѣ́лу своему́ упокое́нія,* ни вѣ́ждома дрема́нія,* до́ндеже отъ страсте́й очи́стився* и лѣ́ствицу богови́дѣнія пріе́мь,* къ чистѣ́йшему Свѣ́ту возше́лъ еси́,* идѣ́же ны́нѣ живы́й,* моли́ся дарова́ти душа́мъ на́шимъ* ми́ръ и ве́лію ми́лость. [Два́жды.]

Отче Григо́ріе,* твои́хъ чуде́съ творе́ніе* протече́ всю́ Россíйскую зе́млю,* а́ки труба́ велегла́сна,* вопію́щи и созыва́ющи празднолю́бныя лю́ди,* честну́ю твою́ па́мять восхвали́ти,* съ ни́миже и мы́ хвалу́ прино́симъ* и кла́няемся ра́цѣ моще́й твои́хъ,* моля́щеся тобо́ю улучи́ти* ми́ръ и ве́лію ми́лость. [Два́жды.]

Сла́ва, гла́съ 8:

Мона́ховъ мно́жества, святолѣ́пное твое́ житіе́ чту́ще, удивля́емся и прославля́емъ Просла́вльшаго тя́ Бо́га, я́ко дарова́ тебѣ́ мно́го чудотворе́ніе, и́мже бѣ́сы отъ человѣ́къ прогна́лъ еси́ и согрѣша́ющихъ во исправле́ніе приводи́лъ еси́. Его́же и на́мъ, де́нь честна́го успе́нія твоего́ почита́ющимъ, умоли́ дарова́ти ми́лость въ де́нь су́дный.

И ны́нѣ, пра́здника, гла́съ 4:

Трепета́ше рука́ Крести́телева, егда́ Пречи́стому Твоему́ верху́ косну́ся, возврати́ся Іорда́нъ рѣка́ вспя́ть, не дерза́я служи́ти Тебѣ́: я́же бо устыдѣ́ся Іису́са Нави́на, ка́ко Творца́ своего́ устраши́тися не имя́ше? Но все́ испо́лнилъ еси́ смотре́ніе, Спа́се на́шъ, да спасе́ши мíръ явле́ніемъ Твои́мъ, Еди́не Человѣколю́бче.

Вхо́дъ. Проки́менъ дне́, и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 6. Подо́бенъ: Тридне́вно.

Истлѣ́вшее страстьми́ естество́ на́ше,* Влады́ка сше́дъ на во́ды, обновля́етъ,* и тебе́, свя́те,* къ во́днымъ струя́мъ прише́дша,* обнови́ человѣколю́бнѣ,* препосла́въ въ живо́тъ вѣ́чный.

Сти́хъ: Восхва́лятся преподо́бніи во сла́вѣ* и возра́дуются на ло́жахъ своихъ.

Водо́ю и Ду́хомъ* обнови́вшему человѣ́ческое естество́* Христу́ поревнова́лъ еси́, преподо́бне,* тѣ́мже и́стины ра́ди* въ водѣ́ потопле́нъ бы́лъ еси́,* е́юже тече́ніе соверши́въ,* ны́нѣ ра́дуешися со Христо́мъ* на водѣ́ поко́йнѣ.

Сти́хъ: Возвесели́тся пра́ведникъ о Го́сподѣ* и упова́етъ на Него́.

На́гъ стоя́й въ струя́хъ Іорда́нскихъ Влады́ка,* разрѣша́етъ ро́дъ человѣ́ческій* отъ у́зъ а́дскихъ,* и́же и тебе́, блаже́нне, водо́ю разрѣши́,* внегда́ изведе́ изъ темни́цы плотскíя ду́хъ тво́й.

Сла́ва, гла́съ 5:

Житіе́ твое́, свѣ́тлостію Боже́ственныхъ добродѣ́телей украше́нно, облиста́етъ Россíйскую зе́млю, ра́ка же святы́хъ моще́й твои́хъ всѣ́мъ, съ вѣ́рою приходя́щимъ, лучи́ чуде́съ испуща́етъ. Да́ждь сія́ и на́мъ въ зна́меніе любве́ твоея́, а́ще бо и отше́лъ еси́, но духо́внѣ при́сно призира́еши, и ви́дя всѣ́хъ те́плое проше́ніе, подае́ши отъ Христа́ Бо́га благода́ть и ве́лію ми́лость моли́твами твои́ми.

И ны́нѣ, пра́здника, гла́съ 4:

Тебе́, въ Ду́сѣ и огни́ очища́юща грѣ́хъ мíра, зря́ Крести́тель гряду́ща къ себѣ́, ужаса́яся и трепе́ща, вопія́ше, глаго́ля: не смѣ́ю держа́ти ве́рхъ Тво́й Пречи́стый, Ты́ мя освяти́, Влады́ко, Боже́ственнымъ явле́ніемъ Твои́мъ, Еди́не Человѣколю́бче.

Тропа́рь, гла́съ 3:

Вели́кихъ дарова́ній пріе́мниче и вели́кихъ чуде́съ си́лою Бо́жіею твори́телю, пречу́дне о́тче Григо́ріе, я́ко ве́ліе дерзнове́ніе имѣ́я ко Христу́ Бо́гу, непреста́нно о на́съ моли́ся Ему́, да грѣхо́въ оставле́ніе пода́стъ душа́мъ на́шимъ.

Сла́ва, и ны́нѣ, пра́здника.



НА УТРЕНИ,
На Бо́гъ Госпо́дь: тропа́рь пра́здника, [два́жды]. Сла́ва, свята́го. И ны́нѣ, пра́здника.

По 1-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Блаже́нство боя́щихся Го́спода хотя́ наслѣ́дити, дѣ́ломъ за́повѣди Бо́жія испо́лнилъ еси́, все́ свое имѣ́ніе, е́же имѣ́лъ еси́, во сла́ву Бо́жію расточи́лъ еси́, а́ще и лука́внѣ тре́бующимъ, богому́дре Григо́ріе пребога́те. Тѣ́мже твоя́ па́мять и пра́вда пребыва́етъ во вѣ́ки. [Два́жды.]

Сла́ва, и ны́нѣ, пра́здника.

По 2-мъ стихосло́віи сѣда́ленъ, гла́съ 3. Подо́бенъ: Красотѣ́ дѣ́вства.

Тебѣ́, Влады́ко Христе́, на Іорда́нъ прише́дшу, ра́бъ, и́же вѣ́рно Тебѣ́ преподо́біемъ и пра́вдою послужи́лъ, повелѣ́ніемъ кня́зя утопле́нъ, къ нестарѣ́ющейся жи́зни оты́де. Его́же ско́раго моли́твенника къ вели́честву Твоему́ иму́ще, Тебе́, Бо́га на́шего, въ па́мяти его́ прославля́емъ. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 8. Подо́бенъ: Прему́дрости.

Пра́ведныхъ блаже́нства и со а́нгельскими чи́нми ликостоя́нія жела́я, вся́, я́же въ мíрѣ, презрѣ́въ, и о само́мъ животѣ́ неради́лъ еси́, тѣ́мже ни нося́щаго діади́му устыдѣ́лся еси́, но оте́чески нака́зовалъ, къ покая́нію того́ приводя́, отъ него́же непови́ннѣ въ водѣ́ утопле́нъ, къ вода́ми Одѣва́ющемуся отше́лъ еси́, псало́мски поя́: проидо́хъ сквозѣ́ о́гнь и во́ду, и изве́лъ еси́, Бо́же, въ поко́й Тво́й. Идѣ́же ны́нѣ живы́й, моли́ не лиши́тися того́ и на́мъ, любо́вію чту́щимъ святу́ю па́мять твою́, Григо́ріе досточу́дне. [Два́жды.]

Сла́ва, и ны́нѣ, пра́здника.


Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Луки́, зача́ло 24.

По 50-мъ псалмѣ́ стихи́ра, гла́съ 8:

Мона́ховъ мно́жества, [святолѣ́пное твое́ житіе́ чту́ще, удивля́емся и прославля́емъ Просла́вльшаго тя́ Бо́га, я́ко дарова́ тебѣ́ мно́го чудотворе́ніе, и́мже бѣ́сы отъ человѣ́къ прогна́лъ еси́ и согрѣша́ющихъ во исправле́ніе приводи́лъ еси́. Его́же и на́мъ, де́нь честна́го успе́нія твоего́ почита́ющимъ, умоли́ дарова́ти ми́лость въ де́нь су́дный].

Кано́нъ пра́здника, со ирмосо́мъ на 6, и преподо́бнаго на 6, гла́съ 2.

Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися .

Свѣ́томъ благода́ти Твоея́, Христе́, пра́ведники Своя́ просвѣти́вый и дѣя́ній и́хъ луча́ми мíра концы́ озари́вый, омраче́нный мо́й у́мъ невѣ́деніемъ просвѣти́, да чи́стѣ въ па́мяти уго́дника Твоего́ воспою́ Ти пѣ́снь: я́ко просла́вися.

Огне́мъ любве́ воспали́лъ еси́ преподо́бного Твоего́ се́рдце, е́же во слѣ́дъ Тебе́ тещи́, и, обрѣ́тъ, Его́же жела́ше, ны́нѣ ра́достно пое́тъ: я́ко просла́вися.

Вели́кихъ оте́цъ житію́ подража́ти хотя́, прише́лъ еси́, Григо́ріе, во оби́тель Бо́жія Ма́тере, идѣ́же а́нгельскій о́бразъ на ся́ воспріе́мь, вообрази́лъ еси́ въ себѣ́ добродѣ́тельныя ви́ды, и бы́сть твоя́ душа́ кра́сная невѣ́ста Безсме́ртному Жениху́, я́вльшемуся ны́нѣ на Іорда́нѣ.

Мно́гихъ ра́ди по́двиговъ и трудо́въ, тобо́ю сотворе́нныхъ, а́ще не число́мъ вре́мени нечита́емыхъ, прія́лъ еси́ вла́сть отъ Бо́га на бѣ́сы, преподо́бне, я́коже и вопія́ху: непристу́пенъ еси́ на́мъ, Григо́ріе, огражде́нъ моли́твою и ору́жіемъ кре́стнымъ.

Богоро́диченъ: Моли́твъ ра́ди уго́дника Твоего́, огради́ мя́ си́лою Твое́ю, Чи́стая Дѣ́во, и непристу́пна враго́мъ покажи́, я́ко Непристу́пнаго Бо́га родила́ еси́, Иже во человѣ́честѣмъ естествѣ́ мене́ ра́ди ны́нѣ на́гъ стои́тъ на Іорда́нѣ.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Крѣ́пость моли́твы твоея́ ви́дяще, ду́хове зло́бы поднебе́сніи го́рцѣ вопія́ху на тя́ и помышля́ху, ка́ко бы тебѣ́ па́кость сотвори́ти? Ты́ же, о́тче, стра́ха и́хъ не убоя́лся еси́, но ко Укрѣпля́ющему тя́ взыва́лъ еси́: крѣ́пость моя́ — Госпо́дь е́сть мнѣ́ во спасе́ніе.

Тмы́ нача́льницы и гее́нны сы́нове на тя́, свѣ́томъ Боже́ственнымъ озаря́емаго, зубы́ скрежета́ху и разли́чныя нога́мъ твои́мъ препина́ху сѣ́ти, во е́же бы поне́ ма́ло оскорби́ти тя́, но не возмого́ша, непреста́нно бо взыва́лъ еси́: нѣ́сть свя́тъ, я́коже Бо́гъ на́шъ.

Та́тскимъ о́бразомъ напа́дающіи на рабы́ Бо́жія лю́тіи бѣ́сове наусти́ша злы́я человѣ́ки, во е́же окра́сти тя́, блаже́нне, но что́ имѣ́яху взя́ти въ тебе́, ничто́же иму́ща, ра́звѣ кни́гъ, къ похвале́нію Бо́жію храни́мыхъ.

Тмо́ю злодѣя́нія омраче́нніи та́тіе, въ нощи́ прише́дше къ ке́лліи твое́й, свя́те, жда́ху, до́ндеже изы́деши ты́ на у́треннее пѣ́ніе въ це́рковь, да тогда́ твоя́ во́зьмутъ; и́хже ты́ прихо́дъ ощути́въ, помоли́лся еси́, и бы́ша сно́мъ отягоще́нни пя́ть дне́й и пя́ть ноще́й.

Богоро́диченъ: Мра́къ души́ моея́, и́мже мя́ бѣ́сове омрача́ютъ, отжени́, Богоро́дице: родила́ бо еси́ Свѣтода́вца, Иже вся́каго человѣ́ка, гряду́ща въ мíръ, свѣ́тлостію лица́ Своего́ просвѣща́етъ.

Конда́къ и и́косъ пра́здника.
Та́же, сѣда́ленъ преподо́бному, гла́съ 1:

Свѣ́тъ Боже́ственный, вы́ну тебе́ облиста́ющъ, простира́ше лучи́ своя́ и прогоня́ше во мра́цѣ ходя́щихъ, не даю́щи къ тебѣ́ приступи́ти: вся́къ бо иму́щій дѣла́ зла́я, не приступа́етъ къ свѣ́ту, да не обличе́нъ бу́детъ. Но, бѣга́я сего́, вра́гъ паде́ся и бы́сть въ попра́ніе вы́ну, отъ него́же на́мъ сохрани́тися, Христа́ Бо́га моли́, о́тче преподо́бне. [Два́жды.]

Сла́ва, и ны́нѣ, пра́здника:

Іису́су, ро́ждшуся отъ Дѣ́вы Марíи, и во Іорда́нѣ кре́щшуся отъ Іоа́нна, Ду́хъ Святы́й сни́де На́нь въ ви́дѣ голуби́нѣ, сего́ ра́ди проро́къ со а́нгелы взыва́ше: сла́ва прише́ствію Твоему́, Христе́, сла́ва Ца́рствію Твоему́, сла́ва смотре́нію Твоему́, Еди́не Человѣколю́бче!

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Услы́шанъ бы́лъ еси́, о́тче, отъ Бо́га, я́ко моли́тва твоего́ смире́нія о́блаки про́йде. Тѣ́мже моли́твы твоя́ Вы́шній пріе́мля, сохрани́лъ тебе́ отъ вся́каго зла́: исповѣ́далъ бо еси́ еди́ну бы́ти Бо́жію си́лу и му́дрость.

Усну́ша сно́мъ свои́мъ и не возмого́ша ничто́же пе́рвіи та́тіе восхи́тити отъ запреще́нія твоего́, блаже́нне, и́хже ты́ по пяти́ дне́хъ и пяти́ но́щехъ возбуди́лъ еси́, глаго́ля: доко́лѣ стра́ждете, отыди́те, но не возмого́ша, держи́ми Бо́жіею си́лою неви́димою.

Та́тей, гла́домъ погиба́ющихъ душе́внымъ и тѣле́снымъ, ви́дѣвъ, свя́те, не возда́лъ еси́ зла́ за зло́, но, пи́санное исполня́я, ухлѣби́лъ еси́ враги́ а́лчущія и отпусти́лъ я́ въ до́мы своя́, да поне́ та́ко уцѣлому́дрятся и исповѣ́дятъ я́сно, я́ко вои́стинну въ тебѣ́ дѣ́йствуетъ Бо́жія му́дрость и си́ла.

На Бо́га положи́лъ еси́ су́дъ оскорби́вшихъ тя́, Его́же отмще́ніе не прости́ тате́й, но подаде́ властели́ну въ слу́хъ, и́же е́мь и́хъ, му́камъ преда́ти имѣ́яше, ты́ же, немощно́е человѣ́ческое разсужда́я, кни́ги твоя́ во искупле́ніе да́лъ еси́ судіи́ и свободи́лъ я отъ му́къ го́рькихъ.

Богоро́диченъ: Лю́тъ сопе́рникъ — тя́жущаяся со мно́ю о грѣсѣ́хъ со́вѣсть, съ не́юже не увѣща́хся исправле́ніемъ, егда́ бѣ́хъ на пути́ житія́, ны́нѣ привлече́ мя́ къ Судіи́, да пріиму́ су́дъ по дѣло́мъ и да не изы́ду отъ у́зъ, до́ндеже съ послѣ́днимъ разочту́ся. Увы́ мнѣ́, кто́ мя́ отъ сего́ зла́ изба́витъ! а́ще не Ты́, Чи́стая, пода́си ми по́мощь.

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Іису́съ, живота́ Нача́льникъ, наставля́я грѣ́шныя на пу́ть пра́вый, даде́ тате́мъ ду́хъ пра́въ, и́мже умили́вшеся, въ покая́ніе пріидо́ша, и вда́вшеся на рабо́ту оби́тели Бо́жія Ма́тере, примири́шася Бо́гу, Иже лю́бящимъ Его́ зако́нъ, ми́ръ да́руетъ.

Іису́са еди́наго, живота́ Нача́льника, возлюби́въ, сло́во Его́ дѣ́ломъ испо́лнилъ еси́, о́тче, и́бо вся́, я́же имѣ́лъ, прода́лъ еси́, да не па́ки си́хъ ра́ди, кто́ въ бѣду́ впаде́тъ, цѣ́ну же ту́ разда́лъ еси́ ни́щимъ и тѣ́хъ рука́ми вне́слъ еси́ въ сокро́вище, идѣ́же та́ть не приближа́ется, но цѣ́ло пребыва́етъ.

Па́ки вра́гъ па́коствуетъ тебѣ́, преподо́бне, татьми́ други́ми, и́же, вше́дше въ вертогра́дъ тво́й, ово́щіемъ влага́лища напо́лниша, но хотя́ху ити́ и не возмого́ша, неви́димою держи́ми ве́рвію, бре́мены же угнѣта́еми, пребы́ша, стоя́ще два́ дни́ и двѣ́ но́щи.

Иже ча́яху злодѣя́ніе свое́ утаи́ти, се́ сíи, иму́ще коры́сть непра́вды во обличе́ніе на плеща́хъ свои́хъ, возопи́ша, проще́нія прося́ще у тебе́, о́тче, обѣща́ющеся про́чая лѣ́та въ покая́ніи провожда́ти.

Богоро́диченъ: Хотѣ́хъ утаи́тися Всеви́дца Бо́га злы́ми дѣя́ніи мои́ми, но су́щее обличе́ніе во вну́треннихъ, а́ки ве́ліе бре́мя, сту́дъ мо́й открыва́етъ. Невѣ́дый у́бо, что́ про́чее сотвори́ти, къ Тебѣ́ вопію́: поми́луй мя́, Благоутро́бная Ма́ти, а́ще и покры́ срамота́ лице́ мое́.

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Гла́съ слове́съ твои́хъ, о́тче, смяте́ ко́сти кра́дущихъ, и исчеза́ше душа́ ихъ отъ стра́ха: зане́ бы́ти и́мъ, а́ки мѣ́ху на сла́нѣ, неподви́жимымъ на еди́номъ мѣ́стѣ, и не бѣ́, кто́ отъ толи́каго зла́ ихъ избавля́яй.

Гла́съ проповѣ́давша, къ покая́нію призыва́ющъ, та́тіе я́ко услы́шаша, припа́даху къ тебѣ́, блаже́нне, со слеза́ми отпуще́нія прося́ще, ты́ же, свя́те, умили́вся, кро́ткимъ гла́сомъ ре́клъ еси́: благослове́нъ Бо́гъ, укрѣпля́яяй ва́съ на дѣ́ло бла́го, и То́й да свободи́тъ ва́съ, отъ тли́ всѣ́хъ избавля́яй.

Христу́ я́вльшуся на Іорда́ни, мытари́ и вси́ грѣ́шницы гряду́тъ къ Нему́ и пріе́млютъ живота́ своего́ обновле́ніе; и́мже и та́тіе, твои́мъ, о́тче, наказа́ніемъ поревнова́вше, въ но́вости жи́зни покая́ніе нача́ша и рабо́тою наверши́ша.

Образъ да́лъ еси́ Собо́ю, Христе́, рабо́мъ Твои́мъ, е́же не искуси́тися сатано́ю: тѣ́мже уго́дникъ Тво́й, трети́цею искуша́емь злы́ми человѣ́ки, не искуси́ся, но, незло́бивъ сы́й, даде́, его́же тре́боваху, предви́дя па́губу еди́наго, отъ нея́же не бѣ́ избавля́ющаго.

Богоро́диченъ: Во́лею свое́ю привлече́нъ, падох́ся въ ро́въ поги́бели, и нѣ́сть мнѣ́ возведе́нія наде́жды. Къ Тебѣ́ простира́ю гла́съ мо́й, Госпоже́, моли́ за мя́ Сы́на Твоего́, Иже дне́сь яви́ся на Іорда́нѣ, не то́кмо мене́, но и ве́сь мíръ отъ тли́ избавля́я.

Конда́къ, гла́съ 7:

Запреща́я беззако́ннующимъ беззако́нновати, вве́рженъ бы́лъ еси́ тѣ́ми въ струи́ рѣ́чныя, досточу́дне Григо́ріе, идѣ́же блаже́нную воспріе́мь кончи́ну, ны́нѣ со а́нгелы предстоя́ престо́лу Влады́чню, моли́ся о душа́хъ на́шихъ.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Юношамъ, иногда́ су́щимъ въ пещи́, не поревнова́вше окая́нніи, и́же пла́мень му́жественно попра́ша и мучи́телю сопроти́вишася крѣ́пко, но врагу́ совѣ́тующу, пла́мени стра́стному себе́ вда́вше, мня́ху предъ тобо́ю, о́тче, лжу́ свою́ утаи́ти, ему́же откры́лъ е́сть Бо́гъ Благослове́нный.

Ду́хомъ зря́ проро́чески вну́трь, су́щее въ сердца́хъ тате́й, я́ко и́мать сбы́тися въ пра́вду, прослези́лся еси́, блаже́нне, прови́дя окая́нство того́, его́же приспѣ́ де́нь поги́бели, и лжу́щему всу́е не даде́ ми́лости Бо́гъ Благослове́нный.

Вѣ́сть Ду́хъ Святы́й отве́рзти и нечи́стая уста́, да глаго́лютъ пра́вду на исправле́ніе и́нѣмъ. Тѣ́мже тебѣ́ вопроси́вшу, преподо́бне, ко́ею сме́ртію у́мретъ сы́нъ поги́бельный, и невѣ́дуще та́тіе прореко́ша, я́ко на дре́вѣ обвѣ́шенъ и́мать бы́ти, е́же и сбы́стся во вре́мя свое́.

Сме́рти жа́ло — грѣ́хъ, и́же убива́етъ человѣ́ка, и нѣ́сть сему́ искупле́нія, до́ндеже покая́ніемъ живо́тъ снабди́тся: а́ще бо и да́лъ еси́, о́тче, во иску́пъ тате́мъ кни́ги своя́, но не искупи́ся поги́бели пови́нный, па́че же потреби́ся па́мять его́ отъ кни́гъ живо́тныхъ.

Богоро́диченъ: Разу́мная су́щи кни́га, Марíе Богоневѣ́сто, въ не́йже пе́рстомъ Ду́ха Всесвята́го написа́ся Сло́во Отчее, въ кни́ги живо́тныя написа́тися, о Благослове́нная, всѣ́хъ на́съ сподо́би.

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Та́йну се́рдца лука́ва прови́дяща тя́, о́тче, загради́ша та́тіе въ пеще́рѣ и отверзо́ша къ злодѣя́нію мы́сль свою́, наче́ншимъ же и́мъ собира́ти чужды́хъ трудо́въ плоды́, пости́же о́наго, о не́мже проре́клъ еси́, су́дъ Бо́жій: да не бу́детъ благослови́ти съ живы́ми Го́спода во вѣ́ки.

Хотя́ твоя́, о́тче, труды́, а́ки ве́прь ди́вій, та́ть озоба́ти, простре́ ру́ку, вступи́въ на дре́во, но не удержа́ся: вѣ́твь бо отломи́ся, и а́біе обвѣ́шеніемъ изсуши́ живота́ своего́ дре́во, я́ко не ктому́ да́ти ему́ пло́дъ покая́нія во вѣ́ки.

Да не су́дитъ никто́же су́дъ непра́веденъ, ни да глаго́летъ лжу́: Бо́гъ бо поруга́емь не быва́етъ. Руга́ющеся, та́тіе еди́наго, досто́йна повѣ́шенія на дре́вѣ, осуди́ша, и рече́нное сбы́стся, ты́ же, преблаже́нне, превозно́сиши Го́спода во вѣ́ки.

Ничто́же сокрове́нное отъ тебе́, о́тче, ви́дѣвше, припа́дающе, проще́нія прося́ху, я́ко да не на́йдетъ и на и́хъ подо́бна поги́бель, ты́ же, свя́те, кра́дущихъ наказа́лъ еси́ не ктому́, кра́сти, но па́че рабо́тати на бра́тію и благослове́нный пло́дъ снѣда́ти, а́ще хо́щутъ превозноси́ти Го́спода во вѣ́ки.

Богоро́диченъ: Косну́хся не благослове́ннаго ми́ плода́ и се́ умира́ю сме́ртію душе́вною. Ви́дя у́бо Тя́, Ма́терь Живота́, простира́ю гла́съ мо́й: приложи́ мнѣ́ пла́стырь живо́тный покая́нія, да, поне́ ма́ло прише́дъ въ себе́, обря́щу живо́тъ и превозношу́ Тя́, Богоро́дице, во вѣ́ки.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Недоумѣва́яся вра́гъ, ка́ко, о́тче, тя́ озло́бити, наведе́ безу́мныя рабы́ кня́зя, и́же тебѣ́, въ рѣцѣ́ во́ду че́рплющу, поруга́хуся, сра́мная глаго́лющи, но ты́, преподо́бне, ду́хомъ предзря́ си́хъ поги́бель, нака́зовалъ еси́, да не глаго́лютъ скве́рная, па́че же язы́комъ Бо́га да велича́ютъ.

Му́жіе велерѣ́чивіи не испра́вишася твои́мъ наказа́ніемъ, свя́те, но па́че тебѣ́ руга́хуся, досажда́юще, тѣ́мже па́ки благоутро́бнѣ нака́зовалъ еси́ и́хъ, да па́че моли́твы тре́буютъ, я́ко ско́ро потопле́ни бу́дутъ съ кня́земъ свои́мъ Ростисла́вомъ.

Не облича́й безу́мна, да не возненави́дитъ тебе́, — глаго́летъ Писа́ніе, е́же и сбы́стся на тебѣ́, преблаже́нне, и́бо кня́зь, отъ тебе́ прорече́нную себѣ́ сме́рть слы́шавъ, во укори́зну вмѣня́я, разгнѣ́вася на тя́, и безстра́шіемъ одержи́мь, повелѣ́ тя́ въ водѣ́ утопи́ти.

Ко Христу́, вода́ми ны́нѣ облага́ющемуся, водо́ю преше́лъ еси́, о́тче, и посѣче́ сме́рть вре́менныя твоея́ жи́зни дре́во, е́же ны́нѣ доброзра́чнѣе при исхо́дящихъ во́дъ живо́тныхъ процвѣта́етъ, и ли́ствіе моли́твъ твои́хъ Це́рковь увеселя́етъ, тѣ́мъ тя́, свя́те, велича́емъ.

Богоро́диченъ: Въ хра́мѣ сла́вы Твоея́, гла́съ Гавріи́ловъ Тебѣ́ принося́щихъ, Чи́стая Дѣ́во, въ ми́рѣ соблюди́ и ски́птры ца́рствія утверди́, подая́ тѣ́мъ си́лу благода́ти Твоея́ во отгна́ніе вся́кихъ тлетво́рныхъ страсте́й, да Тя́ вси́ велича́емъ.

Свѣти́ленъ:

Иже а́нгеломъ въ жи́зни се́й житіе́мъ непоро́чнымъ уподо́бивыйся, блаже́нне, тѣ́хъ и по кончи́нѣ не отлучи́лся еси́: повелѣ́ бо Вы́шній Ца́рь а́нгеломъ Свои́мъ многострада́льное твое́ тѣ́ло по тріе́хъ дне́хъ изъ воды́ въ ке́ллію принести́, ду́шу же твою́ святу́ю въ ски́ніяхъ святы́хъ всели́ти, идѣ́же ны́нѣ живы́й, помяни́ на́съ, чту́щихъ твою́ па́мять, о́тче свяще́ннѣйшій. [Два́жды.]

Сла́ва, и ны́нѣ, пра́здника:

Яви́ся Спа́съ — благода́ть и и́стина, во струя́хъ Іорда́нскихъ, и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

На хвали́техъ стихи́ры на 4, гла́съ 1. Подо́бенъ: Небе́сныхъ чино́въ.

Водо́ю и ка́менемъ,* къ вы́и привя́заннымъ,* сконча́въ жи́знь свою́, блаже́нне,* отше́лъ еси́ къ стоя́щему на вода́хъ Христу́,* су́щу Тому́ ка́мени краеуго́льну,* на не́мже основа́нъ Вы́шній Іерусали́мъ,* та́мо ны́нѣ селе́ніе твое́ со а́нгелы имѣ́я,* помина́й любо́вію почита́ющихъ* всечестну́ю па́мять твою́. [Два́жды.]

Зако́ну Бо́жію* въ жи́зни се́й поучи́вся, преподо́бне,* зако́нно, я́коже бѣ́ досто́йно, пожи́лъ еси́,* и жи́знь настоя́щаго вѣ́ка му́ченически сконча́въ,* преше́лъ еси́ къ Законополо́жнику Христу́ и Вѣнцеда́вцу,* отъ Него́же вѣне́цъ нетлѣ́нный пріе́мь,* ра́дуешися ны́нѣ со а́нгельскими ли́ки,* вселе́нія у́бо съ ни́ми* и весе́лія прича́стники и на́съ бы́ти* сподо́би моли́твами твои́ми.

Свя́занъ сы́й по руку́ и но́гу,* и въ во́дныя струи́ вве́рженъ,* разрѣши́лся еси́ отъ у́зъ плотски́хъ,* Госпо́дь у́бо, изъ темни́цы сея́ ду́шу твою́ изве́дъ,* въ неизрече́нномъ свѣ́тѣ,* идѣ́же пра́ведныхъ ду́си зрѣ́нія Бо́жія наслажда́ются,* ны́нѣ упокоя́етъ,* е́же и мы́ улучи́ти мо́лимся* твои́мъ хода́тайствомъ,* о́тче блаже́ннѣйшій.

Сла́ва, гла́съ 8:

Да́ръ нело́жный проро́чествія имѣ́я, преподо́бне, прови́дѣлъ еси́ па́губу твоего́ убíйцы, и́же твои́ми словесы́ наказу́емь не испра́вися, ни восхотѣ́ благослове́нія твоего́ и моли́твы, во бра́нехъ посо́бствующія. Тѣ́мже, я́ко фарао́нъ, погрязе́ въ водѣ́ съ во́и и обоего́ живота́ лиши́ся, пріе́мь поноше́ніе седмери́цею въ нѣ́дра своя́, и па́мять его́ поги́бе. Но ты́, о́тче, предстоя́ Бо́жію престо́лу, пода́ждь благослове́ніе рабо́мъ твои́мъ и моли́тву, покланя́ющимся чудотво́рнымъ моще́мъ твои́мъ и па́мять твою́ хвала́ми почита́ющимъ.

И ны́нѣ, пра́здника, гла́съ то́йже:

Го́споди, испо́лнити хотя́, я́же уста́вилъ еси́ отъ вѣ́ка, отъ всея́ тва́ри служи́тели та́йны Твоея́ прія́лъ еси́: отъ а́нгелъ — Гавріи́ла, отъ человѣ́къ — Дѣ́ву, отъ небе́съ — звѣзду́, и отъ во́дъ — Іорда́нъ, въ не́мже беззако́ніе мірско́е потреби́лъ еси́. Спа́се на́шъ, сла́ва Тебѣ́!

Славосло́віе вели́кое, [ектеніи́] и отпу́стъ.



НА ЛИТУРГІИ,
Слу́жба [пра́здника и] преподо́бнаго.

[Блаже́нна пра́здника, пѣ́снь 1-я, на 4, и преподо́бному, пѣ́снь 6-я, на 4. Проки́менъ, пра́здника, гла́съ 4: Благослове́нъ Гряды́й во и́мя Госпо́дне, Бо́гъ Госпо́дь, и яви́ся на́мъ. Сти́хъ: Исповѣ́дайтеся Го́сподеви, я́ко бла́гъ, я́ко въ вѣ́къ ми́лость Его́. И преподо́бному, гла́съ 7: Честна́ предъ Го́сподемъ сме́рть преподо́бныхъ Его́. Апо́столъ преподо́бному, къ Гала́томъ, зача́ло 213. Аллилу́ія пра́здника, гла́съ 4: Принеси́те Го́сподеви сы́нове Бо́жіи, принеси́те Го́сподеви, сы́ны о́вни. Сти́хъ: Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. И преподо́бному, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе отъ Матѳе́я, зача́ло 43. Прича́стенъ пра́здника: Яви́ся благода́ть Бо́жія спаси́тельная всѣ́мъ человѣ́комъ. И преподо́бному: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жбы Преподо́бнымъ отце́мъ Пече́рскимъ, и́хже мо́щы въ Бли́жной и Да́льной пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1785. — Л. 46 – 51.

/ Къ оглавленію раздѣла /


Наверхъ / Къ титульной страницѣ

0