Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 7-й де́нь.
Собо́ръ свята́го сла́внаго Проро́ка, Предте́чи и Крести́теля Іоа́нна.

ВЕЧЕРЪ,
Стихоло́гія не быва́етъ бдѣ́нія ра́ди бы́вшаго, кромѣ́ суббо́ты. На Го́споди воззва́хъ: стихи́ры пра́здника 3, гла́съ 2:

Просвѣти́теля на́шего, просвѣща́ющаго вся́каго человѣ́ка, ви́дѣвъ Предте́ча, крести́тися прише́дша, ра́дуется душе́ю и трепе́щетъ, руко́ю показу́етъ Его́, и глаго́летъ лю́демъ: Се́й, избавля́яй Изра́иля, свобожда́яй на́съ отъ истлѣ́нія. О, безгрѣ́шный Христе́ Бо́же на́шъ, сла́ва Тебѣ́!

Изба́вителю на́шему, отъ раба́ креща́ему и Ду́ха прише́ствіемъ свидѣ́тельствуему, ужасо́шася, зря́ще, а́нгельская во́инства. Гла́съ же съ небесе́ принесе́ся отъ Отца́: Се́й, Его́же Предте́ча руко́ю креща́етъ, Сы́нъ Мо́й е́сть возлю́бленный, о Не́мже благоволи́хъ. Христе́ Бо́же на́шъ, сла́ва Тебѣ́!

Іорда́нскія струи́ Тебе́, Исто́чника, прія́ша, и Утѣ́шитель въ ви́дѣ голуби́нѣ схожда́ше: приклоня́етъ ве́рхъ Приклони́вый небеса́. Зове́тъ и вопіе́тъ бре́ніе Зижди́телю: что́ ми повелѣва́еши, я́же вы́ше мене́? Азъ тре́бую Твоего́ креще́нія. О, безгрѣ́шный Христе́ Бо́же на́шъ, сла́ва Тебѣ́!

И Предте́чи 3, гла́съ 1. Подо́бенъ: Всехва́льніи му́ченицы.

Ви́дѣвъ Тя́ гряду́ща, Христе́, къ себѣ́ Предте́ча* и креще́нія прося́ща,* съ тре́петомъ возопи́:* что́ ми повелѣва́еши,* я́же па́че си́лы соверши́ти?* О, Всеси́льне Го́споди,* ка́ко руко́ю косну́ся Тебе́,* руко́ю вся́ содержа́щаго?* Ты́ мя па́че крести́, раба́ Твоего́.

Яви́хся ве́сь Человѣ́къ ны́нѣ,* присту́пенъ тебѣ́ бы́хъ,* Естество́мъ Непристу́пный,* во́лею обнища́хъ, Бога́тъ сы́й,* я́ко да обнища́вшее обогащу́* нетлѣ́ніемъ и избавле́ніемъ.* Приступи́, крести́* тлѣ́нію неподлежа́щаго* и ми́ръ отъ тли́ изыма́ющаго.

Содержи́мь е́смь отвсю́ду* и, ка́мо бѣжа́ти, недоумѣ́юся, —* рече́ Зижди́телю Предте́ча, —* пото́къ сы́й пи́щный, Ще́дре,* ка́ко у́бо Тя́* рѣ́чныя вше́дшаго пріи́мутъ струи́,* излива́юща спасе́ніе* почита́ющимъ Твое́* свято́е, Сло́ве, явле́ніе?

Сла́ва, гла́съ 6:

Во пло́ти свѣти́льниче, Предте́че Спа́совъ, прозябе́ніе непло́дныя, дру́же Су́щаго отъ Дѣ́вы, Ему́же взыгра́ньми во утро́бѣ поклони́лся еси́ и крести́лъ еси́ въ вода́хъ Іорда́нскихъ. Сего́ моли́, мо́лимся, проро́че, бу́дущихъ избѣжа́ти треволне́ній.

И ны́нѣ, пра́здника, гла́съ то́йже:

Бо́гъ Сло́во яви́ся пло́тію ро́ду человѣ́ческому, стоя́ше крести́тися во Іорда́нѣ, и глаго́лаше къ Нему́ Предте́ча: ка́ко простру́ ру́ку и прикосну́ся верху́ Держа́щаго вся́ческая? Аще и отъ Марíи еси́ Младе́нецъ, но вѣ́мъ Тя́, Бо́га Превѣ́чнаго, по земли́ хо́диши, пѣва́емый отъ серафи́мъ, и ра́бъ Влады́ку креща́ти не научи́хся. Непостижи́ме Го́споди, сла́ва Тебѣ́!

Вхо́дъ.

Проки́менъ, гла́съ 7: Бо́гъ на́шъ на небеси́ и на земли́,* вся́, ели́ка восхотѣ́, сотвори́.

Сти́хъ: Во исхо́дѣ Изра́илевѣ отъ Еги́пта, до́му Іа́ковля изъ люде́й ва́рваръ, бы́сть Іуде́я святы́ня Его́, Изра́иль о́бласть Его́.

Сти́хъ: Мо́ре ви́дѣ и побѣже́, Іорда́нъ возврати́ся вспя́ть.

Сти́хъ: Что́ ти е́сть, мо́ре, я́ко побѣ́гло еси́? И тебѣ́, Іорда́не, я́ко возврати́лся еси́ вспя́ть?

И па́ки: Бо́гъ на́шъ на небеси́ и на земли́...

Та́же ектенія́.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Яко ви́дѣ Тя́, Влады́ко, Іоа́ннъ Предте́ча,* къ нему́ иду́ща,* ужа́сенъ бы́въ,* я́ко благонра́венъ ра́бъ со стра́хомъ вопія́ше:* ко́е смире́ніе, Спа́се?* ка́я нищета́, въ ню́же одѣ́ялся еси́?* Бога́тствомъ бла́гости смири́вшагося человѣ́ка возне́съ,* я́ко Благоутро́бенъ,* я́ко въ него́ одѣ́явыйся.

Сти́хъ: Мо́ре ви́дѣ и побѣже́,* Іорда́нъ возврати́ся вспя́ть.

Гряди́ ко Мнѣ́, —* та́инство соверша́ющему спаси́тельное* Предте́чи противовѣща́лъ еси́, —* со стра́хомъ послужи́* Спа́су вся́ческихъ и не ужаса́йся.* Сокруше́ннаго бо Ада́ма грѣхо́мъ обновля́я,* креща́юся, я́ко Человѣ́къ,* естество́мъ Нескве́рный,* Іорда́нскими вода́ми,* въ ни́хже ви́диши прише́дша Мя́.

Сти́хъ: Что́ ти е́сть, мо́ре, я́ко побѣ́гло еси́?* И тебѣ́, Іорда́не, я́ко возврати́лся еси́ вспя́ть?

Со́лнце очища́емо* кто́ отъ земноро́дныхъ ви́дѣ, —* Іоа́ннъ проти́во рече́, —* и Одѣва́ющаго не́бо о́блаки обнажа́ема всего́,* и исто́чники, и рѣ́ки Содѣва́ющаго въ во́ды входя́ща?* Дивлю́ся несказа́нному смотре́нію Твоему́, Влады́ко,* не отягчи́ раба́ Твоего́* стра́шными повелѣ́ніи.

Сла́ва, гла́съ 4. Византíево:

Яко Ду́ха рачи́тель и благода́ти боговѣща́нная ла́стовица, я́сно смотре́ніе Царе́во, человѣ́ческому ро́ду изъ Чи́стыя свѣ́тло возсія́вшаго человѣ́ковъ на обновле́ніе просвѣти́лъ еси́, Предте́че, сѣ́тующихъ обы́чай отъе́мля въ коне́цъ и жи́зни присносу́щныя прія́ти направля́я сердца́ въ покая́ніи креща́емыхъ, блаже́нне богопрія́тне.

И ны́нѣ, гла́съ то́йже:

Пріиди́те, подража́имъ му́дрыя дѣ́вы, пріиди́те, сря́щимъ я́вльшагося Влады́ку, я́ко пріи́де, я́ко Жени́хъ, ко Іоа́нну. Іорда́нъ, ви́дѣвъ Тя́, убоя́ся и пожда́. Іоа́ннъ вопія́ше: не смѣ́ю держа́ти верха́ Безсме́ртнаго. Ду́хъ схожда́ше въ ви́дѣ голуби́нѣ освяти́ти во́ды, и гла́съ съ небесе́: Се́й е́сть Сы́нъ Мо́й, прише́дый въ мíръ спасти́ ро́дъ человѣ́ческій. Го́споди, сла́ва Тебѣ́!

Тропа́рь, гла́съ 2:

Па́мять пра́веднаго съ похвала́ми, тебѣ́ же довлѣ́етъ свидѣ́тельство Госпо́дне, Предте́че: показа́лъ бо ся еси́ вои́стинну и проро́ковъ честнѣ́йшій, я́ко и въ струя́хъ крести́ти сподо́бился еси́ Проповѣ́даннаго. Тѣ́мже за и́стину пострада́въ, ра́дуяся, благовѣсти́лъ еси́ и су́щимъ во а́дѣ Бо́га, я́вльшагося пло́тію, взе́млющаго грѣ́хъ мíра и подаю́щаго на́мъ ве́лію ми́лость.

Сла́ва, и ны́нѣ, пра́здника:

Во Іорда́нѣ креща́ющуся Тебѣ́, Го́споди, Тро́ическое яви́ся поклоне́ніе: Роди́телевъ бо гла́съ свидѣ́тельствоваше Тебѣ́, возлю́бленнаго Тя́ Сы́на имѣну́я, и Ду́хъ въ ви́дѣ голуби́нѣ извѣ́ствоваше словесе́ утвержде́ніе. Явле́йся Христе́ Бо́же и мíръ просвѣще́й, сла́ва Тебѣ́.

На повече́ріи, по трисвято́мъ, конда́къ Предте́чи: Плотска́го Твоего́ прише́ствія... На полу́нощницѣ глаго́лемъ каѳи́сму обы́чную. По 1-мъ трисвято́мъ, вмѣ́сто: Се́ Жени́хъ... глаго́лемъ тропа́рь пра́здника. По 2-мъ трисвято́мъ, конда́къ Предте́чи: Плотска́го Твоего́ прише́ствія...


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, Предте́чи. И ны́нѣ, пра́здника.

По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Іису́су ро́ждшуся отъ Дѣ́вы Марíи и во Іорда́нѣ кре́щшуся отъ Іоа́нна, Ду́хъ сни́де на Него́, зри́мый въ ви́дѣ голуби́нѣ. Сего́ ра́ди проро́къ со а́нгелы глаго́лаше, зовы́й: сла́ва прише́ствію Твоему́, Христе́, сла́ва Ца́рствію Твоему́, сла́ва смотре́нію Твоему́, Еди́не Человѣколю́бче.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 4. Подо́бенъ: Яви́лся еси́ дне́сь.

Во струя́хъ ви́дѣвъ Тя́ Іорда́нскихъ, крести́тися хотя́ща, вели́кій Предте́ча, Христе́, съ весе́ліемъ взыва́ше: прише́лъ еси́ и яви́лся еси́, Свѣ́тъ Непристу́пный.

Сла́ва, и ны́нѣ, то́йже.

Кано́нъ пра́здника пе́рвый со ирмосо́мъ на 6, тропари́ на 4; и другíй со ирмосо́мъ на 4. Ирмосы́ обою́ кано́новъ пра́здника по два́жды. И Предте́чи на 4, гла́съ то́йже.

Кано́нъ пра́здника, гла́съ 2.
Пѣ́снь 1.

Ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Ада́ма истлѣ́вшаго обновля́етъ струя́ми Іорда́нскими и зміе́въ главы́ гнѣздя́щихся сокруша́етъ Царь вѣко́въ, Госпо́дь, я́ко просла́вися.

Огне́мъ Божества́ Невеще́ственнымъ въ пло́ть веще́ственну одѣ́явся, Іорда́нскою облага́ется водо́ю воплоще́йся отъ Дѣ́вы Госпо́дь, я́ко просла́вися.

Скве́рну омыва́яй человѣ́ковъ, си́мъ очи́щся во Іорда́нѣ, и́мже, восхотѣ́въ, уподо́бися, е́же бѣ́ пребы́въ, су́щія во тмѣ́ просвѣща́яй Госпо́дь, я́ко просла́вися.

Инъ кано́нъ, пра́здника, гла́съ то́йже.
Пѣ́снь 1.

Ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Утру я́вльшуся человѣ́комъ свѣтоно́сну ны́нѣ изъ пусты́ни, къ вода́мъ Іорда́нскимъ, Царю́, преклони́лъ еси́ со́лнца Твою́ вы́ю, ли́ка мра́чна родонача́льника исхи́тити, скве́рны же вся́кія очи́стити тва́рь.

Безнача́льне, струя́мъ спогре́бшася Тебѣ́, Сло́ве, но́ваго прево́диши, истлѣ́вшаго ле́стію, Сего́ несказа́нно отъ Отца́ пріе́мъ гла́съ держа́венъ: Се́й возлю́бленный, ра́венъ же Мнѣ́ Отрокъ естество́мъ.

Кано́нъ Предте́чи. Творе́ніе Ѳеофа́ново, его́же краегране́сіе: Крести́телю Христо́въ, хвале́нія моя́ пріими́. Гла́съ 2.
Пѣ́снь 1.

Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозѣ́ е́ изра́ильтескія лю́ди наста́вльшему, Го́сподеви пои́мъ: сла́вно бо просла́вися.

Погружа́ема мя́ страсте́й бу́рею, Предте́че, моли́твами твои́ми предвари́въ, спаси́: безстра́стія бо са́мъ бы́лъ еси́ прія́телище честно́е и чистѣ́йшее, Го́споду свы́ше отъ младе́нства возложе́нъ.

Ра́дуяся, Бо́гу предстоя́й а́нгелъ равноа́нгельнаго благовѣсти́ Заха́ріи честно́му, твоему́ свяще́нствующу отцу́, тя́, всеблаже́нне, Госпо́дня Предте́чу и дру́га бы́вша.

Испо́лненъ бы́лъ еси́ Всесвята́го Ду́ха, еще́ во чре́вѣ твоея́ ма́тере вну́трь носи́мь, и взыгра́ніемъ кра́снымъ Дѣ́вственный Пло́дъ, ра́дуяся, возвѣсти́лъ еси́, и поклони́лся еси́, проро́че всече́стне.

Непрохо́дный всѣ́мъ человѣ́комъ пе́рвѣе стра́нный пу́ть житія́ просѣ́кшаго и крести́вшаго Христа́ во Іорда́нскихъ струя́хъ, восхва́лимъ Госпо́дня Предте́чу, боже́ственнаго и богому́драго.

Богоро́диченъ: Всеосвяще́нный Дѣ́вства хра́мъ, во чре́вѣ Бо́га Сло́ва чревоноси́вшая, притека́ющія къ Тебѣ́ и призыва́ющія, Чи́стая, спаси́ моли́твами Твои́ми, бѣ́дъ разруша́ющи нахожде́ніе, Всенепоро́чная.

Катава́сія: Глубины́ откры́лъ е́сть дно́... Другíй: Ше́ствуетъ морску́ю... По кли́росомъ.

Пѣ́снь 3.

Ирмо́съ: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Непло́дная дре́вле и безча́дная лю́тѣ, дне́сь весели́ся, Христо́ва Це́рковь: водо́ю бо и Ду́хомъ сы́нове тебѣ́ роди́шася, вѣ́рою взыва́юще: нѣ́сть свя́тъ, я́коже Бо́гъ на́шъ.

Ве́ліимъ гла́сомъ въ пусты́ни вопіе́тъ Предте́ча: Христу́ угото́вайте пути́ и стези́ Бо́гу на́шему пра́вы содѣ́лайте, вѣ́рою взыва́юще: нѣ́сть свя́тъ, я́коже Бо́гъ на́шъ.

Инъ:

Ирмо́съ: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Умерщвле́ніе пе́рвѣе насади́вый тва́ри, звѣ́ря злодѣ́йственнаго вообра́жься въ естество́, омрача́ется плотски́мъ прише́ствіемъ: у́тру я́вльшуся, прирази́вся Влады́цѣ сокруши́ти свою́ вражде́бную главу́.

Влече́тъ къ себѣ́ Богозда́нное естество́, утро́бы мучи́теля, погребе́нное предѣ́лы; ражда́ется па́ки земноро́дныхъ Обновле́ніе, дѣ́ло держа́вно соверша́я Влады́ка: пріи́де бо, то́е очи́стити хотя́.

Инъ:

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Непло́дствія поноше́ніе разрѣши́лъ еси́, позна́въ Дѣ́вы Боже́ственное Рождество́, взыгра́лъ еси́, ра́дуяся во чре́вѣ ма́терни, всехва́льне, а́нгеловъ сожи́телю, Госпо́день Предте́че блаже́ннѣйшій.

Стези́ предугото́вивъ Госпо́дни, ше́ствовалъ еси́ предъ лице́мъ Его́, проро́че, я́ко свѣти́льникъ бо, всѣ́мъ явля́яй сла́вы Отчее сія́ніе, я́вльшееся пло́тію на́съ ра́ди, показа́лся еси́ всѣ́хъ изя́щнѣйшій.

Возсія́лъ еси́, я́ко у́тро, пра́вды Со́лнце возвѣща́я су́щимъ во тмѣ́: всѣ́хъ бо спасе́нія ты́ бы́лъ еси́ проповѣ́дникъ и Предте́ча и всѣ́мъ глаго́лалъ еси́: ко Христу́ приступи́те вѣ́рою и спасе́теся.

Богоро́диченъ: Ра́дость неизглаго́ланную пріе́мши, зачала́ еси́ безсѣ́менно Твоего́ Влады́ку, всю́, Богома́ти, вселе́нную призва́вшаго. Ему́ же и взыва́емъ: я́ко нѣ́сть свя́тъ, па́че Тебе́, Го́споди.

Катава́сія: Крѣ́пость дая́й... Другíй: Ели́цы дре́внихъ...

Конда́къ, гла́съ 4:

Яви́лся еси́ дне́сь вселе́ннѣй, и свѣ́тъ Тво́й, Го́споди, зна́менася на на́съ, въ ра́зумѣ пою́щихъ Тя́: прише́лъ еси́ и яви́лся еси́, Свѣ́тъ Непристу́пный.

Икосъ:

Галиле́и язы́честѣй, Завуло́нстѣй странѣ́ и Нефѳали́мстѣй земли́, я́коже рече́ проро́къ, Свѣ́тъ вели́къ возсія́, Христо́съ. Омраче́ннымъ свѣтла́ яви́ся Заря́, изъ Виѳлее́ма облиста́ющая, па́че же изъ Марíи Госпо́дь, все́й вселе́ннѣй возсіява́етъ лучи́ Со́лнце пра́вды. Тѣ́мже, и́же отъ Ада́ма назíи, пріиди́те вси, облече́мся въ Него́, да согрѣ́емся, покрыва́етъ бо нагíя и просвѣща́етъ те́мныя. Прише́лъ еси́ и яви́лся еси́, Свѣ́тъ Непристу́пный.

Та́же сѣда́ленъ, гла́съ 8. Подо́бенъ: Прему́дрости.

Іорда́нъ струя́ми слу́житъ, и Іоа́ннъ простира́етъ ру́ку тлѣ́нную я́вльшуся Тебѣ́, Неви́диме, пло́тію ко креще́нію. Но о́въ у́бо возвраща́шеся вспя́ть со стра́хомъ, о́въ же а́біе держа́ще съ тре́петомъ Тя́, Нетлѣ́ннаго. Вои́стинну Агнецъ Бо́жій, Исто́чникъ присноживо́тный, исто́чники же, и моря́, и человѣ́ки освяти́въ, Тро́ица бо просія́ свы́ше, Сы́на Тя́ имену́етъ Роди́тель, и Святы́й Ду́хъ схо́дитъ.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Очища́емо со́лнце кто ви́дѣ, — проповѣ́дникъ вопіе́тъ, — пресвѣ́тлое естество́мъ? Да Тебе́ вода́ми, сія́ніе Сла́вы, Отца́ о́бразъ Присносу́щнаго, омы́ю и, сѣ́но сы́й, Огню́ прикосну́ся Твоего́ Божества́? Ты́ бо еси́ Христо́съ, Бо́жія му́дрость и си́ла.

Яви́ Боже́ственное, е́же имѣ́, благоговѣ́ніе Моисе́й, прилучи́вся Тебѣ́, я́ко бо изъ купины́ Тя, возгласи́вша, разумѣ́, а́біе отврати́ лице́. Азъ же ка́ко Тя́ уви́жу я́сно? Или́ ка́ко ру́ку положу́ на Тя́? Ты́ бо еси́ Христо́съ, Бо́жія му́дрость и си́ла.

Душе́вное соверша́я му́дре и сло́вомъ почте́нный, безду́шныхъ стыжду́ся. Аще бо крещу́ Тя, клеве́тна ми́ е́сть огне́мъ дымя́щаяся гора́, побѣ́гшее же мо́ре на дво́е и Іорда́нъ се́й, возврати́выйся: Ты́ бо еси́ Христо́съ, Бо́жія му́дрость и си́ла.

Инъ:

Ирмо́съ: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

По́сланъ отъ Отца́, всесвѣ́тлое Сло́во, но́щи отгна́ти зломра́чное стремле́ніе, и искорени́ти гряде́ши человѣ́ковъ грѣхи́, сы́ны же привлещи́, Твои́мъ Креще́ніемъ, Бла́же, свѣ́тлы отъ стру́й Іорда́нскихъ.

Са́мое прови́дѣвъ нарече́нное Сло́во, я́сно проповѣ́дникъ вопіе́тъ тва́ри: Се́й пре́жде мене́, вторы́й пло́тію сообра́зенъ, просія́ Боже́ственною си́лою вражде́бный на́шъ отъя́ти грѣ́хъ.

Па́жить у Себе́ животво́рну нося́, уловля́етъ зміе́въ, гнѣ́здамъ натека́я мно́гими сѣтьми́, низлага́я, Богъ Сло́во, запина́етъ же уязви́вшаго всемíрный ро́дъ, сего́ потре́бль, избавля́етъ тварь.

Инъ:

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Оскверне́нныя омы́ти водо́ю посла́лся еси́, отъ Влады́ки уготовля́я прія́ти взе́млющаго грѣ́хъ Христа́ и ле́сть отгоня́ща богоразу́мія заре́ю, всече́стне.

Яда мя́ зміи́на угрызе́нія исцѣли́ти, блаже́нне, моли́, и́же Христа́ вода́ми крести́въ Іорда́нскими, въ ни́хже зміе́въ вогнѣзди́вшуюся зло́бу Спа́съ сокруши́.

Му́дростію Бо́жіею укра́шенъ, прише́лъ еси́ христопроповѣ́дникъ: Вопію́щаго бо бы́лъ еси́ зову́щій, — пока́йтеся! — гла́съ, я́ко проро́къ, провозгласи́, Су́щаго па́че всѣ́хъ человѣ́къ Тя́ показу́я на́мъ.

Стра́нное и человѣ́ки нетре́нное живы́й житіе́, предста́лъ еси́ вода́мъ, всеизря́днѣйше, Іорда́нскимъ, гла́съ Отчій слы́шавъ и прише́ствіе Ду́ха узрѣ́въ.

Богоро́диченъ: Иже вся́ созда́вый Госпо́дь, по на́мъ Са́мъ зи́ждется, всели́вся, Всечи́стая, во утро́бу Твою́ всесвяту́ю, во о́бразъ человѣ́чь одѣ́яся и Сво́й о́бразъ спасе́.

Катава́сія: Услы́шахъ, Го́споди, гла́съ Тво́й... Другíй: Огне́мъ очи́щся...

Пѣ́снь 5.

Ирмо́съ: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Сше́дшимся безъ числа́ лю́демъ отъ Іоа́нна крести́тися, са́мъ посредѣ́ и́хъ ста́. Провозгласи́ же предстоя́щимъ: кто́ показа́, непокори́віи, гнѣ́ва ва́мъ уклони́тися, хотя́щаго бы́ти? Плоды́ досто́йны Христу́ сотвори́те: Предстоя́й бо ны́нѣ ми́ръ да́руетъ.

Дѣ́латель и Зижди́тель, посредѣ́ стоя́й, я́ко Еди́нъ всѣ́хъ сердца́ испыту́етъ, чисти́тельную же лопа́ту руко́ю пріе́мъ, всемíрное гумно́ всему́дрѣ разлуча́етъ, непло́діе паля́, благопло́днымъ вѣ́чный живо́тъ да́руетъ.

Инъ:

Ирмо́съ: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Ви́дѣвъ Зижди́тель во мра́цѣ прегрѣше́ній плени́цами неизбѣ́жными его́же вообрази́ пе́рсты, поставля́етъ на обою́ ра́му, воздвигъ горѣ́, ны́нѣ во многотеку́щихъ вода́хъ омыва́я студа́ дре́вняго Ада́мова зла́го нра́ва.

Со благоче́стіемъ притеце́мъ прилѣ́жно ко исто́чникомъ пречи́стымъ тече́нія спаси́тельнаго, Сло́во усмотря́юще отъ Нетлѣ́нныя, почерпа́ла принося́ще жа́жди Боже́ственныя, мíра сла́достнѣ исцѣля́я неду́гъ.

Инъ:

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Преесте́ственныя добродѣ́тели свѣтлостьми́ озаре́нъ, я́ко отъ небе́снаго тайновожде́нія вода́мъ предста́лъ еси́ Іорда́нскимъ, креща́я и очища́я водо́ю, Предте́че, вѣ́рою душе́вною приступа́ющія тебѣ́.

Чи́стый и Нетлѣ́нный Свѣ́тъ хотя́ крести́ти, сосу́дъ чистѣ́йшій показа́лся еси́, Іоа́нне: бо́лій бо всѣ́хъ отъ Него́ предъизбра́лся еси́, проро́ковъ же честнѣ́йшій, Проро́чествованнаго бо сподо́бился еси́ ви́дѣти.

По́сланъ бы́въ предъ лице́мъ Госпо́днимъ, всего́ всѣ́мъ стези́ человѣ́комъ показу́я, прикаса́ется, трепе́ща, верху́ Влады́чню и креща́етъ, глаго́ля, Предте́ча: ино́го, ра́звѣ Тебе́, Бо́га не вѣ́мъ.

Кто́ ви́дѣ, или́ кто́ слы́ша, когда́ Безскве́рнаго созда́нію ве́рхъ преклоня́юща, руко́ю вся́ Содержа́щаго? Тѣ́мъ тре́петно Крести́тель вопія́ше: ино́го, па́че Тебе́, Бо́га не вѣ́мъ.

Богоро́диченъ: Сы́нъ Бо́жій, Сы́нъ Тво́й, Дѣ́во, я́вѣ показа́ся, дѣла́ я́ко Бо́гъ соверша́я во́лею еди́ною. Тѣ́мже Тя́ вси́, и́стинно Богоро́дицу, и госпо́дьственно имену́емъ: ины́я бо Ма́тере Бо́жія не вѣ́мы.

Катава́сія: Іису́съ, живота́ Нача́льникъ... Другíй: Врага́ те́много...

Пѣ́снь 6.

Ирмо́съ: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Ро́ждься нетлѣ́нно отъ Бо́га и Отца́, отъ Дѣ́вы кромѣ́ скве́рны воплоща́ется Христо́съ, Ему́же реме́нь, я́же отъ на́съ Сло́ва сочта́нія, разрѣши́ти неудо́бь, учи́тъ Предте́ча, земноро́дныя отъ ле́сти избавля́я.

Огне́мъ крести́тъ коне́чнымъ Христо́съ проти́вныя, а не Бо́га му́дрствующихъ Его́, Ду́хомъ же обновля́етъ водо́ю благода́ти разумли́выя Божества́ Его́, отъ прегрѣше́ній избавля́я.

Инъ:

Ирмо́съ: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Отъ глуби́ннаго льва́, тревече́рній стра́ннѣ проро́къ во вну́треннихъ валя́яся, а́біе произы́де, пакибытія́ спасе́ніе отъ змíя человѣкоубíйцы всѣ́мъ предъявля́я въ послѣ́дняя лѣ́та.

Отве́рсту не́бу всесвѣ́тлыхъ писа́ній, учени́къ зри́тъ отъ Отца́ посыла́емый, пребыва́ющъ же Ду́хъ на Пречи́стѣмъ Сло́вѣ, наше́дъ я́ко го́лубь неизрече́ннымъ о́бразомъ, лю́демъ же явля́ется, прише́дшимъ ко Влады́цѣ.

Инъ:

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Ты́ Сло́ва гла́съ предше́ствовалъ еси́ и, я́ко свѣтоно́сная звѣзда́, возсія́лъ еси́, провозвѣща́я, Предте́че, ты́ пра́вды Со́лнца.

Земны́хъ попече́ній не увѣ́дѣлъ еси́ и небе́сными наде́ждами обогати́лся еси́: на земли́, я́ко а́нгелъ, жи́знь соверши́лъ еси́, всеблаже́нне.

Проро́ковъ тя́ печа́ть зна́емъ, я́ко ве́тхаго и но́ваго хода́тая, и Крести́теля, и Предте́чу Спа́са Христа́ предвозвѣща́емъ.

Богоро́диченъ: Несказа́нно вои́стинну зача́тіе, неизрече́нно Рождество́ Твое́ и непостижи́мо всѣ́мъ вѣ́рнымъ познава́ется и вѣ́руется, Еди́на Богоневѣ́сто.

Катава́сія: Гла́съ Словесе́... Другíй: Вожделѣ́ннаго я́вствова...

Конда́къ, гла́съ 6:

Плотска́го Твоего́ прише́ствія убоя́вся, Іорда́нъ стра́хомъ возвраща́шеся; проро́ческое же служе́ніе исполня́я, Іоа́ннъ тре́петомъ спря́ташеся; а́нгельскія чи́ни ужаса́хуся, зря́ще Тя́, во струя́хъ пло́тію креща́ема; и вси́, су́щіи во тмѣ́, озаря́хуся, воспѣва́юще Тя́, я́вльшагося и просвѣти́вшаго вся́.

Икосъ:

Ослѣ́пшу Ада́му во Еде́мѣ, яви́ся Со́лнце изъ Виѳлее́ма и отве́рзе ему́ зѣ́ницы, омы́въ сія́ Іорда́нскими вода́ми. Очернѣ́вшему и омраче́нному Свѣ́тъ возсія́ неугаси́мый. Уже́ ему́ нѣ́сть но́щь, но всегда́ де́нь, е́же ко у́тру у́тро, его́ ра́ди роди́ся; къ ве́черу бо сокры́ся, я́коже пи́шетъ, обрѣ́те зарю́, возставля́ющую того́. Иже къ ве́черу пады́й измѣни́ся мра́ка и дости́же ко у́тру Явльшагося и Просвѣти́вшаго вся́.

Пѣ́снь 7.

Ирмо́съ: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Якоже на небеси́, съ тре́петомъ и чу́домъ предстоя́ху во Іорда́нѣ си́лы а́нгельскія, смотря́юще толи́ка Бо́жія схожде́нія: я́ко Держа́й превы́шнихъ во́дъ соста́въ, въ вода́хъ Плотоно́сецъ стоя́ше, Богъ отце́въ на́шихъ.

Облакъ дре́вле и мо́ре Боже́ственнаго прообража́ху Креще́нія чу́до, въ ни́хже дре́вніи крести́шася, исходя́ще зако́нніи лю́діе. Мо́ре же бе о́бразъ воды́, и о́блакъ — Ду́ха. Имиже соверша́еми, — благослове́нъ еси́, — зове́мъ, — Го́споди Бо́же, во вѣ́ки.

Вси вѣ́рніи, въ Не́мже соверше́ніе прія́хомъ, богосло́вяще немо́лчно со а́нгелы, просла́вимъ Отца́, и Сы́на, и Ду́ха Свята́го: се бо — Тро́ица, Ѵпоста́сьми Единосу́щная, Еди́нъ же Бо́гъ. Ему́же пое́мъ: благослове́нъ еси́, Го́споди Бо́же, во вѣ́ки.

Инъ:

Ирмо́съ: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Тебе́ живопису́ющій ассирíйскій пла́мень ужа́сенъ поставля́еши, въ ро́су преведе́нъ; тѣ́мже вода́ ны́нѣ, я́коже пла́мень, одѣва́яй, вре́дную зло́бу, Христе́, прикрове́нную опаля́етъ, отъ поползнове́нныя стези́ призыва́ющи.

Раздѣ́льшуся Іорда́ну дре́вле, по су́ху прехо́дятъ лю́діе Изра́ильстіи, Тебе́, Держа́внѣйшаго, содержа́ща тва́рь некосни́тельнѣ, ны́нѣ въ вода́хъ напису́ющіи, къ нетлѣ́ннѣй и поле́знѣй стези́.

Вѣ́мы, пе́рвѣе всепа́губный пото́пъ ми́лостивно Тя́ всѣ́хъ во тлю́ привести́, о, тревели́кія сотворя́я и стра́нная́ Ны́нѣ же пото́пльша, Христе́, грѣ́хъ за благосе́рдіе и человѣ́ческое спасе́ніе.

Инъ:

Ирмо́съ: Купина́ въ горѣ́ огненеопа́льная и росоно́сная пе́щь халде́йская, я́вѣ предписа́ Тя, Богоневѣ́сто, Боже́ственный бо невеще́ственный въ веще́ственнѣмъ чре́вѣ, Огнь неопа́льно прія́ла еси́. Тѣ́мже изъ Тебе́ Ро́ждшемуся пое́мъ: благослове́нъ еси́, Бо́же оте́цъ на́шихъ.

Священнодѣ́йствовавъ креще́ніе и соверши́въ, Предте́че, я́же отъ Бо́га я́вѣ да́нныя тебѣ́ та́йны, я́ко а́гнецъ незло́бивъ священнодѣ́йствуемый, прине́слся еси́ же́ртва. Тѣ́мже съ тобо́ю согла́сно пое́мъ: благослове́нъ Бо́гъ оте́цъ на́шихъ.

Но́вый Илія́ ты́ бы́лъ еси́, со дерзнове́ніемъ, Предте́че, и царя́ облича́я беззако́нновавша, и житіе́ невеще́ственно показу́я на́мъ, я́коже о́нъ, треблаже́нне. Тѣ́мже съ тобо́ю, проро́че, пое́мъ: благослове́нъ Бо́гъ оте́цъ на́шихъ.

Иже проро́ковъ бо́льшій и апо́столовъ, Предте́че, Христо́выхъ боже́ственную че́сть наслѣ́довавъ, ты́ зако́на исполне́ніе и нача́ло я́вѣ но́выя благода́ти яви́лся еси́. Тѣ́мже съ тобо́ю, треблаже́нне, пое́мъ: благослове́нъ Бо́гъ оте́цъ на́шихъ.

Богоро́диченъ: Пѣснослове́ньми Всечи́стую и Богопрія́тную Влады́чицу, благочести́віи, досто́йно вси́ воспои́мъ, я́ко Бо́га ро́ждшую Единоро́днаго, на́мъ человѣ́комъ я́вльшася. Къ Нему́же, вѣ́рніи, согла́сно пое́мъ: благослове́нъ Бо́гъ оте́цъ на́шихъ.

Катава́сія: Юноши благочести́выя... Другíй: Опали́ струе́ю змíевы главы́...

Пѣ́снь 8.

Ирмо́съ: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Отложи́ стра́хъ ве́сь, — Изба́витель Предте́чи рече́, — Мнѣ́ же повини́ся, я́ко Благо́му, Мнѣ́ приступи́, сіе́ бо естество́мъ бы́хъ, Мои́мъ повелѣ́ніемъ покори́ся и крести́ Мя, соше́дшаго, Его́же благословя́тъ лю́діе и превозно́сятъ во вся́ вѣ́ки.

Глаго́лы я́коже услы́ша Крести́тель Влады́чни, съ тре́петомъ дла́нь простира́етъ, оба́че же, руко́ю косну́вся верху́ Зижди́теля своего́, Кре́щшемуся вопія́ше: освяти́ мя, Ты́ бо еси́ Бо́гъ мо́й, Его́же благословя́тъ лю́діе и превозно́сятъ во вся́ вѣ́ки.

Тро́ицы явле́ніе во Іорда́нѣ бы́сть, са́мое бо Пребоже́ственное Естество́, Оте́цъ, возгласи́: Се́й креща́емый — Сы́нъ возлю́бленный Мо́й, Ду́хъ же пріи́де къ Подо́бному, Его́же благословя́тъ лю́діе и превозно́сятъ во вся́ вѣ́ки.

Инъ:

Ирмо́съ: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

Тріе́ богови́дніи, во огни́ ороша́еми, озаря́ющеся треми́ всесвѣ́тлѣ святы́нями, я́вѣ показова́ху Превы́шнее Естество́ смѣше́ніемъ человѣ́ческимъ, огнепаля́щее росо́ю ми́лостивно вся́ку па́губную ле́сть.

Да убѣли́тся вся́кое земно́е естество́, отъ паде́нія ны́нѣ на не́бо возводи́мо, Имже бо вся соблюда́ются, Сло́вомъ, теку́щими струя́ми омы́вшеся, прегрѣше́ній пре́жнихъ убѣже́, пресвѣ́тло измове́но.

Инъ:

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Тя́, и́же на земли́ равноа́нгельна я́вльшася премѣне́ннымъ житіе́мъ и всѣ́хъ вы́шша, Іоа́нне всеблаже́нне, ра́достно почита́емъ, зову́ще: благослови́те, вся́ дѣла́ Госпо́дня, Го́спода.

Еди́но въ Тре́хъ Божества́ Существо́ Единосу́щными Ѵпоста́сьми, проро́че, научи́лъ еси́: гла́сомъ бо Роди́теля и прише́ствіемъ Ду́ха позна́лъ еси́ Креща́емаго, Сло́ва Бо́жія Присносу́щнаго.

Утро мы́сленное, Со́лнце возвѣща́я, е́же изъ Дѣ́вы возсія́вшее, изъ непло́дныя предте́клъ еси́, Іоа́нне всече́стне, и Агнца проповѣ́далъ еси́, мíра грѣ́хъ человѣколю́біемъ взе́млющаго.

Свы́ше на́съ ны́нѣ назира́я, блаже́нне, твои́ми моли́твами сохрани́, боже́ственному проповѣ́данію послѣ́дующія твоему́, всеблаже́нне, и во уче́ніихъ пребыва́юще, Предте́че, боже́ственныхъ и спаси́тельныхъ твои́хъ догма́товъ.

Богоро́диченъ: Сла́вы Отчія зачала́ еси́ несказа́нно Превѣ́чное Осія́ніе и Сло́во Безнача́льное, въ нача́лѣ су́щее разумѣва́емое, и ны́нѣ изъ Тебе́ перворожде́нна, Всечи́стая, бы́вша неизмѣ́нно тва́ри.

Катава́сія: Та́йну пресла́вную Вавило́нская... Другíй: Свобо́дна у́бо тва́рь познава́ется...

На 9-й пѣ́сни Честнѣ́йшую... не пое́мъ, но пое́мъ припѣ́вы пра́здника, и Предте́чи, и ирмосы́.

Припѣ́въ: Велича́й, душе́ моя́, Честнѣ́йшую го́рнихъ во́инствъ, Дѣ́ву Пречи́стую Богоро́дицу.

Пѣ́снь 9.

Ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Та́же вторы́й ли́къ пое́тъ то́йже припѣ́въ и ирмо́съ.

Велича́й, душе́ моя́, отъ Предте́чи креще́нія Прося́ща.

Велича́й, душе́ моя́, во Іорда́нѣ Прише́дшаго крести́тися.

Дави́де, пріиди́ Ду́хомъ къ просвѣще́ннымъ, — ны́нѣ приступи́те, — по́й къ Бо́гу, — вѣ́рою, — глаго́ля, — просвѣти́теся́! Се́й ни́щій воззва́ Ада́мъ въ паде́ніи, и́бо Того́ услы́ша Госпо́дь, прише́дъ, струя́ми Іорда́нскими тлѣ́ннаго же обнови́. [Два́жды.]

Велича́й, душе́ моя́, отъ Оте́ческаго гла́са Свидѣ́тельствованна.

Иса́ія, — измы́йтеся, очи́ститеся́ — глаго́летъ, — лука́вствія предъ Го́сподемъ оста́вите. Жа́ждущіи, на во́ду жи́ву иди́те: кропи́тъ бо водо́ю, обновля́я, Христо́съ приступа́ющія къ Нему́ вѣ́рою и къ животу́ нестарѣ́емому креща́етъ Ду́хомъ.

Велича́й, душе́ моя́, Еди́наго отъ Тро́ицы, прекло́ньшаго вы́ю и креще́ніе пріе́мша.

Соблюда́емся благода́тію, вѣ́рніи, и печа́тію. Яко бо губи́теля, бѣжа́ша пра́га евре́и, дре́вле окрова́влена, та́ко и на́мъ исхо́дное Боже́ственное сіе́ пакибытія́ ба́ня бу́детъ. Отсю́ду и Тро́ицы у́зримъ Свѣ́тъ Незаходи́мый.

Та́же пе́рвый ли́къ пое́тъ втора́го кано́на припѣ́въ:

Дне́сь Влады́ка преклоня́етъ вы́ю подъ ру́ку Предте́чеву.

И ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

Та́же вторы́й ли́къ пое́тъ то́йже припѣ́въ и ирмо́съ.

Дне́сь Іоа́ннъ креща́етъ Влады́ку, во струя́хъ Іорда́нскихъ.

Увѣ́дѣхомъ Моисе́ю купино́ю явле́нная, гряди́, стра́нными уста́вы содѣ́ланная: я́ко бо спасе́ся, Огнь нося́щи, Дѣ́ва, Свѣтоно́сна ро́ждши Благодѣ́теля, во Іорда́нскихъ же струя́хъ явле́нна.

Дне́сь Влады́ка вода́ми погреба́етъ человѣ́ческій грѣ́хъ.

Помазу́еши, соверша́я человѣ́ческое существо́, Царю́ Безнача́льне, Ду́ха обще́ніемъ, струя́ми чи́стыми отмы́въ и тмы́ крѣ́пость же посра́мль возвы́шенную, ны́нѣ въ безпреста́ннѣмъ возда́ти житіи́.

Инъ:

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Припѣ́въ къ тропаре́мъ Предте́чевымъ:

Велича́й, душе́ моя́, [и́же] во проро́цѣхъ вели́каго Предте́чу.

Изъ пусты́ни Предте́ча гла́съ Сло́во показу́етъ, пло́тски къ на́мъ прише́дшее, и прису́щее прера́достно крести́ти гото́вится, ду́ши очища́ющее отъ грѣха́ вѣ́ры ра́ди.

Благода́ть же и зако́нъ хода́тая тя́ че́стна я́вѣ предлага́ютъ: о́въ у́бо запеча́тствующаго, о́вая же начина́ющаго, всѣ́хъ проро́ковъ Сло́вомъ предпочте́ннаго, па́че ви́димыхъ пожи́вша, всече́стне.

Безтѣле́снымъ подо́бное житіе́ показа́въ, со а́нгельскими ли́ки весели́тся и, престо́лу предстоя́ Влады́чню, ра́дуется, восхваля́ющимъ оставле́ніе и спасе́ніе испроша́я.

Припѣ́въ пе́рвый: [Велича́й, душе́ моя́, Честнѣ́йшую го́рнихъ во́инствъ, Дѣ́ву Пречи́стую Богоро́дицу].

Богоро́диченъ: За благоутро́біе всѣ́хъ Изба́витель Человѣ́къ быва́етъ и плотско́е рожде́ніе пріе́млетъ, человѣколю́бно па́че человѣ́ковъ сы́й Человѣколю́бецъ, изъ дѣ́вственнаго ложесна́ Твоего́, Богороди́тельнице Всеблаже́нная.

И посе́мъ на схо́дѣ пое́мъ о́ба ли́ка вку́пѣ припѣ́въ пра́здника. Та́же катава́сія: Недоумѣ́етъ вся́къ язы́къ... Та́же припѣ́въ Богоро́дицѣ и ирмо́съ: О, па́че ума́... И покло́нъ.

Свѣти́ленъ Предте́чи. Подо́бенъ: Ду́хомъ во святи́лищи.

Стези́ предугото́валъ еси́ чу́дно Го́сподеви: гла́съ бо бы́лъ еси́ Того́ прише́ствія и проповѣ́дникъ и́стиннѣйшій, проро́ковъ превы́шшій, блаже́нне Іоа́нне: ты́ Свѣ́тъ ви́дѣлъ еси́, я́ко неизглаго́ланное Его́ сконча́въ смотре́ніе.

Сла́ва, и ны́нѣ, пра́здника:

Яви́ся Спа́съ, благода́ть и и́стина, во струя́хъ Іорда́нскихъ и су́щія во тмѣ́ и сѣ́ни спя́щія просвѣти́лъ е́сть, и́бо пріи́де и яви́ся Свѣ́тъ Непристу́пный.

На хвали́техъ стихи́ры на 4, гла́съ 1. Самогла́сны:

Свѣ́тъ отъ Свѣ́та возсія́ мíру, Христо́съ, Спа́съ на́шъ, явле́йся Бо́гъ: Сему́, лю́діе, поклони́мся.

Ка́ко Тя́, Христе́, раби́, Влады́ку досто́йно почти́мъ? я́ко въ вода́хъ всѣ́хъ на́съ обнови́лъ еси́.

Ты́, во Іорда́нѣ кре́щся, Спа́се на́шъ, во́ды освяти́лъ еси́, дла́нію раба́ рукополага́емый и стра́сти мíра врачу́яй. Ве́ліе та́инство явле́нія Твоего́, Человѣколю́бче Го́споди, сла́ва Тебѣ́!

Истинный Свѣ́тъ яви́ся и всѣ́мъ просвѣще́ніе да́руетъ. Креща́ется Христо́съ съ на́ми, Иже вся́кія вы́шши чистоты́, влага́етъ свяще́ніе водѣ́, и душа́мъ сіе́ очище́ніе быва́етъ, земно́е явля́емое и вы́шше небе́съ разумѣва́емое. Ба́нею спасе́ніе, водо́ю же Ду́хъ, погруже́нія ра́ди, и́же къ Бо́гу, на́шъ восхо́дъ быва́етъ. Чуде́сна дѣла́ Твоя́, Го́споди, сла́ва Тебѣ́!

Сла́ва, гла́съ 6. Самогла́сенъ:

Ангелъ изъ непло́дныхъ ложе́снъ произше́лъ еси́, Крести́телю, отъ са́мыхъ пеле́нъ въ пусты́ню всели́лся еси́, печа́ть же всѣ́хъ проро́ковъ показа́лся еси́: Его́же бо они́ многообра́зно ви́дѣша и гада́тельно проповѣ́даша, Сего́ крести́ти во Іорда́нѣ сподо́бился еси́. Гла́съ же услы́шалъ еси́ Оте́ческій съ небесе́, свидѣ́тельствующь Его́ Сыновство́, и Ду́ха ви́дѣлъ еси́ голуби́нымъ ви́домъ, гла́съ влеку́щаго на Креща́емаго. Но, о всѣ́хъ проро́ковъ превы́шшій! Не преста́й моли́тися о на́съ, вѣ́рно творя́щихъ твою́ па́мять.

И ны́нѣ, гла́съ 2. Анато́лія:

Дне́сь Христо́съ на Іорда́нъ пріи́де крести́тися, дне́сь Іоа́ннъ каса́ется верху́ Влады́чню. Си́лы небе́сныя ужасо́шася, пресла́вное ви́дяще та́инство. Мо́ре ви́дѣ и побѣже́, Іорда́нъ, ви́дѣвъ, возврати́ся. Мы́ же, просвѣ́щшеся, вопіе́мъ: сла́ва яви́вшемуся Бо́гу, и на земли́ ви́дѣнному, и просвѣти́вшему мíръ.

Славосло́віе вели́кое. По трисвято́мъ тропа́рь Предте́чи. Сла́ва, и ны́нѣ, пра́здника. Ектеніи́, и отпу́стъ, и ча́съ пе́рвый.

На пе́рвомъ часѣ́ тропа́рь пра́здника. Сла́ва, Предте́чи. И ны́нѣ, богоро́диченъ часо́въ. По трисвято́мъ, конда́къ пра́здника и про́чее. И соверше́нный отпу́стъ.


НА ЛИТУРГІИ,

Блаже́нна пра́здника, пѣ́снь 3-я, на 4 и свята́го пѣ́снь 6-я, на 4. По вхо́дѣ тропа́рь пра́здника и Предте́чи. Сла́ва, конда́къ Предте́чи. И ны́нѣ, пра́здника. Входно́е: Спаси́ ны, Сы́не Бо́жій, во Іорда́нѣ крести́выйся, пою́щія Ти́: аллилу́ія. Си́це пое́мъ и до отда́нія. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Апо́столъ въ Дѣя́ніихъ, зача́ло 42. Аллилу́ія, гла́съ 5: Свѣ́тъ возсія́ пра́веднику и пра́вымъ се́рдцемъ весе́ліе. Сти́хъ: Весели́теся, пра́ведніи, о Го́сподѣ, [и исповѣ́дайте па́мять о святы́нѣ Его́]. Ева́нгеліе Іоа́нна, зача́ло 3. Прича́стенъ: Яви́ся благода́ть Бо́жія [спаси́тельная всѣ́мъ человѣ́комъ]. Другíй: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 94 – 104 об.

/ Къ оглавленію раздѣла /


Наверхъ / Къ титульной страницѣ

0