Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 5-й де́нь.
Послѣ́дованіе часо́въ, пѣва́емыхъ въ на́вечеріи Просвѣще́нія.

[Зри́:] О часѣ́хъ въ на́вечеріи святы́хъ Богоявле́ній подоба́етъ вѣ́дати:

Аще ли прилучи́тся Богоявле́ніе въ недѣ́лю или́ въ понедѣ́льникъ, часы́ пое́мъ въ пято́къ, а яди́мъ два́жды дне́мъ: мона́хи сы́ръ и ма́сло, а міря́не мя́со. Аще ли Богоявле́ніе во вто́рникъ, часы́ пое́мъ въ понедѣ́льникъ. Аще ли Богоявле́ніе въ сре́ду, часы́ пое́мъ во вто́рникъ. Аще ли Богоявле́ніе въ четверто́къ, часы́ пое́мъ въ сре́ду. Аще ли Богоявле́ніе въ пято́къ, часы́ пое́мъ въ четверто́къ. Во вся́ сія́ дни́, отъ понедѣ́льника, въ на́вечерія предъ Богоявле́ніемъ мірски́мъ по́стъ, ника́коже сы́ра, ни ма́сла вкуша́емъ, но то́чію шти́ съ со́комъ да кутію́.


Ча́съ пе́рвый.

Въ нача́лѣ втора́го часа́ зна́менуетъ въ кампа́нъ, и, собра́вшеся во хра́мъ, облачи́тся іере́й въ фело́нь, діа́конъ же въ стиха́рь. И поставля́етъ параекклисіа́рхъ анало́гій укра́шенъ пря́мо ца́рскихъ вра́тъ, и вжига́етъ свѣщу́ на свѣ́щницѣ. Іере́й же исхо́дитъ со Ева́нгеліемъ во хра́мъ или́ въ тра́пезу ца́рскими враты́, предходя́щу ему́ діа́кону съ кади́ломъ. И полага́етъ іере́й свято́е Ева́нгеліе на анало́гѣ и, ста́въ предъ анало́гомъ, твори́тъ нача́ло по обы́чаю. И по нача́лѣ чте́цъ: Сла́ва Тебѣ́, Бо́же на́шъ, сла́ва Тебѣ́. И Царю́ Небе́сный.., и про́чая. И по возгла́сѣ кади́тъ іере́й свято́е Ева́нгеліе на анало́гѣ о́крестъ, и про́чія ико́ны, и хра́мъ ве́сь, и настоя́теля, и бра́тію. Чте́цъ же чте́тъ:

Псало́мъ 5:

Глаго́лы моя́ внуши́, Го́споди, разумѣ́й зва́ніе мое́. Вонми́ гла́су моле́нія моего́, Царю́ мо́й и Бо́же мо́й, я́ко къ Тебѣ́ помолю́ся, Го́споди. Зау́тра услы́ши гла́съ мо́й: Зау́тра предста́ну Ти́, и у́зриши мя́. Яко Бо́гъ, не хотя́й беззако́нія, Ты́ еси́, не присели́тся къ Тебѣ́ лука́внуяй, ниже́ пребу́дутъ беззако́нницы предъ очи́ма Твои́ма. Возненави́дѣлъ еси́ вся́, дѣ́лающія беззако́ніе. Погуби́ши вся, глаго́лющія лжу́, му́жа крове́й и льсти́ва гнуша́ется Госпо́дь. Азъ же мно́жествомъ ми́лости Твоея́ вни́ду въ до́мъ Тво́й, поклоню́ся ко хра́му свято́му Твоему́ въ стра́сѣ Твое́мъ. Го́споди, наста́ви мя́ пра́вдою Твое́ю, вра́гъ мои́хъ ра́ди испра́ви предъ Тобо́ю пу́ть мо́й. Яко нѣ́сть во устѣ́хъ и́хъ и́стины, се́рдце ихъ су́етно, гро́бъ отве́рстъ горта́нь и́хъ, язы́ки свои́ми льща́ху. Суди́ и́мъ, Бо́же, да отпаду́тъ отъ мы́слей свои́хъ, по мно́жеству нече́стія и́хъ изри́ни я́, я́ко преогорчи́ша Тя́, Го́споди. И да возвеселя́тся вси́, упова́ющіи на Тя́, во вѣ́къ возра́дуются, и всели́шися въ ни́хъ. И похва́лятся о Тебѣ́ лю́бящіи и́мя Твое́. Яко Ты́ благослови́ши пра́ведника, Го́споди, я́ко ору́жіемъ благоволе́нія венча́лъ еси́ на́съ.

Псало́мъ 22:

Госпо́дь пасе́тъ мя́, и ничто́же мя́ лиши́тъ. На мѣ́стѣ зла́чнѣ, та́мо всели́ мя, на водѣ́ поко́йнѣ воспита́ мя. Ду́шу мою́ обрати́, наста́ви мя́ на стези́ пра́вды и́мене ра́ди Своего́. Аще бо и пойду́ посредѣ́ сѣ́ни сме́ртныя, не убою́ся зла́, я́ко Ты́ со мно́ю еси́, же́злъ Тво́й и па́лица Твоя́, та́ мя́ утѣ́шиста. Угото́валъ еси́ пре́до мно́ю трапе́зу, сопроти́въ стужа́ющимъ мнѣ́, ума́стилъ еси́ еле́омъ главу́ мою́, и ча́ша Твоя́ упоява́ющи мя́, я́ко держа́вна. И ми́лость Твоя́ пожене́тъ мя́ вся́ дни́ живота́ моего́, и е́же всели́ти ми ся въ до́мъ Госпо́день, въ долготу́ днíй.

Псало́мъ 26:

Госпо́дь просвѣще́ніе мое́ и Спаси́тель мо́й, кого́ убою́ся? Госпо́дь Защи́титель живота́ моего́, отъ кого́ устрашу́ся? Внегда́ приближа́тися на мя́ зло́бующимъ, е́же снѣ́сти пло́ти моя́, оскорбля́ющіи мя́ и врази́ мои́, тíи изнемого́ша и падо́ша. Аще ополчи́тся на мя́ по́лкъ, не убои́тся се́рдце мое́, а́ще воста́нетъ на мя́ бра́нь, на Него́ а́зъ упова́ю. Еди́но проси́хъ отъ Го́спода, то́ взыщу́: е́же жи́ти ми́ въ дому́ Госпо́дни вся́ дни́ живота́ моего́, зрѣ́ти ми́ красоту́ Госпо́дню и посѣща́ти хра́мъ святы́й Его́. Яко скры́ мя въ селе́ніи Свое́мъ въ де́нь зо́лъ мои́хъ, покры́ мя въ та́йнѣ селе́нія Своего́, на ка́мень вознесе́ мя. И ны́нѣ се́ вознесе́ главу́ мою́ на враги́ моя́. Обыдо́хъ и пожро́хъ въ селе́ніи Его́ же́ртву хвале́нія и воскликнове́нія, пою́ и воспою́ Го́сподеви. Услы́ши, Го́споди, гла́съ мо́й, и́мже воззва́хъ: поми́луй мя́ и услы́ши мя́. Тебѣ́ рече́ се́рдце мое́: Го́спода взыщу́. Взыска́ Тебе́ лице́ мое́, лица́ Твоего́, Го́споди, взыщу́. Не отврати́ лица́ Твоего́ отъ мене́ и не уклони́ся гнѣ́вомъ отъ раба́ Твоего́, помо́щникъ мо́й бу́ди, не отри́ни мене́ и не оста́ви мене́, Бо́же, Спаси́телю мо́й. Яко оте́цъ мо́й и ма́ти моя́ оста́виста мя́, Госпо́дь же воспрія́тъ мя́. Законоположи́ ми, Го́споди, въ пути́ Твое́мъ и наста́ви мя́ на стезю́ пра́вую вра́гъ мои́хъ ра́ди. Не преда́ждь мене́ въ ду́ши стужа́ющихъ ми́, я́ко воста́ша на мя́ свидѣ́теліе непра́ведніи и солга́ непра́вда себѣ́. Вѣ́рую ви́дѣти блага́я Госпо́дня на земли́ живы́хъ. Потерпи́ Го́спода, мужа́йся, и да крѣпи́тся се́рдце твое́, и потерпи́ Го́спода.

Сла́ва, и ны́нѣ. Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.] Господи помилуй. [Три́жды.]
Сла́ва, тропа́рь, гла́съ 4:

Возвраща́шеся иногда́ Іорда́нъ рѣка́ ми́лотію Елиссе́евою,* возне́сшуся Иліи́,* и раздѣля́хуся во́ды сю́ду и сю́ду,* и бы́сть ему́ су́хъ пу́ть, и́же мо́крый,* во о́бразъ вои́стинну креще́нія,* и́мже мы́ теку́щее житія́ прехо́димъ ше́ствіе:* Христо́съ яви́ся во Іорда́нѣ освяти́ти во́ды.

И ны́нѣ, богоро́диченъ:

Что́ Тя́ нарече́мъ, о Благода́тная? Не́бо, я́ко возсія́ла еси́ Со́лнце пра́вды. Ра́й, я́ко прозябла́ еси́ Цвѣ́тъ нетлѣ́нія. Дѣ́ву, я́ко пребыла́ еси́ нетлѣ́нна. Чи́стую Ма́терь, я́ко имѣ́ла еси́ на святы́хъ Твои́хъ объя́тіяхъ Сы́на, всѣ́хъ Бо́га. Того́ моли́ спасти́ся душа́мъ на́шимъ.

Та́же тропари́ сія́ пое́мъ по два́жды, гла́съ 8. Творе́ніе Софро́нія, патріа́рха Іерусали́мскаго:

Дне́сь во́дъ освяща́ется естество́,* и раздѣля́ется Іорда́нъ* и свои́хъ во́дъ возвраща́етъ струи́,* Влады́ку зря́ креща́ема.

И вторы́й ли́къ то́йже тропа́рь безъ припѣ́ва.

И па́ки пе́рвый ли́къ припѣ́въ: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Яко Человѣ́къ на рѣку́ прише́лъ еси́, Христе́ Царю́,* и ра́бское креще́ніе прія́ти тщи́шися, Бла́же,* отъ Предте́чеву руку́* грѣ́хъ ра́ди на́шихъ, Человѣколю́бче.

И вторы́й ли́къ вторы́й припѣ́въ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

И па́ки то́йже тропа́рь: [Яко Человѣ́къ на рѣку́ прише́лъ еси́, Христе́ Царю́,* и ра́бское креще́ніе прія́ти тщи́шися, Бла́же,* отъ Предте́чеву руку́* грѣ́хъ ра́ди на́шихъ, Человѣколю́бче.]

Сла́ва:

Ко гла́су вопію́щаго въ пусты́ни:* угото́вайте пу́ть Госпо́день,* прише́лъ еси́, Го́споди, зра́къ ра́бій пріи́мъ,* креще́нія прося́, не вѣ́дый грѣха́.* Ви́дѣша Тя́ во́ды и убоя́шася.* Тре́петенъ бы́сть Предте́ча и возопи́, глаго́ля:* ка́ко просвѣти́тъ свѣти́льникъ Свѣ́та?* Ка́ко ру́ку положи́тъ ра́бъ на Влады́ку?* Освяти́ мене́ и во́ды, Спа́се,* взе́мляй мíра грѣ́хъ.

И ны́нѣ, па́ки то́йже:

[Ко гла́су вопію́щаго въ пусты́ни:* угото́вайте пу́ть Госпо́день,* прише́лъ еси́, Го́споди, зра́къ ра́бій пріи́мъ,* креще́нія прося́, не вѣ́дый грѣха́.* Ви́дѣша Тя́ во́ды и убоя́шася.* Тре́петенъ бы́сть Предте́ча и возопи́, глаго́ля:* ка́ко просвѣти́тъ свѣти́льникъ Свѣ́та?* Ка́ко ру́ку положи́тъ ра́бъ на Влады́ку?* Освяти́ мене́ и во́ды, Спа́се,* взе́мляй мíра грѣ́хъ.]

Та́же проки́менъ, гла́съ 4: И возгремѣ́ съ небесе́ Госпо́дь,* и Вы́шній даде́ гла́съ Сво́й. Сти́хъ: Возлюблю́ Тя́, Го́споди, крѣ́посте моя́, Госпо́дь утвержде́ніе мое́.

Проро́чества Иса́іина чте́ніе. [Глава́ 35.]

Та́ко глаго́летъ Госпо́дь: да возвесели́тся пусты́ня жа́ждущая, да возра́дуется пусты́ня и процвѣте́тъ, я́ко кри́нъ, и да прозя́бнетъ, и вся́ возвеселя́тся. И возра́дуются пусты́нная Іорда́нова, и сла́ва Лива́нова дана́ бы́сть е́й и че́сть Карми́лова, и лю́діе Мои́ у́зрятъ сла́ву Госпо́дню и высоту́ Бо́жію. Укрѣпи́теся, ру́ки осла́бленныя, и, колѣ́на разсла́бленная, утѣ́шитеся, и рцы́те малоду́шнымъ мы́слію: укрѣпи́теся и не бо́йтеся, се́ Бо́гъ на́шъ су́дъ воздае́тъ, То́й пріи́детъ и спасе́тъ на́съ. Тогда́ отве́рзутся очеса́ слѣпы́хъ, и ушеса́ глухи́хъ услы́шатъ, тогда́ ско́читъ хро́мый, я́ко еле́нь, и я́сенъ бу́детъ язы́къ гугни́выхъ, я́ко прорази́ся въ пусты́ни вода́ и де́брь въ земли́ жа́ждущей. И бу́детъ безво́дная въ бла́та, и въ жа́ждущей земли́ исто́чникъ воды́ бу́детъ. Та́мо бу́детъ весе́ліе пти́цъ, водворе́ніе си́риновъ, и тро́стій, и бла́та. Та́мо бу́детъ пу́ть чи́стъ, и пу́ть свя́тъ нарече́тся. И не мимои́детъ та́мо нечи́стъ, ниже́ бу́детъ та́мо пу́ть нечи́стый, разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ниже́ отъ звѣре́й лю́тыхъ взы́детъ на́нь, ниже́ обря́щется та́мо, но по́йдутъ по нему́ изба́вленніи и со́бранніи отъ Го́спода, и обратя́тся, и пріи́дутъ въ Сіо́нъ съ весе́ліемъ и ра́достію, и весе́ліе вѣ́чное надъ главо́ю и́хъ. Хвала́, и ра́дованіе, и весе́ліе пости́гнетъ и́хъ, отбѣже́ болѣ́знь, печа́ль и воздыха́ніе.

Дѣя́ній святы́хъ апо́столъ чте́ніе. [Зача́ло 33.]

Во дни́ о́ны, я́коже скончава́ше Іоа́ннъ тече́ніе, глаго́лаше: кого́ мя непщу́ете бы́ти, нѣ́смь а́зъ, но се́ гряде́тъ по мнѣ́, Ему́же нѣ́смь досто́инъ разрѣши́ти реме́нь сапогу́ Его́. Му́жіе, бра́тіе, сы́нове ро́да Авраа́мля, и и́же въ ва́съ, боя́щіися Бо́га, ва́мъ сло́во спасе́нія Сего́ посла́ся: Живу́щіи бо во Іерусали́мѣ и кня́зи и́хъ сего́ не разумѣ́вше, и гла́сы проро́ческія, по вся суббо́ты что́мыя, осуди́вше Его́, испо́лниша. И ни еди́ныя вины́ сме́ртныя обрѣ́тше, проси́ша у Пила́та уби́ти Его́. Якоже сконча́ша вся́, я́же о Не́мъ пи́сана, сне́мше со дре́ва, положи́ша во гро́бѣ. Бо́гъ же воскреси́ Его́ отъ ме́ртвыхъ. Иже яви́ся на дни́ мно́ги совозше́дшимъ съ Ни́мъ отъ Галиле́и во Іерусали́мъ, и́же ны́нѣ су́ть свидѣ́теліе Его́ къ лю́демъ. И мы́ ва́мъ благовѣству́емъ обѣтова́ніе, бы́вшее ко отце́мъ, я́ко сіе́ Бо́гъ испо́лнилъ е́сть на́мъ, ча́домъ и́хъ, воздви́гъ Іису́са.

Діа́конъ: Прему́дрость, про́сти, услы́шимъ свята́го Ева́нгелія.
Іере́й: Отъ Матѳе́я свята́го Ева́нгелія чте́ніе. [Зач. 5.]

Во вре́мя о́но пріи́де Іоа́ннъ Крести́тель, проповѣ́дуя въ пусты́ни Іуде́йстѣй и глаго́ля: пока́йтеся, прибли́жи бо ся Ца́рство небе́сное. Се́й бо е́сть рече́нный Иса́іемъ проро́комъ, глаго́лющимъ: гла́съ вопію́щаго въ пусты́ни: угото́вайте пу́ть Госпо́день, пра́вы твори́те стези́ Его́. Са́мъ же Іоа́ннъ имя́ше ри́зу свою́ отъ вла́съ велблу́ждь и по́ясъ усме́нъ о чре́слѣхъ свои́хъ; снѣ́дь же его́ бѣ́ пру́жіе и ме́дъ ди́вій. Тогда́ исхожда́ше къ нему́ Іерусали́ма и вся Іуде́я, и вся страна́ Іорда́нская. И креща́хуся во Іорда́нѣ отъ него́, исповѣ́дающе грѣхи́ своя́. Ви́дѣвъ же Іоа́ннъ мно́ги фарисе́и и саддуке́и, гряду́щія на креще́ніе его́, рече́ и́мъ: рожде́нія ехи́днова, кто́ сказа́ ва́мъ бѣжа́ти отъ бу́дущаго гнѣ́ва? Сотвори́те у́бо плоды́, досто́йны покая́нія. И не начина́йте глаго́лати въ себѣ́: отца́ и́мамы Авраа́ма. Глаго́лю бо ва́мъ, я́ко мо́жетъ Бо́гъ отъ ка́менія сего́ воздви́гнути ча́да Авраа́му. Уже́ бо и сѣки́ра при ко́рени дре́ва лежи́тъ: вся́ко у́бо дре́во, е́же не твори́тъ плода́ добра́, посѣка́емо быва́етъ и во о́гнь вмета́емо. Азъ у́бо креща́ю вы́ водо́ю въ покая́ніе, Гряды́й же по мнѣ́, крѣ́плій мене́ е́сть, Ему́же нѣ́смь досто́инъ сапоги́ понести́, То́й вы́ крести́тъ Ду́хомъ Святы́мъ.

Та́же:

Стопы́ моя́ напра́ви по словеси́ Твоему́ и да не облада́етъ мно́ю вся́кое беззако́ніе. Изба́ви мя отъ клеветы́ человѣ́ческія, и сохраню́ за́повѣди Твоя́. Лице́ Твое́ просвѣти́ на раба́ Твоего́ и нау́чи мя оправда́ніемъ Твои́мъ.

Да испо́лнятся уста́ моя́ хвале́нія Твоего́, Го́споди, я́ко да воспою́ сла́ву Твою́, ве́сь де́нь великолѣ́піе Твое́.

Трисвято́е, и по Отче на́шъ... Свяще́нникъ: Яко Твое́ е́сть Ца́рство... Конда́къ, гла́съ 4:

Во струя́хъ дне́сь Іорда́нскихъ бы́въ, Госпо́дь* Іоа́нну вопіе́тъ:* не убо́йся крести́ти Мя́,* спасти́ бо пріидо́хъ* Ада́ма первозда́ннаго.

Го́споди поми́луй, [40.] И моли́тву сію́:

Иже на вся́кое вре́мя, и на вся́кій ча́съ, на Небеси́ и на земли́, покланя́емый и сла́вимый Христе́ Бо́же, долготерпѣли́ве, многоми́лостиве, многоблагоутро́бне, И́же пра́ведныя любя́й, и грѣ́шныя ми́луяй, И́же вся́ зовы́й ко спасе́нію обѣща́нія ра́ди бу́дущихъ бла́гъ. Са́мъ Го́споди, пріими́ и на́ша въ ча́съ се́й моли́твы и испра́ви живо́тъ на́шъ къ за́повѣдемъ Твои́мъ, ду́ши на́ша освяти́, тѣлеса́ очи́сти, помышле́нія испра́ви, мы́сли очи́сти, и изба́ви на́съ отъ вся́кія ско́рби, зо́лъ и болѣ́зней; огради́ на́съ святы́ми Твои́ми А́нгелы, да ополче́ніемъ и́хъ соблюда́еми и наставля́еми, дости́гнемъ въ соедине́ніе вѣ́ры, и въ ра́зумъ непристу́пныя Твоея́ сла́вы, я́ко благослове́нъ еси́ во вѣ́ки вѣко́въ, ами́нь.

Го́споди поми́луй. [Три́жды.] Сла́ва, и ны́нѣ.

Честнѣ́йшую херуви́мъ, и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу Тя́ велича́емъ.

Именемъ Госпо́днимъ благослови́, о́тче.

Свяще́нникъ возглаша́етъ: Бо́же уще́дри ны́, и благослови́ ны, просвѣти́ лице́ Твое́ на ны́, и поми́луй ны́.

Та́же моли́тва:

Христе́, Свѣ́те и́стинный, просвѣща́яй и освяща́яй вся́каго человѣ́ка, гряду́щаго въ мíръ, да зна́менается на на́съ свѣ́тъ лица́ Твоего́, да въ не́мъ у́зримъ Свѣ́тъ непристу́пный, и испра́ви стопы́ на́ша къ дѣ́ланію за́повѣдей Твои́хъ моли́твами Пречи́стыя Твоея́ Ма́тере и всѣ́хъ Твои́хъ святы́хъ, ами́нь.


Ча́съ тре́тій.
Пріиди́те, поклони́мся... [Три́жды.] Та́же псало́мъ 28:

Принеси́те Го́сподеви сы́нове Бо́жіи, принеси́те Го́сподеви сы́ны о́вни, принеси́те Го́сподеви сла́ву и че́сть. Принеси́те Го́сподеви сла́ву и́мени Его́, поклони́теся Го́сподеви во дворѣ́ святѣ́мъ Его́. Гла́съ Госпо́день на вода́хъ, Бо́гъ сла́вы возгремѣ́, Госпо́дь на вода́хъ мно́гихъ. Гла́съ Госпо́день въ крѣ́пости, гла́съ Госпо́день въ великолѣ́піи. Гла́съ Го́спода, сокруша́ющаго ке́дры, и стры́етъ Госпо́дь ке́дры лива́нскія. И истни́тъ я́, я́ко тельца́ лива́нска, и возлю́бленный, я́ко сы́нъ единоро́жь. Гла́съ Го́спода, пресѣца́ющаго пла́мень огня́, гла́съ Го́спода, стряса́ющаго пусты́ню, и стрясе́тъ Госпо́дь пусты́ню Каддíйскую. Гла́съ Госпо́день, сверша́ющій еле́ни, и откры́етъ дубра́вы, и въ хра́мѣ Его́ вся́кій глаго́летъ сла́ву. Госпо́дь пото́пъ населя́етъ, и ся́детъ Госпо́дь Ца́рь въ вѣ́къ. Госпо́дь крѣ́пость лю́демъ Свои́мъ да́стъ, Госпо́дь благослови́тъ лю́ди Своя́ ми́ромъ.

Псало́мъ 41:

Имже о́бразомъ жела́етъ еле́нь на исто́чники водны́я, си́це жела́етъ душа́ моя́ къ Тебѣ́, Бо́же. Возжада́ душа́ моя́ къ Бо́гу крѣ́пкому, живо́му, когда́ пріиду́ и явлю́ся лицу́ Бо́жію? Бы́ша сле́зы моя́ мнѣ́ хлѣ́бъ де́нь и но́щь, внегда́ глаго́латися мнѣ́ на вся́къ де́нь: гдѣ́ е́сть Бо́гъ тво́й? Сія́ помяну́хъ, и излія́хъ на мя́ ду́шу мою́, я́ко пройду́ въ мѣ́сто селе́нія ди́вна, да́же до до́му Бо́жія, во гла́сѣ ра́дованія и исповѣ́данія, шу́ма пра́зднующаго. Вску́ю приско́рбна еси́, душе́ моя́, и вску́ю смуща́еши мя́? Упова́й на Бо́га, я́ко исповѣ́мся Ему́, спасе́ніе лица́ моего́, и Бо́гъ мо́й. Ко мнѣ́ самому́ душа́ моя́ смяте́ся, сего́ ра́ди помяну́хъ Тя́ отъ земли́ Іорда́нски и Ермоніи́мски, отъ горы́ ма́лыя. Бе́здна бе́здну призыва́етъ во гла́сѣ хля́бій Твои́хъ, вся́ высоты́ Твоя́ и во́лны Твоя́ на мнѣ́ преидо́ша. Въ де́нь заповѣ́сть Госпо́дь ми́лость Свою́, и но́щію пѣ́снь Его́ отъ мене́, моли́тва Бо́гу живота́ моего́. Реку́ Бо́гу: Засту́пникъ мо́й еси́, почто́ мя́ забы́лъ еси́? И вску́ю, сѣ́туя, хожду́, внегда́ оскорбля́етъ вра́гъ? Внегда́ сокруша́тися косте́мъ мои́мъ, поноша́ху ми́ врази́ мои́, внегда́ глаго́лати и́мъ мнѣ́ на вся́къ де́нь: гдѣ́ е́сть Бо́гъ тво́й? Вску́ю приско́рбна еси́, душе́ моя́, и вску́ю смуща́еши мя́? Упова́й на Бо́га, я́ко исповѣ́мся Ему́, спасе́ніе лица́ моего́ и Бо́гъ мо́й.

Псало́мъ 50:

Поми́луй мя́, Бо́же, по вели́цѣй ми́лости Твое́й, и по мно́жеству щедро́тъ Твои́хъ очи́сти беззако́ніе мое́. Наипа́че омы́й мя отъ беззако́нія моего́, и отъ грѣха́ моего́ очи́сти мя. Я́ко беззако́ніе мое́ а́зъ зна́ю и грѣ́хъ мо́й предо мно́ю е́сть вы́ну. Тебѣ́ Еди́ному согрѣши́хъ, и лука́вое предъ Тобо́ю сотвори́хъ, я́ко да оправди́шися во словесѣ́хъ Твои́хъ и побѣди́ши, внегда́ суди́ти Ти́. Се́ бо въ беззако́ніихъ зача́тъ е́смь, и во грѣсѣ́хъ роди́ мя́ ма́ти моя́. Се́ бо и́стину возлюби́лъ еси́, безвѣ́стная и та́йная прему́дрости Твоея́ яви́лъ ми́ еси́. Окропи́ши мя́ иссо́помъ, и очи́щуся, омы́еши мя́, и па́че снѣ́га убѣлю́ся. Слу́ху моему́ да́си ра́дость и весе́ліе, возра́дуются ко́сти смире́нныя. Отврати́ лице́ Твое́ отъ грѣ́хъ мои́хъ, и вся́ беззако́нія моя́ очи́сти. Се́рдце чи́сто сози́жди во мнѣ́, Бо́же, и ду́хъ пра́въ обнови́ во утро́бѣ мое́й. Не отве́ржи мене́ отъ лица́ Твоего́, и Ду́ха Твоего́ Свята́го не отъими́ отъ мене́. Возда́ждь ми́ ра́дость спасе́нія Твоего́, и Ду́хомъ Влады́чнимъ утверди́ мя́. Научу́ беззако́нныя путе́мъ Твои́мъ, и нечести́віи къ Тебѣ́ обратя́тся. Изба́ви мя́ отъ крове́й, Бо́же, Бо́же спасе́нія моего́, возра́дуется язы́къ мо́й пра́вдѣ Твое́й. Го́споди, устнѣ́ мои́ отве́рзеши, и уста́ моя́ возвѣстя́тъ хвалу́ Твою́. Я́ко а́ще бы восхотѣ́лъ еси́ же́ртвы, да́лъ бы́хъ убо́, всесожже́нія не благоволи́ши. Же́ртва Бо́гу — ду́хъ сокруше́нъ, се́рдце сокруше́нно и смире́нно Бо́гъ не уничижи́тъ. Ублажи́, Го́споди, благоволе́ніемъ Твои́мъ Сіо́на, и да сози́ждутся стѣ́ны Іерусали́мскія. Тогда́ благоволи́ши же́ртву пра́вды, возноше́ніе и всесожега́емая: тогда́ возложа́тъ на олта́рь Тво́й тельцы́.

Сла́ва, и ны́нѣ. Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.] Господи помилуй. [Три́жды.]
Сла́ва, тропа́рь, гла́съ 4:

Возвраща́шеся иногда́ Іорда́нъ рѣка́ ми́лотію Елиссе́евою,* возне́сшуся Иліи́,* и раздѣля́хуся во́ды сю́ду и сю́ду,* и бы́сть ему́ су́хъ пу́ть, и́же мо́крый,* во о́бразъ вои́стинну креще́нія,* и́мже мы́ теку́щее житія́ прехо́димъ ше́ствіе:* Христо́съ яви́ся во Іорда́нѣ освяти́ти во́ды.

И ны́нѣ, богоро́диченъ:

Богоро́дице, Ты еси́ лоза́ и́стинная, возрасти́вшая намъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.

Та́же пое́мъ тропари́, гла́съ 8:

Предте́чи, и Крести́теля, и проро́ка,* и па́че всѣ́хъ почте́на проро́къ,* трепета́ше ны́нѣ рука́ десна́я,* егда́ ви́дѣ Тебе́, Агнца Бо́жія,* очища́ющаго мíру согрѣше́нія,* и, по́двигомъ одержи́мь, вопія́ше:* не смѣ́ю прикосну́тися, Сло́ве, верху́ Твоему́,* Са́мъ мя́ освяти́ и просвѣти́, Ще́дре:* Ты́ бо еси́ Живо́тъ, и Свѣ́тъ, и Ми́ръ мíрови. [Два́жды.]

Та́же сти́хъ. Гла́съ 4: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Тро́ица, Бо́гъ на́шъ,* Себе́ на́мъ дне́сь нераздѣ́льно яви́:* и́бо Оте́цъ явле́ннымъ свидѣ́тельствомъ сро́дства возгласи́,* Ду́хъ же голуби́нымъ о́бразомъ сни́де съ небе́съ,* Сы́нъ пречи́стый ве́рхъ Сво́й Предте́чи приклони́* и, кре́щься, человѣ́чество отъ рабо́ты изба́ви,* я́ко Человѣколю́бецъ.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

И па́ки то́йже тропа́рь: [Тро́ица, Бо́гъ на́шъ,* Себе́ на́мъ дне́сь нераздѣ́льно яви́:* и́бо Оте́цъ явле́ннымъ свидѣ́тельствомъ сро́дства возгласи́,* Ду́хъ же голуби́нымъ о́бразомъ сни́де съ небе́съ,* Сы́нъ пречи́стый ве́рхъ Сво́й Предте́чи приклони́* и, кре́щься, человѣ́чество отъ рабо́ты изба́ви,* я́ко Человѣколю́бецъ.]

Сла́ва, гла́съ 5:

Гряды́й съ пло́тію ко Іорда́ну, Го́споди,* крести́тися хотя́ во о́бразѣ Человѣ́ка, Животода́вче,* да прельсти́вшихся на́съ, я́ко Благоутро́бенъ,* вся́кія ко́зни и сѣ́ти змíевы изба́вивъ, просвѣти́ши,* отъ Отца́ свидѣ́тельствуемь,* Боже́ственный же Духъ голуби́нымъ ви́домъ Тебѣ́ предста́,* но всели́ въ ду́ши на́ша Того́, Человѣколю́бче.

И ны́нѣ, то́йже:

[Гряды́й съ пло́тію ко Іорда́ну, Го́споди,* крести́тися хотя́ во о́бразѣ Человѣ́ка, Животода́вче,* да прельсти́вшихся на́съ, я́ко Благоутро́бенъ,* вся́кія ко́зни и сѣ́ти змíевы изба́вивъ, просвѣти́ши,* отъ Отца́ свидѣ́тельствуемь,* Боже́ственный же Духъ голуби́нымъ ви́домъ Тебѣ́ предста́,* но всели́ въ ду́ши на́ша Того́, Человѣколю́бче.]

Та́же, проки́менъ, гла́съ 6: Ви́дѣша Тя́ во́ды, Бо́же,* ви́дѣша Тя́ во́ды и убоя́шася. Сти́хъ: Гла́сомъ мои́мъ ко Го́споду воззва́хъ, гла́сомъ мои́мъ къ Бо́гу, и вня́тъ ми́.

Проро́чества Иса́іина чте́ніе. [Глава́ 1.]

Та́ко глаго́летъ Госпо́дь: измы́йтеся и чи́сти бу́дете, отыми́те лука́вствія отъ ду́шъ ва́шихъ предъ очи́ма Мои́ма, преста́ните отъ лука́вствій ва́шихъ. Научи́теся до́брое твори́ти, изыщи́те суда́, изба́вите оби́дима, суди́те си́ру и оправди́те вдови́цу. И пріиди́те, и истя́жимся, — глаго́летъ Госпо́дь, — и а́ще бу́дутъ грѣси́ ва́ши, я́ко багря́ное, я́ко снѣ́гъ, убѣлю́; а́ще же бу́дутъ, я́ко червле́ное, я́ко во́лну, убѣлю́. И а́ще хо́щете и послу́шаете Мене́, блага́я земли́ снѣ́сте. Аще ли же не хо́щете, ниже́ послу́шаете Мене́, ме́чь ва́съ поя́стъ, — уста́ бо Госпо́дня глаго́лаша сія́.

Дѣя́ній святы́хъ апо́столъ чте́ніе. [Зача́ло 42.]

Во дни́ о́ны бы́сть внегда́ бы́ти Аполло́су въ Кори́нѳѣ, Па́влу же, проше́дшу вы́шнія страны́, пріити́ во Ефе́съ, и, обрѣ́тъ нѣ́кія ученики́, рече́ къ ни́мъ: а́ще у́бо Ду́хъ Свя́тъ прія́ли есте́, вѣ́ровавше? Они́ же рѣ́ша къ нему́: но ниже́, а́ще Духъ Святы́й е́сть, слы́шахомъ. Рече́ же къ ни́мъ: во что́ у́бо крести́стеся? Они́ же реко́ша: во Іоа́нново креще́ніе. Рече́ же Па́велъ: Іоа́ннъ у́бо крести́ креще́ніемъ покая́нія, лю́демъ глаго́ля: во Гряду́щаго по не́мъ да вѣ́руютъ, си́рѣчь во Христа́ Іису́са. Слы́шавше же, крести́шася во и́мя Го́спода Іису́са. И возло́жшу Па́влу на ня́ ру́цѣ, пріи́де Духъ Святы́й на ня́: глаго́лаху же язы́ки и проро́чествоваху. Бя́ше же всѣ́хъ муже́й я́ко двана́десять. Вше́дъ же въ со́нмище, дерза́ше, не обину́яся, три́ мѣ́сяцы бесѣ́дуя и увѣря́я я́же о Ца́рствіи Бо́жіи.

Діа́конъ: Прему́дрость, про́сти, услы́шимъ свята́го Ева́нгелія.
Іере́й: Отъ Ма́рка свята́го Ева́нгелія чте́ніе. [Зач. 1.]

Зача́ло Ева́нгелія Іису́са Христа́, Сы́на Бо́жія, я́коже е́сть пи́сано во проро́цѣхъ: се́ Азъ посыла́ю а́нгела Моего́ предъ лице́мъ Твои́мъ, и́же угото́витъ пу́ть Тво́й предъ Тобо́ю. Гласъ вопію́щаго въ пусты́ни: угото́вайте пу́ть Госпо́день, пра́вы твори́те стези́ Его́. Бы́сть Іоа́ннъ, крестя́й въ пусты́ни, и проповѣ́дая креще́ніе покая́нія во отпуще́ніе грѣхо́въ. И исхожда́ше къ нему́ вся́ Іуде́йская страна́ и іерусали́мляне, и креща́хуся вси́ во Іорда́нѣ рѣцѣ́ отъ него́, исповѣ́дающе грѣхи́ своя́. Бѣ́ же Іоа́ннъ оболче́нъ власы́ вельблу́жди, и по́ясъ усме́нъ о чре́слѣхъ его́, и яды́й акри́ды, и ме́дъ ди́вій. И проповѣ́даше, глаго́ля: гряде́тъ Крѣ́плій мене́, во слѣ́дъ мене́, Ему́же нѣ́смь досто́инъ, прекло́нься, разрѣши́ти реме́нь сапо́гъ Его́. Азъ у́бо крести́хъ вы́ въ водѣ́, То́й же крести́тъ вы́ Ду́хомъ Святы́мъ.

Та́же:

Госпо́дь Бо́гъ благослове́нъ, благослове́нъ Госпо́дь де́нь дне́, поспѣши́тъ на́мъ Бо́гъ спасе́ній на́шихъ, Бо́гъ на́шъ, Бо́гъ спаса́ти.

Трисвято́е, и по Отче на́шъ... Свяще́нникъ: Яко Твое́ е́сть Ца́рство... Конда́къ, гла́съ 4:

Во струя́хъ дне́сь Іорда́нскихъ бы́въ, Госпо́дь* Іоа́нну вопіе́тъ:* не убо́йся крести́ти Мя́,* спасти́ бо пріидо́хъ* Ада́ма первозда́ннаго.

Го́споди поми́луй, [40.] И моли́тва:

Иже на вся́кое вре́мя, [и на вся́кій ча́съ, на Небеси́ и на земли́, покланя́емый и сла́вимый Христе́ Бо́же, долготерпѣли́ве, многоми́лостиве, многоблагоутро́бне, И́же пра́ведныя любя́й, и грѣ́шныя ми́луяй, И́же вся́ зовы́й ко спасе́нію обѣща́нія ра́ди бу́дущихъ бла́гъ. Са́мъ Го́споди, пріими́ и на́ша въ ча́съ се́й моли́твы и испра́ви живо́тъ на́шъ къ за́повѣдемъ Твои́мъ, ду́ши на́ша освяти́, тѣлеса́ очи́сти, помышле́нія испра́ви, мы́сли очи́сти, и изба́ви на́съ отъ вся́кія ско́рби, зо́лъ и болѣ́зней; огради́ на́съ святы́ми Твои́ми А́нгелы, да ополче́ніемъ и́хъ соблюда́еми и наставля́еми, дости́гнемъ въ соедине́ніе вѣ́ры, и въ ра́зумъ непристу́пныя Твоея́ сла́вы, я́ко благослове́нъ еси́ во вѣ́ки вѣко́въ, ами́нь].

Го́споди поми́луй. [Три́жды.] Сла́ва, и ны́нѣ.

Честнѣ́йшую херуви́мъ, [и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу Тя́ велича́емъ].

Именемъ Госпо́днимъ благослови́, о́тче.

Свяще́нникъ возглаша́етъ: Моли́твами святы́хъ оте́цъ на́шихъ, Го́споди Іису́се Христе́, Бо́же на́шъ, поми́луй на́съ, ами́нь.

Та́же моли́тва:

Влады́ко Бо́же О́тче Вседержи́телю, Го́споди Сы́не Единоро́дный Іису́се Христе́, и Святы́й Ду́ше, еди́но Бо́жество́, еди́на си́ла, поми́луй мя́ грѣ́шнаго, и и́миже вѣ́си судьба́ми, спаси́ мя недосто́йнаго раба́ Твоего́, я́ко благослове́нъ еси́ во вѣ́ки вѣко́въ, ами́нь.


[Зри́:] На тре́тіемъ и шесто́мъ часѣ́ кади́тъ діа́конъ Ева́нгеліе и ико́ны, и настоя́теля, и ли́ки то́кмо.

Ча́съ шесты́й.
Пріиди́те, поклони́мся... [Три́жды.] И псало́мъ 73:

Вску́ю, Бо́же, отри́нулъ еси́ до конца́? Разгнѣ́вася я́рость Твоя́ на о́вцы па́жити Твоея́. Помяни́ со́нмъ Тво́й, его́же стяжа́лъ еси́ испе́рва, изба́вилъ еси́ жезло́мъ достоя́нія Твоего́, гора́ Сіо́нъ сія́, въ не́йже всели́лся еси́. Воздви́гни ру́цѣ Твои́ на горды́ни и́хъ въ коне́цъ, ели́ка лука́внова вра́гъ во святѣ́мъ Твое́мъ. И восхвали́шася ненави́дящіи Тя́ посредѣ́ пра́здника Твоего́, положи́ша зна́менія своя́, зна́менія, и не позна́ша. Яко во исхо́дѣ превы́ше, я́ко въ дубра́вѣ дре́вянѣ, сѣки́рами разсѣко́ша две́ри его́ вку́пѣ, сѣ́чивомъ и оско́рдомъ разруши́ша и́. Возжго́ша огне́мъ святи́ло Твое́, на земли́ оскверни́ша жили́ще и́мене Твоего́. Рѣ́ша въ се́рдцы свое́мъ ю́жики и́хъ вку́пѣ: пріиди́те, и отста́вимъ вся́ пра́здники Бо́жія отъ земли́. Зна́менія и́хъ не ви́дѣхомъ: нѣ́сть ктому́ проро́ка, и на́съ не позна́етъ ктому́. Доко́лѣ, Бо́же, поно́ситъ вра́гъ, раздражи́тъ проти́вный и́мя Твое́ до конца́? Вску́ю отвраща́еши ру́ку Твою́ и десни́цу Твою́ отъ среды́ нѣ́дра Твоего́ въ коне́цъ? Бо́гъ же, Ца́рь на́шъ пре́жде вѣ́ка, содѣ́ла спасе́ніе посредѣ́ земли́. Ты́ утверди́лъ еси́ си́лою Твое́ю мо́ре, Ты́ сте́рлъ еси́ главы́ змíевъ въ водѣ́, Ты́ сокруши́лъ еси́ главу́ змíеву, да́лъ еси́ того́ бра́шно лю́демъ Еѳіо́пскимъ. Ты́ расто́рглъ еси́ исто́чники и пото́ки, Ты́ изсуши́лъ еси́ ре́ки Иѳа́мскія. Тво́й е́сть де́нь, и Твоя́ е́сть но́щь, Ты́ соверши́лъ еси́ зарю́ и со́лнце. Ты́ сотвори́лъ еси́ вся́ предѣ́лы земли́, жа́тву и ве́сну, Ты́ созда́лъ еси́ я́. Помяни́ сія́: вра́гъ поноси́ Го́сподеви, и лю́діе безу́мніи раздражи́ша и́мя Твое́. Не преда́ждь звѣ́ремъ ду́шу, исповѣ́дающуюся Тебѣ́, ду́шъ убо́гихъ Твои́хъ не забу́ди до конца́. При́зри на завѣ́тъ Твой, я́ко испо́лнишася помраче́нніи земли́ домо́въ беззако́ній. Да не возврати́тся смире́нный посра́мленъ, ни́щъ и убо́гъ восхвали́та и́мя Твое́. Воста́ни, Бо́же, суди́ прю́ Твою́, помяни́ поноше́ніе Твое́, е́же отъ безу́мнаго ве́сь де́нь. Не забу́ди гла́са моли́твенникъ Твои́хъ, горды́ня ненави́дящихъ Тя́ взы́де вы́ну.

Псало́мъ 76:

Гла́сомъ мои́мъ ко Го́споду воззва́хъ, гла́сомъ мои́мъ къ Бо́гу, и вня́тъ ми́. Въ де́нь ско́рби моея́ Бо́га взыска́хъ рука́ма мои́ма, но́щію предъ Ни́мъ, и не прельще́нъ бы́хъ: отве́ржеся утѣ́шитися душа́ моя́. Помяну́хъ Бо́га и возвесели́хся; поглумля́хся, и малоду́шствоваше ду́хъ мо́й. Предвари́стѣ стражбы́ о́чи мои́, смято́хся и не глаго́лахъ. Помы́слихъ дни́ пе́рвыя, и лѣ́та вѣ́чная помяну́хъ, и поуча́хся. Но́щію се́рдцемъ мои́мъ глумля́хся, и тужа́ше ду́хъ мо́й. Еда́ во вѣ́ки отри́нетъ Госпо́дь и не приложи́тъ благоволи́ти па́ки? Или́ до конца́ ми́лость Свою́ отсѣче́тъ, сконча́ глаго́лъ отъ ро́да въ ро́дъ? Еда́ забу́детъ уще́дрити Бо́гъ или́ удержи́тъ во гнѣ́вѣ Свое́мъ щедро́ты Своя́? И рѣ́хъ: ны́нѣ нача́хъ, сія́ измѣ́на десни́цы Вы́шняго. Помяну́хъ дѣла́ Госпо́дня, я́ко помяну́ отъ нача́ла чудеса́ Твоя́. И поучу́ся во всѣ́хъ дѣ́лѣхъ Твои́хъ и въ начина́ніихъ Твои́хъ поглумлю́ся. Бо́же, во святѣ́мъ пу́ть Тво́й: кто́ Бо́гъ ве́лій, я́ко Богъ на́шъ? Ты́ еси́ Бо́гъ, творя́й чудеса́, сказа́лъ еси́ въ лю́дехъ си́лу Твою́. Изба́вилъ еси́ мы́шцею Твое́ю лю́ди Твоя́, сы́ны Іа́ковли и Іо́сифовы. Ви́дѣша Тя́ во́ды, Бо́же, ви́дѣша Тя́ во́ды и убоя́шася, смято́шася бе́здны. Мно́жество шу́ма во́дъ, гла́съ да́ша о́блацы, и́бо стрѣ́лы Твоя́ прехо́дятъ. Гласъ гро́ма Твоего́ въ колеси́, освѣти́ша мо́лнія Твоя́ вселе́нную, подви́жеся и тре́петна бы́сть земля́. Въ мо́ри путіе́ Твои́, и стези́ Твои́ въ вода́хъ мно́гихъ, и слѣды́ Твоя́ не позна́ются. Наста́вилъ еси́, я́ко о́вцы, лю́ди Твоя́ руко́ю Моисе́овою и Ааро́нею.

Псало́мъ 90:

Живы́й въ по́мощи Вы́шняго, въ кро́вѣ Бо́га небе́снаго водвори́тся. Рече́тъ Го́сподеви: засту́пникъ мо́й еси́ и прибѣ́жище мое́, Бо́гъ мо́й, и упова́ю на Него́. Яко То́й изба́витъ тя́ отъ сѣ́ти ло́вчи, и отъ словесе́ мяте́жна, плещма́ Свои́ма осѣни́тъ тя́, и подъ крилѣ́ Его́ надѣ́ешися, ору́жіемъ обы́детъ тя́ и́стина Его́. Не убои́шися отъ стра́ха нощна́го, отъ стрѣлы́ летя́щія во дни́, отъ ве́щи во тмѣ́ преходя́щія, отъ сря́ща и бѣ́са полу́деннаго. Паде́тъ отъ страны́ твоея́ ты́сяща, и тма́ одесну́ю тебе́, къ тебѣ́ же не прибли́жится, оба́че очи́ма твои́ма смо́триши и воздая́ніе грѣ́шниковъ у́зриши. Яко Ты́, Го́споди, упова́ніе мое́; Вы́шняго положи́лъ еси́ прибѣ́жище твое́. Не пріи́детъ къ тебѣ́ зло́, и ра́на не прибли́жится тѣлеси́ твоему́, я́ко а́нгеломъ Свои́мъ заповѣ́сть о тебѣ́, сохрани́ти тя́ во всѣ́хъ путе́хъ твои́хъ. На рука́хъ во́змутъ тя́, да не когда́ преткне́ши о ка́мень но́гу твою́; на а́спида и васили́ска насту́пиши, и попере́ши льва́ и змíя. Яко на Мя́ упова́, и изба́влю и́; покры́ю и́, я́ко позна́ и́мя Мое́. Воззове́тъ ко Мнѣ́, и услы́шу его́, съ ни́мъ е́смь въ ско́рби, изму́ его́ и просла́влю его́, долгото́ю дне́й испо́лню его́ и явлю́ ему́ спасе́ніе Мое́.

Сла́ва, и ны́нѣ. Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.] Господи помилуй. [Три́жды.]
Сла́ва, тропа́рь, гла́съ 4:

Возвраща́шеся иногда́ Іорда́нъ рѣка́ ми́лотію Елиссе́евою,* возне́сшуся Иліи́,* и раздѣля́хуся во́ды сю́ду и сю́ду,* и бы́сть ему́ су́хъ пу́ть, и́же мо́крый,* во о́бразъ вои́стинну креще́нія,* и́мже мы́ теку́щее житія́ прехо́димъ ше́ствіе:* Христо́съ яви́ся во Іорда́нѣ освяти́ти во́ды.

И ны́нѣ, богоро́диченъ:

Яко не и́мамы дерзнове́нія за премно́гія грѣхи́ на́ша, Ты́ Иже отъ Тебе́ Ро́ждшагося моли́, Богоро́дице Дѣ́во, мно́го бо мо́жетъ моле́ніе Ма́тернее ко благосе́рдію Влады́ки. Не пре́зри грѣ́шныхъ мольбы́, Всечи́стая, я́ко ми́лостивъ е́сть и спасти́ могíй, Иже и страда́ти о на́съ изво́ливый.

Та́же стихи́ра, гла́съ 8:

Та́ко глаго́летъ Госпо́дь ко Іоа́нну:* проро́че, гряди́ крести́ти Мене́,* тебе́ созда́вшаго, и просвѣща́ющаго благода́тію,* и очища́ющаго всѣ́хъ.* Прикосни́ся Боже́ственному Моему́ верху́* и не усумни́ся.* Про́чее оста́ви ны́нѣ,* и́бо испо́лнити пріидо́хъ пра́вду вся́кую.* Ты́ же не усумни́ся отню́дъ,* и́бо тая́щагося въ вода́хъ бори́теля,* кня́зя тмы́, тщу́ся погуби́ти,* избавля́я мíръ отъ его́ сѣ́тей ны́нѣ,* подая́ я́ко Человѣколю́бецъ Живо́тъ вѣ́чный. [Два́жды.]

Та́же сти́хъ, гла́съ 6: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Дне́сь псало́мское проро́чество коне́цъ прія́ти спѣши́тъ:* мо́ре бо, — рече́, — ви́дѣ и побѣже́,* Іорда́нъ возврати́ся вспя́ть* отъ лица́ Госпо́дня, отъ лица́ Бо́га Іа́ковля,* прише́дша отъ раба́ прія́ти креще́ніе.* Яко да и мы́, и́дольскія измы́вшеся нечистоты́,* просвѣти́мся душа́ми Его́ ра́ди.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

Па́ки то́йже: [Дне́сь псало́мское проро́чество коне́цъ прія́ти спѣши́тъ:* мо́ре бо, — рече́, — ви́дѣ и побѣже́,* Іорда́нъ возврати́ся вспя́ть* отъ лица́ Госпо́дня, отъ лица́ Бо́га Іа́ковля,* прише́дша отъ раба́ прія́ти креще́ніе.* Яко да и мы́, и́дольскія измы́вшеся нечистоты́,* просвѣти́мся душа́ми Его́ ра́ди.]

Сла́ва, гла́съ 5:

Что́ возвраща́еши твоя́ во́ды, о Іорда́не?* Что́ воспяща́еши струи́,* и не прехо́диши е́же по естеству́ хожде́ніе?* Не мо́щно ми́ терпѣ́ти, — рече́, — Огня́, пояда́ющаго мя́.* Удивля́юся и ужаса́юся кра́йнему схожде́нію:* я́ко не обыко́хъ Чи́стаго измыва́ти,* ни навыко́хъ Безгрѣ́шнаго отира́ти,* но оскверне́нныя сосу́ды очища́ти,* те́рнія попаля́ти ми́ согрѣше́ній учи́тъ* Иже во мнѣ́ креща́емый Христо́съ.* Іоа́ннъ свидѣ́тельствуетъ ми́ гла́съ Сло́ва, вопія́:* се́ Агнецъ Бо́жій, взе́мляй грѣхи́ мíра.* Тому́, вѣ́рніи, возопіи́мъ:* явле́йся Бо́же въ на́ше спасе́ніе, сла́ва Тебѣ́.

И ны́нѣ, то́йже:

[Что́ возвраща́еши твоя́ во́ды, о Іорда́не?* Что́ воспяща́еши струи́,* и не прехо́диши е́же по естеству́ хожде́ніе?* Не мо́щно ми́ терпѣ́ти, — рече́, — Огня́, пояда́ющаго мя́.* Удивля́юся и ужаса́юся кра́йнему схожде́нію:* я́ко не обыко́хъ Чи́стаго измыва́ти,* ни навыко́хъ Безгрѣ́шнаго отира́ти,* но оскверне́нныя сосу́ды очища́ти,* те́рнія попаля́ти ми́ согрѣше́ній учи́тъ* Иже во мнѣ́ креща́емый Христо́съ.* Іоа́ннъ свидѣ́тельствуетъ ми́ гла́съ Сло́ва, вопія́:* се́ Агнецъ Бо́жій, взе́мляй грѣхи́ мíра.* Тому́, вѣ́рніи, возопіи́мъ:* явле́йся Бо́же въ на́ше спасе́ніе, сла́ва Тебѣ́.]

Та́же, проки́менъ, гла́съ 4: Въ мо́ри путіе́ Твои́,* и стези́ Твоя́ въ вода́хъ мно́гихъ. Сти́хъ: Гла́съ гро́ма Твоего́ въ колеси́, [освѣти́ша мо́лнія Твоя́ вселе́нную].

Та́же, паремíя: Проро́чества Иса́іина чте́ніе. [Глава́ 12.]

Та́ко глаго́летъ Госпо́дь: почерпи́те во́ду съ весе́ліемъ отъ исто́чниковъ спасе́нія. И рече́ши въ де́нь о́нъ: исповѣ́дайтеся Го́сподеви и призови́те и́мя Его́. Возвѣсти́те во язы́цехъ сла́ву Его́, помяни́те, я́ко вознесе́ся и́мя Его́. По́йте и́мя Госпо́дне, я́ко высо́кая сотвори́. Возвѣсти́те сія́ по все́й земли́, ра́дуйтеся и весели́теся, живу́щіи въ Сіо́нѣ, я́ко вознесе́ся Святы́й Изра́илевъ посредѣ́ его́.

Къ Ри́мляномъ посла́нія свята́го апо́стола Па́вла чте́ніе. [Зача́ло 91.]

Бра́тіе, ели́цы во Христа́ Іису́са крести́хомся, въ сме́рть Его́ крести́хомся. Спогребо́хомся у́бо Ему́ креще́ніемъ въ сме́рть: да я́коже воста́ Христо́съ отъ ме́ртвыхъ сла́вою Отчею, та́ко и мы́ во обновле́ніи жи́зни ходи́ти на́чнемъ. Аще бо сообра́зни бы́хомъ подо́бію сме́рти Его́, то и воскресе́нію бу́демъ. Сіе́ вѣ́дяще, я́ко ве́тхій на́шъ человѣ́къ съ Ни́мъ распя́тся, да упраздни́тся тѣ́ло грѣхо́вное, я́ко ктому́ не рабо́тати на́мъ грѣху́. Уме́рый бо, оправди́ся отъ грѣха́. Аще ли умро́хомъ со Христо́мъ, вѣ́руемъ, я́ко и жи́ви бу́демъ съ Ни́мъ: Вѣ́дяще, я́ко Христо́съ воста́ отъ ме́ртвыхъ, ктому́ уже́ не умира́етъ, сме́рть Ему́ ктому́ не облада́етъ. Еже бо у́мре, грѣху́ у́мре еди́ною, а е́же живе́тъ, Бо́гови живе́тъ. Та́кожде и вы́ помышля́йте себе́: ме́ртвымъ у́бо бы́ти грѣху́, живы́мъ же Бо́гови, о Христе́ Іису́сѣ, Го́сподѣ на́шемъ.

Діа́конъ: Прему́дрость, про́сти, услы́шимъ свята́го Ева́нгелія.
Іере́й: Отъ Ма́рка свята́го Ева́нгелія чте́ніе. [Зач. 2.]

Во вре́мя о́но пріи́де Іису́съ отъ Назаре́та Галиле́йскаго и крести́ся отъ Іоа́нна во Іорда́нѣ. И а́біе восходя́ отъ воды́, ви́дѣ разводя́щася небеса́ и Ду́хъ, я́ко го́лубь, сходя́щь На́нь. И гла́съ бы́сть съ небесе́: Ты́ еси́ Сы́нъ Мо́й возлю́бленный, о Не́мже благоволи́хъ. И а́біе Ду́хъ изведе́ Его́ въ пусты́ню. И бѣ́ ту́ въ пусты́ни дне́й четы́редесять, искуша́емь сатано́ю, и бѣ́ со звѣрьми́, и а́нгели служа́ху Ему́. По преда́ніи же Іоа́нновѣ, пріи́де Іису́съ въ Галиле́ю, проповѣ́дая Ева́нгеліе Ца́рствія Бо́жія и глаго́ля: я́ко испо́лнися вре́мя и прибли́жися Ца́рствіе Бо́жіе. Пока́йтеся и вѣ́руйте во Ева́нгеліе.

Та́же:

Ско́ро да предваря́тъ ны́ щедро́ты Твоя́, Го́споди, я́ко обнища́хомъ зѣло́; помози́ на́мъ, Бо́же, Спа́се на́шъ, сла́вы ра́ди и́мене Твоего́, Го́споди, изба́ви на́съ и очи́сти грѣхи́ на́ша, имене ра́ди Твоего́.

Трисвято́е, и по Отче на́шъ... Свяще́нникъ: Яко Твое́ е́сть Ца́рство... Конда́къ, гла́съ 4:

Во струя́хъ дне́сь Іорда́нскихъ бы́въ, Госпо́дь* Іоа́нну вопіе́тъ:* не убо́йся крести́ти Мя́,* спасти́ бо пріидо́хъ* Ада́ма первозда́ннаго.

Го́споди поми́луй, [40.]

Иже на вся́кое вре́мя, [и на вся́кій ча́съ, на небеси́ и на земли́, покланя́емый и сла́вимый Христе́ Бо́же, долготерпѣли́ве, многоми́лостиве, многоблагоутро́бне, И́же пра́ведныя любя́й, и грѣ́шныя ми́луяй, И́же вся́ зовы́й ко спасе́нію обѣща́нія ра́ди бу́дущихъ бла́гъ. Са́мъ Го́споди, пріими́ и на́ша въ ча́съ се́й моли́твы и испра́ви живо́тъ на́шъ къ за́повѣдемъ Твои́мъ, ду́ши на́ша освяти́, тѣлеса́ очи́сти, помышле́нія испра́ви, мы́сли очи́сти, и изба́ви на́съ отъ вся́кія ско́рби, зо́лъ и болѣ́зней; огради́ на́съ святы́ми Твои́ми А́нгелы, да ополче́ніемъ и́хъ соблюда́еми и наставля́еми, дости́гнемъ въ соедине́ніе вѣ́ры, и въ ра́зумъ непристу́пныя Твоея́ сла́вы, я́ко благослове́нъ еси́ во вѣ́ки вѣко́въ, ами́нь].

Го́споди поми́луй. [Три́жды.] Сла́ва, и ны́нѣ.

Честнѣ́йшую херуви́мъ, [и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу Тя́ велича́емъ].

Именемъ Госпо́днимъ благослови́, о́тче.

Іере́й: Моли́твами святы́хъ оте́цъ на́шихъ, [Го́споди Іису́се Христе́, Бо́же на́шъ, поми́луй на́съ, ами́нь].

И моли́тва:

Бо́же и Го́споди си́лъ и всея́ тва́ри Содѣ́телю, Иже за милосе́рдіе безприкла́дныя ми́лости Твоея́ Единоро́днаго Сы́на Твоего́, Го́спода на́шего Іису́са Христа́, низпосла́вый на спасе́ніе ро́да на́шего, и честны́мъ Его́ Кресто́мъ рукописа́ніе грѣ́хъ на́шихъ растерза́вый, и побѣди́вый тѣ́мъ нача́ла и вла́сти тмы́. Са́мъ, Влады́ко Человѣколю́бче, пріими́ и на́съ, грѣ́шныхъ, благода́рственныя сія́ и моле́бныя моли́твы и изба́ви насъ отъ вся́каго всегуби́тельнаго и мра́чнаго прегрѣше́нія и всѣ́хъ озло́бити на́съ и́щущихъ ви́димыхъ и неви́димыхъ врагъ. Пригвозди́ стра́ху Твоему́ пло́ти на́ша и не уклони́ серде́цъ на́шихъ въ словеса́ или́ помышле́нія лука́вствія, но любо́вію Твое́ю уязви́ ду́ши на́ша, да, къ Тебѣ́ всегда́ взира́юще и е́же отъ Тебе́ свѣ́томъ наставля́еми, Тебе́, непристу́пнаго и присносу́щнаго зря́ще Свѣ́та, непреста́нное Тебѣ́ исповѣ́даніе и благодаре́ніе возсыла́емъ, Безнача́льному Отцу́, со Единоро́днымъ Твои́мъ Сы́номъ, и Всесвяты́мъ, и Благи́мъ, и Животворя́щимъ Твои́мъ Ду́хомъ ны́нѣ, и при́сно, и во вѣ́ки вѣко́въ, ами́нь.


Ча́съ девя́тый.
Пріиди́те, поклони́мся... [Три́жды.] И псало́мъ 92:

Госпо́дь воцари́ся, въ лѣ́поту облече́ся, облече́ся Госпо́дь въ си́лу и препоя́сася, и́бо утверди́ вселе́нную, я́же не подви́жится. Гото́въ престо́лъ Тво́й отто́лѣ, отъ вѣ́ка Ты́ еси́. Воздвиго́ша рѣ́ки, Го́споди, воздвиго́ша рѣ́ки гла́сы своя́. Во́змутъ рѣ́ки сотре́нія своя́ отъ гласо́въ во́дъ мно́гихъ. Ди́вны высоты́ морскíя, ди́венъ въ высо́кихъ Госпо́дь. Свидѣ́нія Твоя́ увѣ́ришася зѣло́: до́му Твоему́ подоба́етъ святы́ня, Го́споди, въ долготу́ днíй.

Псало́мъ 113:

Во исхо́дѣ Изра́илевѣ отъ Еги́пта, до́му Іа́ковля, изъ люде́й ва́рваръ, бы́сть Іуде́я святы́ня Его́, Изра́иль о́бласть Его́. Мо́ре ви́дѣ и побѣже́, Іорда́нъ возврати́ся вспя́ть. Го́ры взыгра́шася, я́ко овни́, и хо́лми, я́ко а́гнцы о́вчіи. Что́ ти́ е́сть, мо́ре, я́ко побѣ́гло еси́, и тебѣ́, Іорда́не, я́ко возврати́лся еси́ вспя́ть? Го́ры, я́ко взыгра́стеся, я́ко овни́, и хо́лми, я́ко а́гнцы о́вчіи? Отъ лица́ Госпо́дня подви́жеся земля́, отъ лица́ Бо́га Іа́ковля, обра́щшаго ка́мень во езе́ра водна́я, и несѣко́мый во исто́чники водны́я. Не на́мъ, Го́споди, не на́мъ, но и́мени Твоему́ даждь сла́ву, о ми́лости Твое́й и и́стинѣ Твое́й, да не когда́ реку́тъ язы́цы: гдѣ́ е́сть Бо́гъ и́хъ? Бо́гъ же на́шъ на небеси́ и на земли́, вся́, ели́ка восхотѣ́, сотвори́. Идоли язы́къ сребро́ и зла́то, дѣла́ ру́къ человѣ́ческихъ: уста́ и́мутъ, и не возглаго́лютъ, о́чи и́мутъ, и не у́зрятъ, у́ши и́мутъ, и не услы́шатъ, но́здри и́мутъ, и не обоня́ютъ, ру́цѣ и́мутъ, и не ося́жутъ, но́зѣ и́мутъ, и не по́йдутъ, не возглася́тъ горта́немъ свои́мъ. Подо́бни и́мъ да бу́дутъ творя́щіи я́ и вси́, надѣ́ющіися на ня́. До́мъ Изра́илевъ упова́ на Го́спода, Помо́щникъ и Защи́титель и́мъ е́сть. До́мъ Ааро́нь упова́ на Го́спода, Помо́щникъ и Защи́титель и́мъ е́сть. Боя́щіися Го́спода упова́ша на Го́спода, Помо́щникъ и Защи́титель и́мъ е́сть. Госпо́дь, помяну́въ ны́, благослови́лъ е́сть на́съ, благослови́лъ е́сть до́мъ Изра́илевъ, благослови́лъ е́сть до́мъ Ааро́нь. Благослови́лъ е́сть боя́щіяся Го́спода, ма́лыя съ вели́кими. Да приложи́тъ Госпо́дь на вы́, на вы́ и на сы́ны ва́ша. Благослове́ни вы Го́сподеви, Сотво́ршему не́бо и зе́млю. Не́бо небесе́ Го́сподеви, зе́млю же даде́ сыново́мъ человѣ́ческимъ. Не ме́ртвіи восхва́лятъ Тя́, Го́споди, ниже́ вси́, низходя́щіи во а́дъ: Но мы́, живíи, благослови́мъ Го́спода отъ ны́нѣ и до вѣ́ка.

Псало́мъ 85:

Приклони́, Го́споди, у́хо Твое́ и услы́ши мя́, я́ко ни́щъ и убо́гъ е́смь а́зъ. Сохрани́ ду́шу мою́, я́ко преподо́бенъ е́смь; спаси́ раба́ Твоего́, Бо́же мой, упова́ющаго на Тя́. Поми́луй мя́, Го́споди, я́ко къ Тебѣ́ воззову́ ве́сь де́нь. Возвесели́ ду́шу раба́ Твоего́, я́ко къ Тебѣ́ взя́хъ ду́шу мою́. Яко Ты́, Го́споди, бла́гъ, и кро́токъ, и многоми́лостивъ всѣ́мъ, призыва́ющимъ Тя́. Внуши́, Го́споди, моли́тву мою́ и вонми́ гла́су моле́нія моего́. Въ де́нь ско́рби моея́ воззва́хъ къ Тебѣ́, я́ко услы́шалъ мя́ еси́. Нѣ́сть подо́бенъ Тебѣ́ въ бозѣ́хъ, Го́споди, и нѣ́сть по дѣло́мъ Твои́мъ. Вси́ язы́цы, ели́ки сотвори́лъ еси́, пріи́дутъ, и покло́нятся предъ Тобо́ю, Го́споди, и просла́вятъ и́мя Твое́, я́ко ве́лій еси́ Ты́ и творя́й чудеса́, Ты́ еси́ Бо́гъ еди́нъ. Наста́ви мя́, Го́споди, на пу́ть Тво́й, и пойду́ во и́стинѣ Твое́й: да возвесели́тся се́рдце мое́ боя́тися и́мене Твоего́. Исповѣ́мся Тебѣ́, Го́споди Бо́же мо́й, всѣ́мъ се́рдцемъ мои́мъ и просла́влю и́мя Твое́ въ вѣ́къ. Яко ми́лость Твоя́ ве́лія на мнѣ́, и изба́вилъ еси́ ду́шу мою́ отъ а́да преиспо́днѣйшаго. Бо́же, законопресту́пницы воста́ша на мя́, и со́нмъ держа́вныхъ взыска́ша ду́шу мою́ и не предложи́ша Тебе́ предъ собо́ю. И Ты́, Го́споди Бо́же мо́й, ще́дрый и ми́лостивый, долготерпѣли́вый, и многоми́лостивый, и и́стинный, при́зри на мя́ и поми́луй мя́, да́ждь держа́ву Твою́ о́троку Твоему́ и спаси́ сы́на рабы́ Твоея́. Сотвори́ со мно́ю зна́меніе во бла́го, и да ви́дятъ ненави́дящіи мя́ и постыдя́тся, я́ко Ты́, Го́споди, помо́глъ ми́ и утѣ́шилъ мя́ еси́.

Сла́ва, и ны́нѣ. Аллилу́ія, аллилу́ія, аллилу́ія, сла́ва Тебѣ́, Бо́же. [Три́жды.] Господи помилуй. [Три́жды.]
Сла́ва, тропа́рь, гла́съ 4:

Возвраща́шеся иногда́ Іорда́нъ рѣка́ ми́лотію Елиссе́евою,* возне́сшуся Иліи́,* и раздѣля́хуся во́ды сю́ду и сю́ду,* и бы́сть ему́ су́хъ пу́ть, и́же мо́крый,* во о́бразъ вои́стинну креще́нія,* и́мже мы́ теку́щее житія́ прехо́димъ ше́ствіе:* Христо́съ яви́ся во Іорда́нѣ освяти́ти во́ды.

И ны́нѣ, богоро́диченъ:

Иже на́съ ра́ди рожде́йся отъ Дѣ́вы и распя́тіе претерпѣ́въ, Благíй, испрове́ргій сме́ртію сме́рть и воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю. Яви́ человѣколю́біе Твое́, Ми́лостиве. Пріими́ ро́ждшую Тя́ Богоро́дицу, моля́щуюся за ны́. И спаси́, Спа́се на́шъ, лю́ди отча́янныя.

Та́же, тропа́рь, гла́съ 7:

Ужасъ бѣ́ ви́дѣти* небесе́ и земли́ Творца́, на рѣцѣ́ обна́жшагося* и креще́ніе отъ раба́* за на́ше спасе́ніе пріе́млющаго, я́ко раба́.* И ли́цы ангельстіи дивля́хуся стра́хомъ и ра́достію,* съ ни́миже покланя́емся Тебѣ́:* спаси́ на́съ, Го́споди. [Два́жды.]

Та́же сти́хъ, гла́съ 2: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Егда́ къ себѣ́ гряду́ща* Предте́ча Го́спода сла́вы вопія́ше зря́:* Се́й, избавля́яй мíра, пріи́де отъ истлѣ́нія,* Се́й избавля́етъ на́съ отъ ско́рби,* Се́й согрѣше́ній оставле́ніе да́руетъ, я́ко Бо́гъ на земли́,* отъ Дѣ́вы Чи́стыя пріи́де ми́лости ра́ди* и вмѣ́сто рабо́въ сы́ны Бо́жія содѣ́ловаетъ,* вмѣ́сто же тмы́ просвѣща́етъ человѣ́чество* водо́ю Боже́ственнаго креще́нія Его́.* Про́чее, пріиди́те, согла́сно Того́ да славосло́вимъ* со Отце́мъ и со Святы́мъ Ду́хомъ.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

И па́ки, то́йже тропа́рь: [Егда́ къ себѣ́ гряду́ща* Предте́ча Го́спода сла́вы вопія́ше зря́:* Се́й, избавля́яй мíра, пріи́де отъ истлѣ́нія,* Се́й избавля́етъ на́съ отъ ско́рби,* Се́й согрѣше́ній оставле́ніе да́руетъ, я́ко Бо́гъ на земли́,* отъ Дѣ́вы Чи́стыя пріи́де ми́лости ра́ди* и вмѣ́сто рабо́въ сы́ны Бо́жія содѣ́ловаетъ,* вмѣ́сто же тмы́ просвѣща́етъ человѣ́чество* водо́ю Боже́ственнаго креще́нія Его́.* Про́чее, пріиди́те, согла́сно Того́ да славосло́вимъ* со Отце́мъ и со Святы́мъ Ду́хомъ.]

Та́же канона́рхъ, ста́въ среди́ це́ркве, прочита́етъ стихи́ру сію́, гла́съ 5:

Ру́ку твою́, прикосну́вшуюся пречи́стому верху́ Влады́чню,* съ не́юже и пе́рстомъ Того́ на́мъ показа́лъ еси́,* воздѣжи́ о на́съ къ Нему́, Крести́телю,* я́ко дерзнове́ніе имѣ́я мно́го,* и́бо бо́лій проро́къ всѣ́хъ,* отъ Него́ свидѣ́тельствованъ еси́.* Очи же твои́ па́ки,* Всесвята́го Ду́ха ви́дѣвшія,* я́ко въ ви́дѣ голуби́нѣ соше́дша,* воздви́гни къ Нему́, Крести́телю,* и ми́лостива на́мъ содѣ́лай,* и пріиди́, ста́ни съ на́ми,* запеча́таяй пѣ́ніе и предначина́яй торжество́.

И твори́мъ три́ покло́ны.

Пото́мъ чте́тъ діа́конъ та́кожде велегла́сно сіе́:

Благовѣ́рному, и Благочести́вому, и Христолюби́вому, Самодержа́внѣйшему, Вели́кому Госуда́рю на́шему, Бо́гомъ Вѣнча́нному и Превознесе́нному [и́мярекъ], Импера́тору и Самоде́ржцу Всероссíйскому, Его́ Цеса́рскому Вели́честву, Моско́вскому, Кíевскому, Влади́мірскому, Новгоро́дскому, Царю́ Каза́нскому, Царю́ Астраха́нскому, Царю́ По́льскому, Царю́ Сиби́рскому, Царю́ Херсо́ниса Таври́ческаго, Царю́ Грузи́нскому, Госуда́рю Пско́вскому, и Вели́кому Кня́зю Смоле́нскому, Лито́вскому, Волы́нскому, Подо́льскому и Финля́ндскому, Кня́зю Естля́ндскому, Лифля́ндскому, Курля́ндскому и Семига́льскому, Самоги́цкому, Бѣлосто́кскому, Коре́льскому, Тверско́му, Югорскому, Пе́рмскому, Вя́тскому, Бо́лгарскому, и ины́хъ. Госуда́рю и Вели́кому Кня́зю Новаго́рода Ни́зовскія земли́, Черни́говскому, Ряза́нскому, По́лоцкому, Росто́вскому, Яросла́вскому, Бѣлоезе́рскому, Удо́рскому, Обдо́рскому, Кондíйскому, Вите́бскому, Мстисла́вскому и всея́ Сѣ́верныя страны́ Повѣли́телю, и Госуда́рю Иверскія, Картали́нскія, и Кабарди́нскія земли́ и о́бласти Арме́нскія, Черка́сскихъ и Го́рскихъ князе́й, и ины́хъ Наслѣ́дному Госуда́рю и Облада́телю. Госуда́рю Туркеста́нскому, Наслѣ́днику Норве́жскому, Ге́рцогу Шлезви́гъ-Голсти́нскому, Сторма́рнскому, Дитмарсе́нскому и Олденбу́ргскому, пода́ждь, Го́споди, благоде́нственное и ми́рное житіе́, здра́віе же и спасе́ніе, и во все́мъ благо́е поспѣше́ніе, на враги́ же побѣ́ду и одолѣ́ніе, и сохрани́ Его́ на мно́гая лѣ́та.

И пою́тъ на о́ба ли́ка по три́жды: На мно́га лѣ́та.

Супру́гѣ Его́, Благовѣ́рной и Благочести́вой, Вѣнча́нной и Превознесе́нной Госуда́рынѣ Императри́цѣ [и́мярекъ], мно́га лѣ́та.

На о́ба ли́ка по три́жды: На мно́га лѣ́та.

Ма́тери Его́, Благовѣ́рной и Благочести́вой, Вѣнча́нной и Превознесе́нной Госуда́рынѣ Императри́цѣ [и́мярекъ], мно́га лѣ́та.

На о́ба ли́ка по три́жды: На мно́га лѣ́та.

Наслѣ́днику Его́, Благовѣ́рному Госуда́рю, Цесаре́вичу и Вели́кому Кня́зю [и́мярекъ], и всему́ Ца́рствующему До́му, мно́га лѣ́та.

На о́ба ли́ка по три́жды: На мно́га лѣ́та.

Святѣ́йшему Прави́тельствующему Всероссíйскому Сѵно́ду, мно́га лѣ́та.

И пе́рвый ли́къ пое́тъ: Мно́га лѣ́та. [Три́жды.]

Аще въ вели́кихъ собо́рныхъ це́рквахъ: Святѣ́йшимъ Патріа́рхомъ правосла́внымъ: Константинопо́льскому, Александрíйскому, Антіохíйскому и Іерусали́мскому, мно́га лѣ́та.]

И вторы́й ли́къ пое́тъ: Мно́га лѣ́та. [Три́жды.]
Та́кожде и на про́чихъ. Сіе́ же повсю́ду:

Преосвяще́ннымъ Митрополи́томъ, Архіепи́скопомъ и Епи́скопомъ и всему́ освяще́нному при́чту, мно́га лѣ́та.

Благовѣ́рнымъ: Прави́тельствующему Сѵнкли́ту, и военача́льникомъ, градонача́льникомъ, и всему́ христолюби́вому во́инству, и всѣ́мъ правосла́внымъ христіа́номъ, пода́ждь, Го́споди, тишину́, и благоде́нствіе, и изоби́ліе плодо́въ земны́хъ и мно́га лѣ́та.

Аще ли въ монастырѣ́:

Спаси́, Христе́ Бо́же, преподо́бнаго отца́ на́шего игу́мена [или́ архимандри́та] [и́мярекъ], е́же о Христѣ́ съ бра́тіею, и святу́ю оби́тель сію́ въ ми́рѣ сохрани́, и хра́мъ се́й святы́й утверди́ во вѣ́ки вѣко́въ, ами́нь.

И пою́тъ три́жды: Спаси́, Христе́ Бо́же...

[Зри́:] Вѣ́домо же бу́ди, я́ко сіе́ многолѣ́тное поздравле́ніе въ собо́рныхъ це́рквахъ при архіере́ехъ и и́ндѣ, гдѣ́ прили́чно, твори́тся въ на́вечеріи по отпу́стѣ святы́я литургíи, или́ по вече́рни, егда́ быва́етъ на́вечеріе въ суббо́ту и недѣ́лю; во оби́телехъ же во всѣ́хъ ти́пикахъ чи́нъ положе́нъ сему́ быва́ти на часѣ́хъ въ се́мъ мѣ́стѣ.

Та́же о́ба ли́ка вку́пѣ пою́тъ предрече́нную стихи́ру.
Сла́ва, и ны́нѣ, гла́съ 5:

Ру́ку твою́, прикосну́вшуюся пречи́стому верху́ Влады́чню,* съ не́юже и пе́рстомъ Того́ на́мъ показа́лъ еси́,* воздѣжи́ о на́съ къ Нему́, Крести́телю,* я́ко дерзнове́ніе имѣ́я мно́го,* и́бо бо́лій проро́къ всѣ́хъ,* отъ Него́ свидѣ́тельствованъ еси́.* Очи же твои́ па́ки,* Всесвята́го Ду́ха ви́дѣвшія,* я́ко въ ви́дѣ голуби́нѣ соше́дша,* воздви́гни къ Нему́, Крести́телю,* и ми́лостива на́мъ содѣ́лай,* и пріиди́, ста́ни съ на́ми,* запеча́таяй пѣ́ніе и предначина́яй торжество́.

На девя́томъ часѣ́ кади́тъ діа́конъ ве́сь хра́мъ.

Та́же проки́менъ, гла́съ 3: Госпо́дь просвѣще́ніе мое́ и Спаси́тель мо́й,* кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся?

Посе́мъ паремíя: Проро́чества Иса́іина чте́ніе. [Глава́ 49.]

Та́ко глаго́летъ Госпо́дь: во вре́мя прія́тное послу́шахъ тя́ и въ де́нь спасе́нія помого́хъ тебѣ́. И созда́хъ тя́ и да́хъ тя́ въ завѣ́тъ язы́ковъ, е́же устро́ити зе́млю и наслѣ́дити наслѣ́діе пусты́ни. Глаго́люща су́щимъ во у́захъ: изыди́те! И су́щимъ во тмѣ́: откры́йтеся! На всѣ́хъ путе́хъ пасти́ся бу́дутъ, и на всѣ́хъ стезя́хъ па́жить и́хъ. Не вза́лчутъ, ниже́ вжа́ждутъ, ниже́ порази́тъ и́хъ зно́й, ниже́ со́лнце, но Ми́луяй и́хъ утѣ́шитъ я́ и сквозѣ́ исто́чники во́дъ проведе́тъ я́. И положу́ вся́кую го́ру въ пу́ть и вся́кую стезю́ въ па́ству и́хъ. Се́ сíи издале́ча пріи́дутъ, сíи отъ сѣ́вера и мо́ря, инíи же отъ земли́ Пе́рсскія. Да веселя́тся небеса́, и ра́дуется земля́, да отры́гнутъ го́ры весе́ліе и хо́лми пра́вду, я́ко поми́лова Бо́гъ лю́ди Своя́ и смире́нныя люде́й утѣ́ши. Рече́ же Сіо́нъ: оста́ви мя́ Госпо́дь, и Бо́гъ забы́ мя. Еда́ забу́детъ жена́ отроча́ свое́? Или́ не поми́луетъ изча́дія чре́ва своего́? Аще ли же и си́хъ забу́детъ жена́, но Азъ не забу́ду тебе́, — глаго́летъ Госпо́дь.

Къ Ти́ту посла́нія свята́го апо́стола Па́вла чте́ніе. [Зача́ло 302.]

Ча́до Ти́те, яви́ся благода́ть Бо́жія спаси́тельная всѣ́мъ человѣ́комъ, наказу́ющи на́съ, да отве́ргшеся нече́стія и мірски́хъ похоте́й, цѣлому́дренно, и пра́ведно, и благоче́стно поживе́мъ въ ны́нѣшнемъ вѣ́цѣ, жду́ще блаже́ннаго упова́нія и явле́нія сла́вы Вели́каго Бо́га и Спа́са на́шего Іису́са Христа́. Иже да́лъ е́сть Себе́ за ны́, да изба́витъ ны́ отъ вся́каго беззако́нія и очи́ститъ Себѣ́ лю́ди избра́нны, ревни́тели до́брымъ дѣло́мъ. Егда́ же благода́ть и человѣколю́біе яви́ся Спа́са на́шего Бо́га, не отъ дѣ́лъ пра́ведныхъ, и́хже сотвори́хомъ мы́, но по Свое́й Его́ ми́лости, спасе́ на́съ ба́нею пакибытія́ и обновле́ніемъ Ду́ха Свята́го, Его́же излія́ на на́съ оби́льно Іису́съ Христо́мъ, Спаси́телемъ на́шимъ, да оправди́вшеся благода́тію Его́, наслѣ́дницы бу́демъ по упова́нію жи́зни вѣ́чныя.

Діа́конъ: Прему́дрость, про́сти, услы́шимъ свята́го Ева́нгелія.
Іере́й: Отъ Матѳе́я свята́го Ева́нгелія чте́ніе. [Зач. 6.]

Во вре́мя о́но пріи́де Іису́съ отъ Галиле́и на Іорда́нъ ко Іоа́нну крести́тися отъ него́. Іоа́ннъ же возбраня́ше Ему́, глаго́ля: а́зъ тре́бую Тобо́ю крести́тися, и Ты́ ли гряде́ши ко мнѣ́? Отвѣща́въ же, Іису́съ рече́ къ нему́: оста́ви ны́нѣ, та́ко бо подо́бно е́сть на́мъ испо́лнити вся́ку пра́вду. Тогда́ оста́ви Его́. И, крести́вся, Іису́съ взы́де а́біе отъ воды́, и се́ отверзо́шася Ему́ небеса́, и ви́дѣ Ду́ха Бо́жія, сходя́ща, я́ко го́лубя, и гряду́ща на Него́. И се́ гла́съ съ небесе́, глаго́ля: Се́й е́сть Сы́нъ Мо́й возлю́бленный, о Не́мже благоволи́хъ.

Та́же:

Не преда́ждь на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ, Авраа́ма ра́ди, возлю́бленнаго отъ Тебе́, и за Исаа́ка, раба́ Твоего́, и Изра́иля, свята́го Твоего́.

Та́же: Трисвято́е, и по Отче на́шъ... Конда́къ, гла́съ 4:

Во струя́хъ дне́сь Іорда́нскихъ бы́въ, Госпо́дь* Іоа́нну вопіе́тъ:* не убо́йся крести́ти Мя́,* спасти́ бо пріидо́хъ* Ада́ма первозда́ннаго.

Го́споди поми́луй, [40.] И моли́тва:

Иже на вся́кое вре́мя, [и на вся́кій ча́съ, на Небеси́ и на земли́, покланя́емый и сла́вимый Христе́ Бо́же, долготерпѣли́ве, многоми́лостиве, многоблагоутро́бне, И́же пра́ведныя любя́й, и грѣ́шныя ми́луяй, И́же вся́ зовы́й ко спасе́нію обѣща́нія ра́ди бу́дущихъ бла́гъ. Са́мъ Го́споди, пріими́ и на́ша въ ча́съ се́й моли́твы и испра́ви живо́тъ на́шъ къ за́повѣдемъ Твои́мъ, ду́ши на́ша освяти́, тѣлеса́ очи́сти, помышле́нія испра́ви, мы́сли очи́сти, и изба́ви на́съ отъ вся́кія ско́рби, зо́лъ и болѣ́зней; огради́ на́съ святы́ми Твои́ми А́нгелы, да ополче́ніемъ и́хъ соблюда́еми и наставля́еми, дости́гнемъ въ соедине́ніе вѣ́ры, и въ ра́зумъ непристу́пныя Твоея́ сла́вы, я́ко благослове́нъ еси́ во вѣ́ки вѣко́въ, ами́нь].

Го́споди поми́луй. [Три́жды.] Сла́ва, и ны́нѣ.

Честнѣ́йшую херуви́мъ, [и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу Тя́ велича́емъ].

Именемъ Госпо́днимъ благослови́, о́тче.

Іере́й: Моли́твами святы́хъ оте́цъ на́шихъ, [Го́споди Іису́се Христе́, Бо́же на́шъ, поми́луй на́съ, ами́нь].

Та́же моли́тва вели́каго Васи́лія:

Влады́ко Го́споди, Іису́се Христе́, Бо́же на́шъ, долготерпѣ́вый о на́шихъ согрѣше́ніихъ и да́же до ны́нѣшняго часа́ приведы́й на́съ, въ о́ньже, на Животворя́щемъ Дре́вѣ ви́ся, благоразу́мному разбо́йнику и́же въ ра́й путесотвори́лъ еси́ вхо́дъ и сме́ртію сме́рть разруши́лъ еси́. Очи́сти на́съ, грѣ́шныхъ и недосто́йныхъ ра́бъ Твои́хъ, согрѣши́хомъ бо и беззако́нновахомъ и нѣ́смы досто́йни возвести́ очеса́ на́ша и воззрѣ́ти на высоту́ небе́сную, зане́ оста́вихомъ пу́ть пра́вды Твоея́ и ходи́хомъ въ во́ляхъ серде́цъ на́шихъ. Но мо́лимъ Твою́ безмѣ́рную бла́гость: пощади́ на́съ, Го́споди, по мно́жеству ми́лости Твоея́, и спаси́ на́съ и́мене Твоего́ ра́ди свята́го, я́ко исчезо́ша въ суетѣ́ днíе на́ши, изми́ на́съ изъ руки́ сопроти́внаго, и оста́ви на́мъ грѣхи́ на́ша, и умертви́ плотско́е на́ше мудрова́ніе, да, ве́тхаго отложи́вше человѣ́ка, въ но́ваго облеце́мся и Тебѣ́ поживе́мъ, на́шему Влады́цѣ и Благодѣ́телю. И та́ко, Твои́мъ послѣ́дующе повелѣ́ніемъ, въ вѣ́чный поко́й дости́гнемъ, идѣ́же е́сть всѣ́хъ веселя́щихся жили́ще. Ты́ бо еси́ вои́стинну и́стинное весе́ліе и ра́дость лю́бящихъ Тя́, Христе́ Бо́же на́шъ, и Тебѣ́ сла́ву возсыла́емъ, со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ, ами́нь.


[Изобрази́тельны.]

Псало́мъ 102:

Благослови́, душе́ моя́, Го́спода, и вся́ вну́тренняя моя́ и́мя свято́е Его́. Благослови́, душе́ моя́, Го́спода и не забыва́й всѣ́хъ воздая́ній Его́. Очища́ющаго вся́ беззако́нія твоя́, исцѣля́ющаго вся́ неду́ги твоя́. Избавля́ющаго отъ истлѣ́нія живо́тъ тво́й, вѣнча́ющаго тя́ ми́лостію и щедро́тами. Исполня́ющаго во благи́хъ жела́ніе твое́, обнови́тся, я́ко о́рля, ю́ность твоя́. Творя́й ми́лостыни Госпо́дь и судьбу́ всѣ́мъ обиди́мымъ. Сказа́ пути́ Своя́ Моисе́ови, сыново́мъ Изра́илевымъ хотѣ́нія Своя́. Щедръ и ми́лостивъ Госпо́дь, долготерпѣли́въ и многоми́лостивъ. Не до конца́ прогнѣ́вается, ниже́ въ вѣ́къ вражду́етъ. Не по беззако́ніемъ на́шимъ сотвори́лъ е́сть на́мъ, ниже́ по грѣхо́мъ на́шимъ возда́лъ е́сть на́мъ. Яко по высотѣ́ небе́снѣй отъ земли́, утверди́лъ е́сть Госпо́дь ми́лость Свою́ на боя́щихся Его́. Ели́ко отстоя́тъ восто́цы отъ за́падъ, уда́лилъ е́сть отъ на́съ беззако́нія на́ша. Якоже ще́дритъ оте́цъ сы́ны, уще́дри Госпо́дь боя́щихся Его́. Яко То́й позна́ созда́ніе на́ше, помяну́, я́ко пе́рсть, есмы́. Человѣ́къ, я́ко трава́, днíе его́, я́ко цвѣ́тъ се́льный, та́ко оцвѣте́тъ. Яко ду́хъ про́йде въ не́мъ, и не бу́детъ, и не позна́етъ ктому́ мѣ́ста своего́. Ми́лость же Госпо́дня отъ вѣ́ка и до вѣ́ка на боя́щихся Его́. И пра́вда Его́ на сынѣ́хъ сыно́въ, храня́щихъ завѣ́тъ Его́ и по́мнящихъ за́повѣди Его́ твори́ти я́. Госпо́дь на небеси́ угото́ва престо́лъ Свой, и Ца́рство Его́ всѣ́ми облада́етъ. Благослови́те Го́спода, вси а́нгели Его́, си́льніи крѣ́постію, творя́щіи сло́во Его́, услы́шати гла́съ слове́съ Его́. Благослови́те Го́спода, вся́ си́лы Его́, слуги́ Его́, творя́щіи во́лю Его́. Благослови́те Го́спода, вся́ дѣла́ Его́, на вся́комъ мѣ́стѣ Влады́чества Его́; благослови́, душе́ моя́, Го́спода.

Сла́ва Отцу́, и Сы́ну, и Свято́му Ду́ху. Псало́мъ 145:

Хвали́, душе́ моя́, Го́спода, восхвалю́ Го́спода въ животѣ́ мое́мъ. Пою́ Бо́гу моему́, до́ндеже е́смь. Не наде́йтеся на кня́зи, на сы́ны человѣ́ческія, въ ни́хже нѣ́сть спасе́нія. Изы́детъ ду́хъ его́ и возврати́тся въ зе́млю свою́, въ то́й де́нь поги́бнутъ вся́ помышле́нія Его́. Блаже́нъ, ему́же Бо́гъ Іа́ковль помо́щникъ его́, упова́ніе его́ на Го́спода Бо́га своего́, сотво́ршаго не́бо и зе́млю, мо́ре и вся́, я́же въ ни́хъ, храня́щаго и́стину въ вѣ́къ, творя́щаго су́дъ оби́димымъ, даю́щаго пи́щу а́лчущимъ. Госпо́дь рѣши́тъ окова́нныя, Госпо́дь умудря́етъ слѣпцы́, Госпо́дь возво́дитъ низве́рженныя, Госпо́дь лю́битъ пра́ведники, Госпо́дь храни́тъ прише́льцы, си́ра и вдову́ пріи́метъ и пу́ть грѣ́шныхъ погуби́тъ. Воцари́тся Госпо́дь во вѣ́къ, Бо́гъ Тво́й, Сіо́не, въ ро́дъ и ро́дъ.

И ны́нѣ, и при́сно, и во вѣ́ки вѣко́въ, ами́нь.

Единоро́дный Сы́не и Сло́ве Бо́жій, Безсме́ртенъ Сы́й и изво́ливый спасе́нія на́шего ра́ди воплоти́тися отъ Святы́я Богоро́дицы и Приснодѣ́вы Марíи, непрело́жно вочеловѣ́чивыйся, распны́йся же, Христе́ Бо́же, сме́ртію сме́рть попра́вый, Еди́нъ Сы́й Святы́я Тро́ицы, спрославля́емый Отцу́ и Свято́му Ду́ху, спаси́ на́съ.

Та́же:

Во Ца́рствіи Твое́мъ помяни́ на́съ, Го́споди, егда́ пріи́деши, во Ца́рствіи Твое́мъ.

Блаже́ни ни́щіи ду́хомъ, я́ко тѣ́хъ е́сть Ца́рство небе́сное.

Блаже́ни пла́чущіи, я́ко тíи утѣ́шатся.

Блаже́ни кро́тціи, я́ко тíи наслѣ́дятъ зе́млю.

Блаже́ни а́лчущіи и жа́ждущіи пра́вды, я́ко тíи насы́тятся.

Блаже́ни ми́лостивіи, я́ко тíи поми́ловани бу́дутъ.

Блаже́ни чи́стіи се́рдцемъ, я́ко тíи Бо́га у́зрятъ.

Блаже́ни миротво́рцы, я́ко тíи сы́нове Бо́жіи нареку́тся.

Блаже́ни изгна́ни пра́вды ра́ди, я́ко тѣ́хъ е́сть Ца́рство небе́сное.

Блаже́ни есте́, егда́ поно́сятъ ва́мъ, и изжену́тъ, и реку́тъ всякъ зо́лъ глаго́лъ на вы́, лжу́ще Мене́ ра́ди.

Ра́дуйтеся и весели́теся, я́ко мзда́ ва́ша мно́га на небесѣ́хъ.

Сла́ва, и ны́нѣ:

Помяни́ на́съ, Го́споди, егда́ пріи́деши, во Ца́рствіи Твое́мъ.

Помяни́ на́съ, Влады́ко, егда́ пріи́деши, во Ца́рствіи Твое́мъ.

Помяни́ на́съ, Святы́й, егда́ пріи́деши, во Ца́рствіи Твое́мъ.

Ли́къ небе́сный пое́тъ Тя́ и глаго́летъ: Свя́тъ, Свя́тъ, Свя́тъ Госпо́дь Савао́ѳъ, испо́лнь не́бо и земля́ сла́вы Твоея́.

Приступи́те къ Нему́ и просвѣти́теся, и ли́ца ва́ша не постыдя́тся.

Ли́къ небе́сный пое́тъ Тя́ и глаго́летъ: Свя́тъ, Свя́тъ, Свя́тъ Госпо́дь Савао́ѳъ, испо́лнь не́бо и земля́ сла́вы Твоея́.

Сла́ва:

Ли́къ святы́хъ а́нгелъ и арха́нгелъ со всѣ́ми небе́сными си́лами пое́тъ Тя́ и глаго́летъ: Свя́тъ, Свя́тъ, Свя́тъ Госпо́дь Савао́ѳъ, испо́лнь не́бо и земля́ сла́вы Твоея́.

И ны́нѣ:
Исповѣ́даніе Правосла́вныя вѣ́ры, Пе́рваго Собо́ра.
[Аще е́сть литургíя, здѣ́ не глаго́лемъ, но по И ны́нѣ, глаго́лемъ: Осла́би, оста́ви.., и про́чая.]

Вѣ́рую во еди́наго Бо́га Отца́, Вседержи́теля, Творца́ не́бу и земли́, ви́димымъ же всѣ́мъ и неви́димымъ. И во еди́наго Го́спода Іису́са Христа́, Сы́на Бо́жія, Единоро́днаго, И́же отъ Отца́ рожде́ннаго пре́жде всѣ́хъ вѣ́къ; Свѣ́та отъ Свѣ́та, Бо́га и́стинна отъ Бо́га и́стинна, рожде́нна, не сотворе́нна, единосу́щна Отцу́, И́мже вся́ бы́ша. На́съ ра́ди человѣ́къ и на́шего ра́ди спасе́нія сше́дшаго съ небе́съ и воплоти́вшагося отъ Ду́ха Свя́та и Марíи Дѣ́вы, и вочеловѣ́чшася. Распя́таго же за ны́ при Понтíйстѣмъ Пила́тѣ, и страда́вша, и погребе́на. И воскре́сшаго въ тре́тій де́нь по Писа́ніемъ. И возше́дшаго на небеса́, и сѣдя́ща одесну́ю Отца́. И па́ки гряду́щаго со сла́вою суди́ти живы́мъ и ме́ртвымъ, Его́же Ца́рствію не бу́детъ конца́.

Втора́го Собо́ра: И въ Ду́ха Свята́го, Го́спода, Животворя́щаго, И́же отъ Отца́ исходя́щаго, Иже со Отце́мъ и Сы́номъ спокланя́ема и ссла́вима, глаго́лавшаго проро́ки. Во еди́ну Святу́ю, Собо́рную и Апо́стольскую Це́рковь. Исповѣ́дую еди́но креще́ніе во оставле́ніе грѣхо́въ. Ча́ю воскресе́нія ме́ртвыхъ, и жи́зни бу́дущаго вѣ́ка, ами́нь.

Та́же моли́тва:

Осла́би, оста́ви, прости́, Бо́же, прегрѣше́нія на́ша, во́льная и нево́льная, я́же въ сло́вѣ и въ дѣ́лѣ, я́же въ вѣ́дѣніи и не въ вѣ́дѣніи, я́же во дни́ и въ нощи́, я́же во умѣ́ и въ помышле́ніи, вся́ на́мъ прости́, я́ко Бла́гъ и Человѣколю́бецъ. [Ами́нь.]

Посе́мъ: [Трисвято́е,] и по Отче на́шъ... Конда́къ, гла́съ 4:

Во струя́хъ дне́сь Іорда́нскихъ бы́въ, Госпо́дь* Іоа́нну вопіе́тъ:* не убо́йся крести́ти Мя́,* спасти́ бо пріидо́хъ* Ада́ма первозда́ннаго.

Го́споди поми́луй, [40.] И моли́тва:

Всесвята́я Тро́ице, Единосу́щная Держа́во, Нераздѣ́льное Ца́рство, всѣ́хъ благи́хъ Вина́: благоволи́ же и о мнѣ́, грѣ́шнемъ, утверди́, вразуми́ се́рдце мое́ и всю́ мою́ отыми́ скве́рну. Просвѣти́ мою́ мы́сль, да вы́ну сла́влю, пою́, и покланя́юся, и глаго́лю: Еди́нъ Свя́тъ, Еди́нъ Госпо́дь, Іису́съ Христо́съ во сла́ву Бо́га Отца́, ами́нь.

[Зри:] Аще е́сть литургíя, глаго́лемъ: Досто́йно е́сть... И отпу́стъ.
Аще же нѣ́сть литургíи, глаго́лемъ здѣ́:
Бу́ди и́мя Госпо́дне благослове́но отъ ны́не и до вѣ́ка. [Три́жды.]
Сла́ва, и ны́нѣ. Псало́мъ 33:

Благословлю́ Го́спода на вся́кое вре́мя, вы́ну хвала́ Его́ во устѣ́хъ мои́хъ. О Го́сподѣ похва́лится душа́ моя́, да услы́шатъ кро́тціи и возвеселя́тся. Возвели́чите Го́спода со мно́ю, и вознесе́мъ и́мя Его́ вку́пѣ. Взыска́хъ Го́спода, и услы́ша мя́ и отъ всѣ́хъ скорбе́й мои́хъ изба́ви мя́. Приступи́те къ Нему́ и просвѣти́теся, и ли́ца ва́ша не постыдя́тся. Се́й ни́щій воззва́, и Госпо́дь услы́ша и́, и отъ всѣ́хъ скорбе́й его́ спасе́ и́. Ополчи́тся а́нгелъ Госпо́день о́крестъ боя́щихся Его́ и изба́витъ и́хъ. Вкуси́те и ви́дите, я́ко бла́гъ Госпо́дь. Блаже́нъ му́жъ, и́же упова́етъ На́нь. Бо́йтеся Го́спода вси́ святíи Его́, я́ко нѣ́сть лише́нія боя́щимся Его́. Бога́тіи обнища́ша и взалка́ша, взыска́ющіи же Го́спода не лиша́тся вся́каго бла́га. Пріиди́те, ча́да, послу́шайте мене́, стра́ху Госпо́дню научу́ васъ. Кто́ е́сть человѣ́къ, хотя́й живо́тъ, любя́й дни́ ви́дѣти бла́ги? Удержи́ язы́къ тво́й отъ зла́ и устнѣ́ твои́, е́же не глаго́лати льсти́. Уклони́ся отъ зла́ и сотвори́ бла́го; взыщи́ ми́ра и пожени́ и́. Очи Госпо́дни на пра́ведныя и у́ши Его́ въ моли́тву и́хъ. Лице́ же Госпо́дне на творя́щія зла́я, е́же потреби́ти отъ земли́ па́мять и́хъ. Воззва́ша пра́ведніи, и Госпо́дь услы́ша и́хъ и отъ всѣ́хъ скорбе́й и́хъ изба́ви и́хъ. Близъ Госпо́дь сокруше́нныхъ се́рдцемъ, и смире́нныя ду́хомъ спасе́тъ. Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. Храни́тъ Госпо́дь вся́ ко́сти и́хъ, ни еди́на отъ ни́хъ сокруши́тся. Смерть грѣ́шниковъ люта́, и ненави́дящіи пра́веднаго прегрѣша́тъ. Изба́витъ Госпо́дь ду́ши ра́бъ Свои́хъ, и не прегрѣша́тъ вси́, упова́ющіи на Него́.

Досто́йно е́сть... И отпу́стъ.
И быва́етъ росхо́дъ до часа́ вече́рняго. Вече́рня же быва́етъ съ литургíею Васи́лія Вели́каго во свое́ вре́мя.



Вѣ́домо же бу́ди:

[Зри:] Аще случи́тся на́вечеріе Богоявле́нія въ суббо́ту или́ недѣ́лю, по́стъ не быва́етъ. И тропари́ ца́рскихъ часо́въ со чте́ніями въ суббо́ту и недѣ́лю не пою́тся, но пое́мъ часы́ ца́рскія пре́жде въ пято́къ, по обы́чаю, я́коже ука́зано на ряду́, глаго́лемъ же и псало́мъ 33-й: Благословлю́ Го́спода.., и отпу́стъ. И въ то́й де́нь яди́мъ сы́ръ и я́ица.

[Зри́:] Аще бу́детъ на́вечеріе въ суббо́ту: проки́менъ, аллилу́ія и прича́стенъ дне́. Апо́столъ же и Ева́нгеліе пре́жде суббо́тѣ предъ Богоявле́ніемъ и пото́мъ ря́дъ. По Изря́дно.., пое́мъ Досто́йно е́сть...

[Зри́:] Аще ли въ недѣ́лю на́вечеріе Богоявле́нія: проки́менъ, аллилу́ія и прича́стенъ пре́жде недѣ́ли предъ Богоявле́ніемъ и пото́мъ ря́дъ. По Изря́дно.., пое́мъ Досто́йно... По отпуще́ніи же литургíи яди́мъ укру́хи, и піе́мъ по еди́ной ча́ши вина́. Соверше́нно же яди́мъ по отпу́стѣ вече́рни со еле́емъ, сы́ра же, и яи́цъ, и ры́бъ ника́коже де́рзнемъ косну́тися.

Подоба́етъ вѣ́дати: Аще Просвѣще́ній де́нь случи́тся въ недѣ́лю, воскре́сно ничто́же пое́мъ, но все́ послѣ́дованіе пра́здника: ве́черъ, и у́тро, и на литургíи.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 57 об. – 74.

/ Къ оглавленію раздѣла /


Наверхъ / Къ титульной страницѣ

0