Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 5-й де́нь.
Предпра́зднство Просвѣще́нія, и святы́хъ му́ченикъ Ѳеопе́мпта и Ѳео́ны, и преподо́бныя Синклитикíи.

[ВЕЧЕРЪ,]
На Го́споди воззва́хъ: стихи́ры му́чениковъ 3, гла́съ 4. Подо́бенъ: Яко до́бля.

Ѳео́ну и Ѳеопе́мпта* му́дрыя воспои́мъ:* Христо́вымъ бо догма́томъ повину́ющеся,* служе́ніе вся́ко нечести́вое свѣ́тло упраздни́вше,* свя́тѣ, и че́стнѣ, и благонаде́жнѣ послужи́ша,* Еди́наго Бо́га и Го́спода* предъ лице́мъ мучи́телей* благодерзнове́нно исповѣ́дающе,* и вѣнча́еми свы́ше.

Житія́, до́лу влеку́щая,* и пи́щи наслажде́ніе,* и цвѣту́щую сла́ву, всехва́льніи,* оста́вивше я́ко привре́менну,* Христу́ прилѣпи́стеся,* Того́ добро́тою кра́сною распала́еми,* и принесо́стеся, я́ко сладково́нніи шипцы́,* и вѣнце́мъ нетлѣ́ннаго Ца́рствія* боголѣ́пно вѣнча́стеся.

Иже мíръ возненави́дѣвше,* премíрни яви́стеся,* въ Це́ркви перворо́дныхъ совокупи́стеся* и со а́нгелы поете́ пѣ́снь нетлѣ́нную,* предъ Бо́гомъ предстоя́ще вку́пѣ,* скве́рную и́дольскую* ле́сть отри́нувше,* мучи́телей безу́міе* му́ченически посрами́сте.

Ины стихи́ры преподо́бныя, гла́съ 1. Подо́бенъ: Небе́сныхъ чино́въ.

Сла́вы отце́въ вои́стинну возжела́вши,* сла́ву нетлѣ́нную возлюби́ла еси́,* тѣ́мже отсту́пльши сла́дкихъ,* тѣ́ло твое́ болѣ́знемъ всѣмъ отдала́ еси́.* И ны́нѣ болѣ́зней пріе́млеши возме́здіе* со Христо́мъ ца́рствующи.

Иже Іова попусти́въ испроси́вшему,* и тя́ искуси́ти хотя́, я́ко зла́то,* оста́ви тѣ́ло твое́ ну́ждею лука́ваго,* тѣ́мже ты́, посрами́вши терпѣ́ніемъ неду́говъ искуси́теля,* побѣ́ды вѣнце́мъ вѣнча́лася еси́.

Жениха́ кра́сную добро́ту возжела́вши, Христа́,* и уневѣ́ститися Сему́* ты́ восхотѣ́вши всѣ́ми ви́ды благи́хъ,* болѣ́зньми воздержа́нія тебе́ украси́ла еси́,* тѣ́мже ны́нѣ съ Ни́мъ ца́рствуеши,* въ черто́зѣ Его́.

Сла́ва, и ны́нѣ, гла́съ 6:

Гото́вися, Іорда́не реко́: се́ бо прихо́дитъ Христо́съ Богъ крести́тися отъ Іоа́нна, да зміе́въ неви́димыя главы́ сокруши́тъ Божество́мъ въ вода́хъ твои́хъ. Ра́дуйся, пусты́не Іорда́нская, го́ры, игра́йте съ весе́ліемъ: прихо́дитъ бо Вѣ́чный Живо́тъ воззва́ти Ада́ма. Гла́съ вопію́щаго, возопíй, о Іоа́нне Предте́че: угото́вайте пути́ Госпо́дни и стези́ Его́ пра́вы содѣ́лайте.

На стихо́внѣ стихи́ры, гла́съ 6. Подо́бенъ: Тридне́венъ.

Земля́ и назе́мная,* игра́йте и ра́дуйтеся,* Пото́къ сла́дости* въ рѣцѣ́ креща́ется,* излія́ніе изсуша́я зло́бы,* и источа́етъ Боже́ственное оставле́ніе.

Сти́хъ: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Свѣ́та сы́й пода́тель Іису́съ,* не тре́буя крести́тися,* пло́тію восхо́дитъ на Іорда́нскія струи́,* просвѣти́ти су́щія во тмѣ́ хотя́.* Вѣ́рою Сего́ усе́рдно сря́щемъ.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды, и убоя́шася.

Поне́съ раба́ зра́къ,* предгряде́ши крести́тися, Христе́, отъ раба́* во Іорда́нскихъ струя́хъ,* избавля́я отъ рабо́ты ве́тхаго грѣха́,* и освяща́я и просвѣща́я на́съ.

Сла́ва, и ны́нѣ, гла́съ 6:

Да возра́дуется пусты́ня Іорда́нова, и да процвѣте́тъ я́ко кри́нъ, гла́съ бо вопію́щаго услы́шанъ бы́сть въ не́й: угото́вайте пу́ть Госпо́день. Го́ры бо поста́вивый ста́виломъ, и удо́лія мѣ́риломъ, вся́ исполня́яй, я́ко Бо́гъ, креща́ется отъ раба́, обнищава́ти нача́тъ бога́тныя да́ры да́руяй. Услы́ша Ева: въ печа́лехъ роди́ши ча́да. Ны́нѣ же услы́ша Дѣ́ва: ра́дуйся, Обра́дованная, Госпо́дь съ Тобо́ю, имѣ́яй ве́лію ми́лость.

Тропа́рь, гла́съ 4:

Возвраща́шеся иногда́ Іорда́нъ рѣка́ ми́лотію Елиссе́евою, возне́сшуся Иліи́, и раздѣля́хуся во́ды сю́ду и сю́ду, и бы́сть ему́ су́хъ пу́ть, и́же мо́крый, во о́бразъ вои́стинну креще́нія, и́мже мы́ теку́щее житія́ прехо́димъ ше́ствіе: Христо́съ яви́ся во Іорда́нѣ освяти́ти во́ды.


НА ПОВЕЧЕРІИ,
Кано́нъ, его́же краегране́сіе: И дне́сь же суббо́ту пою́ вели́кую. Ирмо́съ по два́жды: тропари́ же на 6, и па́ки то́йже ирмо́съ о́ба ли́ка вку́пѣ. Гла́съ 6.

Пѣ́снь 1.

Ирмо́съ: Волно́ю морско́ю Покры́вшаго дре́вле гони́теля мучи́теля, Іорда́нскія струи́ спря́товаетъ и кры́етъ, мое́ ны́нѣ очища́я человѣ́ческимъ очище́ніемъ: сла́вно бо просла́вися.

Го́споди Бо́же мой, свѣтоиме́нное пѣ́ніе и предпра́зднственную пѣ́снь Тебѣ́ пое́мъ, Боже́ственнымъ явле́ніемъ та́инственно обно́вльшему на́съ и къ свѣ́тлости Боже́ственнѣй возводя́щему.

Горѣ́ превѣ́чна и до́лѣ но́во я́вльшася Тя́, премíрная и земна́я, Спа́се, ужаса́хуся зря́ще, и е́же па́че сло́ва Твое́ воспѣва́ху снизше́ствіе.

Да Твоея́ сла́вы вся́ческая испо́лниши, Тебе́ Сама́го истощи́лъ еси́ да́же и до ра́бія о́браза. Ны́нѣ же дла́ни раба́ подклоня́еши главу́ ра́бски, мое́ назда́ніе благоутро́бно очища́я.

Пѣ́снь 3.

Ирмо́съ: Тебе́, на вода́хъ Основа́вшаго всю́ зе́млю неодержи́мо, тва́рь, ви́дѣвши пло́тію кры́емаго въ вода́хъ, у́жасомъ мно́гимъ содержа́шеся, — нѣ́сть свя́тъ, па́че Тебе́, Го́споди, — взыва́ющи.

Образы пе́рвѣе проро́ками показа́лъ еси́ Твоего́ Богоявле́нія, ны́нѣ сокрове́нная дѣ́йствами сказа́лъ еси́, я́вль та́йны человѣ́комъ дне́сь, подая́ но́вое возрожде́ніе.

Простре́ Іорда́нъ во́ды, я́ко плещи́, съ тре́петомъ прія́ти Зижди́теля, тѣле́сно креща́емаго и вся́ освяща́ющаго, — нѣ́сть свя́тъ, па́че Тебе́, Го́споди, — взыва́ющія.

Ве́ліе ко спасе́нію напу́тіе креще́ніемъ подае́тъ Христо́съ чу́вствующимъ Его́ Боже́ственное осія́ніе, съ весе́ліемъ пою́щимъ: нѣ́сть свя́тъ, па́че Тебе́, Го́споди Человѣколю́бче.

Пѣ́снь 4.

Ирмо́съ: Еже ко креще́нію Твое́ прише́ствіе прови́дя, Авваку́мъ, ужа́сся, вопія́ше: на мо́ре ко́ни Твоя́, во́ды мно́ги наве́лъ еси́, Спа́се, смуща́ющія.

Явльшуся Тебѣ́ тѣ́ломъ, освяти́ся земля́, во́ды благослови́шася, не́бо просвѣти́ся, ро́дъ же человѣ́ковъ го́рькаго мучи́тельства вра́жія изба́вися.

Глаго́ломъ Боже́ственнымъ ны́нѣ Предте́ча изъ пусты́ни гряде́тъ ко Іорда́ну, глаго́ля: пока́йтеся, прибли́жися бо небе́сное Ца́рство, призыва́я вся́ къ сла́вѣ Бо́жіей.

Превраще́й пе́рвѣе мо́ре въ су́шу, и исто́чники отъ несѣко́маго источи́въ, прегрѣше́ній очище́ніе ны́нѣ содѣва́етъ во Іорда́нскихъ струя́хъ огне́мъ Ду́ха.

Пѣ́снь 5.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ, взыва́ше: просвѣще́нніи, пріиди́те, омы́йтеся водо́ю Боже́ственною и Ду́хомъ я́вѣ и ду́шу, и тѣ́ло очи́стите.

Новотвори́ши земноро́дныя, Но́въ Ада́мъ бы́въ Содѣ́тель, огне́мъ, и Ду́хомъ, и водо́ю стра́нное соверша́я возрожде́ніе и обновле́ніе чу́дное, кромѣ́ сокруше́нія и горни́лъ креще́ніемъ богодѣ́тельнымъ новотворя́.

Ду́хомъ ду́ши новотвори́ши, водо́ю же освяща́еши тѣ́ло сложе́ное, живо́тна назида́я человѣ́ка: сугу́бому бо сро́дная потре́бно, лѣчбы́ му́дрымъ про́мысломъ прино́сиши, я́ко Вра́чь тѣле́съ и ду́шъ.

Отъ Чи́стыя, проше́дъ, рожде́йся изъ Отца́ пре́жде вѣко́въ, къ су́щему изъ непло́дныя прише́лъ еси́, прося́ я́ко Человѣ́къ креще́нія, но отъ воды́ та́инственно Ду́хомъ содѣ́лалъ еси́, Спа́се, многоча́дну Це́рковь, пе́рвѣе безча́дную.

Пѣ́снь 6.

Ирмо́съ: Ятъ бы́сть, но не удержа́нъ стра́хомъ Боже́ственный Крести́тель: а́ще бо и спря́товается прибли́житися Огню́ сѣ́но, но, слыша́въ, — оста́ви ны́нѣ, — тече́, повелѣ́ніе исполня́я я́ко ра́бъ, Боже́ственному же, свы́ше свидѣ́тельствующему гла́су, услы́ша Сы́на Превѣ́чнаго.

Написа́лся, но не порабо́тился еси́, ке́саревымъ повелѣ́ніемъ повину́яся: а́ще бо и отъ рабо́ты утѣше́ніе на́мъ подая́, во́льно повину́ешися и да́ньствуеши дидра́хму, но зако́номъ грѣха́ пе́рвѣе про́данныя ны́ свободи́лъ еси́ ны́нѣ и сыноположе́нія удосто́илъ еси́.

Ца́рствуеши, но не мíрски, естество́мъ сы́й Ца́рь, а́ще бо и по пло́ти отъ пле́мене Дави́дова роди́вся, престо́лъ ца́рствія, Спа́се, сего́ прія́лъ еси́, но сво́йственну и́маши держа́ву Ца́рствуя со Отце́мъ пре́жде вѣко́въ, при́сно и во вѣ́ки съ Ду́хомъ.

Ца́рь у́бо, мíра Нача́льникъ и су́щихъ въ вода́хъ дре́вле пронарече́ся, но удавля́ется Твои́мъ очище́ніемъ и низлага́ется я́ко езе́рскій пе́рвѣе легео́нъ. Ру́къ же Твои́хъ, Спа́се, созда́ніе, порабоще́нное отъ него́, держа́вною Твое́ю руко́ю свобожде́нія сподо́билъ еси́.

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене преклоня́етъ ве́рхъ и про́ситъ креще́нія отъ раба́, очища́я вопію́щія: Изба́вителю, Бо́же, благослове́нъ еси́.

Сѣче́тся струя́ пе́рвѣе ми́лотію Іорда́нская, прообразу́ющи креще́ніе Твое́, и́мже и страсте́й растерза́ется хито́нъ, и нетлѣ́нія оде́жда самотвори́тся вопію́щимъ Бо́гу: благослове́нъ еси́.

Бога́тна струя́, въ себѣ́ бо пріе́мше креща́ема Содѣ́теля, показа́ся исто́чникъ живо́тныя воды́ на спасе́ніе на́съ, пѣснопою́щихъ: Изба́вителю Бо́же, благослове́нъ еси́.

Ме́ртвость Боже́ственную знамени́тельнѣ образу́юще, погруже́ніемъ въ водѣ́ трикра́тнымъ въ креще́ніи Христу́ совостае́мъ, тридне́вному воста́нію пріобща́ющеся, и вопію́ще Христу́: благослове́нъ еси́ во вѣ́ки.

Еди́на благода́ть Отца́, Сы́на же и Ду́ха соверша́ющая да́ромъ жела́ющія вѣ́рно Боже́ственнаго креще́нія, сыноположе́нія воспріе́мшія вла́сть, е́же вопи́ти: Бо́же, благослове́нъ еси́.

Пѣ́снь 8.

Ирмо́съ: Ужасни́ся, боя́йся, не́бо, и да подви́жатся основа́нія земли́: се́ бо водо́ю облачи́тся Опали́вый водо́ю пре́жде пра́веднаго же́ртву пресла́вно. Его́же, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Избавле́ніе гряде́тъ Христо́съ креще́ніемъ пода́ти всѣ́мъ вѣ́рнымъ: си́мъ бо Ада́ма очища́етъ, па́дшаго возвыша́етъ, низло́жшаго мучи́теля посрамля́етъ, небеса́ отверза́етъ, Ду́ха Боже́ственнаго низво́дитъ и нетлѣ́нія прича́стіе да́руетъ.

Преста́ ле́сть вра́жія, гла́съ бо вопію́щаго въ пусты́ни, — пу́ть Госпо́день, — зове́тъ, — угото́вайте и вся́ стези́ Его́ пра́вы твори́те, — повелѣва́етъ, де́брь бо смиря́ется, естество́ земны́хъ возвыша́ется, гора́ и хо́лмъ же враго́въ понижа́ется.

О, пресла́вныхъ даро́въ! О, Боже́ственныя благода́ти и несказа́нныя любве́! Се́ бо водо́ю очища́етъ мя́, огне́мъ просвѣща́етъ мя́ и Ду́хомъ Боже́ственнымъ соверша́етъ мя́ Содѣ́тель и Влады́ка, ны́нѣ во Іорда́нѣ въ мое́ обле́кся естество́, Безгрѣ́шный.

Пѣ́снь 9.

Ирмо́съ: Не рыда́йте всу́е, отча́янія тенета́ми удавля́еми, человѣ́цы, пови́нніи злы́хъ, но во умиле́ніи души́ присту́пимъ Очища́ющему вся́, я́ко Еди́ному Чи́стому и Даю́щему проще́ніе креще́ніемъ.

Во стра́ннѣмъ Твое́мъ Рождествѣ́ пе́рвѣе изъ Дѣ́вы преесте́ственно удиви́лъ еси́, Сло́ве Бо́жій. Ны́нѣ же велича́емъ, ве́ліе та́инство соверша́я пресла́вно прича́стіемъ честны́мъ, купе́ль многоча́дну Боже́ственнымъ Ду́хомъ.

Земля́ освяти́ся Рождество́мъ Твои́мъ святы́мъ, Сло́ве, повѣ́дающимъ небесе́мъ звѣздо́ю сла́ву Твою́. Ны́нѣ же водно́е естество́ благослови́ся, Тебѣ́ пло́тію кре́щшуся, и ро́дъ земноро́дныхъ къ пе́рвому взы́де па́ки благоро́дію.

Да ра́дуется земля́ вся́, не́бо да весели́тся, мíръ да игра́етъ, рѣ́ки да пле́щутъ руко́ю, исто́чницы и езе́ра, бе́здны, моря́ да сра́дуются: прихо́дитъ бо Христо́съ Ада́ма очи́стити и спасти́ Боже́ственнымъ креще́ніемъ.

И па́ки ирмо́съ. И покло́нъ.



НА УТРЕНИ,
На Бо́гъ Госпо́дь: Тропа́рь предпра́зднства, три́жды.

По 1-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Весели́ся, рѣко́ Іорда́не, въ тебѣ́ бо всѣ́хъ Творе́цъ прихо́дитъ во́лею, креще́ніе прія́ти отъ раба́, я́ко Благоутро́бенъ. Красу́йся, лику́й, Ада́ме, и Ево прама́ти: пріи́де избавле́ніе всѣ́хъ, Бо́гъ Преблагíй.

Сла́ва, и ны́нѣ, гла́съ и подо́бенъ то́йже:

Пото́къ сла́дости Влады́ка сый, предгряде́тъ во струя́хъ рѣ́чныхъ крести́тися, напои́ти мя́ хотя́ очище́нія вода́ми. Его́же зря, Іоа́ннъ вопія́ше: ка́ко ру́ку мою́ на ве́рхъ Тво́й простру́, Его́же трепе́щутъ вся́ческая?

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Ада́мову наготу́ одѣва́я, Благоутро́бне, во оде́жду сла́вы, хо́щеши обнажи́тися пло́тію во Іорда́нѣ рѣцѣ́. О, чудесе́ пресла́внаго! Ка́ко Тя́ поды́метъ вода́, Влады́ко Го́споди, вода́ми покрыва́ющаго превы́спренняя? — я́коже пи́шетъ. Пое́мъ, Іису́се Благодѣ́телю, вси́ Твое́ явле́ніе.

Сла́ва, и ны́нѣ, гла́съ то́йже. Подо́бенъ: Боже́ственныя вѣ́ры.

Ве́ліе Со́лнце во Іорда́нѣ просія́ти гряде́тъ, е́же изъ Дѣ́вы, изъ о́блака возсія́вшее, Христо́съ Бо́гъ на́шъ, грѣхо́вный отгоня́ мра́къ и мíра просвѣща́я концы́, Его́же осія́нія получи́ти благоче́стно помо́лимся, прося́ще прія́ти ве́лію ми́лость.

Кано́ны три́: предпра́зднства со ирмосо́мъ на 6, му́чениковъ на 4 и преподо́бныя на 4.

Кано́нъ предпра́зднства, гла́съ 1.
Пѣ́снь 1.

Ирмо́съ: Го́рькія рабо́ты изба́влься Изра́иль, непроходи́мое про́йде, я́ко су́шу, врага́ зря́ потопля́ема, пѣ́снь я́ко Благодѣ́телю пое́тъ Бо́гу, чудодѣ́ющему мы́шцею высо́кою, я́ко просла́вися.

Христо́съ гряде́тъ ко креще́нію, Христо́съ ко Іорда́ну прихо́дитъ, Христо́съ на́ша въ водѣ́ погреба́етъ ны́нѣ грѣхи́, я́ко Бла́гъ, съ весе́ліемъ воспои́мъ Ему́, я́ко просла́вися.

Да кропя́тъ, веселя́щеся, о́блацы весе́ліе вѣ́чное: Христо́съ Іису́съ предгряде́тъ вода́ми Іорда́нскими пото́ки грѣхо́вныя потопи́ти, просвѣще́ніе всѣ́мъ да́руя.

Се́ Свѣ́тъ явля́ется, се́ Очище́ніе показу́ется, се́ Спа́съ предстои́тъ просія́ти су́щимъ во тмѣ́ Боже́ственныя зари́. Сего́ помышле́ньми чи́стыми ра́достно поды́мемъ.

Инъ кано́нъ му́чениковъ, гла́съ 7.
Пѣ́снь 1.

Ирмо́съ: Пои́мъ Го́сподеви, погрузи́вшему всю́ си́лу фарао́нову въ мо́ри, побѣ́дную пѣ́снь, я́ко просла́вися.

Гряди́те, вѣ́рніи, согла́сно пра́зднуимъ препросла́вленную па́мять страда́льцевъ, въ пѣ́снехъ духо́вныхъ славосло́вяще Христа́.

Страстоте́рпцы Христо́вы и вѣ́ры тве́рдіи побо́рницы, на нече́стіе ополчи́вшеся крѣ́пко, враги́ побѣди́ша.

Нечести́вый гони́тель и вѣ́ры Христо́вы чу́ждь, на страстоте́рпцы разгнѣ́вався злочести́вый, вѣ́рою упражня́ется.

Богоро́диченъ: Па́ству, ю́же стяжа́ла еси́, Богороди́тельнице, сію́ спаса́й отъ вся́кія ну́жды, моля́щи Спа́са и Бо́га на́шего.

Инъ кано́нъ преподо́бныя, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Вѣнча́ти твою́ пѣ́сньми па́мять прихожду́, тебѣ́ надѣ́явся, несмы́сленный и ве́сь нечи́стый, но да́ждь ми́ сло́во му́дрости и ра́зума твои́ми мольба́ми.

Ве́сь у́мъ къ Боже́ственнѣй высотѣ́ взе́мши и благи́хъ бе́здну и наслажде́ній позна́вши бла́гость, вся претерпѣ́ла еси́, приклю́чшаяся тебѣ́.

Умъ къ Бо́гу впери́вши Вы́шнему, тѣ́ло твое́, влеку́щее къ до́льнимъ, воздержа́ніемъ и болѣ́зньми облегчи́ла еси́, жела́ющи вели́кія сла́вы.

Богоро́диченъ: Пребы́въ, е́же бѣ́, и воплоти́вся изъ утро́бы Твоея́, е́же бѣ́хомъ дарова́ на́мъ пе́рвое, отъ пе́рсти бы́вшимъ, изба́вивъ прегрѣше́ній, Богороди́тельнице.

Пѣ́снь 3.

Ирмо́съ: Не му́дростію и бога́тствомъ да хва́лится сме́ртный свои́мъ, но вѣ́рою Госпо́днею, правосла́вно взыва́я Христу́ Бо́гу и поя́ при́сно: на ка́мени Твои́хъ за́повѣдей утверди́ мя, Влады́ко.

Пре́жде вѣко́въ сѣдя́й со Отце́мъ и Ду́хомъ, ны́нѣ въ послѣ́дняя изъ Дѣ́вы вопло́щся, я́коже вѣ́сть, Христо́съ гряде́тъ ко креще́нію, безсме́ртіе Боже́ственною ба́нею всѣ́мъ подая́.

Водо́ю погребсти́ на́ша грѣхи́ хотя́ во Іорда́нскихъ струя́хъ за милосе́рдіе ми́лости, Христо́съ Бо́гъ предгряде́тъ и назида́етъ истлѣ́вшія ны́ креще́ніемъ.

Обнаже́ніе сту́дное покрыва́я Ада́ма пра́отца, обнажа́ешися во́льно и струя́ми Іорда́нскими Тебе́ Сама́го покрыва́еши, вода́ми превы́спренняя покрыва́я, Христе́, Еди́не Многоми́лостиве.

Инъ.

Ирмо́съ: Утверди́ся се́рдце мое́ въ Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Благоче́стія и вѣ́ры предста́тели, боже́ственныя страда́льцы восхва́лимъ, Ѳеопе́мпта и Ѳео́ну пресла́внаго.

Пра́вило, и о́бразъ, и начерта́ніе я́вльшеся, Христо́вы великому́ченицы, святы́хъ бы́ша путевожди́ ко страда́нію.

Ревну́юще си́хъ добродѣ́тельному жи́тельству, му́ченицы, ку́пно на суди́щи предстоя́ще, взыва́ху: христіа́не есмы́ вси́.

Богоро́диченъ: Роди́лся еси́ изъ Дѣ́вы несказа́нно, яви́лся еси́, я́коже благоволи́лъ еси́, Человѣколю́бче, и мíръ обнови́лъ еси́, Го́споди.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Не пощадѣ́ла еси́ пло́ти мно́гими я́звами, ниже́ весьма́ неоде́ржно друча́емыя, къ болѣ́знемъ воздержа́нія, искуси́тель въ ни́хже отрѣва́шеся.

Ше́ствіе тѣ́сное жи́зни хода́тайственно нетлѣ́нныя и Боже́ственныя ты́ изво́лила еси́, широ́кое оплева́вши, его́же ничто́же го́рше вои́стинну у́мъ иму́щему.

Горя́щу ю́ностному цвѣ́ту отбѣже́ тѣсното́ю и болѣ́зньми воздержа́нія и пале́ніе оче́съ твои́хъ сле́зными тече́ніи угаси́ла еси́.

Богоро́диченъ: Сло́во, вопло́щшеся изъ Тебе́, Всечи́стая, пло́ти скве́рну хотя́ омы́ти о́бразомъ очище́нія, тече́ніе водно́е диви́тся.

Конда́къ, гла́съ 2. Подо́бенъ: Вы́шнихъ ища́.

Всѣ́хъ, Христе́, благоутро́бнѣ отъе́мляй прегрѣше́ній мно́жество ми́лости ра́ди безмѣ́рныя, Іорда́нскими вода́ми крести́тися гряде́ши, я́ко Человѣ́къ, оде́ждею мя́ одѣва́я, сла́вы дре́внія обнаже́нна лю́тѣ.

Та́же сѣда́ленъ му́ченика, гла́съ 1. Подо́бенъ: Гро́бъ Тво́й.

Ѳеопе́мптъ яви́вся святи́тель су́щихъ до́лѣ, съ Ѳео́ною ку́пно тве́рдымъ и сострада́льцемъ, мучи́телемъ противле́нія не терпя́щимъ, ураня́ется: Тя́, — ра́дуяся, вопія́, — чту́ Еди́наго, погре́бшаго во Іорда́нскихъ струя́хъ земны́хъ прегрѣше́нія.

Инъ сѣда́ленъ преподо́бныя, гла́съ 5. Подо́бенъ: Собезнача́льное.

По́стныхъ превзошла́ еси́ ты́ терпѣ́нія болѣ́знь, на небесѣ́хъ наслажда́ешися бо́льшія оби́тели и лу́чшія зари́ испо́лнилася еси́, зане́ му́жески жесто́кій ше́ствовала еси́ пу́ть, побѣди́вши настоя́щая, и а́нгеломъ уподо́билася еси́, и ны́нѣ сла́вы причаща́ешися тѣ́хъ.

Сла́ва, и ны́нѣ, предпра́зднства, гла́съ 1. Подо́бенъ: Гро́бъ Тво́й, Спа́се.

Вели́кій До́ждь къ рѣ́чнымъ струя́мъ предгряде́тъ, пло́тію крести́тися восхотѣ́въ. Къ Нему́же боже́ственный Предте́ча, ужаса́яся, глаго́лаше: ка́ко крещу́ Тя, скве́рны не иму́ща весьма́? Ка́ко простру́ мою́ десни́цу на главу́, ея́же трепе́щутъ вся́ческая?

Пѣ́снь 4.

Ирмо́съ: Слы́ша дре́вле Авваку́мъ, Христе́, чу́дный Тво́й слу́хъ и стра́хомъ взыва́ше: отъ ю́га Бо́гъ пріи́детъ и Святы́й отъ горы́ пріосѣне́нныя ча́щи спасти́ пома́занныя. Сла́ва си́лѣ Твое́й, Го́споди.

Во́ду почерпи́те Жи́зни, се́ ны́нѣ пріи́де ми́ра Рѣка́ и́стинно изсуши́ти му́тныя невѣ́рія во́ды и просвѣще́ніе источи́ти пою́щимъ Ему́: сла́ва си́лѣ Твое́й, Го́споди.

Весели́ся, пусты́ня, я́же пре́жде жа́ждущая, естество́ все́ человѣ́ческое: ны́нѣ яви́ся Пото́къ сла́дости, Іорда́нскими вода́ми рѣша́я зно́й грѣха́. Ему́же пое́мъ вѣ́рно: сла́ва си́лѣ Твое́й, Го́споди.

Вопію́щаго гла́съ проро́чески пусты́мъ возшумѣ́ помышле́ніемъ: угото́вайте пути́ пра́выя Христу́ гряду́щему, глаго́лющь, я́ко да креще́ніемъ очи́ститъ обветша́вшія ны́, разрѣша́я пе́рвое осужде́ніе.

Инъ.

Ирмо́съ: Услы́шахъ слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди.

Всю́ напои́ша вселе́нную словесы́ Боже́ственными Христо́вы великому́ченицы и ле́сть упраздни́ша.

Бога́тство некрадо́мо обрѣто́ша вои́стинну страстоте́рпцы, бога́тство, сла́ву и свѣ́тлость земны́хъ оплева́ша.

Вооружи́вшеся страстоте́рпцы Христо́вымъ ору́жіемъ, мучи́телево суровство́ все́ въ се́мъ низложи́ша.

Богоро́диченъ: Ма́ти Чи́стая, Благослове́нная Свята́я Дѣ́во, пою́щія Тя́ спаса́й отъ вся́каго обстоя́нія.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Ты́, тѣлесе́ преизря́дствующи добро́тами, была́ еси́ мно́гимъ отречена́, не полу́чшимъ раче́нія. Тѣ́мже, изнури́вши себе́, причасти́лася еси́ Боже́ственныя красоты́.

Претерпѣ́ла еси́, я́ко Іовъ, тѣле́сное озлобле́ніе, не изрекла́ еси́ сло́ва, кончи́ну привлача́щаго, лѣ́томъ и естество́мъ же преше́дши, Боже́ственное прія́ла еси́ жили́ще.

Уедини́ся отъ сро́дниковъ, и роди́телей, и стяжа́нія, Христа́ еди́наго и́шущи некра́домо бога́тство и неиждива́емое, съ Ни́мже вы́шнія сла́вы яви́лася еси́ прича́стница.

Богоро́диченъ: Рождество́ Твое́ Ада́ма отъ тли́ изба́ви, кромѣ́ тлѣ́нія человѣкодѣ́льнаго, и́бо па́че человѣ́ка бы́сть зача́тіе. Тѣ́мже тлѣ́нія и зо́лъ мя́, Отрокови́це, изба́ви.

Пѣ́снь 5.

Ирмо́съ: Свѣ́тъ Тво́й незаходи́мый возсія́й, Христе́, въ сердца́ вѣ́рно пою́щихъ Тя́, ми́ръ подава́яй на́мъ па́че ума́; тѣ́мъ, отъ но́щи невѣ́дѣнія ко дню́ свѣ́томъ Твои́мъ теку́ще, славосло́вимъ Тя́, Человѣколю́бче.

Ми́ра, Христе́, сы́й Ца́рь, вражды́ средостѣ́ніе разори́лъ еси́, пло́ти подо́біемъ яви́вся су́щимъ на земли́. Тѣ́мже прише́ствіе Твое́ ви́дѣвъ, Іоа́ннъ дивля́шеся со стра́хомъ, рукоположи́ти Тя́ повелѣва́емь.

Зміе́въ главы́ сокруши́ти Христо́съ спѣша́, ны́нѣ гряде́тъ вода́ми и трепе́щущему вопіе́тъ Крести́телю: простри́ твою́ ру́ку, и прикосни́ся верху́ Моему́, и у́жасъ оттряси́, соверша́я повелѣ́нное.

Сказа́ше проро́къ благода́ть иногда́ креще́нія Боже́ственнымъ Ду́хомъ, порази́въ Іорда́нскія струи́ ми́лотію, я́же раздѣли́шася, на́мъ путетворя́щія возрожде́ніе Боже́ственное въ нихъ я́вльшагося Христа́.

Инъ.

Ирмо́съ: Утренююще, Сло́ве, въ сла́ву Твою́ и хвалу́, восхваля́емъ непреста́нно о́бразъ Креста́ Твоего́, Его́же да́лъ еси́ на́мъ ору́жіе въ по́мощь.

Му́дріи страда́льцы, вѣ́ры ору́жницы, му́ки до́блественнѣ враго́въ пребеззако́нныхъ побѣди́вше, ку́пно вѣнцы́ прія́ша.

Ни ласка́ніе, ни ле́сть, ни сла́ва земны́хъ возмо́же отсѣщи́ вѣ́ры ва́шея тече́ніе, страда́льцы, тѣ́мже и ра́дуетеся.

Предстоя́ще престо́лу сла́вы Госпо́дни, со а́нгелы непреста́нно моли́теся, да́ти прегрѣше́ній очище́ніе вѣ́рою пою́щимъ васъ.

Богоро́диченъ: Всесвята́я Дѣ́во Обра́дованная, ро́ждшая въ лѣ́тѣ Сло́во па́че сло́ва, моли́ Его́ спасти́ ду́ши на́ша.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Хра́мъ была́ еси́ обита́ющаго въ чи́стыхъ ду́сѣхъ Сло́ва, му́драя, осія́ла бо еси́ ты́ воздержа́нія мно́гими болѣ́зньми души́ твоея́ добро́ту, пресла́вная.

Пло́ть умертви́ла еси́, обагре́нную есте́ственною благода́тію болѣ́зньми мно́гими, уясня́ющи па́че свѣ́томъ добродѣ́телей душе́вный о́бразъ, свѣ́тло сія́ющій.

Ве́щь тѣлесе́ души́ твоея́ ко Христу́ жела́ніемъ распали́вши, ты́ ны́нѣ съ невеще́ственными невеще́ственно вои́стинну а́нгелы сра́дуешися, Бо́га смотря́ющи.

Богоро́диченъ: Главы́ сокруши́ Глава́ благочести́выхъ, Всечи́стая, струя́ми ны́нѣ гнѣздя́щихся зміе́въ, Рожде́йся изъ Твоея́ утро́бы безъ сѣ́мене вои́стинну.

Пѣ́снь 6.

Ирмо́съ: Ве́сь отъ страсте́й безмѣ́рныхъ содержу́ся и ки́томъ зо́лъ снизпадо́хъ, но возведи́ изъ нетлѣ́нія мя́, Бо́же, я́коже пре́жде Іо́ну, и вѣ́рою безстра́стіе ми́ да́руй, я́ко да во гла́сѣ хвале́нія и спасе́нія ду́хомъ пожру́ Ти.

Милосе́рдіе щедро́тъ Христо́съ показу́я, въ ра́біи зра́цѣ Непремѣ́нный прихо́дитъ къ рабу́, прося́ креще́нія, отъ рабо́ты восхища́я человѣ́чество, Его́же уди́влься прише́ствію, ужаса́ется и стра́хомъ одержи́мь быва́етъ.

Ка́ко Тя́ рѣ́чныя струи́ пріи́мутъ, нестерпи́маго Огня́, ны́нѣ иду́ща? Ка́ко обнаже́ніе небе́сніи ви́дятъ а́нгели? Ка́ко ру́ку Іоа́ннъ простре́тъ на Тя́, Сло́ве Бо́жій Пребезнача́льне, того́ отъ земли́ созда́вшаго?

Мо́ре раздѣля́ется, бѣжа́ще, показа́ но́вымъ лю́демъ Боже́ственное прехожде́ніе, е́же содѣ́ла въ рѣцѣ́, пло́тію прише́дъ, Иже изъ ка́мене пресла́вно источи́въ во́ду. Сего́ я́ко Бо́га просла́вимъ, на́ше сокруше́ніе назда́вшаго.

Инъ.

Ирмо́съ: Іо́на изъ чре́ва а́дова вопія́ше: возведи́ отъ тли́ живо́тъ мо́й. Мы́ же Тебѣ́ вопіе́мъ: Всеси́льне Спа́се, поми́луй на́съ.

Упраздни́ша и́дольскую ле́сть му́ченицы, на суди́щи стра́ждуще, и нече́стіе все́ потреби́ша отъ земли́ страда́ніемъ свои́мъ.

Предпоста́ви врагъ и гони́тель вѣ́ры своя́ служи́тели мечми́, я́коже а́гнцы, убива́ти ва́съ го́рько, му́ченицы сла́вніи.

Якоже ви́дѣ ли́къ святы́хъ мучи́тели, вооруже́нныя мечми́, му́жески вопія́ше: во́ини Христо́вы есмы́, о мучи́телю!

Богоро́диченъ: Его́же родила́ еси́, Богоро́дице, несказа́нно, Бо́га на́шего, моля́щи не преста́й изба́вити отъ бѣ́дъ пою́щія Тя́, Чи́стая Приснодѣ́во.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Просвѣти́вшися заре́ю духо́вною, вся́кое наслажде́ніе отри́нула еси́ плотско́е, я́ко но́щно, до́брыхъ бо уязви́лася еси́ жела́ніемъ.

Облиста́ твоя́ свѣтоно́сная дне́сь па́мять, издале́ча просвѣща́ющи ду́шъ омраче́ніе, мона́ховъ подвиза́ющихся удобре́ніе.

Чистоту́ дѣ́вства соблюла́ еси́, почита́ющи черто́гъ нетлѣ́нный: Христа́ бо жела́ніемъ разжегла́ся еси́, стра́ннаго Жениха́ твоего́.

Богоро́диченъ: Да сла́вы испо́лнимся, пріи́де въ безсла́вное человѣ́чество сла́вы Госпо́дь. Якоже человѣ́къ, мы́емь, Тво́й Сы́нъ человѣ́ки просла́ви.

Конда́къ предпра́зднства, гла́съ 4. [Подо́бенъ: Яви́лся еси́ дне́сь.]

Во струя́хъ дне́сь Іорда́нскихъ бы́въ, Госпо́дь Іоа́нну вопіе́тъ: не убо́йся крести́ти Мя́, спасти́ бо пріидо́хъ Ада́ма первозда́ннаго.

Икосъ:

Не истязу́ю тя́, Крести́телю, предѣ́лы преходи́ти, не глаго́лю тебѣ́: рцы́ Ми, я́же глаго́леши беззако́ннымъ и учи́ши грѣ́шники. То́чію крести́ Мя́ молча́ и ча́я, я́же отъ креще́нія: пріи́меши бо сего́ ра́ди досто́инство, е́же не бы́сть а́нгеломъ, и́бо всѣ́хъ проро́ковъ бо́льша тя́ сотворю́. Отъ о́ныхъ у́бо ни еди́нъ я́вѣ Мя́ ви́дѣ, но во о́бразѣхъ, и сѣ́нѣхъ, и гада́ніихъ, ты́ же предъ тобо́ю стоя́ща ви́дѣлъ еси́, спасти́ бо пріидо́хъ Ада́ма первозда́ннаго.

Пѣ́снь 7.

Ирмо́съ: Проидо́ша, я́ко черто́гъ, пе́щный пла́мень нестерпи́мый и́же за благоче́стіе иногда́ о́троцы святíи, показа́вшеся я́вѣ, и, согла́сно воспѣва́юще, пѣ́снь поя́ху: отце́въ Бо́же, благослове́нъ еси́.

Христо́съ спасе́ніе яви́ся, просвѣще́ніе да́руя. Да ра́дуется не́бо, о́блацы же да кропя́тъ и́стинно пра́вду, взыва́ющимъ: отце́въ Бо́же, благослове́нъ еси́.

Руно́, е́же прови́дѣ Гедео́нъ, полна́ ча́ша воды́ иска́павшія я́вѣ Твое́ креще́ніе ска́зоваше, Христе́, е́же подае́ши, крести́вся, воспѣва́ющимъ: отце́въ Бо́же, благослове́нъ еси́.

Сла́ныя безча́дствующія Елиссе́й исцѣля́я во́ды, благоча́діе честны́я купѣ́ли прообрази́, хотя́щее бы́ти та́инственно, воспѣва́ющимъ: отце́въ Бо́же, благослове́нъ еси́.

Инъ.

Ирмо́съ: Пе́щь горя́щую ороси́лъ еси́, Спа́се, о́троки спа́слъ еси́, пою́щія и глаго́лющія: благослове́нъ еси́ во вѣ́ки, Го́споди Бо́же оте́цъ на́шихъ.

Коне́цъ муче́нія прія́сте ку́пно, мече́мъ умерщвля́еми съ жена́ми и дѣтьми́, Христу́ вопію́ще: благослове́нъ еси́, Го́споди Бо́же оте́цъ на́шихъ.

Ра́довахуся святíи, зря́ще себе́, мечи́ скончава́емыя, и вѣ́рою взыва́ху: благослове́нъ еси́, Го́споди Бо́же оте́цъ на́шихъ.

Нечести́выхъ сверѣ́пство потреби́ся отъ земли́, и бо́зи падо́ша на зе́млю и сокруши́шася му́ченикъ исповѣ́даніемъ, и вѣнцы́ прія́ша.

Богоро́диченъ: Спаса́й па́ству Твою́, Всесвята́я Чи́стая, отъ вся́каго обстоя́нія, я́ко еди́на Предста́тельница ро́да на́шего, Благослове́нная Богоро́дице Всепѣ́тая.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Злѣ́ умышля́я, сопроти́вный души́ твоея́ крѣ́пость умягчи́ти неду́гами покуша́шеся, и Іова прирази́выйся терпѣ́нію, му́дрѣ болѣ́зньми отража́шеся, твои́мъ терпѣ́ніемъ, му́драя, уязвля́яся.

Твоя́ ны́нѣ уклони́ся отъ треволне́ній житія́ къ благоути́шному душа́ приста́нищу, бога́та су́щи добро́тами въ Боже́ственныхъ пребыва́ніихъ, му́драя, идѣ́же проугото́вися твои́мъ терпѣливострада́ніемъ мно́гимъ поко́ище.

Му́дрѣ наста́вила еси́ во о́бщемъ житіи́, мѣ́сто, глаго́лющи, измѣни́ти никогда́же, вели́кихъ бо хода́тайственно воздая́ній терпѣ́ніе, словесы́ же и дѣлесы́ по́льзовати мона́шествующія вои́стинну не облѣни́лася еси́.

Богоро́диченъ: Водно́е естество́ отъ грѣха́ мя измыва́етъ Рождества́ Твоего́ па́че естества́ му́дростію, Бо́га бо очище́ніе, Творца́ свѣ́та, очища́етъ, Богоневѣ́сто, мно́гими оскверни́вшагося, Дѣ́во, согрѣше́ньми.

Пѣ́снь 8.

Ирмо́съ: Чу́да преесте́ственнаго показа́ о́бразъ огнеро́сная пе́щь дре́вле: о́гнь бо не опали́ ю́ныя дѣ́ти, Христо́во явля́я безсѣ́менное отъ Дѣ́вы Боже́ственное рождество́. Тѣ́мъ, воспѣва́юще, воспои́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Хвалу́ велегла́сно Влады́цѣ возсле́мъ: пріи́де, яви́ся, восхо́дитъ на во́ды, и обнажа́ется, не́бо о́блаки одѣва́яй, и креща́ется, очища́я ны воспѣва́ющія: да благослови́тъ тварь вся́ Го́спода и превозно́ситъ во вся́ вѣ́ки.

Пріиди́те мы́сленно, ко Іорда́ну и́демъ, видѣ́ніе ве́ліе въ не́мъ у́зримъ: Іису́съ бо, просвѣще́ніе, прихо́дитъ и раба́ преклоня́ется дла́ни, съ тре́петомъ вопію́ща: да благослови́тъ тва́рь вся́ Го́спода и превозно́ситъ во вся́ вѣ́ки.

Угль, Его́же прови́дѣ Иса́ія, въ вода́хъ Іорда́нскихъ разгорѣ́вся, попали́ ве́щь всю́ грѣхо́въ и подаде́ сокруше́ннымъ назда́ніе. Тѣ́мже, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Инъ.

Ирмо́съ: Еди́наго Безнача́льнаго Царя́ сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Еди́наго Благоутро́бнаго Царя́ сла́вы исповѣ́дающе, му́дріи страда́льцы прія́ша по́чести побѣ́ды, вопію́ще благодерзнове́нно: лю́діе, превозноси́те Его́ во вѣ́ки.

Тве́рдо проти́вишася Христо́вы страда́льцы къ мучи́телемъ, стра́ждуще до́блественнѣ, побѣди́ша и́дольскую ле́сть, вопію́ще благодерзнове́нно: лю́діе, превозноси́те во вся́ вѣ́ки.

Якоже адама́нта, до́бліи ору́жницы, мучи́телей преще́нія и му́ки побѣди́вше, ра́достно вопія́ху: по́йте, свяще́нницы, лю́діе, превозноси́те Го́спода во вѣ́ки.

Богоро́диченъ: Еди́наго Благоутро́бнаго Превѣ́чнаго Сло́ва, изъ Дѣ́вы въ послѣ́дняя ро́ждшагося и спа́сшаго человѣ́ческій ро́дъ, по́йте, свяще́нницы, лю́діе, превозноси́те Его́ во вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

На земли́ живу́щи, къ земли́ блаже́нныхъ вои́стинну дости́гнути вожделѣ́ла еси́, идѣ́же чи́ни а́нгельстіи, преподо́бныхъ и по́стниковъ, дѣ́въ, живу́ще, вѣ́чно пѣсносло́вятъ Христа́ во вѣ́ки вся́.

Добро́тою естества́ лу́чши мно́гихъ су́щи, о души́ попекла́ся еси́, я́ко ви́дъ добро́ты душе́вныя му́дрѣ сохрани́вши, тѣ́мже добро́ту тѣле́сную угаси́вши, распали́лася еси́ воздержа́ніемъ души́ твоея́.

Бо́дръ у́мъ къ Бо́гу преусе́рдіемъ душе́внымъ ты́ стяжа́вши, ко́зни льсти́ваго мудреца́ злы́хъ до конца́ успи́ла еси́, сла́вная, и ны́нѣ, у́спши, живе́ши во вѣ́ки.

Богоро́диченъ: Обнови́ти земны́я Сы́нъ Тво́й восхотѣ́въ, ко Іорда́ну я́ко Человѣ́къ тщи́тся, Чи́стая, кра́йнія ра́ди любве́: та́мо бо всѣ́хъ сокру́шшаго сотре́, обновля́етъ моли́твами Твои́ми мíръ.

Пѣ́снь 9.

Ирмо́съ: Неизглаго́ланное Дѣ́вы та́инство: не́бо бо Сія́, и престо́лъ херуви́мскій, и свѣтоно́сный черто́гъ показа́ся Христа́ Бо́га Вседержи́теля, Сію́ благоче́стно я́ко Богоро́дицу велича́емъ.

Та́инство стра́нное зрю́ и пресла́вное: Іису́съ гряде́тъ во́лею къ рѣцѣ́ Іорда́ну, вопія́ Іоа́нну: твою́ десни́цу Ми, дру́же, взаи́мствуй, стра́шная соверша́ющему лю́демъ Мои́мъ въ снабдѣ́ніе.

Пусты́нная Іорда́нская да процвѣту́тъ, и́же во тмѣ́ лежа́щіи, вели́къ яви́ся ва́мъ Свѣ́тъ. Ви́дѣвше, взыгра́йте: Христо́съ отъ Галиле́и приходя́й, пло́тію крести́тися отъ раба́ хо́щетъ.

Возвесели́ся ны́нѣ, Іорда́не, и лику́й, Іоа́нне, взыгра́й, вся́ вселе́нная ра́дуйся: се́ яви́ся Христо́съ, и обнажа́ется и креща́ется, во оде́жду облача́я нетлѣ́нія человѣ́чество.

Инъ.

Ирмо́съ: Па́че естества́ Ма́терь и по естеству́ Дѣ́ву, еди́ну въ жена́хъ Благослове́нную, пѣ́сньми, вѣ́рніи, Богоро́дицу велича́емъ.

Попра́вше вся́ идолослуже́нія вѣ́рою страстоте́рпцы Христо́вы, боже́ственное тече́ніе сконча́вше благоче́стно и вѣ́рою утверди́ша.

Земна́я вся́ презрѣ́вше вѣ́рою страстоте́рпцы Христо́вы, вку́пѣ усе́рдно пострада́вше, отъ Бо́га прія́ша врачева́нія.

Страстоте́рпцы му́жески вооружи́вшеся вѣ́рою, Госпо́днимъ кресто́мъ ополче́нія низложи́ша вра́жія и вѣнцы́ прія́ша.

Богоро́диченъ: Во чре́вѣ заче́ншая непостижи́мое Сло́во и Сіе́ безъ сѣ́мене намъ ро́ждшая, моли́ прилѣ́жно спасти́ся душа́мъ на́шимъ.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Уясни́вшися добро́тами дѣ́вства, сла́вная, тебе́ саму́ю украси́ла еси́ вѣнце́мъ воздержа́тельнаго житія́, тѣ́мже сугу́бымъ вѣнце́мъ вѣнча́ тя стра́нный Жени́хъ тво́й, Его́же уязви́лася еси́ ты любо́вію.

Наде́жда не посрами́, Синклитикíе, тя́, всечестна́я, бу́дущихъ, ю́же имѣ́ла еси́ въ се́рдцѣ твое́мъ: ны́нѣ бо прія́ла еси́ болѣ́зней воздая́нія отъ Спа́са, за я́же воздержа́нія вся́къ ви́дъ прешла́ еси́.

Въ крѣ́пость и утвержде́ніе, честна́я, Христа́ одѣ́ялася еси́ и въ зе́млю ты́ киче́ніе пони́зила еси́ глаго́лавшаго на высоту́ непра́вду. Тѣ́мже тя́ вѣнце́мъ побѣ́ды украси́ побѣ́ды пода́тель Іису́съ.

Богоро́диченъ: О Тебѣ́ пра́отца паде́ніе крѣ́пость прія́тъ, поити́ да́льше крѣ́пости не иму́щее: креще́ніемъ бо Сы́на Твоего́ вся́ка зло́ба ны́нѣ погрузи́ся. Тѣ́мже вино́вну Тя́ очище́нія проповѣ́даемъ.

Свѣти́ленъ. Подо́бенъ: Ду́хомъ во святи́лищи.

Яко ви́дѣ Тя́ обнаже́на Іорда́нъ, съ тре́петомъ къ су́щему отъ непло́дове рече́: оста́ви, о Іоа́нне, крести́тися Го́спода, огне́мъ и Ду́хомъ очища́ющаго всю́ тварь, на сіе́ бо пріи́де, освяти́ти земны́я и во́дное естество́.

Сла́ва, и ны́нѣ:

Изъ Дѣ́вы возсія́вый въ Виѳлее́мѣ пло́тію ко Іорда́ну ны́нѣ тщи́тся, скве́рну отмы́ти земноро́дныхъ, къ свѣ́ту приводя́ во тмѣ́ су́щія креще́ніемъ Боже́ственнымъ.

На хвали́техъ стихи́ры, на 4, гла́съ 6. Подо́бенъ: Ангельскія предыди́те си́лы.

Что́ не домышля́ешися, Крести́телю, смотре́нія, е́же соверша́ю за всѣ́хъ спасе́ніе? Дре́вняя оста́ви ны́нѣ, и помышля́й поле́зная. Вѣ́руй Бо́гу соше́дшему и, приступи́въ, Мнѣ послужи́: Богъ бо пріидо́хъ за благоутро́біе Ада́ма очи́стити отъ паде́нія.

Взе́мляй на́ша грѣхи́ на ра́мена, прише́лъ еси́, Іису́се, къ струя́мъ Іорда́нскимъ, а́зъ же ужасо́хся Твоего́ стра́шнаго прише́ствія. Ка́ко у́бо ми́ вели́ши крести́ти Тя́? Са́мъ мя́ очи́стити прише́лъ еси́. И ка́ко креще́нія отъ мене́ про́сиши, всѣ́хъ Очище́ніе?

Естества́ Моего́ непости́жное Сло́во, въ ра́бій же зра́къ одѣ́явся, пріидо́хъ на Іорда́нъ, ника́коже Мене́ отрецы́ся. Гряди́, не бо́йся, прибли́жися ко Мнѣ́, десни́цу на ве́рхъ Мо́й положи́въ, возопíй: благослове́нъ, явле́йся Бо́же на́шъ, сла́ва Тебѣ́.

О, па́че ума́, безмѣ́рныя Твоея́ нищеты́, Сло́ве Бо́жій! Мене́ ра́ди, па́дшаго, позна́хъ Тя́, за милосе́рдіе во Ада́ма обле́кшася и су́щія отъ Ада́ма обновля́юща, и повину́яйся Твоему́ велѣ́нію, вѣ́рно зову́ Тебѣ́: благослове́нъ, явле́йся Бо́же на́шъ, сла́ва Тебѣ́.

Сла́ва, гла́съ и подо́бенъ то́йже:

Съ тре́петомъ служа́ Іоа́ннъ Влады́цѣ, ра́дуется душе́ю и вопіе́тъ съ весе́ліемъ: сра́дуйтеся мнѣ́, вси́ ро́ди пра́отца, пріи́де бо ча́яніе на́ше, прíиде на Іорда́нъ Христо́съ, вся́ отъ грѣха́ Ада́мова очи́стити, я́ко Благоутро́бенъ.

И ны́нѣ, гла́съ и подо́бенъ то́йже:

Воспои́мъ, лю́діе, Рожде́нному отъ Дѣ́вы и въ рѣцѣ́ кре́щшемуся Іорда́нѣ, и къ Нему́ возопіи́мъ: Царю́ вся́кія тва́ри, да́руй намъ неосужде́нно чи́стою со́вѣстію вѣ́рно дости́гнути Твое́ свято́е изъ ме́ртвыхъ тридне́вное воста́ніе.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Се́ Ца́рь,* се́ ча́яніе* Изра́илево пріи́де.* Лю́діе, ра́дуйтеся,* Свѣтъ бо явля́ется.

Сти́хъ: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Узрѣ́ся су́щимъ* на земли́ съ пло́тію,* Боже́ственный ны́нѣ Свѣ́тъ* су́щимъ во тмѣ́ яви́ся,* и всѣ́мъ благода́ть возсія́.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

Свѣти́льниче Свѣ́ту,* заре́ Со́лнцу,* предтече́ Сло́ву,* дру́же Жениху́,* проро́че, послужи́.

Сла́ва, и ны́нѣ, гла́съ 8. Анато́ліево.

Іоа́нне Крести́телю, во утро́бѣ позна́вый Мя́, Агнца, на рѣцѣ́ Ми́ послужи́, со а́нгелы Ми́ слу́жбу принеси́: просте́ръ, косни́ся руко́ю твое́ю верху́ Моему́ пречи́стому и, егда́ у́зриши го́ры трепе́щущія и Іорда́нъ возвраща́ющся, съ си́ми возопíй: воплоти́выйся отъ Дѣ́вы въ на́ше спасе́ніе, Го́споди, сла́ва Тебѣ́.

По Бла́го е́сть: Трисвято́е, и по Отче на́шъ. Тропа́рь. Та́же ектеніи́, и отпу́стъ.

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 46 – 57 об.

/ Къ оглавленію раздѣла /


Наверхъ / Къ титульной страницѣ

0