Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 4-й де́нь.
Слу́жба свята́го сла́внаго преподобному́ченика Ону́фрія Бо́лгарскаго, Га́бровскаго, пострада́вшаго въ о́стровѣ Хíосѣ въ лѣ́то 1818-е.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 8. Подо́бенъ: О, пресла́внаго чудесе́!

Христу́ ро́ждшемуся, Ону́фріе блаже́нне, волсви́ Перси́дстіи ма́ніемъ Бо́жіимъ да́ры принесо́ша: зла́то, сми́рну и лива́нъ; ты́ же, му́чениче всечу́дне, вмѣ́сто зла́та, свя́тость житія́, вмѣ́сто же сми́рны, умерщвле́ніе тѣлесе́, и вмѣ́сто лива́на, святу́ю ду́шу твою́, я́ко же́ртву всеблагоуха́нну Бо́гу прине́слъ еси́.

Спаси́телево Рождество́ пра́здновалъ еси́ че́стно, богоно́се Ону́фріе, послѣди́ же, я́же на земли́ Богоявле́нія, страда́льчествомъ предвари́въ, му́чениче, въ небе́сная взя́лся еси́ и съ ли́ки му́ченическими во сла́вѣ водвори́лся еси́, идѣ́же даде́ся ти́ благода́ть, я́снѣйше вы́ну зрѣ́ти Боже́ственное явле́ніе, блаже́ннѣйше.

Слеза́ми пре́жде очи́стилъ еси́ твою́ ду́шу, свяще́нне, и по́двигами по́стничества, послѣди́ же страда́льчествомъ просвѣти́лся еси́ Ону́фріе, и излія́ніемъ Христа́ ра́ди кро́ве твоея́ честны́я пресла́вно украси́лся еси́, тѣ́мже и прія́лъ еси́ отъ Христа́ Бо́га вѣне́цъ нетлѣ́нный, я́ко до́блій му́ченикъ и побѣдоно́сецъ, пресла́вне.

Сла́ва, гла́съ 1:

Отве́ргся мíра и предочи́стився въ по́стничествѣ, отъ вся́кія скве́рны пло́ти и ду́ха, всече́стне Ону́фріе, ве́сь боже́ственъ бы́лъ еси́, живя́ я́ко а́нгелъ въ тѣлеси́. Приложи́въ же къ по́стничеству е́же о вѣ́рѣ страда́льчество, сугу́бъ вѣне́цъ прія́лъ еси́ отъ Христа́, съ преподо́бными и му́ченики прославля́емь, моли́ся о душа́хъ на́шихъ.

И ны́нѣ, предпра́зднства.

На стихо́внѣ [стихи́ры], гла́съ 2. Подо́бенъ: До́ме Евфра́ѳовъ.

Гряди́, все́ мно́жество христоиме́нныхъ, пѣ́сньми пра́ведно почти́мъ но́ваго му́ченика, его́же Христо́съ просла́ви.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Пріиди́те, мучениколю́бцы, и собери́теся вси́, да единому́дренно Христо́ва страстоте́рпца и преподобному́ченика па́мять свѣ́тло торжеству́емъ.

Сти́хъ: Святы́мъ, и́же су́ть на земли́ Его́, удиви́ Госпо́дь [вся́ хотѣ́нія Своя́ въ ни́хъ].

Теце́мъ и мы́, мно́жество благочести́выхъ, и рука́ми да воспле́щемъ, пра́здненственное торжество́ преподобному́ченика Ону́фрія и те́плаго о на́съ къ Бо́гу предста́теля.

Сла́ва, и ны́нѣ:

Ма́ти Іису́сова, съ Ону́фріемъ, боже́ственнымъ страстоте́рпцемъ, на́мъ, осужде́ннымъ, Созда́теля уми́лостивите.

Тропа́рь свята́го. [Пи́санъ на вели́цѣй вече́рни.] Сла́ва, и ны́нѣ, предпра́зднства.
[Ектенія́] и отпу́стъ.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ]. На Го́споди воззва́хъ: стихи́ры предпра́зднства 3 и свята́го стихи́ры [на 7], гла́съ 1. Подо́бенъ: Всехва́льніи му́ченицы.

Свѣтла́ твоя́ побѣ́да, му́дре, я́же воздви́глъ еси́ проти́ву пре́лести, Ону́фріе, свѣ́тло страда́льчество, свѣтла́ твоя́ жи́знь, и свѣ́телъ вѣне́цъ Христо́съ Жизнода́вецъ предложи́ твоему́ честно́му верху́, его́же цѣлу́юще любо́вію, вѣ́рно тя́ почита́емъ.

Свѣ́тъ невече́рній въ тебѣ́ свѣ́тлый, Ону́фріе, Трисо́лнечнаго Божества́ возсія́, въ небе́сная а́ки вторы́й свѣ́тъ показа́ тя́, свѣ́тла лико́мъ а́нгельскимъ, я́ко по прича́стію обоже́нна, досточу́дне, излія́ніемъ честны́я твоея́ кро́ви.

Расточи́лъ еси́ бога́тство тлѣ́нное ни́щимъ и поте́клъ еси́ я́ко ле́въ къ боре́ніемъ, тве́рдый Ону́фріе, су́щимъ му́ченичества, и му́жественно бра́лся еси́ съ сатано́ю отсту́пникомъ, и одержа́лъ еси́ сла́вную надъ ни́мъ побѣ́ду, си́лою Христо́вою укрѣпля́емь.

Мучи́тельскій ме́чь тебѣ́ бы́сть лѣ́ствица къ небе́снымъ и Боже́ственнымъ селе́ніемъ, му́чениче му́дре, идѣ́же всели́лся еси́ со а́нгелы, и съ неизглаго́ланною ра́достію пѣснопое́ши Тро́ицу Трисвяту́ю: Отца́ и Сы́на и Свята́го Ду́ха, и мо́лишися о душа́хъ на́шихъ.

Ины стихи́ры, гла́съ 4. Подо́бенъ: Яко до́бля.

Предпра́зднственное торжеству́юще Христо́ва ны́нѣ Креще́нія, тя́ свѣ́тло вои́стинн[у] торжество́ обрѣто́хомъ: Христа́ бо ра́ди поте́клъ еси́ къ по́двигомъ му́ченическимъ, и подража́я Предте́чи Іоа́нну Преклони́вшему главу́, съ любо́вію всечестну́ю главу́ твою́ подъ ме́чь преклони́лъ еси́, преподобному́чениче Ону́фріе.

По́стничества пу́ть пре́жде ше́ствовалъ еси́, преподо́бне, очища́я сердца́ Боже́ственнымъ Ду́хомъ, послѣди́ же къ пути́ му́ченичества вседу́шно прите́клъ еси́, и страстоте́рпецъ изря́денъ яви́лся еси́, преподобному́чениче Ону́фріе, тѣ́мже и наслѣ́довалъ еси́ го́рнее Ца́рство Госпо́дне и ра́дость неизглаго́ланную.

Не во о́бразѣхъ живопи́сца и у́мственнымъ гада́ніемъ созерца́еши Богочеловѣ́ка Іису́са, я́коже пре́жде, Ону́фріе, но и́стинно лице́мъ къ Лицу́ ны́нѣ предстои́ши Ему́, озаря́емь Боже́ственнымъ Его́ свѣ́томъ, и́мже озари́ и на́съ, чту́щихъ любо́вію честну́ю па́мять твою́, всему́дре.

Соверша́ющія благоче́стно па́мять твою́, всесла́вне, изба́ви отъ искуше́ній и вся́каго озлобле́нія моли́твами твои́ми, преподо́бне Ону́фріе, и умоли́ Христа́, за Него́же подвиза́лся еси́, я́ко да обря́щемъ грѣхо́въ очище́ніе въ де́нь суда́, и муче́нія изба́вимся, и живота́ вѣ́чнаго улучи́мъ.

Сла́ва, гла́съ 8:

Уя́звленный се́рдцемъ Боже́ственнымъ раче́ніемъ Христу́ въ страда́ніяхъ о́бщникъ бы́ти вожделѣ́лъ еси́, тѣ́мже и дости́гъ въ му́жа соверше́нна, въ мѣ́ру во́зраста исполне́нія Христо́ва, соверше́ніемъ Боже́ственныхъ добродѣ́телей, Бо́га соверше́нна Того́ и Человѣ́ка соверше́нна предъ мучи́телей дерзнове́нно исповѣ́далъ еси́, Ону́фріе, Бо́лгарское сла́вное прозябе́ніе, Его́же ра́ди и закла́вся во́лею, вѣне́цъ прія́лъ еси́ побѣ́ды, и дерзнове́ніе имѣ́еши моли́тися о чту́щихъ тя́.

И ны́нѣ, [гла́съ] то́йже:

Іоа́нне Крести́телю, во утро́бѣ позна́вый Мя́ Агнца, на рѣцѣ́ Мнѣ́ послужи́, со а́нгелы Мнѣ́ слу́жбу принеси́, просте́ръ, косни́ся дла́нію верху́ Моему́ пречи́стому. И, егда́ у́зриши го́ры трепе́щущія и Іорда́на возвраща́ющася, съ си́ми возопíй: воплоти́выйся изъ Дѣ́вы въ на́ше спасе́ніе, Го́споди, сла́ва Тебѣ́.

Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На стихо́внѣ [стихи́ры], гла́съ 5. Подо́бенъ: Ра́дуйся, по́стническихъ.

Ра́дуйся, по́стническихъ вои́стинну по́двиговъ Боже́ственными ору́жіи, Ону́фріе, посто́мъ, струя́ми сле́зъ, свяще́нными моли́твами, колѣнопреклоне́ніи, бдѣ́ніи и умерщвле́ніемъ тѣлесе́ вооруже́нный, преподо́бне, и вся́кимъ Боже́ственнымъ всеору́жіемъ Ду́ха одѣ́янный, и страда́льчествовавый твердѣ́йше, и одержа́вый до́блественно свѣ́тлыя побѣ́ды на пре́лести, досточу́дне, и Христа́ то́чію Го́спода всѣ́хъ и Спа́са проповѣ́давый, Его́же моли́твами твои́ми на́мъ уми́лостивый.

Сти́хъ: Ди́венъ Бо́гъ во святы́хъ Свои́хъ, Бо́гъ Изра́илевъ.

Ра́дуйся, преподобному́чениче Христо́въ, Бо́лгарская о́трасле честна́я, боже́ственное воспита́ніе Аѳо́нское, сла́во страда́льцевъ и благолѣ́піе преподо́бныхъ, Ону́фріе, вѣ́рныхъ вели́кое утвержде́ніе, Це́ркве основа́ніе вои́стинну непоколеби́мое, проповѣ́дниче яснѣ́йшій Божества́ Христо́ва, низложи́телю пре́лести, нечести́выхъ обличе́ніе, предста́телю Болга́ріи и защи́тниче Хíоса, его́же освяти́лъ еси́ излія́ніемъ честны́хъ крове́й твои́хъ.

Сти́хъ: Святы́мъ, и́же су́ть на земли́ Его́, удиви́ Госпо́дь [вся́ хотѣ́нія Своя́ въ ни́хъ].

Ра́дуйся, богому́дре Ону́фріе, преподо́бныхъ но́вое приложе́ніе, треблаже́нне; ра́дуйся, побо́рниче вѣ́ры и обличи́телю пре́лести, прія́вый отъ Христа́ му́дрость и уста́ богода́нная, и́мже проти́вящіися не возмого́ша ничесо́же противорещи́ или́ препре́ти тя́, богоглаго́ливаго исповѣ́дника: Христа́ бо имѣ́лъ еси́ глаго́люща въ тебѣ́, блаже́нне.

Сла́ва, гла́съ 6:

Въ вѣ́рѣ, я́же къ Бо́гу, боговѣ́дѣніе прія́въ, въ зна́ніи е́же къ себѣ́ любы́ стяжа́въ, въ любви́ же, е́же въ добродѣ́телѣхъ соверше́нно дости́гъ, мзду́ прія́лъ еси́, е́же кро́вію сконча́тися, я́коже жела́лъ еси́, треблаже́нне, и о́бщникъ бы́ти страсте́мъ Христо́вымъ сподо́бился еси́, Его́же не преста́й моля́, о соверша́ющихъ вѣ́рою и любо́вію блаже́нное твое́ страда́льчество.

И ны́нѣ, гла́съ то́йже:

Гряде́тъ ко Іорда́ну Христо́съ Истина крести́тися отъ Іоа́нна, и рече́ къ Нему́: а́зъ тре́бую отъ Тебе́ крести́тися. И Ты́ ли гряде́ши ко мнѣ́? Не смѣ́ю, сѣ́но, прикосну́тися Огню́: Ты́ мя́ освяти́, Влады́ко, Боже́ственнымъ явле́ніемъ Твои́мъ.

Тропа́рь, гла́съ 4:

Тече́ніемъ сле́зъ, удруче́ніемъ поста́, непреста́нною моли́твою и колѣнопреклоне́ніемъ, Ону́фріе всечу́дне, и всено́щными стоя́ньми, о́гнь невеще́ственный Госпо́днія любве́ въ се́рдцѣ твое́мъ, преподо́бне, возжже́ся, и за Христа́ безбоя́зненно на сме́рть поте́клъ еси́, тѣ́мже и Христо́съ къ ли́ку му́чениковъ и преподо́бныхъ тя́ сопричте́. Его́же моли́ спасти́ся душа́мъ на́шимъ.

Сла́ва, и ны́нѣ, предпра́зднства.



НА УТРЕНИ,
[На Бо́гъ Госпо́дь: Тропа́рь предпра́зднства, два́жды. Сла́ва, свята́го. И ны́нѣ, предпра́зднства.]

По 1-й каѳи́смѣ сѣда́ленъ, гла́съ 1. Подо́бенъ: Гро́бъ Тво́й, Спа́се.

Утреннююще твоя́ восхваля́емъ по́двиги въ пѣ́ніяхъ и пѣ́снехъ, я́же подъя́лъ еси́ до́блественно, Ону́фріе всечу́дне, въ по́стничествѣ удруча́емь, и потща́лся еси́ ху́ждшее покори́ти лу́чшему и пло́ть порабо́тати ду́ху.

Сла́ва, то́йже. И ны́нѣ, предпра́зднства, гла́съ [4]. Подо́бенъ: Ско́ро предвари́.

Се́ прихо́дитъ ко Іорда́ну Христо́съ, приглаша́етъ же Предте́чу: гряди́ и крести́ вѣ́рно ве́сь очища́ющаго мíра грѣ́хъ рѣчны́ми струя́ми, простри́ твою́ ру́ку къ верху́ Моему́ Боже́ственному, руки́ бо прегрѣше́ніе пріидо́хъ исцѣли́ти.

По 2-й каѳи́смѣ сѣда́ленъ, гла́съ 3. Подо́бенъ: Боже́ственныя.

Умре́ти возмнѣ́лся еси́ неи́стовнымъ, преподобному́чениче, и вмѣни́ся, и́же ко Го́споду тво́й исхо́дъ озлобле́ніе и ше́ствіе твое́, е́же къ небеси́, суему́дреннымъ кончи́ну су́етну, но ми́ръ Боже́ственный отъ Бо́га даде́ся ти́, и́же вся́къ у́мъ, Ону́фріе, превосхо́дитъ.

Сла́ва, то́йже. И ны́нѣ, предпра́зднства, гла́съ 4. Подо́бенъ: Вознесы́йся.

Царя́ всѣ́хъ и Влады́ку на креще́ніе, вѣ́рніи, зря́ще, боголѣ́пно гряду́ща, воспои́мъ Его́, стези́ серде́цъ на́шихъ угото́вимъ любо́вію, скве́рны отмыва́юще лю́тыхъ прегрѣше́ній: се́ бо спасти́ ро́дъ человѣ́ческій на Іорда́нскія струи́ прихо́дитъ.

[Поліеле́й и велича́ніе:

Ублажа́емъ тя́, преподобному́чениче Ону́фріе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Въ со́нмищѣ предста́въ злочести́выхъ ага́рянъ, я́сно проповѣ́далъ еси́ Христа́, Бо́га и Человѣ́ка, Содѣ́теля же всего́ и Влады́ку, и дерзнове́нно обличи́лъ еси́ злоче́стіе и́хъ, страда́льче до́блественне, и мече́мъ во главу́ усѣче́нъ бы́лъ еси́, Ону́фріе, тѣ́мже вѣне́цъ нетлѣ́нія отъ Христа́ прія́лъ еси́.

Сла́ва, то́йже. И ны́нѣ, [предпра́зднства], гла́съ 8. Подо́бенъ: Прему́дрость.

Вели́кій Крести́телю Госпо́день, ра́дуйся! Пріи́де бо Христо́съ отъ тебе́ крести́тися. Трепе́щеши, я́ко служи́тель, Влады́ка бо главу́ преклоня́етъ тебѣ́, прикосни́ся Боже́ственному верху́ содержа́щаго руко́ю вся́ческая и благоволе́ніемъ спаса́ющаго Бо́га ро́дъ человѣ́ческій.

Степе́нна, 1-й антифо́нъ 4-го гла́са. Проки́менъ, [гласъ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же [воздаде́ ми́?] Та́же: Вся́кое дыха́ніе... Ева́нгеліе отъ Ма́рка, зача́ло 37.

По 50-мъ псалмѣ́ стихи́ра, гла́съ 1:

Отве́ргся мíра и предочи́стився въ по́стничествѣ отъ вся́кія скве́рны пло́ти и ду́ха, всечу́дне Ону́фріе, ве́сь боже́ственъ бы́лъ еси́, живя́ я́ко а́нгелъ въ тѣлеси́, приложи́въ же къ по́стничеству е́же о вѣ́рѣ страда́льчество, сугу́бъ вѣне́цъ прія́лъ еси́ отъ Христа́, съ преподо́бными и му́ченики прославля́емь; моли́ся о душа́хъ на́шихъ.

Кано́нъ предпра́зднства со ирмосо́мъ на 6 и свята́го кано́нъ на 8. Гла́съ 1.

Пѣ́снь 1.

Ирмо́съ: Христо́съ ражда́ется — сла́вите! Христо́съ съ небе́съ — сря́щите! Христо́съ на земли́ — возноси́теся! По́йте Го́сподеви, вся́ земля́, и весе́ліемъ воспо́йте, лю́діе, я́ко просла́вися.

Воспѣва́ющему любо́вію па́мять твою́ боже́ственную и свѣтоно́сную, Ону́фріе, просвѣти́тельную Ду́ха благода́ть дарова́тися проси́ ны́нѣ, имѣ́яй дерзнове́ніе ко Христу́, богоблаже́нне, я́ко преподобнострада́лецъ.

Возненави́дѣвъ мíръ, Ону́фріе, обрѣ́лъ еси́ Христа́, вѣ́дя добрѣ́йше, я́ко вся́кое мірско́е наслажде́ніе вражду́ бы́ти Бо́гу, Его́же предпоче́лъ еси́ всѣ́хъ, наслѣ́дникъ и́стинно Его́ быва́емь.

Хра́мъ бы́лъ еси́ богопрія́тенъ Бо́гу велелѣ́пный страда́льчествомъ, тве́рдый страда́льче Ону́фріе, ра́достно соверша́емъ свѣтоно́сную твою́ па́мять, согрѣше́ній очище́ніе воспріе́млюще.

Преподо́бныхъ Аѳо́нскихъ удобре́ніе и но́выхъ страда́льцевъ честносло́віе показа́лся еси́, му́дре Ону́фріе, тѣ́мже тя́ благохва́лимъ я́ко побѣди́теля, взыва́юще согла́сно: чту́щія тя́ ны́нѣ спаси́ моли́твами твои́ми.

Богоро́диченъ: Се́ Дѣ́ва зача́тъ безсѣ́менно Влады́ку тва́ри, я́коже рече́ Иса́ія, роди́ же нетлѣ́нно Бо́га пло́тію, Его́же и нарица́ется ны́нѣ и́мя — вели́каго совѣ́та Ангелъ.

Катава́сія: Глубины́ откры́лъ е́сть дно́...

Пѣ́снь 3.

Ирмо́съ: Пре́жде вѣ́къ отъ Отца́ рожде́нному нетлѣ́нно Сы́ну и въ послѣ́дняя отъ Дѣ́вы воплоще́нному безсѣ́менно, Христу́ Бо́гу возопіи́мъ: вознесы́й ро́гъ на́шъ, Свя́тъ еси́, Го́споди.

Дне́сь въ пѣ́снехъ да почти́тся многострада́льный Ону́фрій, Бо́га бо поче́тшій добродѣ́тельнымъ житіе́мъ и вѣне́цъ сугу́бъ отъ Него́ прія́вый я́ко преподобному́ченикъ Христо́въ. О, сугу́баго дарова́нія!

Труба́ небе́сная показа́ся богогла́сный тво́й язы́къ, проповѣ́дающій посредѣ́ собо́рища беззако́нныхъ Христа́ Бо́га, Ону́фріе, и пре́лесть нечести́выхъ я́сно, му́чениче, облича́ющій.

Прія́лъ еси́ благода́ть вся́къ неду́гъ цѣли́ти, Ону́фріе, прибѣга́ющихъ къ тебѣ́ вѣ́рою и лобыза́ющихъ честны́й тво́й о́бразъ, тѣ́мже, молю́ся, исцѣли́ души́ моея́ и тѣлесе́ лю́тыя стра́сти па́губныя.

Богоро́диченъ: Ма́ти и Дѣ́ва была́ еси́ еди́на, Богоневѣ́сто, я́коже бо пребы́сть неизмѣ́ненъ по воплоще́ніи па́ки Бо́гъ, Иже отъ Тебе́ оболкíй мя́, си́це и по рождествѣ́ Тя́ соблюда́етъ па́ки Приснодѣ́ву.

Сѣда́ленъ, гла́съ 8. Подо́бенъ: Прему́дрость.

Анти́христову пре́лесть въ дѣ́тскомъ во́зрастѣ прія́въ, Христа́ отве́рглся еси́ Спаси́теля твоего́. — Увы́, лю́таго твоего́ прегрѣше́нія! — Въ не́мъ же па́лъ еси́ преле́стію змíя началозло́бнаго, но а́біе ма́ніемъ Боже́ственнымъ воста́лъ еси́ въ вѣ́ру Правосла́вную, умилостивля́я Бо́га прія́ти грѣхо́въ свои́хъ проще́ніе боже́ственными дѣ́лы, всеблаже́нне, Его́же и страда́льчествомъ твои́мъ сла́вно просла́вилъ еси́.

Сла́ва, то́йже. И ны́нѣ, предпра́зднства. Подо́бенъ то́йже.

Вели́кій Крести́телю Госпо́день, ра́дуйся! Пріи́де бо Христо́съ отъ тебе́ крести́тися. Трепе́щеши, я́ко служи́тель, Влады́ка бо главу́ преклоня́етъ тебѣ́, прикосни́ся Боже́ственному верху́ содержа́щаго руко́ю вся́ческая и благоволе́ніемъ спаса́ющаго Бо́га ро́дъ человѣ́ческій.

Пѣ́снь 4.

Ирмо́съ: Же́злъ изъ ко́рене Іессе́ева и цвѣ́тъ отъ него́, Христе́, отъ Дѣ́вы прозя́блъ еси́, изъ горы́, Хва́льный, приосѣне́нныя ча́щи прише́лъ еси́, вопло́щся отъ Неискусому́жныя, Невеще́ственный и Бо́же, сла́ва си́лѣ Твое́й, Го́споди.

Привре́менную сла́ву и че́сть оста́вилъ еси́, Ону́фріе, и сраспя́лся еси́ Зижди́телю твоему́, мучи́телемъ тве́рдо противостоя́, и усѣ́ченъ бы́въ во свяще́нную главу́, я́ко же́ртва Бо́гу соверше́нна и благоуго́дна прине́слся еси́.

Скве́рную пучи́ну страсте́й, Ону́фріе, изсуши́лъ еси́ поще́ніемъ и моли́твою, и взя́лся еси́ къ небе́снымъ, ра́нами му́ченичества я́ко въ сла́вѣ украша́емь; моли́ прилѣ́жно о чту́щихъ тя́, свя́те.

Вси́ вѣ́рніи ра́достно пое́мъ тя́, Ону́фріе, я́ко посрами́вша вражде́бную де́рзость супоста́тъ, небоя́зненною благода́тію Христа́, Влады́ки всѣ́хъ, Его́же моли́ при́сно о соверша́ющихъ па́мять твою́.

Богоро́диченъ: Блаже́нъ язы́къ, Препѣ́тая Чи́стая, и́же сподо́бися чести́ Рождество́ Твое́ вѣ́рно, Правосла́віемъ, и уче́ніемъ, и дѣ́лы, и́стиннѣ явля́я вся́ о́бразы воплоще́нія Сы́на Твоего́.

Пѣ́снь 5.

Ирмо́съ: Бо́гъ Сы́й ми́ра, Оте́цъ щедро́тъ, вели́каго Совѣ́та Твоего́ Ангела, ми́ръ подава́юща, посла́лъ еси́ на́мъ; тѣ́мъ, богоразу́мія къ свѣ́ту наста́вльшеся, отъ но́щи у́тренююще, славосло́вимъ Тя́, Человѣколю́бче.

Преподо́бно имѣ́я жела́ніе къ Бо́гу, на горѣ́ Аѳо́нстѣй, му́дре, навы́клъ еси́, Ону́фріе, посту́ и моли́твамъ, та́же поте́клъ къ по́двигомъ му́ченичества, богому́дре, страда́льчествовалъ еси́ Влады́ки ра́ди твоего́, досточу́дне.

Вси́ тя́ предста́теля бога́та имѣ́емъ, му́дре, ко Христу́, Его́же моли́, Ону́фріе, дарова́тися на́мъ согрѣше́ній проще́ніе, и всѣ́хъ бѣ́дствій разрѣше́ніе и спасе́ніе, я́ко да любо́вію, сла́вне, почита́емъ боже́ственную твою́ па́мять.

Бро́вь вели́кую нечести́выхъ низложи́лъ еси́ глаго́лами, му́чениче му́дре: простото́ю бо слове́съ твои́хъ проповѣ́далъ еси́ Христа́, еди́наго Бо́га всѣ́хъ, того́ ра́ди и усѣ́ченъ бы́въ во главу́, и вѣне́цъ нетлѣ́нный прія́лъ еси́, Ону́фріе.

Богоро́диченъ: Иму́щи я́ко Ма́ти дерзнове́ніе ко Христу́ Бо́гу, Чи́стая, отъ ага́рянскихъ ча́дъ изба́витися на́мъ моли́ при́сно, и отъ вся́каго вре́да и всегда́ благода́рно сла́вити Его́, утверди́, Пренепоро́чная Дѣ́во.

Пѣ́снь 6.

Ирмо́съ: Изъ утро́бы Іо́ну младе́нца изблева́ морскíй звѣ́рь, якова́ прія́тъ; въ Дѣ́ву же все́льшееся Сло́во и пло́ть пріе́мшее про́йде, сохра́ншее нетлѣ́нну: Его́же, бо не пострада́ истлѣ́нія, Ро́ждшую сохрани́ неврежде́нну.

Ме́чь разлучи́ главу́ твою́ отъ тѣ́ла твоего́, му́дре, и ны́нѣ возлетѣ́лъ еси́ въ небе́сная селе́нія, лику́я съ ли́ки му́ченикъ предстои́ши престо́лу Христо́ву, Ону́фріе, Его́же моли́ оставле́ніе прегрѣше́ній на́мъ дарова́ти.

Вверга́ется во глубину́ морску́ю тѣ́ло твое́ по усѣкнове́ніи, тве́рдый Ону́фріе, ду́хъ же тво́й взы́де къ небеси́ въ селе́ніихъ святы́хъ, съ ни́ми же ра́дуяся, му́дре, моли́ о благохва́лящихъ тя́, дарова́тися душе́вное спасе́ніе.

Ми́лостива на́мъ бы́ти Еди́наго Человѣколю́бца Бо́га честны́ми твои́ми мольба́ми содѣ́лай, о преподобнострада́льче Ону́фріе! Бо́лгарская о́трасль и Аѳо́нскій благоуха́нный ши́пче, я́ко да любо́вію соверша́емъ по́двигъ тво́й, му́дре, его́же Христо́съ просла́ви, я́ко за Него́ страда́льчествовавша твердѣ́йше.

Богоро́диченъ: Марíе, Бо́жіе жили́ще, мене́, жили́ще бы́вша лука́выхъ бѣсо́въ дѣ́лы скве́рными, и си́хъ исполня́ющаго во́лю безу́мно, покая́ніемъ мя́ яви́ Бо́гу жили́ще.

Конда́къ, гла́съ 3. Подо́бенъ: Дѣ́ва дне́сь.

Свѣ́тлое твое́ страда́льчество и боже́ственное усѣкнове́ніе, сошло́ е́сть со свяще́ннымъ Рождество́мъ Христо́вымъ, узрѣ́ся же и съ Боже́ственнымъ Богоявле́німъ, имѣ́ющее, преподобному́чениче, сла́ву обою́ду свѣ́тлу, сла́вне Ону́фріе, страда́льче Христо́въ.

Икосъ:
Въ по́стничествѣ пе́рвѣе и послѣди́ въ страда́льчествѣ украси́вшагося Ону́фрія боже́ственнаго, пріиди́те, о христолю́бцы и мучениколю́бцы, восхва́лимъ, дивя́щеся боже́ственнымъ его́ исправле́ніемъ: отрече́ніемъ отъ мíра и повинове́ніемъ Христу́, отсѣче́ніемъ своея́ во́ли, присноте́чными слеза́ми, продолжи́тельными во дне́хъ и но́щехъ поще́ніями, протя́жными моли́твами и всено́щнымъ стоя́ніемъ, сокруше́ніемъ серде́чнымъ, несравне́ннымъ умиле́ніемъ и смире́ніемъ, Христа́ па́ки пріобрѣ́те, и́хже ра́ди и испроси́ у Него́, е́же сконча́тися кро́вію, си́мъ, глаго́лю, чудя́щеся и, воскли́кнувше, возопіе́мъ ему́: Ону́фріе блаже́нне, сла́во и похвало́ всея́ Болга́ріи, не преста́й моли́ти о на́съ, восхваля́ющихъ тя́ вѣ́рно и чту́щихъ па́мять твою́, страда́льче Христо́въ.

Пѣ́снь 7.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Ты́, му́чениче Ону́фріе, неле́стными уче́ніи лю́тую пре́лесть оста́вивъ, Боже́ственнымъ украше́ніемъ нетлѣ́нія украси́лся еси́, и Христо́вымъ страда́льцемъ сочи́слился еси́, вопія́: отце́въ Бо́же, благослове́нъ еси́.

Напая́ніемъ кро́ве твоея́, му́чениче, злочести́выхъ суровство́ удави́лъ еси, непобѣди́вся отъ зѣ́льности зо́лъ, всесла́вне, но му́жественно терпя́, му́дре, взыва́лъ еси́: отце́въ Бо́же, благослове́нъ еси́.

Зи́му нече́стія и мра́зъ невѣ́рія разруши́лъ еси́ въ теплоту́ боже́ственныя твоея́ ре́вности, о Ону́фріе, и согрѣ́ялся еси́ возжже́ніемъ Боже́ственнаго Ду́ха, вопія́: Бо́же, благослове́нъ еси́.

Богоро́диченъ: Яко одушевле́нъ виногра́дъ, Дѣ́во, прорасти́ла еси́ на́мъ Гро́здъ зрѣ́лый, источи́вшій вино́ оставле́нія и изсуши́вшій грѣхо́вное пія́нство.

Пѣ́снь 8.

Ирмо́съ: Чу́да преесте́ственнаго росода́тельная изобрази́ пе́щь о́бразъ: не бо́, я́же прія́тъ, пали́тъ ю́ныя, я́ко ниже́ о́гнь Божества́ — Дѣ́вы, въ Ню́же вни́де утро́бу. Тѣ́мъ, воспѣва́юще, воспое́мъ: да благослови́тъ тва́рь вся́ Го́спода и превозно́ситъ во вся́ вѣ́ки.

Иночествующіи ли́ки горы́ Аѳо́нскія ра́дующеся пою́тъ честно́е твое́ страда́льчество, и́мже возше́лъ еси́ на небеси́ ра́дуяся, съ ни́ми же и мы́ тя́ восхваля́юще, вопіе́мъ: да благослови́тъ тва́рь вся́ Госпо́дня Го́спода и превозно́ситъ во вся́ вѣ́ки.

Яко престо́лъ Бо́жій показа́лся еси́, страстоте́рпче, проповѣ́дуя Его́ всесвято́е и́мя, Ону́фріе, предъ нечести́выми и христоненави́стными мучи́тельми мно́гимъ дерзнове́ніемъ, тѣ́мже и зако́нно соверши́въ до́брый тво́й по́двигъ, прія́лъ еси́ вѣне́цъ пра́вды отъ руки́ Госпо́дни.

Се́ свѣтоза́рное торжество́ су́щаго преподобному́ченика возсія́, озаря́ющее концы́ вселе́нныя и веселя́щее сердца́ мона́шествующихъ, присту́пимъ у́бо усе́рдно, цѣлу́юще его́ честно́е изображе́ніе.

Богоро́диченъ: Дре́вле Тя́ прозя́бшій Ааро́новъ же́злъ вообрази́, Дѣ́во, Ты́ бо еди́на родила́ еси́ прозябе́ніе безъ му́жа, небе́сный ны́нѣ до́ждь пріе́мши во чре́вѣ, тѣ́мъ, веселя́щеся, Тя́ Богоро́дицу по до́лгу согла́сно вси́ пое́мъ и превозно́симъ во вся́ вѣ́ки.

Пѣ́снь 9.

Ирмо́съ: Та́инство стра́нное ви́жу и пресла́вное: не́бо — верте́пъ; престо́лъ херуви́мскій — Дѣ́ву; я́сли — вмѣсти́лище, въ ни́хже возлеже́ Невмѣсти́мый — Христо́съ Бо́гъ, Его́же, воспѣва́юще, велича́емъ.

Горѣ́ Боже́ственныя свѣ́тлости сподо́бился еси́, страда́льче Ону́фріе, и просвѣща́еши ны́нѣ свяще́нными свѣтлостьми́ соверша́ющія благонаро́читую твою́ па́мять и любо́вію покланя́ющіяся всечестно́му твоему́ изображе́нію.

Сла́ва Аѳо́нскихъ и́ноковъ и му́чениковъ показа́лся еси́, Ону́фріе, тѣ́мже удали́ отъ на́съ тму́ искуше́ній моли́твами твои́ми, свя́те, чту́щихъ честну́ю твою́ па́мять и любо́вію тя́ блажа́щихъ.

Ты́ яви́лся еси́ сла́ва земли́ Бо́лгарскія и похвала́ о́строва Хíоса, я́ко въ пе́рвѣй прозя́блъ и воспита́лся еси́, въ Хíосѣ же страда́льчествовалъ еси́, тѣ́мже ны́нѣ по до́лгу и любви́, не преста́й закрыля́ти и избавля́ти и́хъ отъ вся́кихъ бѣ́дъ и искуше́ній, преподобному́чениче Ону́фріе.

Суди́щу беззако́нныхъ предста́лъ еси́, страстоте́рпче, и небоя́зненнымъ мудрова́ніемъ проповѣ́далъ еси́ Іису́сова Божества́, и усѣ́ченъ бы́въ во главу́, Ону́фріе, вѣнце́мъ нетлѣ́ннымъ украси́лся еси́, досточу́дне.

Въ ти́хое приста́нище устреми́лся еси́, свободи́вся отъ треволне́ній и бу́ри нече́стія, Ону́фріе, и предста́лъ еси́ Влады́цѣ Христу́, веселя́ся, Его́же моли́ при́сно о на́съ, восхваля́ющихъ тя́, блаже́нне.

Богоро́диченъ: Воплоще́нна Сло́ва, но непрело́жна вѣ́мъ, тѣ́мже воспѣва́ю Его́ вѣ́рно во двою́ у́бо существу́, ѵпоста́си же еди́нѣй, Его́же вои́стинну я́ко Богочеловѣ́ка проповѣ́дая, пѣ́снь соверша́ю.

Свѣти́ленъ. Подо́бенъ: Со ученики́ взы́демъ.

Страстоте́рпца дне́сь и преподо́бнаго па́мять, вси́ вѣ́рніи, почти́мъ, въ пѣ́ніи и пѣ́снехъ вопію́ще ему́ любо́вію: доблему́дренне Ону́фріе, моли́ Его́же возлюби́[лъ] и проповѣ́далъ еси́, да́ти на́мъ согрѣше́ній оставле́ніе, и изба́витися бу́дущаго муче́нія и улучи́ти Ца́рствія.

Сла́ва. Подо́бенъ: Не́бо звѣзда́ми.

Преподобному́чениче Госпо́день, Ону́фріе страстоно́сче, по́двиги твоя́ пое́мъ и благоговѣ́йно соверша́емъ присночти́мую па́мять свѣ́тлаго твоего́ му́ченичества.

И ны́нѣ, предпра́зднства. Подо́бенъ: Посѣти́лъ ны́ е́сть.

Гото́вися, Завуло́не, Нефѳали́ме, украси́ся, подыми́, Іорда́не, Зижди́теля всѣ́хъ и Бо́га, пло́тію къ тебѣ́ гряду́ща, на́ша грѣхи́ измы́ти хотя́щаго.

На хвали́техъ стихи́ры предпра́зднства 3 и свята́го 3. Подо́бенъ: Всехва́льніи му́ченицы.

Всехва́льный му́чениче Христо́въ, страда́льче Ону́фріе, пріими́ любо́вь Боже́ственную, усе́рдно тя́ сла́вящаго въ пѣ́ніихъ и пѣ́снехъ уми́льныхъ, и помина́й оте́чество твое́ со всѣ́ми благохва́лящими тя́, и твои́ми къ Бо́гу моли́твами изба́ви отъ вся́кихъ бѣ́дъ и скорбе́й.

Бо́гу предстоя́ ны́нѣ, всесла́вне Ону́фріе, и Боже́ственныя сла́вы исполня́емь, съ чи́нми преподо́бныхъ и боже́ственныхъ му́ченикъ счиня́емь, помина́й пою́щія твое́ боже́ственное страда́льчество, и покланя́ющіяся вѣ́рою и любо́вію подо́бію зра́ка твоего́.

По отсѣче́ніи твоея́ главы́, въ мо́ре вве́ржеся суровство́мъ суде́й боже́ственное твое́ тѣ́ло, страстоте́рпче, со все́ю окрова́вленною пе́рстію, не терпя́ще зрѣ́ти бы́ти покланя́емо отъ вѣ́рныхъ люде́й; но [мы́], зря́ще, цѣлу́емъ зра́ка твоего́ боже́ственное изображе́ніе.

[Ина] стихи́ра, гла́съ 2. Подо́бенъ: Егда́ отъ дре́ва.

Ве́сь во у́жасѣ покланя́юся свяще́нному твоему́ и вожделѣ́нному начерта́нію, да́ждь ми́ у́бо исцѣле́ніе твои́ми къ Бо́гу моли́твами души́ и тѣлесе́, и упра́ви еще́ ве́сь живо́тъ мо́й къ стезя́мъ добродѣ́телей, свя́те Ону́фріе, бли́жній Христа́ Бо́га моего́, и моея́ ско́рби утѣше́ніе.

Сла́ва, гла́съ 8:

Си́лою Боже́ственною отъ прича́стія Пречи́стыхъ Та́инствъ обо́лкся, небоя́зненно предста́лъ еси́ беззако́нному суди́щу, и Христа́ имѣ́я въ себѣ́ глаго́люща, дерзнове́нно изобличи́лъ еси́ злоиме́нное нече́стіе, въ со́нмищѣ мно́гихъ мучи́телей, отъ ни́хже а́біе во главу́ усѣ́ченъ бы́въ, со Христо́мъ совокупи́лся еси́, Ону́фріе, и живе́ши съ Ни́мъ вѣ́чно; сла́ва Его́ бла́гости. Но, о Бо́лгарская похвало́ и Аѳо́нское украше́ніе, я́ко имѣ́я къ Нему́ дерзнове́ніе, не преста́й моля́ся о ро́дѣ твое́мъ и всѣ́хъ восхваля́ющихъ тя́.

И ны́нѣ, предпра́зднства, гла́съ 6:

Да испо́лнится Отчее благоволе́ніе: пріидо́хъ на зе́млю, одѣ́явся въ нищету́, не́бо Мнѣ́ престо́лъ, земля́ же подно́жіе, тебѣ́ же вы́ю преклоня́ю, на сіе́ бо пріидо́хъ, Мене́ крести́, во Мнѣ́ человѣ́ковъ очища́юща прегрѣше́нія.

Славосло́віе вели́кое, [ектеніи́,] ча́съ 1-й и отпу́стъ.



НА ЛИТУРГІИ,

Блаже́нна отъ кано́на предпра́зднства 3-я пѣ́снь на 4, и свята́го пѣ́снь 6-я на 4. [Проки́менъ, гла́съ 7: Восхва́лятся преподо́бніи во сла́вѣ* и возра́дуются на ло́жахъ свои́хъ. Сти́хъ: Воспо́йте Го́сподеви пѣ́снь но́ву, хвале́ніе Его́ въ це́ркви преподо́бныхъ.] Апо́столъ къ Тимоѳе́ю, зача́ло 291. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́, ро́дъ пра́выхъ благослови́тся.] Ева́нгеліе отъ Ма́рка, зача́ло 37. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Коне́цъ и Бо́гу сла́ва.

Источникъ: Служби на българските светии. — Света Гора, Атон: Славянобългарски манастир «Св. Вмчк Георги Зограф», 2007. — Л. 5-19.

/ Къ оглавленію раздѣла /


Наверхъ / Къ титульной страницѣ

0