Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 4-й де́нь.
Па́мять и́же во святы́хъ отца́ на́шего Евста́ѳія, архіепи́скопа Се́рбскаго.

НА ВЕЛИЦѢЙ ВЕЧЕРНИ,
Стихологису́емъ: Блаже́нъ му́жъ.., [1-й антифо́нъ]. На Го́споди воззва́хъ... поста́вимъ стихи́ръ 6. Гла́съ 6. Подо́бенъ: Все́ отло́жше.

Всѣ́хъ мірски́хъ отре́кся, блаже́нне,* духо́внымъ прилѣпи́лся еси́,* плотска́я бо игра́нія и земны́я по́хоти* посто́мъ и всено́щнымъ бдѣ́ніемъ покори́въ,* моли́твами же и слеза́ми, я́же посѣ́явъ,* съ весе́ліемъ пожа́лъ еси́,* тѣ́мже просла́вльшаго святу́ю па́мять твою́ Христа́ Бо́га* со дерзнове́ніемъ моли́ о душа́хъ на́шихъ. [Два́жды.]

Вся́ воспрія́лъ еси́, преосвяще́нне уго́дниче Госпо́день,* всю́ду бо разда́лъ еси́ ста́ду твоему́ Боже́ственная сла́дости уче́нія,* и́миже наслажда́ешися,* утвержда́емь и огражда́емь отъ вра́жія собла́зна и молвы́,* тѣ́мже Христа́ прославля́емъ, да́вшаго тебѣ́ такову́ю благода́ть,* Его́же со дерзнове́ніемъ моли́ о душа́хъ на́шихъ. [Два́жды.]

Сла́ва, гла́съ 6:

На высоту́ добродѣ́телей небе́сныхъ восте́клъ еси́, велегла́сно всѣ́хъ, притека́ющихъ къ тебѣ́, научи́лъ еси́ небе́сная му́дрствовати, земны́хъ же попече́ній и плотски́хъ похоте́й дале́че уклоня́тися, тѣ́мже, я́ко фи́никсъ, процвѣ́лъ еси́ въ дому́ Госпо́дни и, я́ко кри́нъ, благоуха́еши, небе́сныя красо́ты наслажда́яся, сего́ ра́ди, о всече́стне Евста́ѳіе, непреста́нно моли́ Христа́, да спасе́тъ ду́ши на́ша.

И ны́нѣ, предпра́зднства.
Вхо́дъ, проки́менъ дне́ и чте́нія три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4-5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. У́зрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо въ себѣ́, ка́ющеся, и въ тѣснотѣ́ ду́ха воздо́хнутъ и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ, и во святы́хъ жре́бій его́ е́сть? У́бо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели, и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 1. Подо́бенъ: Всехва́льніи му́ченицы.

Отче Евста́ѳіе,* твои́ устнѣ́ рѣ́ки духо́вныя точа́щи,* напая́ющія вѣ́рою изсо́хшая сердца́,* изыма́я и на пу́ть и́стины наставля́я* заблу́ждшихъ Боже́ственнымъ уче́ніемъ,* всѣ́хъ приве́лъ еси́ въ позна́ніе Единосу́щныя Тро́ицы,* Ейже моли́ся о душа́хъ на́шихъ.

Сти́хъ: Уста́ моя́ возглаго́лютъ прему́дрость* [и поуче́ніе се́рдца моего́ ра́зумъ].

Отче Евста́ѳіе,* не да́лъ еси́ сна́ очесе́мъ,* ни вѣ́ждома свои́ма дрема́нія,* до́ндеже ду́шу и тѣ́ло свое́ отъ по́хоти свободи́лъ еси́,* слеза́ми облива́яся,* тѣ́мже моли́ся Христу́ Бо́гу* дарова́ти душа́мъ на́шимъ ми́ръ и ве́лію ми́лость.

Сти́хъ: Уста́ пра́веднаго поуча́тся [прему́дрости,* и язы́къ его́ возглаго́летъ су́дъ].

Отче Евста́ѳіе,* нача́льникъ святи́телемъ сподо́бился еси́ бы́ти* и, я́ко первопресто́льникъ незло́бивъ,* сама́го себе́ въ непоро́чну же́ртву прине́слъ еси́ Христу́,* Его́же моли́ дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 4:

Па́мять твоя́, Евста́ѳіе, іера́рше Госпо́день, просія́ па́че со́лнечнаго сія́нія, озаря́ющи ста́ду твоему́ сердца́ и просвѣща́ющи мы́сли: и́бо вои́стинну ра́ка боже́ственныхъ моще́й твои́хъ, я́ко труба́ велегла́сна свидѣ́тельствуетъ сіе́, облагоуха́ющи ны́ дарова́ніемъ Боже́ственнаго Ду́ха, прогоня́етъ грѣхо́вную тму́ и науча́етъ на́съ благодари́ти и сла́вити Христа́ Го́спода, тя́ просла́вльшаго вѣ́чною сла́вою.

И ны́нѣ, предпра́зднства.

Тропа́рь, гла́съ 4:

Избра́нъ отъ Бо́га, возлю́бленъ отъ люде́й, архіере́овъ Боже́ственная красото́, о́тче Евста́ѳіе, а́нгеловъ сослужи́телю, та́инъ же Боже́ственныхъ проповѣ́датель бы́лъ еси́, тѣ́мже моли́ Христа́ Бо́га со всѣ́ми святы́ми изба́витися отъ вся́кихъ зо́лъ моли́твами твои́ми, блаже́нне, и спасти́ся на́мъ, чту́щимъ любо́вію святу́ю па́мять твою́.

Сла́ва, и ны́нѣ, предпра́зднства.



НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, свята́го. И ны́нѣ, предпра́зднства.

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Се́ приспѣ́ свѣ́тлая па́мять и торжество́ святи́теля Христо́ва Евста́ѳія: сего́ ра́ди пріиди́те, соше́дшеся, да пра́зднуемъ свѣ́тло и, соста́вльше ли́ки, похва́лимъ его́, вопія́: ра́дуйся, честны́й свѣти́льниче земли́ Се́рбскія, красото́ ея́ и сла́во, то́чиши бо чудеса́ и излива́еши исцѣле́нія, моля́ся непреста́нно о душа́хъ на́шихъ. [Два́жды.]

Сла́ва, и ны́нѣ, предпра́зднства.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Красотѣ́ дѣ́вственныя и пресвѣ́тлыя добро́ты твоея́ чи́ны а́нгельстіи, зря́ще, удиви́шася и глаго́лаша: ка́ко, во пло́ти сы́й, безпло́тнаго врага́ побѣди́лъ еси́? Что́ же [тя́] нарече́мъ и мы́, ча́да твоя́? Аще и недоумѣ́емъ, оба́че вопіе́мъ ти́: ра́дуйся, Евста́ѳіе, о́тче преосвяще́нне, святи́телемъ похвало́. [Два́жды.]

Сла́ва, и ны́нѣ, предпра́зднства.

[Велича́ніе:

Велича́емъ тя́, святи́телю о́тче Евста́ѳіе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8:

Прему́дрость вы́шнюю вѣ́дая, а́нгельскому житію́ подража́тель бы́лъ еси́, всѣ́хъ, послу́шающихъ тя́, приве́дъ къ спасе́нію, блаже́нне Евста́ѳіе. Терпѣ́нію бо чи́нъ бы́лъ еси́ и кро́тости удивле́ніе, и́нокомъ о́бразъ и ю́нымъ наста́вникъ, ста́рымъ же крѣ́пость, тѣ́мже и мы́, соше́дшеся, святу́ю па́мять твою́ по до́лгу восхваля́емъ и согла́сно вопіе́мъ ти́, глаго́люще: моли́ Христа́ Бо́га спасти́ся всѣ́мъ на́мъ.

Сла́ва, и ны́нѣ, предпра́зднства.

Степе́нна 1-й антифо́нъ, 4-го гла́са. Проки́менъ, [гла́съ 4]: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Ева́нгеліе отъ Іоа́нна, зача́ло 35, [отъ полу́].

По 50-мъ псалмѣ́ стихи́ра, гла́съ 6:

Излія́ся благода́ть во устна́хъ твои́хъ, преподо́бне о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати [въ] Тро́ицу Единосу́щную во Еди́номъ Божествѣ́.

Кано́нъ предпра́зднству со ирмосо́мъ на 6 и свята́го на 8, его́же краегране́сіе: Благостоя́нію тезоимени́таго Евста́ѳія пѣ́сньми почту́. Гласъ 3.

Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Прему́дрость Бо́жія Всемо́щная, все́льшися въ тя́, о́тче, отъ пеле́нъ назна́мена тя́ благода́тію духо́вною и наставля́я, тѣ́мже всѣ́хъ исправля́еши и науча́еши пѣ́ти си́це: пои́мъ Го́сподеви, сла́вно бо просла́вися.

Крѣпи́теся и мужа́йтеся проти́ву неви́димыхъ бра́ней вра́жіихъ, Госпо́днею по́мощію утвержда́яся и глаго́ля: Го́сподеви пои́мъ, сла́вно бо просла́вися.

Ра́зумъ воспріе́мше небе́сный, весели́теся, земноро́дніи, процвѣте́ бо цвѣ́тъ отъ земна́го ко́рене, свѣтя́щу богосія́нному свѣ́ту, и, богоуго́дно взыва́юще, рце́мъ: пои́мъ Го́сподеви, сла́вно бо просла́вися.

Богоро́диченъ: Изъ чре́ва пре́жде денни́цы рожде́нное отъ Отца́ Превѣ́чное Сло́во Бо́жіе возсія́ на́мъ изъ Тебе́, Браконеиску́сная, и роди́ся, Богоро́дице, науча́я святы́я Своя́ воспѣва́ти: Го́спода по́йте, дѣла́, и превозноси́те во вся́ вѣ́ки.

Катава́сія по уста́ву.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Пе́рвенца показа́ тя́ Госпо́дь ста́ду Своему́ пе́рвенствовати, преосвяще́нна архіере́я, е́же стяжа́ Свое́ю Кро́вію.

Малоу́мнымъ па́ки возвраща́я зѣ́льныя по́мыслы, ко исправле́нію яви́ тя́ Госпо́дь, преосвяще́нне о́тче Евста́ѳіе.

Земли́ вѣ́рныхъ Свои́хъ яви́ тя́ Бо́гъ Сло́во ко исправле́нію благоче́стныхъ дѣя́ній, святи́телю преблаже́нне.

Богоро́диченъ: Изъ Дѣви́ческаго чре́ва яви́лся еси́, Со́лнце Пра́ведное, озаря́яй земны́хъ чу́вствія и наставля́яй вои́стинну къ позна́нію Своего́ Божества́.

Сѣда́ленъ, гла́съ 8:

Повелѣ́нное та́йнѣ, Боже́ственная пріе́мь въ ра́зумѣ свое́мъ, покро́въ возжелѣ́лъ еси́ небе́снаго житія́, ско́ро пріи́де, взе́мый кре́стъ на ра́мо, глаго́лалъ еси́ непреста́нно всѣ́мъ: Преклони́вый схожде́ніемъ небеса́ и пло́ть взе́мь отъ Дѣ́вы, всѣ́хъ велегла́сно зове́тъ спасти́ся, вопи́ти же и глаго́лати: сла́ва неизрече́ннѣй Твое́й ми́лости, Еди́не Преми́лостиве. [Два́жды.]

Сла́ва, и ны́нѣ, предпра́зднства.

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Яко свяще́нный неизрече́нныхъ бла́гъ спасе́нія служи́тель, ве́село во святѣ́й Це́ркви служи́лъ еси́, моли́твами и слеза́ми прилѣ́жно просія́лъ еси́, всѣ́мъ прося́ оставле́ніе грѣхо́въ, и духодви́жно ра́достію вопія́лъ еси́: Го́споди, испо́лнишася вся́ Твоего́ хвале́нія.

На Него́ же упова́лъ еси́, святи́телю, изъ мла́да бо во́зраста, ра́дуяся же, я́ко еле́нь, восте́клъ еси́ на го́ру святу́ю, земна́я вся́ въ мíрѣ оста́вилъ еси́, прилѣпи́вся зако́ну Творца́ и Влады́ки исполне́ніемъ за́повѣди Боже́ственнаго хотѣ́нія, Ему́же, святи́телю, ра́достно вопіе́ши: испо́лнишася вся́ Твоего́ хвале́нія.

Ви́дѣлъ еси́, святи́телю, Сло́во Безнача́льное, пло́тію къ на́мъ прише́дшее и вся́ человѣ́ки спа́сшее, са́мъ бо вся́ мірска́я ни во что́же вмѣни́лъ еси́, усе́рдно вопія́ ко Го́споду: испо́лнишася вся́ Твоего́ хвале́нія.

Богоро́диченъ: Ви́дѣти херуви́момъ и серафи́момъ невозмо́жно отъ Дѣви́ческія кро́ве пло́ть Заи́мствовавшаго и къ на́мъ Прише́дшаго, научи́ всѣ́хъ съ любо́вію вопи́ти Ему́: Свя́тъ еси́, Го́споди.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Свяще́нный смы́слъ изуча́я, пло́ти уго́дія и похотѣ́нія удали́лъ еси́ непреста́ннымъ ру́къ твои́хъ воздѣя́ніемъ и ча́стымъ колѣ́нъ преклоне́ніемъ, о́тче богому́дре, съ ра́достію воспѣва́еши си́це: Тебе́ люблю́, Іису́се Бо́же мо́й, Свѣ́та Невече́рняго и мíромъ влады́чествующаго.

Прему́дрость Бо́жія, избра́вшая гони́теля Па́вла въ сосу́да Себѣ́, изыма́ющая отъ земли́ убо́га и посажда́я на престо́лѣ бога́тѣмъ, прови́дя и тебе́, святы́й архіере́ю Бо́жій Евста́ѳіе, избра́л[а] е́сть въ па́стыря и наста́вника всѣ́мъ лю́бящимъ Христа́, Свѣ́та Невече́рняго и мíромъ влады́чествующа.

Очи́стивъ ду́шу и тѣ́ло отъ скве́рны, преподо́бна, пра́ведна и незло́бива учи́теля себе́ показа́лъ еси́, о́тче блаже́нне, си́рыхъ пита́тель, оби́димыхъ помо́щникъ и страннопріи́мецъ бы́лъ еси́, тѣ́мже со дерзнове́ніемъ вопіе́ши: Тебе́ люблю́, Іису́се Бо́же мо́й, Свѣ́та Невече́рняго и мíромъ влады́чествующа.

Богоро́диченъ: Безлѣ́тнаго въ лѣ́то родила́ еси́, Браконеиску́сная, дѣ́вство и рождество́ сопря́гши па́че ума́, да человѣ́ка обожи́ши, па́че естества́ и ра́зума, Свѣ́та Невече́рняго и мíромъ влады́чествующа.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ — Бо́гъ мо́й.

Сіо́на доше́лъ еси́, блаже́нне, и, гро́бъ Госпо́день усе́рдною любо́вію облобыза́въ, о ка́мень претыка́нія ника́коже потка́лся еси́, благода́тію Бо́жіею сохраня́емь.

Сы́ны человѣ́ческія сотворя́я сына́ми Бо́жіими, потща́лся еси́, блаже́нне, покланя́тися Святѣ́й Тро́ицѣ во Еди́номъ Существѣ́.

Бра́нь и бу́ря отъ вселука́ваго врага́ воздвиза́ется на ны́, ча́дъ твои́хъ, но я́ко имѣ́я ко Христу́ дерзнове́ніе, пода́ждь ста́ду твоему́ благостоя́ніе, я́ко тезоимени́тъ.

Богоро́диченъ: Безлѣ́тнаго во чре́вѣ пріе́мши, Богоро́дице, неизрече́нно Сы́на — Емману́ила, чу́дно воздои́ла еси́ отъ сосе́цъ Твои́хъ во спасе́ніе всѣ́мъ вѣ́рнымъ.

Конда́къ, гла́съ 6. Подо́бенъ: Еже о на́съ.

Свы́ше благода́ть пріе́мь отъ Бо́га, во святи́тельское подо́біе обле́клся еси́ и отъ у́стъ твои́хъ благоче́стно всѣ́хъ научи́лъ еси́ покланя́тися Тро́ицѣ Единосу́щнѣй. Тѣ́мже па́мять твою́ чту́ще, прославля́емъ Бо́га, просла́вльшаго тя́.

Икосъ:

На престо́лѣ сла́вы сѣдя́щаго Бо́га возжелѣ́въ всеусе́рдно, къ Нему́ приве́лъ еси́ вѣ́рное ста́до твое́ и процвѣ́лъ еси́ въ дому́ Госпо́дни, я́ко фи́никсъ, умножа́я и возвыша́я, я́коже ке́дръ, ча́да твоя́, кро́тостію и смире́ніемъ научи́въ и́хъ воспѣва́ти и сла́вити Бо́га, просла́вльшаго тя́.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Авраа́мли же́ртвы подража́въ, о́тче Евста́ѳіе, я́коже о́нъ Исаа́ка, та́ко ты́ твою́ ду́шу прине́слъ еси́ Христу́ въ же́ртву чи́сту и непоро́чну, благоче́стно воспѣва́я: благослове́нъ Бо́гъ оте́цъ на́шихъ.

Ро́да зе́мна изба́вити, грѣхи́ сластолюби́выхъ очища́я воздѣя́ніемъ ру́къ, всено́щнымъ бдѣ́ніемъ, слеза́ми мно́гими, церко́вною слу́жбою и ча́стымъ воздыха́ніемъ прося́ о ни́хъ Го́спода, Ему́же благоче́стно воспѣва́еши: благослове́нъ Бо́гъ оте́цъ на́шихъ.

Гро́бъ тво́й нетлѣ́нна тя́ соблю́лъ е́сть Бо́жіимъ манове́ніемъ, ра́ди утвержде́нія въ вѣ́рѣ ста́да твоего́, тѣ́мже, ра́ку твою́ цѣлу́юще, зове́мъ: благослове́нъ Бо́гъ оте́цъ на́шихъ.

Богоро́диченъ: Отчею во́лею, осѣне́ніемъ Ду́ха Свята́го прія́ла еси́ Сы́на Бо́жія, Пречи́стая, неизрече́нно поне́сши Его́, родила́ еси́, Ему́же вѣ́рно вопіе́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе твои́, предзря́ще тя́ свяще́нна, возлюби́ша твоего́ уста́ва смире́ніе и кро́тость, испо́лненную Боже́ственнаго уче́нія, отъ медото́чныхъ усте́нъ пѣ́сненно вопію́тъ: благослови́те, вся́ дѣла́ Госпо́дня, Го́спода.

Се́ Жи́знь и Свѣ́тъ всѣ́мъ Христо́съ прибли́жися, воздая́ кому́ждо по дѣло́мъ: нечести́вымъ осужде́ніе, благочести́вымъ благода́ть и сла́ву, велегла́сно вопі[ю́щимъ] Ему́: благослови́те, вся́ дѣла́ Госпо́дня, Го́спода.

По успе́ніи твое́мъ, свяще́нне о́тче Евста́ѳіе, пресели́лся еси́ въ го́рній Іерусали́мъ, на́мъ же оста́вль мо́щи своя́, тѣ́мже вопіе́мъ: благослови́те, вся́ дѣла́ Госпо́дня, Го́спода.

Богоро́диченъ: Се́ Дѣ́ва, я́коже проро́къ глаго́лаше, во чре́вѣ прія́ и роди́ Сы́на Емману́ила, е́же е́сть съ на́ми Бо́гъ, на земли́ яви́ся и съ человѣ́ки поживе́, Ему́же, вѣ́рніи, вопіе́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Дре́вле разумѣва́емѣй же́ртвѣ, зако́номъ принося́щейся, ю́же Бо́жій архіере́й прино́ситъ, Госпо́дня преда́нія па́мятствуя, возно́ситъ хлѣ́бъ и вино́ во оставле́ніе грѣхо́въ, всѣ́мъ я́сно сказу́етъ исповѣ́даніе вѣ́ры во Христа́ Го́спода.

Возда́ждь ми́, — Бо́гу вопія́ше святи́тель, — прича́стія да́ра, е́же вопи́ти Тебѣ́ во Ца́рствіи Твое́мъ и испо́лнитися ми́ Твоего́ весе́лія и въ Тебѣ́ пребыва́ти; тѣ́мже, хва́ляще, велича́емъ Го́спода.

Свяще́ннаго проповѣ́дателя вои́стинну и Бо́жія рачи́теля, гряди́те, обстоя́ще честну́ю ра́ку на́шего учи́теля, усе́рдно воспои́мъ благода́ть Бо́жію, я́же въ не́мъ пребыва́етъ, велича́юще Го́спода.

Богоро́диченъ: Превы́ше обы́чая, неизрече́нно, Дѣ́во Богоро́дице, Христа́ родила́ еси́, Его́же ны́нѣ умоли́ изба́витися на́мъ отъ нахожде́нія пога́ныхъ ага́рянъ и отъ вся́каго вре́да и междоусо́бныя бра́ни, да Тя́ непреста́нно, и́стинную Богома́терь, велича́емъ.

Свѣти́ленъ:

Свяще́нная и свѣтоно́сная, па́че ума́ свѣтлѣ́йшая, о́тче Евста́ѳіе, па́мять твоего́ успе́нія, ю́же свѣ́тло пра́зднуемъ, возсія́ на́мъ дне́сь: сего́ ра́ди сла́вимъ просла́вльшаго тя́ Го́спода, да́вшаго ти́ благода́ть такову́ю, е́юже огражда́еши ста́до твое́. [Два́жды.]

Сла́ва, и ны́нѣ, предпра́зднства.

На хвали́техъ стихи́ры на 4, гла́съ 8:

Отче богому́дре Евста́ѳіе,* мы́сленное о́ко на высоту́ ра́зума впери́въ,* небе́сною му́дростію наслади́лся еси́,* съ не́ю же пита́еши духо́вная ча́да твоя́,* соблюда́я и́хъ отъ вся́кія сѣ́ти,* тѣ́мже не преста́й моля́ся Святѣ́й Тро́ицѣ* спасти́ся на́мъ. [Два́жды.]

Отче богому́дре Евста́ѳіе,* уподо́бился еси́ купцу́, и́щущему до́браго би́сера,* небе́сный же да́ръ въ се́рдцѣ твое́мъ стяжа́лъ еси́* и нелѣ́ностно труди́лся еси́ зѣ́льною ре́вностію о ста́дѣ твое́мъ,* е́же невреди́мо соблю́лъ еси́,* тѣ́мже мо́лимся ти́:* не преста́й моли́тися Христу́,* да спасе́тъ ду́ши на́ша.

Отче богому́дре Евста́ѳіе,* сладкоглаго́ливѣй ла́стовицѣ уподобля́яся,* непреста́нно ста́до твое́ науча́лъ еси́ Боже́ственнымъ уче́ніямъ Христо́вымъ,* Ему́же, я́ко Подвигополо́жнику, подо́бяся,* положи́лъ еси́ ду́шу за о́вцы своя́,* тѣ́мже ча́да твоя́,* усе́рдно обстоя́ще ра́ку моще́й твои́хъ, мо́лятся ти́:* не преста́й моли́тися о на́съ ко Го́споду.

Сла́ва, гла́съ 6:

Се́ пріи́де весе́лое торжество́ и пресвѣ́тлая па́мять богоно́снаго отца́! Ра́дуйся и красу́йся, Се́рбская митропо́ліе, ве́село съ на́ми взыгра́й, взыва́я: уясни́ся добро́та твоя́ па́че луны́ по́лныя, се́ бо святи́телей ве́рхъ, пресла́вный чудотво́рецъ и архипа́стырь Евста́ѳій оби́льную ча́шу духо́внаго питія́ раздае́тъ всѣ́мъ. Тѣ́мже у́бо, о празднолю́бцы, вку́пѣ соше́дшеся, пѣ́сненными похвала́ми увязе́мъ его́, глаго́люще: ра́дуйся, учи́телю благíй, положи́вый ду́шу за о́вцы своя́; ра́дуйся, апо́стольскихъ преда́ній и Правосла́вныя вѣ́ры извѣ́стный храни́телю и побо́рниче; ра́дуйся, сто́лпе непоколеба́выйся злы́мъ богоху́льныхъ еретико́въ лжеуче́ніемъ; ра́дуйся, си́рыхъ и вдо́въ пита́телю, радостотворя́й и на́мъ жи́знь вѣ́чную, чту́щимъ любо́вію святу́ю и всечестну́ю па́мять твою́.

И ны́нѣ, предпра́зднства.
Славосло́віе вели́кое. По трисвято́мъ тропа́рь свята́го и предпра́зднства. Ектеніи́ и отпу́стъ.



НА ЛИТУРГІИ,

Блаже́нна пѣ́снь 3-я и 6-я. Проки́менъ, [гла́съ 1]: Уста́ моя́ возглаго́лютъ прему́дрость,* [и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй]. Апо́столъ ко Евре́омъ, зача́ло 318. [Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

[Зри́:] Аще случи́тся недѣ́ля предъ Просвѣще́ніемъ или́ суббо́та предъ Просвѣще́ніемъ, слу́жбу свята́го Евста́ѳія подоба́етъ соверша́ти во вторы́й де́нь сего́ мѣ́сяца [1].

Примѣчаніе:
[1] Запись на полѣ книги.

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 178 – 181.

/ Къ оглавленію раздѣла /


Наверхъ / Къ титульной страницѣ

0