Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 4-й де́нь.
Предпра́зднство Просвѣще́нія, и Собо́ръ святы́хъ седми́десяти апо́столъ, и преподо́бнаго отца́ на́шего Ѳеокти́ста игу́мена, и́же въ Куку́мѣ Сикелíйстѣмъ.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Клео́пу, Андрони́ка,* Силуа́на же и Ага́ва,* Ана́нію и Фили́ппа,* Про́хора, Никано́ра,* Ру́фа и Сосѳе́на,* Ли́на же и Стахíя, Стефа́на, Ти́мона,* Ерма, Фле́гонта, Ма́рка, Луку́,* Сосипа́тра, Іа́ссона и Га́ія,* и Тихи́ка, и Филимо́на* свяще́нными пѣ́сньми, вѣ́рніи, ублажи́мъ.

Нарки́ссъ и Трофи́мъ,* Ке́сарь, Зи́на и Ариста́рхъ,* Ма́ркъ, Си́ла и Га́ій,* Ермíй и Асинкри́тъ,* Аполло́съ и Ки́фа, Кли́мъ и Іу́стъ,* Куа́ртъ, Ера́стъ, Лука́, Ониси́форъ,* Ка́рпъ и Ево́дъ, Матѳíй и Іа́ковъ,* Урва́нъ и Аристову́лъ,* Тихи́къ и Ариста́рхъ* досто́йно да почтя́тся.

Пу́да, Иродіо́на и Арте́му,* Филоло́га, Оли́мпа же и Родіо́на,* Апе́лла и Амплíя,* Патро́ва и Ма́рка,* Те́ртія и Ѳадде́я,* Епене́та чу́днаго,* Аха́ика же, Аки́лу, Лукíя, Варна́ву,* и Фуртуна́та, и Апо́лла сла́внаго, и Кри́спа* почти́мъ, честны́я богопроповѣ́дники.

Ины стихи́ры преподо́бнаго, гла́съ 2. Подо́бенъ: Егда́ отъ дре́ва.

Егда́ уязви́лъ еси́ ду́шу жела́ніемъ боже́ственнымъ, всеблаже́нне, ра́дуяся, взя́лъ еси́ тво́й кре́стъ, и послѣ́довалъ еси́ Христу́, и, умертви́въ мудрова́ніе плотско́е воздержа́ніемъ, Ду́ха дѣ́йство жи́во воспрія́лъ еси́, рѣши́ти неду́говъ зи́му теплото́ю моли́твъ твои́хъ богопрія́тныхъ, тѣ́мже тя́ согла́сно ублажа́емъ.

Егда́ прилѣ́жными моли́твами и твердѣ́йшимъ поще́ніемъ зри́тельное души́, о́тче, очи́стилъ еси́, хра́мъ бы́лъ еси́ Трисо́лнечнаго Божества́ и, свяще́нства пома́заніе Боже́ственное свято́е пріи́мъ, вну́трь невхо́дныхъ вше́лъ еси́, закала́я тебе́ ра́ди Закла́вшагося, ра́ди сше́ствія Неизглаго́ланнаго.

Кро́токъ, незло́бивъ я́влься, въ цѣ́лости нра́ва, о́тче Ѳеокти́сте, наслѣ́довалъ еси́ кро́ткихъ вои́стинну зе́млю и, прича́стіемъ обожа́емь, пи́щи наслажда́ешися, и ра́дости, и весе́лія и́стиннаго, идѣ́же помина́я не преста́й и́скренно тя́ почита́ющихъ и твое́ соверша́ющихъ боже́ственное успе́ніе.

Сла́ва, и ны́нѣ, гла́съ 3:

Ясенъ у́бо мимоше́дшій пра́здникъ, сла́внѣйшій же настоя́щій де́нь: во о́нъ Спа́су волсви́ поклони́шася, въ се́й же Влады́ку ра́бъ сла́венъ крести́. Та́мо па́стыріе свиря́юще, ви́дѣвше и чудя́хуся, здѣ́ же гла́съ Отчій Единоро́днаго Сы́на проповѣ́да.

На стихо́внѣ стихи́ры, гла́съ 8. Подо́бенъ: Му́ченицы Твои́, Го́споди.

Сы́й Огнь нестерпи́мый, бре́нію и сѣ́ну мнѣ́ су́щу, Христе́ мо́й, что́ святу́ю Твою́ преклоня́еши главу́, ея́же а́нгельская трепе́щутъ мно́жества? — рече́ Іоа́ннъ ко Творцу́, егда́ крести́тися пріи́де. Вели́ко Твое́ е́сть, Благоутро́бне Жизнода́вче, низше́ствіе.

Сти́хъ: Сего́ ра́ди помяну́хъ Тя́ отъ земли́ Іорда́нски и Ермоніи́мски.

Се́ Просвѣще́ніе на́ше, Избавле́ніе, Спасе́ніе, хотя́, предгряде́тъ на Іорда́нѣ обнажи́тися я́вѣ и одѣ́ятися, я́ко ри́зою, вода́ми, обнаже́ніе одѣва́я всѣ́хъ, обна́жшихся змíя совѣ́томъ сопроти́внымъ.

Сти́хъ: Ви́дѣша Тя́ во́ды, Бо́же, ви́дѣша Тя́ во́ды и убоя́шася.

Огнь нестерпи́мый вои́стинну, хотя́, предгряде́тъ ко Іорда́ну очи́стити мя́, сокруше́ннаго преступле́ніемъ лука́вымъ, до́ждь небе́сный пріе́млетъ, посреди́ во́дъ омы́ти мя́ отъ скве́рны мно́гихъ мои́хъ прегрѣше́ній, я́ко Ще́дръ и Многоми́лостивъ.

Сла́ва, и ны́нѣ, гла́съ 6:

Гряде́тъ ко Іорда́ну Христо́съ Истина крести́тися отъ Іоа́нна, и рече́ къ Нему́: а́зъ тре́бую отъ Тебе́ крести́тися. И Ты́ ли гряде́ши ко мнѣ́? Не смѣ́ю, сѣ́но, прикосну́тися Огню́: Ты́ мя́ освяти́, Влады́ко, Боже́ственнымъ явле́ніемъ Твои́мъ.

Тропа́рь, гла́съ 3:

Апо́столи святíи, моли́те ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.

Сла́ва, и ны́нѣ, предпра́зднства:

Гото́вися, Завуло́не, и красу́йся, Нефѳали́ме, Іорда́не рѣко́, ста́ни, подыми́, взыгра́я, крести́тися гряду́ща Влады́ку. Весели́ся, Ада́ме съ прама́терію, не кры́йта себе́, я́коже въ раи́ пре́жде, и́бо, на́ги ви́дѣвъ вы́, яви́ся, да облече́тъ въ пе́рвую оде́жду: Христо́съ яви́ся, всю́ тва́рь хотя́ обнови́ти.


НА ПОВЕЧЕРІИ,
Кано́нъ, его́же краегране́сіе: Вели́каго четвертка́ до́лгую пѣ́снь пою́. Гла́съ 6: Ирмосы́ по два́жды, тропари́ на 6. Та́же ирмо́съ, о́ба ли́ка вку́пѣ.

Пѣ́снь 1.

Ирмо́съ: Сѣче́ное сѣче́тся мо́ре Чермно́е, волнопита́емая же изсуша́ется глубина́, та́яжде ку́пно безору́жнымъ бы́вши проходи́ма и всеору́жнымъ гро́бъ. Пѣ́снь же богокра́сная воспѣва́шеся: сла́вно просла́вися Христо́съ, Бо́гъ на́шъ.

Всевино́вная и пода́тельная жи́зни, безмѣ́рная му́дрость Бо́жія созда́ хра́мъ себѣ́ изъ Чи́стыя Неискусому́жныя Ма́тере, ко Іорда́нскимъ же ны́нѣ струя́мъ гряде́тъ, обогаща́я Божество́мъ земны́хъ на обновле́ніе.

Тайново́дствующи, вся́ созыва́етъ, су́щія отъ язы́къ, Бо́жія Му́дрость къ свѣ́ту, во тмѣ́ пре́жде невѣ́дѣнія несвѣ́тлой лежа́щія, въ позна́ніе Истины возводя́щи, къ Свѣ́ту креще́ніемъ, сердца́ очища́ющимъ и созида́ющимъ Ду́хомъ.

Да послу́шаемъ ны́нѣ проро́ческихъ, соверша́емыхъ Ду́хомъ гласо́въ: креща́яй бо въ Ду́сѣ и огни́, и́детъ Христо́съ ко Іорда́ну. Пріиди́те къ Нему́ и просвѣти́теся, ва́ша бо ли́ца не постыдя́тся.

Пѣ́снь 3.

Ирмо́съ: Госпо́дь Сы́й всѣ́хъ и Зижди́тель Бо́гъ, созда́нное Безстра́стный, обнища́въ, Себѣ́ соедини́лъ еси́ и струя́ми, и́миже хотѣ́лъ еси́ пріити́, Са́мъ Сы́й лю́демъ провозглаша́лъ еси́: во́ду жи́зни почерпи́те и вѣ́рою утверди́теся.

Рѣши́тельную ду́шъ и тѣле́съ ку́пно креще́нія благода́ть, Спа́се, гряде́ши дарова́ти, сего́ ра́ди подава́еши ны́нѣ на́мъ и благода́ть вмѣ́сто благода́ти, зовы́й: во́ду жи́зни почерпи́те и вѣ́рою утверди́теся.

Безу́менъ му́жъ, невѣ́дый Бо́га, растлѣва́ется, и́бо безмѣ́стными начина́ньми лиша́ется отъ вся́каго бла́га и вся́каго отпа́даетъ спасе́нія, его́же ча́сти вси́, Христа́ вѣ́дящіи, да изба́вимся.

Пѣ́снь 4.

Ирмо́съ: Прови́дя проро́къ та́йны Твоея́ неизрече́нное, Христе́, провозгласи́: положи́лъ еси́ крѣ́пкую креще́нія благода́ть, вѣ́рою сіе́ пріе́млющимъ всѣ́мъ во избавле́ніе грѣхо́въ на́шихъ.

На креще́ніе тща́ся, сме́ртнымъ источа́ющее оставле́ніе, обремене́нныя вся́ прегрѣше́ньми зове́ши, злѣ́ въ нечистотѣ́ пожи́вшія, душе́вный поко́й тѣ́мъ, я́ко Ще́дръ, пода́ти обѣщава́я.

Причаща́яйся пло́ти мое́й, да Твоего́ Божества́ пода́си ми́: о́бразъ бо неизмѣ́ненъ сы́й Твоего́ Отца́, вмѣща́ешися подъ ру́ки Твоего́, Спа́се, созда́нія, кромѣ́ грѣха́ Человѣ́къ я́влься, подо́бнымъ очища́я, Сло́ве, подо́бное.

Питіе́, и пома́заніе, и Ду́хъ Твоея́ печа́ти, Спа́се, позна́нія, и та́йная дарова́нія, и даро́въ Боже́ственныхъ досторачи́тельная дѣла́, и́бо Единоро́днаго Тя́ очище́ніе Оте́цъ въ мíръ посла́.

Пѣ́снь 5.

Ирмо́съ: Сою́зомъ боя́зни содержи́мь ны́нѣ, Предте́ча отрица́ется крести́ти, благоговѣ́йно Христа́ ви́дѣвъ, на́га стоя́ща на водѣ́, водо́ю покрыва́ющаго превы́спренняя.

Неодержи́мую держа́щая и превы́спреннюю на возду́сѣ во́ду, бе́здны обуздава́ющая и моря́ востязу́ющая, Бо́жія Му́дрость гряде́тъ ко Іорда́ну, креще́ніе пріе́мля отъ руки́ раба́.

Вообрази́въ человѣ́ческое естество́, креще́ніемъ ны́нѣ гряде́тъ очи́стити Христо́съ, о́блаки не́бо облага́я и одѣва́яйся свѣ́томъ на́гъ зри́тся во Іорда́нскихъ струя́хъ, и руко́ю держи́тся вся́ нося́й.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и, волне́нія не ктому́ терпя́, я́ко Іо́на Влады́цѣ, вопію́ Ти: отъ тли́ мя возведи́.

Го́спода Тя́ вѣ́дяще, небеса́ повѣ́даютъ земли́ Твою́, Спа́се, сла́ву въ Твое́мъ рождествѣ́, ны́нѣ же Оте́цъ Тя́ проповѣ́дуетъ, Сы́на возлю́бленна, креща́емаго.

Скве́рну вся́къ нося́й да омы́етъ ю́ сле́зными ка́плями и Христу́ съ тре́петомъ да присту́питъ, огне́мъ и Ду́хомъ Боже́ственнымъ очи́стити иду́щему естество́ на́ше.

Пѣ́снь 7.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Помава́я главо́ю ко враждѣ́, никто́же ле́стно да дви́жетъ, и́скреннему зло́ возда́ти злѣ́ вмѣ́сто зла́ поуча́яся, но въ любви́ Го́спода я́вльшагося да почестви́мъ.

Вы́, Христо́вы я́ко дру́зи, ма́ло спостражди́те вообра́жшемуся, и гряду́щему креще́ніе прія́ти, и я́вльшемуся по на́мъ о́браза на очище́ніе и прегрѣше́ній на избавле́ніе.

Со Мно́ю а́ще кто́ сни́детъ и спогребе́тся креще́ніемъ, со Мно́ю сла́вы наслади́тся и воскресе́нія, — Христо́съ ны́нѣ возвѣща́етъ, Его́же вѣ́рно да усря́щимъ.

Пѣ́снь 8.

Ирмо́съ: За зако́ны оте́ческія блаже́нніи въ Вавило́нѣ ю́ноши предбѣ́дствующе, царю́ющаго оплева́ша повелѣ́ніе безу́мное и, совоку́плени, и́мже не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Гости́теліе, Бо́жія пи́щи въ Виѳлее́мѣ му́дрѣ напита́вшеся, со а́нгелы же просла́вльше, и па́стырьми, и волхвы́ Вопло́щшагося, ны́нѣ же ко Іорда́ну та́инственно и́демъ, ви́дяще та́инство ве́ліе, е́же Христо́съ Са́мъ соверша́етъ, Его́же превозно́симъ во вся́ вѣ́ки.

Зако́на соблюда́юще глави́зну и проро́къ, любо́вію утве́рждшеся, подо́бницы Христа́ бу́демъ, за любо́вь кра́йнюю пло́ть пріи́мшаго, и креще́ніемъ на́съ Отцу́ примири́вшаго, и научи́вшаго пѣ́ти: Го́спода по́йте, дѣла́, и превозноси́те во вся́ вѣ́ки.

Пріима́ше Гряду́щаго грѣхи́ мíра очи́стити водо́ю, но Сему́ возбраня́ше, сопря́туемь стра́хомъ: а́зъ бо тре́бую крести́тися отъ Тебе́, — Жениху́ противорече́ дру́гъ, гла́съ же Сло́ву и Со́лнцу свѣти́льникъ. Тя́ превозно́симъ во вся́ вѣ́ки.

Пѣ́снь 9.

Ирмо́съ: Стра́нствія Влады́чня и безсме́ртныя трапе́зы во убо́зѣмъ верте́пѣ пре́жде наслади́вшеся, ны́нѣ на Іорда́нъ теце́мъ, та́йну зря́ще стра́нну, го́рнія свѣ́тлости хода́тайственну.

Иди́те отъ Виѳлее́ма, пито́мицы чуде́съ, къ странѣ́ Іорда́нстѣй и та́мо ви́дите дѣла́, та́инственно соверша́ема креще́ніемъ же Христа́, прише́дша Ада́ма обнови́ти, и́бо воплоти́ся.

Содѣ́тель, ро́ждься изъ Отца́ пре́жде вѣко́въ, роди́ся, напослѣ́докъ непрело́жно вопло́щся изъ Дѣ́вы Чи́стыя Богоотрокови́цы, сугу́бъ, Бо́гъ и Человѣ́къ пребыва́я, Ада́ма обнови́ти креще́ніемъ.

Яко Человѣ́къ прише́лъ еси́ существо́мъ, не мечта́ніемъ, я́ко Еди́нъ посреди́ всѣ́хъ, прося́й креще́нія, Еди́нъ, естество́мъ непови́нный, погребсти́ бо вины́ прише́лъ еси́ человѣ́ческія, въ вода́хъ креща́емь.

Та́же ирмо́съ: Стра́нствія Влады́чня... и покло́нъ.



НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, апо́столовъ. И ны́нѣ, предпра́зднства.

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Се́ прихо́дитъ ко Іорда́ну Христо́съ, приглаша́етъ же Предте́чу: гряди́ и крести́ вѣ́рно ве́сь очища́ющаго мíра грѣ́хъ рѣчны́ми струя́ми, простри́ твою́ ру́ку къ верху́ Моему́ Боже́ственному, руки́ бо прегрѣше́ніе пріидо́хъ исцѣли́ти.

Сла́ва, и ны́нѣ, гла́съ то́йже. Подо́бенъ: Вознесы́йся.

Царя́ всѣ́хъ и Влады́ку на креще́ніе, вѣ́рніи, зря́ще, боголѣ́пно гряду́ща, воспои́мъ Его́, стези́ серде́цъ на́шихъ угото́вимъ любо́вію, скве́рны отмыва́юще лю́тыхъ прегрѣше́ній: се́ бо спасти́ ро́дъ человѣ́ческій на Іорда́нскія струи́ прихо́дитъ.

По 2-й стихоло́гіи сѣда́ленъ, гла́съ 8. Подо́бенъ: Воскре́се.

Вели́кій Крести́телю Госпо́день, ра́дуйся! Пріи́де бо Христо́съ отъ тебе́ крести́тися. Трепе́щеши, я́ко служи́тель, Влады́ка бо главу́ преклоня́етъ тебѣ́, прикосни́ся Боже́ственному верху́ содержа́щаго руко́ю вся́ческая и благоволе́ніемъ спаса́ющаго Бо́га ро́дъ человѣ́ческій.

Сла́ва, и ны́нѣ, гла́съ то́йже:

Торжество́ свѣ́тлое предсоверша́юще вси́ Просвѣще́нія Христо́ва, добродѣ́тельми облиста́емся: прихо́дитъ бо Иже надъ всѣ́ми отъ Галиле́и ко Іоа́нну креще́ніе источи́ти спасе́нія огне́мъ Ду́ха во Іорда́нскихъ струя́хъ, я́ко Бо́гъ, ро́ду человѣ́ческому.

Кано́ны три́: предпра́зднства со ирмосо́мъ на 6, апо́столовъ на 4 и преподо́бнаго на 4.

Кано́нъ предпра́зднства, его́же краегране́сіе по алфави́ту, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Да ра́дуется тва́рь, оте́чествія язы́ковъ да пою́тъ: Іису́съ, Ца́рь всея́ земли́, предгряде́тъ струя́ми Іорда́нскими на́ше сотвори́ти очище́ніе.

Въ ца́рскую багряни́цу изъ дѣ́вственныхъ крове́й, Го́споди, одѣ́явся пло́тію, къ рѣчны́мъ тече́ніемъ на́гъ прихо́диши, мою́ одѣва́я наготу́.

Сы́нъ Отца́ Пребезнача́льнаго Ты́ сы́й, къ сы́ну, Благоутро́бне, Заха́ріину смире́нно прихо́диши, креще́нія прося́, я́ко да благода́тію сы́ны Бо́жія сотвори́ши ны́.

Инъ кано́нъ апо́столовъ, его́же краегране́сіе: Христо́вы ученики́ вторы́я да похвалю́. Іо́сифъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Христо́вы ученицы́ бы́вше, на́съ ра́ди ве́щію тѣле́сною Явльшагося, всехва́льніи, просвѣти́сте мíръ ве́сь заре́ю благоче́стія, тму́ разори́вше безбо́жія.

Тлѣ́нныхъ оста́вльше оскверне́нное и нестоя́нное, Христу́ послѣ́доваша Кри́спъ, и Про́хоръ, и Андрони́къ, Ѳадде́й и Никано́ръ, свѣти́льницы бы́вше богови́днѣйшіи.

Крѣ́пость губи́теля побѣди́сте, сла́вніи, крѣ́постію Ду́ха, неи́стовствомъ же безбо́жія коне́чнѣ осла́бленныя крѣ́пости испо́лнисте и боже́ственнаго разумѣ́нія.

Пло́тію я́вльшагося Го́спода Амплíй проповѣ́да, Стахíй и Фили́ппъ, я́ко апо́столи, я́ко боже́ственніи іера́рси, я́ко вои́стинну служи́теліе су́щихъ па́че ума́.

Богоро́диченъ: Боже́ственную Пала́ту Царе́ву почти́мъ, въ Ню́же всели́ся, я́коже восхотѣ́, Неискусому́жную и еди́ну Богоро́дицу, Ея́же ра́ди обожи́хомся, воспѣсносло́вимъ.

Инъ кано́нъ преподо́бнаго, гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Сла́дости Пото́къ, Христо́съ, къ вода́мъ прихо́дитъ раболѣ́пно Іорда́нскимъ омы́тися. Го́ры, взыгра́йте ра́достію, хо́лми, препоя́шитеся, оскверне́нніи, ко очище́нію Боже́ственному угото́витеся.

Свѣтоно́сная па́мять твоя́ на́мъ дне́сь возсія́ со́лнечныя лучи́, Ѳеокти́сте, исправле́ній твои́хъ, страсте́й у́бо на́шихъ отгоня́щи о́блакъ, ю́же соверша́юще, вѣ́рою тя́ и любо́вію блажи́мъ.

Впери́вся любо́вію Христо́вою, бы́лъ еси́ вы́шшій, мірска́го отступи́въ смуще́нія, тѣ́мже отлучи́вся къ по́стничества болѣ́зненнымъ трудо́мъ и воздержа́ніемъ, я́коже а́нгелъ, пожи́лъ еси́.

Богоро́диченъ: Чи́стую чи́стымъ умо́мъ, пріиди́те, ублажи́мъ, Добро́ту Іа́ковлю, Юже возлюби́ Бо́гъ, избра́въ, въ Ню́же всели́ся, я́ко ски́нію свяще́нія, я́ко Честнѣ́йшую всѣ́хъ тва́рей воспои́мъ.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Влады́чествуяй всѣ́ми я́ко Бо́гъ, раба́ но́сиши о́бразъ и къ рабу́, Ще́дре, прихо́диши пло́тски, креще́ніемъ богодѣ́льнымъ отъ рабо́ты вра́жія изыма́я ны́.

Прише́лъ еси́ на струи́, чесо́ ра́ди? Ко́е очище́ніе хотя́? Ку́ю скве́рну отмы́ти, Преблагíй, ища́й? Пою́ Твое́, е́же па́че ума́, за милосе́рдіе, Сло́ве, снизхожде́ніе.

Ища́ овча́, Христе́, е́же ди́вій во́лкъ расто́ргне ле́стію, на Іорда́нскихъ струя́хъ стои́ши, взыва́я Предте́чи: гряди́, крести́ Мя ты́.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Якоже рѣ́ки, ва́съ Сло́во посла́ во всю́ зе́млю, наполня́ющія сію́, всему́дріи, напое́ніи Боже́ственнаго Ду́ха и пла́мень отъе́млющія безбо́жія благода́тію.

Воспои́мъ Ти́мона боже́ственнаго, Си́лу же и Силуа́на и вѣ́рою восхва́лимъ Епене́та сла́внаго, и Урва́на, и Ага́ва, и́стинныя христопроповѣ́дники.

Блаже́ни уже́ бы́вше, я́ко и́стинно блаже́ннаго Бо́га Учи́теля стяжа́вше, и́же пе́рвѣе окая́нныя, всему́дріи, прича́стники показа́сте Боже́ственнаго блаже́нства.

Богоро́диченъ: Чиста́ пре́жде рождества́, и въ рождествѣ́, и по рождествѣ́ вои́стинну Дѣ́ва, Ма́ти, была́ еси́: Бо́га бо породила́ еси́, Его́же апо́столовъ сосло́віе пресвѣ́тло проповѣ́да.

Инъ.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Бе́здны повелѣ́ніемъ Сотвори́вый, вода́ми Покрыва́яй превы́спренняя, въ вода́хъ предгряде́тъ крести́тися. Душе́, бо́дрствуй, отъ страсте́й очи́стися, добродѣ́телей принося́щи прозябе́нія.

Яко ши́покъ сладково́ненъ, дѣ́ланіемъ Ду́ха во цвѣ́тницѣ поще́нія процвѣ́лъ еси́, Ѳеокти́сте, благоуха́нія исполня́яй Боже́ственнаго пою́щія всегда́: я́ко нѣ́сть свя́тъ, па́че Тебе́, Го́споди.

Яко ма́слина плодови́та, въ дому́ Госпо́дни прозя́блъ еси́, еле́емъ трудо́въ твои́хъ, Ѳеокти́сте, умаща́я на́ша ли́ца, пою́щихъ, преподо́бне: я́ко нѣ́сть свя́тъ, па́че Тебѣ́, Го́споди.

Богоро́диченъ: Мно́зи, борю́щіи мя́ отъ высоты́, въ болѣ́зни оскудѣ́ жи́знь моя́, понро́хъ въ про́пасть прегрѣше́ній. Спаси́ мя, Влады́чице, не пре́зри мене́, Предста́тельницу бо Тя́ непобѣ́дну и́мамъ.

Конда́къ предпра́зднства, гла́съ 4. Подо́бенъ: Яви́лся еси́ дне́сь.

Во струя́хъ дне́сь Іорда́нскихъ бы́въ, Госпо́дь Іоа́нну вопіе́тъ: не убо́йся крести́ти Мя́, спасти́ бо пріидо́хъ Ада́ма первозда́ннаго.

Икосъ:

Не истязу́ю тя́, Крести́телю, предѣ́лы преходи́ти, не глаго́лю тебѣ́: рцы́ Ми, я́же глаго́леши беззако́ннымъ и учи́ши грѣ́шники. То́чію крести́ Мя́ молча́ и ча́я, я́же отъ креще́нія: пріи́меши бо сего́ ра́ди досто́инство, е́же не бы́сть а́нгеломъ, и́бо всѣ́хъ проро́ковъ бо́льша тя́ сотворю́. Отъ о́ныхъ у́бо ни еди́нъ я́вѣ Мя́ ви́дѣ, но во о́бразѣхъ, и сѣ́нѣхъ, и гада́ніихъ, ты́ же предъ тобо́ю стоя́ща ви́дѣлъ еси́, спасти́ бо пріидо́хъ Ада́ма первозда́ннаго.

Та́же, сѣда́ленъ апо́столовъ, гла́съ 3. Подо́бенъ: Боже́ственныя вѣ́ры.

Столпи́ непоколеби́міи Це́ркве, основа́нія благоче́стія бы́вше, ученицы́ Бо́га на́шего, соблюди́те сію́ невре́дну, отгоня́юще льсти́ваго собла́зны и моля́ще Христа́ Бо́га всегда́ дарова́ти на́мъ ве́лію ми́лость.

Сла́ва, преподо́бнаго, гла́съ 1. Подо́бенъ: Ка́мени запеча́тану.

Упа́съ богоуго́дно Госпо́дню па́ству свирѣ́лію сло́ва, богоно́се Ѳеокти́сте, на па́жити безстра́стія и жи́зни приве́лъ еси́, спаса́емую, Бо́гу и, къ Сему́ отше́дъ, мзду́ трудо́въ прія́лъ еси́ досто́йную. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

И ны́нѣ, гла́съ и подо́бенъ то́йже:

Іису́су ро́ждшуся отъ Дѣ́вы Марíи, и во Іорда́нѣ кре́щшуся отъ Іоа́нна, Ду́хъ сни́де на Него́, зри́мый въ ви́дѣ голуби́нѣ. Сего́ ра́ди проро́къ со а́нгелы глаго́лаше, зовы́й: сла́ва прише́ствію Твоему́, Христе́, сла́ва Ца́рствію Твоему́, сла́ва смотре́нію Твоему́, Еди́не Человѣколю́бче.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Егда́ ви́дѣ Тя́, струя́, Го́споди, Іорда́нская возврати́ся; мно́гими же страстьми́ низложе́нное естество́ на́ше къ небесе́мъ обрати́ся, поклони́вся Тебѣ́.

Ужаса́ется со́лнце, зря́ Тебе́, Со́лнца, пло́тски обна́жшася и та́инственно все́ озаря́юща, обна́жшееся мра́чнымъ преступле́ніемъ естество́, Влады́ко.

Се́ Очище́ніе, се́ Избавле́ніе и Обновле́ніе всѣ́хъ, Просвѣще́ніе пріи́де во Своя́, да присво́имся у́бо Ему́ житія́ чистото́ю.

Инъ.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Мо́ре возмути́ша язы́ческое, въ сіе́ вше́дше, всему́дріи, я́коже ко́ни, Спа́совы ученицы́ и вѣ́рныя спасо́ша водо́ю свято́ю и Ду́хомъ.

Облиста́ша, я́ко со́лнце на земли́, Пу́дъ, Апе́ллій и Филоло́гъ, и Иродіо́нъ, Ру́фъ же и Патро́въ и вѣ́рныя просвѣти́ша, отъ тмы́ невѣ́дѣнія изба́вльше.

Напря́гъ, посла́ стрѣ́лы вы́ я́ко изощре́нны Благоутро́бный, стрѣ́лы, сокруша́юща вра́жія и лю́тѣ уя́звленныя, сла́вніи, благода́тію Бо́жіею исцѣля́юща.

Хвалу́ принесе́мъ Изба́вителю, пѣсносло́вяще Родіо́на богоглаго́ливаго, и Ермíя сла́внаго, и му́драго Асинкри́та, Ли́на же боже́ственнаго и Га́ія.

Богоро́диченъ: Тя́ блаже́ннѣйшій дре́вле ли́къ проро́чествующихъ Ду́хомъ богоглаго́ланіи свяще́нными боголѣ́пно имену́етъ, Всечи́стая, две́рь же и го́ру пріосѣне́нную.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Иска́паша сла́дость болѣ́зней по́тове твои́, го́ресть отъе́млюще де́монскую, сла́вне, неду́ги отгоня́ще сла́вныя окропле́ніемъ, досточу́дне.

Обожа́емь непреста́нными очище́ніи, преподо́бне, свѣти́льникъ бы́лъ еси́ мона́шествующихъ свѣтлѣ́йшій, о́бразъ извѣ́стнѣйшій, и наста́вникъ, и сто́лпъ непоколеби́мь.

Расто́рглъ еси́ страсте́й моря́, Ѳеокти́сте, жезло́мъ вѣ́ры и, фарао́на неви́димаго, о́тче, потопи́въ, ко обѣтова́ннѣй земли́ дости́глъ еси́, преподо́бне.

Богоро́диченъ: Воззову́ въ нощи́ и во дни́, Всенепоро́чная, къ Тебѣ́, и спасу́ся, и сласте́й прейду́ стѣ́ну, и изба́влюся искуше́ній де́монскихъ хода́тайствомъ Твои́мъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Плодопринесе́мъ Христу́ житіе́ чи́стое: гряде́тъ бо Очища́яй вода́ми грѣхо́въ скве́рну благода́тію, Еди́нъ Благодѣ́тель и Безгрѣ́шный.

Лю́діе, во тмѣ́ скорбе́й дре́вле сѣдя́щіи, Свѣ́тъ яви́ся ва́мъ незаходя́щій, ви́дите, и Боже́ственными заря́ми просвѣти́теся, и Явльшагося благода́ть воспо́йте.

Ве́ліе та́инство соверша́я, къ вели́кому Предте́чи Твоему́, о Великодарови́те Го́споди, гряде́ши, ума́лившееся человѣ́чество неизглаго́ланно велича́я креще́ніемъ.

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Вяза́ти же, всехва́льніи, и рѣши́ти я́ко апо́столи пріи́мше вы́ вла́сть, свя́занныя зловѣ́рія у́зами разрѣши́сте, тѣ́мже ва́шу па́мять пра́зднуемъ, вѣ́рно лику́юще.

Боже́ственными Ариста́рхъ да почти́тся пѣснопѣ́ньми, Те́ртій, Іа́ссонъ и Сосѳе́нъ, Ке́сарь и Ма́ркъ, Лука́, Сосипа́тръ, Куа́ртъ и боже́ственный Апе́ллій, Кли́мъ и Епафроди́тъ и всему́дрый Ера́стъ.

Ва́съ, я́ко двана́десять, посла́ Госпо́дь, все́ искореня́ющія безбо́жіе, всѣ́мъ человѣ́комъ насажда́ющія зна́ніе Боже́ственное свѣ́тло, сла́вніи апо́столи, моли́твенницы о душа́хъ на́шихъ.

Богоро́диченъ: Очи просвѣти́, Дѣ́во, се́рдца моего́, осія́й ми́ зарю́ покая́нія, тмы́ мя́ изба́ви вѣ́чнующія, две́ре Свѣ́та, христіа́нъ всѣ́хъ Прибѣ́жище, вѣ́рно воспѣва́ющихъ Тя́.

Инъ.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Моли́твъ ра́ломъ обнови́въ зе́млю се́рдца, сію́ насѣ́ялъ еси́ Сло́ва сѣ́менемъ, о́тче богому́дре, и кла́съ пожа́лъ еси́ благопло́дія, восхваля́ющихъ тя́ всѣ́хъ благочести́выхъ ду́ши пита́ющій.

Бо́дръ у́мъ всегда́ принося́, о́тче богому́дре, стра́сти успи́лъ еси́ душетлѣ́нныя, къ Боже́ственному у́тру тща́ся дости́гнути, къ незаходи́маго Свѣ́та свѣ́тлости, веселя́щихся въ не́мже е́сть жили́ще.

Яко свѣтоза́рный и свѣтоно́сецъ, и по́лнъ дарова́ній Ду́ха Боже́ственнаго сы́й, о́тче, незло́бія чи́стъ обы́чай явля́я, всѣ́мъ пока́зовался еси́, я́коже а́нгелъ живы́й съ тѣ́ломъ.

Богоро́диченъ: Съ высоты́ восто́ка я́вльшагося показа́лася еси́ две́рь и престо́лъ превознесе́нъ Царе́въ, небомѣ́рная и высо́кая лѣ́ствица, на ню́же взы́де Христо́съ, Пречи́стая, и отринове́ннымъ человѣ́комъ пріобщи́ся.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Во́дъ сы́й испо́лненъ та́йныхъ, я́ко рѣка́ ми́ра, Еди́не Го́споди, къ рѣцѣ́ прише́лъ еси́, отъ ма́лыя ка́пли прося́ крести́тися, Еди́не Безгрѣ́шне.

Диви́тся свы́ше а́нгельскій ли́къ, смотря́я обнаже́на о́блаки покрыва́ющаго не́бо, и взыва́етъ: что́ сіе́ Твое́ мно́гое къ человѣ́комъ снизше́ствіе?

По́лный истощи́ся, Неви́димый се́, вопло́щся, яви́ся. Іорда́не рѣко́, возвесели́ся, струи́ твоя́ испо́лни, я́ко да омы́еши всѣ́хъ Возрожде́ніе.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Въ ве́сь мíръ кропите́ во́ду жи́зни спаси́тельную, о́блацы одушевле́нніи я́вльшеся, апо́столи, и вѣ́рныхъ сердца́ ороси́сте.

Глаго́лъ Боже́ственныхъ си́ла ва́ша ри́торовъ побѣди́ мно́гую лю́тость и нему́дрыя умудри́, объюродѣ́вшія ра́зумомъ пре́лести, всему́дріи.

Боже́ственный Пу́дъ и Трофи́мъ, Филимо́нъ сла́вный и Ариста́рхъ, Ониси́форъ же и Тихи́къ всеизря́днѣйшій, я́ко ученицы́ Сло́ва да возвели́чатся.

Богоро́диченъ: Пою́ Тя́, еди́на Всепѣ́тая, сла́влю Тя́, при́сно Богосла́вная, и блажу́ Тя, Юже ро́ди блажа́тъ родо́въ, Дѣ́во Богоблаже́нная.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Въ ра́бій зра́къ одѣ́явся, гряде́тъ къ рабу́ Христо́съ, прося́ креще́нія, порабоще́нныя страстьми́ свобо́дны показу́я благода́тію.

Лука́вствія покори́лъ еси́ ду́хи, Ду́ха Свята́го яви́вся сосу́дъ, си́лу тебѣ́ вдохну́вшаго, богоно́се всеблаже́нне Ѳеокти́сте.

Слове́сною па́лицею твое́ю, преподо́бне, на па́жити по́стничества, о́тче, воспита́лъ еси́ слове́сную твою́ па́ству и ко огра́дѣ небе́снѣй напра́вилъ еси́.

Богоро́диченъ: Не́бо простры́й манове́ніемъ ино́е на земли́ не́бо Тя́ показа́, Богороди́тельнице Непоро́чная, и изъ Тебе́ су́щимъ во тмѣ́ яви́ся.

Конда́къ апо́столовъ, гла́съ 2. Подо́бенъ: Вы́шнихъ ища́.

Христо́выхъ ученико́въ ли́къ се́дмьдесятъ боже́ственно, вѣ́рніи, въ пѣ́снехъ восхва́лимъ, тѣ́ми бо вси́ навыко́хомъ Тро́ицу почита́ти Нераздѣ́льную, и пребыва́ютъ свѣти́льницы боже́ственныя вѣ́ры.

Икосъ:

Се́дмьдесяти апо́столовъ ли́къ согла́сно, вѣ́рніи, свяще́нными пѣснопѣ́ньми да восхва́лимъ: Стефа́на, Про́хора же, и Си́лу, и Никано́ра, Ти́мона, и Амплíя, и Парме́на, Апе́ллія же, Іа́кова, Фили́ппа, Ариста́рха, и Ма́рка, и Матѳíя, и Иродіо́на, Кри́скента и Фле́гонта, Варна́ву, Ли́на и Оли́мпа, Ана́нію, Луку́ и Асинкри́та и про́чія, пребыва́ютъ бо свѣти́льницы боже́ственныя вѣ́ры.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Ка́ко Тя́ струи́ поды́мутъ рѣ́чныя, сла́дости су́ща пото́ка, Христе́? Ка́ко Предте́ча простре́тъ ру́ку на Тя́, руко́ю созда́вшаго его́ и отъ руки́ льсти́ваго изба́вльшаго ны́?

Струя́, Го́споди сы́й, бла́гости, ко струя́мъ Іорда́нскимъ ка́ко прихо́диши, нетлѣ́нія вода́ми ища́ напои́ти вкуше́ніемъ лука́вымъ низложе́нныя во тлю́ за́вистію змíя?

Да ка́плютъ го́ры ра́дованіе, и хо́лми да взыгра́ютъ, веселя́щеся, рѣ́ки да воспле́щутъ руко́ю: яви́ся, гряде́тъ Христо́съ въ рѣцѣ́ человѣ́ческая погрузи́ти прегрѣше́нія.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Улови́вше сло́вомъ, извлеко́сте изъ глубины́ безбо́жія язы́ки многоразсѣ́янныя, зна́меньми и чудесы́ утверди́вше мудрова́нія си́хъ, му́дріи апо́столи, путевожди́ заблу́ждшихъ.

Вше́дше въ приста́нище тиша́йшее, волну́ющимся въ мо́ри лю́тыхъ спаси́теліе яви́стеся и прави́теліе му́дріи, воспѣва́юще: отце́въ Госпо́дь и Бо́гъ, благослове́нъ еси́.

Вси́ Ево́да и Ка́рпа ублажи́мъ, и Тихи́ка, и Ки́фу, Іу́ста и Арте́му, Зи́ну же сла́внаго, я́ко Христо́вы ученики́, воспѣва́юще: отце́въ Госпо́дь и Бо́гъ, благослове́нъ еси́.

Молніезра́чніи Ду́хомъ бы́вше, Христо́вы апо́столи, одержи́мыя но́щію невѣ́дѣнія изба́висте и къ Свѣ́ту жи́зни наста́висте, вопію́щія всегда́: Бо́же, благослове́нъ еси́.

Богоро́диченъ: Очисти́лище, Всенепоро́чная, была́ еси́ грѣша́щихъ при́сно, ро́ждши преесте́ственно мíра взе́млющаго грѣ́хъ Христа́, Ему́же зове́мъ: отце́въ Госпо́дь и Бо́гъ, благослове́нъ еси́.

Инъ.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Пусты́ня дне́сь Іорда́нова да процвѣте́тъ: гряде́тъ бо всѣ́хъ Избавле́ніе, огне́мъ Божества́ погрузи́ти на́съ водо́ю и Ду́хомъ, лю́тѣ сокруше́нныхъ грѣхопаде́ньми.

Сле́зъ пролія́ньми погаси́лъ еси́ страсте́й разжже́нія, Ѳеокти́сте блаже́нне, чуде́съ источи́лъ еси́ струи́ присноживо́тныя, и́миже отмыва́ются ду́шъ же и тѣле́съ неду́ги, пресла́вне.

Дави́довѣ кро́тости, о́тче, поревнова́лъ еси́, стяжа́въ непоро́чно Іовлево безстра́стіе, Іа́ковлю простоту́ и вѣ́ру Авраа́мову, Петро́ву теплоту́. Съ ни́миже всели́вся, на́съ помина́й.

Богоро́диченъ: Жи́знь Ѵпоста́сную на́мъ ро́ждши, сме́ртію сме́рть, Дѣ́во, упраздни́вшую, лю́тыми обурева́ньми умерщвле́на мя́ оживи́ мольба́ми Твои́ми, Чи́стая, Благослове́нная и Препросла́вленная.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Рѣ́чныя струи́ ми́лотію разсѣка́ше Елиссе́й, благода́ть креще́нія предсѣннопиша́, ю́же Христо́съ содѣ́лаетъ, на сія́ восходя́, Еди́нъ Благодѣ́тель.

Назна́меноваше иногда́ проро́къ сла́вный креще́нія благода́ть, со́лію во́ды безпло́дныя пе́рвѣе содѣ́лавъ многопло́дны, я́вльшагося Бо́га на́шего си́лою.

Де́брь вся́ка Боже́ственныхъ даро́въ испо́лнится, и хо́лмъ проти́вный смири́тся, и стро́потная въ пра́вая обратя́тся воплоще́ннаго Бо́га явле́ніемъ.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Обно́вльше ра́зумы оляденѣ́вшія ра́ломъ Сло́ва, всесла́вніи, и въ ни́хъ спаси́тельная сѣ́мена насѣ́ясте, и благоче́стія кла́съ стори́чный пожа́сте — спа́сшихся мно́жество, Госпо́дни апо́столи всему́дріи.

Похвала́ми Іа́кова боже́ственными, Клео́пу, Варна́ву же и Стефа́на, Нарки́сса всему́драго, Ма́рка, Аристову́ла и Апе́ллія почти́мъ, апо́столы Христо́вы, вопію́ще: Го́спода по́йте, дѣла́, и превозноси́те во вся́ вѣ́ки.

Кре́стъ вмѣ́сто броня́ нося́ще, ко всѣ́мъ му́жески ополчи́стеся полко́мъ змíя, всему́дріи апо́столи, и, ты́я погуби́вше, я́же плѣни́ человѣ́ки, улови́сте вѣ́рою, и Жизнода́вцу приведо́сте Влады́цѣ.

Богоро́диченъ: О, чу́до вы́шше чуде́съ! Ка́ко ражда́еши и пребыва́еши дѣ́вствующи, Всечи́стая Богоневѣ́сто? Сло́во бо родила́ еси́, Отцу́ Собезнача́льное, Ему́же вси́ пое́мъ: Го́спода по́йте, дѣла́, и превозноси́те во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Просвѣще́ніе и очище́ніе ду́шъ яви́лся еси́ на Іорда́нѣ, исто́чникъ, Спа́се, му́дрости: воды́ жи́вы пи́щный пото́къ подава́я на́мъ, вода́ми погружа́еши на́ша грѣхи́.

Въ незло́біи жи́знь препроводи́въ вои́стинну, богому́дре о́тче, вра́жію зло́бу соверше́ннѣйшимъ умо́мъ низложи́лъ еси́, — по́йте, — вопія́, — дѣла́ вся́, Го́спода и превозноси́те Его́ во вѣ́ки.

Ны́нѣ сѣки́ра душа́мъ прети́тъ посѣче́ніе, душе́ моя́, потщи́ся и, страсте́й те́рнія отсѣ́кши, плоды́ зрѣ́лы Го́споду принеси́, богоно́снаго моли́твами спаса́ющися.

Богоро́диченъ: Отъ всѣ́хъ Тя́ родо́въ избра́ Христо́съ въ жили́ще Себѣ́, Богоро́дице, обновля́я ны́, истлѣ́вшія, соедине́ніемъ лу́чшимъ, тѣ́мъ Тя́ пое́мъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Рука́ми созда́вый, Христе́, человѣ́ка, подъ руку́ Предте́чеву подклоня́ешися, я́ко Человѣ́къ смиря́яся, я́ко да возвы́сиши мя́, дре́вле смири́вшася и поги́бша. Сла́ва сла́вному и стра́шному строе́нію Твоему́.

Ду́шъ очище́ніе гото́вится, просвѣще́ніе, рѣше́ніе лю́тыхъ пріи́де. Іорда́не рѣко́, возвесели́ся, возлику́й, вся́ тва́рь, земля́ же и мо́ре, восплещи́, сла́вящи Христа́ Преблага́го.

Яко Сы́й всѣ́хъ до́брыхъ исполне́ніе, гряде́ши, вопія́, испо́лненному святы́ни рабу́ Твоему́, уди́вльшуся Твоему́ снизхожде́нію: прибли́жися, крести́ Мя́, хощу́ бо испо́лнити естество́ земны́хъ освяще́нія и очище́нія.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Исцѣли́ на́ша, Христе́, сокруше́нія серде́чная моли́твами возлюби́вшихъ Тя́ и проповѣ́давшихъ во всѣ́хъ язы́цѣхъ Бо́га ку́пно и Го́спода, Содѣ́теля всѣ́хъ, и и́дольское все́ омраче́ніе отгна́вшихъ свѣ́томъ проповѣ́данія.

Якоже мо́лнія, мíръ освѣти́ша Лука́ вку́пѣ и Ермъ, Ма́ркъ и Ана́нія и съ Матѳíемъ свяще́нный Оли́мпъ и вѣ́рныхъ исполне́ніе я́вѣ просвѣти́ша, я́же вѣ́рою дне́сь почти́мъ свяще́нными и честны́ми пѣснопѣ́ньми.

Ста́немъ благоговѣ́йно въ дому́ Бо́га на́шего и ублажи́мъ священнопроповѣ́дники и учи́тели, и ангелому́дрыя, и богати́тели, спаси́тели же, и защи́тники, и предста́тели всѣ́хъ су́щія, чту́щихъ и́хъ па́мяти.

Озари́шася свѣ́томъ невеще́ственнымъ Ду́ха Аки́ла, Аха́икъ, Лукíй сла́вный и Фуртуна́тъ съ шестію́десять и шестію́ Христо́выми уго́дники и свяще́нными ученики́ и сердца́ всѣ́хъ озаря́ютъ свѣтоно́сною и́хъ па́мятію дне́сь.

Богоро́диченъ: Сія́ніе блиста́нія Рождества́ Твоего́ просія́, и уясни́ всю́ подсо́лнечную, и предста́теля тмы́ погуби́, Богороди́тельнице Всечи́стая, а́нгеловъ хвало́ и человѣ́ковъ всѣ́хъ спасе́ніе, непреста́нными гла́сы восхваля́ющихъ Тя́.

Инъ.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Бо́жіе зда́ніе бы́лъ еси́, Ѳеокти́сте, чи́стое, не оскверни́въ души́ твоея́ добро́ты, преподо́бне, грѣхо́въ ка́ломъ, но тебе́ самаго́ всего́ украси́лъ еси́ до́брыми пода́ніи, сего́ ра́ди тя́ почита́емъ.

Добродѣ́тельми укра́шенъ, любо́вію просвѣща́емь, до́брыхъ ви́ды облиста́емь, къ твои́мъ преста́вился еси́ отце́мъ, о́тче му́дре, въ ста́рости масти́тѣй, я́коже пшени́ца зрѣла́, въ сокро́вищахъ Боже́ственныхъ блюдо́мь.

Па́ства твоя́ дне́сь лику́етъ, пра́зднующи свѣтоно́сную па́мять твоего́ успе́нія, ю́же благословя́ съ небесе́ и по преставле́ніи не преста́й, треблаже́нне, Бо́гу предстоя́ со а́нгелы, всеблаже́нне.

Богоро́диченъ: Жи́знь ро́ждшая земны́мъ на избавле́ніе, уме́ршую, Дѣ́во, прегрѣше́ньми оживи́, Чи́стая, ду́шу мою́, я́ко сострада́тельна, я́ко Еди́на Предста́тельница прибѣга́ющихъ въ Тво́й кро́въ, Всенепоро́чная.

Свѣти́ленъ апо́столовъ. Подо́бенъ: Жены́, услы́шите.

Апо́столи всехва́льніи Христа́ всеще́драго, и ученицы́, и богови́дцы, не премолчи́те, моля́ще о на́съ, любо́вію ва́шу па́мять соверша́ющихъ, да прегрѣше́ній оставле́ніе и Боже́ственную обря́щемъ благода́ть въ де́нь Суда́.

Сла́ва, и ны́нѣ, предпра́зднства. Подо́бенъ: Посѣти́лъ ны́.

Гото́вися, Завуло́не, Нефѳали́ме, украси́ся, подыми́, Іорда́не, Зижди́теля всѣ́хъ и Бо́га, пло́тію къ тебѣ́ гряду́ща, на́ша грѣхи́ измы́ти хотя́щаго.

На хвали́техъ стихи́ры, на 4, гла́съ 6. Подо́бенъ: Ангельскія.

Его́же гла́съ вопію́щаго предъявля́ше, пріи́де Христо́съ на струи́ Іорда́нскія и Предте́чи рече́: гряди́, омы́й Мя́ вода́ми, крести́ Мя, ны́нѣ снизше́дшаго, Ада́ма бо омы́ти пріидо́хъ отъ пе́рваго паде́нія. Благослове́нъ, явле́йся Бо́же на́шъ, сла́ва Тебѣ́.

Высоты́ небе́сныя ника́коже изслѣ́дихъ, звѣ́здъ число́, ниже́ зе́млю измѣ́рихъ, и ка́ко верху́ Твоему́, — Влады́цѣ Предте́ча рече́, — косну́ся руко́ю? Ка́ко же крещу́ Нося́щаго го́рстію тва́рь? Тѣ́мже зову́ Ти: благослове́нъ, явле́йся Бо́же на́шъ, сла́ва Тебѣ́.

Сопресто́ленъ Отцу́ и Ду́ху Сы́й, а́нгельскими во́инствы дориношу́ся, но въ ма́лѣмъ верте́пѣ, стра́нствуя, роди́хся въ Виѳлее́мѣ за благоутро́біе. Тѣ́мже и ны́нѣ десни́цу твою́ Мнѣ́ взаи́мствуй, да отмы́ю во Мнѣ́ мíра прегрѣше́нія.

Потопи́лъ еси́ иногда́ грѣ́хъ при Но́и, сло́вомъ разве́рзый хля́би небе́сныя, и ка́ко Тя́ Іорда́нъ ви́дѣвъ, стерпи́тъ? уже́ бо струю́ отврати́тъ. Позна́ Тя́ тва́рь вся́, и а́зъ зову́ Тебѣ́: благослове́нъ, явле́йся Бо́же на́шъ, сла́ва Тебѣ́.

Сла́ва, и ны́нѣ, гла́съ и подо́бенъ то́йже:

Ты́, Изра́иля столпо́мъ и о́блакомъ пе́рвѣе свѣтоводя́ и орошая́ въ пусты́ни, Ты́, влады́чествуяй всѣ́ми, естество́мъ несказа́нный въ ра́бій зра́къ ка́ко одѣ́ялся еси́? не прикосну́ся Тебѣ́, Огню́ сѣ́но: Са́мъ мя́ крести́, а́зъ бо тре́бую отъ Тебе́ очище́ніе прія́ти.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́ся Оте́ческое озаре́ніе сла́вы* на Іорда́нскихъ струя́хъ,* креще́ніемъ очища́я скве́рну ду́шъ на́шихъ.

Сти́хъ: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Пріими́ раболѣ́пно,* проро́че Іоа́нне,* Изба́вителя мíра* и крести́ Зижди́теля* земны́хъ на возрожде́ніе.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

Пріи́де Просвѣще́ніе,* Избавле́ніе яви́ся.* На Іорда́нъ пріиди́те,* сни́демся очи́ститися* и пѣ́ти предпра́зднственная.

Сла́ва, и ны́нѣ, гла́съ и подо́бенъ то́йже:

Дне́сь Христо́съ* спаси́тельное человѣ́комъ* рѣше́ніе да́руетъ,* ду́шъ очища́я скве́рну* огне́мъ креще́нія.


НА ЛИТУРГІИ,

Блаже́нна отъ кано́на предпра́зднства пѣснь 3-я, и апо́столовъ пѣ́снь 6-я. Проки́менъ, гла́съ 4: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ къ Ри́мляномъ, зача́ло 96. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе отъ Луки́, зача́ло 50. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 34 – 46.

/ Къ оглавленію раздѣла /


Наверхъ / Къ титульной страницѣ

0