Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 24 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 3-й де́нь.
Предпра́зднство Просвѣще́нія, и свята́го проро́ка Малахíи, и свята́го му́ченика Гордíя.

[ВЕЧЕРЪ,]
На Го́споди воззва́хъ: стихи́ры проро́ка 3, и му́ченика 3.
Проро́ка стихи́ры, гла́съ 8. Подо́бенъ: Го́споди, а́ще и на суди́щи.

Глаго́лы* богодви́жимаго твоего́ язы́ка* сбыва́емы зря́,* тя́ ны́нѣ ублажа́ю, проро́че,* и́стиннѣ удивля́емь,* ты́ бо гла́сомъ свѣ́тлымъ* мíръ облиста́лъ еси́,* Госпо́дне провозглаша́я* прише́ствіе спаси́тельное.

Ангелъ* ангелоподо́бнымъ твои́мъ житіе́мъ* на земли́ бы́лъ еси́* и прозва́ніемъ а́нгела* всеподо́бно обогати́лся еси́,* добро́ту душе́вную* добро́тѣ тѣле́снѣй* сугу́бо сочета́въ,* Малахíе всеблаже́нне.

Го́споди,* къ Тебѣ́ Твоего́ проро́ка,* моле́бника и моли́твенника предлага́ю,* его́же мольба́ми, Ще́дре, и моли́твами,* я́ко Благоутро́бенъ,* отча́янныя души́* согрѣше́нія разрѣши́,* суще́ственную имѣ́я* и есте́ственную благосты́ню.

Ины стихи́ры му́ченика, гла́съ то́йже. Подо́бенъ: О, пресла́внаго чудесе́!

Превозвы́шенную ви́дѣвъ* пре́лести мглу́,* бѣ́гая, удали́лся еси́,* страстоте́рпче Гордíе,* Бо́га ожида́я,* мно́гими же болѣ́зньми искуша́емь* и а́лчбами томи́мь,* я́коже вѣ́дый свою́ си́лу подви́жникъ,* устреми́лся еси́ самозва́нъ къ противобо́рцу.

Вельми́ упова́въ,* прише́лъ еси́ къ проти́вныхъ мно́жеству,* всесла́вный Гордíе,* въ ничто́же вмѣни́въ беззако́нныхъ собо́рище,* и, ста́въ посреди́, проповѣ́дникъ самовла́стенъ,* велегла́сно Христа́ проповѣ́далъ еси́* Зижди́теля и Го́спода,* Отцу́ Собезнача́льна* и Честно́му Ду́ху* Единоче́стна и Соприсносу́щна.

Мече́мъ во главу́ усѣка́емь,* отъ жи́зни въ жи́знь, отъ сме́рти въ безсме́ртіе* и отъ тлѣ́нія къ нетлѣ́нію проявле́нно преше́лъ еси́,* не пожда́въ естества́ ме́ртвости,* но самоизво́льно ведо́мь умре́ти.* О, подвиго́въ твои́хъ, страстоно́сче Гордíе,* и́миже Христа́, му́чениче, возвели́чилъ еси́,* Еди́наго Благоутро́бнаго!

Сла́ва, и ны́нѣ, гла́съ 4. Іоа́нна мона́ха:

О, пресла́внаго чудесе́! Иже Ду́хомъ Святы́мъ креща́яй и огне́мъ на Іорда́нъ гряде́тъ крести́тися отъ Іоа́нна: Бо́гъ не на́гъ, ниже́ Человѣ́къ про́стъ, но во двою́ естеству́, Еди́нъ то́йжде Сы́нъ Единоро́дный, ища́й у́бо креще́нія я́ко Человѣ́къ отъ сме́ртнаго, взима́я же я́ко Бо́гъ грѣ́хъ мíра и подая́ всѣ́мъ ве́лію ми́лость.

На стихо́внѣ стихи́ры, гла́съ 6. Подо́бенъ: Тридне́венъ.

Се́ Просвѣще́ніе вѣ́рныхъ, се́ Очище́ніе на́ше вни́ти хо́щетъ во струи́ рѣ́чныя, я́ко да скве́рну отмы́етъ зло́бы человѣ́ческія и обнови́тъ сокруше́нныя ны́.

Сти́хъ: Сего́ ра́ди помяну́хъ Тя́ отъ земли́ Іорда́нски и Ермоніи́мски.

Яко ви́дѣ Тя́ гряду́ща Предте́ча Тво́й, Го́споди, и прося́ща крести́тися отъ него́, со стра́хомъ вопія́ше: Бо́же мо́й, Содѣ́телю мо́й, ка́ко Тя́ крещу́, Нескве́рнаго?

Сти́хъ: Ви́дѣша Тя́ во́ды, Бо́же, ви́дѣша Тя́ во́ды и убоя́шася.

Сни́демся, вѣ́рніи, у́мнѣ ко Іорда́нскимъ струя́мъ, я́ко да чу́до ве́ліе ви́димъ я́вѣ: Зижди́тель бо всѣ́хъ яви́ся зри́мь и крести́тися прише́лъ е́сть.

Сла́ва, и ны́нѣ, гла́съ 5:

На Іорда́нскую рѣку́ Христо́съ Бо́гъ на́шъ прихо́дитъ ко креще́нію, очи́стити хотя́ ны́ отъ беззако́ній на́шихъ Свои́мъ явле́ніемъ, я́ко Еди́нъ Бла́гъ и Человѣколю́бецъ.

Тропа́рь му́ченика, гла́съ 4:

Му́ченикъ Тво́й, Го́споди, Гордíй, во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Тропа́рь предпра́зднства, гла́съ то́йже:

Гото́вися, Завуло́не, и красу́йся, Нефѳали́ме, Іорда́не рѣко́, ста́ни, подыми́, взыгра́я, крести́тися гряду́ща Влады́ку. Весели́ся, Ада́ме съ прама́терію, не кры́йта себе́, я́коже въ раи́ пре́жде, и́бо, на́ги ви́дѣвъ вы́, яви́ся, да облече́тъ въ пе́рвую оде́жду: Христо́съ яви́ся, всю́ тва́рь хотя́ обнови́ти.


НА ПОВЕЧЕРІИ,
Трипѣ́снецъ, ирмосы́ по два́жды, тропари́ же на 6, гла́съ 2, его́же краегране́сіе: Четве́ртому пою́.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Су́етное бы́сть умышле́ніе Иродово, хотя́щаго улучи́ти свобо́ду, беззако́нно убива́ющаго дѣ́ти, Христо́съ бо, Изба́витель на́шъ, жи́знь да́руетъ всѣ́мъ неубíйственну, креща́яся.

Лю́тое совѣща́ніе Иродово младе́нцевъ пе́рвѣе уби́ но́вый во́зрастъ, Виѳлее́мъ кровьми́ испо́лнивъ. Ны́нѣ же Христо́съ гряде́тъ Це́ркве ча́да мно́гая креще́ніемъ сотвори́ти.

Другíй трипѣ́снецъ, его́же краегране́сіе: Предсуббо́тіе же. Гла́съ 6.
Пѣ́снь 5.

Ирмо́съ: Къ Тебѣ́ у́тренюю, благоутро́бія ра́ди Себе́ истощи́вшему непрело́жно и раба́ руко́ю крести́тися восхотѣ́вшему, Сло́ве Бо́жій, ми́ръ пода́ждь ми́, па́дшему, Человѣколю́бче.

Очи́стивше умы́ и предъизмы́вшеся та́инства прича́стіемъ стра́шнаго смотре́нія, вси́ вѣ́рніи, гряду́ща Христа́ сря́щемъ Іорда́нскими струя́ми очи́стити ны́.

Зри́те, дру́зи, гла́съ Сло́ва, Со́лнца свѣти́льника, дру́га Женихо́ва: пока́йтеся! — лю́демъ вопію́ща, — и потщи́теся очи́ститися Зижди́теля на срѣ́теніе.

Пѣ́снь 8.

Ирмо́съ: Глаго́лъ мучи́телевъ поне́же превозмо́же, седмери́цею пе́щь разжже́на бы́сть иногда́, въ не́йже о́троцы не опали́шася, царе́во попра́вше велѣ́ніе, но вопія́ху: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Излія́вше сле́зныя исто́чники, вѣ́рніи, отъ оче́съ, очи́стимъ вся́ку скве́рну душе́вную, и Свѣ́тъ во Свѣ́тѣ Свѣ́томъ у́зримъ, крести́тися Христу́ гряду́щу. Ему́же присвидѣ́тельствуетъ Оте́цъ съ небесе́, и Ду́ха Свята́го блиста́етъ прише́ствіе голуби́нымъ ви́домъ.

Слезу́ вся́кую Христо́съ отъе́мля отъ вся́каго лица́, предгряде́тъ, ду́шъ многоболѣ́зненныя неду́ги неболѣ́зненно водо́ю уставля́я и обветша́вшія человѣ́ки обновля́я пакибытіе́мъ, превознося́щія Его́ во вѣ́ки.

Священнодѣ́йствуются ду́ши креще́нія богода́нною ба́нею и Ду́ха огне́мъ, стра́сти очища́ющаго, и ве́щь попаля́ющаго всю́ скве́рныя зло́бы, и благода́ть даю́щаго вопи́ти во умиле́ніи: Тя́ превозно́симъ, Христе́, во вѣ́ки.

Инъ.

Ирмо́съ: Столпу́ зло́бы лю́таго Ирода вси́ поруга́вшеся, на Іорда́нъ пріиди́те. Идемъ, вѣ́рніи, да у́зримъ Христа́ Изба́вителя, отъ Предте́чи креща́емаго пло́тію во струя́хъ, Его́же вся́ тва́рь благослови́тъ, сла́вящи во вѣ́ки.

Отъ вѣ́ждей душе́вныхъ зло́бы со́нъ оттря́сше, лука́вствія оты́мемъ, вѣ́рніи, отъ серде́цъ на́шихъ и слеза́ми те́плыми омы́емъ смы́слы, я́ко да зри́теліе я́вльшагося яви́мся, Христа́ сла́вяще во вѣ́ки.

Скве́рно сло́во лука́выхъ помышле́ній да не внесе́мъ, сло́ву же боже́ственному поучи́вшеся, пѣ́сни да принесе́мъ Сло́ву, на́съ ра́ди пло́тію я́вльшемуся и просвѣща́ющему су́щія во тмѣ́, Его́же вся́ тва́рь благослови́тъ, сла́вящи во вѣ́ки.

Глубина́ прему́дрости сокрове́ннаго та́инства ны́нѣ явля́ется человѣ́комъ, Бо́жіихъ суде́бъ бе́здна ны́нѣ вѣ́рнымъ открыва́ется, Бо́гу съ пло́тію на земли́ я́вльшуся на обновле́ніе человѣ́ческаго ро́да, Его́же вся́ тва́рь благослови́тъ, сла́вящи во вѣ́ки.

Отрица́ешися, Іоа́нне, е́же да содѣ́лаеши вско́рѣ, повину́яся Мнѣ́, оста́ви у́бо ны́нѣ, та́ко бо подоба́етъ на́мъ вся́ку испо́лнити вои́стинну пра́вду, — Влады́ка рабу́ рече́, Его́же вся́ тва́рь благослови́тъ, сла́вящи во вѣ́ки.

Та́же: Хва́лимъ, благослови́мъ, покланя́емся Го́сподеви, пою́ще и превознося́ще во вся́ вѣ́ки.

Ирмо́съ: Столпу́ зло́бы лю́таго Ирода вси́ поруга́вшеся, на Іорда́нъ пріиди́те. Идемъ, вѣ́рніи, да у́зримъ Христа́ Изба́вителя, отъ Предте́чи креща́емаго пло́тію во струя́хъ, Его́же вся́ тва́рь благослови́тъ, сла́вящи во вѣ́ки.

Пѣ́снь 9.

Ирмо́съ: Душа́ми чи́стыми и нескве́рными устна́ми, пріиди́те, возвели́чимъ Нескве́рную и Пречи́стую Ма́терь Емману́илеву, Еюже изъ Нея́ къ Рожде́нному принося́ще моли́тву: пощади́ ду́ши на́ша, Христе́ Бо́же, и спаси́ на́съ.

Неразу́менъ никто́же и ко Христу́ неблагода́ренъ да бу́детъ, долготерпѣ́ніе пожда́нія Его́ и бла́гость укоря́я, да не преоби́дитъ, но со стра́хомъ и ра́достію да порабо́таемъ Ему́, пою́ще: пощади́ ду́ши на́ша, Христе́ Бо́же, и спаси́ на́съ.

Глаго́летъ лю́демъ непокори́вымъ Предте́ча: кто́ ва́мъ показа́ отъ гнѣ́ва убѣжа́ти гряду́щаго, ехи́днова исча́дія? Покая́нія у́бо плоды́ покажи́те досто́йны, вопію́ще: пощади́ ду́ши на́ша, Христе́ Бо́же, и спаси́ на́съ.

О, слѣ́потнаго неразу́мія де́рзости! Ему́же бо иноплеме́нницы, я́ко Изба́вителю Христу́, поклони́шася, съ да́ры почествова́вше, дома́шніи же неи́стовнѣ иска́ху уби́ти Рожде́ннаго. Пощади́ ду́ши на́ша, Христе́ Бо́же, и спаси́ на́съ.

Инъ.

Ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ.

Всегуби́тельное паде́ніе Ада́мово ны́нѣ исправля́я, яви́ся Но́вый Ада́мъ, свобожде́ніе пакибытія́ подая́ пресла́вно креще́ніемъ.

Зако́нъ и проро́ки исполня́я и пра́вду скончава́я, всѣ́хъ Спа́съ ны́нѣ подъ дла́нь прекланя́ется раба́, отъ рабо́ты восхища́я вра́жія человѣ́ка.

Язы́комъ возсія́ вели́кій Свѣ́тъ, омраче́ннымъ Боже́ственная просія́ заря́, въ сѣ́ни дре́вле сме́ртнѣй сѣдя́щимъ Со́лнце сла́вы, Христо́съ, возсія́.

Окружа́ху а́нгельская во́инства во Іорда́нѣ креща́емаго Изба́вителя и тре́петомъ вели́кое та́инство воспѣва́ху, Сего́ неизглаго́ланное соше́ствіе.

Та́же ирмо́съ: Честнѣ́йшую херуви́мъ и сла́внѣйшую безъ сравне́нія серафи́мъ, безъ истлѣ́нія Бо́га Сло́ва ро́ждшую, су́щую Богоро́дицу, Тя́ велича́емъ. [И покло́нъ.]


НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, му́ченика. И ны́нѣ, предпра́зднства.

По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Неопи́санъ Сы́й Божество́мъ, опи́санъ ве́щію тѣле́сною, хо́щетъ пріити́ вода́ми Іорда́нскими крести́тися, Сего́ чистото́ю мы́сленною пріи́мемъ: всѣ́мъ бо содѣ́лати обновле́ніе хо́щетъ. Къ Нему́же возопіи́мъ со стра́хомъ: сла́ва, Христе́, явле́нію Твоему́.

Сла́ва, и ны́нѣ, подо́бенъ то́йже:

Явльшуся Тебѣ́ во Іорда́нѣ, Спа́се, въ вода́хъ крести́тися пло́тію, а́нгельская во́инства ужаса́хуся, зря́ще рабу́ предстоя́ща Влады́ку тва́ри: свы́ше проповѣ́да Тя́ Оте́цъ Пребезнача́льный. Тѣ́мже съ весе́ліемъ вопіе́мъ Ти́: сла́ва Бо́гу крести́вшемуся.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Единоче́стное Сло́во Отцу́ и Ду́ху, воплоще́нно за милосе́рдіе и креща́емо, а́нгельстіи ли́цы ви́дяще, трепета́ху, и Іорда́нская рѣка́, устыдѣ́вшися и убоя́вшися, возврати́ся вспя́ть, на́съ возводя́ къ высотѣ́ спасе́нія, страстьми́ истлѣ́вшія.

Сла́ва, и ны́нѣ, гла́съ то́йже подо́бенъ:

Собезнача́льное Сло́во Отцу́ и Ду́ху, вообра́жься за милосе́рдіе ны́нѣ въ чужде́е, крести́тися на́съ ра́ди уже́ гряде́тъ. Усря́щемъ Его́ мы́слію чи́стою: благослове́нъ еси́, — вопію́ще, — Христе́ Спа́се Благодѣ́телю, освяти́ти на́съ приходя́й.

Кано́ны три́: предпра́зднства со ирмосо́мъ на 6, и проро́ка на 4, и му́ченика на 4.

Кано́нъ предпра́зднства, его́же краегране́сіе по алфави́ту. Іо́сифъ. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Бе́здны повелѣ́ніемъ сотвори́въ, Человѣколю́бче, Иже зе́млю на вода́хъ повѣ́сивый, Го́споди, смиря́яся, предгряде́ши крести́тися рѣ́чными струя́ми, омыва́я мя́ отъ скве́рныхъ страсте́й.

Хотѣ́ніемъ обнища́лъ еси́, самово́льно обнища́вшаго злы́ми дѣя́ньми мене́ обогаща́я, Христе́, и къ вода́мъ предгряде́ши Іорда́нскимъ, креще́нія прося́, Безгрѣ́шный.

Обветша́вшій прегрѣше́ньми мíръ обновля́я, Человѣколю́бче, стра́нно порожде́ніе гряде́ши сотвори́ти водо́ю и Ду́хомъ человѣ́комъ. Тѣ́мже Твое́ сла́вимъ явле́ніе.

Дави́дъ, Боже́ственнымъ Ду́хомъ предвозглаша́я, вѣща́ше: что́ ти е́сть мо́ре, я́ко побѣ́гло еси́? И ты́ же, я́ко возврати́лся еси́, Іорда́не, Христа́ ви́дѣвъ, на́га стоя́ща въ тебѣ́?

Инъ кано́нъ проро́ка, его́же краегране́сіе: Малахíева мно́ю сла́ва да сла́вится. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Го́рнему ли́ку сра́дуяся, и сему́ сликовству́я и свеселя́ся, и Боже́ственнаго просвѣще́нія досто́йно насыща́яся, богодохнове́нне, вѣ́рою твою́ честну́ю па́мять пра́зднующія, Го́споду пою́щія, моли́твою твое́ю сохрани́.

Ангелообра́зныя души́ красото́ю и добро́тою сія́я, па́ки тѣле́сною, вы́шнюю зарю́ Боже́ственнаго сія́нія прія́лъ еси́, богоглаго́ливе, свѣ́тло и, ра́дуяся, взыва́лъ еси́: Го́споду пои́мъ, сла́вно бо просла́вися.

Непоро́чно соверша́я житіе́ твое́, и о́бразомъ благоукраше́нія украша́яся, и нра́вы благи́ми, преблаже́нне, чи́стя себе́, проро́къ благоче́стія и́стиннаго, зовы́й, бы́лъ еси́: Го́споду пои́мъ, сла́вно бо просла́вися.

Богоро́диченъ: Чи́стая Ма́ти Бо́га Вседержи́теля, Яже отъ ца́рскаго колѣ́на, Влады́чице, возра́стши и Еди́наго Бо́га, всѣ́ми ца́рствующаго, ро́ждши пло́тію па́че естества́, отъ бѣ́дъ мя́ спаси́, Сы́ну Твоему́ пою́ща: сла́вно бо просла́вися.

Кано́нъ му́ченика, его́же краегране́сіе: Му́ченика Гордíя пѣ́сньми сла́дкими пою́. Творе́ніе Ѳеофа́ново. Гла́съ 8.
Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Свидѣ́тель и́стины, Гордíе всеблаже́нне, познава́емь, свѣтоно́сную мнѣ́ благода́ть съ небесе́ пода́ждь моли́твами твои́ми.

Пои́мъ Го́сподеви, страстоте́рпца укрѣ́пльшему на противобо́рныя и вѣнце́мъ побѣ́ды украси́вшему.

Си́лою и всеору́жіемъ всѣ́хъ Царя́ укрѣпля́емь, мучи́телей низложи́лъ еси́ вражду́, всесла́вный Гордíе.

Богоро́диченъ: Воды́, теку́щія въ безсме́ртіе, яви́лася еси́ селе́ніе, источа́ющаго всѣ́мъ человѣ́комъ жи́знь, Богоневѣ́сто.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Возвесели́ся, пусты́ня жа́ждущая, человѣ́ческое естество́ все́: се́ вода́ явля́ется жи́зненная, напая́ющи тя́ новора́сленною благода́тію, Христо́съ, всѣ́хъ обновле́ніе.

Взыска́ти мя́, ра́зумомъ заблу́ждшаго, предгряде́ши на во́ды, Христе́, въ ня́же вше́дъ, потопля́еши моя́ прегрѣше́нія и изъ глубины́ возво́диши мя́ вся́кія зло́бы, я́ко Благоутро́бенъ.

Со́лнце, зрѣ́ти Тя́ иму́щее, Сло́ве, обнаже́на, сокрыва́етъ зари́: гряде́ши бо обнаже́на мя́ ле́стію зміи́ною честны́мъ креще́ніемъ во оде́жду облещи́ спаси́тельную.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ра́дуешися ны́нѣ, зря́ прорече́ній сбытіе́, блаже́нне, твои́хъ и соверше́ніе, Малахíе богопрія́тне.

Исцѣле́ніе въ крила́хъ имѣ́яй, возсія́ Со́лнце мы́сленное пра́вды, я́коже проре́клъ еси́, богодохнове́нне.

Богоро́диченъ: Всю́ наде́жду мою́ на Тя́, Всенепоро́чная, возлага́ю, всю́ къ Тебѣ́, ра́дуяся, простира́ю и ду́шу, и помышле́ніе.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Теку́щихъ нестоя́тельное помышля́я и пребыва́ющихъ состоя́ніе, му́чениче сла́вне, воспомина́я, блаже́нне, безъ стра́ха въ суди́лище вше́лъ еси́ страда́нія.

Отступи́лъ еси́ привре́меннаго су́етства, и приложи́лся еси́, всебога́тне, при́сно пребыва́ющимъ, и, бѣ́гая отъ человѣ́къ, а́нгеломъ единокро́вникъ, богому́дре, бы́лъ еси́.

Земна́я мудрова́нія оста́вивъ, жи́тельство небе́сное, му́чениче, обрѣ́лъ еси́, зрѣ́ти бо не терпя́ пре́лести шата́нія, въ пусты́ню удали́лся еси́.

Богоро́диченъ: Нѣ́сть непоро́чны, я́коже Ты́, Влады́чице, и нѣ́сть пречи́сты, па́че Тебе́, Всенепоро́чная: во утро́бѣ бо Зижди́теля всѣ́хъ вмѣсти́ла еси́, Еди́наго Многоми́лостиваго.

По 3-й пѣ́сни конда́къ проро́ка, гла́съ 4. Подо́бенъ: Яви́лся еси́.

Проро́чества дарова́ніемъ богатѣ́я, проро́че, Христо́во предвозвѣсти́лъ еси́ прише́ствіе я́вѣ и мíрови спасе́ніе, Его́же сія́ніемъ мíръ просвѣти́ся.

Другíй конда́къ му́ченика, гла́съ 8. Подо́бенъ: Яко нача́тки.

Твоя́ по́ты, пресла́вне, всю́ зе́млю напои́ша, и честны́ми кровьми́, Гордíе, мíръ ве́сь возвесели́лъ еси́. Моли́твами твои́ми, богому́дре, спаса́й вся́, вѣ́рою тя́ воспѣва́ющія и ублажа́ющія, вопію́щія пѣ́снь досто́йную, всехва́льне, я́ко многострада́ленъ.

Сѣда́ленъ проро́ка, гла́съ 8. Подо́бенъ: Прему́дрости.

Проро́чествія благода́тію обога́щся, бу́дущихъ зна́нію боголѣ́пно научи́лся еси́ ду́хомъ, Малахíе богодохнове́нне, и предглаго́леши всѣ́мъ Христо́во прише́ствіе, и язы́ковъ, пребога́те, Боже́ственное призва́ніе. Тѣ́мже честну́ю твою́ пра́зднуемъ па́мять, и любо́вію пое́мъ тя́, и вѣ́рно ублажа́емъ, взыва́юще тебѣ́, сла́вне: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва му́ченика, гла́съ то́йже:

Разже́гся любо́вію Іису́совою, самово́льнымъ хотѣ́ніемъ, му́чениче му́дре, усе́рдно на сме́рть себе́ преда́лъ еси́ и посреди́ суди́ща самозва́нъ ста́лъ еси́, вопія́ мучи́телемъ: се́ а́зъ пріидо́хъ. Тѣ́мже и ле́сть дерзнове́ніемъ обличи́въ, мече́мъ во главу́ усѣ́ченъ еси́, сла́вне, и къ жи́зни безконе́чнѣй преста́вился еси́, всехва́льне. Моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

И ны́нѣ, пра́здника, гла́съ то́йже. Подо́бенъ: Свирѣ́лей па́стырскихъ.

Ли́къ проро́ческій, проповѣ́дуя, ра́дуется, креще́ніе Христо́во, живо́тъ источа́ющее. Зове́тъ Иса́ія: почерпи́те во́ду чисти́тельную. Пи́шетъ богооте́цъ: ка́ко отъ лица́ бѣжи́тъ мо́ре благоволе́ніемъ спаса́ющаго Бо́га ро́дъ человѣ́ческій?

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Ужасомъ содержи́тся не́бо и а́нгельская во́инства, раболѣ́пно Тя́ иду́ща, Христе́, къ Твоему́ рабу́ ви́дяще и прося́ща креще́нія.

Іоа́нне, взыгра́й, гряде́тъ бо всѣ́хъ избавля́яй Госпо́дь преклони́тися руцѣ́ твое́й смире́нно, я́ко да смире́ннаго мя́ боже́ственнымъ вознесе́тъ креще́ніемъ.

Преклони́въ небеса́, сше́лъ еси́ въ Дѣ́ву, Человѣколю́бче, и Іоа́нну прекланя́еши ве́рхъ, прося́ креще́нія. Сла́ва мно́гому благоутро́бію Твоему́.

Разрѣша́я безмѣ́рный моя́, Сло́ве, плени́цы согрѣше́ній, на во́ды Іорда́нскія тщи́шися пріити́ и крести́тися, Влады́ко. Сла́ва мно́гому благоутро́бію Твоему́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Проро́къ бы́въ богонача́льныя, блаже́нне, бла́гости, всѣ́мъ язы́комъ проповѣ́далъ еси́ бы́вшее избавле́ніе.

Научи́вся Ду́хомъ преесте́ственному Сло́ва воплоще́нію, неизглаго́ланное та́инство, Малахíе блаже́нне, провозгласи́лъ еси́.

Богоро́диченъ: На Тя́ возложи́хъ вся́ко ча́яніе спасе́нія моего́ и житія́ окормле́ніе, обра́дованная Ма́ти Дѣ́во.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Рече́нія Христо́ва, всеблаже́нне, услы́шавъ, ра́дуяся, тлѣ́нное оста́вилъ еси́ во́инство и Царю́ вво́инился еси́ Небе́сному, вѣнцено́сче му́чениче Гордíе.

Сокруши́шася, му́чениче, го́ры мучи́телей, раста́яшася же хо́лми и́дольстіи терпѣли́внымъ твои́мъ страда́ніемъ, и со дерзнове́ніемъ, вѣнцено́сче, прибли́жившася.

Укрѣпи́лся еси́ креста́ Боже́ственною си́лою, собо́ру злочести́вому вопи́ти велегла́сно: не и́щущимъ обрѣто́хся, не вопроша́ющимъ, ны́нѣ упова́въ, явля́юся.

Ве́сь на тя́, богому́дре, мучи́теля воздви́глъ еси́ неудержи́мый гнѣ́въ, уди́вльшася, всеблаже́нне, умышле́нію и души́ твоея́ воста́нію.

Богоро́диченъ: Невѣ́сто Бо́жія, Марíе Богоро́дице, изба́ви мя́ лю́тыхъ прегрѣше́ній и бѣ́дъ и къ ти́хому приста́нищу и спаси́тельному Твои́ми моли́твами наста́ви.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Дале́че человѣ́чество отъ Бо́га бы́вшее, Сло́во Бо́жіе, уще́дривъ, Человѣ́къ яви́ся, и креще́ніемъ богодѣ́льнымъ сіе́ присвоя́етъ боголѣ́пно, и къ первообра́зному возво́дитъ достоя́нію.

Ме́ртвы бы́вшія ны́ преступле́ньми, гряде́ши, Живода́вче Всеще́дрый, оживи́ти Іорда́нскими струя́ми. Тѣ́мже Твое́ сла́вимъ вѣ́рно ны́нѣ явле́ніе и неизрече́нную ми́лость.

Диви́тся вся́ка душа́, помышля́ющи Твое́, Сло́ве, стра́шное смотре́ніе: ка́ко, назда́ти вся́ хотя́, гряде́ши вни́ти въ рѣ́чныя струи́ обнаже́нъ, Иже свѣ́томъ одѣва́яйся.

Инъ.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Стра́шный де́нь Христо́ва прише́ствія провозвѣсти́лъ еси́, Малахíе богому́дре, Боже́ственнымъ просвѣща́емь Ду́хомъ.

Ду́шъ скве́рну отъе́мля и омыва́я благода́тію, я́коже бѣли́ломъ перу́щихъ, си́це тя́, богому́дре, просла́ви.

Богоро́диченъ: Держа́ву сме́рти, Отрокови́це, живоно́снымъ Твои́мъ рождество́мъ разори́ла еси́, Всесвята́я Дѣ́во, и Жи́знь источи́ла еси́ неразори́му.

Инъ. Ирмо́съ то́йже.

Вше́дъ безъ стра́ха и до́блественнѣ, я́ко ле́въ, въ позо́рище, я́коже ка́меніе безду́шное, блаже́нне, вмѣни́лъ еси́ безу́мныя.

Нака́занъ, му́чениче, богодохнове́ннаго писа́нія уче́ніемъ, вся́ ко спасе́нію обрѣ́лъ еси́ веду́щая, Гордíе.

Разумѣ́въ, богому́дре, тве́рдое твое́ мучи́тель противле́ніе, я́коже о ка́мень волна́, твое́ю разсѣ́деся тве́рдостію.

Богоро́диченъ: Иже изъ Твоея́ утро́бы пресу́щественно, Дѣ́во, Воплоща́яйся мíръ богоразу́мія заре́ю просвѣти́, Пречи́стая.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Иже во тмѣ́ дре́вле сѣдя́щіи Свѣ́тъ прише́дшъ зря́ще, ра́дости испо́лнитеся: се́ яви́ся Госпо́дь, Іорда́нскими струя́ми одѣ́янъ.

Ка́ко у́зритъ Тя́, иду́ща, Предте́ча, Спа́се, и прося́ща боже́ственнаго креще́нія? Ка́ко Тя́ во́ды пріи́мутъ Іорда́нскія, Во́ду су́щу оставле́нія?

Да кропя́тъ, веселя́щеся, о́блацы мы́сленное ра́дованіе: се́ пріи́де крести́тися Госпо́дь, разоря́я те́мныя о́блаки серде́цъ на́шихъ.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Просвѣ́щшися твоя́ му́драя мы́сль отъ самаго́ Боже́ственнаго свѣтозаре́нія, и до́льныхъ отлучи́лся еси́ веще́й, бу́дущихъ сподо́бися ра́зума: зва́ніе бо язы́ковъ и зако́на преста́тіе проре́клъ еси́.

Пріи́де вои́стинну Госпо́дь, Его́же мы́ ра́достно иска́хомъ, во хра́мъ, Его́же Са́мъ отъ Дѣ́вы благослове́нныя му́дрѣ созда́, я́коже рече́, отъ Бо́га осія́вся, Малахíй сла́вный.

Богоро́диченъ: Безнача́льный Отцу́ и Единоро́дный, То́йже Единоча́дый отъ Дѣ́вы вопло́щся, и неизрече́нно роди́ся, и Ро́ждшую Дѣ́ву сохрани́: Бо́гъ бо бѣ́ и́стиненъ, а́ще и естество́ человѣ́ческое прія́тъ.

Инъ.

Ирмо́съ: Якоже проро́ка изба́вилъ еси́ изъ глубины́ преиспо́днія, Христе́ Бо́же, и мене́ отъ грѣхо́въ мои́хъ изба́ви, я́ко Человѣколю́бецъ, и упра́ви живо́тъ мо́й, молю́ся.

Священнодѣ́йствуется же́ртва, и прія́тно приноше́ніе Тебѣ́ прино́сится, иска́пая кро́вію, Гордíй, Влады́ко, во́льнѣй стра́сти Твое́й подо́бяся.

Несмы́сленный умо́мъ тебѣ́ тлѣ́нную обѣщава́етъ сла́вицу, сла́вою нетлѣ́нною, Гордíе, обога́щшемуся и безсме́ртное бога́тство сокры́вшему.

Напра́влена упова́нія къ Бо́гу имѣ́я, прете́клъ еси́ житія́ нестоя́тельное и, мече́мъ посѣка́емь, къ простра́ннѣй широтѣ́ преше́лъ еси́.

Богоро́диченъ: Умерщвле́нный у́мъ мо́й страсте́й треволне́ньми возста́ви, Жи́знь Вѣ́чную, Христа́, Ро́ждшая, подаю́щаго всѣ́мъ исцѣле́нія.

Конда́къ предпра́зднства, гла́съ 4. Подо́бенъ: Яви́лся еси́ дне́сь.

Во струя́хъ дне́сь Іорда́нскихъ бы́въ, Госпо́дь Іоа́нну вопіе́тъ: не убо́йся крести́ти Мя́, спасти́ бо пріидо́хъ Ада́ма первозда́ннаго.

Икосъ:

Не истязу́ю тя́, Крести́телю, предѣ́лы преходи́ти, не глаго́лю тебѣ́: рцы́ Ми, я́же глаго́леши беззако́ннымъ и учи́ши грѣ́шники. То́чію крести́ Мя́ молча́ и ча́я, я́же отъ креще́нія: пріи́меши бо сего́ ра́ди досто́инство, е́же не бы́сть а́нгеломъ, и́бо всѣ́хъ проро́ковъ бо́льша тя́ сотворю́. Отъ о́ныхъ у́бо ни еди́нъ я́вѣ Мя́ ви́дѣ, но во о́бразѣхъ, и сѣ́нѣхъ, и гада́ніихъ, ты́ же предъ тобо́ю стоя́ща ви́дѣлъ еси́, спасти́ бо пріидо́хъ Ада́ма первозда́ннаго.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Сокруше́на мя́ прегрѣше́ньми и лежа́ща во тмѣ́, Го́споди, преступле́нія, поми́ловавъ, уще́дрилъ еси́ за благосты́ню и въ вода́хъ Іорда́нскихъ, Влады́ко, гряде́ши крести́тися.

Что́ стра́нное сіе́ видѣ́ніе? — возопи́ша а́нгельстіи чи́ни, — езе́ра и рѣ́ки сотвори́вый велѣ́ніемъ, Іорда́нскими струя́ми гряде́тъ одѣ́ятися, си́ми бо Ада́ма обновля́етъ.

Высота́ неизрече́нна и глубина́ неизмѣ́рна е́сть, Влады́ко, смотре́нія Твоего́, вся́ко преходя́ ума́ постиже́ніе: ка́ко водо́ю и Всесвяты́мъ Ду́хомъ земны́я очища́еши?

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Ты Влады́чествующаго всѣ́ми всечестно́е проре́клъ еси́ прише́ствіе, Малахíе проро́че сла́вне, зовы́й: благослове́нъ еси́, Го́споди Бо́же, во вѣ́ки.

Пріими́ моля́щагося, Ще́дре, сла́внаго проро́ка Малахíя о и́же благоче́стно пою́щихъ и вопію́щихъ: благослове́нъ еси́, Го́споди Бо́же, во вѣ́ки.

Богоро́диченъ: Всему́ мнѣ́ ве́сь неслія́нно по Ѵпоста́си соедини́лся еси́, Бо́жій Сло́ве, отъ Дѣ́вы Чи́стыя обо́лкся въ мя́, Ще́дре, благослове́нъ еси́, Го́споди Бо́же, во вѣ́ки.

Инъ.

Ирмо́съ: Отроки ороси́вый въ пещи́ и Дѣ́ву сохрани́вый, ро́ждшую Тя́, по рождествѣ́, благослове́нъ еси́, Бо́же оте́цъ на́шихъ.

Муче́нія сла́ву стяжа́въ, со а́нгелы лику́еши, вѣнцено́сче, Христу́ взыва́я: благослове́нъ еси́, Го́споди Бо́же оте́цъ на́шихъ.

Благочести́вое дерзнове́ніе имѣ́я, злочести́выя облича́еши, воспѣва́я велегла́сно: благослове́нъ еси́, Го́споди Бо́же оте́цъ на́шихъ.

Изба́витися прегрѣше́ній ны́нѣ моли́ вѣ́рою чту́щимъ твою́ честну́ю па́мять и пою́щимъ велегла́сно: благослове́нъ Бо́гъ оте́цъ на́шихъ.

Богоро́диченъ: Ядоме́тное те́рніе грѣха́ исцѣле́ній одожде́ніемъ Твои́хъ отмыва́еши, Богороди́тельнице Благослове́нная Всечи́стая, Бо́га безсѣ́менно ро́ждшая.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Гла́съ Роди́телевъ съ высоты́ Сы́на свидѣ́тельствуетъ Единосу́щна, входя́ща въ во́ды и благослове́ніе Твое́ си́мъ предпосыла́юща, благослове́нне Христе́, и Ду́хъ Тя́ Святы́й всѣ́мъ проповѣ́дуетъ Бо́га воплоще́нна.

Лику́й, тва́ре, уви́дѣвши Бо́жіе свято́е явле́ніе, а́нгели, по́йте, мо́ре, весели́ся, езе́ра и исто́чницы, взыгра́йте, и рѣ́ки, та́йно восплещи́те пѣ́сньми: предста́ благослове́ньми ва́съ Христо́съ просвѣща́яй.

Пое́мъ Го́споду во хвале́ніи, я́вльшемуся на вода́хъ, и сокруше́ніе на́ше си́ми обно́вльшему, и главы́ сте́ршему неви́димыхъ враго́въ, и воззове́мъ: по́йте, дѣла́, Го́спода и превозноси́те Его́ во вся́ вѣ́ки.

О, чу́до чуде́съ! Ка́ко, вся́кія тва́ри вы́шши, Бо́гъ на́шъ зи́ждется и обновля́ется отъ Богороди́тельницы, и обновля́етъ во́лею, и назида́етъ на́съ водо́ю и Ду́ха обновле́ніемъ чу́днымъ, Еди́ный Благодѣ́тель?

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Очужди́вся вся́каго ве́щнаго явле́нія, священноявле́нне, Боже́ственныя зари́ яви́лся еси́ нескве́рно зерца́ло, поя́: благослови́те, вся́ дѣла́, Го́спода и превозноси́те Его́ во вѣ́ки.

Неизрече́нныя сла́вы зри́тель ты́ бы́лъ еси́ и та́инъ небе́сныхъ, блаже́нне, проповѣ́дникъ бы́въ, поя́ непреста́нно: благослови́те, вся́ дѣла́, Го́спода и превозноси́те Его́ во вѣ́ки.

Богоро́диченъ: Жи́зни Тя́ Ма́терь и Бо́жію Роди́тельницу позна́вше, правосла́вною вѣ́рою вси́ блажи́мъ, Дѣ́во Ма́ти, благословя́ще вку́пѣ Рождество́ Твое́ Пречи́стое и превознося́ще, Чи́стая, во вся́ вѣ́ки.

Инъ.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Возслѣ́дующая тебѣ́ благода́ть, неви́димо просвѣ́щши, му́чениче, до́блести испо́лни, — благослови́те, — вопію́ща, — вся́ дѣла́ Госпо́дня, Го́спода.

Тече́ніемъ ско́рымъ гоня́, страда́льче, къ жела́емому концу́, Ца́рствія дости́глъ еси́, зовы́й: благослови́те, дѣла́ Госпо́дня, Го́спода.

Въ непроходи́мыя вѣ́ки пребыва́етъ му́чениковъ Твои́хъ сла́ва и безсме́ртное благохвале́ніе: благослови́мъ Тя́, вся́ дѣла́, я́ко Го́спода.

Богоро́диченъ: Воплоще́нно Сло́во заче́нши, пе́рвѣе безпло́тное, Евину кля́тву дре́внюю отврати́ла еси́, Благослове́ніе, Дѣ́во, мíру ро́ждши.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Се Агнецъ, взе́мляй прегрѣше́нія человѣ́чества, пріи́де и предста́ къ рабу́, прося́ креще́нія, раболѣ́пно предстои́тъ свободи́ти ища́й порабоще́нныя ны́ отъ льсти́ваго и добро́ту пе́рвую погу́бльшія.

Яви́ся я́вственно Бо́гъ, воплоща́емь за бла́гость, и Іорда́нскими одѣ́ятися гряде́тъ вода́ми, одѣва́яй не́бо о́блаки вои́стинну: Сего́ вси́ ны́нѣ предпра́зднуимъ честно́е ра́достію явле́ніе.

Взыгра́й ра́достно и предугото́вися подъя́ти во́ду теку́щую, о Іорда́не, въ вѣ́чную жи́знь; рѣ́ки, лику́йте, ви́дяще ны́нѣ пи́щнаго Пото́ка, во струи́ Іорда́нскія входя́ща и зло́бы излія́ніе изсуша́юща.

Озари́ся на́мъ де́нь спаси́тельный, въ нощи́ лю́тыхъ всегда́ спя́щимъ, и́бо предста́ Христо́съ Госпо́дь, пра́вды Со́лнце сы́й и разумѣва́емый, подклони́ти главу́ Свою́ рабу́ и пло́тію крести́тися во́лею.

Ужаса́ются херуви́ми и все́ небе́сное естество́, Всенепоро́чная, па́че постиже́нія честна́го Твоего́ Рождества́, уподо́бльшагося на́мъ за благоутро́біе неизглаго́ланное и кре́щшагося пло́тію, Его́же Боже́ственное вси́ явле́ніе пра́зднуемъ ны́нѣ, ра́дующеся.

Инъ.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Наста́ богосія́нный проро́ка пра́здникъ и честны́й, озаря́я приходя́щія вѣ́рою и пою́щія проро́ческими блиста́ніи, и всѣ́мъ то́чащій душа́мъ исцѣле́нія, и просвѣща́ющій я́сно богому́дрыя.

Соблюди́ живонача́льною десни́цею Твое́ю держа́вною, Многоми́лостиве, Це́рковь Твою́, мольба́ми Твоего́ уго́дника, проре́кшаго на́мъ Твое́ вочеловѣ́ченіе, и́мже возсія́ спасе́ніе и душа́мъ избавле́ніе.

Богоро́диченъ: Зрѣ́лу объе́млю жи́знь, неврежде́нъ дре́вомъ ра́зума: Ты́ бо, Всенепоро́чная, Жи́зни дре́во — Христа́, прозябла́ еси́, вхо́ды живота́ всѣ́мъ показа́вшаго. Тѣ́мъ Тя́, Всечи́стая, Богоро́дицу, вѣ́рніи, возвѣща́емъ.

Инъ.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Ми́лостива бы́ти моли́ Влады́ку вѣ́рою тя́ чту́щимъ и тво́й свѣтоно́сный и честны́й пра́здникъ соверша́ющимъ, Гордíе, му́чениковъ украше́ніе.

Ны́нѣ нетлѣ́нныя пи́щи и боговидѣ́нія насыща́яся, Гордíе, и Свѣ́та Невече́рняго, въ жили́щахъ вѣ́чныхъ пріе́млеши припло́дія по́двиговъ твои́хъ.

Сла́ву мимотеку́щую, и тлѣ́нную, и попира́емую презрѣ́въ, богому́дре му́чениче, присносу́щныя ны́нѣ сла́вы и ра́дости вои́стинну наслажда́ешися, престо́лу Влады́чнему предстоя́.

Богоро́диченъ: Яко спа́сшеся, Дѣ́во, пе́рвыя кля́твы Твои́мъ Боже́ственнымъ Рождество́мъ, досто́йно пою́ще, гла́сы немо́лчными вопіе́мъ: ра́дуйся, Богоро́дице, наде́жда на́ша.

Свѣти́ленъ. Подо́бенъ: Ду́хомъ во святи́лищи.

Виѳлее́мъ оста́вивше, пресла́вное чу́до, ко Іорда́ну теце́мъ душе́ю те́плою и та́мо у́зримъ стра́шное та́инство: боголѣ́пно бо предста́, обнажи́вся, Христо́съ мо́й, одѣва́я мя́ во оде́жду небе́снаго Ца́рствія.

ла́ва, и ны́нѣ, то́йже.

На хвали́техъ стихи́ры, на 4, гла́съ 6. Подо́бенъ: Ангельскія.

Престо́лъ не́бо имѣ́я, Влады́ка пріи́де на зе́млю, вопло́щся отъ Дѣ́вы, и, на Іорда́нѣ предста́въ, очище́нія всѣ́хъ про́ситъ отъ Іоа́нна. Оте́чествія земли́ всея́, Тому́ пое́мъ: благослове́нъ явле́йся, Бо́же на́шъ, сла́ва Тебѣ́.

Приспѣ́ Христо́съ ко струя́мъ Іорда́нскимъ, креще́нія прося́, очища́яй грѣхи́. Вся́ земля́ да игра́етъ, небеса́ да веселя́тся. Ра́дуйся, язы́ческая Це́рковь, Царю́ уневѣ́стившися, вѣ́рно возопíй: благослове́нъ явле́йся, Бо́же на́шъ, сла́ва Тебѣ́.

Го́ры сла́дость весе́лія да ка́плютъ, рука́ми та́инственно ны́нѣ восплещи́те, язы́цы, пусты́ня да процвѣте́тъ. Іорда́не, подыми́, гряди́, Крести́телю, та́инству Изба́вителя послужи́, ра́дуяся. Лю́діе, воспои́мъ: благослове́нъ явле́йся, Бо́же на́шъ, сла́ва Тебѣ́.

Свѣ́тъ изъ Свѣ́та пре́жде лѣ́тъ возсія́вый, въ нощи́ сѣдя́щимъ яви́ся и тму́ грѣха́ очи́сти и просвѣти́. Лику́й, Ада́ме, и весели́ся, Ево, избавле́ніе, Христо́съ, пріи́де. Дави́де, возопíй: благослове́нъ явле́йся, Бо́же на́шъ, сла́ва Тебѣ́.

Сла́ва, гла́съ и подо́бенъ то́йже:

Звѣзда́ изъ Іа́кова возсія́ мíру и, пла́менный человѣ́ковъ грѣ́хъ воспріи́мъ, погреба́етъ во Іорда́нскихъ вода́хъ, сія́я Божества́ сія́ніемъ и просвѣще́ніе богоразу́мія подава́я язы́комъ: благослове́нъ явле́йся, Бо́же на́шъ, сла́ва Тебѣ́.

И ны́нѣ, подо́бенъ то́йже:

Закона́ Испо́лнитель по пло́ти бы́въ, пріи́де Христо́съ, нача́токъ спасе́нія на Іорда́нъ соверши́ти, я́ко Благосе́рдъ, и Крести́телю подклоня́етъ ве́рхъ, вѣ́рно вопію́щу: лю́діе, зове́мъ: благослове́нъ явле́йся, Бо́же на́шъ, сла́ва Тебѣ́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Отъ Виѳлее́ма* на Іорда́нъ пре́йдемъ,* та́мо бо Свѣ́тъ* су́щимъ во тмѣ́* озаря́ти уже́ начина́етъ.

Сти́хъ: Сего́ ра́ди помяну́хъ Тя́* отъ земли́ Іорда́нски и Ермоніи́мски.

Земля́ Завуло́ня,* су́щіи объ о́нъ по́лъ Іорда́на,* услы́шите:* приближа́ется Христо́съ,* Спасе́ніе, Свѣ́тъ и Избавле́ніе.

Сти́хъ: Ви́дѣша Тя́ во́ды, Бо́же,* ви́дѣша Тя́ во́ды и убоя́шася.

Угото́ви и ты́,* Іорда́не, струи́,* огне́мъ бо Креща́яй* приближа́ется обнови́ти* сокруше́нное созда́ніе.

Сла́ва, и ны́нѣ, гла́съ и подо́бенъ то́йже:

Яви́ся сла́вы* Отчее Сія́ніе* во струя́хъ Іорда́нскихъ,* креще́ніемъ очища́я* скве́рну ду́шъ на́шихъ.


НА ЛИТУРГІИ,

Блаже́нна отъ кано́на предпра́зднства пѣ́снь 3-я и 6-я. Проки́менъ, гласъ 7: Возвесели́тся пра́ведникъ о Го́сподѣ [и упова́етъ на Него́]. Сти́хъ: Услы́ши, Бо́же, гла́съ мо́й, внегда́ моли́тимися къ Тебѣ́. Апо́столъ къ Тимоѳе́ю, зача́ло 292. Аллилу́ія, [гла́съ 4]: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. [Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе Матѳе́я, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 23 – 33 об.

/ Къ оглавленію раздѣла /


Наверхъ / Къ титульной страницѣ

0