Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія во 2-й де́нь.
Предпра́зднство Просвѣще́нія, и па́мять и́же во святы́хъ отца́ на́шего Сильве́стра, па́пы Ри́мскаго.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Предпра́зднственныя пѣ́сни* бла́гоче́стно предвозгласи́мъ* честна́го Креще́нія Бо́га на́шего:* се́ бо хо́щетъ, я́ко Человѣ́къ,* пло́тію пріити́ къ Предте́чи Своему́* и проси́ти Креще́нія спаси́тельнаго* въ назда́ніе всѣ́хъ,* вѣ́рою свяще́нно просвѣща́емыхъ* и прича́стниковъ Ду́ха.

Христо́съ показу́ется,* Бо́гъ явля́ется,* я́коже Дави́дъ преднаписа́ я́вственнѣйше,* и къ рабу́, Креще́нія прося́, гряде́тъ.* Іорда́не рѣко́, весе́лія испо́лнися;* земля́ и мо́ре,* го́ры и хо́лми,* и человѣ́ческая ны́нѣ игра́йте сердца́,* Свѣ́тъ мы́сленный воспріе́млюще.

Рѣку́ мíра Тя́* и пото́къ, я́коже пи́шетъ,* пи́щи су́ща, Всеси́льне,* ка́ко Тя́ ре́чныя струи́* пріи́мутъ, Го́споди,* восходя́ща на́га,* не́бо облага́ющаго о́блаки,* и обна́жша вся́ку зло́бу вра́жію,* и нетлѣ́ніемъ земноро́дныя одѣва́юща?

Ины стихи́ры свята́го, гла́съ 8. Подо́бенъ: О, пресла́внаго чудесе́!

Отче святи́телю Сильве́стре,* свяще́нства свѣ́томъ* священнопросвѣща́емь,* вѣ́рныя просвѣти́лъ еси́ свѣтолу́чными уче́ніи,* Еди́ницу Естество́мъ Тріѵпоста́сное Существо́ чествова́ти,* и отгна́лъ еси́ тму́ ересе́й.* Тѣ́мже свѣтоно́сную дне́сь* я́сно па́мять твою́,* ра́дующеся, торжеству́емъ.

Отче богоно́се Сильве́стре,* сто́лпъ яви́лся еси́ о́гненъ,* свяще́нно предводя́ свяще́нный собо́ръ,* и о́блакъ осѣня́ющь,* отъ еги́петскія ле́сти вѣ́рныя изыма́ющь,* и къ Боже́ственнѣй земли́ пренося́щь* неле́стными твои́ми уче́ніи всегда́.* Тѣ́мже благосла́вную и всесвяще́нную* па́мять твою́ чти́мъ.

Отче богоглаго́ливе Сильве́стре,* струя́ми твои́хъ моли́твъ,* многообра́знаго змíя тве́рдо затвори́лъ еси́,* священноудивля́емь,* е́ллиновъ мно́жество Бо́гу приве́лъ еси́,* евре́евъ же суровство́ смири́лъ еси́,* чудеса́ ве́лія творя́ предъ ни́ми я́вѣ.* Тѣ́мже тя́ чти́мъ и ублажа́емъ.

Сла́ва, и ны́нѣ, гла́съ 6:

Гряде́тъ ко Іорда́ну Христо́съ Истина крести́тися отъ Іоа́нна, и глаго́летъ къ Нему́: а́зъ тре́бую отъ Тебе́ крести́тися. И Ты́ ли гряде́ши ко мнѣ́? Не смѣ́ю сѣ́но, прикосну́тися Огню́, Ты́ мя освяти́, Влады́ко, боже́ственнымъ явле́ніемъ Твои́мъ.

На стихо́внѣ стихи́ры самогла́сны, гла́съ 1:

Іоа́нна мона́ха: Свѣ́телъ у́бо мимоше́дшій пра́здникъ, свѣтлѣ́йшій же, Спа́се, приходя́щій: о́нъ а́нгела имѣ́яше благовѣ́стника, и се́й Предте́чу обрѣ́те предугото́вителя. Онъ кро́вемъ излива́емымъ, я́ко безча́денъ, рыда́ше Виѳлее́мъ, и се́й вода́мъ благослове́ннымъ многоча́дна познава́ется купѣ́ль. Тогда́ звѣзда́ волхво́мъ возвѣсти́, ны́нѣ же Оте́цъ мíру Тя́ показа́. Воплоти́выйся и па́ки гряды́й я́вѣ, Го́споди, сла́ва Тебѣ́.

Гла́съ 2.

Сти́хъ: Сего́ ра́ди помяну́хъ Тя́ отъ земли́ Іорда́нски и Ермоніи́мски.

Андре́я Іерусали́мскаго: Па́ки Іису́съ мо́й очища́ется во Іорда́нѣ, па́че же очища́етъ грѣхи́ на́ша: гряде́тъ бо вои́стинну на Креще́ніе, омы́ти хотя́ Ада́мово рукописа́ніе. И рече́ ко Іоа́нну: гряди́, послужи́, о Крести́телю, та́инства стра́ннаго глави́знѣ. Гряди́, простри́ ру́ку твою́ ско́ро, и прикосни́ся верху́ сте́ршаго змíеву главу́ и отве́рзшаго ра́й, его́же затвори́ преступле́ніе ле́стію змíевою, вкуше́ніемъ дре́ва иногда́.

Гла́съ 3.

Сти́хъ: Ви́дѣша Тя́ во́ды, Бо́же, ви́дѣша Тя́ во́ды и убоя́шася.

Ясенъ у́бо мимоше́дшій пра́здникъ, сла́внѣйшій же настоя́щій де́нь: во о́нъ Спа́су волсви́ поклони́шася, въ се́мъ же Влады́ку ра́бъ сла́венъ крести́. Та́мо па́стыріе, свиря́юще, ви́дѣвше и чудя́хуся, здѣ́ же гла́съ Отчій Единоро́днаго Сы́на проповѣ́да.

Сла́ва, и ны́нѣ, гла́съ то́йже:

Пріиди́те, вси́ вѣ́рніи, Іуде́йскую страну́ оста́вивше, пре́йдемъ пусты́ню Іорда́нскую и у́зримъ дне́сь та́мо на́съ ра́ди Явльшагося пло́тію, Креще́нія прося́ща во струя́хъ Іорда́нскихъ, Крести́теля, отрица́ющася и вопію́ща со стра́хомъ: не смѣ́ю рукоположи́ти бре́нною дла́нію Огня́. Іорда́нъ и мо́ре бѣжа́ша, Спа́се, и возврати́шася, и а́зъ ка́ко положу́ на ве́рхъ Тво́й ру́ку, Его́же трепе́щутъ серафи́ми? Побѣже́ Іорда́нъ, я́ко прія́тъ Елиссе́й Иліину́ ми́лоть. Ка́ко не за́йде въ про́пасть и глубину́ ви́дяй на́га тя́ во струя́хъ? Ка́ко же не опали́тъ мя́, всего́ отъ Тебе́ разгара́ема? Что́ косни́ши, Крести́телю, крести́ти Го́спода моего́? — Іорда́нъ вопіе́тъ ко Іоа́нну, — что́ мно́гихъ возбраня́еши очище́ніе? Всю́ тва́рь освяти́, оста́ви освяти́ти и мене́, и водно́е естество́, я́ко на сіе́ яви́ся.

Тропа́рь Сильве́стра, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й Истина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Сильве́стре, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, предпра́зднства, гла́съ то́йже:

Гото́вися, Завуло́не, и красу́йся, Нефѳали́ме, Іорда́не рѣко́, ста́ни, подыми́, взыгра́я, крести́тися гряду́ща Влады́ку. Весели́ся, Ада́ме съ прама́терію, не кры́йта себе́, я́коже въ раи́ пре́жде, и́бо, на́ги ви́дѣвъ вы́, яви́ся, да облече́тъ въ пе́рвую оде́жду: Христо́съ яви́ся, всю́ тва́рь хотя́ обнови́ти.


НА ПОВЕЧЕРІИ,

Пое́мъ трипѣ́снецъ. Ирмосы́ по два́жды, тропари́ на 6 и послѣди́ ирмо́съ о́ба ли́ка вку́пѣ. Аще же двоирмо́сенъ трипѣ́снецъ, и пое́мъ 1-го творца́ ирмо́съ два́жды, тропари́ же обои́хъ творцо́въ на 6, и послѣди́ ирмо́съ 2-го кано́на о́ба ли́ка вку́пѣ. Си́це пое́мъ кано́нъ, и ирмосы́, и на про́чіихъ повече́ріяхъ.

Трипѣ́снецъ, его́же краегране́сіе: Второ́му же. Гла́съ 2.

Пѣ́снь 1.

Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозе́ е́ изра́ильтескія лю́ди наста́вльшему, Го́сподеви пои́мъ, сла́вно бо просла́вися.

Припѣ́въ: Сла́ва Тебѣ́, Бо́же на́шъ, сла́ва Тебѣ́.

Неизрече́нное Зижди́теля соше́ствіе, пе́рвѣе отъ Дѣ́вы возсія́вша, мíръ озари́ло е́сть: Са́мъ же па́ки Христо́съ, друго́е та́инство ны́нѣ соверша́я, гряде́тъ на Іорда́нъ земнымъ въ стра́нное возрожде́ніе.

Служа́ дѣ́лу стра́шному, предгряде́тъ ко Іорда́ну Предте́ча ны́нѣ, Словесе́ гла́съ, обнища́вшаго Ада́ма обогаща́яй Бо́жество́мъ, Ду́хомъ бо богатя́, гряде́тъ Христо́съ да́ромъ Креще́нія.

Пѣ́снь 8.

Ирмо́съ: Устраши́ся отроко́въ бла́гочести́выхъ сообра́знаго души́ нескве́рнаго тѣ́ла и устрани́ся воспита́нный въ безмѣ́рномъ веществѣ́ неутружде́нъ о́гнь: присноживу́щу же изувя́дшу пла́меню вѣ́чнующая пѣ́снь воспѣва́шеся: Го́спода вся дѣла́ по́йте, и превозноси́те во вся́ вѣ́ки.

Ва́съ, Моя сосу́ды избра́нныя, тогда́ позна́ю, а́ще Моего́ дарова́нія печа́ть вообрази́тся въ ва́съ. — Трисія́нный облиста́ющи свѣ́тъ ко Креще́нію, Христо́съ сло́во рече́ въ лѣ́ности уны́нія пребыва́ющимъ, — въ се́мъ бо пу́ть спасе́нія пода́мъ, и свобожде́нія жи́знь всѣ́мъ да́рую.

Чи́на проти́вна въ Тебѣ́ есте́ственнаго е́сть ве́щь соверша́ема ны́нѣ: ме́ньшее бо, Твоего́ благослове́нія тре́бую лу́чшаго. Тѣ́мже убоя́хся верху́ прикосну́тися Твоему́, — Изба́вителю, возопи́ Предте́ча, — нелѣ́по бо, да прибли́жится Огнь сѣ́ну, Ты́ мя па́че освяти́, Твоего́ раба́.

Другíй двоепѣ́снецъ, его́же краегране́сіе: Тре́тіему же. Гла́съ то́йже.

Ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

Уны́нія со́нъ душе́вный оттря́сше серде́чною бо́дростію Гряду́щему очи́стити ду́ши во струя́хъ возопіи́мъ: благослови́те, дѣла́ Госпо́дня, Го́спода.

Да удовли́тся дѣя́ніе въ на́съ души́ въ высо́цѣмъ зрѣ́ніи, я́ко да сугу́бо яви́вшеся свѣ́тли, вся́ очища́ющему боже́ственными струя́ми, Влады́цѣ яви́мся вси́.

Тала́нтъ сло́вомъ дѣ́ятельнымъ украси́вше въ сугу́бомъ дѣ́ланіи, вѣ́рою да́вшему Влады́цѣ вѣ́рніи, я́ко раби́ принесе́мъ крести́тися гряду́щему душа́мъ на обновле́ніе.

Вмѣ́сто Сла́вы, глаго́лемъ: Бла́гослови́мъ Отца́, и Сы́на, и Свята́го Ду́ха, Го́спода.

А къ послѣ́днему тропарю́ глаго́лемъ: И ны́нѣ.

Та́же, на схо́дѣ пое́мъ: Хва́лимъ, бла́гослови́мъ, покланя́емся Го́сподеви, пою́ще и превознося́ще во вся вѣ́ки.

И пое́мъ ирмо́съ: Велѣ́нію мучи́телеву преподо́бніи тріе́ о́троцы не повину́вшеся, въ пе́щь вве́ржени, Бо́га исповѣ́даху, пою́ще: благослови́те, дѣла́ Госпо́дня, Го́спода.

Пѣ́снь 9.

Ирмо́съ: Возвели́чилъ еси́, Христе́, ро́ждшую Тя́ Богоро́дицу, отъ Нея́же, Созда́телю на́шъ, въ подобостра́стное на́мъ обле́клся еси́ тѣ́ло, на́шихъ прегрѣше́ній рѣши́тельное. Сію́ ублажа́юще, вси́ ро́ди, Тебе́ велича́емъ.

Скве́рну вся́ку стра́стную оттря́сше, досто́йно Креще́нія Боже́ственнаго о́бразъ пріими́те мы́сленно: гряде́тъ бо Зижди́тель очище́ніе дарова́ти стра́нное, во струя́хъ креща́яся, всѣ́мъ же но́вое показа́ти измѣне́ніе.

Взира́юще на Христа́, смиря́ющагося во́лею да́же и до ра́бія о́браза, подъ крѣ́пкую Его́ ру́ку ны́нѣ смири́мся, ду́хомъ взе́мшеся, я́ко да креща́ема Сего́ чи́стыми дѣлы почти́мъ.

Инъ.

Ирмо́съ: Невмѣсти́маго Бо́га во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во.

Грѣхо́вную мглу́ вси́ отложи́вше, чи́сти вся́ очища́ющему струя́ми боже́ственными яви́мся Влады́цѣ.

Во Іорда́нѣ рѣцѣ́ крести́тися гряду́щему Христу́, пріиди́те, прибли́жимся, сле́зными очи́щшеся струя́ми.

Вмѣ́сто Досто́йно..., пое́мъ ирмо́съ: Невмѣсти́маго Бо́га во чре́вѣ вмѣсти́вшая и ра́дость мíру роди́вшая, Тя́ пое́мъ, Богоро́дице Дѣ́во. [И покло́нъ.]

По трисвя́то́мъ конда́къ предпра́зднства. Си́це глаго́лемъ на повече́ріяхъ и до пра́здника.


НА УТРЕНИ,
На Бо́гъ Госпо́дь: Тропа́рь предпра́зднства, два́жды. Сла́ва, свята́го. И ны́нѣ, предпра́зднства.

По 1-й стихоло́гіи сѣда́ленъ, гла́съ 1. Подо́бенъ: Гро́бъ Тво́й, Спа́се.

Одѣ́явся въ мою́, Іису́се мо́й, нищету́, предгряде́ши, Тебе́ съ рабы́ смѣша́я и креще́нія прося́ отъ раба́, Человѣколю́бче. Тѣ́мже, ви́дѣвъ тя́ Іоа́ннъ вопія́ше: ка́ко крещу́ Тя, скве́рны весьма́ не иму́ща, Бо́же Преблагíй?

Сла́ва, и ны́нѣ, подо́бенъ то́йже:

Предгряде́тъ Христо́съ бла́гостію къ струя́мъ рѣ́чнымъ Іорда́нскимъ и въ тѣ́хъ на́ше обновле́ніе содѣ́лати хо́щетъ бла́года́тію. Боже́ственный Предте́че, Сего́ пріими́ ра́дуяся, и въ вода́хъ Того́ восхотѣ́вша омы́й, Еди́наго Человѣколю́бца.

По 2-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Обнища́въ Бога́тый за милосе́рдіе мно́гое, на́съ, обнища́вшихъ невоздержа́ніемъ иногда́, обогати́ти хотя́, гряде́тъ вни́ти во Іорда́нскія струи́ и отъ Іоа́нна я́вственно крести́тися. Воспои́мъ, вѣ́рніи, Того́ кра́йнее смире́ніе.

Сла́ва, и ны́нѣ, подо́бенъ то́йже:

Соверши́ся дне́сь Иса́іи гла́съ вопію́щаго: угото́вите пу́ть Госпо́день и стези́ сотвори́те. Возгласи́ бо, я́коже рече́, пустынолю́бная труба́, вся́ созыва́ющи, Іоа́ннъ вели́кій. Тѣ́мже стеце́мся ку́пно, и пресла́вная уви́димъ.

Кано́нъ предпра́зднства со ирмосо́мъ на 8, ирмо́съ по два́жды, тропари́ же на 6 и свята́го на 4.

Кано́нъ предпра́зднства, его́же краегране́сіе по алфави́ту, Іо́сифъ. Гла́съ 2.
Пѣ́снь 1.

Ирмо́съ: Непроходи́мое волня́щееся мо́ре Бо́жіимъ Свои́мъ велѣ́ніемъ изсуши́вшему и пѣшеше́ствовати сквозѣ́ е́ изра́ильтескія лю́ди наста́вльшему, Го́сподеви пои́мъ: сла́вно бо просла́вися.

Вѣ́дый Госпо́дне прише́ствіе, изъ пусты́ни прихо́дитъ боже́ственный Предте́ча, вопія́ свѣ́тло: прибли́жися, яви́ся избавле́ніе, пока́йтеся и водо́ю очи́ститеся.

Погруже́нна мя́ грѣхо́въ волно́ю, Сло́ве, Отцу́ Собезнача́льне, всего́ очи́сти покая́нія кропле́ніемъ, и́же Креще́ніемъ Твои́мъ вѣ́рнымъ избавле́ніе при́сно да́руя за милосе́рдіе безмѣ́рное.

Земля́, я́коже пи́шетъ, Завуло́ня незаходи́мый ви́дѣвши Свѣ́тъ, озари́ся: се́ бо пріи́де на Іорда́нскія струи́, и Су́щаго надъ всѣ́ми Бо́га пое́тъ, зову́щи: Го́сподеви воспои́мъ, сла́вно бо просла́вися.

Наро́дъ ве́сь богоглаго́ливый Предте́ча ви́дя прише́дшъ, си́мъ вѣща́ше: кто́ показа́ ва́мъ отъ гряду́щаго гнѣ́ва бѣжа́ти? Сотвори́те покая́нія плоды́, благода́тію спаса́еміи.

Инъ кано́нъ свята́го, его́же краегране́сіе: Пѣ́ти тя́ вѣ́рою, бла́года́ть да́ждь, бла́же́нне. Іо́сифъ. Гла́съ 8.
Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Сыноположи́вся благода́тію, Сильве́стре, Бо́гу Отцу́, чи́сто житіе́ облобыза́въ, и Боже́ственными блиста́ніи душе́ю свѣтови́дѣнъ бы́въ, преше́лъ еси́ къ Свѣ́ту, зовы́й, невече́рнему: Го́споду воспои́мъ, сла́вно бо просла́вися.

Велему́дренно стра́сти удержа́лъ еси́, и пло́ть по́стнымъ житіе́мъ повину́лъ еси́ ду́ху, му́дре, и Боже́ственное жили́ще Тро́ицы бы́въ свѣ́тло, лука́вствія ду́хи, Го́споду поя́, смири́лъ еси́, сла́вно бо просла́вися.

Зако́ну Боже́ственному Боже́ственнѣ повину́яся, и Богодухнове́ннаго Писа́нія ра́зумомъ укра́шенъ, е́ллинскія мудрецы́ и́стинѣ наказа́лъ еси́ Христа́ исповѣ́дати со Отце́мъ и Ду́хомъ, вопію́щія: Го́споду воспои́мъ, сла́вно бо просла́вися.

Во Ѵпоста́си Еди́нѣй познава́ема, вопло́щшагося Христа́, блаже́нне, проповѣ́далъ еси́, во дву́хъ во́ляхъ и дѣ́йствіихъ, Сильве́стре, разумѣва́ема и вѣ́рою Тому́ обожи́вша зову́щія: Го́споду воспои́мъ, сла́вно бо просла́вися.

Богоро́диченъ: Да ни́жнія съ вы́шними совокупи́тъ, Еди́ный всѣ́хъ Бо́гъ, во чре́во Неискусобра́чныя вни́де, и въ подо́біи пло́тстѣмъ яви́ся, вражды́ средогра́діе разо́рь, ми́ръ введе́, и жи́знь подаде́, и Боже́ственное избавле́ніе.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Яви́ся Христо́съ, — вопіе́тъ Предте́ча, — и на струи́ восхо́дитъ Іорда́нскія, срѣ́сти Сего́ потщи́мся, чи́стыми помышле́ніи просвѣща́еми.

Ища́ мя, безпу́тіемъ заблу́ждшаго, Бо́же мо́й, нището́ю бога́тною одѣ́явся, предстои́ши крести́тися, всѣ́хъ Избавле́ніе.

Земля́ и не́бо ны́нѣ да лику́ютъ: всѣ́хъ креща́ется Благодѣ́тель, въ вода́хъ погружа́я на́ше мно́жество безмѣ́рныхъ прегрѣше́ній.

Инъ.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Ума́ чистоту́ стяжа́въ, святи́тель бы́лъ еси́, пома́заніе свя́то́е воспріе́мъ. Тѣ́мъ тя́, богоно́се о́тче, восхваля́емъ.

На Крестѣ́ просте́ршаго дла́ни пло́тію Бо́га Сло́ва уясни́лъ еси́ слове́сными твои́ми показа́ньми и іуде́йское суровство́ погуби́лъ еси́, всебла́же́нне.

Въ чудесѣ́хъ вели́къ бы́въ, отгоня́еши ду́хи и очища́еши неду́ги вѣ́рою прося́щимъ, Сильве́стре богому́дре.

Богоро́диченъ: Дѣ́ва Чи́стая по Рождествѣ́, Всесвята́я пребыла́ еси́, Бо́га бо Сло́ва родила́ еси́, на́мъ уподо́бльшася кромѣ́ грѣха́.

Конда́къ свята́го, гла́съ 4. Подо́бенъ: Вознесы́йся.

Во свяще́нницѣхъ свяще́нникъ яви́лся еси́ Царя́ и Бо́га, богоно́се, по́стникомъ собесѣ́дникъ бы́въ, отону́дуже сра́дуешися ны́нѣ лико́мъ а́нгельскимъ, о́тче, веселя́ся въ небе́сныхъ, Сильве́стре, сла́вне па́стырю, спаса́й любо́вію соверша́ющія па́мять твою́.

Сѣда́ленъ, гла́съ 8. Подо́бенъ: Прему́дрости.

Рѣка́ бла́гоче́стія яви́вся, уче́ній твои́хъ струя́ми всю́ зе́млю напои́лъ еси́, Сильве́стре, я́ко святи́тель боже́ственный, и чуде́съ ту́чами страсте́й скве́рну омы́лъ еси́, и пи́щный пото́къ досто́йно наслѣ́довалъ еси́. Тѣ́мже, соше́дшеся, благоче́стно тя́ чти́мъ пѣ́сньми дне́сь и вѣ́рно вопіе́мъ ти́: моли́ Христа́ Бо́га прегрѣше́ній оставле́ніе пода́ти чту́щимъ любо́вію свя́ту́ю па́мять твою́.

Сла́ва, и ны́нѣ, гла́съ то́йже. Подо́бенъ: Свирѣ́лей па́стырскихъ.

Неви́димый Бо́же, Непостижи́мый Сло́ве, роди́лся еси́ отъ Отца́ па́че естества́ и сло́ва, па́ки же въ послѣ́дняя отъ Дѣ́вы, не измѣни́въ, е́же бѣ́, гряде́ши и во струя́хъ Іорда́нскихъ ны́нѣ крести́тися пло́тію, благоволи́вый спасти́, я́ко Бо́гъ, ро́дъ человѣ́ческій.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Чуди́тся Твоему́, Іису́се Благодѣ́телю, прихо́ду вели́кій Предте́ча и, ужаса́яся, вопіе́тъ Тебѣ́: Огнь сы́й, Влады́ко, да не опали́ши мене́, сѣ́но су́ща.

Стоя́ща въ вода́хъ си́хъ во́лею, зря́ Мя ны́нѣ, приступи́, о Іоа́нне, и крести́, я́ко да водо́ю благода́ть человѣ́ческому ро́ду содѣ́лаю.

Кры́ющееся я́ко во о́блацѣхъ Тя́ позна́хъ со́лнце, Бо́же мо́й, пло́тію. Ка́ко у́бо на́га Тя́ вода́ми ны́нѣ одѣ́яна зрю́? — Іоа́ннъ вопія́ше, удивля́яся.

Просвѣща́ется человѣ́ческое естество́, и избавле́ніе тмы́ пріе́млетъ грѣхо́вныя, и свы́ше Боже́ственною одѣва́ется нетлѣ́нія оде́ждою, обнажа́ему Мнѣ́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Святи́тель богопрія́тенъ, помазу́я свяще́нники Боже́ственнымъ Ду́хомъ, показа́лся еси́, о́тче Сильве́стре, и лю́ди просвѣща́яй, свяще́ннѣйше.

Содѣ́йствомъ Ду́ха неду́ги отгоня́я, стра́сти неисцѣльныя исцѣли́лъ еси́, пребога́те, обраща́я отъ ле́сти заблужде́нныя.

Ересе́й, Сильве́стре, ле́сть отгна́лъ еси́, па́ству упа́слъ еси́ на вода́хъ бла́гоче́стія, на зла́цѣ Боже́ственнаго позна́нія.

Излія́ся во устна́хъ твои́хъ бла́года́ть Боже́ственнаго Ду́ха. Сего́ ра́ди тя́ свяще́нника лю́демъ Свои́мъ Бо́гъ, всебла́же́нне о́тче, пома́за.

Богоро́диченъ: Исцѣли́, Отрокови́це, я́звы се́рдца моего́ и наведи́ души́ моея́ движе́нія къ Бо́жіимъ, Дѣ́во, хотѣ́ніемъ.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Пока́йтеся, — вопія́, — Ца́рствіе Бо́жіе прибли́жися: свяще́нный Предте́ча яви́ся изъ пусты́ни, опустѣ́вшія въ злы́хъ обновля́я.

Зако́нъ, Его́же дре́вле рече́, и проро́къ свяще́нное сосло́віе, пріи́де — Христо́съ, на́съ обновля́я Боже́ственнымъ Креще́ніемъ, обветша́вшія мно́гими прегрѣше́ньми.

Странна, — рече́, — и ужасна, — Іоа́ннъ, — зрю́ дне́сь: ны́нѣ бо Исто́чникъ безсме́ртія пріи́де, отъ ма́лыя ка́пли Боже́ственное проси́ти Креще́ніе.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Плете́ньми твои́хъ слове́съ ве́сь разрѣши́лъ еси́ су́етенъ соу́зъ, и къ Боже́ственнѣй вѣ́рѣ ле́стію свя́занныя связа́лъ еси́, отверза́я, о́тче, си́хъ у́мъ прочита́ніемъ писа́ній, святи́телю бла́же́нне.

Се́рдце твое́, о́тче, непоро́чно бы́сть во оправда́ніихъ о́бщаго Влады́ки, Его́же вожделѣ́въ, пло́ть удержа́лъ еси́ и чуде́съ бла́года́тію обога́щься, неду́ги исцеля́еши и душе́вныя лю́тыя я́звы.

Бѣся́щаяся сердца́ неду́гомъ душегу́бнымъ, лютыя е́реси го́рькаго Ма́нента ско́рыми лѣчба́ми слове́съ твои́хъ, богоно́се, уста́вилъ еси́, я́ко вра́чь, бла́года́тію Боже́ственною Честны́мъ отгна́лъ еси́ Ду́хомъ.

Богоро́диченъ: Ра́дуйся, Еди́на, ро́ждшая Преси́льнаго, пло́тію обнища́вшаго. Ра́дуйся, па́дшаго мíра исправле́ніе, Всенепоро́чная. Ра́дуйся, печа́ли разрѣше́ніе. Ра́дуйся, вѣ́рныхъ спасе́ніе. Ра́дуйся, Престо́ле Бо́жій превысо́кій.

Пѣ́снь 6.

Ирмо́съ: Бе́здна согрѣше́ній обы́де мя́ послѣ́дняя, но, я́ко проро́ка Іо́ну, Го́споди, Го́споди, возведи́ изъ истлѣ́нія живо́тъ мо́й.

Одожди́ согрѣше́ній на́шихъ, Человѣколю́бче, разрѣше́ніе, Иже Іорда́нскими струя́ми погрузи́вый прегрѣше́нія земноро́дныхъ, за ми́лость вели́кую.

Пучи́на сы́й, Христе́, пра́вды, предгряде́ши ны́нѣ на Іорда́нскую рѣку́ потопи́ти змíя, и Ада́мово преступле́ніе изсуши́ти.

Струю́ Тя нетлѣ́нія, Христе́, су́ща вои́стинну, струи́ ка́ко вмѣстя́тъ рѣ́чныя? — вопія́ше Предте́ча, сла́вя Твое́ мно́гое бла́гоутро́біе.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Неисхо́дна и въ темни́цѣ вѣ́чнѣ затворе́нна содѣ́лалъ еси́ моли́твами твои́ми лука́ваго, погубля́ющаго за́вистію приходя́щія, бла́же́нне, змíя, и я́ко две́ри же и я́ко вереи́, Креста́ зна́меніе положи́въ.

Глаго́лъ твои́хъ медото́чныхъ вѣща́ніе во вся́ческая изы́де, всебла́же́нне, и уче́ній въ концы́ всея́ вселе́нныя сія́ніе облиста́, чуде́съ же свѣ́тлость и дѣ́лъ Боже́ственное показа́ніе.

Исцѣле́нія и дарова́нія Боже́ственная ту́чами источа́я бога́тно Вседѣ́теля, святи́телю всеблаже́нне, и Всесвята́го всегда́ Ду́ха вѣ́рою тебѣ́ чи́стою приступа́ющія цѣли́ти бла́года́тію.

Богоро́диченъ: Разумѣ́вше богоглаго́ливіи проро́цы та́инства Твоего́, Дѣ́во, глубину́, проро́чески провозвести́ша сіе́, наставля́еми Боже́ственнымъ Ду́хомъ, и ны́нѣ мы́, прера́достно сбытія зря́ще, вѣ́руемъ.

Конда́къ, гла́съ 4. Подо́бенъ: Яви́лся еси́ дне́сь.

Во струя́хъ дне́сь Іорда́нскихъ бы́въ, Госпо́дь Іоа́нну вопіе́тъ: не убо́йся крести́ти Мя́, спасти́ бо пріидо́хъ Ада́ма первозда́ннаго.

Икосъ:

Не истязу́ю тя́, Крести́телю, предѣ́лы преходи́ти, не глаго́лю тебѣ́: рцы́ Ми, я́же глаго́леши беззако́ннымъ и учи́ши грѣ́шники. То́чію крести́ Мя молча́ и ча́я, я́же отъ Креще́нія: пріи́меши бо сего́ ра́ди досто́инство, е́же не бы́сть а́нгеломъ, и́бо всѣ́хъ проро́ковъ бо́льша тя́ сотворю́. Отъ о́ныхъ у́бо ни еди́нъ я́вѣ Мя́ ви́дѣ, но во о́бразѣхъ, и сѣ́нехъ, и гада́ніихъ, ты́ же предъ тобо́ю стоя́ща ви́дѣлъ еси́, спасти́ бо пріидо́хъ Ада́ма первозда́ннаго.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Во оде́жду свяще́нную одѣва́я мя́, Христе́, обнажи́вшагося совѣ́томъ льсти́ваго, на́гъ проити́ сквозѣ́ во́ды прише́лъ еси́ бла́гости бога́тствомъ. Воспѣва́ю Твое́ милосе́рдіе и покланя́юся чу́дному Твоему́ смотре́нію.

Что́ сіе́, Христе́, мно́гое Твое́, е́же къ на́мъ, смотре́ніе? Что́ нищета́? Что́ неизрече́нное и па́че ума́ сни́тіе? — рече́, егда́ Тя ви́дѣ Іоа́ннъ обнаже́на и крести́тися отъ него́ повелѣва́юща.

Возже́глъ еси́, Христе́, я́коже свѣти́льникъ, честну́ю пло́ть Твою́ среди́ Іорда́на, и взыска́лъ еси́ погребе́нный страстьми́ и грѣхо́мъ о́бразъ, и, обрѣ́тъ, удобри́лъ еси́ Креще́ніемъ Твои́мъ, Бла́же. Тѣ́мже пое́мъ тя́.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Пра́ведникъ, я́коже фи́никсъ, въ дому́ Госпо́дни, о́тче, процвѣ́лъ еси́ плоды́ пра́вды, и́миже чту́щіи тя́ пита́ются, пою́ще: отце́въ на́шихъ Бо́же, бла́гослове́нъ еси́.

Крѣ́пкими твои́хъ слове́съ явле́ньми обличи́лъ еси́ суему́дренники, неду́гующія невѣ́ріемъ, и, ра́дуяся, пое́ши, пресла́вне Сильве́стре: отце́въ на́шихъ Бо́же, бла́гослове́нъ еси́.

Пребыва́етъ сла́ва во вѣ́ки твоя́, о́тче, и па́мять со всѣ́ми пра́ведными, съ ни́миже на́съ, вѣ́рою пою́щихъ, помина́й: отце́въ на́шихъ Бо́же, бла́гослове́нъ еси́.

Сла́вный святи́тель, ду́хо́вною заре́ю просвѣща́емь, тму́ зло́бы разори́ и вся́ пою́щія просвѣти́: отце́въ на́шихъ Бо́же, бла́гослове́нъ еси́.

Богоро́диченъ: Пречу́дная Отрокови́це, Су́щаго пре́жде всѣ́хъ вѣко́въ родила́ еси́, на́мъ уподо́бльшагося за кра́йнее бла́гоутро́біе, да спасе́тъ пою́щія: отце́въ на́шихъ Бо́же, бла́гослове́нъ еси́.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Гла́съ вопію́щаго въ пусты́ни я́вственно, предста́въ Іоа́ннъ, обраща́я сердца́ пока́явшихся те́плѣ сла́вити я́вльшагося во Іорда́нѣ Спа́са и Влады́ку.

Пото́къ еси́ пи́щный, Иже моря́, исто́чники содѣ́лавый, и ка́ко на во́ды восхо́диши? Что́ отмы́ти ища́й, Иже всѣ́хъ омове́ніе и очище́ніе, пѣсносло́вящихъ Тя́, Христе́, во вѣ́ки?

Изсуши́ти струи́ ища́й зло́бы вра́жія, и моря́ страсте́й уста́вити, и вѣ́рнымъ очище́ніе источи́ти и оставле́ніе, Влады́ко, гряде́ши крести́тися во струя́хъ Іорда́нскихъ.

Часо́въ и лѣ́тъ Тво́рче, подъ лѣ́ты бы́въ за благоутро́біе, безлѣ́тно возсія́въ изъ Пребезнача́льнаго Отца́, прише́лъ еси́ лѣ́тняя прегрѣше́нія всѣ́хъ отмы́ти во струя́хъ Іорда́нскихъ.

Инъ.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Еди́но естество́, о́тче, Еди́наго Божества́ богосло́вивъ, въ Тре́хъ Ли́цѣхъ разумѣва́емаго, пѣ́лъ еси́ непреста́нно: благослови́те, вся́ дѣла́ Госпо́дня, Го́спода.

Истины, о́тче, и́стиненъ учи́тель наре́клся еси́, тѣ́мже лжеиме́нныя льсти́ обличи́лъ еси́ ле́сть, поя́: благослови́те, вся́ дѣла́ Госпо́дня, Го́спода.

Верхо́вникъ яви́лся еси́ свяще́ннаго Собо́ра, священнотаи́нниче, и верхо́внаго ученико́въ украси́лъ еси́ престо́лъ, вопія́: благослови́те, вся́ дѣла́ Госпо́дня, Го́спода.

Добродѣ́тельми боже́ственными, о́тче, се́рдце твое́ удобри́лъ еси́, ве́сь украси́вся, и съ вы́шними чи́нми, вопія́, совокупи́лся еси́: благослови́те, вся́ дѣла́ Госпо́дня, Го́спода.

Богоро́диченъ: Глаго́ломъ Твои́мъ боже́ственнымъ послѣ́дующе ро́ди человѣ́честіи, ублажа́емъ Тя́ Приснобла́же́нную, и воспѣва́емъ: бла́гослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Ви́дѣвъ тя́ Іоа́ннъ къ себѣ́ Благодѣ́теля гряду́ща, и прося́ща отъ него́ смире́ніемъ Креще́нія, уди́влься, ужасе́ся, ника́коже руко́ю прикосну́тися смѣ́я Прикаса́ющагося всѣ́мъ гора́мъ, и воздымя́тся.

Яко ла́стовица пречестна́я, провозвѣща́ющая ве́сну мы́сленную, предста́ Крести́тель, въ зимѣ́ су́щимъ безмѣ́рныхъ прегрѣше́ній и бу́рю терпя́щимъ при́сно сопроти́вныхъ духо́въ, лука́выхъ страсте́й.

Тя́, озаре́ніе сла́вы Отчія, просія́вшее во тмѣ́ сѣдя́щимъ лю́тыхъ, Незаходи́мое Со́лнце, Го́споди, и гряду́ща вся́ просвѣти́ти свяще́ннымъ Твои́мъ Креще́ніемъ, я́ко Бо́га и Спа́са, пѣ́сньми велича́емъ.

Сме́ртная сѣки́ра, при ко́рени лежа́щи, я́ко дре́ву прети́тъ изсѣче́ніемъ, непло́діе твое́ ви́дящи. Не у́бо безпло́дна пребу́ди, душе́ моя́, но возопíй Бо́гу те́плымъ покая́ніемъ: согрѣши́хъ Ти́, спаси́ мя.

Гла́съ вопію́щаго слы́шанъ бы́сть въ пусты́хъ сердца́хъ: возвесели́теся, предста́ Христо́съ, оставле́ніе всѣ́мъ да́руя. Освяти́теся вся́: мо́ре, исто́чницы и рѣ́ки, и удо́лія, и лу́жная мѣ́ста, и вся́ подсо́лнечная.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Свяще́нствовавъ усе́рдно самаго́ себе́, всеблаже́нне, сласте́й умерщвле́ніемъ, и бы́лъ еси́ на́съ ра́ди Умертви́вшемуся же́ртва благопрія́тна.

Яко боже́ственный верхо́вникъ свяще́нныхъ отце́въ, свяще́нное уче́ніе утверди́въ, еретико́въ загради́лъ еси́ безбо́жная уста́.

Совокупи́лся еси́ съ ли́ки безпло́тныхъ, безпло́тныя враги́ съ тѣ́ломъ свѣ́тло, святи́телю, побори́въ.

Па́мять твоя́ мíру, о́тче святи́телю, я́ко свѣтоза́рное возсія́ со́лнце, свѣтоводя́щи вѣ́рою восхваля́ющія тя́.

Богоро́диченъ: Благолюби́вая Дѣ́во, озло́бленную грѣхми́ ду́шу мою́ ублажи́, Блага́го ро́ждшая Бо́га и Го́спода.

Свѣти́ленъ. Подо́бенъ: Жены́, услы́шите.

Гла́съ вопію́щаго возгласи́: и го́ры, взыгра́йте, лику́й, ро́де человѣ́ческій, и́бо Пребезнача́льное Сло́во пло́ть пріе́мъ, я́ко Человѣ́къ, пріи́де, креща́яся отъ ру́къ, я́же созда́, во Іорда́нѣ погружа́яй мíра грѣ́хъ.

Сла́ва, и ны́нѣ:

Ка́ко струи Тя́ рѣ́чныя пріи́мутъ, Человѣколю́бче, рѣ́ки и моря́ сотво́ршаго отъ не су́щихъ? Ка́ко на ве́рхъ пречи́стый Тво́й де́рзнетъ Предте́ча ру́ку положи́ти, Влады́ко? Пое́мъ трепе́щуще, Сло́ве, Твоея́ нищеты́ высоту́.

На хвали́техъ стихиры на 4, и́хже краегране́сіе: Пѣ́сни Ѳеофа́новы на свѣ́ты. Гла́съ 6. Подо́бенъ: Ангельскія.

Ангельскія предыди́те, силы, отъ Виѳлее́ма ко струя́мъ Іорданскимъ; предгряди́, Іоа́нне, оста́вль пусты́ню; ра́дуйся, рѣко́, и угото́вися, вся́ же земля́ да ра́дуется: Христо́съ гряде́тъ грѣ́хъ Ада́мовъ очи́стити, я́ко Благоутро́бенъ.

Усты́ чи́стыми и душа́ми измове́нными, пріиди́те, та́йно Виѳлее́мъ оста́вльше, и ко Іорда́ну со Христо́мъ иду́ще, воспои́мъ Ему́ съ весе́ліемъ, оте́чествія земна́я вся́, вѣ́рно глаго́люще: благослове́нъ, прише́дый Бо́же на́шъ, сла́ва Тебѣ́.

Ве́ліе и стра́шное та́инство е́сть, я́ко Бо́гъ человѣ́комъ уподо́бися, и, грѣха́ отню́дъ не вѣ́дый, я́ко пови́ненъ, отъ Іоа́нна крести́тися въ рѣцѣ́ Іорда́нстѣй про́ситъ дне́сь. Благослове́нъ, явле́йся Бо́же на́шъ, сла́ва Тебѣ́.

Цвѣ́тъ Дави́довъ возсія́въ изъ Дѣ́вы, пріи́де Христо́съ ко струя́мъ Іорданскимъ грѣхи́ омы́ти пра́отца вода́ми. Лику́й, Ада́ме, весели́ся, Ево, не́бо да ра́дуется, лю́діе рце́мъ: бла́гослове́нъ, прише́дый Бо́же на́шъ, сла́ва Тебѣ́.

Сла́ва, гла́съ и подо́бенъ то́йже:

Трепе́щетъ руко́ю, ужаса́яся рукоположи́ти, ра́дуется душе́ю, помышля́я Іоа́ннъ, я́ко ве́рхъ Тво́й подклони́ти благоволи́лъ еси́, въ ра́бій зра́къ одѣ́янъ, да человѣ́ки отъ рабо́ты изба́виши вра́жія, зову́щія: благослове́нъ, прише́дый Бо́же на́шъ, сла́ва Тебѣ́.

И ны́нѣ:

Вся́ земля́ та́йно да ра́дуется ны́нѣ проро́чески, и го́ры да игра́ютъ. Возврати́ струи, Іорда́не, я́коже пи́шетъ, ужасни́ся отъ лица́ Влады́чня, я́ко Бо́гъ, вочеловѣ́чився, человѣ́ки вся отъ грѣха́ Ада́мля очи́стити пріи́де.

На стихо́внѣ стихи́ры самогла́сны, гла́съ 6:

Свѣтлѣ́йшій со́лнца бы́сть преше́дшій пра́здникъ Рожде́ства́ Христо́ва, я́сенъ и пресвѣ́телъ показа́ся приходя́й Боже́ственнаго явле́нія Его́. Во о́нъ па́стыріе со а́нгелы, славосло́вяще, поклони́шася Бо́гу вочеловѣ́чшемуся; въ се́мъ же Влады́цѣ Іоа́ннъ прикосну́вся десно́ю руко́ю, съ тре́петомъ глаго́лаше: освяти́ мене́ и во́ды, Еди́ный, имѣ́яй ве́лію ми́лость.

Сти́хъ: Сего́ ра́ди помяну́хъ Тя́ отъ земли́ Іорда́нски и Ермоніи́мски.

Гото́вися, Іорда́не рѣко́: се́ бо прихо́дитъ Христо́съ Бо́гъ крести́тися отъ Іоа́нна, да зміе́въ неви́димыя главы́ сокруши́тъ Боже́ство́мъ въ вода́хъ твои́хъ. Ра́дуйся, пусты́не Іорда́нская, го́ры, игра́йте съ весе́ліемъ, прихо́дитъ бо Вѣ́чный Живо́тъ воззва́ти Ада́ма. Гла́съ вопію́щаго возопíй, о Іоа́нне Предте́че: угото́вайте пути Госпо́дни, и стези́ Его́ правы содѣ́лайте.

Сти́хъ: Ви́дѣша тя́ во́ды, Бо́же, ви́дѣша Тя́ во́ды и убоя́шася.

Да возра́дуется пусты́ня Іорда́нова и да процвѣте́тъ, я́ко кри́нъ, гла́съ бо вопію́щаго услы́шася въ не́й: угото́вайте пу́ть Госпо́день. Го́ры бо положи́вый мѣ́риломъ и мѣ́ста дубра́вная вѣ́сомъ, вся исполня́яй, я́ко Бо́гъ, кре́ща́ется отъ раба́, обнищава́ти нача́тъ, богатныя да́ры да́руяй. Услы́ша Ева: въ печа́лѣхъ роди́ши чада. Ны́нѣ же услы́ша Дѣ́ва: ра́дуйся, Обра́дованная, Госпо́дь съ Тобо́ю, имѣ́яй ве́лію ми́лость.

Сла́ва, и ны́нѣ, гла́съ 8. Анато́ліево:

Іоа́нне Крести́телю, во утро́бѣ позна́вый Мя́ Агнца, на рѣцѣ́ Мнѣ́ послужи́, со а́нгелы Мнѣ́ слу́жбу принеси́, просте́ръ, косни́ся дла́нію верху́ Моему́ пречи́стому. И, егда́ у́зриши го́ры трепе́щущія и Іорда́на возвраща́ющася, съ си́ми возопíй: воплоти́выйся изъ Дѣ́вы въ на́ше спасе́ніе, Го́споди, сла́ва Тебѣ́.


НА ЛИТУРГІИ,

Блаже́нна предпра́зднства, пѣ́снь 3-я и 6-я. По вхо́дѣ тропа́рь предпра́зднства и хра́ма Богоро́дицы, а́ще е́сть, и хра́ма свята́го, та́же тропа́рь свята́го и конда́къ хра́ма Богоро́дицы, а́ще е́сть, или́ хра́ма свята́го. Сла́ва, конда́къ свята́го. И ны́нѣ, конда́къ предпра́зднства.

Си́це глаго́лемъ тропари́ и кондаки́, въ предпра́зднствѣ Богоявле́нія по вся́ дни́, кромѣ́ недѣ́ли, и поліеле́я свята́го.

Проки́менъ, гла́съ 1: Уста́ моя возглаго́лютъ прему́дрость, и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́, живу́щіи по вселе́ннѣй. Апо́столъ ко Евре́емъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ его́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ его́. Ева́нгеліе Іоа́нна, зача́ло 8. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 13 об. – 23.

/ Къ оглавленію раздѣла /


Наверхъ / Къ титульной страницѣ

0