Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іануа́рія во 2-й де́нь.
Слу́жба преподо́бному и богоно́сному отцу́ на́шему Серафи́му, Саро́вскому чудотво́рцу.

Твори́мъ бдѣ́ніе, идѣ́же хра́мъ свята́го, или́ а́ще восхо́щетъ настоя́тель.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, самогла́сны, гла́съ 4:

Соше́дшеся дне́сь, христоимени́тіи лю́діе,* похва́льными пѣ́сньми вѣнча́имъ* земна́го а́нгела и небе́снаго человѣ́ка* и къ нему́ те́плѣ возопіи́мъ:* о блаже́нне о́тче Серафи́ме,* по́стниковъ пресла́вная похвало́,* о на́съ моли́ся ко Го́споду,* поми́ловатися душа́мъ на́шимъ.

Цѣлому́дріе и кротость* отъ ю́ности возлюби́въ,* о́тче Серафи́ме,* чистото́ю ума́ и се́рдца* любо́вь Христо́ву стяжа́лъ еси́,* е́юже Бо́гови прибли́зился еси́.* Того́ у́бо ны́нѣ моли́ отъ бѣ́дъ изба́вити* вѣ́рою творя́щія честну́ю па́мять твою́.

Дне́сь соше́дшеся* христоимени́тыхъ люде́й мно́жества* въ прославле́ніе честны́хъ моще́й твои́хъ,* преподо́бне о́тче Серафи́ме,* ра́дости и весе́лія вси́ испо́лнишася:* яви́лъ бо ся еси́ боля́щимъ исцѣле́ніе* и хромы́мъ хожде́ніе,* съ вѣ́рою притека́ющимъ къ ра́цѣ моще́й твои́хъ.

Сла́ва, гла́съ 6:

Весели́ся и ра́дуйся о Го́сподѣ, оби́тель Саро́вская: въ тебѣ́ бо возсія́ свѣти́льникъ но́вый Россíйскія земли́. Красу́йся и лику́й, Це́рковь Бо́жія, и и́ноковъ мно́жества, сора́дуйтеся. Празднолю́бцевъ собо́ри, взыгра́йте, и вѣне́цъ отъ духо́вныхъ цвѣто́въ спле́тше, съ Дави́домъ воспо́йте: честна́ предъ Го́сподемъ сме́рть преподо́бныхъ Его́. Сія́ бо преподо́бному Серафи́му нача́ло сла́вы полага́етъ, ея́же о́бщники и на́съ сотвори́ твои́ми моли́твами, блаже́нне.

И ны́нѣ, богоро́диченъ: Никто́же притека́яй...

На стихо́внѣ стихи́ры, гла́съ 2:

Изше́дъ отъ оте́чествія твоего́,* преподо́бне о́тче Серафи́ме,* и гра́да Кíева доше́дъ,* та́мо у моще́й чудотво́рецъ* на пу́ть спаси́тельнаго по́двига благослове́ніе прія́лъ еси́,* сіе́ у́бо и на́мъ низпосли́,* творя́щимъ всесвяту́ю и пречестну́ю па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Ве́лій иску́съ въ послуша́ніи* и́ноческихъ по́двиговъ,* преподо́бне о́тче Серафи́ме,* съ любо́вію прія́лъ еси́* и бра́тію твои́мъ терпѣ́ніемъ* и любо́вію удиви́лъ еси́;* моли́ спасти́ся душа́мъ на́шимъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Наставле́ніи игу́мена укрѣпля́емь,* въ пусты́нное мѣ́сто Саро́ва всели́лся еси́, о́тче,* и та́мо моли́твенному по́двигу* крѣ́пко прилѣжа́ти потщи́лся еси́,* и яви́лся еси́ до́мъ Пресвята́го Ду́ха;* моли́ Христа́ Бо́га о всѣ́хъ на́съ.

Сла́ва, и па́ки та́яжде стихи́ра: Наставле́ніи игу́мена...
И ны́нѣ, богоро́диченъ:

Предста́тельница и покро́въ Ты́ еси́, Пречи́стая, изба́ви на́съ отъ бѣ́дъ лю́тыхъ и обстоя́ній, и ду́ши на́ша спаси́ боже́ственными Твои́ми моли́твами.

Тропа́рь, гла́съ 4:

Отъ ю́ности Христа́ возлюби́лъ еси́, блаже́нне, и, Тому́ Еди́ному рабо́тати пла́меннѣ вожделѣ́въ, непреста́нною моли́твою и трудо́мъ въ пусты́ни подвиза́лся еси́, умиле́ннымъ же се́рдцемъ любо́вь Христо́ву стяжа́въ, избра́нникъ возлю́бленъ Бо́жія Ма́тере яви́лся еси́. Сего́ ра́ди вопіе́мъ ти́: спаса́й на́съ моли́твами твои́ми, Серафи́ме, преподо́бне о́тче на́шъ.


НА ВЕЛИЦѢЙ ВЕЧЕРНИ,

Блаже́нъ му́жъ, 1-й антифо́нъ. На Го́споди воззва́хъ: стихи́ры на 8. Аще у́бо е́сть предпра́зднство святы́хъ Богоявле́ній, пе́рвѣе пое́мъ три́ стихи́ры предпра́зднства; а́ще же нѣ́сть — сія́ стихи́ры, повторя́юще пе́рвую и втору́ю, во гла́съ 1. Подо́бенъ: О, ди́вное чу́до!

О, пресла́вное чу́до,* подви́жникъ благоче́стія въ Саро́вѣ явля́ется* и моли́твенникъ къ Бо́гу те́плый* Серафи́мъ пречу́дный на́мъ быва́етъ;* весели́ся, оби́тель Саро́вская,* иму́щи въ себѣ́ мо́щи преподо́бнаго;* взыгра́йте, правосла́вныхъ мно́жества,* преди́внаго Серафи́ма иму́ще въ бѣда́хъ засту́пника и вопію́ще къ нему́:* ра́дуйся, свѣти́льниче Россíйскія земли́,* тьмы́ сопроти́вныхъ дале́че отрѣва́й* и Го́сподеви моли́ся* дарова́ти душа́мъ на́шимъ ми́ръ и ве́лію ми́лость.

О, ди́вное чу́до,* се́ бо вои́стинну во оби́тели Саро́встѣй* благоче́стія сто́лпъ непоколеби́мый —* Серафи́мъ блаже́нный явля́ется на́мъ,* тѣ́мже, богому́дрыхъ собо́ри,* на высоту́ ду́хомъ возноси́теся,* къ преподо́бному вопію́ще:* преподо́бне о́тче Серафи́ме,* Го́сподеви моли́ся* дарова́ти душа́мъ на́шимъ ми́ръ и ве́лію ми́лость.

Ди́вны Твоя́ та́йны, Христе́ Бо́же,* я́ко дарова́лъ еси́ на́мъ свѣти́льника — преподо́бнаго Серафи́ма,* Благовѣ́рному Царю́ на́шему на сопроти́вныя крѣ́пкаго побо́рника,* и́нокомъ и всѣ́мъ правосла́внымъ христіа́номъ моли́твенника,* святѣ́й оби́тели похвалу́ и утвержде́ніе;* то́й и ны́нѣ мо́литъ Тя́, Го́споди,* дарова́ти душа́мъ на́шимъ ми́ръ и ве́лію ми́лость.

Егда́ вше́лъ еси́, преподо́бне, въ пусты́ню Саро́вскую,* тогда́, своея́ во́ли до конца́ совле́кся,* тве́рдое ко всѣ́мъ послуша́ніе показа́лъ еси́:* доса́ды бо и безче́стія претерпѣ́лъ еси́, ра́дуяся,* ударе́нія и ра́ны отъ злы́хъ человѣ́къ прія́лъ еси́,* о ни́хже и моли́лся еси́, преподо́бне.* Мы́ же, прославля́юще пречестну́ю па́мять твою́,* мо́лимъ ти ся, преподо́бне:* Го́сподеви моли́ся* ми́ръ мíрови дарова́ти* и душа́мъ на́шимъ ве́лію ми́лость.

Блаже́нна оби́тель Саро́вская,* иму́щи тебе́, преподо́бне о́тче Серафи́ме,* добродѣ́телей сокро́вище, сосу́дъ чистоты́,* цѣлому́дрія храни́теля,* прія́телище благода́ти, исто́чникъ исцѣле́ній,* боля́щимъ врача́ безме́здна,* по́стника и́стинна,* въ ско́рбехъ утѣ́шителя,* жите́йскими страстьми́ обурева́емымъ ти́хое приста́нище;* на́мъ же, творя́щимъ честну́ю па́мять твою́,* моли́, преподо́бне о́тче Серафи́ме,* дарова́ти ми́ръ и ве́лію ми́лость.

Дне́сь лику́ютъ собо́ри вѣ́рныхъ* въ па́мять твою́, преподо́бне Серафи́ме,* и велегла́сно вопію́тъ:* ты́, любве́ ра́ди Христо́вы* вся́ кра́сная мíра оста́вивъ* и въ пусты́ню Саро́вскую всели́вся,* ника́коже устраши́лся еси́ неви́димыхъ вра́гъ боре́нія,* но сія́ моли́твами твои́ми, я́ко пра́хъ, отмета́лъ еси́;* тѣ́мже Го́сподеви моли́ся* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 8:

Пріиди́те, вѣ́рныхъ собо́ри, похва́льными пѣ́сньми дне́сь пречу́днаго отца́ просла́вимъ и си́це ему́ возопіи́мъ: преподо́бне о́тче Серафи́ме, вои́стинну сподо́бился еси́ боже́ственныя жи́зни, пріи́мъ отъ Бо́га вѣне́цъ нетлѣ́нныя сла́вы, сего́ ра́ди оби́тель Саро́вская тобо́ю хва́лится, лю́діе же, зря́ще честну́ю ра́ку моще́й твои́хъ и чудеса́ быва́емая, сла́вятъ прославля́ющаго тя́ Го́спода, Ему́же моли́ся, преподо́бне, дарова́ти душа́мъ на́шимъ ми́ръ и ве́лію ми́лость.

И ны́нѣ, предпра́зднства, или́ богоро́диченъ, гла́съ то́йже: Ца́рь небе́сный...
Вхо́дъ. Проки́менъ дне́. И чте́нія три́.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, и преподо́бному стихи́ры, гла́съ 1:

Кíими похва́льными вѣнцы́ вѣнча́имъ подви́жника вели́каго, преподо́бнаго Серафи́ма? То́й бо, я́ко наста́вникъ до́брый, въ тве́рдости вѣ́ры и добродѣ́тели яви́ся, богодухнове́нными уче́ніи и равноа́нгельнымъ житіе́мъ приходя́щія къ нему́ науча́я. Тѣ́мже вопіе́мъ ему́: моли́ся, преподо́бне, Христу́ Бо́гу, правосла́вную вѣ́ру утверди́ти и душа́мъ на́шимъ спасти́ся.

Пріиди́те, и́нокъ мно́жества, дне́сь преподо́бнаго благоче́стно восхва́лимъ, и́стиннаго ученика́ Спа́сова, мірску́ю пре́лесть попра́вшаго, яре́мъ Христо́въ на ра́мо взе́мшаго и полки́ бѣсо́въ посрами́вшаго. Къ нему́же возопіи́мъ си́це: не забу́ди на́съ, о́тче Серафи́ме, восхваля́ющихъ и чту́щихъ святу́ю па́мять твою́.

Свѣ́тлая и боже́ственная па́мять твоя́, преподо́бне Серафи́ме, удиви́ цари́, кня́зи и святи́тели, а́ки безпло́тенъ бо, во пло́ти враги́ неви́димыя посрами́лъ еси́, вся́ же страна́ Тамбо́вская и свята́я оби́тель Саро́вская, иму́щи твоя́ святы́я мо́щи, хва́лится, си́ми бо здра́віе всѣ́мъ, съ вѣ́рою притека́ющимъ къ честнѣ́й твое́й ра́цѣ, подае́тся. Тѣ́мже, просвѣти́вшеся тобо́ю, вопіе́мъ ти́, преподо́бне: моли́ спасти́ся душа́мъ на́шимъ.

Сла́ва, гла́съ 5:

Ра́дуйся дне́сь, вся́ Россíйская земле́, и свята́я оби́тель Саро́вская, весели́ся. Вѣ́рныхъ же мно́жества, сте́кшеся дне́сь, просла́вимъ преподо́бнаго отца́, па́стыря и учи́теля, богому́драго наста́вника заблу́ждшимъ, ско́раго всѣ́хъ боля́щихъ цѣли́теля, Россíйскія земли́ вели́кое украше́ніе, его́же похваля́юще, си́це рце́мъ: преподо́бне Серафи́ме, спаси́ на́съ моли́твами твои́ми.

И ны́нѣ, богоро́диченъ: Хра́мъ и две́рь еси́...

На стихо́внѣ стихи́ры, гла́съ 5. Подо́бенъ: Ра́дуйся, Живоно́сный Кре́сте.

Ра́дуйся, а́нгеломъ собесѣ́дниче,* преподо́бне Серафи́ме,* благоче́стно бо на земли́ пожи́въ,* мно́ги, приходя́щія къ тебѣ́,* стра́ху Госпо́дню поуча́лъ еси́;* благода́тію Пресвята́го Ду́ха озаря́емь,* зрѣ́лъ еси́ бу́дущая, я́ко настоя́щая,* и умиле́нія и ра́дости* мно́ги скорбя́щія душе́ю исполня́лъ еси́.* Тѣ́мже мо́лимъ ти ся:* моли́ся Го́сподеви о чту́щихъ тя́.

Сти́хъ: Честна́ предъ Го́сподомъ* сме́рть преподо́бныхъ Его́.

Ра́дуйся, заблу́ждшихъ учи́телю преди́вный,* Христа́ Го́спода во хра́мѣ со арха́нгелы и а́нгелы* ви́дѣти спо́добивыйся.* И ны́нѣ, преподо́бне, на небесѣ́хъ Того́ зрѣ́нія вы́ну наслажда́яся,* моли́ся о на́съ,* вѣ́рою творя́щихъ па́мять твою́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, преподо́бне Серафи́ме,* всѣ́мъ бо храни́ти и́стинную вѣ́ру Христо́ву заповѣ́далъ еси́,* и, вы́шняго житія́ вожделѣ́въ,* бога́тство возненави́дѣлъ еси́:* ны́нѣ же неизрече́нную красоту́ небе́сную зри́ши* и сла́дкаго пѣ́нія а́нгельскаго наслажда́ешися.* Тѣ́мже моли́ся Го́сподеви* дарова́ти на́мъ ми́ръ и ве́лію ми́лость.

Сла́ва, гла́съ 6:

Преподо́бне о́тче Серафи́ме, кто́ исповѣ́сть труды́ твоя́ и болѣ́зни? Или́ кíй язы́къ изрече́тъ жесто́кое пусты́нное твое́ житіе́, бдѣ́ніе же и поще́ніе, еще́ же въ затво́рѣ пребыва́ніе, усте́нъ безмо́лвіе и моле́ніе непреста́нное? Вои́стинну яви́лся еси́ по́стникомъ украше́ніе, моли́твенникъ къ Бо́гу непосты́дный. Тѣ́мже къ тебѣ́ вопіе́мъ: ра́дуйся, и́ноческаго житія́ пра́вило; ра́дуйся, въ бѣда́хъ и ско́рбехъ вели́кое утѣше́ніе и те́плый всѣ́мъ предста́телю. Моли́ся, преподо́бне, спасти́ся душа́мъ на́шимъ.

И ны́нѣ, предпра́зднства, или́ богоро́диченъ: Творе́цъ и Изба́витель мо́й, Пречи́стая...

Тропа́рь, гла́съ 4: Отъ ю́ности Христа́ возлюби́лъ еси́.., два́жды [пи́санъ на ма́лѣй вече́рни], и предпра́зднства, или́ Богоро́дице Дѣ́во...



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ: предпра́зднства, или́ богоро́диченъ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 4:

Зна́меніемъ кре́стнымъ и моли́твою вра́жія искуше́нія побѣди́въ, посто́мъ и воздержа́ніемъ Го́сподеви благоугоди́лъ еси́: тѣ́мже чуде́съ прія́лъ еси́ да́ръ, всѣ́мъ исцѣле́нія подава́я, вѣ́рою притека́ющимъ къ ра́цѣ моще́й твои́хъ, Серафи́ме преподо́бне, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, предпра́зднства или́ богоро́диченъ:

Ужа́сно чу́до зача́тія и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе: сла́ва Твоя́, Богоро́дице, всѣ́мъ простре́ся, во спасе́ніе ду́шъ на́шихъ.

По 2-мъ стихосло́віи сѣда́ленъ, гла́съ 1:

Во глубинѣ́ пусты́ни Саро́вскія колѣ́на преклоня́лъ еси́ на ка́мени, воздѣва́я преподо́бнѣи твои́ ру́цѣ ко Го́споду, тѣ́мже отъ Спа́са благода́ть Свята́го Ду́ха прія́лъ еси́, стра́ждущія тѣлесы́ исцѣля́ти и ду́ши вѣ́рныхъ просвѣща́ти. Сего́ ра́ди вопіе́мъ ти́: моли́, преподо́бне, Христа́ Бо́га спасти́ся на́мъ, пра́зднующимъ святу́ю па́мять твою́. [Два́жды.]

Сла́ва, и ны́нѣ, предпра́зднства или́ богоро́диченъ:

Моли́тву пріе́мши отъ на́съ, въ кро́въ Тво́й, Пречи́стая Дѣ́во, прибѣга́ющихъ, не преста́й моля́щи Человѣколю́бца спасти́ся рабо́мъ Твои́мъ.

По поліеле́и сѣда́ленъ, гла́съ 7:

Просія́ добродѣ́тельное житіе́ твое́, преподо́бне, ны́нѣ въ Россíйстѣй земли́, и отъ всѣ́хъ пѣ́сньми похва́льными сла́вишися: ты́ бо, я́ко Илія́, на колесни́цу добродѣ́телей вше́дъ, на небеса́ душе́ю возлетѣ́лъ еси́ и та́мо пра́ведно пресвѣ́тлымъ вѣнце́мъ вѣнча́лся еси́. Тѣ́мже, благодаря́ще, вопіе́мъ ти́, блаже́нне Серафи́ме: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, предпра́зднства или́ богоро́диченъ:

Пречи́стая Дѣ́во, поми́луй на́съ, прибѣга́ющихъ вѣ́рою къ Тебѣ́, Милосе́рднѣй, и прося́щихъ те́плаго Твоего́ заступле́нія: я́ко Ма́ти Бо́га Вы́шняго, моли́ Сы́на Твоего́, Христа́ Бо́га на́шего, спасти́ся рабо́мъ Твои́мъ.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподомъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Дне́сь, вѣ́рніи, духо́вно торжеству́юще въ наро́читѣмъ пра́здницѣ преподо́бнаго отца́, и благоче́стно ра́дующеся, тому́ те́плѣ возопіи́мъ: ра́дуйся, Серафи́ме блаже́нне; ра́дуйся, небе́сный человѣ́че и земны́й а́нгеле; ра́дуйся, мно́гихъ на пу́ть спасе́нія наста́вивый; ра́дуйся, Благовѣ́рному Царю́ на́шему похвало́ и Россíйстѣй земли́ утвержде́ніе; моли́ся о душа́хъ на́шихъ.

Кано́нъ предпра́зднства на 6. Аще же нѣ́сть предпра́зднства, кано́нъ Богоро́дицѣ пара́клисъ, со ирмосо́мъ на 6, и свято́му два́ кано́на на 8.

Кано́нъ пе́рвый, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Го́споди, отве́рзи мои́ недосто́йнѣи устнѣ́ и да́ждь ми́ сло́во ра́зума воспѣ́ти досто́йно па́мять блаже́ннаго Серафи́ма, ны́нѣ со а́нгелы моля́щагося Тебѣ́, изба́вити на́съ отъ вся́каго лю́таго обстоя́нія.

Къ Богоро́дицѣ вели́кій моли́твенникъ бы́лъ еси́, преподо́бне, Юже ви́дѣти со апо́столы сподо́бился еси́, и ны́нѣ не преста́й моли́твами твои́ми посѣща́ти ча́дъ твои́хъ.

Отъ ю́ности твоея́, преподо́бне, преда́лся еси́ умо́мъ Бо́гови, и стра́сти тѣле́сныя крѣ́пкимъ воздержа́ніемъ укроти́въ, вся́кими добродѣ́тельми украси́лся еси́, прему́дре.

Богоро́диченъ: Всеблага́я Влады́чице, Яже Преблага́го Бо́га пло́тію рóждши, озло́бленное страстьми́ мое́ се́рдце очи́сти, да вѣ́рою и любо́вію велича́ю Тя́.

Инъ кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

По за́повѣди Влады́ки Христа́ у́зкимъ и тѣ́снымъ путе́мъ вше́лъ еси́, преподо́бне, въ Ца́рство небе́сное, широ́кій и простра́нный пу́ть возненави́дѣвъ, и ны́нѣ моли́ся о на́съ, творя́щихъ пресвѣ́тлую па́мять твою́.

Отъ ю́ности на безстра́стія го́ру возше́дъ и кре́стъ сво́й взе́мъ, невозвра́тно Христу́ послѣ́довалъ еси́, и духо́вную му́дрость стяжа́въ, Го́рняго Іерусали́ма дости́глъ еси́, преподо́бне, моли́ о на́съ Еди́наго Человѣколю́бца.

Ны́нѣ предстоя́, преподо́бне Престо́лу Бо́жію, моли́ся о Христолюби́вомъ Царѣ́ на́шемъ, держа́вѣ Его́ изба́витися отъ наше́ствія иноплеме́нныхъ, и христолюби́вымъ лю́демъ земли́ Россíйскія спасе́ніе испроси́ моли́твами твои́ми, преподо́бне.

Богоро́диченъ: Съ вѣ́рою и любо́вію притека́ющихъ къ Тебѣ́ и со стра́хомъ пою́щихъ Тя́ моли́твенный гла́съ услы́ши, Влады́чице.

Катава́сія по уста́ву.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Моли́твами твои́ми, преподо́бне, предстоя́ Бо́гу со а́нгелы, за ве́сь мíръ моли́ся, бра́ни вра́жія потреби́ти и побѣ́ду на супоста́ты дарова́ти Благочести́вѣйшему Импера́тору на́шему

Отъ ю́ности вѣ́рою и любо́вію прилѣпи́лся еси́ Влады́цѣ вы́шнихъ си́лъ, преподо́бне Серафи́ме, и, возсія́въ въ пусты́ни Саро́встѣй, я́ко со́лнце, въ ско́рбехъ приходя́щимъ къ тебѣ́ утѣ́шитель бы́лъ еси́; моли́ спасти́ся на́мъ.

Яви́лся еси́, преподо́бне, моля́щимся тебѣ́ сто́лпъ непоколеби́мь и прибѣ́жище всѣ́мъ притека́ющимъ во оби́тель Саро́вскую и пріе́млющимъ исцѣле́нія благода́ть неоску́дную.

Богоро́диченъ: Услы́ша Ева прама́терь: въ печа́лехъ роди́ши ча́да; Ты́ же, Чи́стая Дѣ́во, услы́шавши: Госпо́дь съ Тобо́ю, ра́дуйся, — ра́дованнымъ гла́сомъ печа́ль прама́тере потреби́ла еси́.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Моли́ся, блаже́нне, Христу́ Бо́гу изба́витися на́мъ отъ гла́да и па́губы, отъ напра́сныя сме́рти, отъ та́йныхъ прегрѣше́ній и помышле́ній лука́выхъ, да чи́стымъ се́рдцемъ Христу́ возопіи́мъ: моли́твами преподо́бнаго спаси́ на́съ, Го́споди.

Кро́тостію и смире́ніемъ послѣ́дуя Влады́цѣ Христу́, всѣ́мъ вся́ вои́стинну бы́лъ еси́, бога́тыхъ же и убо́гихъ неосла́бно благоче́стію поуча́я, бу́дущая, я́ко настоя́щая, прови́дѣлъ еси́. Моли́ Христа́ Бо́га, преподо́бне, согрѣше́ній на́шихъ оставле́ніе дарова́ти.

Изба́ви оби́тель твою́, преподо́бне, отъ вся́каго навѣ́та вра́жія и испо́лни ю́ любве́ и благода́ти, е́же не помышля́ти о жите́йскихъ, но душеспаси́тельныя дости́гнути добро́ты моли́твами твои́ми.

Богоро́диченъ: Упова́ніе и наде́жда на́ша Ты́ еси́, Пречи́стая Влады́чице, спаси́ держа́ву правосла́вную и лю́ди Твоя́, моля́щіяся и и́мя Твое́ призыва́ющія.

Сѣда́ленъ, гла́съ 4:

Жите́йское мо́ре страсте́й воздержа́ніемъ препобѣди́въ и въ приста́нище безстра́стія прите́къ, сосу́дъ воздержа́нія яви́лся еси́, преподо́бне Серафи́ме, моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва, и ны́нѣ, предпра́зднства или́ богоро́диченъ:

Егда́ предста́ну предъ лице́мъ Созда́теля моего́ въ де́нь пра́веднаго суда́ Его́, тогда́, Влады́чице, предста́ни ми́, и му́ки изба́ви мя́ вѣ́чныя, да не сни́ду во а́дъ, но да спасу́ся Твои́мъ, Пресвята́я Богоро́дице, заступле́ніемъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Дне́сь свѣ́тло пра́зднуетъ Саро́вская оби́тель па́мять твою́, преподо́бне, и мо́литъ тя́: испроси́ у Го́спода вселе́ннѣй ми́ръ и душа́мъ на́шимъ ве́лію ми́лость.

Вели́кими по́двиги твои́ми, преподо́бне, я́ко фи́никсъ, процвѣ́лъ еси́, словесы́ благопло́дными и непоро́чнымъ житіе́мъ сердца́ притека́ющихъ къ тебѣ́ услажда́я, и ны́нѣ у́бо моли́ся, да обря́щемъ ми́лость отъ Христа́, Спа́са на́шего.

Твои́ми моли́твами о на́съ умоли́ Бо́га, преподо́бне Серафи́ме, и грѣхо́вный мра́къ печа́ли на́шея разори́, безстра́стіемъ, вѣ́рою и любо́вію украси́ всѣ́хъ, пресла́вную па́мять твою́ чту́щихъ.

Богоро́диченъ: Ра́дуйся, Влады́чице Дѣ́во, Це́рквамъ красото́, Благочести́вѣйшему Импера́тору на́шему держа́во и похвало́, непреста́нно моли́ся Христу́ Бо́гу, да сохрани́тъ на́съ отъ бѣ́дъ моли́твами Твои́ми.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Не то́кмо свята́я оби́тель Саро́вская, но и вся́ Россíйская земля́ имѣ́етъ тя́, блаже́нне, моли́твенника те́плаго и ско́раго помо́щника, крѣ́пкаго и непобѣди́маго засту́пника и хода́тая о душа́хъ на́шихъ.

Бу́ди о на́съ моле́бникъ и хода́тай ко Пресвятѣ́й Тро́ицѣ, и подви́гни на моли́тву съ тобо́ю ли́ки святы́хъ, и́хже житію́ поревнова́лъ еси́, преподо́бне, съ ни́миже ку́пно моли́ся о ми́рѣ и устрое́ніи всего́ мíра, да ти́хое и безмо́лвное житіе́ поживе́мъ въ вѣ́цѣ се́мъ и въ бу́дущемъ жи́знь вѣ́чную наслѣ́дуемъ.

Въ по́стницѣхъ вели́къ бы́въ, преподо́бне, тѣ́сное и́ноческое въ пусты́ни житіе́ проходи́лъ еси́, и сіе́ во умиле́ннѣй моли́твѣ сконча́лъ еси́; моли́ спасти́ся на́мъ.

Богоро́диченъ: Ты́ еси́, Пречи́стая Богоро́дице, прибѣ́жище на́ше и утвержде́ніе, моли́ Сы́на Твоего́ и Бо́га на́шего пода́ти на́мъ спасе́ніе и грѣхо́въ оставле́ніе.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Всѣ́мъ приходя́щимъ къ тебѣ́ бы́лъ еси́ учи́тель и́стинный и къ Богоро́дицѣ вели́кій моли́твенникъ, и ны́нѣ, преподо́бне, не преста́й моля́ся о ча́дѣхъ твои́хъ, я́ко и́маши дерзнове́ніе ве́ліе.

Да вни́дутъ ны́нѣ христоимени́тіи лю́діе во хра́мъ оби́тели Саро́вскія, къ честны́мъ моще́мъ твои́мъ, преподо́бне Серафи́ме, припа́дающе, и да про́сятъ отъ тебе́ исцѣле́нія, здра́вія и спасе́нія, Христа́ велича́юще.

Въ нощи́ моля́щу ти ся Бо́гу, преподо́бне, вра́гъ неви́димый хотя́ше устраши́ти тя́, но, моли́твою твое́ю посра́мленъ, исчезе́ вселука́вый.

Богоро́диченъ: Бо́га, Его́же родила́ еси́, Пречи́стая Марíе, моли́ рабо́мъ Твои́мъ пода́ти прегрѣше́ній оставле́ніе.

Инъ.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Посто́мъ и непреста́нною моли́твою просла́вилъ еси́, преподо́бне, оби́тель Саро́вскую, еле́емъ отъ ико́ны Влады́чицы помазу́я неду́жныя и тѣ́мъ исцѣле́ніе неоску́дно подава́я, и ны́нѣ моли́ся спасти́ся душа́мъ на́шимъ.

Святи́теліе и свяще́нницы, сора́дуйтеся и́нокомъ Саро́вскимъ, и простíи лю́діе, вку́пѣ воспо́йте блаже́ннаго отца́, обурева́емыхъ скорбьми́ ти́хое приста́нище, врача́ душе́внымъ и тѣле́снымъ неду́гомъ ско́раго.

Принеси́ моли́твы твоя́, преподо́бне, я́ко же́ртву благопрія́тну и непоро́чну, ко Пресвятѣ́й Тро́ицѣ, и не забу́ди на́съ, ны́нѣ творя́щихъ па́мять твою́, ми́лость испроси́ ненави́дящимъ, оби́дящимъ и вражду́ющимъ на на́съ, и изба́ви всѣ́хъ отъ вся́кія ско́рби.

Богоро́диченъ: Упра́ви у́мъ мо́й, Влады́чице, обурева́емый страстьми́ мно́гими, спаси́, Богоро́дице, къ Тебѣ́ прибѣга́ющія, ины́я бо по́мощи, Чи́стая, ра́звѣ Тебе́, не зна́емъ.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Свята́я душа́ твоя́ оби́тель бы́сть Бо́гу, въ не́йже Оте́цъ, Сы́нъ и Святы́й Ду́хъ всели́ся, тѣ́мже мо́лимъ тя́, преподо́бне, наважде́нія вра́жія отъ чту́щихъ тя́ отжени́ и Благочести́вѣйшему Импера́тору на́шему ми́ръ и здра́віе да́руй.

Вели́кія твоя́ пусты́нныя по́двиги и труды́ и сла́дость уче́нія твоего́ почита́емъ, преподо́бне Серафи́ме, и́миже мно́гія приходя́щія къ тебѣ́ просвѣти́лъ еси́ и научи́лъ еси́ воспѣва́ти Единосу́щную Тро́ицу.

Житіе́мъ чи́стымъ послѣ́довавъ Влады́цѣ Христу́, тече́ніе до́брое сконча́лъ еси́, преподо́бне, къ вѣ́чнымъ же оби́телемъ возше́дъ, блаже́нне, зри́ши та́мо, я́же а́нгели ви́дятъ. Тѣ́мже, чту́ще па́мять твою́, Христа́ велича́емъ.

Богоро́диченъ: Ны́нѣ къ Тебѣ́ прибѣга́ю, Пречи́стая, спаси́ мя моли́твами Твои́ми и соблюди́: ели́ка бо хо́щеши, мо́жеши, я́ко Ма́ти Всемогу́щаго.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Грѣхо́въ испо́лнени вси́ есмы́, твоя́ же моли́твы, преподо́бне Серафи́ме, я́ко кади́ло благово́нно, ко Го́сподеви восхо́дятъ. Ны́нѣ мо́лимъ тя́: волну́ющееся въ земли́ на́шей мо́ре зла́го невѣ́рія изсуши́ и спасе́ніе душа́мъ на́шимъ отъ Го́спода испроси́.

Блаже́нъ вои́стинну бы́лъ еси́, преподо́бне Серафи́ме, нището́ю бога́тство и пла́чемъ ра́дость стяжа́въ, ю́же приходя́щимъ оби́льно подава́лъ еси́, и ны́нѣ лучи́ чуде́съ источа́еши и исцѣля́еши всѣ́хъ, съ вѣ́рою къ тебѣ́ притека́ющихъ.

Въ пусты́ни кладене́цъ ископа́въ твои́ма рука́ма, преподо́бне, приходя́щія жа́ждущія лю́ди напои́лъ еси́, и ны́нѣ мно́гимъ неду́жнымъ водо́ю кладенца́ сего́ болѣ́зни исцѣля́еши; вои́стинну ди́внаго моли́твенника и чудотво́рца всѣ́мъ, преподо́бне, Влады́ка тя́ показа́.

Богоро́диченъ: Вои́стинну Тя́, Ма́терь Бо́жію, исповѣ́дуемъ, и́стинную Богоро́дицу: Твои́мъ бо Рождество́мъ тлѣ́ннаго осужде́нія изба́вихомся, милосе́рдія ра́ди Человѣколю́бца Бо́га, и къ жи́зни нетлѣ́ннѣй воззва́ни бы́хомъ.

Кондакъ, гласъ 2:

Мíра красоту́ и я́же въ не́мъ тлѣ́нная оста́вивъ, преподо́бне, въ Саро́вскую оби́тель всели́лся еси́, и та́мо а́нгельски пожи́въ, мно́гимъ пу́ть бы́лъ еси́ ко спасе́нію, сего́ ра́ди и Христо́съ тебе́, о́тче Серафи́ме, просла́ви и да́ромъ исцѣле́ній и чуде́съ обогати́. Тѣ́мже вопіе́мъ ти́: ра́дуйся, Серафи́ме, преподо́бне о́тче на́шъ.

Икосъ:

Оста́вивъ ро́дъ и дру́ги, бога́тство, я́ко пра́хъ, вмѣни́въ, въ пусты́ни Саро́встѣй водвори́лся еси́, и на стра́сти, я́ко безпло́тенъ, подвиза́вся, а́нгеловъ ликостоя́нія сподо́бился еси́. Тѣ́мже духо́вная разумѣ́нія пріи́мъ, пода́ждь и на́мъ, преподо́бне, разу́мно пѣ́сньми воспѣ́ти тя́, си́це глаго́лющимъ: ра́дуйся, Серафи́ме блаже́нне, небе́сный человѣ́че и земны́й а́нгеле; ра́дуйся, въ любви́ Христу́ подража́телю; ра́дуйся, Свята́го Ду́ха оби́тель; ра́дуйся, уныва́ющимъ ве́ліе ра́дованіе; ра́дуйся, исто́чниче исцѣле́ній; ра́дуйся, скорбя́щимъ душа́мъ сла́дкое утѣше́ніе; ра́дуйся, и́нокомъ ти́хое приста́нище и учи́телю прему́дрый; ра́дуйся, похвало́ земли́ Россíйскія; ра́дуйся, Серафи́ме, преподо́бне о́тче на́шъ.

Пѣ́снь 7.

Ирмо́съ: Росода́тельну у́бо пе́щь содѣ́ла Ангелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Чу́дно житіе́ твое́ яви́ся, преподо́бне, благода́тію Боже́ственнаго Ду́ха испо́лнено, блаже́нну вои́стинну кончи́ну преподо́бныхъ прія́лъ еси́, о Христѣ́ ра́дуяся. Мы́ же къ Просла́вльшему тя́ взыва́емъ: оте́цъ на́шихъ Бо́же, благослове́нъ еси́.

Мно́жество люде́й, во святу́ю оби́тель соше́дшеся дне́сь, преподо́бне Серафи́ме, честны́мъ моще́мъ твои́мъ покланя́ется, отъ ни́хже исцѣле́нія вси́ почерпа́емъ, непреста́нно зову́ще: оте́цъ на́шихъ Бо́же, благослове́нъ еси́.

Во всю́ зе́млю изы́де вѣща́ніе сіе́, я́ко въ Саро́вѣ чудотво́рецъ пресла́венъ яви́ся, исцѣле́ній мно́жество источа́я всѣ́мъ, съ вѣ́рою приходя́щимъ и вопію́щимъ: оте́цъ на́шихъ Бо́же, благослове́нъ еси́.

Богоро́диченъ: Богоро́дице Дѣ́во, ро́ждшая Сло́во па́че сло́ва, Зижди́теля Твоего́, Того́ моли́ съ преподо́бнымъ Серафи́момъ поми́ловати ду́ши на́ша.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Поми́луй на́съ, Го́споди, и отъ вся́каго зла́ душетлѣ́ннаго сохрани́ моли́твами уго́дника Твоего́, преподо́бнаго Серафи́ма, да вси́ уми́льно вопіе́мъ Ти́: оте́цъ на́шихъ Бо́же, благослове́нъ еси́.

Кто́ не почуди́тся, кто́ не просла́витъ неизслѣ́димую глубину́ милосе́рдія Твоего́, Го́споди, я́ко яви́лъ еси́ всему́ мíру уго́дника Твоего́, преподо́бнаго Серафи́ма, моли́твенника те́плаго о на́съ, вопію́щихъ Тебѣ́: оте́цъ на́шихъ Бо́же, благослове́нъ еси́.

Благода́рное сіе́ пѣ́ніе, отъ на́съ приноси́мое тебѣ́, преподо́бне Серафи́ме, пріими́ и всѣ́мъ на́мъ, пра́зднующимъ святу́ю па́мять твою́ и покланя́ющимся ра́цѣ моще́й твои́хъ, исцѣле́ніе да́руй, вопію́щимъ: оте́цъ на́шихъ Бо́же, благослове́нъ еси́.

Богоро́диченъ: Ты́ еси́, Пресвята́я Богоро́дице, прибѣ́жище на́ше и утвержде́ніе, моли́ Сы́на Твоего́ и Бо́га на́шего пода́ти на́мъ спасе́ніе и грѣхо́въ оставле́ніе.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Плотскíя стра́сти укроти́въ и мíрови умертви́вся, глаго́лы жи́зни вѣ́чныя се́рдцемъ твои́мъ, блаже́нне, прія́лъ еси́, науча́я всѣ́хъ, къ тебѣ́ притека́вшихъ, взыва́ти: Го́спода по́йте, дѣла́, и превозноси́те Его́ во вѣ́ки.

Въ прославле́ніи честны́хъ моще́й твои́хъ, преподо́бне, оби́тель Саро́вская ра́дости испо́лнися. Лю́діе же вси́ ди́вному во святы́хъ Свои́хъ Бо́гу взыва́ху: Го́спода по́йте, дѣла́, и превозноси́те Его́ во вѣ́ки.

Благода́тію Боже́ственнаго Ду́ха испо́лненъ сы́й, преподо́бне Серафи́ме, вѣ́рнымъ лю́демъ, творя́щимъ святу́ю па́мять твою́, моли́твами твои́ми испроси́ грѣхо́въ проще́ніе, вопію́щимъ: дѣ́ти, благослови́те, свяще́нницы, воспо́йте, лю́діе, превозноси́те Го́спода во вѣ́ки.

Богоро́диченъ: Спасе́нія Хода́таица на́мъ яви́лася еси́, Богоро́дице, ро́ждшая Спа́са и Влады́ку всѣ́хъ, тѣ́мже мо́лимъ Тя́: спасе́нія сподо́би всѣ́хъ, пѣсносло́вящихъ Тя́ вѣ́рно во вся́ вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Добродѣ́тельному житію́ твоему́, преподо́бне, позави́дѣвъ, вра́гъ вселука́вый восхотѣ́ запя́тіе тебѣ́ сотвори́ти, ты́ же, благода́тію Бо́жіею и моли́твами Влады́чицы посрами́въ того́, Бо́га просла́вилъ еси́, пѣсносло́вя: Го́спода по́йте, дѣла́, и превозноси́те Его́ во вѣ́ки.

Яко мо́лнія, блиста́ющися, свѣ́тится на поднебе́снѣй, та́ко и вѣща́нія о твои́хъ, преподо́бне, чудесѣ́хъ во всю́ зе́млю изыдо́ша. Мы́ же, дивя́щеся сла́вѣ твое́й, вопіе́мъ: дѣ́ти, благослови́те, свяще́нницы, воспо́йте, лю́діе, превозноси́те Го́спода во вѣ́ки.

Су́етными и стра́стными помышле́ніи мяту́щійся у́мъ на́шъ исцѣли́, преподо́бне, во́лны зла́го невѣ́рія въ земли́ на́шей укроти́, разсла́бленная жите́йскими попече́ніи сердца́ на́ша укрѣпи́, да сла́вимъ Христа́ Содѣ́теля во вся́ вѣ́ки.

Богоро́диченъ: Ра́дуйся, престо́ле Госпо́день огнезра́чный; ра́дуйся, заре́ невеще́ственнаго блиста́нія; ра́дуйся, о́блаче возсія́вшаго Со́лнца пра́веднаго, Христа́ Спа́са на́шего, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Недосто́йными усты́ воспѣва́емое тебѣ́ ма́лое хвале́ніе на́ше, преподо́бне, не пре́зри, но пріими́ и всѣ́хъ, прославля́ющихъ тя́, освяти́, бѣ́дъ, и напа́стей, и вѣ́чнаго муче́нія изба́ви, да тя́ при́сно воспѣва́емъ.

Мра́зъ нощны́й и ва́ръ дневны́й во уедине́ніи пусты́ннѣмъ до́блественнѣ претерпѣ́въ, до́мъ Прему́дрости Бо́жія бы́лъ еси́ и къ сія́нію невече́рнему восте́клъ еси́; моли́ спасти́ся на́мъ.

Сла́вится дне́сь оби́тель, въ не́йже яре́мъ Христо́въ прія́ти изво́лилъ еси́: та́мо бо, въ пусты́ни, дни́ твоя́ пребы́лъ еси́, и твои́ми уче́ньми мно́ги приходя́щія къ тебѣ́ вразуми́въ, научи́лъ еси́ бы́ти ча́да Це́ркве Христо́вы.

Богоро́диченъ: Ты́ еси́ крѣ́пость на́ша, Ты́ еси́ похвала́ и ра́дованіе, Храни́тельница на́ша, заступле́ніе, прибѣ́жище и Предста́тельница непобѣди́мая, Пречи́стая Богоро́дице, спаси́ рабы́ Твоя́.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вели́кимъ отце́мъ, дре́вле въ постѣ́ и по́двизѣхъ просія́вшимъ, поревнова́въ, преподо́бне, чрезъ вся́ дни́ живота́ твоего́ въ моли́твѣ, слеза́хъ и трудѣ́хъ пребы́лъ еси́, до́ндеже дости́глъ еси́ небе́сныя оби́тели, тѣ́мже тя́ досто́йно ублажа́емъ.

Крѣ́пкою си́лою Христо́съ Бо́гъ тя́ препоя́са и укрѣпи́ побѣжда́ти ко́зни де́монскія, преподо́бне. Тѣ́мже ны́нѣ мо́лимъ тя́: моли́ Человѣколю́бца Бо́га, да изба́витъ всѣ́хъ на́съ отъ вра́жіихъ нахожде́ній и искуше́ній и спасе́тъ ду́ши на́ша.

Въ болѣ́знехъ и ско́рбехъ на́шихъ къ тебѣ́, преподо́бне, прибѣга́емъ и изъ глубины́ душе́вныя вопіе́мъ: бу́ди на́мъ небу́рное приста́нище и болѣ́знемъ ско́рый цѣли́тель и изба́ви на́съ отъ вся́каго неду́га и ну́жды, да тя́ непреста́нно велича́емъ.

Богоро́диченъ: Еди́наго отъ Святы́я Тро́ицы, Сло́ва и Сы́на родила́ еси́, Дѣ́во Пречи́стая, Его́же съ преподо́бными и пра́ведными моли́ о рабѣ́хъ Твои́хъ, вѣ́рою прося́щихъ грѣхо́въ проще́нія.

Свѣти́ленъ. Подо́бенъ: Жены́, услы́шите.

Пріиди́те, вси́ вѣ́рніи, свяще́нными пѣ́сньми восхва́лимъ ди́внаго въ чудесѣ́хъ преподо́бнаго Серафи́ма, но́ваго свѣти́льника Россíйскія земли́, а́нгеломъ собесѣ́дника и те́плаго моли́твенника къ Бо́гу о чту́щихъ святу́ю па́мять его́.

Сла́ва, и ны́нѣ, богоро́диченъ.

По Бо́зѣ упова́ніе иму́ще на Тя́, Пречи́стая Богоро́дице, мо́лимъ Ти ся: Ро́ждшагося изъ Тебе́ умоли́ дарова́ти ми́ръ вселе́ннѣй и ве́лію ми́лость.

На хвали́техъ стихи́ры на 6: предпра́зднства 3 и преподо́бному 3.
Аще же нѣ́сть предпра́зднства, преподо́бному на 4, гла́съ 8:

Приспѣ́ всечестны́й пра́здникъ оби́тели Саро́вскія,* па́мять преподо́бнаго Серафи́ма,* ему́же ны́нѣ си́це возопіи́мъ:* ра́дуйся, по́стникомъ свѣти́ло и утвержде́ніе,* и́нокомъ звѣздо́,* я́коже волхво́мъ, показу́ющая пу́ть въ небе́сныя оби́тели,* свяще́нникомъ похвало́ пресла́вная,* любве́ и цѣлому́дрія исто́чниче неизсяка́емый,* свѣти́льниче пресвѣ́тлый духо́внаго разсужде́нія;* ра́дуйся, пра́вило добродѣ́телемъ вели́кое. [Два́жды.]

Блаже́нне о́тче Серафи́ме,* Христо́ви вои́стинну послѣ́довалъ еси́,* братолю́біемъ и незло́біемъ всѣ́хъ къ себѣ́ привлека́я,* кро́тостію же и смире́ніемъ* мно́ги добродѣ́тельному пути́ науча́я.* Тѣ́мже любо́вію па́мять твою́,* преподо́бне Серафи́ме, ублажа́емъ.

Въ пусты́ню всели́лся еси́, преподо́бне,* и, та́мо испо́лнився духо́вныя прему́дрости,* на высоту́ добродѣ́тели возше́лъ еси́.* Тѣ́мже вопіе́мъ ти́:* ра́дуйся, церко́вное украше́ніе,* свяще́нникомъ до́брое утѣше́ніе,* и́нокомъ благолѣ́піе и похвало́,* Серафи́ме блаже́нне,* моли́ Христа́ Бо́га* ми́ръ вселе́ннѣй дарова́ти* и душа́мъ на́шимъ ве́лію ми́лость.

Сла́ва, гла́съ 6:

Пріиди́те, и́ноковъ собо́ри и по́стниковъ сосло́віе, пріиди́те, христоимени́тыхъ люде́й мно́жества, пѣ́сньми и́стиннаго по́стника почти́мъ, вопію́ще: ра́дуйся, по стопа́мъ Влады́ки Христа́ у́зкимъ путе́мъ управля́емый, и притека́ющимъ къ тебѣ́ въ бѣда́хъ и ско́рбехъ ско́рый помо́щниче, и спасе́нія хода́таю преди́вный; ра́дуйся, да́ромъ проро́чества укра́шенный, прорица́яй, я́ко настоя́щая, гряду́щая, моли́ся, преподо́бне Серафи́ме, о чту́щихъ вѣ́рою и любо́вію святу́ю па́мять твою́.

И ны́нѣ, предпра́зднства или́ богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ пло́дъ живота́, Тебѣ́ мо́лимся, моли́ся Влады́чице со святы́ми ца́рственными страстоте́рпцы и всѣ́ми новому́ченики, поми́ловати ду́ши на́ша.

Славосло́віе вели́кое, [ектенíи] и отпу́стъ.



НА ЛИТУРГІИ,

Блаже́нна отъ кано́на пе́рваго пѣ́снь 3-я и втора́го кано́на пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. [Аллилуія, гласъ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24, или́ отъ Матѳе́я, зача́ло 10. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíя дополни́тельная. — СПб.: С.-Петербургская Сѵнодальная Типографія, 1909. — Л. 73 об. – 83.

/ Къ оглавленію раздѣла /


Наверхъ / Къ титульной страницѣ

0