Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іаннуа́рія въ 1-й де́нь.
Еже по пло́ти Обрѣ́заніе Го́спода на́шего Іису́са Христа́.
И па́мять и́же во святы́хъ отца́ на́шего Васи́лія Вели́каго, архіепи́скопа Кесарíи Каппадокíйскія.

Аще хра́мъ свята́го Васи́лія, твори́мъ бдѣ́ніе.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 3, самогла́сны:

Христа́ всели́въ въ ду́шу твою́ чи́стымъ твои́мъ житіе́мъ, Исто́чника жи́зни, священноявле́нне Васи́ліе, рѣ́ки источи́лъ еси́ уче́ній благочести́выхъ вселе́ннѣй, отъ ни́хже напая́еми, вѣ́рніи церко́вніи лю́діе плоды́ усте́нъ, исповѣ́дающихъ благода́ть, прино́сятъ Просла́вльшему па́мять твою́ во вѣкъ вѣ́ка. [Два́жды.]

Мѵ́ро, излія́нное на тебѣ́ благода́ти, пома́за тя священнодѣ́йствовати Ева́нгеліе Ца́рствія небе́снаго, Васи́ліе богоявле́нне, Христо́во благоуха́ніе бывъ, воне́ю зна́нія Его́ вселе́нную испо́лнилъ еси́. Тѣ́мже, гла́сы рабъ твои́хъ благопрія́тнѣ пріе́мляй, испроси́ намъ, чту́щимъ тя, ве́лія ми́лости.

Византíево: Святи́тельскою оде́ждею одѣ́янъ, Тро́ицы побо́рниче Васи́ліе, престо́лу предста́лъ еси́ суди́щному, бѣду́ пріе́мляй о вѣ́рѣ, и, страда́льческое противостоя́ніе показа́въ, я́рость епа́рхову посрами́лъ еси́, яря́щася держа́вою нече́стія и неми́лостивнымъ разсѣче́ніемъ претя́ща, усе́рдно, о́тче, проразсуди́въ и му́ченикъ бы́въ произволе́ніемъ, вѣне́цъ прія́лъ еси́ побѣ́ды отъ Христа́, иму́щаго ве́лію ми́лость.

Сла́ва, гла́съ 2:

Су́щихъ извы́къ естество́ и всѣ́хъ усмотри́въ нестоя́тельное, Еди́наго обрѣ́лъ еси́ непоколе́блема, Пресу́щнаго су́ща Содѣ́теля всѣ́хъ, Ему́же и па́че приложи́вся, не су́щихъ жела́ніе отве́рглъ еси́. Моли́ и намъ боже́ственнаго жела́нія получи́ти, священноявле́нне Васи́ліе.

И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Храмъ всесвѣ́телъ* трисо́лнечныя зари́ сый,* озаря́еши ду́ши пита́ющихся* словесы́ твои́ми, Васи́ліе.

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

Труба́ съ небесе́* шу́мъ гла́са твоего́ е́сть* и о́гнь, и́мже попаля́ются* ерети́ческая вся́,* Васи́ліе, уче́нія.

Сти́хъ: Уста́ пра́веднаго поуча́тся прему́дрости,* и язы́къ его́ возглаго́летъ су́дъ.

Свѣ́тъ Еди́нъ Трисія́нный,* раздѣля́яй ли́цы,* единя́яй же существо́мъ,* Арія низложи́лъ еси́* и Саве́ллія, Васи́ліе.

Сла́ва, и ны́нѣ:

Плотско́е обрѣ́заніе* Боговочеловѣ́чнаго Сло́ва* и па́мять Васи́лія* почита́юще Вели́каго,* Богоро́дицу почита́емъ.

По Отче на́шъ: Тропа́рь свята́го. Сла́ва, и ны́нѣ, Обрѣ́занія. Ектенія́ и отпу́стъ.
На вели́цей же вече́рни, и на у́трени, и на литургíи пое́мъ все́ послѣ́дованіе, я́коже изъяви́ся на ряду́.



НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8. Пра́здника 4, гла́съ 8. Самогла́сны:

Сходя́й Спасъ къ ро́ду человѣ́ческому прія́тъ пелена́ми пови́тіе, не возгнуша́ся плотска́го обрѣ́занія, осмодне́венъ по Ма́тери, безнача́льный по Отцу́, Тому́, вѣ́рніи, возопіи́мъ: Ты́ еси́ Бо́гъ на́шъ, поми́луй насъ. [Два́жды.]

Не устыдѣ́ся Всеблагíй Бо́гъ плотски́мъ обрѣ́заніемъ обрѣ́затися, но даде́ Самаго́ Себе́ о́бразъ и начерта́ніе всѣ́мъ ко спасе́нію, и́бо зако́на Творе́цъ зако́нная исполня́етъ и проро́ковъ прорече́нія, я́же о Не́мъ. Иже вся́ содержа́й го́рстію и пелена́ми пови́выйся, Го́споди, сла́ва Тебѣ́. [Два́жды.]

Ины стихи́ры свята́го Васи́лія на 4, гла́съ 4. Подо́бенъ: Зва́нный свы́ше.

Иже тезоимени́тнѣ* нарече́нъ бы́въ ца́рствія,* егда́ ца́рское ты́ свяще́ніе,* Христо́въ язы́къ свя́тъ,* любому́дріемъ и худо́жествомъ,* о́тче, упаслъ еси́,* тогда́ вѣнце́мъ тя́ украси́ ца́рствія, Васи́ліе,* ца́рствующими Ца́рствуяй и всѣ́хъ Госпо́дь,* Иже Ро́ждшему соедине́нный,* Присносу́щный Сы́нъ и Собезнача́льный.* Его́же моли́* спасти́ и просвѣти́ти ду́ши на́ша. [Два́жды.]

Святи́тельства оде́ждами укра́шенъ,* ра́дуяся, проповѣ́далъ еси́ Ева́нгеліе Ца́рствія, Васи́ліе,* правосла́вія Це́ркви источи́въ уче́ніе.* Имиже ны́нѣ просвѣща́еми,* Еди́но Божество́, е́же во Отцѣ́ Вседержи́тели,* и во Единоро́днѣмъ Бо́жіи Сло́вѣ,* и Боже́ственнѣмъ Ду́сѣ,* богосло́вимъ и сла́вимъ,* въ Тріе́хъ Ли́цѣхъ нераздѣ́льно.* Его́же моли́* спасти́ и просвѣти́ти ду́ши на́ша.

Небе́снымъ спребыва́я ликостоя́ніемъ* и соводворя́яся, о́тче Васи́ліе,* и́хже и житію́ поревнова́лъ еси́* свѣ́тлостію чи́стою житія́ твоего́,* еще́ съ пло́тію живы́й съ су́щими на земли́,* я́ко безпло́тенъ.* Наслажда́ющіяся богодохнове́ннымъ уче́ніемъ твои́мъ* отъ бѣ́дъ и тмы́ невѣ́дѣнія* Христа́, Бо́га на́шего, моли́* спасти́ и просвѣти́ти ду́ши на́ша.

Сла́ва, гла́съ 8. Анато́лія:

Прему́дрости рачи́тель бы́въ, преподо́бне, и всѣ́хъ су́щихъ, е́же къ Бо́гу, предсуди́въ сожи́тельницу — поуче́ніе сме́ртное, лѣ́потно житіе́ препроводи́лъ еси́, и́бо, плотскíя стра́сти воздержа́нія крѣ́постьми себе́ обложи́въ и боже́ственнаго поуче́нія зако́номъ, нерабо́тенъ душе́вный соблю́лъ еси́ са́нъ, добродѣ́тели бога́тствомъ все плотско́е мудрова́ніе повину́лъ еси́ ду́ху. Тѣ́мже пло́ть и мíръ возненави́дѣвъ и міроде́ржца, предстоя́ Христу́, проси́ душа́мъ на́шимъ ве́лія ми́лости.

И ны́нѣ, гла́съ то́йже, пе́рвую стихи́ру:

Сходя́й Спасъ къ ро́ду человѣ́ческому [прія́тъ пелена́ми пови́тіе, не возгнуша́ся плотска́го обрѣ́занія, осмодне́венъ по Ма́тери, безнача́льный по Отцу́, Тому́, вѣ́рніи, возопіи́мъ: Ты́ еси́ Бо́гъ на́шъ, поми́луй насъ].

Вхо́дъ. Проки́менъ дне́. [Чте́нія три́.]

Бытія́ чте́ніе. [Глава́ 17.]

Яви́ся Госпо́дь Авра́му и рече́ ему́: Азъ е́смь Бо́гъ тво́й, благоугоди́ предо Мно́ю и бу́ди непоро́ченъ. И положу́ завѣ́тъ Мой между́ Мно́ю и между́ тобо́ю, и умно́жу тя́ зѣло́. И бу́деши оте́цъ мно́гихъ язы́ковъ. И не нарече́тся ктому́ и́мя твое́ Авра́мъ, но бу́детъ и́мя твое́ Авраа́мъ, я́ко отца́ мно́гихъ язы́ковъ положи́хъ тя́. И возращу́ тя зѣло́ зѣло́, и положу́ тя́ въ язы́ки, и ца́ріе изъ тебе́ изы́дутъ. И положу́ завѣ́тъ Мо́й между́ Мно́ю и тобо́ю и между́ сѣ́менемъ твои́мъ по тебѣ́ въ ро́ды и́хъ, въ завѣ́тъ вѣ́чный, и бу́ду и́мъ Бо́гъ. И паде́ Авраа́мъ на лицѣ́ свое́мъ и поклони́ся Го́сподеви. И рече́ Бо́гъ ко Авраа́му: ты́ же завѣ́тъ Мо́й да соблюде́ши, ты́ и сѣ́мя твое́ по тебѣ́ въ ро́ды и́хъ. И се́й завѣ́тъ, и́же соблюде́ши между́ Мно́ю и ва́ми и между́ сѣ́менемъ твои́мъ по тебѣ́ въ ро́ды ихъ: обрѣ́жите пло́ть ва́шу кра́йнюю, и бу́детъ въ зна́меніе завѣ́та между́ Мно́ю и ва́ми и между́ сѣ́менемъ твои́мъ по тебѣ́ въ ро́ды и́хъ. И отроча́ осмодне́вно обрѣ́жется ва́мъ, вся́къ му́жескъ по́лъ въ ро́дѣхъ ва́шихъ. И му́жескій полъ, и́же не обрѣ́жетъ пло́ть кра́йнюю свою́ во осмы́й день, потреби́тся душа́ о́на отъ ро́да своего́, я́ко завѣ́тъ Мо́й разори́ла е́сть.

При́тчей чте́ніе. [Глава́ 8.]

Госпо́дь созда́ мя́ нача́ло путе́й Свои́хъ въ дѣла́ Своя́. Пре́жде вѣ́къ основа́ мя въ нача́лѣ, пре́жде не́же зе́млю сотвори́ти, и пре́жде не́же бе́здны содѣ́лати, пре́жде не́же произы́ти исто́чникомъ во́дъ, пре́жде, не́же гора́мъ водрузи́тися, пре́жде же всѣ́хъ холмо́въ ражда́етъ мя́. Госпо́дь сотвори́ страны́, и пусты́ни, и концы́, населе́ны подъ небесе́мъ. Егда́ гото́вяше не́бо, съ Нимъ бѣ́хъ, и егда́ отлуча́ше Себѣ́ престо́лъ на вѣ́трѣхъ, егда́ крѣ́пки творя́ше вы́шнія о́блаки и я́ко тве́рды полага́ше исто́чники поднебе́сныя. Внегда́ полага́ти мо́рю предѣ́лъ его́, и во́ды не мимои́дутъ у́стъ Его́, и крѣ́пки творя́ше основа́нія земли́, бѣ́хъ къ Нему́ подо́бна. Азъ бѣ́хъ, о не́йже ра́довашеся: по вся́ же дни́ веселя́хся предъ лице́мъ Его́ на вся́ко вре́мя.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

На литíи стихи́ра хра́ма, та́же свята́го Васи́лія, гла́съ 3. Ге́рманово:

Христа́ всели́въ въ ду́шу твою́ чи́стымъ твои́мъ житіе́мъ, Исто́чника жи́зни, священноявле́нне Васи́ліе, рѣ́ки источи́лъ еси́ уче́ній благочести́выхъ вселе́ннѣй, отъ ни́хже напая́еми, вѣ́рніи церко́вніи лю́діе плоды́ усте́нъ, исповѣ́дающихъ благода́ть, прино́сятъ Просла́вльшему па́мять твою́ во вѣкъ вѣ́ка.

Мѵ́ро, излія́нное на тебѣ́ благода́ти, пома́за тя́ священнодѣ́йствовати Ева́нгеліе Ца́рствія небе́снаго, Васи́ліе богоявле́нне. Христо́во благоуха́ніе бы́въ, воне́ю ра́зума Его́ вселе́нную испо́лнилъ еси́. Тѣ́мже, гла́сы ра́бъ твои́хъ благопрія́тнѣ пріе́мляй, испроси́ на́мъ, чту́щимъ тя́, ве́лія ми́лости.

Византíево: Святи́тельскою оде́ждею одѣ́янъ, Тро́ицы побо́рниче Васи́ліе, престо́лу предста́лъ еси́ суди́щному, бѣду́ пріе́мляй о вѣ́рѣ, и, страда́льческое противостоя́ніе показа́въ, я́рость епа́рхову посрами́лъ еси́, яря́щася держа́вою нече́стія и неми́лостивнымъ разсѣче́ніемъ претя́ща, усе́рдно, о́тче, проразсуди́въ, и, му́ченикъ бы́въ произволе́ніемъ, вѣне́цъ прія́лъ еси́ побѣ́ды отъ Христа́, иму́щаго ве́лію ми́лость.

Сла́ва, гла́съ 6:

Излія́ся благода́ть во устна́хъ твои́хъ, преподо́бне о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во Еди́номъ Божествѣ́.

И ны́нѣ, гла́съ 8:

Сходя́й Спасъ [къ ро́ду человѣ́ческому прія́тъ пелена́ми пови́тіе, не возгнуша́ся плотска́го обрѣ́занія, осмодне́венъ по Ма́тери, безнача́льный по Отцу́, Тому́, вѣ́рніи, возопіи́мъ: Ты́ еси́ Бо́гъ на́шъ, поми́луй насъ].

На стихо́внѣ стихи́ры свята́го, самогла́сны, гла́съ 1.

Византíево: О, боже́ственная и свяще́нная Христо́вы Це́ркве пчело́, Васи́ліе всеблаже́нне! Ты́ бо боже́ственнаго жела́нія жа́ломъ тебѣ́ вооружи́въ, богоме́рзкихъ ересе́й хулы́ уязви́лъ еси́ и душа́мъ вѣ́рныхъ благоче́стія сла́дость сокро́виществовалъ еси́. И ны́нѣ боже́ственнаго рая́ нетлѣ́нныя проходя́ па́жити, помина́й и на́съ, предстоя́ Тро́ицѣ Единосу́щнѣй.

Стихъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.

Васи́лія мона́ха: Всѣ́хъ святы́хъ собра́лъ еси́ добродѣ́тели, о́тче нашъ Васи́ліе: Моисе́еву кро́тость и Иліину́ ре́вность, Петро́во исповѣ́даніе, Іоа́нново богосло́віе. Яко Па́велъ, вопія́, не преста́лъ еси́: кто́ изнемога́етъ, и а́зъ не изнемога́ю? Кто́ соблажня́ется, и а́зъ не разжиза́юся? Тѣ́мже, съ ни́ми водворя́яся, моли́ спасти́ся душа́мъ на́шимъ.

Сти́хъ, гла́съ 2: Уста́ пра́веднаго поуча́тся прему́дрости, и язы́къ его́ возглаго́летъ су́дъ.

Іоа́нна мона́ха: Су́щихъ извы́къ естество́ и всѣ́хъ усмотри́въ настоя́тельное, Еди́наго обрѣ́лъ непоколе́блема, Пресу́щнаго су́ща Содѣ́теля всѣ́хъ, Ему́же и па́че приложи́вся, не су́щихъ жела́ніе отве́рглъ еси́, моли́ и на́мъ боже́ственнаго жела́нія получи́ти, священноявле́нне Васи́ліе.

Сла́ва, гла́съ 6:

Благода́ть чуде́съ съ небесе́ пріе́мъ и ле́сть и́дольскую обличи́въ уче́ньми, святи́телей еси́ сла́ва и утвержде́ніе, всеблаже́нне Васи́ліе, и всѣ́хъ преподо́бныхъ уче́нія о́бразъ. Дерзнове́ніе имѣ́я къ Бо́гу, Того́ моли́ спасти́ся душа́мъ на́шимъ.

И ны́нѣ, гла́съ 8:

Не устыдѣ́ся Всеблагíй Бо́гъ плотски́мъ обрѣ́заніемъ обрѣ́затися, но даде́ Самаго́ Себе́ о́бразъ и начерта́ніе всѣ́мъ ко спасе́нію, и́бо зако́на Творе́цъ зако́нная исполня́етъ и проро́ковъ прорече́нія, я́же о Не́мъ. Иже вся́ содержа́й го́рстію и пелена́ми пови́выйся, Го́споди, сла́ва Тебѣ́.

Тропа́рь свята́го, гла́съ 1:

Во всю́ зе́млю изы́де вѣща́ніе твое́, я́ко пріе́мшую сло́во твое́, и́мже боголѣ́пно научи́лъ еси́, естество́ су́щихъ уясни́лъ еси́, человѣ́ческія обы́чаи украси́лъ еси́, ца́рское свяще́ніе, о́тче преподо́бне, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника, гла́съ то́йже:

На престо́лѣ огнезра́чнѣмъ въ вы́шнихъ сѣдя́й со Отце́мъ Безнача́льнымъ и Боже́ственнымъ Твои́мъ Ду́хомъ, благоволи́лъ еси́ роди́тися на земли́ отъ Отрокови́цы Неискусому́жныя, Твоея́ Ма́тере, Іису́се, сего́ ра́ди и обрѣ́занъ бы́лъ еси́, я́ко Человѣ́къ осмодне́вный. Сла́ва всеблаго́му Твоему́ совѣ́ту, сла́ва смотре́нію Твоему́, сла́ва снизхожде́нію Твоему́, Еди́не Человѣколю́бче.

И отпу́стъ.

На повече́ріи конда́къ свята́го. Сла́ва, и ны́нѣ, пра́здника. Полу́нощницу же пое́мъ, по обы́чаю, съ каѳи́смою. По 1-мъ трисвято́мъ тропа́рь пра́здника. По 2-мъ трисвято́мъ конда́къ пра́здника же. Моли́твы же Помяни́, Го́споди, въ наде́жди воскресе́нія... не глаго́лемъ, то́чію: Го́споди, поми́луй, 12. И отпу́стъ.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва свята́го. И ны́нѣ, пра́здника.

По 1-й каѳи́смѣ сѣда́ленъ, гла́съ 5. Подо́бенъ: Собезнача́льное.

Яко ца́рское украше́ніе Це́ркве, Васи́лія вси́ да восхва́лимъ, уче́ній сокро́вище неоску́дное, си́ми бо то́й наказа́ на́съ Тро́ицу почита́ти Святу́ю, соедине́ну у́бо Существо́мъ, раздѣле́ну же Ѵпоста́сьми.

Сла́ва, гла́съ 1. Подо́бенъ: Гро́бъ Тво́й.

Васи́ліе прему́дре, предстоя́й Тро́ицѣ, моли́ся получи́ти въ де́нь Суда́ на́мъ, пою́щимъ тя́ и чту́щимъ па́мять твою́, благода́ть, ми́лость и очище́ніе прегрѣше́ній, я́ко да усты́ прославля́емъ и се́рдцемъ Еди́наго Человѣколю́бца.

И ны́нѣ:

Всѣ́хъ Творе́цъ и Влады́ка мíра, Сы́й со Отце́мъ и Ду́хомъ горѣ́, я́ко Младе́нецъ обрѣ́зуется на земли́ осмодне́венъ. Истинно боже́ственна же и чу́дна дѣла́ Твоя́: Ты́ бо, Влады́ко, на́съ ра́ди обрѣ́зался еси́, я́ко Сы́й зако́на исполне́ніе.

И чте́мъ во Ева́нгеліи толково́мъ поуче́ніе Вели́каго Васи́лія мона́хомъ.

По 2-й каѳи́смѣ сѣда́ленъ, гла́съ 8. Подо́бенъ: Прему́дрости.

Неизрече́нныя прему́дрости богови́днѣ поче́рплъ еси́ бога́тство та́йное, всѣ́мъ источи́лъ еси́ правосла́вія во́ды, вѣ́рныхъ у́бо сердца́ боже́ственнѣ веселя́щія, невѣ́рныхъ же велѣ́нія досто́йнѣ потопля́ющія. Отню́дуже обою́ду благоче́стія по́ты показа́лся еси́ непобѣди́мь Тро́ицы побо́рникъ, святи́телю Васи́ліе. Моли́ся Христу́ Бо́гу прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, гла́съ 3. Подо́бенъ: Боже́ственныя вѣ́ры.

Всю́ напои́лъ еси́ вселе́нную, я́коже вода́ми, уче́ніи твои́ми, благоче́стія собра́нными догма́ты, жи́зни бо Исто́чникъ въ тебѣ́ препочива́ше вои́стинну, Васи́ліе. Его́же моли́, я́ко дерзнове́ніе стяжа́вый, богодохнове́нне, дарова́ти на́мъ ве́лію ми́лость.

И ны́нѣ, гла́съ 4:

Иже естество́мъ Неви́димый, ны́нѣ ви́димь е́сть пло́тію: Сло́во несозда́нное, ны́нѣ изъ Дѣ́вы Чи́стыя ражда́емо, зи́ждется. Тѣ́мже и по зако́ну на́съ ра́ди, человѣ́ковъ, я́коже осмодне́венъ, обрѣ́зуется Младе́нецъ. Тому́ у́бо поклони́мся, я́ко Спа́су на́шему.

[Поліеле́й и велича́ніе:

Велича́емъ тя, святи́телю о́тче Васи́ліе, и чте́мъ святу́ю па́мять твою́, ты́ бо мо́лиши за на́съ Христа́, Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́, живу́щіи по вселе́ннѣй...]

По поліеле́и сѣда́ленъ, гла́съ 8. Подо́бенъ: Прему́дрости.

Си́лою слове́съ боже́ственныхъ е́реси низложи́лъ еси́ мра́чныя, вся́ шата́нія Евно́міева погрузи́лъ еси́, человѣ́комъ бо Ду́ха Бо́га бы́ти проповѣ́далъ еси́ и ру́къ воздѣ́ніемъ враги́ умертви́лъ еси́. Все́ прогна́лъ еси́ Саве́лліево служе́ніе, вся́ же мудрова́нія Несто́ріева упраздни́лъ еси́, святи́телю Васи́ліе. Моли́ся Христу́ Бо́гу прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва:

Благода́ть слове́съ твои́хъ боже́ственныхъ и догма́тъ высота́ та́инственная боже́ственнаго на́мъ бы́сть восхожде́нія лѣ́ствица: Ду́ха бо, о́тче, стяжа́вый трубу́, то́ю проповѣ́далъ еси́ боже́ственная уче́нія. Тѣ́мже и на мѣ́стѣ всели́лся еси́ зла́чнѣ, мзды́ подвиго́въ твои́хъ пріе́мъ, преподо́бне іера́рше Васи́ліе. Моли́ся Христу́ Бо́гу прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

И ны́нѣ:

Вся́ческихъ Влады́ка и Творе́цъ, изъ пречи́стыя утро́бы Твоея́ пло́ть пріе́мый, предста́тельницу Тя́ показа́ человѣ́комъ, Всенепоро́чная. Сего́ ра́ди вси́ къ Тебѣ́ прибѣга́емъ, очище́нія прегрѣше́ній прося́ще, Влады́чице, и вѣ́чнующія изба́витися му́ки, и вся́каго озлобле́нія лю́таго міроде́ржца. Сего́ ра́ди вопіе́мъ Ти́: Моли́ся Твоему́ Сы́ну и Бо́гу прегрѣше́ній оставле́ніе дарова́ти покланя́ющимся вѣ́рою всесвято́му Рождеству́ Твоему́.

И чте́мъ надгро́бное сло́во Григо́рія Богосло́ва, е́же о Вели́цѣмъ Васи́ліи, на четы́ре ча́сти.

Степе́нна, 1-й антифо́нъ 4-го гла́са. Проки́менъ, гла́съ 4: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Вся́кое дыха́ніе... Ева́нгеліе Іоа́нна, зача́ло 36.

По 50-мъ псалмѣ, стихира самогласна, гласъ 6:

Излія́ся благода́ть во устна́хъ твои́хъ, преподо́бне о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во Еди́номъ Божествѣ́.

Кано́нъ пра́здника. Творе́ніе Ѳеофа́ново. Ирмо́съ по два́жды, тропари́ же на 4, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Осмери́ца дне́й, нося́щая о́бразъ бу́дущаго, Твое́ю, Христе́, просвѣща́ется и освяща́ется во́льною нището́ю, въ се́й бо зако́нно обрѣ́зался еси́ пло́тію.

Обрѣ́заніе пріе́млетъ осмодне́вное Христо́съ Своего́ рождества́, и сего́ дне́сь сѣ́нь спря́таетъ, свѣ́тъ возсіява́я но́выя благода́ти.

Инъ кано́нъ святи́теля Васи́лія, на 8. Творе́ніе Іоа́нна Дамаскина́, гла́съ и ирмо́съ то́йже.

Твоему́ гла́су подоба́ше пріити́, Васи́ліе, нача́ти хотя́щимъ хвалы́ твоя́, но, о́тче, мольбу́ пріе́мъ, благода́ть подава́й незави́стно на́мъ.

Добродѣ́телей ты́ жесто́кій ше́ствовалъ еси́ пу́ть, въ гла́дкій дости́глъ еси́ и несопроти́вный небе́сный восхо́дъ и всѣ́мъ яви́лся еси́ о́бразъ, Васи́ліе.

Страстно́е взыгра́ніе, томя́щее пло́ть, любому́дрія жела́ніемъ наказа́лъ еси́, тѣ́мже въ нетлѣ́нныхъ водворя́ешися Ца́рствіихъ, о́тче Васи́ліе.

Душе́вныя стра́сти благопотре́бно, Васи́ліе, вку́пѣ же и тѣле́сныя, духо́внымъ посѣ́клъ еси́ мече́мъ, себе́ же Влады́цѣ же́ртву прине́слъ еси́.

Ты́, бы́въ неизрече́нныхъ таи́нникъ, Васи́ліе, Христо́ву Ца́рствію тайнонаучи́лъ еси́, свяще́нне о́тче, я́вѣ Тро́ическій свѣ́тъ облиста́лъ еси́ на́мъ.

Богоро́диченъ: Кто́ изрещи́ Твое́ по досто́инству возмо́жетъ, е́же па́че сло́ва зача́тіе? Бо́га бо родила́ еси́ пло́тію, Всечи́стая, на́мъ я́вльшася Спа́са и Го́спода.

Катава́сія: пе́рвый ли́къ пое́тъ ирмо́съ: Глубины́ откры́лъ е́сть дно́ и су́шею Своя́ влече́тъ, въ не́й покры́въ проти́вныя, крѣ́пкій во бранѣ́хъ Госпо́дь, я́ко просла́вися.

Другíй ли́къ, ирмо́съ: Ше́ствуетъ морску́ю волня́щуюся бу́рю, су́шу а́біе Изра́иль я́вльшуюся. Че́рмный же по́нтъ триста́ты еги́петскія покры́ ку́пно, водостла́ненъ гро́бъ, си́лою крѣ́пкою десни́цы Влады́чни.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Сло́во вопло́щшееся Пресу́щественное въ преста́тіе зако́на обрѣ́зася, нача́токъ же Боже́ственныя благода́ти и жи́зни нетлѣ́нныя на́мъ подаде́.

Зако́на испо́лнитель, не я́ко сопроти́венъ Бо́гу сы́й, Христо́съ воплоти́выйся показа́ся и сподо́бися во́лею обрѣ́затися осмодне́венъ.

Преподо́бнаго:

Спритече́ Христо́ву и спросія́ па́мять твоя́, о́тче, Рождеству́, Его́же несказа́нное та́инство твои́ми уче́ньми я́вѣ сотвори́лъ еси́.

Стра́хомъ Госпо́днимъ утвержда́емь, нача́ло бо му́дрости се́й е́сть, любо́вію лу́чшею впери́лся еси́ прему́дрости, о Васи́ліе.

Наказа́нія бы́въ вся́каго испо́лненъ, не то́кмо до́льнаго и попира́емаго, мно́го же па́че лу́чшаго, показа́лся еси́ мíру свѣ́тъ, Васи́ліе.

Васи́ліе прему́дре, вшелъ еси́ дѣя́ніемъ, и дѣя́ніе вше́ствіе видѣ́нія боже́ственнѣйшаго показа́лъ еси́, и су́щихъ ра́зуму научи́лся еси́ я́вѣ.

Богоро́диченъ: Безсѣ́менно во чре́вѣ Бо́га зачала́ еси́ и ражда́еши несказа́нно воплоще́нна, на Него́же зрѣ́ти не смѣ́ютъ, Чи́стая, небе́сныхъ си́лы, Приснодѣ́во.

Катава́сія, ли́къ пе́рвый: Крѣ́пость дая́й царе́мъ на́шимъ Госпо́дь, и ро́гъ пома́занныхъ Свои́хъ вознося́й, отъ Дѣ́вы ражда́ется, гряде́тъ же ко Креще́нію. Тому́, вѣ́рніи, возопіе́мъ: нѣ́сть свя́тъ, я́ко Бо́гъ на́шъ.

Другíй: Ели́цы дре́внихъ изрѣши́хомся сѣ́тей бра́шенъ льво́въ, сотре́нныхъ члено́вными, ра́дуимся и разшири́мъ уста́, сло́во плету́ще отъ слове́съ сладкопѣ́нія, и́мже къ на́мъ наслажда́ется дарова́ній.

Конда́къ пра́здника, гла́съ 3. Подо́бенъ: Дѣ́ва дне́сь.

Всѣ́хъ Госпо́дь обрѣ́заніе терпи́тъ и человѣ́ческая прегрѣше́нія, я́ко Бла́гъ, обрѣ́зуетъ, дае́тъ спасе́ніе дне́сь мíру. Ра́дуется же въ вы́шнихъ и Созда́телевъ іера́рхъ, и свѣтоно́сный, боже́ственный таи́нникъ Христо́въ Васи́лій.

Та́же сѣда́ленъ свята́го, гла́съ 8. Подо́бенъ: Прему́дрости.

Прему́дрости сло́ва навы́къ и писа́ніе зако́на отложи́въ, всѣ́мъ проповѣ́далъ еси́ благода́ти сло́во и ду́шъ скрижа́ли угла́дилъ еси́ словесы́ твои́ми, въ ни́хже начерта́лъ еси́ боже́ственная уче́нія. Тѣ́мже и мра́къ проше́дъ о́блакомъ покро́ва тѣлесе́, и просія́лъ еси́ ду́хомъ, святи́телю Васи́ліе. Моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́здника, гла́съ 4. Подо́бенъ: Яви́лся еси́ дне́сь.

Яко Сы́й бе́здна человѣколю́бія, одѣ́ялся еси́, Влады́ко, въ зра́къ ра́бій и пло́тію обрѣ́зался еси́, да́руя всѣ́мъ человѣ́комъ вели́кую Твою́ ми́лость.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Обрѣ́заніе преста́, отне́лѣже Христо́съ во́лею обрѣ́зася, язы́къ мно́жество спаса́я благода́тію.

Бу́дущаго непреста́нную осма́го вѣ́ка жи́знь изобража́етъ, въ ню́же Влады́ка обрѣ́зася пло́тію.

Преподо́бнаго:

Украша́ется я́коже Рождество́мъ Христо́ва невѣ́ста Це́рковь, та́ко и па́мятію твое́ю, всеблаже́нне.

Непребори́мь яви́лся еси́, по Бо́зѣ боря́, Васи́ліе, во всѣ́хъ Того́ повелѣ́нію покаря́яся.

Це́ркви подаде́ся отъ Бо́га огражде́ніе и стѣна́ тверда́, Васи́ліе всеблаже́нне.

Сопротивобо́жнымъ сѣ́чиво ты́ сѣка́тельное и о́гнь, пояда́яй пре́лесть, яви́лся еси́, о́тче Васи́ліе.

Богоро́диченъ: Мо́лимъ Тя, Чи́стая, я́же Бо́га безсѣ́менно заче́нши, при́сно моли́ти за рабы́ Твоя́.

Катава́сія: Услы́шахъ, Го́споди, гла́съ Тво́й, его́же ре́клъ еси́, гла́съ вопію́щаго въ пусты́ни, я́ко возгремѣ́лъ еси́ надъ вода́ми мно́гими, Твоему́ свидѣ́тельствуяй Сы́ну, ве́сь бы́въ соше́дшаго Ду́ха, возопи́: Ты́ еси́ Христо́съ, Бо́жія му́дрость и си́ла.

Другíй: Огне́мъ очи́щся та́йнаго зрѣ́нія, поя́ проро́къ человѣ́ковъ новодѣ́йство, возглаша́етъ гла́съ, Ду́хомъ пле́щущь, воплоще́ніе явля́ющь Неизрече́нна Сло́ва, Имже си́льныхъ держа́вы сотро́шася.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Ты́, отъ Дѣ́вы Ма́тере несказа́нно проше́дъ, Го́споди, и въ человѣ́ческій не не сподо́бился еси́ одѣ́ятися о́бразъ, я́ко Младе́нецъ зако́нно зако́нъ испо́лнилъ еси́.

Но́щи уподо́бися, я́ко сѣ́нь зако́нную лю́бящи Изра́иля, Ро́ждшая, изъ Нея́же облиста́вшій Свѣ́тъ мíра, Христо́съ, яви́ся.

Преподо́бнаго:

Во́дитъ вои́стинну сугу́бъ Це́рковь пра́здникъ дне́сь обрѣ́занія, я́ко младе́нца Влады́ки, я́вльшагося на земли́, и па́мять раба́, му́дра и треблаже́нна.

Непостижи́мый Свѣ́тъ почи́въ въ тебѣ́, преподо́бне, пресвѣ́тлу свѣщу́ мíру тя́ показа́ Христо́съ, тѣ́мже па́мять твою́ пое́мъ, Васи́ліе.

Всете́мно напи́санное въ Сина́и бытіе́ Моисе́емъ, ты́, сказу́я отъ боже́ственныхъ сокро́вищь, начерта́лъ еси́ всѣ́мъ, преблаже́нне Васи́ліе.

Ни законополо́жникъ Моисе́й, ни пе́рвѣе зако́на Іо́сифъ бы́сть, и́же по тебѣ́ пи́щи пшеницомѣ́ритель: Боже́ственныя бо пло́ти са́мъ раздроби́тель яви́лся еси́, Васи́ліе.

Богоро́диченъ: Тебѣ́, ро́ждшей Христа́, всѣ́хъ Содѣ́теля, зове́мъ: ра́дуйся, Чи́стая, ра́дуйся, Свѣ́тъ возсія́вшая на́мъ, ра́дуйся, вмѣсти́вшая Бо́га Невмѣсти́маго.

Катава́сія: Іису́съ, живота́ Нача́льникъ, разрѣши́ти осужде́ніе гряде́тъ Ада́ма первозда́ннаго, очище́ній же я́ко Бо́гъ не тре́буя, па́дшаго очища́етъ во Іорда́нѣ, въ не́мже вражду́ уби́въ, преиму́щъ вся́къ у́мъ ми́ръ да́руетъ.

Другíй: Врага́ те́мнаго и оскверне́ннаго я́да очище́ніемъ Ду́ха измове́ни, къ но́вой приста́хомъ небла́зненной стези́, водя́щей въ непристу́пную ра́дость, еди́нѣмъ присту́пну, и́мже Бо́гъ примири́ся.

Пѣ́снь 6.

Ирмо́съ: Бе́здна мя́ мно́га грѣхо́вная окружа́етъ, и вопію́ Ти, проро́ка подража́яй: отъ тли́ мя́, Го́споди, возведи́.

Прія́тъ коне́цъ зако́нъ, отне́лѣже Христо́съ, младе́нствовавъ, испо́лнитель зако́на Сы́й, обрѣ́заніе воспрія́тъ и разрѣши́ зако́нную кля́тву.

Суббо́тство, обрѣ́заніе же шата́нія евре́йскаго я́вльшагося Христа́ манове́ніемъ преста́, и возсія́ благода́ти весна́.

Преподо́бнаго:

Напита́лъ еси́ ду́ши, та́ющія гла́домъ, ни́щихъ оби́льно и а́лчущихъ сердца́ вся́каго испо́лнилъ еси́, Васи́ліе, боже́ственнаго весе́лія.

Напита́лъ еси́ бога́тно а́лчущія пи́щею небе́сною: хлѣ́бъ бо а́нгельскій е́сть сло́во твое́, Васи́ліе, и́мже изря́денъ пшеницода́вецъ бы́лъ еси́.

Собра́лъ еси́ пче́льный, Васи́ліе, люботру́дно добродѣ́тели вся́кія цвѣ́тъ и, худо́гъ бывъ, въ ни́хже ублажа́ешися.

Потща́лся еси́ мíра отлучи́тися и съ Бо́гомъ пожи́ти, тѣ́мже нестоя́тельная и тлѣ́нная, всеблаже́нне Васи́ліе, оста́вль, пребыва́ющая, я́ко му́дръ, стяжа́лъ еси́.

Богоро́диченъ: Спаси́ отъ бѣ́дъ рабы́ Твоя́, Богоро́дице, я́ко вси́ по Бо́зѣ къ Тебѣ́ прибѣга́емъ, я́ко къ неруши́мѣй стѣнѣ́ и предста́тельству.

Катава́сія: Гла́съ Словесе́, свѣти́льникъ Свѣ́та, денни́ца Со́лнца, Предте́ча въ пусты́ни, — пока́йтеся, — всѣ́мъ вопіе́тъ лю́демъ, — и предочи́ститеся: се́ бо предстои́тъ Христо́съ, отъ тли́ мíръ избавля́яй.

Другíй: Вожделѣ́ннаго я́вствова со всеблаже́ннымъ гла́сомъ Оте́цъ, Его́же изъ чре́ва отры́гну. — Ей, — глаго́летъ, — Се́й соесте́ственъ Сы́нъ, Сы́й свѣтоза́ренъ, произни́че изъ человѣ́ча ро́да, Сло́во же мое́ жи́во, и Человѣ́къ промышле́ніемъ.

Конда́къ, гла́съ 4. Подо́бенъ: Яви́лся еси́ дне́сь.

Яви́лся еси́ основа́ніе непоколеби́мое Це́ркве, подая́ всѣ́мъ некрадо́мое госпо́дьство человѣ́комъ, запечатлѣ́я твои́ми велѣ́ньми, небоявле́нне Васи́ліе преподо́бне.

Икосъ:

Цѣлому́дрія ча́ша, уста́ прему́дрости и степе́нь уче́ній, Васи́лій Вели́кій всѣ́мъ облиста́етъ мы́сленно. Пріиди́те у́бо, и ста́немъ въ дому́ Бо́жіи, те́плѣ взира́юще, чудесы́ сего́ крася́щеся, я́коже луче́ю, облиста́вшеся житія́, чи́стымъ Ду́хомъ прохла́ждшеся, подо́бящеся того́ вѣ́рѣ, и теплотѣ́, и смире́нію, и́миже до́мъ яви́ся естества́ Бо́жія. Къ нему́же вопію́ще, пое́мъ: небоявле́нне Васи́ліе преподо́бне.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Свѣ́тло и пресвѣ́тло Рождество́ Христо́во, и бу́дущаго обновле́нія подписа́вшее та́инство дне́сь, я́ко зако́ннымъ чи́номъ Спа́съ обрѣ́зуется, не я́ко Бо́гъ, но я́ко Человѣ́къ и зако́на исполне́ніе.

Зако́нъ исполня́я, зако́на Творе́цъ, пло́тію дне́сь во́лею обрѣ́зуется, обрѣ́заніе содѣва́я грѣхо́вныя зимы́ и зва́ти да́руя: благослове́нъ еси́, Бо́же оте́цъ на́шихъ.

Преподо́бнаго:

Образъ Отца́ Сы́нъ, и Сы́на Ду́хъ е́сть. Ты́ же Ду́ха, о Васи́ліе, нескве́рнено зерца́ло, до́мъ же всея́ Тро́ицы. Блаже́нна па́мять твоя́, и сла́вящіи ю́ воспрославля́ются.

Углуби́въ у́мъ во глубины́ Бо́жія непостижи́мыя и собра́въ многоцѣ́нный ты́ би́серъ ра́зума, напо́лнилъ еси́ мíръ прему́дростію и зва́ти научи́лъ еси́: благослове́нъ еси́, Бо́же оте́цъ на́шихъ.

О, еди́но дохнове́ніе ума́ свяще́нныхъ сопру́гъ, я́коже еди́на душа́ во двою́ тѣлесѣ́хъ нераздѣ́льно: въ Григо́ріи Васи́лій, жела́ніемъ боже́ственнымъ совоку́плени, въ Васи́ліи же Григо́рій, ны́нѣ моли́те Христа́ о ста́дѣ ва́шемъ.

Оте́цъ сиро́тъ, и вдо́въ защи́тникъ, и бога́тство ни́щихъ, боля́щихъ утѣше́ніе и су́щихъ въ бога́тствѣ окормле́ніе, ста́рости же́злъ яви́лся еси́, и наказа́ніе ю́ности, и мона́шествующихъ добродѣ́тели пра́вило, Васи́ліе.

Очи́стивъ отъ вся́каго ти́ннаго скверне́нія у́мъ, Васи́ліе, сразсмотри́лъ еси́ духо́вная жела́ннымъ твои́мъ ду́хомъ. Тѣ́мже, воспѣва́я Тро́ицу, со дерзнове́ніемъ взыва́лъ еси́: благослове́нъ еси́, Бо́же оте́цъ на́шихъ.

Богоро́диченъ: Тя́ купину́ Моисе́й въ горѣ́ Сина́йстѣй огнепали́му, Чи́стая, прови́дяше, пріе́мшую неопа́льно нестерпи́мую зарю́ Неизглаго́ланнаго Существа́, соедини́вшагося дебельству́ пло́ти еди́ныя въ Не́мъ святы́хъ Ѵпоста́сей.

Катава́сія: Юноши благочести́выя, пе́щи о́гненнѣй приобщи́вшіяся, шумя́щъ ду́хъ ро́сный невреди́мы сохрани́ и Бо́жія а́нгела снизхожде́ніе. Тѣ́мже, въ пла́мени ороша́еми, благода́рственно воспѣва́ху: препѣ́тый оте́цъ Го́споди и Бо́же, благослове́нъ еси́.

Другíй: Опали́ струе́ю змíевы главы́ пе́щный высо́кій пла́мень, ю́ноши нося́щъ благочести́выя, Ути́шивый, неудободержи́мую мглу́ изъ грѣха́ всю́ же омыва́етъ росо́ю Ду́ха.

Пѣ́снь 8.

Ирмо́съ: Неизрече́нною му́дростію соста́вльшаго вся́ческая Бо́га Сло́ва и отъ не су́щихъ во е́же бы́ти приве́дшаго, благослови́те, дѣла́, я́ко Го́спода, и превозноси́те во вся́ вѣ́ки.

Во осмы́й де́нь обрѣ́зуется я́ко Младе́нецъ Влады́ка, Іису́са же пріе́млетъ именова́ніе, я́ко мíра е́сть Спа́съ и Госпо́дь.

Ко Христо́ву Рождеству́ досто́йно осмы́й спряже́ся, святи́теля всесла́вная па́мять, ю́же почита́юще вѣ́рою, пое́мъ Го́спода и превозно́симъ во вѣ́ки.

Преподо́бнаго:

Несказа́ннымъ про́мысломъ дарова́вшаго Васи́лія мíру, свѣ́тъ благоче́стія, трубу́ же богосло́вія, благослови́те, дѣла́ Госпо́дня, Го́спода.

Бога́тнымъ дѣ́йствомъ все́льшася въ му́драго Васи́лія и тѣ́мъ благоче́стно богосло́вившаго, благослови́те, дѣла́ Госпо́дня, Го́спода.

Боже́ственныхъ твои́хъ слове́съ наслади́вшіися, Васи́ліе, непреста́нно въ твое́й па́мяти торжеству́юще, вопіе́мъ: благослови́те, дѣла́ Госпо́дня, Го́спода.

Лучи́ слове́съ испусти́лъ еси́, Васи́ліе, мíру, свѣ́томъ наставля́ющія Еди́но чествова́ти Тро́ическое Естество́: благослови́те, дѣла́ Госпо́дня, Го́спода.

Богоро́диченъ: Изъ Отца́, проше́дшаго пре́жде вѣкъ, и безлѣ́тнаго Бо́га Сло́ва и въ послѣ́дняя возсія́вша изъ Дѣ́вы, благослови́те, дѣла́ Госпо́дня, Го́спода.

Катава́сія: Та́йну пресла́вную вавило́нская показа́ пе́щь, источи́вшая ро́су, я́ко струя́ми имя́ше невеще́ственный Огнь воспрія́ти Іорда́нъ и объя́ти пло́тію креща́ема Зижди́теля, Его́же благословя́тъ лю́діе и превозно́сятъ во вся́ вѣ́ки.

Другíй: Свобо́дна у́бо тва́рь познава́ется и сы́нове Свѣ́та, пре́жде омраче́нніи, еди́нъ стене́тъ тмы́ предста́тель. Ны́нѣ да благослови́тъ усе́рдно Вино́внаго пре́жде окая́нное язы́ковъ всенаслѣ́діе.

На 9-й пѣ́сни Честнѣ́йшую... не пое́мъ, но пое́мъ припѣ́вы Обрѣ́занія:

Велича́й, душе́ моя́, по зако́ну пло́тію обрѣ́завшагося Го́спода.

Пѣ́снь 9.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Та́же вторы́й ли́къ пое́тъ то́йже припѣ́въ и ирмо́съ. Про́чія же три́ припѣва́емъ къ тропаре́мъ.

Велича́й, душе́ моя́, во осмы́й день обрѣ́заніе Пріе́млюща. [Два́жды.]

Дне́сь Влады́ка обрѣ́зуется пло́тію я́ко Младе́нецъ, исполня́я зако́нъ. [Еди́ножды.]

Дне́сь Влады́ка пло́тію обрѣ́зася, Іису́съ нарече́ся. [Еди́ножды.]

Преше́дъ предѣ́лы Христо́съ человѣ́ческаго всего́ естества́, преесте́ственно изъ Дѣ́вы ражда́ется, и, писа́ніе зако́нное я́коже повелѣва́етъ, пло́тію обрѣ́зается, и испо́лнитель зако́на явля́ется.

Пріиди́те, Влады́ки сла́вная Христо́ва именова́нія во святы́ни торжеству́имъ, Іису́съ бо боголѣ́пно нарече́ся дне́сь. Съ си́ми же и па́мять святи́теля велича́емъ.

Та́же свята́го припѣ́вы къ тропаре́мъ его́:

Велича́й, душе́ моя́, во іера́рсѣхъ Васи́лія Вели́каго. [Два́жды.]

Велича́й, душе́ моя́, вселе́нныя пресвѣ́тлаго свѣти́льника. [Два́жды.]

Велича́й, душе́ моя́, отъ Кесарíи Васи́лія Вели́каго. [Два́жды.]

Се́й же вмѣ́сто Сла́вы:

Велича́й, душе́ моя́, украси́вшаго Христо́ву Це́рковь.

Вмѣ́сто И ны́нѣ:

Велича́й, душе́ моя́, Честнѣ́йшую небе́сныхъ во́инствъ, Дѣ́ву Пречи́стую Богоро́дицу.

Пе́рваго па́стыря, я́ко овча́ вѣ́рное Христо́во, Васи́ліе, живоно́снымъ стопа́мъ послѣ́довалъ еси́, мучи́телю бо твою́ ду́шу, о́тче, преда́лъ еси́, до́блественнѣ предбѣ́дствуя о Це́ркви, всеблаже́нне.

Церко́вное всесвяще́нное Христо́во ви́дѣвъ совокупле́ніе, твои́мъ укра́шено святи́тельствомъ, му́дре, всегуби́тель, я́ко отъ гро́ма, треснове́нъ бывъ, паде́ся мучи́тель, су́щія бо въ тебѣ́ Ду́ха зари́ не стерпѣ́, Васи́ліе.

Апо́столовъ сѣда́лища, ли́ка же страда́лецъ Христо́выхъ, патріа́рховъ ски́ніи, и пра́ведныхъ сла́дости, и ра́дости проро́ковъ сподо́бился еси́, Васи́ліе: Богоро́дицы бо служи́тель и Тро́ицы таи́нникъ бы́лъ еси́.

Богоро́диченъ: Превы́спренняя вода́ми покрыва́яй Еди́нъ Госпо́дь, востязу́яй мо́ре, бе́здны же изсуша́яй, изъ Тебе́, Чи́стая, пло́ть воспріе́мый, отъ Виѳлее́ма тщи́тся ко Іорда́ну крести́тися пло́тію.

Та́же о́ба ли́ка, соше́дшеся вку́пѣ, пою́тъ пе́рвый припѣ́въ пра́здника:

[Велича́й, душе́ моя́, по зако́ну пло́тію обрѣ́завшагося Го́спода.]

И ирмо́съ: Недоумѣ́етъ вся́къ язы́къ благохвали́ти по достоя́нію, изумѣва́етъ же у́мъ и премíрный пѣ́ти Тя́, Богоро́дице: оба́че Блага́я су́щи, вѣ́ру пріими́, и́бо любо́вь вѣ́си Боже́ственную на́шу, Ты́ бо христіа́нъ еси́ Предста́тельница, Тя́ велича́емъ.

Та́же припѣ́въ:

Велича́й, душе́ моя́, Честнѣ́йшую небе́сныхъ во́инствъ, Дѣ́ву Пречи́стую Богоро́дицу.

И ирмо́съ: О, па́че ума́ Рождества́ Твоего́ чуде́съ! Невѣ́сто Всечи́стая, Ма́ти Благослове́нная, Еюже получи́вше всесоверше́нное спасе́ніе, досто́йно хва́лимъ я́ко Благодѣ́теля, да́ръ нося́ще пѣ́снь благодаре́нія.

Свѣ́тиленъ. Подо́бенъ: Ду́хомъ во святи́лищи.

Любому́дрія жела́ніемъ обрѣ́залъ еси́, о́тче, души́ твоея́ покрыва́ло, и мíру показа́лся еси́, я́ко со́лнце, чудесы́, и вѣ́рныхъ озари́лъ еси́ мы́сли, богому́дре, Тро́ицы таи́нниче, о Васи́ліе му́дре, и служи́телю Богоро́дицы. [Два́жды.]

Сла́ва, и ны́нѣ, пра́здника:

Пло́тію обрѣ́зуется зако́нъ испо́лнивый, я́ко Младе́нецъ осмодне́венъ, вѣко́въ Зижди́тель, и пелена́ми повива́ется, я́ко Человѣ́къ, и млеко́мъ пита́ется, Иже вся́ безмѣ́рною крѣ́постію я́ко Бо́гъ содержа́й и манове́ніемъ возводя́й.

На хвалитехъ стихиры, на 6, гласъ 5. Подобенъ: Ра́дуйся.

Терпи́тъ обрѣ́заніе пло́тію изъ Отца́ кромѣ́ сѣче́нія же и тлѣ́нія неизрече́нно ро́ждься я́ко Сло́во и я́ко Богъ отъ Бо́га, въ непрело́жнѣмъ пребыва́яй Божествѣ́. Тѣ́мъ по зако́ну па́че зако́на бы́вый кля́твы зако́нныя избавля́етъ вся́ и свы́ше благослове́ніе да́руетъ. Тѣ́мже, преблаго́е Его́ схожде́ніе восхваля́юще, пое́мъ и благода́рственно прославля́емъ, Того́ моля́ще душа́мъ на́шимъ дарова́ти ве́лію ми́лость. [Два́жды.]

По благода́ти Сы́нъ Бо́жій бы́въ возрожде́ніемъ боже́ственнаго креще́нія, естество́мъ и и́стиною, и первовѣ́чна Сы́на Бо́жія и Сло́ва, Единосу́щна Отцу́ и Собезнача́льна исповѣ́далъ еси́, преподо́бне, еретико́въ же незатворе́нная уста́ свѣ́тлостію твои́хъ слове́съ загради́лъ еси́. Тѣ́мже и въ Ца́рства вы́шняя всели́лся еси́, сца́рствуяй Еди́ному и есте́ственнѣ Ца́рствующему Христу́, бога́тно раздаю́щему мíру ве́лію ми́лость.

Внутрь небе́снаго хра́ма я́ко святи́тель свяще́ненъ вмѣсти́лся еси́, дѣя́ніемъ и видѣ́ніемъ прему́дрости нача́лами, я́ко оде́ждею свято́ю, обложе́нъ. И ны́нѣ въ вы́шнѣмъ же́ртвенницѣ, преподо́бне, свяще́нствуя, и Бо́гу предстоя́, и невеще́ственную слу́жбу соверша́я, помина́й ми́лостивно, всеблаже́нне Васи́ліе, соверша́ющія па́мять свяще́нную твою́ и всече́стную, Христа́ моля́, подаю́щаго мíрови ве́лію ми́лость.

Ве́сь освяще́нъ Бо́гу и всеобра́зно отъ дѣ́тства возложе́нъ, Му́дрости Пребоже́ственныя озари́вся заря́ми, су́щихъ разумѣ́ніе уясни́лъ еси́, свѣ́тло сказу́я и му́дрѣ повѣ́дая, е́же въ су́щихъ благочи́ніе творя́ позна́нія боже́ственнѣйшаго дѣ́ла. Тѣ́мже тя, богоглаго́лива и боже́ственна учи́теля и свѣтоно́сна свѣти́льника церко́внаго, проповѣ́дуемъ, Христа́ моля́ща, подаю́щаго мíру ве́лію ми́лость.

Стра́хомъ утверди́вся Бо́жіимъ, нача́ло Прему́дрости разумѣ́лъ еси́, Васи́ліе, стра́хъ прему́дростію и житія́ пра́востію превозше́лъ еси́, о́тче, любо́вію же Бо́гу сраствори́вся, и сво́йственнѣйшій былъ еси́. Тѣ́мже боже́ственнымъ наказа́вся оправда́ніемъ и судьба́мъ, человѣ́ковъ изучи́лъ еси́ обы́чаи и украси́лъ еси́ вѣ́рныхъ ра́зумы, законоположе́ньми духо́вными уясни́въ собо́ръ. Христа́ у́бо моли́ душа́мъ на́шимъ дарова́ти ве́лію ми́лость.

Сла́ва, гла́съ 6:

Излія́ся благода́ть во устна́хъ твои́хъ, преподо́бне о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во Еди́номъ Божествѣ́.

И ны́нѣ, гла́съ 8:

Сходя́й Спасъ къ ро́ду человѣ́ческому прія́тъ пелена́ми пови́тіе, не возгнуша́ся плотска́го обрѣ́занія, осмодне́венъ по Ма́тери, безнача́льный по Отцу́, Тому́, вѣ́рніи, возопіи́мъ: Ты́ еси́ Бо́гъ на́шъ, поми́луй насъ.

Славосло́віе вели́кое. По трисвято́мъ тропа́рь Васи́лія. Сла́ва, и ны́нѣ, пра́здника. Ектеніи́ и отпу́стъ.

И зна́менуются бра́тія еле́емъ отъ канди́ла свята́го, а́ще изво́литъ настоя́тель, и пое́мъ стихи́ру самогла́сну. На 1-мъ часѣ́ тропа́рь пра́здника. Сла́ва, Васи́лія. И ны́нѣ, богоро́диченъ часо́въ. По трисвято́мъ конда́къ пра́здника. И про́чая. И соверше́нный отпу́стъ. На часѣ́хъ кондаки́ глаго́лемъ пра́здника и свята́го, премѣня́юще.


НА ЛИТУРГІИ,

Блаже́нна отъ кано́на пра́здника, пѣ́снь 3-я, и свята́го, пѣ́снь 6-я. По вхо́дѣ тропа́рь пра́здника и свята́го. Сла́ва, конда́къ свята́го. И ны́нѣ, пра́здника. Проки́менъ, гла́съ 6: Спаси́, Го́споди, лю́ди Твоя́ [и благослови́ достоя́ніе Твое́]. Сти́хъ: Къ Тебѣ́, Го́споди, [воззову́, Бо́же мо́й, да не премолчи́ши отъ мене́]. И свята́го, гла́съ 1: Уста́ моя́ возглаго́лютъ [прему́дрость, и поуче́ніе се́рдца моего́ ра́зумъ]. Апо́столъ къ Колосса́емъ, зача́ло 254. И свята́го, ко Евре́емъ, зача́ло 318. Аллилу́ія, гла́съ 8: Пасы́й Изра́иля [вонми́, наставля́яй я́ко овча́ Іо́сифа]. Сти́хъ: Уста́ пра́веднаго поуча́тся прему́дрости, [и язы́къ его́ возглаго́летъ су́дъ]. Ева́нгеліе Луки́, зача́ло 6. И свята́го, зача́ло 24. И про́чее. Соверша́ется боже́ственная литургíя Вели́каго Васи́лія. И пое́мъ за Досто́йно... О Тебѣ́ ра́дуется... Прича́стенъ: Хвали́те Го́спода съ небе́съ, [хвали́те Его́ въ вы́шнихъ]. Другíй: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іаннуа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 1 – 13 об.

/ Къ оглавленію раздѣла /


Наверхъ / Къ титульной страницѣ

0