Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 29-й де́нь.
Преподо́бнаго отца́ на́шего и исповѣ́дника Кассіа́на Ри́млянина.

[ВЕЧЕРЪ,]
[Зри́:] Егда́ и́мать Февруа́рій мѣ́сяцъ дне́й 28, тогда́ слу́жба свята́го Кассіа́на пое́тся на повече́ріи.
Аще же е́сть ви́сектъ, стихи́ры, гла́съ 6. Подо́бенъ: Все́ отло́жше.

Кре́стъ отъ младе́нства взе́мъ* и стезе́ю, о́тче, жесто́кою и тѣ́сною* ше́ствовалъ еси́ спѣ́шно,* и честно́ю па́че,* повину́яся, сла́вне,* велѣ́ніемъ Призва́вшаго.* Тѣ́мже сугу́бо обрѣ́лъ еси́* трудо́въ воздая́ніе* и досто́йну мзду́:* небе́сное Ца́рствіе Христо́во* и со всѣ́ми святы́ми ликова́ніе* во свѣ́тѣ, Кассіа́не.* Съ ни́миже непреста́нно моли́* о душа́хъ на́шихъ.

Чудесе́ ве́щь* вся́кія е́сть добродѣ́тели, богому́дре,* съ не́юже и въ пло́ти на земли́ пе́рвѣе,* смотря́я молча́, преподо́бне,* и глаго́ля по́слѣжде* и словесы́, и вещми́,* смире́нъ и кро́токъ, незло́бивъ* и вельми́ благогла́сникъ проро́ческій:* мно́жае же ны́нѣ па́че,* егда́ къ Бо́гу восте́къ, удиви́лся еси́* и прія́лъ благода́ть исцѣле́ній.

Сла́ва, и ны́нѣ, богоро́диченъ. Подо́бенъ то́йже:

Нра́вомъ злы́мъ поползо́хся* и порабоще́нъ ле́стію лука́вною, Богоневѣ́стная,* къ пречу́дному Твоему́ милосе́рдію* и те́плому заступле́нію,* Пресвята́я Отрокови́це,* прибѣга́ю, окая́нный:* сою́зъ мя́ изба́ви напа́стей и печа́лей,* и спаси́ мя, Пренепоро́чная,* бѣсо́вскихъ прило́гъ,* да прославля́ю Тя́,* и любо́вію пою́ и покланя́юся,* и велича́ю Тя́, Влады́чице,* Присноблаже́нную.

Крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде,* Пречи́стая Влады́чице,* егда́ узрѣ́ла еси́ изъ Тебе́ возсія́вшаго* неизрече́ннымъ сло́вомъ,* отъ беззако́нныхъ я́ко осужде́на возноси́ма на Кре́стъ,* о́цтомъ и же́лчію напая́емаго,* ре́бра же пробода́ема,* и ру́цѣ и но́зѣ пригвожда́ема,* и, рыда́ющи, восклица́ла еси́, ма́терски вопію́щи:* что́ сіе́, Ча́до сладча́йшее,* но́вое та́инство?


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Вѣнча́въ Боже́ственными добродѣ́тельми, преподо́бне, житіе́ твое́, Кассіа́не, къ Бо́гу отше́лъ еси́, отъ Него́же на́мъ проси́ избавле́нія прегрѣше́ній, мо́лимся, соверша́ющимъ вѣ́рою свято́е твое́ преставле́ніе.

Всеобра́знымъ манове́ніемъ къ Бо́гу всѣ́хъ, достосла́вне, отъ стра́стныхъ помышле́ній уклони́лся еси́ и свѣ́тъ бы́лъ еси́, прича́стіи невеще́ственными обожа́емь, препросла́вленнаго Го́спода поя́, тя́ просла́вльшаго.

Вра́чь бы́лъ еси́ душа́мъ, боже́ственными твои́ми уче́ніи, Кассіа́не, управля́я мудрова́нія мона́шествующихъ благода́тію, и къ жи́зни вѣ́чнѣй наста́вилъ еси́. Сего́ ра́ди тя́ вси́ любо́вію почита́емъ.

Богоро́диченъ: Во чре́вѣ носи́вшую, Чи́стая, вси́ вѣ́мы: Бо́га бо, въ пло́ть ме́ртвенную обле́кшася, па́че ума́ родила́ еси́, просвѣти́вшаго преподо́бныхъ сосло́віе, препросла́вленнаго Го́спода, сла́вно бо просла́вися.

Пѣ́снь 3.

Ирмо́съ: Процвѣла́ е́сть пусты́ня я́ко кри́нъ Го́споди, язы́ческая неплодя́щая це́рковь, прише́ствіемъ Твои́мъ, въ не́йже утверди́ся мое́ се́рдце.

Звѣзду́ тя́, на высотѣ́ церко́внѣй возсія́вшую, просвѣще́ніе показа́ су́щимъ во тмѣ́ Христо́съ, всехва́льне, по́стниковъ украше́ніе, преподо́бне.

Кресту́ пріобщи́вшемуся и мíръ просвѣ́щшему, Кассіа́не, подо́бяся, распя́лся еси́ мірски́мъ страсте́мъ, кова́рствія бѣсо́въ побѣди́въ.

Му́дрости испо́лнися твое́ се́рдце, прему́дре, уче́нія бе́здну Святы́мъ источи́ Ду́хомъ, мона́ховъ стада́ напая́ющу.

Богоро́диченъ: Исцѣли́, Всенепоро́чная, ду́шу мою́, молю́ся, изнемо́гшую страстьми́ и вся́кими настоя́ніи злѣ́йшихъ де́моновъ, боже́ственнымъ хода́тайствомъ Твои́мъ.

Сѣда́ленъ, гла́съ 4. Подо́бенъ: Вознесы́йся.

Преподо́бенъ бы́въ, Бо́гу возложи́лся еси́ и, просвѣ́щься до́брыми ви́ды, Кассіа́не, я́ко со́лнце, облиста́лъ еси́ сія́ніемъ боже́ственныхъ твои́хъ уче́ній сердца́ всѣ́хъ, чту́щихъ тя́, всегда́ просвѣща́я. Но прилѣ́жно моли́ Христа́ о и́же любо́вію те́плѣ восхваля́ющихъ тя́.

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя, Безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шнымъ бо Ты́ еси́ очище́ніе, и спасе́ніе вѣ́рныхъ, и заступле́ніе.

Крестобогоро́диченъ:

Иже во́лею на́съ ра́ди распе́ншагося на дре́вѣ Агница зря́щи, рыда́ющи, глаго́лаше, слезя́щи: что́ Ти безблагода́тный евре́йскій собо́ръ воздаде́, и́же мно́гихъ и вели́кихъ, Сы́не Мо́й, даро́въ наслажде́йся? Но воспѣва́ю Твое́, Бо́же Мо́й, долготерпѣ́ніе.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

По́двиги твои́ми плотска́я покори́лъ еси́ игра́нія ду́ху, преподо́бне, и свяще́нными уче́ніи твои́ми вся́ обнажи́лъ еси́ кова́рствія льсти́ваго и ловле́нія.

Умерщвля́емь во́лею отъ мірскíя ме́ртвости, бу́дущія жи́зни наслѣ́діе прія́лъ еси́, Кассіа́не пресла́вне, зако́ны же написа́лъ еси́ мона́ховъ въ наставле́ніе и соверше́ніе.

Всели́ся въ ду́шу твою́ благода́ть Ду́ха и всѣ́хъ вы́шша плотски́хъ мудрова́ній тя́ показа́, пребога́те, и льсти́ваго сѣте́й явле́нно.

Богоро́диченъ: Безлѣ́тнаго, въ лѣ́то бы́вша, родила́ еси́ неизрече́нно, Всенепоро́чная, преподо́бныя просвѣти́вшаго, вѣ́рою пожи́вшія, и злонача́льнаго змíя смири́вшаго.

Пѣ́снь 5.

Ирмо́съ: Хода́тай Бо́гу и человѣ́комъ бы́лъ еси́, Христе́ Бо́же: Тобо́ю бо Влады́ко, къ свѣтонача́льнику Отцу́ Твоему́, отъ но́щи невѣ́дѣнія, приведе́ніе и́мамы.

Восхи́тился еси́, твои́ми добродѣ́тельми, богопрія́тне, носи́мь, и, ра́дуяся, дости́глъ еси́ къ небе́снымъ селе́ніемъ, трудо́въ по́чести досто́йно пріе́мля.

Умо́мъ чи́стымъ ты́ взира́я добро́ту Христо́ву, стоя́лъ еси́ непрекло́ненъ въ нощи́ и во дни́, пресла́вне, Боже́ственная явле́нія отту́ду пріе́мля.

Сле́зъ тече́ніи, богоно́се о́тче, напая́емь, я́ко дре́во высоковѣ́твенно, прине́слъ еси́ плоды́ исправле́нія, веселя́щая всѣ́хъ боже́ственно помышле́нія.

Богоро́диченъ: Изъ Тебе́ Жи́знь па́че ума́ возсія́вши, Дѣ́во, врага́ умертви́, вся́ ны́ умертви́вшаго, и оживи́ мíръ, непреста́нно воспѣва́ющій Тя́.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Путе́мъ тѣ́снымъ, о́тче, ше́ствовалъ еси́, всѣ́мъ же словесы́ твои́ми се́й показа́лъ еси́, и́мже до́брѣ ходя́щіи, въ ра́йскую широту́ вводи́ми быва́ютъ.

Жи́знь твоя́ преподо́бна бы́сть, и кончи́на блаже́нна и честна́, Кассіа́не о́тче на́шъ, святы́хъ а́нгеловъ собесѣ́дниче.

Дрема́ніе уны́нія отве́рглъ еси́ и, пребдѣва́я въ видѣ́ніихъ и дѣя́ніихъ, а́нгельски пожи́лъ еси́ на земли́, богоно́се, всеблаже́нне.

Богоро́диченъ: Яко добру́, я́ко красну́ возлюби́въ Тя́, добротворя́й Іису́съ, Всенепоро́чная, изъ Тебе́ пло́тію ражда́ется и обожа́етъ мя́ за милосе́рдіе безмѣ́рное.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Всегда́ воззрѣ́ньми свѣтлѣ́йшими, богому́дре, обожа́емь, свѣти́льникъ яви́лся еси́ незаходи́мь, отню́дуже облиста́лъ еси́ сло́во спаси́тельное, всѣ́хъ на́съ ра́зумы просвѣща́ющее, восхваля́ющихъ тя́.

Язы́къ тво́й Ду́хомъ обощре́нъ, я́вѣ начерта́вшій зако́нъ спаси́теленъ, и о́бразы изложи́, и́миже управля́ются вся́, всеблаже́нне, при́сно мона́шествующихъ стада́, ра́дующеся.

Ра́зумы, преподо́бне, спаси́тельныя и глаго́лы, невѣ́дѣніе серде́чное отгоня́ющія, бога́тно источи́лъ еси́, о́тче богому́дре. Тѣ́мже тя́ почита́емъ вѣ́рно, всесвяту́ю соверша́юще па́мять твою́.

Богоро́диченъ: Черто́гъ была́ еси́ Боже́ственныя сла́вы и престо́лъ огнезра́ченъ, на не́мже почи́ Сло́во, воплоще́нное за кра́йнюю благосты́ню. Того́ у́бо моли́, Чи́стая, уще́дрити и поми́ловати ны́.

Пѣ́снь 8.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Сія́я, я́коже звѣзда́, сло́вомъ и житіе́мъ, Кассіа́не, просвѣща́еши вся́ земны́я концы́, невѣ́дѣнія изыма́я мглы́ и пѣ́ти повелѣва́я всегда́: благослови́те, вся́ дѣла́ Госпо́дня, Го́спода.

Заше́лъ еси́, у́меръ, я́ко со́лнце, преблаже́нне, я́ко зарю́ же, оста́вилъ еси́ незаходи́ма словеса́ твоя́, просвѣща́ющая ду́ши на́ша, вѣ́рою святу́ю твою́, преподо́бне, соверша́ющихъ па́мять.

Добро́ты мы́сленныя неизрече́нно наслажда́ешися, оста́вль тлѣ́нное тѣ́ло, и ви́дѣти сподо́бился еси́, я́же ви́дятъ, сла́вне, а́нгельская во́инства, пою́ще: благослови́те, вся́ дѣла́ Госпо́дня, Го́спода.

Богоро́диченъ: Яви́лася еси́ небе́съ ши́рши, Дѣ́во, Его́же бо та́я не вмѣсти́ша, несказа́нно вмѣсти́вши и ро́ждши па́че смы́сла, сугу́ба су́ща Естество́мъ, еди́ну же иму́ща боголѣ́пно Ѵпоста́сь.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Крѣ́пость тебѣ́ дарова́ся отъ Бо́га и си́ла нача́ла отгони́ти міроде́ржца, тѣ́мже до́блествовавъ вельми́, я́ко вои́стинну, о́тче богому́дре, лико́мъ счи́слился еси́ преподо́бныхъ, ра́дуяся.

Яко ши́покъ сладково́ненъ, на́съ благоуха́ютъ богодухнове́нная словеса́ боже́ственнаго язы́ка твоего́: ты́ бо благоуха́ніе бы́лъ еси́ на́съ ра́ди Излія́вшагося за милосе́рдіе и въ пло́ть Обле́кшася, богоно́се всече́стне.

Па́мять твоя́, дне́сь преподо́бно возсія́вши, озаря́етъ сердца́ восхваля́ющихъ твое́ а́нгельское житіе́, Кассіа́не, въ не́йже мо́лимся согрѣше́ній проще́ніе дарова́ти всѣ́мъ, помоли́ся.

Богоро́диченъ: Гла́съ Ти́ прино́симъ Гавріи́ловъ, взыва́юще: ра́дуйся, трапе́зо, боже́ственный хлѣ́бъ носи́вшая; ра́дуйся, непроходи́мая две́ре; ра́дуйся, ра́досте всѣ́хъ спаса́емыхъ, преподо́бныхъ похвало́, Богоро́дице Приснодѣ́во.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 205 об. – 208 об.

/ Къ оглавленію раздѣла /


Наверхъ / Къ титульной страницѣ

0