Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 28-й де́нь.
Преподо́бнаго отца́ на́шего и исповѣ́дника Васи́лія, спо́стника свята́го Проко́пія.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Тече́ніе воздержа́нія* непрело́жно соверши́лъ еси́* и вѣ́ру соблю́лъ еси́.* Тѣ́мже и вѣнце́мъ украси́лся еси́, о́тче, пра́вды,* Его́же тебѣ́ угото́ва Христо́съ,* по достоя́нію подава́яй возме́здія,* и по́чести да́руя, и болѣ́зней воздая́нія.* Его́же моли́, богодухнове́нне,* спасти́ ду́ши на́ша.

Вся́кое сладостра́стіе,* порабоща́я тѣ́ло твое́, отве́рглъ еси́, богому́дре,* огорчева́я чу́вство воздержа́нія болѣ́зньми* и жестокопребыва́ньми,* терпѣ́ніемъ же напа́стей* и пожда́ніемъ обстоя́ній,* и́миже безконе́чное пріе́млеши наслажде́ніе,* и сла́дость непрее́мную,* и ра́дость неизглаго́ланную.

Сла́ва, и ны́нѣ, богоро́диченъ, гла́съ 4. Подо́бенъ то́йже:

Де́монскими преклоне́на прило́ги* и въ ро́въ поги́бели вве́ржена* уще́дри, Влады́чице,* и утверди́ мя на ка́мени добродѣ́телей,* и, навѣ́ты вра́жія разори́вши,* сподо́би мя́ твори́ти повелѣ́нія* Твоего́ Сы́на и Бо́га на́шего,* я́ко да улучу́* оставле́ніе въ де́нь суда́.

Крестобогоро́диченъ. Подо́бенъ то́йже:

Распина́ема Христа́ Человѣколю́бца* ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Васи́ліе: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ, его́же краегране́сіе: Вѣ́ры основа́ніе тя́ зна́ю, о́тче. Творе́ніе Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Восхожде́ніе на ка́мени положи́въ, о́тче, вѣ́ры, напа́стей не убоя́лся еси́ стремле́нія, но непоколеби́мь пребы́лъ еси́, я́ко добродѣ́тели побо́рникъ и я́ко ца́рствія тезоимени́тъ.

Благода́ть Пресвята́го Ду́ха тя́ укрѣпи́вши, болѣ́зненныя ра́ны претерпѣ́ти утверди́ и побѣдоно́сца показа́ на мучи́теля суему́дреннаго.

Сострада́льца и сво́ина му́дра, о́тче, получи́лъ еси́, добродѣ́тельми преспѣва́юща при́сно, съ ни́мже, ра́дуяся, пребога́те, по́двигъ страда́нія проше́лъ еси́ муче́ніемъ.

Богоро́диченъ: Предста́тельницу, и спасе́нія хода́таицу, и стѣ́ну необори́му, Тя́ предлага́ю моея́ жи́зни, Богоро́дице Всепѣ́тая, Бо́га ро́ждшую, Благодѣ́теля всея́ тва́ри.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Напра́вилъ еси́ усе́рдно твое́ се́рдце къ Бо́гу, преподо́бне, по́стною благода́тію и исповѣ́даніемъ просія́лъ еси́.

Во́инство воспріи́мъ и всеору́жіе Креста́, побѣди́лъ еси́ мы́сленнаго змíя и чу́вственного, о́тче, льва́.

Соблю́дше благочести́вѣ, е́же по о́бразу души́, преподо́бніи, Христо́въ пречи́стый чту́ще о́бразъ, пострада́сте.

Богоро́диченъ: Благослови́ся Тобо́ю пе́рвая кля́тва, и тлѣ́ніемъ держи́мое естество́ на́ше, Чи́стая, нетлѣ́ніе прія́тъ.

Сѣда́ленъ, гла́съ 3. Подо́бенъ: Красотѣ́ дѣ́вства.

Бога́тство тлѣ́нное и сла́ву теку́щую оста́вивъ, небе́сное бога́тство воспрія́лъ еси́ и сла́ву, о́тче, вои́стинну, блаже́нне, вѣ́чную. Тѣ́мже блажи́мъ свято́е твое́ успе́ніе и, торжеству́юще, въ не́мъ вопіе́мъ ти́: помина́й на́съ, къ Бо́гу имѣ́я дерзнове́ніе, Васи́ліе.

Сла́ва, и ны́нѣ, богоро́диченъ:

Недомы́сленно и непостижи́мо е́сть, Влады́чице Богора́дованная, е́же содѣ́ланное о Тебѣ́ стра́шное Бо́жіе та́инство, и́бо Необыме́ннаго, заче́нши, родила́ еси́, пло́тію обложе́на отъ пречи́стыхъ крове́й Твои́хъ, Его́же всегда́, Чи́стая, я́ко Сы́на Твоего́, моли́ спасти́ся душа́мъ на́шимъ.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Яко красно́ твое́, всеблаже́нне, терпѣ́ніе, въ ста́рости ю́ностную показу́я, преподо́бне, тве́рдость, въ не́йже взыва́лъ еси́: сла́ва си́лѣ Твое́й, Го́споди.

Соедине́нъ любо́вію твоему́ Влады́цѣ и Того́ по́мощію одѣ́явся, болѣ́зни не чу́вствовалъ еси́ плотскíя, взыва́я же, пѣ́лъ еси́: сла́ва си́лѣ Твое́й, Го́споди.

Ца́рства я́ко тезоимени́тъ небе́снаго, и́же къ нему́ веду́щимъ путе́мъ ше́ствовалъ еси́, спу́тника обрѣ́тъ Проко́пія, зову́ща: сла́ва си́лѣ Твое́й, Го́споди.

Богоро́диченъ: Неискусобра́чно родила́ еси́, о Дѣ́во, и по Рождествѣ́ яви́лася еси́ дѣ́вствующи па́ки. Тѣ́мже немо́лчными гла́сы, — ра́дуйся, — Тебѣ́, Влады́чице, вѣ́рою несумнѣ́нною зовемъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Ты́, преподо́бне, свѣ́тло подвиза́лся еси́, Васи́ліе, льво́ву укори́въ неукроти́мую де́рзость, и нра́въ неразу́мный.

Равномо́щна обрѣ́тъ Проко́пія въ трудѣ́хъ, соверша́еши страда́ніе преспѣ́яніи многообра́зными, боже́ственнѣ вѣнча́емь.

Ны́нѣ ви́диши мы́сленно Христа́, Его́же возжела́лъ еси́ и Его́же издале́ча явле́нія дѣ́йственно ви́дѣлъ еси́, преблаже́нне свяще́ннѣйше.

Богоро́диченъ: Тя́, ору́жіе непобѣди́мое на враги́ предлага́емъ, Тя́, утвержде́ніе и наде́жду на́шего спасе́нія, Богоневѣ́сто, стяжа́хомъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Раче́ніемъ Ца́рствіе вы́шнее воспріе́мь, земна́го царя́ несмы́сленный нра́въ, и повелѣ́нія, и за́повѣди, богоно́се, до́блественнѣ пренебре́глъ еси́. [Два́жды.]

На́гъ у́бо су́щихъ на земли́, му́дростнѣ подвиза́лся еси́, одѣ́янъ же Боже́ственною си́лою, яви́лся еси́ вѣнцено́сецъ, я́ко побѣди́въ безбо́жныхъ мучи́телей противле́ніе.

Богоро́диченъ: Се́ ны́нѣ проро́ковъ исполня́ются проповѣ́данія Тебѣ́, Дѣ́вѣ, ро́ждшей проро́ки дре́вле проповѣ́даннаго и исполня́ющаго прорече́нная Ду́ха благода́тію.

Конда́къ, гла́съ 2. Подо́бенъ: Вы́шнихъ ища́.

Съ высоты́ пріи́мь Боже́ственное открове́ніе, изше́лъ еси́, му́дре, отъ среды́ мо́лвъ и, мона́шествовавъ преподо́бно, чуде́съ прія́лъ еси́ дѣ́йство и неду́ги исцѣля́ти благода́тію, Васи́ліе всеблаже́нне свяще́ннѣйшій.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Укрѣпле́нъ Боже́ственною си́лою, о́тче, обличи́лъ еси́ вся́, честна́го о́браза Христо́ва отмета́ющіяся, я́ко пребезу́мны, — благослове́нъ еси́, — вопія́, — въ хра́мѣ сла́вы Твоея́, Го́споди. [Два́жды.]

Воздѣ́ланна и очище́на воздержа́ніемъ, о́тче, и поще́ніемъ возсія́вша терпѣли́вно, Христо́съ тя́ прія́тъ, — благослове́нъ еси́, — зову́ща, — въ хра́мѣ сла́вы Твоея́, Го́споди.

Богоро́диченъ: Яко Богоро́дицу и Цари́цу всея́ тва́ри, вси́ вѣ́рніи, пое́мъ Тя́, Чи́стую, и е́же — ра́дуйся, — Тебѣ́ взыва́емъ, — благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Тѣ́ло, богоно́се, и у́мъ во всепло́діе Христу́ прине́слъ еси́, я́ко всесожже́ніе соверше́но огне́мъ свѣ́дѣнія, и пла́менемъ ра́нъ всесожега́емь, и зовы́й: благослови́те, вся́ дѣла́ Госпо́дня, Го́спода.

Погна́въ твоя́ враги́ и гони́мь, о́тче, низложи́лъ еси́ и попра́лъ еси́, преподо́бне, безу́міе высокому́дреннаго, неукроти́мы ви́дя тебе́ му́чащія, взыва́я: благослови́те, вся́ дѣла́ Госпо́дня, Го́спода.

Якоже нѣ́кій худо́жникъ, на́мъ уче́ньми изря́денъ яви́лся еси́, пребога́те: пе́рвѣе бо воздержа́ніе къ страда́ніемъ му́жественнѣйше предложи́лъ еси́, сострада́льца имѣ́я ученика́ Проко́пія, и вопію́ща: благослови́те, вся́ дѣла́ Госпо́дня, Го́спода.

Богоро́диченъ: Две́рь свѣтоно́сну небе́сную Тя́ имену́емъ, е́юже про́йде Бо́гъ и воплоти́ся, Пречи́стая, безпло́тный пе́рвѣе, я́ко Бо́гъ и Отцу́ Сы́й Единосу́щенъ, Ему́же вопіе́мъ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Вся́ко чу́вство, о́тче, ны́нѣ превозше́дъ, ко Влады́цѣ, ра́дуяся, преше́лъ еси́ любо́вію, твои́хъ подвиго́въ бога́тство обра́въ — а́нгельскую красоту́ и рая́ сла́дость непреста́нную.

Съ твои́мъ ученико́мъ и сострада́льцемъ воспріе́мля, богоно́се, блаже́нныхъ наде́жду и вѣ́чнующее весе́ліе, ва́ше торжество́ творя́щихъ назира́йте.

Отъ земли́ къ небе́сному наслажде́нію, вѣнцено́сцы, преста́вльшеся, идѣ́же святы́хъ собо́ри и а́нгелъ боже́ственная во́инства, учени́къ сосло́віе ва́шими моли́твами спаса́йте.

Богоро́диченъ: Расто́ргни плени́цы прегрѣше́ній Тя́ пою́щихъ, Богома́ти, уста́ви стремле́нія напа́стей, грѣхо́вную ути́ши молву́, бу́рю сокруши́ бѣ́дъ, Ма́ти Дѣ́во.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 202 – 205.

/ Къ оглавленію раздѣла /


Наверхъ / Къ титульной страницѣ

0