Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 26.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 27-й де́нь.
Преподо́бнаго отца́ на́шего и исповѣ́дника Проко́пія Декаполи́та.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Поще́ніемъ пе́рвѣе пріе́мъ* и страда́ніемъ богому́дренно послѣди́,* благоугоди́лъ еси́ обои́ми Созда́вшему,* Еди́ному очище́ніе* истязу́ющему отъ на́съ* и душе́вное благоро́діе.* Его́же плотско́е прише́ствіе сла́вя,* покланя́лся еси́ о́бразу свято́му,* и́же по Того́ вочеловѣ́ченію.

Иже Сло́ва воплоще́ніе* злочести́вѣ отве́ргшія* облича́я, преподо́бне,* соверши́лъ еси́ я́звенными истяза́ніи,* и вся́цѣми озлобле́ньми, и у́зами, и темни́цею,* утвержда́я и́стину.* Тѣ́мже бы́лъ еси́ Христо́ва Ца́рствія наслѣ́дникъ,* и ра́дости неизрече́нныя,* и присносу́щнаго сія́нія.

Сла́ва, и ны́нѣ, богоро́диченъ. Гла́съ и подо́бенъ то́йже:

Яко моли́тву неусыпа́ющую* и мольбу́ пребыва́ющую* иму́щи, Пречи́стая, къ Бо́гу,* напа́сти успи́,* во́лны укроти́ окая́нныя моея́ души́,* и въ ско́рби су́щее се́рдце мое́ утѣ́ши,* Отрокови́це, молю́ Тя,* и облагодати́ у́мъ мо́й,* я́ко да досто́йно сла́влю Тя́.

Крестобогоро́диченъ. Подо́бенъ то́йже:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и Ма́терски Тебѣ́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 8:

Сле́зъ твои́хъ тече́ньми пусты́ни безпло́дное воздѣ́лалъ еси́, и и́же изъ глубины́ воздыха́ньми во сто́ трудо́въ уплодоноси́лъ еси́, и бы́лъ еси́ свѣти́льникъ вселе́ннѣй, сія́я чудесы́, Проко́піе о́тче на́шъ, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Твоя́ по́двиги благолѣ́пнѣ пою́, блаже́нне. Творе́ніе Ѳеофа́ново. Гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Благоче́стія любо́вію объя́тъ бы́въ и Боже́ственнымъ раче́ніемъ треволне́нія мірска́я оттря́слъ еси́, преподо́бне, Бо́гу побѣ́дную пѣ́снь взыва́я, я́ко просла́вися.

Свѣтоно́сное твое́ житіе́, и свѣ́тлое души́, и спротяже́нное, благоче́стію срастворе́нно добродѣ́тели воображе́ніе, въ тебѣ́, преподо́бне, я́вѣ содѣ́лаша.

Преесте́ственнымъ уче́ніемъ и свѣтоза́рнымъ Христо́вымъ освѣща́емь, страстны́я прило́ги воздержа́ніемъ увяди́лъ еси́, вопія́ побѣ́дную пѣ́снь Вседержи́телю.

Богоро́диченъ: Воплоще́нное Сло́во боголѣ́пно заче́нши, Пречи́стая, е́же пре́жде безпло́тное, на́мъ па́че естества́ родила́ еси́, Чи́стая, по Рождествѣ́ Дѣ́ва пребы́вши.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Твоя́ богопрія́тная душа́, вѣ́ры ра́ди ре́вностію распаля́ема, блаже́нне, беззако́нныхъ го́рькое неи́стовство и я́рость, богоно́се, держа́вно разори́ла е́сть.

Твои́ми кровьми́ обагри́вся, му́ченическимъ страда́ніемъ уподо́бился еси́, треблаже́нне, ра́ны нечести́выхъ му́жественною душе́ю претерпѣ́лъ еси́ терпѣли́вно, Проко́піе.

Подъя́лъ еси́, преподо́бне, сугу́бы по́двиги му́дрѣ, е́реси облича́я и льво́въ стремле́нія му́жески претерпѣ́въ богому́дренно, прему́дре Проко́піе.

Богоро́диченъ: Му́дрость и Сло́во Отчее, е́же пре́жде всѣ́хъ вѣ́къ напослѣ́докъ време́нъ неизрече́нно вопло́щься отъ Неискусому́жныя Ма́тере , Богоро́дицу Сію́ содѣ́ла.

Сѣда́ленъ, гла́съ 4. Подо́бенъ: Яви́лся еси́.

Воздержа́нія добро́тами укра́шенъ, муче́нія кровьми́ уясни́лъ еси́ ду́шу и па́че со́лнца просія́лъ еси́, чудоно́сне Проко́піе преподо́бне.

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, и помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й Безлѣ́тный?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Напая́я, преподо́бне, сле́зными тече́ньми се́рдце твое́, блаже́нне, добродѣ́телей сѣ́мя воздѣ́лалъ еси́ по́мысломъ чи́стымъ, преподо́бне Проко́піе.

Земно́е мудрова́ніе Боже́ственному Ду́ху повину́лъ еси́, о́тче, по́стническое житіе́ пріе́мъ и сочета́емь лико́мъ му́ченическимъ, всеблаже́нне.

Яко му́ченикъ боже́ственъ и и́стиннѣйшъ по благоче́стіи, ерети́ческое обличи́лъ еси́ безу́міе, неи́стовство бо му́жески безбо́жныхъ пренебре́глъ еси́.

Богоро́диченъ: Зако́нныхъ кромѣ́ уста́вовъ, Всенепоро́чная, заче́нши Зижди́теля, и безъ тли́ Сего́ породила́ еси́, и Богоро́дица и́стинная и госпо́дственно была́ еси́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Освяще́нна по́стнически и сконча́вшася кро́вію, о́тче, достойно почита́емъ: па́мять бо пра́ведныхъ съ похвала́ми при́сно вѣ́рно соверша́ется и помина́ется.

Му́дрѣ все́ претворя́я и устроя́я къ лу́чшему, я́коже хо́щетъ Госпо́дь, злочеству́ющихъ скверноубíйство твои́мъ воздержа́ніемъ и муче́нія сла́вою преложи́.

На ра́мо взе́мъ кре́стное всеору́жіе, о́тче, Христу́ послѣ́довалъ еси́, вся́ за́дняя забве́нію творя́, къ пре́днимъ тече́ніемъ простира́яся.

Богоро́диченъ: Пое́мъ, Пречи́стая, изъ Тебе́ въ пло́ть стра́стну же и ме́ртвенну одѣ́явшагося Го́спода и обоже́ну содѣ́лавшаго соедине́ніемъ неслія́ннымъ по Ѵпоста́си.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Преходя́, приснопа́мятне, отъ сла́вы вои́стинну по́стническія, восте́клъ еси́ къ му́чениковъ сла́вѣ и че́сти, твое́ю кро́вію въ багряни́цу очервле́ну одѣ́янъ.

Теку́щихъ непостоя́нное преоби́дѣвъ, душе́ю и по́мысломъ богому́дреннымъ, приснопребыва́ющимъ, благи́мъ и конца́ не иму́щимъ благоче́стно впери́лся еси́, всеблаже́нне.

Воздержа́ніемъ благомо́щнымъ и кро́тостію Христо́съ зря́ тя́ обогати́вшася, человѣколю́бнѣ призрѣ́ на тя́ и сла́вы показа́ прича́стника, страстоте́рпче пресла́вне.

Богоро́диченъ: Всенепоро́чная Влады́чице, души́ моея́ тя́жкая и лю́тая сокруше́нія рукодѣя́ньми исцѣли́ та́йными, дѣйстви́тельныя лѣчбы́ Сы́на Твоего́ полага́ющи Стра́сти.

Конда́къ, гла́съ 4. Подо́бенъ: Яви́лся еси́.

Денни́цу дне́сь Це́рковь иму́щи, вся́кую злосла́вія мглу́ разгоня́етъ, почита́ющи Тя́, небеснотаи́нниче, Проко́піе пресла́вне.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Яко пресвѣ́тло житіе́ твое́, богому́дре, бы́сть по́стничествомъ, та́ко яви́ся твое́ я́вѣ страда́ніе тве́рдо, Христа́ бо просла́вилъ еси́, вопія́: благослове́нъ еси́, Бо́же оте́цъ на́шихъ.

Цѣлому́дрія чистото́ю, чу́дный о́тче, препоя́сався, му́жествомъ же муче́нія вѣне́цъ свѣ́телъ прія́лъ еси́ благода́тію, зовы́й: благослове́нъ еси́, Бо́же оте́цъ на́шихъ.

Не покланя́ющіися о́бразу Твоему́ Пречи́стому, Спа́се, нечести́віи раба́ Твоего́ я́звятъ, стру́жуще лю́тѣ, пою́ща и глаго́люща къ Тебѣ́: благослове́нъ еси́, Бо́же оте́цъ на́шихъ.

Богоро́диченъ: Веселя́щеся Рождество́мъ Твои́мъ, Всенепоро́чная, вси́ Тя́ ублажа́емъ. Того́ бо ра́ди ны́нѣ плотска́го мы́ изба́вльшеся тлѣ́нія, вопіе́мъ Ему́: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Разрѣше́нъ отъ тли́ и пре́жде сме́рти я́влься, преста́вился еси́ отсю́ду къ нетлѣ́ннѣй, преподо́бне, жи́зни, сме́рть пріе́мъ лѣ́ствицею свѣ́тло, Проко́піе богому́дре.

Испо́лненъ яви́лся еси́ зари́ благода́тныя и къ незаходи́мому Свѣ́ту, о́тче, отше́лъ еси́, вся́ко ве́щное отложи́въ жела́ніе. Тѣ́мже тя́ почита́емъ, Проко́піе богому́дре.

Вооруже́нъ си́лою Боже́ственнаго Ду́ха, лука́вствія духо́въ побѣди́лъ еси́ полки́. Тѣ́мже небе́сныя две́ри тебѣ́ отверзо́шася, блаже́нне, воспѣва́ющу Христа́ во вѣ́ки вся́.

Богоро́диченъ: Блажа́тъ вси́ ро́ди, Влады́чице, я́коже прорекла́ еси́, Еди́на Богоблаже́нная, Тя́, и́стинную Богоро́дицу Пречи́стую, Юже превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Пострада́ти зако́нно, му́чениче, изво́ливъ, страсте́й стремле́нія воздержа́ніемъ умертви́лъ еси́ и плотска́я взыгра́нія, уго́дниче Христо́въ: тѣ́мже безстра́стія ны́нѣ безсме́ртное съ безпло́тными во́инствы обрѣ́лъ еси́ наслажде́ніе.

Судіи́ пра́ведному свѣ́тло предстои́ши, я́ко побѣди́тель, вѣнцы́ неувяда́емыя пріе́мь, прилѣ́жно, Проко́піе, моля́ся о соверша́ющихъ твою́ свяще́нную па́мять и боже́ственный пра́здникъ преставле́нія твоего́.

Заря́ми Тре́ми ны́нѣ озаря́емь, отъ Еди́наго несказа́нно происходя́щими Божества́, пребога́тнаго наслѣ́дія сподо́бился еси́ и кра́снаго весе́лія, ра́дуяся съ премíрными во́инствы, о́тче Проко́піе.

Богоро́диченъ: Тлѣ́ненъ Сло́во Бо́жіе нетлѣ́нное зра́къ пріе́мь, человѣ́ки въ нетлѣ́ніе облече́, благоволе́ніемъ Отчимъ всели́вся въ Тя́, Обра́дованную. Тѣ́мже, Пречи́стая, съ небе́сными во́инствы Тя́ велича́емъ.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 199 – 202.

/ Къ оглавленію раздѣла /


Наверхъ / Къ титульной страницѣ

0