Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 26-й де́нь.
Иже во святы́хъ отца́ на́шего Порфи́рія, архіепи́скопа Га́зскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Якоже три́ дре́вле* спа́слъ е́сть отъ огня́ Бо́гъ а́нгеломъ,* и ны́нѣ тобо́ю о́троки три́,* въ ро́въ попо́лзшіяся, спасе́:* въ ко́шницѣ бо я́коже носи́ми бя́ху,* свѣ́томъ о́блака си́хъ осѣни́,* три́ вообрази́вша кресты́ въ тѣлесѣ́хъ* на обличе́ніе проти́вящимся,* тебѣ́, Порфи́ріе.

Кто́ по достоя́нію воспое́тъ* напа́сти и болѣ́зни,* бѣды́ и ско́рби твоя́,* и́же по вѣ́рѣ, по́двиги твоя́, Порфи́ріе?* Мно́гое бо твое́ су́щее,* е́же по Бо́зѣ, показа́лъ еси́ дерзнове́ніе.* Тѣ́мже мо́лимъ тя́,* дерзнове́ніе бо и́маши:* о на́съ моли́ся ко Го́споду спасти́ся на́мъ.

Сла́ва, и ны́нѣ, богоро́диченъ, гла́съ 8. Подо́бенъ то́йже:

Пло́ть отъ крове́й Твои́хъ пріе́мъ,* Первовѣ́чный Бо́гъ* Тя́ Предста́тельницу показа́* человѣ́комъ, Чи́стая.* Тѣ́мже изба́ви рабы́ Твоя́* отъ вся́кія бѣды́ и обстоя́нія* и сѣ́тей лука́ваго врага́* и сія́нія причасти́тися сподо́би избра́нныхъ,* вся́ сла́вящія и покланя́ющіяся Тебѣ́.

Крестобогоро́диченъ. Подо́бенъ то́йже:

Тя ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ вся́ изба́вивый* милосе́рдіемъ Твои́мъ?

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля, яви́ тя ста́ду твоему́, я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Порфи́ріе, моли́ Христа́ Бо́га спасти́ся ду́шамъ на́шимъ.


[НА УТРЕНИ,]
Кано́нъ, творе́ніе Гео́ргіево, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Порфи́рою Це́рковь дне́сь я́коже ца́рскою укра́шена, уче́ньми твои́ми, святи́телю Порфи́ріе, си́ми украша́ется и воспѣва́етъ всѣ́хъ Го́спода.

Житіе́мъ просія́въ, преподо́бне, и словесы́ боже́ственными твои́ми, свѣти́льникъ яви́лся еси́ всѣ́мъ человѣ́комъ, при́сно сія́я дѣ́лы и уче́ньми, и озаря́я концы́.

Кропле́ніемъ Пресвята́го Ду́ха, Порфи́ріе, очи́щься и боже́ственныхъ добродѣ́телей во оде́жду одѣ́явся, вше́лъ еси́ въ незаходи́мая священнодѣ́йствовати тебе́ Пома́завшему.

Богоро́диченъ: Сказа́ти су́щимъ на земли́ неизрече́нное и па́че ума́ человѣколю́біе хотя́, Сы́нъ Бо́жій, Богоневѣ́сто, изъ Тебе́ пло́тію роди́ся, вѣ́рнымъ подая́ порожде́ніе.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Покори́лъ еси́ подъ но́зѣ злочести́выхъ мудрова́нія, и́же на Самаго́ Бо́га вся́ческихъ вѣща́ющая.

Глаго́лъ твои́хъ огне́мъ хвра́стіе Ма́нентово му́дрѣ попали́лъ еси́ и вѣ́рнымъ просвѣще́ніе уче́нія просте́рлъ еси́.

Водрузи́въ на тве́рдѣмъ ка́мени но́ги вѣ́рныхъ, поколеба́лъ еси́ отъ основа́нія самого́ основа́ніе нече́ствующихъ, Порфи́ріе.

Богоро́диченъ: Испо́лнися вся́ земля́ Сы́на Твоего́ и Бо́га, Чи́стая, и́стиннаго ра́зума, и сла́вы неизрече́нныя, и благода́ти.

Сѣда́ленъ, гла́съ 3. Подо́бенъ: Боже́ственныя вѣ́ры.

Дѣ́лы просія́лъ еси́, я́ко денни́ца, всю́ е́ресь отгна́лъ еси́ отъ Це́ркве, святи́телю Порфи́ріе, и вѣ́рныхъ сердца́ просвѣти́лъ еси́ воспѣва́ти и сла́вити Го́спода. Тѣ́мже, дне́сь па́мять творя́ще, вопіе́мъ ти́: моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чную, еди́нъ Госпо́дь. Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Пресвѣ́тлаго вѣ́ры сія́нія, въ души́ Со́лнце пра́вды имѣ́я, просвѣти́лъ еси́ словесы́, Порфи́ріе, церко́вное все́ исполне́ніе.

Утве́рждься въ любви́ Бо́жія Сло́ва, ви́димыхъ, Порфи́ріе, пристра́стія вся́каго возгнуша́лся еси́, тѣ́мже тя́ почита́емъ, я́ко равноа́нгельна и святи́теля че́стна.

Въ прича́стіи та́инъ неизрече́нныхъ я́коже бы́въ, Порфи́ріе, сія́ чи́стыми соблю́лъ еси́ дея́ньми чи́сто и неизрече́нно, я́ко таи́нникъ си́мъ досто́инъ.

Богоро́диченъ: Украша́ется сла́вно Твои́ми Це́рковь вели́чествіи, Пречи́стая, Боже́ственными, и удобря́ется си́ми я́сно, и любо́вію сла́витъ Тя́, пѣсносло́вя Твое́ Рождество́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Вѣтíямъ плени́цы разоря́я, Порфи́ріе, словесы́ и́стинными, вѣ́ры держа́ву утверди́лъ еси́ вся́чески.

Поче́рпъ на земли́ Утѣ́шителя, преподо́бне, уче́ній незави́стныя рѣ́ки благоче́стія источи́лъ еси́, Порфи́ріе.

Изсуши́въ огне́мъ слове́съ твои́хъ, Порфи́ріе, пото́ки нече́стія, благоче́стія вѣща́ніемъ человѣ́ки просвѣти́лъ еси́.

Богоро́диченъ: Укрѣ́пльшеся Тобо́ю, си́лою духо́вною супоста́ты проти́вныя Христо́вы и́стины побѣжда́емъ, Пречи́стая.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Духо́вно тя́ одушевле́нъ добродѣ́телей о́бразъ, Порфи́ріе, и при́сно сія́ющъ иму́ще въ дѣла́ боже́ственна вси́ вои́стинну, сего́ ра́ди тя́ почита́емъ.

Си́лою Утѣ́шителя одѣ́явся, я́коже самови́дцы Сло́ва, враги́ непобѣди́мь яви́лся еси́, отгоня́ и посѣка́я си́хъ нече́стія.

Водо́ю сыноположе́нія креще́нія обновля́я человѣ́ки, сы́ны творя́щаго, си́хъ приве́лъ еси́ и пре́далъ еси́ чи́сты, непоро́чны, Порфи́ріе.

Богоро́диченъ: Разумѣ́вше Твоя́, я́же па́че сло́ва Боже́ственная та́инства и неизрече́нну сла́ву, и́же о Тебѣ́ хва́лящіися, Пречи́стая, вои́стинну Тя́, Богоро́дицу, непреста́нно сла́вимъ.

Конда́къ, гла́съ 2. Подо́бенъ: Вы́шнихъ ища́.

Свяще́ннѣйшими твои́ми нра́вы украша́емь, свяще́нства оде́ждею озари́лся еси́, всеблаже́нне богому́дре Порфи́ріе, и исцѣле́ній удобря́еши возвыше́ньми, моля́ся непреста́нно о всѣ́хъ на́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Коле́блемую проти́вными вѣ́тры и прило́ги, о́тче, Христо́ву водрузи́лъ еси́ держа́вно Це́рковь, Сему́ пою́щую: благослове́нъ еси́ въ хра́мѣ сла́вы Твоея́, Го́споди.

Собо́ры до́блественнѣ ерети́ческія побѣди́лъ еси́, о́тче му́дре, ору́жіи слове́сными одѣ́явся, и Христу́ благода́рно взыва́лъ еси́: благослове́нъ еси́ въ хра́мѣ сла́вы Твоея́, Го́споди.

Въ ра́й мы́сленныхъ вше́лъ еси́ добродѣ́телей, отъ ни́хже цвѣ́ты пожа́лъ еси́ и́стинныя и кра́сныя, о́тче Порфи́ріе, и́миже въ мíрѣ благоуха́лъ еси́.

Богоро́диченъ: Крѣ́пость и держа́ву Тя́ немощны́мъ всѣ́мъ си́льное Сло́во Бо́жіе, Дѣ́во, изъ Тебе́ ро́ждшееся, дарова́ взыва́ющимъ: благослове́нъ еси́ въ хра́мѣ сла́вы Твоея́, Го́споди.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Вооружи́лъ еси́ словесы́ твои́ми, му́дре, Це́рковь Христо́ву и утверди́лъ еси́, тѣ́мже побѣжда́етъ всегда́ наше́ствіе ересе́й и побѣдоно́сно Христу́ пое́тъ, взыва́ющи: благослови́те, вся́ дѣла́ Госпо́дня, Го́спода.

Умъ на небеса́ вы́ну имѣ́я, Порфи́ріе, боже́ственнаго улучи́лъ еси́ премѣне́нія неизрече́нно, и чу́вствомъ непости́жна ви́дя та́инства Христо́ва, и вѣ́рою взыва́лъ еси́ Ему́: благослови́те, вся́ дѣла́ Госпо́дня, Го́спода.

Уста́ льво́въ мы́сленныхъ, злѣ́ ху́лящихъ, загради́лъ еси́ моли́твами твои́ми, Порфи́ріе, и че́люсти сокруши́лъ еси́ стрѣла́ми тве́рдыми боже́ственныхъ слове́съ твои́хъ, Сему́ взыва́я прилѣ́жно, укрѣпля́ющему тя́: благослови́те, вся́ дѣла́ Госпо́дня, Го́спода.

Богоро́диченъ: Иже на престо́лѣ сла́вы Отца́ сѣдя́й Сы́нъ и Сло́во Его́, Тя́, Боже́ственно носи́ло, Чи́стая, и сѣда́лище пресла́вно, изъ Тебе́ рожде́йся пло́тію, еди́ну содѣ́ла, Юже вси́ земнíи воспѣва́ютъ, я́ко Влады́чицу.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Честны́я прине́слъ еси́ да́ры, благопрія́тныя добродѣ́тели твоя́, великодарови́тому Влады́цѣ, изба́вльшіяся отъ ле́сти ересе́й тобо́ю, о́тче преподо́бне, Зижди́теля всѣ́хъ велича́ющія.

Ту́чами сле́зъ твои́хъ страсте́й угаси́лъ еси́ пла́мень, и безстра́стіемъ Зижди́телю послужи́лъ еси́, и сла́вы лу́чшія сподо́бился еси́, Порфи́ріе, Сего́ поя́ и велича́я при́сно.

Съ вы́шними лику́я а́нгелы, и святы́ми, и преподо́бными, о и́же вѣ́рою чту́щихъ тя́ и восхваля́ющихъ, о́тче Порфи́ріе, Благодѣ́теля Го́спода непреста́нно моли́.

Богоро́диченъ: О на́шемъ спасе́ніи вочеловѣ́чився Влады́ка, Тя́, хода́таицу всѣ́мъ, и покро́въ, и врачева́ніе, Чи́стая, дарова́, вѣ́рно Тя́ сла́вящимъ и Сего́ любо́вію велича́ющимъ.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 195 об. – 198 об.

/ Къ оглавленію раздѣла /


Наверхъ / Къ титульной страницѣ

0