Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 25-й де́нь.
Иже во святы́хъ отца́ на́шего Тара́сія, архіепи́скопа Константи́на гра́да.

[ВЕЧЕРЪ.]
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Вѣ́ру вселе́ннѣй, верхо́вный о́тче, вои́стинну явля́я, му́дре, начерта́лъ еси́, скве́рну оттряса́я ерети́ческую, и добро́ту водрузи́лъ еси́ церко́вную, уче́ніемъ послѣ́дуя апо́столъ Христо́выхъ. Тѣ́мже съ ни́ми тебѣ́ вопіе́мъ вси́: достохва́льне о́тче, моли́ спасти́ся душа́мъ на́шимъ.

Всего́ воспрія́лъ еси́ Христа́ и блаже́нство ми́лости, е́же къ ни́щимъ любо́вь, си́мъ бо ми́лость бога́тно излія́въ, ми́лость получи́лъ еси́ обѣтова́нія, ми́лость бо на судѣ́ хвали́тися вопіе́тъ. Тѣ́мже къ жи́зни отше́лъ еси́. Моли́, мо́лимся, я́ко да согрѣше́ній обря́щемъ проще́ніе.

Сла́ва, и ны́нѣ, богоро́диченъ:

Еди́на Невмѣсти́маго Бо́га нетѣсномѣ́стно во чре́вѣ носи́ла еси́, Человѣ́ка бы́вша за бла́гость, Пресвята́я Богоневѣ́сто. Тѣ́мже молю́ Тя, утѣсня́ющихъ мя́ страсте́й измѣни́, я́ко да, тѣ́сную и пра́вую стезю́ ше́ствовавъ, дости́гну, я́же къ жи́зни, Дѣ́во, водя́щую.

Крестобогоро́диченъ:

Гро́здъ всезрѣ́лый, Чи́стая, Его́же невоздѣ́ланно во утро́бѣ носи́ла еси́, на дре́вѣ я́ко узрѣ́ла еси́ Сего́ повѣ́шена, рыда́ющи, восклица́ла еси́ и взыва́ла еси́: Ча́до, сла́дость иска́пай, е́юже оты́мется пія́нство вся́кое страсте́й, Благодѣ́телю, Мене́ ра́ди, Тебе́ ро́ждшія, Свои́мъ благоутро́біемъ умоля́емь.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля, яви́ тя ста́ду твоему́, я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Тара́сіе, моли́ Христа́ Бо́га спасти́ся душа́мъ на́шимъ.


[НА УТРЕНИ.]
Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Наведе́нія, и плѣне́нія, и рабо́ты грѣхо́вныя мя́ изба́ви и къ покая́нію наста́ви, Ще́дре, наводя́ мя ско́ро къ любви́ Твое́й.

Струи́ жи́зни имѣ́я, му́дре, се́рдце твое́, Це́ркве бы́лъ еси́ я́ко рѣка́ Бо́жія, напо́лнившися уче́ньми, и сея́ напоя́я, о́тче, бразды́.

Ма́стію тво́й ве́рхъ честны́й Ду́хомъ Боже́ственнымъ пома́зася, Тара́сіе, на браду́ бога́тно, я́ко Ааро́ню, сни́де на оме́ты твоя́, я́ко роса́ Аермо́нская.

Богоро́диченъ: Се́ вопіе́тъ Иса́ія, Дѣ́во Чи́стая: совѣ́та вели́каго Ангела, во утро́бѣ Твое́й заче́нши безъ сѣ́мене, родила́ еси́ и Дѣ́ва пребыва́еши по Рождествѣ́, Чи́стая.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Всѣ́мъ утвержде́ніе сердца́мъ бы́лъ еси́ хлѣ́бомъ слове́съ твои́хъ, святи́телю, умаща́я же, я́ко еле́емъ, весели́ши, я́ко вино́мъ, сердца́ на́ша.

Теплото́ю ра́зума и ре́вностію вѣ́ры отце́въ бы́лъ еси́ верхо́вникъ, и ерети́ческая противле́нія я́ко су́щая а́дова врата́ разори́лъ еси́.

Воздѣ́въ къ Бо́гу преподо́бныя ру́ки твоя́, ми́ръ ста́ду твоему́ испроси́. Тѣ́мже и къ Вы́шнему наслѣ́дію возше́дъ, почи́лъ еси́.

Богоро́диченъ: Стра́нно Рождество́, стра́нно происхожде́ніе во утро́бѣ обновля́ется Дѣ́вы, и естество́, попо́лзшееся въ тлѣ́ніе, отъ ле́сти воздви́же.

Сѣда́ленъ, гла́съ 3. Подо́бенъ: Боже́ственныя вѣ́ры.

Дѣ́лы просія́лъ еси́ богоразу́мія, заре́ю облиста́лъ еси́ Це́рковь, е́реси умертви́лъ еси́ словесы́ твои́ми, нищелю́біе и любо́вь источи́лъ еси́, Авра́амову страннопрія́тію подо́бяся, о́тче Тара́сіе, Христа́ Бо́га моли́, дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

По́томъ благоче́стія всѣ́ялъ еси́ Боже́ственное сло́во Це́ркви и пожа́лъ еси́ кла́съ, Тара́сіе, Правосла́вія; на земли́ кро́ткихъ всели́лся еси́ и съ ни́ми ра́дуешися, веселя́ся.

Его́же рече́ Иса́ія, преподо́бне, боже́ственный стра́хъ во чре́вѣ прія́лъ еси́ Ду́хомъ и роди́лъ еси́ Це́ркви, и́мже ересе́й прозябе́нія разбива́ются о ка́мень вѣ́ры.

Излія́ніемъ сле́зъ, преподо́бне, отмы́лъ еси́ скве́рны и ко исто́чнику дости́глъ еси́, въ не́мже неодожде́нное пи́во сла́дости присносу́щныя пролива́емо, къ жела́ніемъ ты́ приспѣ́лъ еси́ кра́йнимъ.

Богоро́диченъ: Безъ сѣ́мени заче́нся, Всенепоро́чная, Бо́гъ Сло́во во утро́бѣ Твое́й происхо́дитъ сообра́зно непрело́жно къ человѣ́ческому ро́ду. Того́ о рабѣ́хъ Твои́хъ моли́ при́сно, отъ бѣ́дъ спасти́ся душа́мъ на́шимъ.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Си́лою слове́съ твои́хъ не́мощь нечести́выхъ обличи́лъ еси́, и сою́зомъ связа́лъ еси́ боже́ственныя любве́ ста́до твое́, и наде́ждею и вѣ́рою сохраня́еши невреди́мо.

Оттря́съ воздержа́ніемъ пи́щу, пита́лъ еси́ твою́ ду́шу, хлѣ́бъ имѣ́я чи́стыя моли́твы, поуче́ніе же боже́ственное и вознося́щее смире́ніе.

Ты́ ри́зу, му́дре, церко́вную оте́чески истка́лъ еси́, въ ню́же Христо́съ честны́мъ о́бразомъ одѣ́явъ тя́ вѣ́ры ра́ди, и правосла́вія уясни́лъ еси́ уче́нія.

Богоро́диченъ: Тя́ Предста́тельницу, Чи́стая, и наде́жди крѣ́пкое основа́ніе, и подпо́ръ, и покро́въ, и стѣ́ну и́мамы вси́, и къ Ца́рствію приводя́щій мо́стъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Же́ртва и заколе́ніе бы́въ, повину́лъ еси́ себе́ Бо́гу вѣ́рою и соблюда́еши безкро́вныя слу́жбы Его́ соверше́ніе.

Ны́нѣ въ невеще́ственную сла́ву преше́дъ отъ земли́, веще́ственными страстьми́ оскве́рншуюся, преподо́бне, ду́шу мою́ прилѣ́жною моли́твою твое́ю исцѣли́.

Острога́лъ еси́ дебельство́ писа́нія ра́зума глубо́кимъ истонче́ніемъ, Це́ркви бы́лъ еси́ скоропи́сца, Тара́сіе, тро́сть.

Богоро́диченъ: Недоумѣ́ніемъ покрыва́ется Рождество́ Твое́, стра́нно бо, Дѣ́во, дои́ши Пита́теля, и млеко́мъ пита́еши Невеще́ственнаго, и на руку́ держи́ши Зижди́теля.

Конда́къ, гла́съ 3. Подо́бенъ: Дѣ́ва дне́сь.

Правосла́вными догма́ты Це́рковь уясни́въ, и Христо́ву, блаже́нне, честну́ю ико́ну почита́ти и покланя́тися всѣ́хъ научи́въ, обличи́лъ еси́ иконобо́рцовъ безбо́жное велѣ́ніе. Сего́ ра́ди вопіе́мъ ти́: о о́тче, ра́дуйся, му́дре Тара́сіе!

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Прему́дрости ча́ша яви́лся еси́, добродѣ́тельми испо́лнена, и, созва́въ проповѣ́даніемъ высо́каго житія́ твоего́, наслади́лъ еси́ ста́до, богому́дре, и съ ни́мъ, о́тче, взыва́еши: благослове́нъ еси́, Бо́же оте́цъ на́шихъ.

Оби́тели та́мошнія и наслажде́нія честна́я предвари́лъ еси́, и ра́дуешися съ Бо́гомъ твои́мъ, и весели́шися у́бо. Тѣ́мже тя́ чту́ще, преблаже́нне, со дерзнове́ніемъ взыва́емъ: благослове́нъ еси́, Бо́же оте́цъ на́шихъ.

Му́жествомъ ра́зума препоя́санъ въ чре́сла, Тара́сіе, и житіе́мъ одѣ́янъ, вводя́щимъ въ вѣ́ру, на трапе́зу Вы́шняго Царя́ восте́клъ еси́, поя́: благослове́нъ еси́, Бо́же оте́цъ на́шихъ.

Богоро́диченъ: Безъ Отца́ изъ Тебе́, Иже безъ ма́тере изъ Отца́, прохо́дитъ, и чистоты́ Твоея́ зна́менія сохра́нь невре́дна, показа́ пречи́сто рождество́ и дѣ́вство нескве́рно: обновля́ется бо въ Тебѣ́ зако́на рождество́.

Пѣ́снь 8.

Ирмо́съ: Въ пещи́ о́трочестѣй прообрази́лъ еси́ иногда́ Твою́ Ма́терь, Го́споди, о́бразъ же Сія́ изъ огня́ изыма́ше, неопа́льно входя́щія. Юже пое́мъ, я́вльшуюся Тобо́ю конце́мъ дне́сь, и превозно́симъ во вся́ вѣ́ки.

Ты́, я́ко о́блакъ у́тренній, и я́ко ка́пля ка́плющая, и роса́, яви́лся еси́, благотворе́нія бога́тство собра́лъ еси́ на земли́, а́лчущихъ сердца́ ума́стилъ еси́ и свѣ́тлу вже́глъ еси́, му́дре, душе́вную свѣщу́.

Святи́тельства оде́ждею дѣ́лъ твои́хъ свѣ́томъ просвѣ́щся, и яви́лся еси́ цѣлому́дрія клю́чь, воздержа́нія пи́ща, и́стинныя моли́твы учи́тель, и покая́нія пу́ть, и зако́нъ житія́.

Покая́нія вре́мя и обраще́нія пло́дъ принеси́, и смоко́вницы непло́дныя посѣче́нія преще́нія, душе́ моя́, кля́твы убо́йся, напита́й же Христа́ добродѣ́телей благопло́діемъ.

Богоро́диченъ: Не забу́ди гла́са, Предста́тельнице стра́шная, ра́бъ Твои́хъ, но отъ вся́кія бѣды́ моли́твами Твои́ми и вся́каго преще́нія исхити́, преклоня́етъ бо Бо́га Твоя́ Ма́терняя моли́тва.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Увяди́лъ еси́, о́тче, кова́рствія и стрѣ́лы вра́жія огне́мъ воздержа́нія и чистоты́ у́гльми, пло́ти ве́щный гнѣ́въ попали́лъ еси́ и́стинно, о́наго свѣтозаре́нія, Тара́сіе, сподо́бився.

Съ патріа́ршескими ли́ки водворя́яся, пое́ши пѣ́снь а́нгельскую съ ни́ми: свя́тъ, свя́тъ, свя́тъ Оте́цъ роди́тель, и Сы́нъ рожде́йся, и Ду́хъ, исходя́й нераздѣ́льно; Тро́ице Свята́я, сла́ва Тебѣ́!

Яко вше́дшу въ вы́шняя съ Па́вломъ, вопіе́мъ: преблаже́нне, Бо́жіе блаже́нство, Це́ркви утвержде́ніе, Импера́тору побѣ́ду, на́мъ же дарова́ти очище́ніе, чту́щимъ тя́ любо́вію, Тара́сіе, помоли́ся.

Богоро́диченъ: Вопло́щься неизрече́нно отъ чи́стыхъ Твои́хъ крове́й, я́ко со́лнце, яви́ся на́мъ, Пречи́стая Ма́ти безневѣ́стная, вѣ́къ всѣ́хъ Иже пе́рвѣе, Отцу Собезнача́ленъ Сы́нъ, и тму́ отгна́въ, просвѣти́ вся́ческая.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 192 об. – 195 об.

/ Къ оглавленію раздѣла /


Наверхъ / Къ титульной страницѣ

0