Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 24-й де́нь.
Пе́рвое и второ́е обрѣ́теніе честны́я главы́ Предте́чевы.

ВЕЧЕРЪ,

Гла́съ 5. Подо́бенъ: Ра́дуйся.

Ра́дуйся, свяще́нная главо́, и свѣтоно́сная, и а́нгеломъ говѣ́йная, я́же мече́мъ отсѣ́чена дре́вле, и о́стрыми обличе́ньми нечистоты́ сту́дъ посѣ́кшая, исто́чникъ чуде́съ, вѣ́рныя напая́юща, и я́же Спа́сово спаси́тельное прише́ствіе возвѣсти́вшая, и наи́тіе Ду́ха дре́вле уви́дѣвшая, къ Сему́ все́льшаяся, ве́тхой же и но́вой хода́тайствовавшая благода́ти. Христа́ умоли́ душа́мъ на́шимъ дарова́ти ве́лію ми́лость.

Въ сосу́дѣ скуде́льнѣ сокрове́нная иногда́ Предте́чева глава́ яви́ся, отъ земны́хъ нѣ́дръ изда́вшаяся я́вственнѣ и чуде́съ струи́ источа́ющая, и́бо въ вода́хъ главу́ омы́, превы́спренняя ны́нѣ Покрыва́ющаго вода́ми и Одождя́ющаго человѣ́комъ Боже́ственное оставле́ніе. Сію́ у́бо ублажи́мъ, и́стинно пресла́вну, и въ сея́ обрѣ́теніи ра́достно пра́зднуемъ, Христа́ моля́ще дарова́ти душа́мъ на́шимъ ве́лію ми́лость.

Глава́, я́же Агнца Бо́жія проповѣ́давшая, пло́тію я́вльшагося, и всѣ́мъ покая́нія спасе́нныя пути́ Боже́ственными заповѣдьми́ извѣсти́вшая, я́же пре́жде Иродово законопреступле́ніе обличи́вшая и сего́ ра́ди отсѣ́чена отъ тѣлесе́, и на вре́мя подъе́мшая сокрове́ніе, я́коже свѣтоявле́нное на́мъ возсія́ со́лнце, — пока́йтеся — вопію́щая — и ко Христу́ ны́нѣ предложи́теся во умиле́ніи душе́внѣмъ, подаю́щему мíру ве́лію ми́лость.

Сла́ва, гла́съ 6:

Сокро́вище боже́ственныхъ даро́въ, богохрани́мая глава́ твоя́, Предте́че, отъ земны́хъ нѣ́дръ возсія́, ю́же мы́, вѣ́рно пріе́млюще и покланя́ющеся, сла́вне, обогаща́емся отъ тебе́, Христо́въ Крести́телю, чудесы́ пресла́вными и согрѣше́ній проще́ніемъ.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и чте́нія.

Проро́чества Иса́іина чте́ніе. [Глава́ 40.]

Та́ко глаго́летъ Госпо́дь: утѣша́йте, утѣша́йте лю́ди Моя́, глаго́летъ Бо́гъ: свяще́нницы, глаго́лите въ се́рдцы Іерусали́му, умоли́те его́, я́ко умно́жися смире́ніе его́. Разрѣши́ся бо грѣ́хъ его́, я́ко прія́тъ изъ руки́ Госпо́дни сугу́ба согрѣше́нія своя́. Гла́съ вопію́щего въ пусты́ни: угото́вайте пу́ть Госпо́день, пра́вы твори́те стези́ Бо́гу на́шему. На го́ру высо́ку взы́ди, благовѣству́й Сіо́ну, возвыша́й крѣ́постію гла́съ сво́й, благовѣству́яй Іерусали́му: вознеси́те, не бо́йтеся. Азъ Го́сподь Бо́гъ, Азъ услы́шу убо́гихъ Изра́илевъ, и не оста́влю тѣ́хъ. Но отве́рзу отъ го́ръ рѣ́ки и посредѣ́ по́ля исто́чники, сотворю́ пусты́ню въ лу́гъ и жа́ждущую зе́млю во исто́чники водны́я. Да возвесели́тся не́бо свы́ше, и о́блацы да кропя́тъ пра́вду, да возсія́етъ земля́, и да прозя́бнетъ ми́лость, и пра́вда да возсія́етъ вку́пѣ. Гла́съ весе́лія возвѣсти́те, и услы́шано да бу́детъ, возвѣсти́те да́же до коне́цъ земли́, глаго́лите, я́ко изба́ви Госпо́дь раба́ Своего́ Іа́кова и, а́ще вжа́ждутъ въ пусты́ни, источи́тъ и́мъ во́ду изъ ка́мене. Возвесели́ся, непло́ды неражда́ющая, расто́ргни и возопíй, неболѣ́вшая, я́ко мно́га ча́да пусты́я па́че, не́жели иму́щія му́жа.

Проро́чества Малахíина чте́ніе. [Глава́ 3.]

Та́ко глаго́летъ Госпо́дь Вседержи́тель: се́ Азъ посыла́ю Ангела Моего́ предъ лице́мъ Твои́мъ, и́же угото́витъ пу́ть Тво́й предъ Тобо́ю. И пріи́детъ во хра́мъ Сво́й Госпо́дь, Его́же вы́ и́щете, и кто́ стерпи́тъ де́нь вхо́да Его́? Зане́же тому́ пріити́, я́ко о́гнь въ горни́лѣ и я́коже бы́ліе перу́щихъ, и очи́ститъ, пояда́я и очища́я, я́ко сребро́ и зла́то. И пріи́детъ къ ва́мъ судо́мъ, и бу́детъ свидѣ́тель ско́ръ на лука́выя, и на прелюбодѣ́йцы, и на клену́щіяся и́менемъ Мои́мъ во лжу́, и на лиша́ющія мзды́ нае́мника, и на наси́льствующія вдови́цы и пха́ющія си́рыя, и на уклоня́ющія су́дъ прише́льца, и на небоя́щіяся Его́, глаго́летъ Госпо́дь Вседержи́тель. Зане́ Азъ Госпо́дь Бо́гъ ва́шъ, и не измѣню́ Себе́; и вы́, сы́нове Іа́ковли, уклони́стеся отъ зако́на и не сохрани́сте. Сего́ ра́ди обрати́теся ко Мнѣ́, и обращу́ся къ ва́мъ, глаго́летъ Госпо́дь Вседержи́тель, и ублажа́тъ ва́съ вси́ язы́цы, и разумѣ́йте, я́ко Азъ Госпо́дь, смотря́яй посреди́ пра́веднаго и посреди́ беззако́нника въ де́нь о́нъ, въ о́ньже сотворю́ снабдѣ́ніе лю́бящимъ Мя́. Позна́йте у́бо и помяни́те зако́нъ Моисе́овъ, раба́ Моего́, я́коже заповѣ́да ва́мъ въ Хори́вѣ, ко всему́ Изра́илю повелѣ́ніе и оправда́ніе. И се́ Азъ послю́ ва́мъ Илію́ Ѳесви́тянина, пре́жде да́же не пріити́ дню́ Госпо́дню вели́кому, просвѣще́нному, и́же напра́витъ се́рдце отца́ къ сы́ну и се́рдце человѣ́ка ко и́скреннему своему́, да не, прише́дъ, поражу́ зе́млю вско́рѣ, глаго́летъ Госпо́дь Вседержи́тель, Бо́гъ Святы́й Изра́илевъ.

Прему́дрости Соломо́ни чте́ніе. [Главы́ 4 и 5.]

Пра́ведникъ, а́ще пости́гнетъ сконча́тися, въ поко́и бу́детъ. Осу́дитъ же пра́ведникъ умира́яй живу́щія нечести́выя. Узрятъ бо кончи́ну пра́веднаго и не разумѣ́ютъ, что́ совѣща́ша о не́мъ, я́ко пове́ржетъ Госпо́дь нечести́выя безгла́сны ни́цъ и поколе́блетъ и́хъ отъ основа́ній, и до послѣ́дняго исче́знутъ въ болѣ́зни, и па́мять и́хъ поги́бнетъ. Пріи́дутъ бо въ помышле́ніе согрѣше́ній свои́хъ ужа́сни, и обличи́тъ и́хъ сопроти́въ беззако́нія и́хъ. Тогда́ ста́нетъ въ дерзнове́ніи мно́зѣ пра́ведникъ предъ лице́мъ оскорби́вшихъ его́ и отмета́ющихъ труды́ его́. Ви́дѣвше же его́, смяту́тся стра́хомъ мно́гимъ и ужа́снутся о пресла́вномъ спасе́ніи его́. Реку́тъ бо къ себѣ́, ка́ющеся, и въ тѣснотѣ́ ду́ха воздо́хнутъ, и реку́тъ: се́й бѣ́, его́же имѣ́хомъ нѣ́когда въ посмѣ́хъ и въ при́тчу поноше́нія, безу́мніи, житіе́ его́ вмѣни́хомъ неи́стово и кончи́ну его́ безче́стну. Ка́ко вмѣни́ся въ сынѣ́хъ Бо́жіихъ и во святы́хъ жре́бій его́ е́сть? Убо заблуди́хомъ отъ пути́ и́стиннаго, и пра́вды свѣ́тъ не облиста́ на́мъ, и со́лнце не возсія́ на́мъ. Беззако́нныхъ испо́лнихомся сте́зь и поги́бели и ходи́хомъ стези́ непрохо́дны, пути́ же Госпо́дня не разумѣ́хомъ.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Пріиди́те, честну́ю главу́, отсѣ́ченную мече́мъ, Крести́телеву, вѣ́рніи, дне́сь почти́мъ, во обрѣ́теніи ея́ срѣта́юще пѣ́сньми, чту́ще отъ любве́, благода́ть пролива́ющую исцѣле́ній на́мъ, ю́же буесло́вящій [1] Иродъ дре́вле предъотсѣче́, неи́стовствомъ Иродіа́дѣ спле́тся.

Сти́хъ: Честна́ предъ Го́сподемъ сме́рть преподо́бныхъ Его́.

Якоже отъ руды́ зла́то, та́ко отъ земли́ Предте́чева глава́ просіява́етъ, въ сосу́дѣ скуде́льнѣмъ свѣтя́щися и вѣща́ющи я́сно, Иродово облича́ющи прелюбодѣ́йство и убíйство, зарю́ же просвѣща́ющую помышле́нія на́ша. Юже облобыза́юще, вѣ́рніи, дне́сь почти́мъ пѣ́сньми, я́ко о на́съ Бо́гу моля́щуюся.

Сти́хъ: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится.

Дре́вле, я́коже Боже́ственное сокро́вище въ сосу́дѣ, сокрове́нная глава́ Крести́телева въ земли́ дне́сь конце́мъ открыва́ется, я́коже бога́тство пролива́ющая исто́чники исцѣле́ній, болѣ́зни исцѣля́ющая, ду́ши просвѣща́ющая. Тѣ́мже, утѣше́нія вся́каго благода́ть воспріе́млюще, пѣ́сньми сію́ благоговѣ́йно похва́лимъ.

Сла́ва, гла́съ 2:

Якоже Боже́ственныхъ умышле́ній всечестна́я ра́ка, Неизрече́ннаго Существа́ я́сно прови́дѣвшая та́инство, глава́ твоя́, я́ко отъ ложе́снъ ма́тернихъ, отъ сокро́вищъ земны́хъ дне́сь возсія́, Іоа́нне всехва́льне, и облагово́ни всю́ подсо́лнечную, освяще́нія пролива́ющая мѵ́ро, и мы́сленно проповѣ́дающая пу́ть покая́нія, и Спа́су всѣ́хъ моля́щаяся о душа́хъ на́шихъ.

И ны́нѣ, богоро́диченъ:

[О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.]

Тропа́рь, гла́съ 4:

Отъ земли́ возсія́вши, Предте́чева глава́ лучи́ испуща́етъ нетлѣ́нія вѣ́рнымъ исцѣле́ній, свы́ше собира́етъ мно́жество а́нгелъ, до́лѣ же созыва́етъ человѣ́ческій ро́дъ, единогла́сную возсыла́ти сла́ву Христу́ Бо́гу.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь, два́жды. Сла́ва, и ны́нѣ, богоро́диченъ воскре́сенъ, по гла́су тропаря́.

По 1-й стихоло́гіи сѣда́ленъ, гла́съ 4. Подо́бенъ: Ско́ро предвари́.

Яко Боже́ственное сокро́вище, сокрове́но въ земли́, Христо́съ откры́ главу́ твою́ на́мъ, проро́че и Предте́че: вси́ у́бо, соше́дшеся въ сея́ обрѣ́теніе, пѣ́сньми богогла́сными Спа́са воспои́мъ, спаса́ющаго на́шу жи́знь моли́твами твои́ми. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́вихомся отъ ле́сти діа́воли и вся́кія бѣды́, Богоро́дице Влады́чице, и вѣ́рно вопіе́мъ: поми́луй ста́до Твое́, еди́на Всепѣ́тая.

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Изда́вшися, я́ко зла́то отъ руды́, свяще́нная твоя́ глава́ пресла́вно отъ незаходи́мыхъ нѣ́дръ земны́хъ, обогати́ вѣ́рныхъ вся́ мы́сли разумѣ́ніемъ Боже́ственнымъ, — ны́нѣ пока́йтеся, — вопію́щи обы́чно. Ейже покланя́ющеся, Предте́че, Христа́ велегла́сно вѣ́рою сла́вимъ. [Два́жды.]

Сла́ва, и ны́нѣ, богоро́диченъ:

Никогда́же премолчи́мъ, Богоро́дице, благода́рно пѣ́ти отъ души́ Твоя́ ми́лости, Влады́чице, раби́ Твои́, зову́ще и глаго́люще: Пресвята́я Дѣ́во, предвари́ и изба́ви отъ вра́гъ ви́димыхъ и неви́димыхъ и вся́каго преще́нія, Ты́ бо еси́ на́мъ заступле́ніе.

[Велича́ніе:

Велича́емъ тя́, Крести́телю Спа́совъ Іоа́нне, и почита́емъ вси́ честны́я твоея́ главы́ обрѣ́теніе.

Псало́мъ избра́нный: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́...]

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Крести́телева глава́ кры́яшеся, я́ко би́серъ, въ земли́ вла́жнѣй и, я́ко свѣ́щникъ богосвѣ́телъ, укра́шена, озаря́етъ, чудотворя́щи, мíръ ве́сь: я́ко у́тро, возсія́ всеблаголѣ́пно Со́лнцу Предте́ча и невече́рнимъ свѣ́томъ возвѣща́я па́ки на́мъ, — се́, — взыва́я, — Агнецъ Бо́жій! [Два́жды.]

Сла́ва, и ны́нѣ, богоро́диченъ:

Благодари́мъ Тя́ при́сно, Богоро́дице, и велича́емъ, Чи́стая, и покланя́емся, воспѣва́юще Рождество́ Твое́, Благода́тная, вопію́ще непреста́нно: спаси́ ны, Дѣ́во Всеми́лостивая, я́ко Блага́я, и де́моновъ исхити́ словоположе́нія стра́шнаго въ ча́съ испыта́нія, да не посрами́мся, раби́ Твои́.

Степе́нна, 1-й антифо́нъ 4-го гла́са. Проки́менъ, гла́съ 4: Та́мо возращу́ ро́гъ Дави́ду,* угото́вахъ свѣти́льникъ пома́занному Моему́. Сти́хъ: Помяни́, Го́споди, Дави́да и всю́ кро́тость его́. Вся́кое дыха́ніе... Ева́нгеліе Луки́, зача́ло 31.

По 50-мъ псалмѣ́ стихи́ра самогла́сна, гла́съ 6:

Яже пе́рвѣе на блю́дѣ, Иродову беззако́нную нечистоту́ обличи́вшая, покая́ніе же всѣ́мъ проповѣ́давшая вѣ́рнымъ, честна́я глава́ Крести́теля Христо́ва, отъ сокро́вищъ земны́хъ я́вльшаяся, предлежи́тъ вѣ́рно притека́ющимъ къ не́й, и прикаса́ющимся со стра́хомъ, и покланя́ющимся любо́вію душе́вною, да́рующая разрѣше́ніе прегрѣше́ній, проше́ніемъ подае́тъ потре́бная и ве́лію ми́лость.

Кано́нъ Богоро́дицы со ирмосо́мъ на 6 и Предте́чи на 8, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Гряди́те, благохва́льнымъ язы́комъ и всеси́льнымъ пле́щуще ду́хомъ, изъ усте́нъ нечи́стыхъ, гла́съ Сло́ва — Предте́чу пѣ́сньми духо́вными, вѣ́рніи, просла́вимъ.

Ми́рнымъ устрое́ніемъ утиша́ется и безмѣ́рными мно́жествы Христо́ва Це́рковь благостоя́тельнѣ упаса́ется, тебѣ́ лѣ́тнюю пѣ́снь вопію́щи, Предте́че.

Юже отъ Бо́га да́руемую я́ко сокро́вище на́мъ неотъе́млемо, богоно́сную главу́ Предте́чеву, вси́ пѣ́сньми досто́йно, соше́дшеся, вѣ́рніи, почти́мъ.

Богоро́диченъ: Твоего́ пріе́мши Содѣ́теля, я́ко Са́мъ восхотѣ́, изъ безсѣ́меннаго Твоего́ чре́ва па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

Катава́сія: Отве́рзу уста́ моя́...

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Утро́ба непло́дна прозябе́ніе тя́ изнесе́ боже́ственно, я́же отъ язы́къ це́рковь, сла́вна невѣстово́дца, Христу́, и́стинному Бо́гу и Жениху́, сію́ обруча́юща.

Твоего́ боговѣща́ннаго гла́са, Предте́че Іоа́нне, ниже́ мече́мъ удержа́ окая́нная прелюбодѣ́йца: боже́ственную бо твою́ на́мъ явля́еши главу́ отъ земли́.

Торжеству́ющій свѣ́тло, жела́ющь тя́ гра́дъ учрежда́емь быва́етъ, я́ко бога́тство обрѣ́тшь та́йное и исто́чникъ неоску́денъ исцѣле́ній, Предте́че, главу́ твою́.

Богоро́диченъ: Боже́ственнаго Рождества́ Твоего́, Чи́стая, вся́кій естества́ чи́нъ прехо́дитъ чу́до: Бо́га бо преесте́ственно зачала́ еси́ во чре́вѣ и, ро́ждши, пребыва́еши при́сно Дѣ́ва.

Сѣда́ленъ, гла́съ 8. Подо́бенъ: Повелѣ́нное та́йно.

Яко въ храни́лищи сокро́вище вложена́ Предте́чева глава́ храня́шеся, въ водоно́сѣ кры́ющася, гла́съ Сло́ва; я́ко пшени́ца покрове́на, во глубинѣ́ земли́ изцвѣте́, плодонося́щи боже́ственную жи́знь. Тоя́ вси́ почита́емъ обрѣ́теніе, Христа́ сла́вяще, пода́вшаго то́й благода́ть источи́ти исцѣле́нія. [Два́жды.]

Сла́ва, и ны́нѣ, богоро́диченъ:

Повелѣ́нное та́йно, пріе́мь въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́, вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ пріе́мша ра́бій зра́къ, ужаса́юся зва́ти Тебѣ́: ра́дуйся Невѣ́сто неневѣ́стная.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Ве́тхаго бы́лъ еси́ печа́ть, всебога́те, я́вѣ Завѣ́та, и проро́ковъ коне́цъ извѣсти́лъ еси́, и чертогокраси́тель же боже́ственный Но́ваго яви́лся еси́, Предте́че.

Власяны́ми ру́бы обы́чно, Предте́че, честну́ю претерпѣ́лъ еси́ и сла́вную главу́ твою́ покры́ти ца́рскою багряни́цею, я́ко ри́зою, ра́дуяся.

Боже́ственную главу́ твою́ отбѣже́ніемъ ни́щій и скита́яйся твои́ми боже́ственными наставле́ньми, я́коже незави́стно бога́тство, Іоа́нне, показу́етъ.

Заре́ю, Предте́че, Боже́ственнаго Ду́ха чту́щій тя́ гра́дъ всегда́ моли́ уясни́ти и боже́ственнѣй па́мяти твое́й безпло́тнымъ сра́доватися.

Богоро́диченъ: Ме́ртва мя́ показа́ са́да вкуше́ніе, живо́тное же дре́во, изъ Тебе́ я́вльшееся, Пречи́стая, воздви́же и ра́йскія пи́щи наслѣ́дника мя́ сотвори́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Не бы́лъ еси́ тро́сть, Крести́телю, искуси́тельными злополуче́нія вѣ́тры всегда́ коле́блемь, сто́лпъ же боже́ственныхъ люде́й непоколеби́мь, си́лою бо Иліино́ю яви́лся еси́ и Ду́ха.

Иже Божество́ отмета́я, и умаля́я сла́ву отъ тебе́ кре́щшагося Христа́, и Боже́ственную благода́ть твою́ утаева́я, пра́ведно отъ огра́дъ Боже́ственныхъ возбраня́емь е́сть.

Отве́рзлъ еси́ незави́стнаго Боже́ственнаго исто́чника две́рь пою́щимъ тя́ любо́вію, сла́вный Предте́че, Боже́ственныя благода́ти источа́ющія во́ды и струи́ исцѣле́ній, всѣ́хъ веселя́щія.

Богоро́диченъ: Нося́щи добро́ту мы́сленную краснѣ́йшія души́ Твоея́, невѣ́ста Бо́жія была́ еси́, запеча́тствованна дѣ́вствомъ, Чи́стая, и заре́ю чистоты́ мíръ просвѣща́ющи.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Проро́ка тя́ рече́ Истина-Христо́съ, и проро́ковъ превы́шша, Крести́теля же и Предте́чу Жи́зни: Того́ бо узрѣ́лъ еси́, Его́же зако́нъ и проро́цы провозвѣсти́ша.

Не терпя́ше кры́тися чуде́съ исто́чникъ, сокро́вище благода́ти, сла́вная глава́ твоя́, Крести́телю, проро́че и Предте́че, но, я́вльшися, пролива́етъ исцѣле́ній исто́чники.

Всебога́тно похвале́ніе, и украше́ніе свѣ́тло, и щи́тъ спаси́теленъ христолю́бный се́й и благосла́вный предлага́етъ гра́дъ тво́й, честну́ю и боже́ственную твою́ главу́, Предте́че.

Богоро́диченъ: Вели́кій прописа́ во проро́цѣхъ Моисе́й Тя́, киво́тъ, и трапе́зу, и свѣ́щникъ, и ста́мну обра́знѣ, назна́менуя воплоще́ніе, е́же изъ Тебе́, Вы́шняго, Ма́ти Дѣ́во.

Конда́къ, гла́съ 2. Подо́бенъ: Вы́шнихъ ища́.

Проро́че Бо́жій и Предте́че благода́ти, главу́ твою́, я́ко шипо́къ свяще́ннѣйшій, отъ земли́ обрѣ́тше, исцѣле́нія всегда́ пріе́млемъ, и́бо па́ки, я́коже пре́жде, въ мíрѣ проповѣ́дуеши покая́ніе.

Икосъ:

Отъ Го́спода свидѣ́тельство пріе́мъ, Іоа́нне, па́че всѣ́хъ человѣ́къ вы́шшій бы́лъ еси́, отону́дуже похвалы́ пѣ́сней принести́ тебѣ́ ужаса́юся, но, любо́вію понужде́нъ, пѣ́снь нача́ти дерзну́хъ. Тѣ́мже да не унедосто́иши споспѣ́шникъ мнѣ́ бы́ти, всехва́льне, да возмогу́ вѣнча́ти тво́й ве́рхъ святы́й, требога́те, и́бо ты́ въ мíрѣ проповѣ́дуеши покая́ніе.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Дѣ́вы прозябе́ніе, тя́ па́че всѣ́хъ рече́ въ рожде́нныхъ жена́ми, я́ко бо безпло́тенъ и равноа́нгеленъ на земли́ Тому́ пожи́лъ еси́, вопія́: благослове́нъ еси́, Бо́же оте́цъ на́шихъ.

Во утро́бѣ дѣ́вственнѣй Все́льшася позна́лъ еси́ изъ непло́дна чре́ва и, употреби́въ ма́терня, Предте́че, гла́са, игра́я взыва́лъ еси́ Ему́: благослове́нъ еси́, Бо́же оте́цъ на́шихъ.

Отъ пусты́ни, Пресвяты́мъ Ду́хомъ науче́нъ, яви́лся еси́, я́коже у́тро свѣтоно́сно, а́нгелъ Свѣ́та, на́съ науча́я вопи́ти: благослове́нъ еси́, Бо́же оте́цъ на́шихъ.

Ублажи́ся я́ко вои́стинну во градѣ́хъ се́й ны́нѣ, приснопа́мятне, стяжа́вый тя́ гра́дъ сокро́вище, Предте́че Христо́въ. Тѣ́мже, пра́зднуя, вопіе́тъ: благослове́нъ еси́, Бо́же оте́цъ на́шихъ.

Богоро́диченъ: Тобо́ю, Ма́ти Дѣ́во, Свѣ́тъ возсія́ все́й вселе́ннѣй свѣ́тлый: Ты́ бо Зижди́теля всѣ́хъ родила́ еси́, Бо́га. У Него́же испроси́, Пречи́стая, на́мъ низпосла́ти, вѣ́рнымъ, ве́лію ми́лость.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

По́сланъ бы́сть вопію́щаго гла́съ — Предте́ча, запустѣ́вшимъ сердца́мъ, Сы́на Бо́жія вѣ́ру благочести́вую водружа́яй, су́щаго Бо́га, Его́же превозно́симъ во вся́ вѣ́ки.

Угото́вите, — глаго́летъ и ны́нѣ Предте́ча, — Госпо́дню стезю́: Се́й бо святы́ни ра́ди, прише́дъ, со Отце́мъ и Ду́хомъ въ на́ша сердца́ всели́тся во вѣ́ки.

Слу́хомъ у́бо гла́су Роди́телеву, очи́ма же Боже́ственнаго Ду́ха зрѣ́нію, вся́чески же осяза́ніемъ Іоа́ннъ Предте́ча, на Тебѣ́ ру́ку положи́вый, Христе́, богоно́сецъ быва́етъ.

Изъ чре́ва освяти́ся Боже́ственнымъ Ду́хомъ и проро́къ яви́ся, во чре́вѣ носи́мь, ны́нѣ же наслажде́ніе и́же въ нѣ́дрѣхъ тя́ иму́щему гра́ду показа́ся, проро́че.

Богоро́диченъ: Златоза́рный Тя́ свѣ́щникъ предъизобрази́, пріе́мшую неизрече́нно Свѣ́тъ непристу́пный, позна́ніемъ Того́ озаря́ющь вся́ческая, Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Явѣ исполне́нія десяти́цы, Предте́че, за́повѣдей ты́ храни́тель крѣ́покъ бы́въ, прили́чнѣ отъ Христа́ почте́нъ бы́лъ еси́ дарова́ній десяти́цею. Тѣ́мже тя́, Ду́ха таи́нника и дру́га Сло́ву, вѣ́дуще, ублажа́емъ.

Христо́въ проро́къ же и апо́столъ, а́нгелъ же и Предте́ча, Боже́ственнаго воплоще́нія Крести́тель, и свяще́нникъ, и му́ченикъ вѣ́ренъ, проповѣ́дникъ же су́щимъ во а́дѣ ты́ бы́лъ еси́, и дѣ́вствующимъ пра́вило, и пусты́ни прозябе́ніе.

Души́ невѣ́ріе облича́ется священнодѣ́йственныя руки́ умерщвле́нныя чудесе́мъ, прозя́бшей же па́ки вѣ́рѣ и твое́й я́вльшейся главѣ́, блаже́нне, поже́ртая дла́нь обновля́ется.

Твое́ явле́ніе провозвѣща́юще зри́телю, возвѣща́ху а́нгельстіи чи́ни нело́жно, Гавріи́ла подо́бящеся боже́ственному благовѣ́щенію, е́же пре́жде Рождества́ твоего́ свяще́нный Заха́рія пріе́млетъ.

Богоро́диченъ: Страсте́й исцѣле́нія да почерпа́емъ, въ сла́вный хра́мъ Предте́чевъ притека́юще: въ то́й бо прихо́дятъ а́нгельстіи ли́цы, ду́си же пра́ведныхъ всѣ́хъ, Влады́чица съ Крести́телемъ Іоа́нномъ, исцѣле́нія подава́юще.

Свѣти́ленъ. Подо́бенъ: Ученико́мъ.

Свѣтоявле́нная возсія́ честна́я твоя́ глава́ отъ незаходи́мыхъ нѣ́дръ земны́хъ, Предте́че Іоа́нне, свѣти́льниче Свѣ́та невеще́ственнаго, ея́же обрѣ́теніе любо́вію соверша́юще, мо́лимъ тя́ лю́тыхъ обрѣсти́ разрѣше́ніе и вре́мя удо́бнѣ соверши́ти воздержа́нія моли́твами твои́ми, всехва́льне, Крести́телю Спа́совъ. [Два́жды.]

Сла́ва, и ны́нѣ, богоро́диченъ:

Утѣша́ется, Всечи́стая, вѣ́рныхъ богому́дрое собра́ніе служа́щее и вѣ́рно воспѣва́ющее Тя́, Богоро́дицу и́стинно. Тѣ́мже моли́твами Твои́ми поста́ тече́ніе да́ждь на́мъ соверши́ти боголѣ́пно, и Кресту́ Честно́му поклони́тися, и Страсте́мъ спаси́тельнымъ Сы́на и Бо́га Твоего́.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Отве́рзе преддве́рія воздержа́нія* всечестна́я глава́ твоя́, всехва́льне,* и пи́щу предложи́ сладча́йшую всѣ́мъ* Боже́ственныхъ дарова́ній,* и́хже причаща́ющеся вѣ́рно,* поста́ те́рпкое услажда́емъ,* и вѣ́рою восхваля́емъ тя́,* и вопіе́мъ Христу́ Бо́гу:* Іису́се Всеси́льне,* Спа́се ду́шъ на́шихъ. [Два́жды.]

Мѵ́ра, я́коже во́ды,* глава́ иска́пающи Предте́чева приснотеку́щая* и, на трапе́зѣ дне́сь возло́жшися* та́йнѣй и Боже́ственнѣй,* благоуха́етъ мы́сленнѣ,* и го́ресть отгоня́етъ скорбе́й,* и весе́лія вся́ исполня́етъ любо́вію зову́щія:* Іису́се Всеси́льне,* Спа́се ду́шъ на́шихъ.

Посѣче́ глава́ твоя́,* я́коже ме́чь острѣ́йшій,* главы́ беззако́ннующихъ вра́гъ* и исцѣле́нія источи́ въ благозако́ніи су́щимъ всѣ́мъ* Боже́ственныхъ дарова́ній.* И сего́ ра́ди тя́ вѣ́рно восхваля́емъ,* дру́га и Предте́чу, Іоа́нне, Зижди́телева,* и вопіе́мъ Ему́ прилѣ́жно:* Іису́се Всеси́льне,* Спа́се ду́шъ на́шихъ.

Сла́ва, гла́съ 6:

Всечестну́ю главу́ Крести́теля Твоего́, Го́споди, я́вльшуюся дне́сь отъ земли́, со гла́сомъ хвале́нія пріе́мшіи вѣ́рно, въ моли́тву, Человѣколю́бче, грѣ́шніи раби́ Твои́ приводя́ще, мо́лимся, Тоя́ ра́ди улучи́ти въ де́нь суда́ отъ Тебе́ очище́ніе и ве́лію ми́лость.

И ны́нѣ, богоро́диченъ:

Благолюби́вый Бо́же и Спа́се, рабы́ Твоя́ спаса́й отъ вся́каго обстоя́нія лю́таго моли́твами Предте́чи Твоего́ и всѣ́хъ святы́хъ и Ма́тере Твоея́ мольба́ми.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Кори́нѳяномъ, зача́ло 176. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Истина отъ земли́ возсія́, и пра́вда съ небесе́ прини́че. Ева́нгеліе отъ Матѳе́я, зача́ло 40. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Примѣчаніе:
[1] Въ славянскихъ минеяхъ стоитъ: бляди́вый.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 178 об. – 185.

/ Къ оглавленію раздѣла /


Наверхъ / Къ титульной страницѣ

0