Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 23-й де́нь.
Свята́го священному́ченика Полика́рпа, епи́скопа Сми́рнскаго.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Христо́ва дѣ́ланія* розга́ богонасажде́нная,* слове́сныя боже́ственныя* предлага́я гре́зны,* яви́лся еси́, богоблаже́нне,* отъ ни́хже честну́ю почерпа́емъ сла́дость вѣ́рно* и се́рдцемъ во вселе́нную поуче́нія твоя́ прино́симъ.

Боже́ственнымъ сія́ніемъ озаря́емь,* огне́мъ веще́ственнымъ снѣда́емо тѣ́ло,* къ невеще́ственнѣй преста́вился еси́, о́тче, зари́,* и да́ждь разрѣше́ніе моли́твами твои́ми,* страсте́й мра́чную но́щь просвѣща́я,* му́дре, ду́шъ на́шихъ.

Сла́ва, и ны́нѣ, богоро́диченъ. Подо́бенъ то́йже:

Прегрѣше́ній пучи́ною обурева́емь,* къ ти́хому приста́нищу прибѣ́гъ —* пречи́стѣй моли́твѣ Твое́й,* Богороди́тельнице, взыва́ю Ти́:* спаси́ мя,* крѣ́пкую Твою́ десни́цу просте́рши рабу́ Твоему́,* Всенепоро́чная.

Крестобогоро́диченъ. Подо́бенъ то́йже:

Воздви́жена я́ко ви́дѣ на Крестѣ́ Агнца* Непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* Ка́ко, содержа́й вся́ческая го́рстію,* на дре́вѣ пригвожда́ешися пло́тію?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ. Сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Полика́рпе, моли́ Христа́ Бо́га спасти́ся душа́мъ на́шимъ.


НА УТРЕНИ,
Кано́нъ, его́же краегране́сіе: Боже́ственнаго Полика́рпа въ пѣ́снехъ восхваля́ю. Ѳеофа́ново. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Христо́вымъ свѣтоли́тіемъ сія́я и Того́ просвѣще́ніемъ, о́тче, наполня́емь, омраче́нную ду́шу мою́ озари́, богому́дре, моли́твами твои́ми.

Просвѣще́ніе спаси́тельнаго проповѣ́данія, чи́стое се́рдце твое́, я́коже зерца́ло нескве́рно, о́тче, облиста́въ зари́, всѣ́мъ просія́.

Зако́на но́ваго столпописа́ніе ты́ бы́лъ еси́, напи́сано имѣ́я, о́тче, не черни́ломъ, но Ду́хомъ Боже́ственнымъ благода́ти боже́ственное Ева́нгеліе.

Богоро́диченъ: Бо́га, изъ Тебе́ воплоще́нна, вѣ́дуще, безъ хотѣ́нія плотска́го, су́ща пре́жде тва́ри и пре́жде всѣ́хъ вѣ́къ, вои́стинну Богоро́дицу, Тя́ исповѣ́дуемъ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Ма́слина, псало́мски рещи́, плодови́та бы́лъ еси́, Полика́рпе богоявле́нне, въ дому́ Го́спода твоего́, весе́ліе нося́ проповѣ́данія.

Напра́вилъ еси́ усе́рдно, богоблаже́нне, у́мъ тво́й повелѣ́ніемъ Спа́совымъ, по досто́инству бы́лъ еси́ Того́ Це́ркве па́стырь изря́денъ.

Всецѣ́лую тебе́ сама́го Христу́ прине́слъ еси́ я́ко жи́ву же́ртву муче́ніемъ, со́вѣсти свидѣ́тельствомъ, предпострада́въ, всеблаже́нне, по́стничествомъ.

Богоро́диченъ: Умерщвле́нія на́шего пе́рсть оттрясла́ еси́, ро́ждши и́стинно безсме́ртіе, и оде́жды на́мъ истка́ла еси́ нетлѣ́нія, Дѣ́во, Рождество́мъ Твои́мъ.

Сѣда́ленъ, гла́съ 8. Подо́бенъ: Прему́дрости.

Благода́тный гро́здъ въ души́ вои́стинну воздѣ́лавъ, о́тче му́дре, я́ко вино́, источи́лъ еси́ вѣ́ры сло́во, веселя́щее всѣ́хъ вѣ́рныхъ мы́сли, и чуде́съ яви́лся еси́ непроходи́ма пучи́на; тѣ́мже и му́чениковъ яви́лся еси́ удобре́ніе, огне́мъ скончава́емь и свѣ́та сподобля́емь присносу́щнаго, Полика́рпе. Моли́ Христа́ Бо́га прегрѣше́ній оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Помышле́ньми поползну́вся лука́выми, во глубину́ впадо́хъ грѣхо́вную и, стеня́, взыва́ю Ти́ отъ се́рдца, Пречи́стая: на мнѣ́ удиви́ бога́тую ми́лость, и Твоего́ милосе́рдія неизмѣ́рную пучи́ну, и щедро́тъ Твои́хъ неисче́тное бога́тство и да́ждь ми́ покая́ніе и прегрѣше́ній проще́ніе, да любо́вію взыва́ю Тебѣ́: моли́ Христа́ Бо́га прегрѣше́ній оставле́ніе дарова́ти ми́, Тя́ бо наде́жду имѣ́ю, ра́бъ Тво́й.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ боже́ственныя Стра́сти Твоя́.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Многопло́дный добродѣ́телей добропло́дный са́дъ Влады́цѣ яви́лся еси́, о́тче Полика́рпе.

Всесожже́ніе соверше́нно и чи́ста же́ртва прине́слся еси Спа́су всѣ́хъ, о́тче Полика́рпе.

Пѣсносло́вимъ, сла́вне, души́ твоея́ крѣ́пкое терпѣ́ніе и твои́хъ по́двигъ до́блесть.

Богоро́диченъ: Просвѣти́, Чи́стая, омраче́нную ду́шу мою́ свѣ́томъ Твои́мъ, Яже Свѣ́тъ ро́ждшая Присносу́щный.

Пѣ́снь 5.

Ирмо́съ: Свѣ́та Пода́телю, и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Заре́ю духо́вною просвѣща́емь, у́мъ, преподо́бне, обра́зно огне́мъ опаля́емь, я́вѣ научи́лся еси́ огне́мъ, богому́дре, твоего́ сконча́нія.

Струю́ прія́лъ еси́ жи́зни, я́ко отъ пото́ка пи́щи, прему́дре, ученико́мъ возлю́бленнымъ науче́нъ бы́въ, поче́рпшимъ прему́дрости бе́здну.

Бога́тство, и сла́ву свѣ́тлу, и долготу́ житія́, и жи́знь нетлѣ́нну и́стинная му́дрость — Христо́съ, тебѣ́ дарова́, о́тче, я́ко вельми́ Того́ возлю́бльшему.

Богоро́диченъ: Ве́тхій де́ньми, я́коже на руно́ до́ждь, Пречи́стая, въ Твое́ чре́во сни́де освяще́нное, и но́въ яви́ся Ада́мъ, Человѣколю́бецъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Умертви́вся, богоглаго́ливе, мíру всему́, Еди́ному же Христу́ живы́й пребыва́я, и къ Нему́ преше́лъ еси́, жи́зненное нетлѣ́ніе пріе́мля.

Благообра́зно ходя́, блаже́нне, ча́до же свѣ́та и ми́ра явля́яся, нощна́го пе́рвенца и бори́теля позна́лъ еси́, Маркіо́на.

Науча́еми, о́тче, словесы́ твои́ми, вся́ку побѣжда́емъ скве́рную е́ресь и лука́вая со́нмища, два́ вводя́щихъ нача́ла злочести́выхъ.

Богоро́диченъ: Грѣ́хъ мíра взе́млющаго, Чи́стаго Агнца заче́нши, Всенепоро́чная, согрѣше́ній проще́ніе моли́ дарова́ти рабо́мъ Твои́мъ.

Конда́къ, гла́съ 1. Подо́бенъ: Ли́къ а́нгельскій.

Плоды́ слове́сныя Го́сподеви принося́, Полика́рпе му́дре, добродѣ́телей же́ртвы, тѣ́мже и отъ Бо́га досто́инъ іера́рхъ просла́вился еси́. Сего́ ра́ди дне́сь, просвѣ́щшеся твои́ми словесы́, воспѣва́емъ твою́ достохва́льную па́мять, сла́вяще Го́спода.

Икосъ:

Му́дрости благосты́ню поче́рпъ, отъ тоя́, о́тче, напо́лнилъ еси́ богоразу́мія ста́до твое́ и всесвята́го и неизрече́ннаго Божества́ Трисо́лнечное облиста́лъ еси́, Отца́ нерожде́ніе, Сы́на же рожде́ніе и исхожде́ніе Ду́ха, Еди́но Божество́, Еди́ну Сла́ву я́сно научи́лъ еси́ и и́дольское безбо́жіе изъ ко́рене посѣ́клъ еси́, плоды́ же зрѣ́лы — ду́ши вѣ́рующихъ — приводя́ къ Не́й, сла́вне, въ Ню́же крести́хомся, въ Ню́же и вѣ́руемъ, сла́вяще Го́спода.

Пѣ́снь 7.

Ирмо́съ: Образу злато́му, на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси́, Бо́же оте́цъ на́шихъ.

Тве́рдымъ по́мысломъ горя́щій пла́мень премину́лъ еси́, сла́вне, я́ко тріе́ о́троцы пе́щь, огне́мъ невеще́ственнымъ ороша́еми, посреди́ же огня́ взыва́я, неопали́мь пребы́лъ еси́: благослове́нъ еси́, Бо́же оте́цъ на́шихъ.

Блаже́нъ еси́, и добро́ тебѣ́ е́сть, ны́нѣ все́льшемуся, идѣ́же пра́ведныхъ селе́нія, идѣ́же му́ченикъ во́инства, идѣ́же му́дрыхъ апо́столовъ ли́цы взыва́ютъ: благослове́нъ еси́, Бо́же оте́цъ на́шихъ.

Непло́дныя пе́рвѣе, многопло́дны Христу́ ду́ши приве́лъ еси́, воздѣ́ланіемъ духо́внымъ уравни́въ, и благокла́сно си́мъ предлага́я сѣ́мя, и наказу́я пою́щія съ тобо́ю: благослове́нъ еси́, Бо́же оте́цъ на́шихъ.

Богоро́диченъ: Ты́ еди́на Бо́гу, вся́ческая му́дрѣ содѣ́лавшему, Ма́ти яви́лася еси́ Неискусобра́чная, Дѣ́во Ма́ти Всечи́стая. Тѣ́мже благоче́стно Тебѣ́, Всенепоро́чная, взыва́юще, пое́мъ: благослове́на, Яже Бо́га пло́тію ро́ждшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго, и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Священнодѣ́йствовавъ, сла́вне, Христо́ву та́йную слу́жбу, слове́сное овча́ — себе́ приве́лъ еси́ Бо́гу, же́ртву прія́тну и благоуго́дну, всепло́дну, Полика́рпе треблаже́нне.

Юношское въ сѣди́нѣ и глубоча́йшее му́жество показа́лъ еси́: кре́стною си́лою воздви́глъ еси́ себе́ къ боже́ственнымъ подвиго́мъ, богому́дре, священному́чениковъ Христо́выхъ сла́ва, преподо́бне.

Утвержда́емь кресто́мъ, и святи́тельскою красото́ю досто́йно облече́нъ, о́тче, въ Це́рковь Бо́жію вше́лъ еси́ твое́ю кро́вію Пастыренача́льнику Христу́ яви́тися.

За Христа́ закла́вся, я́коже знамени́тъ ове́нъ, священноявле́нне, подо́бникъ яви́лся еси́ страда́ніемъ Его́, и сла́вы бы́лъ еси́ соприча́стникъ, и Ца́рствія Его́ снаслѣ́дникъ.

Богоро́диченъ: Свѣтови́дѣнъ сто́лпъ о́гненъ и о́блакъ свѣ́телъ, предводя́щь, къ небе́сному наслѣ́дію, Богороди́тельнице Чи́стая, бу́ди ми́, Дѣ́во Всенепоро́чная, въ пусты́ни житія́ заблужде́нному.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Свѣтоно́сная твоя́, о́тче, возсія́вши па́мять, просвѣща́етъ ду́ши благоче́стно сію́ соверша́ющихъ, чу́дне, и прича́стники Боже́ственнаго свѣтоявле́нія сія́ соверша́етъ. Юже досто́йно, богому́дре, пѣ́сньми ублажа́емъ.

Съ вы́шними ли́ки святы́хъ а́нгелъ престо́лу Влады́чнему предстоя́, Сего́ моли́ дости́гнути на́мъ спаси́тельную Стра́сть и Того́ Воскресе́ніе свѣ́тло, добродѣ́телей многообра́зныя ви́ды соверша́ющія.

Вѣнцено́сна тя́, о́тче, и по́чести побѣ́ду пріи́мша Боже́ственныя десни́цы, и по́двиги сконча́вша, и свѣ́та исполня́ема, вѣ́рующе, Полика́рпе му́дре, моли́твенника Христу́ тя́ усе́рдно предлага́емъ.

Богоро́диченъ: Яко Богоро́дицу Тя́, Дѣ́во, и Ма́терь Сло́ва, и Хода́таицу су́щую на́мъ присносу́щныя и Боже́ственныя жи́зни, я́ко пра́вды Со́лнце возсія́вшую на́мъ, вѣ́рніи, единому́дренно пѣ́сньми велича́емъ.

Свѣти́ленъ. Подо́бенъ: Посѣти́лъ ны́.

Богосло́вному ученику́ учени́къ бы́въ, Полика́рпе, мно́гъ пло́дъ Го́споду вѣ́рныхъ приве́лъ еси́, себе́ же самого́ всепло́діе прине́слъ еси́ о твое́мъ ста́дѣ, и ны́нѣ мо́лися за вся́ ны.

Богоро́диченъ:

Щедро́ты Твоя́, Бо́же, на лю́ди и ста́до Твое́ низпосли́ моли́твами Пречи́стыя Твоея́ Ма́тере и всѣ́хъ святы́хъ Твои́хъ и на́мъ всѣ́мъ да́руй вели́кую Твою́ ми́лость.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 174 об. – 178.

/ Къ оглавленію раздѣла /


Наверхъ / Къ титульной страницѣ

0