Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 21-й де́нь.
Преподо́бнаго отца́ на́шего Тимоѳе́я, и́же въ Симво́лѣхъ, и и́же во святы́хъ отца́ на́шего Евста́ѳія, архіепи́скопа Антіохíйскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Отче богому́дре Тимоѳе́е,* Авраа́му подо́бникъ нело́женъ бы́лъ еси́,* исцѣля́я всю́ду* къ тебѣ́ прибѣга́ющія.* Іовлеву стяжа́лъ еси́ въ болѣ́знехъ крѣ́пость,* Дави́дову кро́тость имѣ́я,* житіе́ равноа́нгельно на земли́ пожи́лъ еси́,* жела́ніе получи́лъ еси́ коне́чное,* о на́съ моля́ся.

Отче богому́дре Тимоѳе́е,* цѣлому́дрія о́бразъ,* воздержа́нія подписа́тель,* благоче́стія зра́къ* и исто́чникъ умиле́нія,* правосла́вія утвержде́ніе непоколеби́мо,* исцѣле́ній струя́ присноте́чна,* со́лнце незаходи́мо,* ча́до Боже́ственныя благода́ти* и мона́шествующихъ яви́лся еси́ удобре́ніе, прече́стне.

Ины стихи́ры святи́телю, гла́съ то́йже. Подо́бенъ: Что́ вы нарече́мъ.

Имѣ́я житіе́ небе́сно,* отъ Бо́га свяще́нствовати положе́нъ бы́лъ еси́ вои́стинну* и приноси́лъ еси́ Ему́ слу́жбы умо́мъ чи́стымъ.* Бѣды́ претерпѣ́лъ еси́, блаже́нне, и болѣ́зни,* проповѣ́данія ра́ди Боже́ственнаго* и тве́рдыя и́стины,* ю́же твои́ми словесы́ утверди́лъ еси́,* безу́мныя облича́я я́вственно.

Сло́вомъ свяще́нныхъ твои́хъ тече́ній* запали́лъ еси́ я́вѣ хвра́стіе* Арія злочести́ваго хуле́нія,* Отцу́ невмѣща́юща Сы́ну* естество́мъ именова́тися равноче́стну,* всесвяще́нне Евста́ѳіе,* и сердца́ просвѣти́лъ еси́,* и и́стиною удержа́лъ еси́* вѣ́рою творя́щихъ па́мять твою́.

Помава́я жезло́мъ слове́съ твои́хъ,* всесвяще́нный па́стырю,* ста́до Бо́жіе слове́сное соблю́лъ еси́ тѣ́мъ* отъ во́лкъ вся́кихъ невреди́мо.* Тѣ́мже тя́ до́брый Па́стырь* введе́ во огра́ду небе́сную,* идѣ́же оте́честіи избра́нніи пра́ведныхъ ду́си,* Евста́ѳіе богоно́се преблаже́нне.

Сла́ва, и ны́нѣ, богоро́диченъ, гла́съ 8. Подо́бенъ то́йже:

Кому́ уподо́билася еси́, окая́нная душе́,* къ покая́нію ника́коже возни́чущи* и огня́ не ужаса́ющися,* злы́хъ ожида́ющаго?* Воста́ни, и Еди́ну къ заступле́нію ско́рую призови́, и возопíй:* Дѣ́во Ма́ти, моли́ Твоего́ Сы́на и Бо́га на́шего* изба́вити мя́ отъ сѣ́ти льсти́ваго.

Крестобогоро́диченъ. Подо́бенъ то́йже:

Агница Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше, ма́терски болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


[НА УТРЕНИ,]
Кано́нъ преподо́бнаго, гла́съ 8.

Пѣ́снь 1.

Ирмо́съ: Пои́мъ Го́сподеви, вси́ лю́діе, въ мо́ри Чермнѣ́мъ фарао́на погрузи́вшему, побѣ́дную пѣ́снь пою́ще, я́ко просла́вися.

Тя́, мы́сленную звѣзду́, на высотѣ́, о́тче, воздержа́нія просія́вшую свѣ́тло и вѣ́рныхъ сердца́ озаря́ющу, блаже́нне Тимоѳе́е, восхваля́емъ при́сно.

Имѣ́я къ Бо́гу протяже́нно ума́ твоего́ о́ко, уны́нія со́нъ отъ души́ оттря́слъ еси́, о́тче, и хра́мъ бы́лъ еси́ Боже́ственнаго Ду́ха, и мѣ́сто свяще́нія, Тимоѳе́е.

Лука́ваго ко́зни, смире́ніемъ огражде́нъ, о́тче, преше́лъ еси́ невре́дно, и къ Бо́гу возвы́сился еси́, и Того́ сла́вы вы́ну наслажда́ешися, блаже́нне Тимоѳе́е.

Богоро́диченъ: Несказа́нно Бо́га, Творца́ вся́ческихъ, во чре́вѣ заче́ншую безсѣ́менно и пло́тію я́ко и́стинно ро́ждшую Богоро́дицу, Отрокови́цу, и дѣ́вствующую, пѣ́сньми почита́емъ.

Инъ кано́нъ святи́теля, гла́съ 7.
Пѣ́снь 1.

Ирмо́съ: Поспѣшествова́вшему Бо́гу во Еги́птѣ Моисе́ови, извести́ Изра́иля, Тому́ Еди́ному пои́мъ, я́ко просла́вися.

Иже отце́въ ве́рхъ, я́ко Сло́ва благода́тію одѣ́янна, вели́каго Евста́ѳія пѣ́сньми восхваля́емъ.

Побо́рникъ вѣ́ры я́влься, Христо́ву Це́рковь неплѣне́ну боре́ніемъ е́реси сохрани́лъ еси́, преподо́бне.

Уста́ Словесе́ бы́въ, отры́гнулъ еси́ уче́нія пучи́ну, преподо́бне, въ не́йже потопи́лъ еси́ Аріево злоче́стіе.

Богороди́ченъ: Иже сло́вомъ пло́тію па́че сло́ва ро́ждши Нача́льника Жи́зни, [Того́] непреста́нно моли́ спасти́ся душа́мъ на́шимъ.

Пѣ́снь 3.

Ирмо́съ: Утвержде́ніе мое́, Спа́се, еси́, прибѣ́жище мое́ и си́ла, поколеба́вшееся се́рдце мое́ утверди́ въ стра́сѣ Твое́мъ, я́ко нѣ́сть свя́тъ, я́коже Ты́, Бо́гъ на́шъ.

Ущедря́я всѣ́хъ ми́лованіемъ, и́ный Авраа́мъ бы́лъ еси́, пріе́мля отвсю́ду приходя́щія, о Тимоѳе́е, и тѣ́ми угожда́я всѣ́хъ Бо́гу.

Умертви́лъ еси́, о́тче, я́же на земли́ твоя́ у́ды, я́ко глаго́летъ апо́столъ, жи́зни небе́снѣй прича́стникъ показа́лся еси́, въ не́йже чту́щія тя́ при́сно помина́й.

Восто́ка твои́хъ дѣ́лъ, о́тче, со́лнце бы́лъ еси́ незаходи́мо, луча́ми по́двигъ концы́ озаря́я при́сно и де́моновъ разоря́я омраче́ніе.

Богоро́диченъ: Свята́я Дѣ́во, Царя́ ца́рствующихъ Роди́тельнице, плени́цы прегрѣше́ній мои́хъ расто́ргни и наста́ви къ покая́нія стезя́мъ моли́твами Твои́ми.

Инъ.

Ирмо́съ: Утверди́ся се́рдце мое́ во Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Ты́, ору́жіе извле́къ и́стинное, яви́лся еси́ благоче́стія первонача́льникъ, сопроти́вныя вѣ́рѣ пробо́дъ, Евста́ѳіе.

Ты́, любоболѣ́зненно воздѣ́лавъ Це́рковь серпо́мъ уче́ній твои́хъ, блаже́нне, изъ ко́рене вся́ посѣ́клъ еси́ тѣ́мъ пле́велы.

Старѣ́йшинствуя со сла́вою Истинному, су́щаго вои́стинну нача́льника лжи́ Арія, богоблаже́нне, порази́лъ еси́ ка́меніемъ слове́съ твои́хъ.

Богоро́диченъ: Роди́лся еси́ несказа́нно, яви́лся еси́, я́коже благоволи́лъ еси́, Спа́се на́шъ, и мíръ обнови́лъ еси́, Го́споди.

Сѣда́ленъ, гла́съ 8. Подо́бенъ: Прему́дрости.

Научи́вся Сло́ву, на́съ ра́ди отъ Дѣ́вы ро́ждшемуся безъ истлѣ́нія, Сего́ Божество́ безбо́жнымъ проповѣ́далъ еси́ и мно́ги приве́лъ еси́ Бо́гови вѣ́рою, свяще́нныхъ чуде́съ мно́гими явле́ньми. Тѣ́мже, богоно́се, святу́ю твою́ па́мять творя́ще, благода́тію твое́ю ду́ши просвѣща́емъ и согла́сно вопіе́мъ ти́: богоно́се Тимоѳе́е, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́.

Сла́ва, сѣда́ленъ, гла́съ 3. Подо́бенъ: Красотѣ́ дѣ́вства.

Единосу́щнаго Отцу́ и Ду́ху Сло́ва проповѣ́далъ еси́, о́тче Евста́ѳіе, и безу́мнаго тве́рдо жи́лами уче́ній твои́хъ Арія удави́лъ еси́, ху́лящаго на пра́вое уче́ніе. Тѣ́мже спричте́ся лико́мъ, ра́дуяся, боже́ственныхъ проповѣ́дникъ оте́цъ, съ ни́миже на́съ помина́й.

И ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́, ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Ты́, моли́твами утвержда́яся при́сно, мы́сленныхъ враго́въ лу́ки и стрѣ́лы, я́коже младе́нецъ стрѣля́нія, вмѣни́лъ еси́, о́тче пресла́вне Тимоѳе́е.

Еже къ на́мъ Христо́ва смотре́нія любо́вію покланя́яся, богому́дре, о́бразу, искуше́ніе му́къ претерпѣ́лъ еси́, отъ сего́ отмета́ющихся, о Тимоѳе́е!

Якоже нѣ́кій сто́лпъ, непоколеби́мь бы́лъ еси́, при́сно къ Бо́гу въ славосло́віи ника́коже почива́я, въ си́хъ пребы́лъ еси́ красота́хъ прича́стникъ, о Тимоѳе́е.

Богоро́диченъ: Но́во на земли́ родила́ еси́ Отроча́, е́же отъ Отца́ пре́жде всѣ́хъ вѣ́къ рожде́ннаго нетлѣ́нно, Ма́ти Чи́стая, христіа́нъ исправле́ніе.

Инъ.

Ирмо́съ: Небеса́ покры́ла е́сть добродѣ́тель Твоя́, Го́споди, и Твоего́ хвале́нія вся́ испо́лнилъ еси́. Сла́ва си́лѣ Твое́й, Человѣколю́бче.

Вѣ́ры собира́я побѣди́тельная, стрѣла́ми слове́сными нечести́ваго богому́дренно низложи́лъ еси́, о́тче, Арія.

Слове́съ твои́хъ свѣ́тлость, я́коже мо́лнія, изше́дши, Аріево злосла́віе попаля́етъ, Евста́ѳіе прему́дре.

Огражде́ніе положи́въ словесы́ твои́ми, я́коже виногра́ду Госпо́дню, Це́ркви, преподо́бне.

Богоро́диченъ: Родила́ еси́ пло́тію, Дѣ́во Чи́стая, Иже пре́жде Тебе́ Безнача́льнаго Сло́ва и по Тебѣ́ па́че Сло́ва, изъ Тебе́ вочеловѣ́чшася.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Умо́мъ очище́ннымъ предстоя́ Тро́ицѣ, блаже́нне, и отону́дными заря́ми осія́емь, о́тче, су́щія ны́ во тмѣ́, бѣ́дствующія душе́вными страстьми́, просвѣща́еши всегда́.

Пло́ть воздержа́ніемъ, ду́шу безстра́стіемъ украси́въ, му́дре, Царя́ вся́ческихъ уго́дникъ яви́лся еси́ и отъ Него́ я́вѣ чуде́съ да́ры прія́лъ еси́, Тимоѳе́е.

Не умо́мъ льсти́внымъ, но просты́мъ се́рдцемъ проси́вши, приступи́вшая непло́ды вѣ́рною моли́твою благоча́дна явля́ется отъ непло́дства, пою́щи Христа́ Бо́га на́шего.

Богоро́диченъ: Всели́вся во чре́во Твое́ Живы́й въ вы́шнихъ, Тя́ содѣ́ла небе́съ ши́ршую, Марíе Богоро́дице: Его́же о всѣ́хъ на́съ, я́ко Блага́я, не преста́й моля́щи, Богоневѣ́сто.

Инъ.

Ирмо́съ: Утренюетъ ду́хъ мо́й къ Тебѣ́, Бо́же, зане́ Свѣ́тъ еси́, и Твоя́ повелѣ́нія бы́ша исцѣле́нія рабо́мъ Твои́мъ, Человѣколю́бче.

Мра́къ разори́лъ еси́ ересе́й и возсія́лъ еси́ конце́мъ всѣ́мъ зари́ уче́ній твои́хъ, Евста́ѳіе блаже́нне. [Два́жды.]

Ору́жіи огражда́еми, Евста́ѳіе, уче́ній твои́хъ, настоя́щія Боже́ственнѣй вѣ́рѣ е́реси побѣжда́емъ.

Богоро́диченъ: Дѣ́во, не преста́й моля́щи Бо́га, изъ Тебе́ ро́ждшагося пло́тію, изба́витися рабо́мъ Твои́мъ отъ вся́каго обстоя́нія.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

До́брѣ твое́ соблюда́я дѣ́вства досто́инство во все́й твое́й жи́зни, женѣ́ никогда́же въ лице́ зрѣ́лъ еси́, е́же отъ сего́ вре́дъ до конца́ отрази́въ.

Въ приста́нище мы́сленное устреми́лся еси́, волна́ми сласте́й не омочи́вся, всеблаже́нне Тимоѳе́е, но Ду́ха живоно́сными вѣ́тры до́брѣ преплы́лъ еси́, всесла́вне.

Удали́лся еси́ псало́мски, въ гора́хъ живы́й, въ пусты́няхъ при́сно, му́дре, водворя́яся, до́ндеже вше́лъ еси́ въ Бо́жій гра́дъ небе́сный, Тимоѳе́е блаже́нне.

Богоро́диченъ: На плещу́ херуви́мску неопи́санно Сѣдя́й опи́санно въ Твое́ чре́во всели́ся пло́тію, а не Божество́мъ, и изъ Тебе́ про́йде, спаса́я мя́, Всенепоро́чная.

Инъ.

Ирмо́съ: Іо́на изъ чре́ва а́дова вопія́ше: возведи́ отъ тли́ живо́тъ мо́й. Мы́ же Тебѣ́ вопіе́мъ: Всеси́льне Спа́се, поми́луй на́съ.

Слове́съ твои́хъ богодохнове́нныхъ вѣ́тромъ утиши́лъ еси́ бу́рю ерети́чествующихъ, въ приста́нище благоче́стія Це́рковь направля́я, преблаже́нне. [Два́жды.]

Въ добродѣ́тели непоро́ченъ сы́й, преподо́бне, сла́венъ яви́лся еси́ сло́вомъ и житіе́мъ, Це́ркве Христо́вы удобре́ніе.

Богоро́диченъ: Его́же родила́ еси́, Богоро́дице, несказа́нно, Бо́га на́шего, моля́щи не преста́й, изба́витися отъ бѣ́дъ пою́щимъ Тя́, Чи́стая Приснодѣ́во.

Конда́къ, гла́съ 4. Подо́бенъ: Яви́лся еси́ дне́сь.

Яко звѣзда́ многосвѣ́тлая, отъ восто́ка возсія́въ, озари́лъ еси́ въ сердца́хъ вѣ́рныхъ добродѣ́тели чуде́съ твои́хъ, чудотво́рче всеблаже́нне Тимоѳе́е.

Пѣ́снь 7.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Угаси́въ страсте́й пла́мень сле́зъ росо́ю, благода́ть чуде́съ источи́лъ еси́, и́миже очища́еши скве́рны страсте́й, Тимоѳе́е.

Блаже́нство Боже́ственное нело́жно получи́лъ еси́, кро́ткихъ, преподо́бне, наслѣ́довалъ еси́ зе́млю и ра́дости избра́нныхъ насыща́яся.

Разрѣше́ніе грѣхо́въ творя́щимъ любо́вію свяще́нную па́мять твоего́ преставле́нія, я́ко дерзнове́ніе обрѣ́тъ, блаже́нне, испроси́.

Богоро́диченъ: Изба́вленніи вси́ отъ пе́рвыя кля́твы пресвяты́мъ Рождество́мъ Твои́мъ, благослове́нная Еди́на, Тя́ благослови́мъ, Богоро́дице Нескве́рная.

Инъ.

Ирмо́съ: Въ пещи́ су́ще халде́йстѣй, авраа́мстіи о́троцы ликова́ху со а́нгеломъ, глаго́люще: оте́цъ на́шихъ Бо́же, благослове́нъ еси́.

Ерети́чествующихъ бра́нь ору́жіемъ Ду́ха, му́дре, побѣди́въ, по́чести нетлѣ́нныя прія́лъ еси́, отъ Христа́ вѣнча́емь.

Ме́чь обоюдуо́стръ уста́ твоя́ на нечести́выхъ, о́тче, показа́шася, подъ руко́ю Сло́ва покрыва́ема, я́ко си́хъ бра́нь посѣ́къ.

Уче́нія лопа́тою развѣ́ялъ еси́ Аріеву ле́сть, я́ко пле́вы, во одушевле́нную, о́тче, жи́тницу собира́я пшени́цу вѣ́ры.

Богоро́диченъ: Богоро́дицу вси́ почти́мъ, я́ко Спа́са родила́ е́сть, вѣ́рою взыва́юще: ра́дуйся, Рабо́ и Ма́ти Христа́ Бо́га на́шего.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Страстоубíйца бы́лъ еси́ воздержа́ніемъ мно́гимъ и зѣ́льными болѣ́зньми бдѣ́нія, восхожде́ньми при́сно добродѣ́телей, преподо́бне, поуча́яся въ се́рдцы и отъ сла́вы преходя́ въ сла́ву неконча́емыя жи́зни и нетлѣ́нія.

Яко же́ртву, преподо́бне, моли́твы твоя́ къ Бо́гу Пречи́стому ты́ прине́слъ еси́, чи́сты отъ души́, Боже́ственно дѣ́йство отъ Него́ прія́лъ еси́ чуде́съ: де́моны отгоня́ти и человѣ́ческія цѣли́ти не́мощи.

Ненавистозло́бенъ и незло́бивъ, ми́лостивъ, и кро́токъ, и пра́вдою укра́шенъ, о́тче, бы́лъ еси́, преподо́бенъ, непоро́ченъ, оша́яся вся́кія непра́вды, сто́лпъ мона́шествующихъ, тѣ́мже тя́ почита́емъ, вѣ́рніи, во вѣ́ки.

Богоро́диченъ: Еди́ну Тя́ избра́, добро́ту Іа́ковлю, Отчее Сло́во и во утро́бѣ Твое́й всели́ся, я́коже благоволи́, па́че всѣ́хъ краснѣ́йшій Человѣ́къ, Всечи́стая, про́йде, омраче́нное на́ше очища́я естество́.

Инъ.

Ирмо́съ: Еди́наго Безнача́льнаго Царя́ сла́вы, Его́же благосло́вятъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Жезло́мъ прему́дрости твоея́ писа́ній раздѣли́въ боже́ственную пучи́ну, Христо́въ святи́телю, и преложи́лъ еси́ къ земли́ правосла́вія но́ваго Изра́иля, аріани́ты же, я́ко еги́птяны, удави́лъ еси́.

Небе́снаго ты́ сше́дъ видѣ́нія на сто́лпъ хала́нскій, Аріевъ, размѣси́лъ еси́ язы́ки ерети́чествующихъ, Евста́ѳіе му́дре, единогла́сную вѣ́ру проповѣ́дуя во вѣ́ки.

Исповѣ́даньми твоими, и́же по и́стинѣ, на за́падѣ жи́знь сконча́лъ еси́; возсія́лъ еси́ па́ки на восто́цѣ ста́ду твоему́, му́дре, зарю́ благоче́стія испуща́я во вѣ́ки.

Богоро́диченъ: Созда́вшаго Ада́ма по о́бразу, и отъ смѣше́нія его́ проше́дша, и спа́сша человѣ́ческій ро́дъ, по́йте, свяще́нніи, лю́діе, превозноси́те Его́ во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Свяще́нія хра́мъ, умиле́нія исто́чникъ, сострада́нія струя́ яви́лся еси́, му́дре, любве́ же безмѣ́рная пучи́на, Госпо́день уго́дникъ нело́женъ, и небе́сный граждани́нъ, и а́нгеловъ единокро́вникъ, и чуде́съ точе́ніе.

Хвали́тися ми́лости, о́тче, суда́ свѣ́дый, не презрѣ́лъ еси́ стра́нна, но всѣ́мъ бла́гъ, милосе́рдія отве́рзлъ еси́, преподо́бне, оте́цъ бы́въ си́рыхъ и вдови́цъ засту́пникъ, и наги́хъ одѣя́ніе, и пи́ща а́лчущихъ.

Отъ земли́ отлучи́лся еси́ къ небеси́, идѣ́же имѣ́лъ еси́, еще́ ходя́ во пло́ти, до́брѣ житіе́, преподо́бне, на́мъ очище́ніе согрѣше́ній моля́ дарова́ти, вѣ́рно чту́щимъ твою́ святу́ю па́мять.

Струю́ на́мъ всегда́ честна́я твоя́ ра́ка исцѣле́ній источа́етъ, о́тче, страсте́й излія́нія вся́ческихъ изсуша́ющи и вся́ку напоя́ющи ду́шу къ благопло́дію Боже́ственному, свяще́нне Тимоѳе́е, Христо́въ уго́дниче.

Богоро́диченъ: Глаго́ломъ Твои́мъ послѣ́дующе, ро́ди родо́въ, Блаже́нная, Тя́ блажи́мъ при́сно: Бо́га бо, и́стинно Блаже́ннаго, родила́ еси́, Пресвята́я Чи́стая, вся́ блаже́нны Тому́ рабо́тающія нело́жно творя́ща.

Инъ.

Ирмо́съ: Па́че естества́ Ма́терь и по естеству́ Дѣ́ву, еди́ну въ жена́хъ Благослове́нную, пѣ́сньми, вѣ́рніи, Богоро́дицу велича́емъ.

Иже въ писа́ніихъ, гро́здъ, учи́тельно изгне́тъ, напои́лъ еси́ вѣ́рныхъ вина́, о́тче, и́стины Христо́вы, сердца́ веселя́ща.

Ору́жіе обоюдуостро́, нося́, богосло́вный Тво́й язы́къ, посѣ́клъ еси́ лука́вый Арія гнѣ́въ, непови́нную и душе́вную кро́вь, блаже́нне, излива́ющъ.

Наро́читый святы́й де́нь всесвяты́я твоея́ па́мяти творя́ще духо́вно, тя́ мо́лимъ: моли́ прилѣ́жно, святи́телю, спасти́ся на́мъ.

Богоро́диченъ: Юже во чре́вѣ заче́ншую неопи́санное Сло́во и две́рь Боже́ственныя жи́зни на́мъ я́вльшую, Пречи́стую вои́стинну Богоро́дицу велича́емъ.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 165 об. – 170 об.

/ Къ оглавленію раздѣла /


Наверхъ / Къ титульной страницѣ

0