Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 20-й де́нь.
Преподо́бного отца́ на́шего Льва́, епи́скопа Ката́нскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Го́споди, а́ще и на суди́щи.

Сто́лпъ тя́, Льве́,* Христо́ва Це́рковь жи́въ* и глаго́льника держа́щи* пра́выхъ уче́ній Сло́ва,* сего́ зря́щи непоколеби́ма и́стины,* при́сно пребыва́етъ,* сла́вящи Влады́ку всѣ́хъ и Го́спода,* тя́ просла́вльшаго.

Го́споди,* Ты́ святи́теля сло́во* изощре́нъ показа́лъ еси́ ме́чь* на злоче́ствующихъ* въ Правосла́вную вѣ́ру Твою́* и, тѣ́мъ посѣка́я ло́жная мудрова́нія,* благоче́стія въ мíрѣ умно́жилъ еси́* уче́нія, Влады́ко.

Сла́ва, и ны́нѣ, богоро́диченъ. Подо́бенъ то́йже.

Ви́ждь моего́* сокруше́ннаго се́рдца* стена́нія, Богоневѣ́стная,* пріими́, Дѣ́во Марíе,* и не отри́ни, Всенепоро́чная,* ру́къ мои́хъ, Чи́стая, воздѣя́ніе,* я́ко благолюби́ва,* да пою́ и велича́ю Возвели́чившую ро́дъ на́шъ.

Крестобогоро́диченъ, подо́бенъ:

Агнца Тя́,* егда́ Агница и Дѣ́ва, къ заколе́нію ведо́ма, узрѣ́,* со слеза́ми, Сло́ве, послѣ́доваше* и взыва́ше:* гдѣ́ тщи́шися, Ча́до Мое́?* сше́ствую Тебѣ́, Сладча́йшій,* не терплю́ бо не зрѣ́ти Тебе́,* Іису́се Мо́й Многоми́лостиве.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля, яви́ тя ста́ду твоему́, я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Льве́, моли́ Христа́ Бо́га спасти́ся ду́шамъ на́шимъ.


[НА УТРЕНИ,]
Кано́нъ, его́же краегране́сіе: Льва́, исто́чникъ су́щь чуде́съ, чту́. Іо́сифъ. Гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Свѣти́льника тя́ боже́ственна Христо́ва свѣ́тла Це́рковь стяжа́вши, Льве́ му́дре, добродѣ́телей твои́хъ сія́ньми и чуде́съ бога́тно просвѣща́ется.

Отъ младе́нства возложи́лъ еси́ себе́ сама́го всѣ́хъ Влады́цѣ, и умерщвле́ніемъ сласте́й жива́ Сего́ бы́лъ еси́ же́ртва, закала́я себе́ безъ кро́ве, блаже́нне.

Житіе́ твое́ сія́етъ, добродѣ́тельми укра́шено и чуде́съ блиста́ньми удобре́но, богоно́се, проявле́на тя́ всѣ́мъ содѣ́ла.

Богоро́диченъ: Хра́мъ Ты́ была́ еси́ Бо́жій, Нескве́рная Отрокови́це, Все́льшемуся па́че ума́ въ Тя́, Богоро́дице, и ле́сть отъ ду́шъ человѣ́ческихъ Отгна́вшему.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Спаси́тельна, о́тче, и благоче́стна уче́нія правосла́вія храня́ невре́дна, ста́до упа́слъ еси́ на па́житехъ живоно́сныхъ и въ небе́сную огра́ду вве́лъ еси́.

Возше́дъ на высоту́ добродѣ́телей, преподо́бне, пома́заніе свяще́нно прія́лъ еси́ и Превысо́каго, всему́дре, восхвали́лъ еси́ высоча́йшимъ сѣда́лищемъ, послужи́въ благода́тію Тому́, я́ко а́нгелъ.

Напа́сти претерпѣ́въ Христа́ ра́ди, преподо́бне, безсме́ртію причасти́лся еси́ обоже́нія; мѵ́ро же благово́нно непреста́нно источа́я, освяща́еши вѣ́рою къ тебѣ́ притека́ющія.

Богоро́диченъ: Угля Боже́ственнаго и свѣтоза́рнаго клеще́, купино́, огне́мъ не опали́вшися Божества́, хвра́стныя моя́ вся́ попали́ стра́сти и огня́ исхити́ вѣ́чнующаго.

Сѣда́ленъ, гла́съ 3. Подо́бенъ: Боже́ственныя вѣ́ры.

Вели́кое со́лнце, вселе́ннѣй возсія́лъ еси́ добродѣ́телей твои́хъ сія́ньми, и чуде́съ свѣ́тлостію просвѣти́въ вѣ́рныхъ собо́ры, и отгна́въ страсте́й омраче́ніе, Льве́ преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чився, пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь: Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́! Ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Земледѣ́лавъ ни́ву твоего́ ра́зума, стокра́тный кла́съ прине́слъ еси́, пребога́те, добродѣ́телей боже́ственныхъ и исцѣле́ній.

Свята́я твоя́, сла́вне, ра́ка вы́ну еле́й святы́й источа́етъ, освяща́ющи ду́ши, вѣ́рою къ тебѣ́ притека́ющія.

Неду́говъ очище́ніе, лука́выхъ де́моновъ отгони́тель, святи́телю, бы́лъ еси́ и вѣ́рныхъ человѣ́ковъ прибѣ́жище.

Богоро́диченъ: Всѣ́мъ Невмѣсти́мый, Пречи́стая, вмѣща́ется во утро́бѣ Твое́й, спаса́я мя́ бла́гостію, погруже́ннаго мно́гими грѣхи́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Умо́мъ чистѣ́йшимъ Ума́ всѣ́хъ Вино́внаго смотря́я, отъ Него́ прія́лъ еси́ дарова́ній зарю́, богодохнове́нне, исцѣле́ній свяще́нная свѣтоли́тія, и́миже разрѣша́еши страсте́й омраче́ніе.

Пре́лестьми де́монскими вся́ вѣ́рующія Христу́ прельща́ющаго, о́гненному суду́ пре́далъ еси́ пра́ведно, блаже́нне, и ду́ши изба́вилъ еси́ всегуби́тельнаго сего́ вре́да, я́ко па́стырь и́стиненъ и спаси́теленъ.

Разгорѣ́вшуся огню́ посреди́ ста́лъ еси́, неопали́мь, пресла́вне: Боже́ственная бо роса́ Свята́го окружи́ тя Ду́ха, я́ко священнотаи́нника, я́ко служи́теля Боже́ственныя сла́вы, я́ко вы́шнія свѣ́тлости прича́стника.

Богоро́диченъ: Ви́дѣвше дре́вле боже́ственнѣйше, Богора́дованная, честнíи проро́цы та́инства глубину́ неизрече́нную честна́го Рождества́ Твоего́, Пречи́стая, разли́чными о́бразы, я́ко вмѣсти́ша, Сего́ провозвѣсти́ша.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Слѣпíи моли́твами твои́ми, о́тче, прія́ша прозрѣ́ніе, богому́дре: Христа́ бо содѣ́йственника имѣ́я и къ Нему́ души́ твоея́ о́чи стяжа́въ вы́ну, проше́нія бога́тно прія́лъ еси́.

Бы́лъ еси́ царю́, чу́дне, стра́шенъ, внегда́ иды́й во дворы́ его́, носи́лъ еси́ оде́ждою у́гліе горя́щее: прославля́ше бо тя́ Бо́гъ, Его́же житіе́мъ твои́мъ, Льве́, просла́вилъ еси́.

Благоуха́етъ ра́ка моще́й твои́хъ и излива́етъ при́сно, всеблаже́нне, я́коже исто́чникъ чи́стъ и благово́нный, еле́й Боже́ственный, и́мже отгоня́ются неду́зи отъ вѣ́рныхъ и здра́віе тре́бующимъ да́руется.

Богоро́диченъ: Освяти́ ду́шу мою́, Дѣ́во, Свято́е ро́ждшая Сло́во, вои́стинну во святы́хъ я́ко пречи́сто почива́ющаго Еди́наго Бо́га на́шего, и да́руй ми́, я́ко ми́лостива, умиле́нія ту́чу, Всенепоро́чная.

Конда́къ, гла́съ 8. Подо́бенъ: Яко нача́тки.

Якоже свѣти́льника превели́ка, Це́рковь и́мать, всеблаже́нне, тебе́, па́че со́лнца сія́юща, ю́же твои́ми моли́твами сохрани́, блаже́нне, непобѣди́му, и непоколеби́му отъ е́реси вся́кія, и нескве́рну, я́ко приснопа́мятный.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Чино́мъ боже́ственнымъ безпло́тнымъ съ пло́тію подо́бяся, богому́дре, служи́лъ еси́ Бо́гу, непреста́нно воспѣва́я: благослове́нъ еси́, Го́споди Бо́же, во вѣ́ки.

Уши глухíя, всеблаже́нне, моли́твами твои́ми отве́рзлъ еси́ боже́ственными и хромы́мъ я́вственно пода́лъ благотече́ніе, — благослове́нъ еси́, — вопія́, — Го́споди Бо́же, во вѣ́ки.

Ма́ніемъ Боже́ственнымъ Влады́ки неопале́нъ пребы́лъ еси́, вше́дъ, посреди́ огня́; неприча́стный же Сего́, судо́мъ пра́веднымъ опаля́ется Иліодо́ръ, моли́твою твое́ю.

Богоро́диченъ: Твоего́ чре́ва не опали́ Божества́ Огнь, Дѣ́во Ма́ти, воплоща́ется изъ Тебе́, концы́ ороша́я Боже́ственными свѣ́тлостьми. Сего́ ра́ди Тя́ пое́мъ.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Излія́ся благода́ть, о́тче, во устна́хъ твои́хъ, священнотаи́нниче, сего́ ра́ди тя́, Льве́, Бо́гъ пома́за, святи́теля, лю́демъ, вопію́щимъ: благослови́те, вся́ дѣла́ Госпо́дня, Го́спода.

Царю́, всеблаже́нне, Превѣ́чнующему благоугоди́лъ еси́, земно́му, Льве́, царю́ предста́лъ еси́, у́гліе нося́ и сего́, о́тче, ужаса́я мы́сль чудодѣ́йствы, зѣло́ пресла́вными.

Яко ма́слина, о́тче, насажде́на бы́въ плодови́та въ дому́ Госпо́дни, пло́дъ приноша́еши по кончи́нѣ, отъ боже́ственнаго тѣ́ла твоего́ еле́й боже́ственный, вѣ́рныхъ вся́къ неду́гъ отгоня́я всегда́, къ тебѣ́ съ любо́вію, му́дре, притека́ющихъ.

Богоро́диченъ: Хотѣ́ніемъ вся́ соверша́яй, Всенепоро́чная, Благослове́нная, восхотѣ́въ, во чре́во Твое́ всели́ся, и пло́тію яви́ся, и обожи́ мя, истлѣ́вша пре́жде льсти́ваго злы́мъ совѣ́томъ.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Да тя́ боже́ственными гла́сы блажи́мъ, преподо́бно пожи́вша, и на небеса́ возше́дша, и, ра́дующася, отъ страсте́й, и скорбе́й на́съ моли́твами твои́ми спаса́й, и отъ обстоя́ній, святи́телю и па́стырю досточу́дне.

Яко розга́ виногра́да и́стиннаго бы́въ, о́тче, прозя́блъ еси́ добродѣ́тельны гре́зны, чуде́съ сла́дость иска́пающія, отъ ни́хже пію́ще вѣ́рно, здра́віе пріе́млютъ и ра́дость хва́лящіи тя́ при́сно, Льве́ всему́дре.

Тѣ́ло твое́ бы́сть хра́мъ Свята́го и Честна́го, о́тче, Ду́ха и ны́нѣ лежи́тъ вну́трь Боже́ственнаго хра́ма, его́же созда́лъ еси́ въ сла́ву, Льве́, и че́сть Лукíи му́ченицы, чуде́съ источа́я на́мъ рѣ́ки, благоче́стно тя́ почита́ющимъ.

Якоже со́лнце свѣтоза́рно, добродѣ́тельными свѣща́ми концы́ озаря́я при́сно, и ны́нѣ къ Свѣ́ту премину́лъ еси́ незаходи́мому. Тѣ́мже свѣтоно́сную твою́ па́мять пра́зднующія, Льве́ пребога́те, омраче́ній вселю́тыхъ изба́ви.

Богоро́диченъ: Страшу́ся Твоего́, Еди́не Царю́, втора́го прише́ствія и убоя́хся, безмѣ́рно согрѣши́въ Тебѣ́ и по ра́зумѣ не утве́рждься; но я́ко сы́й Бла́гъ, обрати́ и спаси́ мя ро́ждшія Тя́ благопрія́тными, Іису́се, моли́твами.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 162 – 165.

/ Къ оглавленію раздѣла /


Наверхъ / Къ титульной страницѣ

0