Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 22 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 19-й де́нь.
Свята́го апо́стола Архи́ппа.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Му́ченицы Твои́, Го́споди.

Влеко́мь, блаже́нне, и пробода́емь, и всѣ́ми ины́ми окружа́емь лю́тыхъ ви́ды, не отве́рглся еси́ Христа́, ниже́ истука́ннымъ че́сти отда́лъ еси́. Тѣ́мже вѣне́чникъ бы́лъ еси́, при́сно моля́ся всѣ́мъ дарова́ти ве́лію ми́лость.

Крове́й боже́ственными струя́ми, му́чениче, освяти́лъ еси́ зе́млю, богому́дре, и уязви́лъ еси́ я́звами твои́ми мно́жество де́моновъ лука́вое, источа́я же непреста́нно исцѣле́нія, стра́сти исцѣля́еши лютѣ́йшія. Тѣ́мже твои́ми моли́твами испроси́ всѣ́мъ, блаже́нне, ве́лію ми́лость.

Сла́ва, и ны́нѣ, богоро́диченъ:

Исхи́ти мя́, Влады́чице, руки́ змíевы человѣкоубíйцы, хотя́ща мя́ лука́вствомъ поглоти́ти до конца́. Сокруши́ че́люсти его́, молю́ Тя, и ко́зни разори́, я́ко да избы́въ отъ ногте́й его́, велича́ю заступле́ніе Твое́.

Крестобогоро́диченъ:

Не терплю́, Ча́до, ви́дящи Тя́, на дре́вѣ усну́вша, бо́дрость всѣ́мъ подаю́щаго, я́ко да дре́вле преступле́нія плодо́мъ сно́мъ поги́бельнымъ усну́вшимъ, боже́ственную и спаси́тельную бо́дрость пода́си, — Дѣ́ва глаго́лаше, пла́чущи, Юже велича́емъ.

Тропа́рь, гла́съ 3:

Апо́столе святы́й Архи́ппе, моли́ ми́лостиваго Бо́га, да прегрѣше́ній оставле́ніе пода́стъ душа́мъ на́шимъ.


[НА УТРЕНИ,]
Кано́нъ, его́же краегране́сіе: Архи́ппа пою́ му́драго, богоглаго́ливаго. Творе́ніе Іо́сифово. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Облиста́въ просвѣще́ніемъ благода́ти, Па́велъ прему́дрый, я́коже зарю́, блаже́нне, тя́ свѣ́тлу испусти́, отгоня́щу многобо́жія, Архи́ппе, тму́ глубоча́йшую ду́хомъ.

Глаго́лъ боже́ственными плени́цами уловле́нъ бы́лъ еси́ Па́вла проповѣ́дника, и изъ глубины́ зло́бы вра́жія лю́ди пресла́вно улови́лъ еси́, и слове́сно бра́шно на Боже́ственную трапе́зу прине́слъ еси́.

Въ ри́зу одѣ́янъ, Архи́ппе, Боже́ственныя благода́ти, обнажи́вшіяся сла́вы Боже́ственныя, въ нетлѣ́нія ри́зу и спасе́нія, сла́вне, оде́жду Боже́ственную одѣ́ялъ еси́.

Богоро́диченъ: Ви́дѣвше проро́ческими очесы́ издале́ча, Всечи́стая, е́же па́че ума́ Твоего́ Боже́ственнаго Рождества́ стра́шное та́инство, богоглаго́ливіи, Пречи́стая, разли́чными о́бразы уясни́ша.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Вѣ́рна тя́ раба́ Христо́ва Па́велъ боже́ственный свидѣ́тельствуетъ, Архи́ппе, и свяще́нна проповѣ́дника, и сво́ина, блаже́нне.

Распаля́емь мы́сленно Утѣ́шителя огне́мъ, попали́лъ еси́ ве́щь го́рькую, Архи́ппе, идолонеи́стовства, всехва́льне.

Житіе́ твое́ свѣтоза́рно добродѣ́тельными мо́лніями просія́, просвѣща́я, Архи́ппе, благоче́стно тя́ почита́ющія.

Богоро́диченъ: Хра́мъ показа́лася еси́ Бо́жій вмѣсти́теленъ преявле́нно, Всечи́стая, и чи́сто селе́ніе, и богоподо́бно жили́ще.

Сѣда́ленъ, гла́съ 1. Подо́бенъ: Ли́къ а́нгельскій.

Па́вловъ учени́къ бы́въ, богоно́се, просвѣти́лъ еси́ лю́ди воспѣва́ти Тро́ицу, хра́мы же разори́лъ еси́ па́губныя благода́тію, пострада́въ же терпѣли́вно, вѣнцы́, ра́дуяся, прія́лъ еси́, о на́съ моля́ся, блаже́нне Архи́ппе.

Сла́ва, и ны́нѣ, богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, и́же на Тя́ упова́ніе, Отрокови́це, иму́щія, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ строе́ніе? Имже спа́слъ еси́ пречи́стыхъ ру́къ Твои́хъ, Ще́дре, созда́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Повѣству́юща Боже́ственная и безбо́жныя явле́ннѣ облича́юща, беззако́нный гони́тель біе́ніемъ предаде́ тя, и ра́намъ, Архи́ппе, и различнообра́знымъ му́камъ.

До́брѣ проходя́ житіе́, блаже́нне, кончи́ну обрѣсти́ блаже́нну вои́стинну сподо́бился еси́: му́ченикъ бо бы́лъ еси́ Христо́въ, до́блественнѣйше болѣ́зни претерпѣ́въ тѣле́сныя.

Жиру́ющую безбо́жія гни́лость, благочести́выхъ исполне́ніе, уста́вилъ еси́ сла́дкою со́лію слове́съ твои́хъ и, ра́дуяся, взыва́лъ еси́: сла́ва си́лѣ Твое́й, Го́споди.

Богоро́диченъ: Яко присѣ́нну прови́дя Тя́ дре́вле го́ру Авваку́мъ, Всенепоро́чная, нося́щу Сло́во, вся́ осѣня́ющее отъ пла́мене преступле́нія и грѣхо́въ, Отрокови́це, жже́нія.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Боже́ственными мо́лніями всему́драго проповѣ́данія просвѣти́лъ еси́ невѣ́дѣнія но́щію одержи́мыя, богому́дре всеблаже́нне.

Боже́ственная рѣка́, проше́дши изъ се́рдца твоего́, потопи́ пото́ки ле́стныя и ра́зумы вѣ́рныхъ, преблаже́нне, напои́.

Вжиля́емь благи́ми наде́ждами, претерпѣ́лъ еси́, влеко́мь четы́рми и зе́млю освяща́я кровьми́, богопрія́тне.

Богоро́диченъ: Тя́, Еди́ну отъ всѣ́хъ родо́въ, избра́ Госпо́дь, Богоро́дице, и изъ Тебе́ воплоти́ся, обожи́въ человѣ́чество.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Ника́коже прельще́ньми ослабѣ́вши, льсти́вый неми́лостивно тя́ ссѣца́етъ ра́нами, богому́дре, смотря́юща къ сла́вѣ, ю́же ти́ Христо́съ пода́стъ, прославля́я тя́.

Полки́ враго́въ неви́димыхъ я́звами уязви́лъ еси́, блаже́нне, пло́ти твоея́, Архи́ппе, и, облича́я, се́рдце мучи́телево терза́ньми расто́рглъ еси́.

Иже ка́менію нечу́вственнымъ се́рдцемъ служа́щіи, ка́меніемъ побива́ютъ тя́, блаже́нне, живота́ ка́мень исповѣ́дающа и пре́лести утвержде́ніе, му́чениче, сокруша́юща.

Богоро́диченъ: Умерщвле́нія совле́кся, въ жи́знь облече́ся въ раи́, Дѣ́во, Ада́мъ, Твои́мъ же обезсме́ртвися живоно́снымъ Рождество́мъ, Всесвята́я Богоневѣ́сто.

Конда́къ, гла́съ 4. Подо́бенъ: Яви́лся еси́ дне́сь.

Яко звѣзду́ вели́кую, тя́ Це́рковь иму́щи, Архи́ппе, чуде́съ твои́хъ луча́ми просвѣща́ема, зове́тъ тебѣ́: спаси́ вѣ́рою почита́ющія па́мять твою́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Богоглаго́ланьми богому́дрыми, всеблаже́нне, свидѣ́тельствованъ, ра́зумомъ и́стиннымъ, тму́ невѣ́дѣнія отъ ду́шъ отгна́лъ еси́ му́дрости благода́тію честно́му сло́ву твоему́ повину́вшіяся.

Въ ро́вѣ тя́, му́чениче, до́льнѣйшемъ погреба́ютъ наро́ди злочести́выхъ и ка́меніемъ неми́лостивно умерщвля́ютъ, воспѣва́ющаго: благослове́нъ еси́ въ хра́мѣ сла́вы Твоея́, Го́споди.

Земля́ тѣ́ло погребе́ное, му́чениче, показу́етъ, источа́я исцѣле́ній во́ды вѣ́рнымъ, не́бо же, блаже́нный Архи́ппе, ду́хъ тво́й страстоте́рпческимъ душа́мъ причита́етъ.

Богоро́диченъ: Зе́млю у́бо мгло́ю, не́бо же о́блаки Госпо́дь, Отрокови́це, одѣва́я, во́лею въ пло́ть ме́ртвенную отъ крове́й Твои́хъ одѣва́ется, во оде́жду сла́вы безсме́ртныя одѣва́я человѣ́ка.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Па́велъ, похвала́ми свяще́нными похваля́я тя́, Архи́ппе сла́вне, сво́ина тя́, свя́те, написа́, соверши́теля боже́ственныхъ дѣя́ній, служа́ща ему́ и вѣ́рою пою́ща: благослови́те, вся́ дѣла́ Госпо́дня, Го́спода.

Глаго́лы пома́зася честны́ми къ муче́нію досточу́дная Апфíя, лю́бящи, прему́дре, я́ко сы́на тя́ и́скреннѣйшаго, съ не́юже въ вы́шнихъ живе́ши Ца́рствіихъ, вопія́: благослови́те, вся́ дѣла́ Госпо́дня, Го́спода.

Младе́нцы су́щіи ра́зумомъ, тя́, иму́щаго смы́слъ, младе́нцемъ во игра́ніе преда́ша, Архи́ппе, стра́ждуща, терпѣли́внѣйше, и отъ ни́хъ неми́лостивно пробода́ема и вопію́ща: вся́ дѣла́, благослови́те, Госпо́дня, Го́спода.

Богоро́диченъ: Ме́ртвъ снѣ́ди ра́ди еди́ныя Ада́мъ бы́сть, объе́мь сме́рть са́да разу́мнаго, Чи́стая, Тебе́ же ра́ди оживле́нъ, и рая́ пи́щу па́ки воспрія́тъ, воспѣва́я: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Да вѣ́чную сла́ву наслѣ́диши, страстоте́рпче, сла́ву земну́ю презрѣ́лъ еси́, непостоя́нную же и преходя́щую, и ко Христу́ приступи́лъ еси́, сла́вою Сего́ украша́емь.

Вѣнце́мъ увязе́ся, богому́дре, побѣ́днымъ ве́рхъ тво́й, и одѣ́ялся еси́ въ багряни́цу, твои́ми кровьми́ омоче́ную, Архи́ппе, и со Христо́мъ, ра́дуяся, ца́рствуеши, преблаже́нне.

Яко верхо́внаго, всеблаже́нне, апо́столовъ бы́въ учени́къ, Па́вла му́драго богоглаго́ливаго, съ тѣ́мъ ра́дуешися, вѣ́чнующее наслѣ́дуеши наслажде́ніе, Колосса́евъ удобре́ніе.

Собра́шася лю́діе въ па́мяти свѣтоно́снѣй твое́й воспѣ́ти благода́вца Спа́са и до́блія, Архи́ппе, болѣ́зни твоя́, я́же му́жески претерпѣ́лъ еси́, низложи́въ многоко́зненнаго.

Богоро́диченъ: Нося́щи Христа́ на объя́тіихъ, ма́ніемъ нося́щаго вся́, Сего́, я́ко Сы́на Твоего́, моли́, отъ ру́къ врага́ мя́, Пречи́стая, изба́вити и за милосе́рдія бе́здну объя́ти и спасти́ мя.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 159 – 162.

/ Къ оглавленію раздѣла /


Наверхъ / Къ титульной страницѣ

0