Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 18-й де́нь.
Иже во святы́хъ отца́ на́шего Льва́, па́пы Ри́мскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: Что́ вы́ нарече́мъ?

Что́ тя́ ны́нѣ пронареку́, чу́дне?* проповѣ́дника ли и́стины* и основа́ніе тве́рдо?* старѣ́йшину верхо́внаго Собо́ра честна́го,* пра́вило уче́ній извѣ́стно* и мѣ́рило иму́ще исправле́ніе,* Несто́ріево раздѣле́ніе* и Евти́хіево слія́ніе отсѣка́юща* богоплете́нными явле́ньми.

Что́ тя́ ны́нѣ нареку́, ди́вне?* нача́льника ли* и царя́ тѣле́сныхъ страсте́й,* душе́вное влады́чество направля́юща свѣ́тло?* Боже́ственнаго ми́лованія сосу́дъ,* любве́ соверше́нныя жили́ще?* человѣколюбе́зна согрѣша́ющимъ,* обраще́нія ожида́юща?* Моли́ спасти́ся душа́мъ на́шимъ.

Сла́ва, и ны́нѣ, богоро́диченъ. Подо́бенъ то́йже:

Кому́ уподо́билася еси́, окая́нная душе́,* къ покая́нію ника́коже возни́чущи* и огня́ не ужаса́ющися, злы́хъ ожида́ющаго?* Воста́ни, и Еди́ну къ заступле́нію ско́рую призови́,* и возопíй:* Дѣ́во Ма́ти, моли́ Твоего́ Сы́на и Бо́га на́шего* изба́вити мя́ отъ сѣ́ти льсти́ваго.

Крестобогоро́диченъ. Подо́бенъ:

Агница Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше, ма́терски болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ жи́знь дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Тропа́рь, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́овъ богодохнове́нное удобре́ніе, Льве́ прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Всему́дрому Льву́ пѣ́сни плету́. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Свяще́нства пома́заніемъ, всеблаже́нне, удобре́нъ, украси́лъ еси́ сіе́ добродѣ́тельными ви́ды, пребога́те.

Якоже зрѣ́лъ гро́здъ, о́тче, изгне́лъ еси́ ра́зумъ, весе́лія крати́ръ, треблаже́нне, прему́дрости твоея́ всѣ́мъ предложи́лъ еси́.

Петра́ верхо́внаго престо́ла наслѣ́дникъ бы́лъ еси́, того́ имѣ́я нра́въ и ре́вность, богому́дре, вѣ́ры.

Богоро́диченъ: Зако́на преступле́ніемъ осужде́на первозда́ннаго, Спа́са ро́ждши, Богома́ти Чи́стая, свободи́ла еси́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Сто́лпъ правосла́вія Христо́вы Це́ркве, всему́дре Льве́, усе́рдно нося́, возста́вилъ еси́, его́же держа́щи, еретико́въ безбо́жныя разруша́етъ полки́ и собо́рища.

Небе́сныя и Боже́ственныя насы́тився благода́ти, церко́вныя догма́ты, о́тче, предложи́лъ еси́, со всѣ́ми бо́рствуя ерети́ческими языкобо́ліи, благоче́стія побо́рниче, Льве́ пребога́те.

Свѣ́томъ пресвѣтлѣ́йшимъ озари́вся, преподо́бне, неизглаго́ланнаго и Боже́ственнаго вочеловѣ́ченія, Сло́во уясни́лъ еси́, сугу́бо, ре́къ, существо́ и сугу́бо дѣ́йство вопло́щшагося Бо́га.

Богоро́диченъ: Украси́лася еси́, я́ко невѣ́ста, дѣ́вственными добро́тами, обра́дованная Дѣ́во Ма́ти Неневѣ́стная, вся́кія бо тва́ри Ты́ превознесла́ся еси́ мно́жае, я́ко всѣ́хъ вино́вное Сло́во ро́ждшая.

Сѣда́ленъ, гла́съ 3. Подо́бенъ: Боже́ственныя вѣ́ры.

Уста́вилъ еси́ дерзнове́нія, дѣ́лы увѣ́рилъ еси́ правосла́вія, я́ко упова́, я́ко ле́въ, пра́ведный; и́стины проповѣ́даеши уче́нія и облича́еши пре́лести сокрове́нія, о́тче преподо́бне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься, пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь: Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Изъ горы́ пріосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Ле́въ ты́ я́ко и́стинно, преблаже́нне, яви́лся еси́, смуща́ющія ли́сы отгоня́, ца́рскимъ рыка́ніемъ ужаса́я нечести́выхъ умышле́нія.

Скры́лъ еси́ приложе́ніемъ твои́хъ догма́товъ богоме́рзкихъ ересе́й слѣды́, сокрове́нную и́стину взыска́въ, священнотаи́нниче всече́стне.

Утро отъ за́пада возсія́лъ еси́, треблаже́нне, сви́токъ благочести́выхъ догма́товъ, я́ко лучи́, Це́ркве, богому́дре, испуща́я и озаря́я ду́ши на́ша.

Богоро́диченъ: Умертви́ стремле́нія, Дѣ́во, страсте́й мои́хъ, уста́ви, Блага́я, молву́ прегрѣше́ній, грѣхо́вную бу́рю Твое́ю тишино́ю, Богороди́тельнице, потребля́ющи.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Сугу́бому дѣ́йству проповѣ́дникъ бы́лъ еси́ Спа́са Христа́: дѣ́йствовати бо, ре́клъ еси́, въ ко́емждо естествѣ́, я́коже имя́ше, со обои́мъ слежа́щимъ обще́ніемъ, святи́телю богому́дре блаже́нне. [Два́жды.]

Равномо́щно су́що Ро́ждшему Сло́во позна́лъ еси́, я́коже пло́ть Сего́ бы́вша, треблаже́нне, увѣ́рилъ еси́, прили́чно, ре́клъ еси́, плотска́я сво́йства дѣ́яти, несли́тно, непревра́тно обоя́.

Богоро́диченъ: Еже пре́жде всѣ́хъ вѣ́къ, Еди́ному вѣ́домо Бо́гу та́инство человѣ́ка бы́ти вся́ческихъ Влады́ку и Го́спода и съ пло́тію смѣси́тися кромѣ́ преложе́нія, изъ Тебе́, Дѣ́во, яви́ся, прехожде́ніе пріе́мъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Петра́ честна́го прее́мникъ, и сего́ нача́льствомъ обогати́вся, и теплу́ стяжа́въ ре́вность, богодви́жимый сви́токъ написа́лъ еси́, ерети́ческое велѣ́ніе отмета́я смуще́нное, растворе́ніе несмѣ́сно соединя́я.

Сы́на Еди́наго, Христа́ и Го́спода, пре́жде вѣ́къ отъ Отца́ рожде́нна, и на́съ ра́ди отъ Дѣ́вы ро́ждшагося, и я́вльшася на́мъ Единосу́щна, проповѣ́далъ еси́ преесте́ственно, служи́телю неизглаго́ланныхъ, богопрія́тне.

Богоро́диченъ: Тя́, Всечи́стая, спасе́нія Хода́таицу, вѣ́рніи, исповѣ́дающе, вопіе́мъ: ра́дуйся, Чи́стая; ра́дуйся, Невѣ́сто Дѣ́во; ра́дуйся, горо́ Бо́жія присѣ́нная, мíру бо Ты́ ра́дость присносу́щную источи́ла еси́.

Конда́къ, гла́съ 3. Подо́бенъ: Дѣ́ва дне́сь.

На престо́лѣ, сла́вне, свяще́нства сѣ́дъ и льво́въ уста́ слове́сныхъ загради́въ, догма́ты богодухнове́нными Честны́я Тро́ицы озари́лъ еси́ свѣ́тъ богоразу́мія твоему́ ста́ду. Сего́ ра́ди просла́вился еси́ я́ко боже́ственный таи́нникъ Бо́жія благода́ти.

Икосъ:

Отца́, и Сы́на, и Ду́ха Свята́го, Трисо́лнечный Свѣ́тъ, Трисвяту́ю Си́лу, Божество́ Еди́но и Еди́но Существо́, Сію́ проповѣ́давъ, уста́ льсти́вая до конца́ загради́лъ еси́ ерети́чествующихъ, Льве́ богому́дре. Тѣ́мже Чи́стую Богороди́тельницу я́ко Богоро́дицу исповѣ́давъ, Несто́ріево безу́міе и буесло́віе низложи́лъ еси́, сего́ ра́ди позна́лся еси́ въ мíрѣ и въ Ри́мѣ я́ко боже́ственный таи́нникъ Бо́жія благода́ти.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Сна́ не да́лъ еси́ вѣ́ждома, до́ндеже изъ ко́рене исто́рглъ еси́ ле́сть Евти́ха обезу́мившагося, зовы́й: благослове́нъ еси́, Го́споди Бо́же, во вѣ́ки.

Еди́ну ѵпоста́сь во двою́ существу́, Христа́ исповѣ́давъ, дѣ́йствующа сугу́бо и хотя́ща, ны́нѣ пое́ши: благослове́нъ еси́, Го́споди Бо́же, во вѣ́ки.

Богоро́диченъ: Ны́нѣ къ Тебѣ́ прибѣга́ю, Богома́ти, прегрѣше́ній плени́цами стя́гнутъ, за милосе́рдіе ми́лости изба́ви мя́, вопію́ща: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Всесвѣ́телъ, я́ко со́лнце, отъ за́пада возсія́лъ еси́, чу́до, богоглаго́ливе, я́вѣ пресла́вно, смѣше́ніе и слія́ніе Евти́хіево изсуши́въ я́вѣ и Несто́ріево раздѣле́ніе пресѣка́я, уча́ Еди́наго чествова́ти Христа́ во двою́ существу́ нераздѣ́льно, непревра́тно, неслія́нно.

Отъ Бо́га дви́жимь, благоче́стія уче́нія, я́ко на богоначерта́нныхъ скрижа́лѣхъ вообрази́лъ еси́, я́коже Моисе́й вторы́й, яви́вся боже́ственнымъ лю́демъ и собо́ру честны́хъ учи́телей, зовы́й: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Воплоще́ннаго, преподо́бне, пре́жде безпло́тнаго, позна́лъ еси́, Сло́ва Отча Единоро́днаго и Собезнача́льнаго, въ лѣ́то безлѣ́тнаго, опи́сана у́бо пло́тію, я́ко Творца́ же описа́нія не вѣ́дуща, учи́ши, взыва́я: свяще́нніи, воспо́йте, лю́діе, и превозноси́те Его́ во вѣ́ки.

Богоро́диченъ: Обложе́ніемъ тѣлесе́ обложи́ся, Пречи́стая, отъ Твои́хъ крове́й, свѣти́лъ добро́тами, со́лнцемъ и луно́ю не́бо просвѣти́вый Бо́гъ, одушевле́нное Тя́ друго́е Не́бо показа́въ, Его́же о́троцы благословя́тъ, свяще́нницы воспѣва́ютъ, лю́діе превозно́сятъ во вся́ вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Сія́еши ны́нѣ, таи́нниче Христо́въ, благолѣ́пія вѣнце́мъ укра́шенъ и, я́ко вѣ́ренъ святи́тель, пра́вдою вои́стинну одѣ́ялся еси́ и, въ раи́ сла́дости лику́я, чу́дне, о па́ствѣ твое́й Влады́ку прилѣ́жно умоли́.

Идѣ́же ны́нѣ патріа́рховъ предсѣда́нія же, и престо́ли, и чи́ни, Льве́ всеблаже́нне, ты́ досто́йно, о́тче, всели́лся еси́, я́ко патріа́рхъ и́стиненъ, и вѣ́рою и благода́тію осія́емь. Тѣ́мже вси́ тя́ при́сно блажи́мъ.

Отъ бу́ри жите́йскія отступи́въ, ко Христу́ прише́лъ еси́, Льве́ всеизря́днѣйше, на мѣ́стѣ зла́чнѣмъ почива́я, идѣ́же пото́къ сла́дости, и Свѣ́тъ Невече́рній, и несказа́нное весе́ліе, и ра́дость пребыва́ющая.

Богоро́диченъ: Зрѣ́лу пожина́ю жи́знь, невреди́му дре́вомъ ра́зума: Ты́ бо, Всенепоро́чная, жи́зни Дре́во — Христа́ процвѣла́ еси́, вхо́ды жи́зни всѣ́мъ сказа́вши. Тѣ́мъ Тя́, Всечи́стая, Богоро́дицу, вѣ́рніи, велича́емъ.

Свѣти́ленъ. Подо́бенъ: Не́бо звѣзда́ми.

Святи́телей сла́ва и вѣ́рныхъ защи́тникъ, ты́ яви́лся еси́, богому́дре о́тче, и сто́лпъ добродѣ́телей. Тѣ́мже помина́й всегда́ воспѣва́ющія тя́ любо́вію.

Богоро́диченъ:

Тя́ Предста́тельницу вси́ иму́ще грѣ́шніи, о Пресвята́я Дѣ́во! Ты́ благопремѣни́тельна на́мъ сотвори́ Сы́на Твоего́ Ма́терними Твои́ми моли́твами.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 155 об. – 159.

/ Къ оглавленію раздѣла /


Наверхъ / Къ титульной страницѣ

0