Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 11 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 17-й де́нь.
Свята́го великому́ченика Ѳео́дора Ти́рона.

[ВЕЧЕРЪ,]
На Го́споди воззва́хъ: стихи́ры на 6, гла́съ 2. Подо́бенъ: Егда́ отъ дре́ва.

Сто́лпъ еси́ тве́рдъ, сопроти́вныхъ наше́ствія отрѣва́я, побо́рникъ непобѣди́мь хва́лящимъ тя́, скорѣ́йшее заступле́ніе, те́плое предста́тельство, тща́тельное избавле́ніе, о́бщая по́мощь, моли́твенникъ си́льнѣйшій, блаже́нне, изба́витель гото́вѣйшій, всѣ́мъ, вѣ́рно моля́щимъ тя́, Ѳео́доре.

Имѣ́я пото́къ сла́дости и оставле́нія во́ду — Христа́ Благопремѣни́теля, свидѣ́тель и́стиннѣйшій Того́ бы́въ, пото́ковъ изба́ви мя́ грѣхо́вныхъ, во́ду ми́ ути́ши непостоя́нную, уста́ви напа́стей бу́ри, упра́ви къ вы́шнѣй тишинѣ́, достоблаже́нне Ѳео́доре.

Ины стихиры, гласъ 4. Подобенъ: Яко добля.

Ревностію Божественною движимь* и душею распаляемь,* любовію, славне, Спаса Христа,* съ храмомъ попалилъ еси* богиню лжеименную,* Владыки и Бога возвѣщая имя,* и посрамилъ еси мучителей шатанія, страстотерпче,* и радости вѣчнѣй* сподобился еси, Ѳео́доре.

На высоту́, Ѳео́доре,* Христо́ва разумѣ́нія возше́дъ,* прете́клъ еси́ ви́димая,* и Сего́ то́кмо взыска́лъ еси́,* и, обрѣ́тъ, возлюби́лъ еси́,* и до́блественною душе́ю Того́ ра́ди пострада́лъ еси́.* Его́же моли́ отъ тли́ и бѣ́дъ изба́витися* вѣ́рою творя́щимъ* пресла́вную па́мять твою́.

Богодарова́нною си́лою,* страстоте́рпче Ѳео́доре,* и подви́жными ра́нами обложе́нъ,* Царю́ всея́ тва́ри предста́лъ еси́, Христу́ Бо́гу,* вѣнцы́ отъ Него́ по́чести пріе́мля.* Его́же моли́* отъ тли́ и бѣ́дъ изба́витися* вѣ́рою творя́щимъ* пресла́вную па́мять твою́.

Сла́ва, гла́съ 6. Самогла́сенъ:

Свяще́нія да́ръ и бога́тство боже́ственныя жи́зни яви́лся еси́ мíру, Ѳео́доре, Христо́съ бо твою́, му́дре, па́мять просла́ви, въ не́йже согла́сно, вѣ́рніи, ра́дующеся, пое́мъ по́двиги болѣ́зней твои́хъ.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде,* Пречи́стая Влады́чице,* егда́ узрѣ́ла еси́ изъ Тебе́ возсія́вшаго* неизрече́ннымъ сло́вомъ,* отъ беззако́нныхъ я́ко осужде́на возноси́ма на Кре́стъ,* о́цтомъ и же́лчію напая́емаго,* въ ре́бра же пробода́ема,* и ру́цѣ и но́зѣ пригвожда́емы,* и, рыда́ющи, восклица́ла еси́,* ма́терски вопію́щи:* что́ сіе́, Ча́до сладча́йшее,* но́вое та́инство?

На стихо́внѣ окто́иха. Сла́ва, гла́съ 8. Самогла́сенъ:

Страда́льческимъ му́жествомъ благоче́стно вооружи́вся, страстоте́рпче Христо́въ, и слове́снѣй слу́жбѣ та́йно спобора́я си́лою Его́, и́дольское злоче́стіе и мучи́тельское преще́ніе не́мощно показа́лъ еси́, неради́въ о му́кахъ и вре́меннѣмъ огни́. Но, о, Боже́ственныхъ даро́въ! и ве́щь, и и́мя, отъ вся́каго обстоя́нія моли́твою твое́ю спаса́й соверша́ющія па́мять твою́.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Юница нескве́рная,* Юнца́ ви́дящи на дре́вѣ* пригвожда́ема во́лею,* рыда́ющи жа́лостнѣ, —* увы́ Мнѣ́, — вопія́ше, —* люби́мѣйшее Ча́до,* что́ Ти со́нмъ воздаде́ безблагода́рный евре́йскій,* хотя́ Мя́ обезча́дствовати* отъ Тебе́, Вселюбе́зне?

Тропа́рь, гла́съ 2:

Ве́лія вѣ́ры исправле́нія, во исто́чницѣ пла́мене, я́ко на водѣ́ упокое́нія, святы́й му́ченикъ Ѳео́доръ ра́довашеся: огне́мъ бо всесожже́гся, я́ко хлѣ́бъ сла́дкій Тро́ицѣ принесе́ся. Того́ моли́твами, Христе́ Бо́же, спаси́ ду́ши на́ша.


НА УТРЕНИ,
Оба кано́на окто́иха и свята́го, на 6.

Кано́нъ, его́же краегране́сіе: Призыва́ющія тя́ спаса́й, всеблаже́нне. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Боже́ственнымъ по́двигомъ, му́чениче Христо́въ, подви́гся и тече́ніе сконча́въ, вѣ́ру соблю́лъ еси́ Боже́ственную, пра́вды обрѣ́лъ еси́ вѣне́цъ.

Преесте́ственну сла́ву отъ Христа́ пріи́мъ, страстоте́рпче, зе́млю всю́ обхо́диши, избавля́я вся́, вѣ́рою съ благоговѣ́ніемъ къ тебѣ́ притека́ющія.

Небе́сный, сла́вне, лико́вникъ, со безпло́тными сы́й, на земли́ призыва́ющія тя́ отъ бѣ́дъ и напа́стей избавля́й.

Богоро́диченъ: Прему́дрость и Сло́во Отчее несказа́нно ро́ждшая, души́ моея́ лю́тую исцѣли́ я́зву и се́рдца болѣ́знь укроти́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Огнь муче́ній тя́ не устраши́, тѣ́мже о́гнь напа́стей къ тебѣ́ прибѣга́ющимъ утиша́еши, Ѳео́доре.

Изба́ви моли́твами твои́ми одержа́щія мя́ печа́ли, му́чениче Христо́въ, все́ углажда́я жите́йское стропо́тство.

Все́ се́рдце мое́ и помышле́ніе простира́ю къ тебѣ́ и ду́шу, твоея́, страстоте́рпче, по́мощи тре́буя.

Богоро́диченъ: Уста́ви непостоя́нное помышле́ній мои́хъ смуще́ніе, Ма́ти Бо́жія, е́же къ Сы́ну Твоему́ направля́ющи движе́ніе.

Сѣда́ленъ, гла́съ 4. Подо́бенъ: Вознесы́йся.

Му́ченическими добро́тами укра́шенъ, Царю́ Небе́сному, му́чениче, ра́дуяся, вѣнцено́сецъ предстои́ши, Ѳео́доре: на кре́стъ бо воздви́женъ бы́лъ еси́ Его́ ра́ди и гвозде́й пригвожде́ніе, и воло́выхъ жи́лъ, и ногте́й, и о́чныхъ зѣ́ницъ извертѣ́ніе претерпѣ́лъ еси́ тве́рдо. Тѣ́мже тя́ вѣ́рою почита́емъ, превели́кій. [Два́жды.]

Сла́ва, и ны́нѣ, богоро́диченъ. Подо́бенъ:

Иже на престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ: вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́. Его́же умоли́ спасти́ся рабо́мъ Твои́мъ.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́, распина́ешися? Пою́ Тя, Долготерпѣли́ве.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Прави́теля тя́ предлага́ю, Бо́жій уго́дниче, ты́ мя́ упра́ви вѣ́триломъ Ду́ха и Боже́ственными вѣ́тры, пресла́вне.

Отъ вся́каго, мо́лимся, изба́ви преще́нія, всеблаже́нне Ѳео́доре, тя́ вѣ́рою блажа́щія и Боже́ственную па́мять твою́ почита́ющія.

Ни живо́тъ, ни сме́рть, ни настоя́щая, ни гряду́щая, ни о́гнь, ни ра́ны, отъ Христа́, богому́дре, отлучи́ша тебе́.

Богоро́диченъ: Подъ лѣ́томъ бы́вша, отъ Отца́ безлѣ́тно возсія́вшаго, Богома́ти на́мъ родила́ еси́, Его́же моли́ спасти́ пою́щія Тя́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Му́чениковъ бы́въ удобре́ніе, му́чениче Христо́въ, вѣ́рныхъ по́мощь бу́ди и стѣна́ неруши́ма.

Едине́нія насла́ждься лу́чшаго, я́же па́че ума́ благи́хъ, Ѳео́доре, тя́ чту́щія спаси́.

Побѣжда́емь любо́вію Зижди́теля, жите́йская оттря́слъ еси́ пристра́стія и Бо́гу благоугоди́лъ еси́.

Богоро́диченъ: Его́же родила́ еси́, Дѣ́во Всенепоро́чная, Бо́га Сло́ва, прилѣ́жно моли́ о на́съ, пою́щихъ Тя́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Побо́рникъ сы́й благоче́стія теплѣ́йшій и пре́лести обличи́тель и́дольскія бы́въ, де́моновъ мечта́нія и страсте́й о́бразы души́ моея́ потреби́.

Утвержде́ніе ми́ бу́ди и стѣна́, му́чениче, непобѣди́ма, не́мощь и гни́лость ума́ моего́ утвержда́я, Ѳео́доре, твои́ми предста́тельствы и сохраня́я невре́дно.

Во́инства тлетво́рнаго и тлѣ́ннаго отре́клся еси́, во́инство же жи́зни, всеблаже́нне Ѳео́доре, до конца́ возлюби́лъ еси́, въ не́мже побѣдоно́сецъ показа́лся еси́, досточу́дне.

Богоро́диченъ: Возсія́ отъ Сіо́на Вы́шняго благолѣ́піе прія́тіемъ пло́ти по соедине́нію неизглаго́ланному, изъ Тебе́, Неискусобра́чная, одѣ́явся, и мíръ просвѣти́.

Конда́къ, гла́съ 8:

Вѣ́ру Христо́ву, я́ко щи́тъ, вну́трь пріи́мъ въ се́рдцѣ твое́мъ, проти́вныя си́лы попра́лъ еси́, многострада́льче, и вѣнце́мъ небе́снымъ вѣнча́лся еси́ вѣ́чно, Ѳео́доре, я́ко непобѣди́мый.

Икосъ:

На престо́лѣ свѣ́та Носи́маго, благода́рственно вѣ́рою воспѣва́емъ Тя́, я́ко дарова́ніе боже́ственное дарова́лъ еси́ — до́бляго во страда́ніи Ѳео́дора, въ житіи́ треблаже́ннаго, я́ко побо́рника су́щаго и́стины, благочести́вымъ по́мысломъ Тя́ жела́юща, Христе́, крѣ́пка побѣди́теля на льсти́ваго, я́ко непобѣди́мый.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Тя́, живота́ моего́ предста́теля, и засту́пника и́мамъ спасе́нія моего́, и храни́теля, богому́дре, утвержде́ніе даю́ща вѣ́рою зову́щимъ: оте́цъ на́шихъ Бо́же, благослове́нъ еси́.

Яко красно́ заколе́ніе са́мъ себе́ Го́сподеви и свяще́ннѣйшее приве́лъ еси́, всеблаже́нне, и огне́мъ муче́ній всесоже́глся еси́, сла́вне, вопія́: оте́цъ на́шихъ Бо́же, благослове́нъ еси́.

Живо́тнаго вдохнове́нія насыща́яся, блаже́нне, Боже́ственнаго Ду́ха, ду́хи отгоня́еши, неду́ги исцѣля́еши и зове́ши, ра́дуяся: оте́цъ на́шихъ Бо́же, благослове́нъ еси́.

Богоро́диченъ: Изъ утро́бы Твоея́ про́йде, вопло́щься, вся́ческихъ, Дѣ́во, Госпо́дь. Тѣ́мъ Тя́, Богоро́дицу, му́дрствующе правосла́вно, Сы́ну Твоему́ взыва́емъ: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Вся́ческими, прехва́льне, треволне́ніи окружа́еми и напа́стьми жите́йскими содержи́ми, предста́теля скорѣ́йша, и помо́щника, и спобо́рника, вси́ вѣ́рніи, тя́ моли́твенника Влады́цѣ приво́димъ, вопію́ще: не преста́й моли́ти о воспѣва́ющихъ всечестну́ю твою́ па́мять.

Грѣхо́вными вери́гами свя́занъ, пребога́те, и прегрѣше́ній мои́хъ плени́цами око́ванъ, прибѣга́ю къ покро́ву твоему́, вѣнцено́сче, разрѣше́нія прося́, но я́ко чу́дно ко Влады́цѣ всѣ́хъ, богому́дре, дерзнове́ніе имѣ́я, моли́ спасти́ся Христа́ пою́щимъ во вѣ́ки вся́.

Му́ченическими свѣтлостьми́ просвѣ́щенъ, всехва́льне, а́нгельскимъ счи́слился еси́ чино́мъ, съ ни́миже ра́дуяся и слику́я, му́чениче, при́сно, чудотво́рными исцѣле́ніи уясня́еши любо́вію тя́ чту́щія и вѣ́рно пою́щія: лю́діе, превозноси́те Христа́ во вѣ́ки вся́.

Богоро́диченъ: Пло́тію пріобщи́ся къ человѣ́комъ, я́ко Благоутро́бенъ, Содѣ́тель и Творе́цъ тва́ри, изъ Тебе́, Неискусобра́чная Богороди́тельнице, сію́ пріе́мъ: тѣ́мже Богоро́дицу, вѣ́рніи, Тя́ и́стинно сла́вимъ, вопію́ще и вѣ́рно пою́ще: лю́діе, превозноси́те Христа́ во вѣ́ки вся́.

Пѣ́снь 9.

Ирмо́съ: Тя́, Неискусобра́чную Ма́терь Бо́га Вы́шняго, Тя́, па́че ума́ ро́ждшую сло́вомъ вои́стинну Бо́га, вы́шшую пречи́стыхъ си́лъ, немо́лчными славословле́ніи велича́емъ.

Бо́дра тя́ храни́теля, великому́чениче, стяжа́вше, враго́въ злоу́міе удо́бь отгоня́ща и Це́рквамъ подаю́ща ми́ръ, страстоте́рпче, непреста́нно ублажа́емъ.

Крѣ́пость тебѣ́ на де́моны дарова́ Влады́ка, стра́сти же души́ и тѣлесе́ исцѣля́ти, блаже́нне, всеблагочести́вѣйшимъ дерзнове́ніемъ, моля́ся Спа́су, тѣ́мже тя́ вси́ ублажа́емъ.

Зарю́ Трисо́лнечную и еди́нственную созерца́яй, Еди́но въ Тре́хъ Божество́, и нача́ло пренача́льное, и исто́чникъ бла́гости, страстоте́рпче, тя́ пою́щія сохраня́й.

Богоро́диченъ: Изми́ мя́, Всенепоро́чная, мы́сленнаго плѣне́нія, избавле́ніе воздаю́щи, Влады́чице, Сы́на Твоего́ распя́тіе, е́же за всѣ́хъ бы́вшее, избавле́ніе, и ми́ръ, и спасе́ніе пою́щимъ Тя́.

Свѣти́ленъ. Подо́бенъ: Не́бо звѣзда́ми.

Искуси́вся, я́коже зла́то, огне́мъ и му́ками, досто́инъ яви́лся еси́ да́ръ Бо́га Вы́шняго, Ѳео́доре страстоте́рпче, о на́съ ны́нѣ моли́ся.

Сла́ва, и ны́нѣ, богоро́диченъ:

Держа́внымъ Твои́мъ покро́вомъ отъ враго́въ навѣ́та на́съ, Чи́стая, Твоя́ рабы́, сохрани́ вся́ невреди́мы, Тя́ бо стяжа́хомъ, еди́ну прибѣ́жище въ ну́ждахъ.

На стихо́внѣ стихи́ры окто́иха. Сла́ва, гла́съ 2:

Боже́ственныхъ даро́въ тезоимени́та тя́, треблаже́нне, почита́ю, Ѳео́доре: свѣ́та бо Боже́ственнаго незаходи́мое свѣти́ло я́влься, просвѣти́лъ еси́ страда́ньми твои́ми всю́ тва́рь, и, огня́ крѣпча́йшій яви́вся, пла́мень погаси́лъ еси́, и льсти́ваго змíя главу́ сокруши́лъ еси́. Тѣ́мже во страда́ніихъ твои́хъ Христо́съ приклони́вся, вѣнча́ боже́ственную главу́ твою́, великому́чениче страда́льче. Яко имѣ́я дерзнове́ніе къ Бо́гу, прилѣ́жно моли́ся о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Гро́здъ всезрѣ́лый, Чи́стая, Его́же невоздѣ́ланно во утро́бѣ носи́ла еси́, на дре́вѣ я́ко узрѣ́, Сего́ повѣ́шена, рыда́ющи, восклица́ше и взыва́ше: Ча́до, сла́дость иска́пай, е́юже оты́мется пія́нство вся́кое страсте́й, Благодѣ́телю, Мене́ ра́ди, Тебе́ ро́ждшія, Твои́мъ благоутро́біемъ умоля́емь.


НА ЛИТУРГІИ,

Блаже́нна окто́иха на 4 и свята́го пѣ́снь 3-я, на 4. Проки́менъ, гла́съ 7: Возвесели́тся пра́ведникъ о Го́сподѣ, и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 151 – 155 об.

/ Къ оглавленію раздѣла /


Наверхъ / Къ титульной страницѣ

0