Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 6.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 17-й де́нь.
Слу́жба святи́телю и чудотво́рцу Ермоге́ну, патріа́рху Моско́вскому и всея́ Россíи.

НА МАЛѢЙ ВЕЧЕРНИ,
На Го́споди воззва́хъ, стихи́ры на 4, гла́съ 1. Подо́бенъ: Прехва́льніи му́ченицы.

Прехва́льный Ермоге́не му́чениче,* тя́ ни темни́ца потаи́ла е́сть,* возсѣ́лъ бо еси́ та́мо, я́ко на престо́лѣ,* и отверзо́шася уста́ твоя́,* и, вну́трь ея бы́въ,* всю́ Ру́сь къ ратобо́рству за вѣ́ру, царя́ и оте́чество призва́лъ еси́.* Христу́ моли́ся,* дарова́ти душа́мъ на́шимъ ми́ръ и ве́лію ми́лость.

Прехва́льный Ермоге́не му́чениче,* тя́ ни темни́ца изнури́ла е́сть,* но ве́лія ре́вность Бо́жія объя́тъ тя́,* и испо́лнился еси́ огня́, поя́сти хотя́щаго сопроти́вныя,* и, вну́трь темни́цы бы́въ,* я́ко свѣти́льникъ, предъ Бо́гомъ сгора́лъ еси́.* Христу́ моли́ся,* дарова́ти душа́мъ на́шимъ ми́ръ и ве́лію ми́лость.

Прехва́льный Ермоге́не му́чениче,* тя́ ни земля́ потаи́ла е́сть,* но не́бо прія́тъ тя́, и отверзо́шася ти́ ра́йскія две́ри,* и, вну́трь бы́въ, дре́ва живо́тнаго наслажда́ешися.* Христу́ моли́ся,* дарова́ти душа́мъ на́шимъ ми́ръ и ве́лію ми́лость.

Сла́ва, и ны́нѣ, богоро́диченъ, подо́бенъ то́йже.

Дне́сь священному́ченикъ Ермоге́нъ* предстои́тъ Бо́жіей Ма́тери* и неви́димо за ны́ мо́лится съ на́ми:* Засту́пнице Усе́рдная, заступи́, спаси́ и поми́луй Ру́сь Правосла́вную* и сохрани́ ю́ покро́вомъ Твоея́ бла́гости.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Гра́де Москва́,* се́рдце Руси́ Правосла́вныя,* гра́де вели́кихъ святи́телей,* красу́йся но́вымъ чудотво́рцемъ Ермоге́номъ.

Сти́хъ: Честна́ предъ Го́сподемъ* сме́рть преподо́бныхъ Его́.

До́ме темни́чный,* до́ме святы́й,* въ не́мже святи́тель сконча́ся,* весели́ся,* обрѣ́лъ бо еси́ благода́ть:* престо́лъ Бо́жія хра́ма.

Сти́хъ: Въ па́мять вѣ́чную бу́детъ пра́ведникъ,* [отъ слу́ха зла́ не убои́тся].

До́ме свяще́нный,* гро́бе святы́й,* правосла́вныхъ сла́во,* отве́рзися* и бу́ди исто́чникъ жи́зни приснотеку́щія.

Сла́ва, и ны́нѣ, подо́бенъ то́йже:

Засту́пнице Усе́рдная,* Ма́ти Бо́га на́шего* и Предста́тельнице Чи́стая,* со святи́телемъ моли́* Сы́на Твоего́ о Твои́хъ рабѣ́хъ.

Тропа́рь, гла́съ 4:

Россíйскія земли́ первопресто́льниче* и неусы́пный о не́й къ Бо́гу моли́твенниче!* за вѣ́ру Христо́ву и па́ству твою́ ду́шу свою́ положи́въ,* держа́ву царе́й на́шихъ утверди́лъ еси́* и страну́ на́шу отъ нече́стія изба́вилъ еси́,* тѣ́мже вопіе́мъ ти́:* спаса́й на́съ моли́твами твои́ми,* священному́чениче Ермоге́не, о́тче на́шъ.

Сла́ва, и ны́нѣ, богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 3.

Гла́съ святы́я Це́ркве Правосла́вныя,* со умиле́ніемъ любве́ взыва́етъ:* пріиди́те, ча́да моя́, и́ми же болѣ́зную.* Пріиди́те къ святи́телю вели́кому,* пріиди́те къ священному́ченику преди́вному,* пріиди́те къ моли́твеннику за Ру́сь неотсту́пному,* припади́те и моли́теся изъ глубины́ души́:* священному́чениче Ермоге́не,* спаса́й и ны́нѣ ю́же возлюби́лъ еси́,* Ру́сь Правосла́вную моли́твами твои́ми.

Кто́ се́й, колѣ́на тѣлесе́ и души́ со умиле́ніемъ преклони́вый?* кто́ се́й, на лице́ свое́ пады́й?* кто́ се́й, наде́ждею о́чи на не́бо возводя́й,* и со упова́ніемъ нело́жнымъ ру́цѣ свои́ воздѣва́яй?* кто́ се́й, пла́чай и рыда́яй? —* Ты́ еси́, священному́чениче Ермоге́не,* ты́ еси́, печа́льниче земли́ на́шея,* преложи́ пла́чь ея́ на ра́дость.

Го́споди, а́ще не бы́хомъ, свята́го Твоего́ священному́ченика Ермоге́на имѣ́ли моли́твенника* и благосты́ню Твою́, ми́лующую на́съ,* ка́ко смѣ́ли, Спа́се, стоя́ти предъ лице́мъ Твои́мъ во грѣсѣ́хъ на́шихъ да́же до сего́ дне́?* Ка́ко смѣ́ли бы́хомъ противуста́ти враго́мъ на́шимъ,* и огради́ти вѣ́ру оте́цъ на́шихъ,* и утверди́ти ца́рство правосла́вное?* Но услы́шалъ еси́ моли́тву святи́теля вели́каго —* Ермоге́на, священному́ченика преди́внаго,* и собра́лъ еси́ подъ крилѣ́ его́ Ру́сь Правосла́вную,* и побѣго́ша врази́ ея́ предъ лице́мъ ея́.* И ны́нѣ моли́твами святи́теля пощади́ и спаси́ на́съ, Го́споди.

Жи́во сло́во Госпо́дне и дѣ́йственно:* не убо́йтеся отъ убива́ющихъ тѣ́ло, души́ же не могу́щихъ уби́ти,* убо́йтеся же па́че могу́щаго и ду́шу и тѣ́ло погуби́ти въ гее́ннѣ.* Потерпѣ́ душа́ твоя́ въ сло́во сіе́, священному́чениче Ермоге́не:* Еди́наго бою́ся, Живу́щаго на небесѣ́хъ, — ре́клъ еси́ беззако́ннымъ измѣ́нникомъ, —* Что́ ми е́сть заточе́ніе? — сла́дость моли́твы уедине́нныя.* Что́ ми е́сть мра́зъ и гла́дъ? — умира́ніе жи́зни грѣхо́вныя.* Что́ ми е́сть сме́рть? — ра́дость отше́ствія ко Христу́.* Не бою́ся стра́ха сме́ртнаго,* вся́ потерплю́ за Возлюби́вшаго мене́,* потерплю́ и не отве́ргуся,* я́ко спасе́ніе Руси́ отъ Це́ркве Правосла́вныя и отъ Пома́занника ея́ Держа́внаго.* Сіе́ разумѣ́йте и сему́ покаря́йтеся,* я́ко съ на́ми Бо́гъ Свое́ю благода́тію.

Разумѣ́йте, язы́цы, и покоря́йтеся,* услы́шите до послѣ́днихъ земли́,* а́ще бо па́ки возмо́жете, и па́ки побѣжде́ни бу́дете,* не дре́млютъ бо о́чи святи́теля Ермоге́на на стра́жѣ Руси́ Правосла́вныя,* не умолка́ютъ уста́ во всеору́жіи и́стины,* се́рдце же бди́тъ отъ стра́жи у́треннія до но́щи,* упова́ющу ему́ на Го́спода и моля́щуся:* да вознесе́тъ на Руси́ Це́рковь Правосла́вную* и да укрѣпи́тъ на вѣ́ки ца́рство Пома́занника ея́ — Царя́ Правосла́внаго.

Постиго́ша Ру́сь грѣси́ ея́,* пото́цы беззако́нія смято́ша ю́,* приложи́ бо беззако́ніе къ беззако́нію* и погиба́ше за беззако́ніе свое́,* но обрати́ся ко Го́споду и спасе́ся, —* святи́телю Ермоге́ну проповѣ́дующу, и къ покая́нію призыва́ющу:* пріиди́те, ча́да, послу́шайте мене́,* исповѣ́дайте на ся́ грѣхи́ ва́ша* и въ беззако́ніихъ ва́шихъ смири́теся;* лю́битъ бо Госпо́дь смире́нныя се́рдцемъ* и сокруше́нныя ду́хомъ пріе́млетъ,* я́ко у Го́спода ми́лость и мно́гое у Него́ избавле́ніе.

Си́це ре́клъ еси́, святи́телю Ермоге́не, враго́мъ ца́рства правосла́внаго:* та́ко вѣ́рую и та́ко исповѣ́дую —* подоба́етъ царю́ Руси́ бы́ти правосла́вну,* и о Це́ркви святѣ́й рачи́тельну,* и о ча́дѣхъ Це́ркве попечи́тельну,* и о наро́дѣхъ ца́рства промысли́тельну;* да хва́лятъ Го́спода вси́ лю́діе* и вси́ язы́цы да похва́лятъ Его́,* да бу́дутъ вси́ еди́но ста́до подъ ски́петромъ держа́вы его́,* и да пою́тъ вси́ еди́нѣми усты́ и еди́нѣмъ се́рдцемъ* вели́кое и́мя Святы́я Тро́ицы.

Моли́твами святи́теля Ермоге́на* прія́лъ е́сть Госпо́дь покая́ніе рыда́ющихъ предъ Ни́мъ* и утверди́лъ е́сть ми́лость Свою́ на боя́щихся Его́;* и се́, на Руси́ Правосла́внѣй ра́дуются о Го́сподѣ* и веселя́тся о Ду́сѣ Свя́тѣ,* ца́ріе си́лою Христо́вою хва́лятся* и сла́вою святы́я Це́ркве велича́ются,* лю́діе го́рняя му́дрствуютъ,* и́щуще небе́снаго Іерусали́ма,* и́стина Правосла́вія наро́домъ ца́рства благовѣству́ется во спасе́ніе всея́ земли́.* Та́ко и́стина Госпо́дня пребыва́етъ въ ро́дѣ на́шемъ* и ми́лость Его́ на на́съ утвержда́ется.

Сла́ва, и ны́нѣ, богоро́диченъ:

Ка́ко не диви́мся Богому́жному Рождеству́ Твоему́, Пречестна́я? Искуше́нія бо му́жескаго не пріе́мши, Всенепоро́чная, родила́ еси́ безъ отца́ Сы́на пло́тію, пре́жде вѣ́къ отъ Отца́ рожде́ннаго безъ ма́тере, ника́коже претерпѣ́вшаго измѣне́нія, или́ смѣше́нія, или́ раздѣле́нія, но обою́ существу́ сво́йство цѣ́ло сохра́ншаго. Тѣ́мже, Ма́ти Дѣ́во Влады́чице, Того́ моли́ спасти́ся душа́мъ, правосла́вно Богоро́дицу исповѣ́дающихъ Тя́.

Вхо́дъ. Проки́менъ. Чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма.
Та́же стихи́ры Ермоге́на, гла́съ 1, самогла́сны.

Что́ сіе́ е́сть пра́зднество?* что́ е́сть ве́лій гла́съ освяще́ннаго собо́ра?* что́ сіе́ е́сть благохва́льное и кра́сное собра́ніе?* Свяще́нницы ра́дуются,* лю́діе въ весе́ліе облека́ются,* и вся́ Правосла́вная Ру́сь торжеству́етъ,* святи́телю Ермоге́ну предлежа́щу,* и всѣ́хъ отъ ра́ки моще́й свои́хъ благословля́ющу,* и всѣ́хъ благода́тно утѣша́ющу, и та́йно глаго́лющу:* не бо́йся, ма́лое ста́до, не потопи́ти мо́рю жите́йскому корабля́ Іису́сова,* не поги́бнетъ Ру́сь правосла́вная и Бо́гомъ люби́мая,* я́ко благоизво́ли Госпо́дь да́ти на́мъ ца́рство,* на ка́мени бо вѣ́ры и пра́вды стои́мъ.

Пріиди́те вси́ вѣ́рніи,* святи́теля Ермоге́на восхва́лимъ,* звѣзду́, отъ восто́къ со́лнца возсія́вшую* и за́падъ со́лнца Правосла́віемъ вѣ́ры озари́вшую,* и ны́нѣ звѣзду́ но́ву, на сла́вныхъ небесѣ́хъ въ со́нмѣ священному́ченикъ явле́нную,* въ по́мощь Це́ркви и царю́ проти́ву враго́въ на́шихъ* и во утвержде́ніе вѣ́ры отце́въ на́шихъ.* Го́споди, моли́твами святи́теля ми́ръ Тво́й пода́ждь на́мъ и ве́лію ми́лость.

Что́ тя́ нарече́мъ, святи́телю Ермоге́не?* Ангела ли? — зане́ я́ко храни́тель правосла́вныя Руси́ бы́лъ еси́;* апо́стола — я́ко невѣ́рныя научи́лъ еси́;* му́ченика ли — я́ко за правосла́віе ца́рства ду́шу свою́ Христа́ ра́ди положи́лъ еси́.* Его́же моли́ поми́ловати ду́ши на́ша.

Сла́ва, и ны́нѣ, богоро́диченъ, гла́съ то́йже:

Притеце́мъ ны́нѣ къ Ма́тери Го́спода Вы́шняго* и вку́пѣ со святи́телемъ Ермоге́номъ воспое́мъ Засту́пницу Усе́рдную:* за всѣ́хъ мо́литъ бо Сы́на Своего́, Христа́ Бо́га на́шего,* и всѣ́мъ твори́тъ спасти́ся,* въ держа́вный Ея́ покро́въ прибѣга́ющимъ.

На стихо́внѣ стихи́ры, гла́съ 6. Подо́бенъ: Тридне́венъ воскре́слъ еси́.

Святи́телю Ермоге́не,* мо́лимъ тя́: при́зри на Ру́сь и посѣти́ ю́ моли́твою:* Го́споди, да исче́знутъ врази́ Руси́, я́ко ды́мъ,* и, я́ко во́скъ отъ лица́ огня́, да поги́бнутъ.

Сти́хъ: Честна́ предъ Го́сподемъ* сме́рть преподо́бныхъ Его́.

Моли́тву твою́ пролія́лъ ко Го́споду, святи́телю Ермоге́не,* и Тому́ возвѣсти́лъ еси́ печа́ли твоя́, глаго́ля:* се́, а́зъ ду́шу мою́ полага́ю за о́вцы моя́;* Го́споди, пріими́ ю́, я́ко кади́ло моли́твы о Руси́ правосла́внѣй,* да пребу́детъ свя́та и правовѣ́рна во вѣ́ки.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Облецы́ на́съ моли́твами твои́ми,* святи́телю о́тче на́шъ,* и научи́ на́съ правосла́вно моли́тися:* Го́споди, Го́споди, спаси́ на́съ,* пре́жде да́же до конца́ не поги́бнемъ.

Сла́ва, и ны́нѣ, богоро́диченъ, подо́бенъ то́йже:

Святи́телю Ермоге́ну предстоя́щу Бо́жіей Ма́тери* и моля́щуся о Руси́,* припаде́мъ и мы́ ко Пречи́стѣй:* Пресвята́я Богоро́дице, помога́й на́мъ.

На благослове́ніи хлѣ́бовъ: Тропа́рь, два́жды [пи́санъ на ма́лѣй вече́рни], и Богоро́дице Дѣ́во.., еди́ножды.

А идѣ́же нѣ́сть всено́щнаго бдѣ́нія: на вели́цѣй вече́рни, по Ны́нѣ отпуща́еши.., глаго́лемъ тропа́рь еди́ножды. Сла́ва, и ны́нѣ, богоро́диченъ воскре́сенъ.



НА УТРЕНИ,
На Бо́гъ Госпо́дь: [Тропа́рь святи́теля:] Россíйскія земли́ первопресто́льниче.., [два́жды.] Сла́ва, и ны́нѣ, богоро́диченъ: Еже отъ вѣ́ка утае́нное.

По 1-мъ стихосло́віи сѣда́льны, гла́съ 4. Подо́бенъ: Яви́лся еси́.

Строи́теля земли́ на́шея во дни́ нестрое́нія,* вѣ́рніи, соше́дшеся восхва́лимъ,* я́ко ца́рству на́шему пу́ть правосла́внаго строи́тельства проповѣ́да,* и, самозва́нныя богопроти́вныя вла́сти обличи́въ дерзнове́ннѣ,* въ темни́цѣ гла́домъ заму́ченъ бы́сть,* и ны́нѣ со священному́ченики живы́й,* Христу́ мо́лится, спасти́ся на́мъ.

Сла́ва:

Свѣ́тлую твою́ па́мять дне́сь творя́ще,* Спа́са и Го́спода моли́ти приле́жно тя́ мо́лимъ,* священному́чениче Ермоге́не,* зако́номъ да́ти правосла́вное утвержде́ніе.

И ны́нѣ, богоро́диченъ:

Те́плое заступле́ніе су́щимъ въ бѣда́хъ* и помо́щницу на́шу,* Еюже ра́бства инозе́мнаго изба́вихомся,* Богоро́дицу, вѣ́рніи, ублажа́емъ.

По 2-мъ стихосло́віи сѣда́льны, гла́съ и подо́бенъ то́йже:

Яви́лся еси́ дне́сь Руси́ правосла́внѣй,* и свѣ́тъ твоего́ благоволе́нія зна́менася на на́съ,* въ ра́зумѣ пою́щихъ тя́:* прише́лъ еси́ и яви́лся еси́* чудотво́рецъ пресла́вный.

Сла́ва:

Притеце́мъ, вѣ́рніи, къ ра́цѣ моще́й святи́теля Ермоге́на,* и проліе́мъ предъ ни́мъ печа́ль на́шу,* и ско́рбь на́шу предъ ни́мъ возвѣсти́мъ,* да обря́щемъ ве́ліе утѣше́ніе:* вся́къ бо вѣ́руяй не оты́детъ то́щь.

И ны́нѣ, богоро́диченъ:

Дне́сь Влады́чица мíра ра́дуется,* зря́щи святи́теля Ермоге́на, отъ Христа́ вѣнча́ннаго си́лою мно́гою* и при́сно о правосла́внѣй Руси́ моля́щася.* Его́же моли́твами, Ма́ти Бо́га Вы́шняго,* покры́й на́съ покро́вомъ Твоея́ бла́гости.

По поліеле́и сѣда́льны, гла́съ и подо́бенъ то́йже:

Прему́драго іера́рха восхва́лимъ,* я́ко ко́рмчаго Руси́ правосла́вныя,* къ го́рнему Іерусали́му путево́дствующа,* и на вся́ку пра́вду наставля́юща,* и отъ вся́каго зла́ спаса́юща.

Сла́ва:

Прему́драго іера́рха восхва́лимъ,* я́ко а́нгела-храни́теля Руси́ правосла́вныя,* ца́рство на́ше въ правосла́внѣмъ самодержа́віи утвержда́юща,* и Христа́ въ не́мъ вообража́юща.

И ны́нѣ, богоро́диченъ:

Ублажи́мъ Честнѣ́йшую го́рнихъ во́инствъ:* Та́ бо помогла́ е́сть святи́телю Ермоге́ну* упоко́итися въ вѣ́чныхъ оби́телехъ,* Та́ бо спасе́тъ и на́съ, грѣ́шныхъ.

По 50-мъ псалмѣ́ стихи́ра, гла́съ 4. Подо́бенъ: Яви́лся еси́.

Предста́тель теплѣ́йшій ца́рства правосла́внаго показа́лся еси́, Ермоге́не,* и, иносла́вная безбо́жная уче́нія отверга́я со дерзнове́ніемъ,* пра́вило показа́лся еси́ всѣ́мъ Правосла́вія,* о всѣ́хъ моля́ся, послѣ́дующихъ твои́мъ боже́ственнымъ уче́ніемъ и наказа́ніемъ.

Кано́нъ Богоро́дицы со ирмосо́мъ на 6, гла́съ 8: Во́ду проше́дъ.., и святи́теля, [его́же краегране́сіе: Вонми́, земле́, гла́су святи́теля Ермоге́на: свята́я и Бо́гомъ люби́мая Ру́сь не поги́бнетъ] на 8, гла́съ то́йже.

Пѣ́снь 1.

Ирмо́съ: Пѣ́снь возсле́мъ, лю́діе, чу́дному Бо́гу на́шему, свободи́вшему Изра́иля отъ рабо́ты, пѣ́снь побѣ́дную пою́ще и вопію́ще: пои́мъ Тебѣ́, еди́ному Влады́цѣ.

Вѣ́дущіи воскликнове́ніе, по́йте и велича́йте святи́теля вели́каго и, взира́я на кончи́ну его́, подража́йте вѣ́рѣ его́.

Оби́ліе благода́ти обита́етъ въ ра́цѣ моще́й твои́хъ, святи́телю Ермоге́не, ея́же ра́ди прославля́емъ тя́, я́ко новоявле́нна чудотво́рца, и про́симъ исцѣле́ній.

Нача́ло прему́дрости — стра́хъ Госпо́день, научи́вый и тя́, святи́телю, рабо́тати Го́сподеви съ тре́петомъ и ра́доватися предъ лице́мъ Его́. Да́ждь и на́мъ, по моли́твѣ твое́й, положи́ти сіе́ нача́ло благо́е.

Мно́ги ско́рби пра́веднымъ, и отъ всѣ́хъ и́хъ изба́витъ я́ Госпо́дь. По словеси́ сему́ бы́сть житіе́ твое́, святи́телю. И се́, ны́нѣ ра́дуешися на небесѣ́хъ и ра́дуеши всѣ́хъ, чту́щихъ па́мять твою́.

Испыта́яй свидѣ́нія Бо́жія бы́лъ еси́, святи́телю, въ зако́нѣ бо Христо́вѣ поуча́лся еси́ де́нь и но́щь, и оправда́нія Госпо́дня пра́ва су́ть, въ селе́нія бо пра́ведныхъ всели́ тя́ Госпо́дь.

За́повѣди Госпо́дни отъ ю́ности возлюби́лъ еси́ и преда́нія святы́хъ оте́цъ да́же до сме́рти соблю́лъ еси́, святи́телю, и ны́нѣ съ ни́ми сопрославля́еши Бо́га, Его́же моли́, да спасе́тъ тобо́ю ду́ши на́ша.

Его́же возлюби́лъ еси́ и Ему́же ре́вностно порабо́талъ еси́, ны́нѣ съ ли́ки святы́хъ воспѣва́еши и мо́лишися за ны́.

Богоро́диченъ: Моли́твеннице те́плая, Засту́пнице ро́да христіа́нскаго, пріими́ мольбы́ отъ на́съ, приле́жно призыва́ющихъ и моля́щихся Тебѣ́: покры́й страну́ на́шу правосла́вную покро́вомъ Твоея́ бла́гости.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Лѣ́та дре́вняя помяну́хъ, и поучи́хся во всѣ́хъ дѣ́лѣхъ твои́хъ, святи́телю, и обрѣто́хъ вѣ́дѣніе, ка́ко жи́ти въ мíрѣ се́мъ, отъ святы́хъ оте́цъ и отъ житíй святы́хъ вразумля́яся.

Епи́скопъ му́дрый лю́демъ и ца́рству бы́лъ еси́, святи́телю, уподо́бился еси́ му́жу, смотря́щу лице́ бытія́ ца́рства правосла́внаго въ лѣ́тописехъ дре́внихъ, я́ко же въ зерца́лѣ, поуча́ющуся прему́дрости Правосла́вія во дне́хъ дре́внихъ.

Го́споди, Госпо́дь на́шъ, я́ко чу́дно и́мя Твое́ по все́й Руси́. Госпо́дь посмѣе́тся враго́мъ на́шимъ. Госпо́дь засту́пникъ на́шъ. — Сію́ пра́вду живописа́лъ еси́, святи́телю, поуча́я ро́ды родо́въ, я́ко лѣтопи́сецъ правосла́вныя Руси́.

Лю́діе поучи́теся, лю́діе умили́теся, вразумля́юще себе́ самѣ́хъ въ пѣ́ніихъ и пѣ́снехъ духо́вныхъ, и́миже просла́вилъ е́сть святи́тель Ермоге́нъ Засту́пницу ро́да на́шего.

Аще не Госпо́дь сози́ждетъ до́мъ, всу́е труди́шася зи́ждущіи. Сію́ и́стину внуша́лъ еси́, святи́телю, стра́жемъ земли́ на́шея, да не осуетя́тся помышле́ніи свои́ми и да не всу́е мяту́тся.

Свяще́нникъ це́ркве святи́теля Никола́я бы́лъ еси́, Ермоге́не, и, возгрѣва́я да́ръ, живу́щій въ тебѣ́, ве́лію любо́вь Богома́тере стяжа́лъ еси́, Еюже отъ сла́вы въ сла́ву да́же до небесе́ влеко́мъ бы́лъ еси́ и въ селе́ніихъ пра́ведныхъ всели́лся еси́.

Уподо́бился еси́ купцу́, многоцѣ́ненъ би́серъ обрѣ́тшу, егда́ ико́ну Богома́тере отъ земли́ подъя́лъ еси́, я́ко сокро́вище благода́ти, ни́щія ду́хомъ обогаща́ющее.

Богоро́диченъ: Сказа́ніе чуде́съ Твои́хъ, Богоро́дице, е́же написа́ святи́тель Ермоге́нъ во сла́ву ико́ны Твоея́ Каза́нскія, воздвиза́етъ всю́ Ру́сь правосла́вную при́сно прибѣга́ти къ Тебѣ́ во всѣ́хъ обстоя́ніихъ и прилѣ́жно моли́ти: Пресвята́я Богоро́дице, помога́й на́мъ.

Сѣда́ленъ, гла́съ 8. Подо́бенъ: Прему́дрости.

Возше́дъ на высоту́ небе́сную, и боже́ственными отту́ду, о́тче, озари́вся сія́ніи чуде́съ, пресвѣ́телъ вои́стину яви́лся еси́ правосла́внѣй Руси́ па́стырь, на́мъ въ напа́стѣхъ сы́й предста́тель непобѣди́мъ; тѣ́мже пресла́вно враги́ побѣди́въ, лжу́ иносла́вія отгна́лъ еси́, и ца́рство правосла́вное спа́слъ еси́ отъ поги́бели, Ермоге́не. Моли́ Христа́ Бо́га, грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Святи́телю Ермоге́ну подража́юще, почти́мъ пресвѣ́тлую ико́ну Богома́тере, я́ко исто́чникъ неисчерпа́емый исцѣле́ній, и ублажи́мъ Ма́терь Бо́га Вы́шняго, я́ко Дѣ́ву и еди́ну въ жена́хъ, безъ сѣ́мене ро́дшую Бо́га пло́тію.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Возвѣсти́те во язы́цѣхъ дѣла́ Бо́жія, я́же яви́лъ на́мъ е́сть Госпо́дь Вседержи́тель отъ ико́ны Своея́ Ма́тере, — ре́клъ еси́, святи́телю, — да не реку́тъ язы́цы: гдѣ́ е́сть Бо́гъ и́хъ, въ Него́ же вѣ́руютъ? и да заградя́тся уста́ и́хъ.

Ята бы́сть земле́ю, но не удержа́нна, ико́на Пречи́стыя, да бу́детъ во утвержде́ніе новопросвѣще́ннымъ, блужда́ющимъ же во тмѣ́ невѣ́дѣнія, во открове́ніе свѣ́та и́стины, я́ко же му́дрствуетъ о се́мъ святи́тель Ермоге́нъ.

Ты́ еси́ изря́дное пѣ́ніе чуде́съ Пренепоро́чныя, ты́ еси́ утвержде́ніе немощству́ющихъ въ вѣ́рѣ, ты́ еси́ просвѣще́ніе омраче́нныхъ тмо́ю невѣ́рія, и пое́тъ тя́ ду́хъ мо́й.

Иго благо́е и бре́мя ле́гкое подъя́лъ еси́, Ермоге́не, егда́ о́бразъ а́нгельскій воспрія́лъ еси́, да пріи́деши въ во́зрастъ му́жа соверше́нна.

Тебѣ́, одѣ́ющагося моли́твою, я́ко ри́зою, добродѣ́телей подви́жника, Спа́сова оби́тель ви́дя, зѣло́ ра́довася: гряде́тъ бо свяще́нно-архимандри́тъ обнови́ти оби́тель и утверди́ти благоче́стіе.

Ермола́ю тезоимени́тый, усоверши́лся еси́, Ермоге́ну же, сожи́тельствуя, уподо́бился еси́, и се́, я́ко свѣти́льникъ немерца́яй, поставля́ешися на свѣ́щницѣ Каза́нскія Це́ркве.

Лѣ́по е́сть прему́дрому нему́дрыя просвѣща́ти, си́льному о Го́сподѣ немощны́я укрѣпля́ти, лѣ́по е́сть святи́тельствовати Ермоге́ну, вся́ могу́щему о Христѣ́ Іису́сѣ.

Богоро́диченъ: Яко Госпожу́, Цари́цу и Влады́чицу, заступа́ющу всѣ́хъ на́съ, въ держа́вный Тво́й покро́въ прибѣга́ющихъ, пое́тъ Тя́ святы́й Ермоге́нъ, съ ни́мже пріими́ и на́ша моле́нія и спаси́ ду́ши на́ша.

Пѣ́снь 5.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Егда́ бы́лъ еси́ въ Каза́ни, невѣ́дущія и́стиннаго Бо́га просвѣща́лъ еси́ и рабо́тати Еди́ному Бо́гу науча́лъ еси́. Сего́ ра́ди со апо́столы ра́дуешися, пріе́мля награ́ду благовѣ́стника Христо́ва.

Ре́вностію Бо́жіею по сла́вѣ ди́вныхъ во святы́хъ: Гу́рія, Варсоно́фія и Ге́рмана поревнова́лъ еси́, Ермоге́не, и, тѣ́хъ моли́твами вспомоществу́емый, въ оби́тели святи́телей пресели́лся еси́, предстоя́ Еди́ному Пастыренача́льнику, Его́же моли́ спасти́ся всѣ́мъ на́мъ.

Ми́луя, нака́зывалъ еси́ и, наказу́я, ми́ловалъ еси́, святи́телю, и се́ю му́дростію огражда́лъ еси́ отъ волко́въ хи́щныхъ новопросвѣще́нная ча́да твоя́ и вся́ о́вцы твоя́.

Опло́томъ во́ли царе́вой, ревну́ющія по правосла́вію ца́рства, немощны́я въ вѣ́рѣ огражда́лъ еси́ и къ попече́нію о спасе́ніи ца́рства во Христѣ́ Іису́сѣ царя́ Ѳео́дора призыва́лъ еси́, указу́я ца́рству спаси́тельное преображе́ніе.

Гра́дъ Москва́ и съ ни́мъ вся́ Ру́сь пла́кася го́рько, самозва́нну повели́телю воцари́вшуся и въ нече́стіе обле́кшуся, ты́ же еди́нъ, я́ко крѣ́пкій побо́рникъ, сему́ нече́стію противоста́лъ еси́ и вѣ́ру Правосла́вную со дерзнове́ніемъ исповѣ́далъ еси́.

Ермоге́на исповѣ́дника, и́же не убоя́ся преще́нія сме́ртнаго и слове́съ жесто́кихъ отъ нечести́ваго врага́, пѣ́сньми ублажа́емъ.

На Него́же ра́дуяся взира́ютъ чи́ни а́нгельстіи и вси́ святíи, Тому́ предстои́ши ны́нѣ, Ермоге́не, и я́ко исповѣ́дникъ хода́тайствуеши при́сно за Ру́сь правосла́вную.

Богоро́диченъ: Ада́мово воззва́ніе, Пренепоро́чная Дѣ́во, съ Тобо́ю Госпо́дь и Тобо́ю съ на́ми Бо́гъ, разумѣ́йте сіе́, язы́цы, и покаря́йтеся.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Собо́ра освяще́ннаго избра́ніемъ и повелѣ́ніемъ ца́рскимъ возше́лъ еси́, святи́телю, на престо́лъ патріа́ршія вла́сти, да спасе́ши Ру́сь, напа́стьми мно́гими обурева́ему.

Вѣ́ры нелицемѣ́рныя исповѣ́даніе неколе́блемое начерта́лъ еси́, святи́телю, руко́ю твое́ю и сію́ вѣ́ру пре́дъ лице́мъ всея́ Це́ркве въ собо́рѣ Успе́нія Пречи́стыя исповѣ́далъ еси́, да у́зритъ вся́ Ру́сь ка́мень и́стинныя вѣ́ры, на не́мже сози́ждется ца́рство и утверди́тся въ Правосла́віи.

Язы́къ тво́й — тро́сть кни́жника скоропи́сца, и́мже загради́шася уста́ грѣ́шнича и уста́ льсти́ваго, и усмири́ся мяте́жъ нечести́выхъ.

Тму́ лжи́, я́же бы́сть о́крестъ престо́ла ца́рскаго, разгоня́я сло́вомъ и́стины, и на борьбу́ съ измѣ́нниками правосла́вное во́инство благословля́я, изне́слъ еси́ на сто́гна гра́да Москвы́ покро́въ отъ чудото́чныхъ моще́й царе́вича Дими́трія, да возвѣсти́тся пра́вда царе́ва и да укрѣпи́тся держа́ва царя́ правосла́внаго.

Аще ца́рь благочести́въ, — ре́клъ еси́, святи́телю, — и по вѣ́рѣ правосла́внѣй побора́тель, благослови́те о не́мъ Го́спода и возлюби́те его́, и въ стра́сѣ Бо́жіи повину́йтеся ему́ и покоря́йтеся.

Яко дре́во при исхо́дищихъ во́дъ, бы́лъ еси́ у престо́ла благода́ти, святи́телю, осѣня́я прохла́дою утѣше́нія и многопло́діемъ пра́вды царя́ правосла́вныя Руси́.

И проповѣ́дуеши, и облича́еши, и призыва́еши, и мо́лишися, и моли́тися во всѣ́хъ хра́мѣхъ повелѣва́еши, святи́телю, о здра́віи и спасе́ніи госуда́ря Бо́гомъ вѣнча́ннаго, о покоре́ніи ему́ всѣ́хъ враго́въ его́ и о умире́ніи его́ ца́рства.

Богоро́диченъ: Богоро́дице Дѣ́во, упова́ніе христіа́номъ, покры́й, соблюди́, сохрани́ и спаси́ Ру́сь, прибѣга́ющу ко Твоему́ заступле́нію.

Конда́къ, гла́съ 6:

Темни́цею и гла́домъ изнуря́емь, да́же до сме́рти вѣ́ренъ пребы́лъ еси́, блаже́нне Ермоге́не, малоду́шіе отъ серде́цъ люде́й твои́хъ изгоня́я и на о́бщій по́двигъ вся́ призыва́я. Тѣ́мже и нечести́выхъ мяте́жъ низложи́лъ еси́ и ски́птры ца́рства утверди́лъ еси́, да вси́ зове́мъ ти́: ра́дуйся, засту́пниче Россíйскія земли́.

Икосъ:

Пріиди́те, правосла́вніи лю́діе, пѣ́сньми ублажи́мъ пресвѣ́тла свѣти́льника Це́ркве Россíйскія, непоколеби́ма столпа́ вѣ́ры правосла́вныя, те́пла моли́твенника и предста́теля за зе́млю на́шу, крѣ́пка стоя́теля проти́ву враго́въ, стро́гаго обличи́теля на преда́телей и разори́телей правосла́внаго ца́рства, до́браго па́стыря, ду́шу свою́ за о́вцы своя́ положи́вша и сего́ ра́ди вѣнце́мъ сла́вы отъ Го́спода вѣнча́нна, къ нему́же припаде́мъ, вѣ́рою и любо́вію зову́ще си́це: ра́дуйся, вели́кій въ іера́рсѣхъ Россíйскихъ святи́телю Христо́въ о́тче на́шъ Ермоге́не.

Пѣ́снь 7.

Ирмо́съ: Отроцы богочести́віи въ Вавило́нѣ, о́бразу злато́му не поклони́шася, но посредѣ́ пе́щи о́гненныя, ороша́еми, пѣ́снь воспѣва́ху, глаго́люще: превозноси́мый отце́въ и на́шъ Бо́же, благослове́нъ еси́.

Огне́мъ лю́тыя зло́бы опаля́ема, пе́щи о́гненнѣй уподо́билася е́сть правосла́вная Ру́сь во дни́ разоре́нія и мяте́жа лю́таго, си́лою же слове́съ твои́хъ, святи́телю, ороша́ема и до дне́сь пое́тъ правосла́вно: отце́въ и на́шъ Бо́же, благослове́нъ еси́.

Гла́съ въ собо́рѣ Успе́нія Пречи́стыя слы́шанъ бы́сть: пока́йтеся о зло́бѣ ва́шей, врази́ царю́ правосла́вному и Бо́гови, и́бо Бо́гомъ вѣнча́нъ е́сть на ца́рство и Бо́гомъ ца́рствуетъ во утвержде́ніе Христо́вы пра́вды, пою́ще Го́сподеви: отце́въ Бо́же, благослове́нъ еси́.

Оте́цъ всея́ Руси́ ца́рь на́шъ и храни́тель оте́ческихъ преда́ній со вла́стію: сего́ ра́ди повину́йтеся ему́ и покаря́йтеся, и по́йте съ ни́мъ и́мени Всевы́шняго: отце́въ и на́шъ Бо́же, благослове́нъ еси́.

Моли́теся и пости́теся, и измѣни́теся въ но́ваго человѣ́ка, одѣ́яна въ добродѣ́тели боголю́бія и царелю́бія, да пода́стъ всѣ́мъ на́мъ Госпо́дь ми́ръ и любо́вь, ца́рству крѣ́пкое едине́ніе, царю́ побѣ́ду на враги́ и одолѣ́ніе.

Любо́вію къ царю́ согрѣва́яйся и ре́вностію по вѣ́рѣ па́че огня́ разгора́яйся, попаля́лъ еси́, святи́телю, те́рнія грѣхолюби́ваго мяте́жа, обновля́я и утвержда́я обветша́вшее ца́рство.

Юнцы́ ту́чніи: самозва́нцы мяте́жніи, цари́ инозе́мніи и измѣ́нницы нечести́віи одержа́ша Ру́сь, предъ лице́мъ же твоея́ пра́вды, святи́телю, исчезо́ша, я́ко ды́мъ отъ огня́, да весели́тся правосла́вный ца́рь о Го́сподѣ, и да торжеству́етъ Правосла́віе.

Бо́гови рабо́тницы и тебѣ́ помо́щницы бы́ша святи́тели Христо́вы: Филаре́тъ Росто́вскій, Ефре́мъ Каза́нскій, Ѳеокти́стъ Тверскíй и Галактіо́нъ Су́здальскій, и́миже во всю́ зе́млю изы́де сло́во твое́, Ермоге́не святи́телю, и въ концы́ Руси́ вѣща́ніе твое́.

Богоро́диченъ: Иже въ напа́стехъ и въ ско́рбехъ, и въ болѣ́знехъ, обремене́нніи грѣхи́ мно́гими, пріиди́те къ Засту́пницѣ Усе́рднѣй, Ма́тери Го́спода Вы́шняго, Та́ бо исцѣли́тъ вы́, и утѣ́шитъ, и упоко́итъ.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Ми́лостыни мно́ги твори́лъ еси́ лю́демъ, святи́телю, егда́ бога́тіи обнища́ша ми́лостію и сребролю́бія ра́ди не внима́ху, е́же помощи́ неиму́щимъ, ты́ же ре́клъ еси́ ке́ларю Се́ргіевой оби́тели Авраа́мію, и жи́тницы отверзо́шася, и а́лчущіи насы́тишася, и благослови́ша Го́спода.

Аще и пѣ́нится жите́йское мо́ре, а́ще и бѣсну́ется, воздвиза́емо напа́стей бу́рею, не потопи́ти ему́ корабля́ Іису́сова: на ка́мнѣ бо вѣ́ры и пра́вды стои́мъ. — Та́ко ре́клъ еси́, святи́телю, и бы́сть та́ко, и се́, торжеству́ютъ правосла́вніи и благословля́ютъ Го́спода.

Яко до́брый ко́рмчій, приве́лъ еси́, святи́телю, кора́бль Россíйскія держа́вы къ ти́хой при́стани Правосла́вныя Це́ркве, и се́, ца́рство на́ше осоля́ется благода́тію Свята́го Ду́ха и благословля́етъ Го́спода.

Ре́клъ еси́, святи́телю, боя́щимся Го́спода: не бо́йся, ма́лое ста́до, я́ко благоизво́лилъ е́сть Оте́цъ Небе́сный дарова́ти на́мъ ца́рство. Та́ко вѣ́ровалъ еси́ и та́ко по вѣ́рѣ воспрія́лъ еси́. И се́, свята́я Це́рковь ра́дуется о правосла́віи ца́рства и благословля́етъ Го́спода.

Уничижи́ша тя́ возстаю́щіи на тя́, мета́юще пра́хъ и песо́къ въ лице́ твое́, да отрече́шися отъ Бо́жія пома́занника, ты́ же вся́ претерпѣ́лъ еси́ пра́вды ра́ди, благословля́я Го́спода.

Свята́я и Бо́гомъ люби́мая Ру́сь не поги́бнетъ, — ре́клъ еси́, святи́телю, измѣ́нникомъ, и преда́телемъ, и всѣ́мъ враго́мъ на́шимъ, — всу́е тружда́етеся, а́ще не Госпо́дь созида́етъ. Пока́йтеся и благослови́те Го́спода.

Не вѣ́даемъ, ка́ко и нарещи́ ва́съ, — ре́клъ еси́, святи́телю, мяте́жникомъ и измѣ́нникомъ, — отступи́ли бо есте́ отъ Бо́га, отпа́ли отъ собо́рныя и апо́стольскія Це́ркве, отступи́ли отъ Бо́гомъ и святы́мъ еле́емъ пома́заннаго царя́, забы́ли есте́ обѣ́ты правосла́вныя вѣ́ры на́шея: стоя́ти до сме́рти за до́мъ Пресвяты́я Богоро́дицы и за ца́рство правосла́вное. Пока́йтеся и обрати́теся и благослови́те Го́спода.

Богоро́диченъ: Еже о на́съ испо́лнивъ смотре́ніе Бо́жіе и я́же на земли́ соедини́въ небе́снымъ, носи́ла еси́ во чре́вѣ отъ Ду́ха Свя́та, Пренепоро́чная, и родила́ еси́ на́мъ всѣ́хъ Бо́га, Его́же вся́ дѣла́ Госпо́дня, пою́тъ и превозно́сятъ во вся́ вѣ́ки.

Пѣ́снь 9.

Ирмо́съ: Вои́стину Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Пречи́стѣй Влады́чицѣ ввѣ́рилъ еси́, святи́телю, правосла́вное во́инство, и стоя́ти за вѣ́ру неподви́жно да́же до сме́рти благослови́лъ еси́, и боя́тися Еди́наго, на небесѣ́хъ Живу́щаго, научи́лъ еси́. Сего́ ра́ди со исповѣ́дники правосла́вныя пра́вды раду́ешися.

Окая́нныя измѣ́нники анаѳема́тствовалъ еси́, правосла́внымъ же во́иномъ и всѣ́мъ ревни́телемъ правосла́внаго ца́рства ми́лость отъ Го́спода Бо́га и отъ своего́ смире́нія благослове́ніе препода́лъ еси́, святи́телю, и́мже бы́сть побѣ́да и одолѣ́ніе на враги́ и всея́ Руси́ спасе́ніе, тебѣ́ же вѣне́цъ отъ Бо́га, я́ко строи́телю святы́я жи́зни.

Гла́съ о́гненныя ре́вности о спасе́ніи ца́рства не вя́жется, а́ще и заключа́ется во хра́минѣ пу́стѣ, я́ко во гро́бѣ, сего́ ра́ди и заповѣ́далъ еси́ ученику́ твоему́ Діони́сію игу́мену и и́нокомъ оби́тели свята́го Се́ргія огласи́ти всю́ Ру́сь правосла́вную, да воздви́жется спаси́тельная бра́нь во сла́ву святы́я Це́ркве и во утвержде́ніе держа́вы Россíйскія, ю́же возлюби́лъ еси́ и о не́йже мо́лишися Бо́гу.

И первопресто́льникъ апо́стольскія Це́ркве, и исповѣ́дникъ правосла́вныя вѣ́ры, и вторы́й Златоу́стъ во обличе́ніе грѣхолюби́выхъ и мяте́жныхъ, и строи́тель правосла́внаго ца́рства бы́лъ еси́, святи́телю, и за сіе́ произволе́ніе темни́цею и гла́домъ му́чимъ бы́лъ еси́, и, прія́въ отъ Бо́га неувяда́емый вѣне́цъ, съ му́ченики весели́шися.

Бо́гу на́шему тобо́ю сла́ва, тебѣ́ же, священному́чениче Ермоге́не, довлѣ́етъ ра́доватися во свѣ́тѣ лица́ Его́ и непреста́нно моли́тися, да не поги́бнетъ Ру́сь свята́я, но да бу́детъ да́же до конца́ свѣ́тъ во открове́ніе язы́комъ правосла́вныя пра́вды.

Ни́щь и боля́й е́смь а́зъ, святи́телю, и во смире́ніи свое́мъ припа́даю къ цѣльбоно́снѣй ра́цѣ твое́й, исцѣлѣ́нія тре́буя.

Его́же возлюби́лъ еси́, Ему́же ду́шу свою́ пре́далъ еси́, и ны́нѣ предстои́ши со дерзнове́ніемъ я́ко му́ченикъ; моли́ Бо́га о на́съ, святы́й священному́чениче Ермоге́не.

Богоро́диченъ: Тя́ исповѣ́дуемъ, я́ко Ма́терь Го́спода Вы́шняго, и, невозвра́тну наде́жду иму́ще на Тя́, мо́лимся Тебѣ́ умиле́нною душе́ю и сокруше́ннымъ се́рдцемъ: всѣ́мъ поле́зная да́руй, и вся́ спаси́, Богоро́дице Дѣ́во, Ты́ бо еси́ Боже́ственный покро́въ рабо́мъ Твои́мъ.

Свѣти́ленъ. Подо́бенъ: Жены́, услы́шите.

Во свѣ́тѣ Правосла́вія, его́же ревни́тель бы́лъ еси́, святи́телю Ермоге́не, зри́мъ Свѣ́тъ и́стины, въ не́мже полнота́ дарова́ній Ду́ха, ра́дуемся о Го́сподѣ и велича́емъ Озари́вшаго тя́ Свѣ́томъ присноживо́тнымъ. [Два́жды.]

Сла́ва, и ны́нѣ, богоро́диченъ:

Ма́терь незаходи́маго Свѣ́та, осіява́ющую Ру́сь покро́вомъ Ма́терняго заступле́нія, пѣ́сньми велича́емъ, я́ко свѣтлѣ́йшую го́рнихъ во́инствъ.

На хвали́техъ стихи́ры на 6, гла́съ 7.

Сотвори́те въ пѣ́снѣхъ су́дъ напи́санъ,* сла́ва сія́ бу́детъ вели́кому Ермоге́ну:* то́й бо е́сть Правосла́вія ревни́тель* и всея́ Руси́ храни́тель,* я́ко оре́лъ, птенцы́ своя́ покрыва́яй.

Хвали́те Бо́га во святѣ́мъ Его́:* то́й бо возвели́чилъ е́сть Его́* и во всѣ́хъ дѣ́лѣхъ Его́ оправда́лъ е́сть Его́* утвержде́ніемъ си́лы Его́.

Хвали́те свята́го въ си́лѣ его́:* вся́ бо мо́жетъ о укрѣпля́ющемъ Іису́сѣ.* Хвали́те его́ по мно́жеству чуде́съ его́:* вся́ бо неду́жныя исцѣля́етъ* о и́мени Госпо́днемъ.

Хвали́те свята́го во псалмѣ́хъ и пѣ́снехъ,* хвали́те его́ въ пѣ́ніихъ духо́вныхъ,* велича́йте сла́ву оте́цъ на́шихъ,* воспѣва́йте утвержде́ніе царе́й на́шихъ,* ра́дуйтесь о не́мъ и весели́теся.

Хвали́те свята́го въ собо́рѣ освяще́нныхъ,* похвали́те его́ вси́ лю́діе:* то́й бо е́сть красота́ церко́вная,* то́й бо е́сть добро́та наро́дная,* то́й бо е́сть ра́дость царе́ва.

Хвали́те свята́го во святи́телехъ,* похвали́те его́ во святѣ́йшихъ патріа́рсѣхъ,* ублажи́те его́ во исповѣ́дницѣхъ* и просла́вите его́ во священному́ченицѣхъ.* Хвали́те его́ во всѣ́хъ дѣ́лѣхъ его́.

Сла́ва, гла́съ то́йже:

Пріиди́те ублажи́мъ па́стыря до́браго земли́ на́шея,* за вѣ́ру Руси́ вся́ претерпѣ́вшаго,* и за правосла́віе ца́рства ду́шу свою́ положи́вшаго,* и ны́нѣ ми́лостію Бо́жіею чудотво́рца,* явле́ннаго во утвержде́ніе вѣ́ры немощству́ющихъ,* и во исцѣлѣ́ніе всѣ́хъ неду́гующихъ,* и во упокое́ніе озло́бленныхъ грѣхи́ мно́гими,* да вси́ возра́дуемся и да пое́мъ ему́:* ра́дуйся, любы́, на́съ согрѣва́ющая;* ра́дуйся, си́ло, на́съ исцѣля́ющая;* ра́дуйся, ра́зуме, всѣ́хъ просвѣща́яй;* ра́дуйся, стра́же, правосла́віе ца́рства охраня́яй;* ра́дуйся, святи́телю Ермоге́не.

И ны́нѣ, богоро́диченъ, гла́съ то́йже:

Пріиди́те, восхва́лимъ Прехва́льную,* Сла́внѣйшую всѣ́хъ земноро́дныхъ* и Честнѣ́йшую небе́сныхъ во́инствъ,* Ма́терь Го́спода Вы́шняго,* Засту́пницу Усе́рдную.

Славосло́віе вели́кое. [Ектеніи́] и отпу́стъ.
Дае́тся же и еле́й бра́тіи отъ канди́ла свята́го, и ча́съ 1-й.



НА ЛИТУРГІИ,

Блаже́нна отъ кано́на, пѣ́сни 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Апо́столъ къ Евре́емъ, зача́ло 335. Аллилу́ія, гла́съ 4: Свяще́нницы Твои́ облеку́тся въ пра́вду, [и преподо́бніи Твои́ возра́дуются]. Ева́нгеліе Іоа́нна, зача́ло 36. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба святи́телю и чудотво́рцу Ермоге́ну. [Па́мять святи́теля Ермоге́на пра́зднуется Мѣ́сяца Феѵруа́рія въ 17-й де́нь. Переложе́ніе и откры́тіе святы́хъ моще́й — Мѣ́сяца Ма́ія въ 12-й де́нь.] — Изда́ніе Моско́вскаго Больша́го Успе́нскаго Собо́ра. — М.: Сѵнода́льная Тѵпогра́фія, 1917. — 22 л.

/ Къ оглавленію раздѣла /


Наверхъ / Къ титульной страницѣ

0