Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 16-й де́нь.
Свята́го [священно]му́ченика Памфи́ла [пресви́тера] и и́же съ ни́мъ.

[ВЕЧЕРЪ,]
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

Свѣ́тло въ вѣ́рѣ Христо́вѣ, Памфи́ле сла́вне,* и боже́ственною сла́вою возне́сся,* Кесарíи яви́лся еси́ благоукраше́ніе,* святи́тель въ не́й прелюбе́зенъ тезоимени́тству бы́въ,* и страда́лецъ всече́стенъ,* и му́ченикъ вѣ́ренъ.

По́лкъ собра́лъ еси́, Памфи́ле держа́вне,* страда́лецъ до́блихъ двана́десять число́мъ,* Боже́ственно во́инство я́вльшеся,* и́мже враги́ побѣ́ждше,* взя́ти бы́сте пестрообра́зно ко Го́споду,* муче́ніемъ сконча́вшеся.

Сла́ва, и ны́нѣ, богоро́диченъ, гла́съ и подо́бенъ то́йже:

Жезло́мъ Твоего́ предста́тельства,* Богороди́тельнице Чи́стая,* звѣри́ныя стра́сти* окая́нныя моея́ души́ отжени́ у́бо,* ми́рно къ жи́зни мя́ направля́ющи,* и свято́му мя́ ста́ду* избра́нныхъ Твои́хъ ове́цъ причти́.

Крестобогоро́диченъ. Подо́бенъ то́йже:

Воздви́жена я́ко ви́дѣ на Крестѣ́ Агнца* Непоро́чная Дѣ́ва, пла́чущи, вопія́ше:* сла́дкое Мое́ Ча́до,* что́ но́вое и пресла́вное видѣ́ніе?* Ка́ко, содержа́й вся́ческая го́рстію,* на дре́вѣ пригвожда́ешися пло́тію?


[НА УТРЕНИ,]
Кано́нъ, его́же краегране́сіе: Собо́ръ дванадесяточи́сленный страстоте́рпцевъ воспою́. Творе́ніе Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Си́лою Всесвята́го Ду́ха дванадесяточи́сленный собра́вся по́лкъ, крѣ́пко злочести́выхъ безбо́жное и лука́вое ополче́ніе я́ко побѣдоно́сецъ побѣди́.

Посрами́ся, страстоте́рпцемъ му́ченикомъ вра́гъ прирази́вся, сво́й бо ту́лъ льсти́вый испраздни́въ горча́йше, низложи́ти не возмо́же до́блѣйшихъ крѣ́пости.

Гнѣ́въ е́ллинскаго шата́нія попра́сте Боже́ственнымъ ра́зумомъ му́ченицы Христо́вы и му́дростію укра́шени, е́йже проти́витися не возмого́ша благоче́стію проти́вницы.

Богоро́диченъ: Облакъ, пра́вды Со́лнце на́мъ возсія́вшую, Отча Сы́на Единоро́днаго, Богоро́дице Всепѣ́тая, всеблагоче́стно сла́вяще, вы́ну Тя́ блажи́мъ.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Просія́лъ еси́ благоче́стно дѣ́ломъ, и сло́вомъ, и честны́мъ пома́заніемъ, му́чениче Христо́въ Памфи́ле, свяще́нства, богому́дре.

Якоже цѣвни́ца всеблаголѣ́пна, исповѣ́даніемъ устро́ена, пою́щи вѣща́нія, Христо́вы му́ченицы со́брани бы́сте.

Теку́ще къ ра́зуму небе́снаго и честна́го зва́нія, я́ко побѣди́теліе вѣне́цъ отъ Влады́ки прія́сте.

Богоро́диченъ: Всели́ся въ ны́ въ вы́шнихъ Живы́й, Пречи́стая, вы́ше естества́, пло́ть бо изъ Тебе́ пріе́мъ, облече́ся.

Сѣда́ленъ, гла́съ 4. Подо́бенъ: Удиви́ся Іо́сифъ.

Дванадеся́тный ли́къ боже́ственныхъ му́ченикъ, вои́стинну проти́ву мучи́телей враго́въ ополчи́вся тве́рдо, си́хъ ору́жіи вѣ́ры побѣди́ и, вѣнце́мъ отъ Бо́га одѣ́явся, а́нгельскимъ же лико́мъ причте́ся. Съ ни́миже мо́литъ всегда́ изба́витися отъ напа́стей же, и скорбе́й, и вѣ́чныхъ му́къ того́ блажа́щимъ.

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по Рождествѣ́ па́ки Дѣ́ва пребыва́етъ.

Крестобогоро́диченъ:

Дѣ́ва и Агница, ви́дѣвши на Крестѣ́, безъ сѣ́мене изъ Нея́ Агнца ро́ждшагося и копіе́мъ прободе́на, печа́ли уя́звлена стрѣла́ми, вопія́ше болѣ́зненно, восклица́ющи: что́ но́вое та́инство? Ка́ко умира́еши, Иже живота́ еди́нъ Госпо́дь? Тѣ́мже воскресни́, па́дшаго воздвиза́я пра́отца.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Укра́шено Боже́ственными апо́столъ и проро́къ дарова́ньми, ликостоя́ніе яви́ся му́ченикъ Твои́хъ, си́хъ равночи́сленно, Влады́ко, я́вльшееся промышле́ніемъ Твои́мъ.

Отъ разли́чныхъ собра́вшеся жи́тельствъ, я́ко вма́лѣ всецѣ́лъ о́бразъ Це́ркве спаса́ти сподо́бистеся, согла́сно зову́ще: сла́ва си́лѣ Твое́й, Го́споди.

Направля́емь дла́нію Влады́ки, и́же Того́ ра́ди во́льную сме́рть подъя́тъ собо́ръ прехва́льный му́чениковъ, взыва́юще: сла́ва си́лѣ Твое́й, Го́споди.

Богоро́диченъ: Богоглаго́ланьми оглаша́еми, Богоро́дице, и́же о Тебѣ́, и ви́дяще си́хъ сбы́тія, — ра́дуйся, — Тебѣ́ вопіе́мъ, — Дѣ́во Всенепоро́чная, изба́вленніи Рождество́мъ Твои́мъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Не терпя́ су́щимъ на земли́ послужи́ти, о Памфи́ле, боже́ственное житіе́, е́же отъ младе́нства имѣ́яше, страда́ніемъ уясни́лъ еси́.

Боже́ственною сѣди́ною и му́дростію укра́шенъ, ко гра́ду свято́му устреми́вся Уа́лъ, я́ко му́ченикъ вѣнча́ся.

Умъ имѣ́я Христо́въ, я́ко Па́влу тезоимени́тъ прехва́льне, му́ченическимъ вѣнце́мъ, зако́нно пострада́въ, украси́лся еси́.

Богоро́диченъ: Испра́вила еси́, Богоро́дице Чи́стая, Евино поползнове́ніе, ро́ждши Бо́га Сло́ва, низве́рженныхъ паде́ніе испра́вльшаго.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Наде́ждами вѣ́чныя жи́зни утвержда́еми, тѣле́съ раздробле́нія, ра́дующеся, терпя́ху до́бліи, боже́ственныхъ проро́къ Твои́хъ, Спа́се, купноиме́нніи.

Сме́ртію жи́знь лу́чшую купи́ша, Самуи́лъ и Илія́, Даніи́лъ и боже́ственный Іеремíя, и къ си́мъ Иса́ія великоимени́тый.

Свѣти́льники свѣ́тлы Бо́гу ны́нѣ Еги́петъ возсіява́етъ, и́же дре́вле глубо́кою тмо́ю покрыва́емый невѣ́дѣнія, богоразу́мія свѣ́томъ обогати́вся.

Богоро́диченъ: Го́ру Тя́ Даніи́лъ зря́ше, Всенепоро́чная, изъ нея́же отсѣче́ся Ка́мень, сокруши́вый вся́кій пре́лести о́бразъ и испо́лнивъ богоразу́мія вся́ концы́.

Конда́къ, гла́съ 4. Подо́бенъ: Вознесы́йся.

Муче́ніемъ стра́шнымъ предлежа́щимъ Госпо́дни страда́льцы до́бліи въ небоя́зненномъ ра́дующеся мудрова́ніи, си́мъ собесѣ́доваша, о пло́ти неради́вше, тѣ́мже наслѣ́дствоваша вѣ́чнующую сла́ву, о на́съ моля́щеся при́сно, восхваля́ющихъ и́хъ по́двиги.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Свѣ́тлымъ лице́мъ и ума́ чистото́ю, му́чениче, предзря́ бу́дущую ра́дость, му́ки преоби́дѣлъ еси́, стру́жемь неми́лостивно, всеблаже́нне Порфи́ріе.

Юноши три́ въ пещи́ спасы́й Бо́гъ, Се́й, страстоте́рпче блаже́нне, тя́, Его́ ра́ди во огни́ жего́ма, я́вѣ пріе́млетъ, благово́нну же́ртву, Порфи́ріе.

Крѣ́постію души́ твоея́ укра́шенъ и тѣлесе́, всю́ мучи́теля, Селевкíе, крѣ́пость низложи́лъ еси́, всехва́льне, — благослове́нъ еси́, Бо́же мо́й, — зовы́й, — и Го́споди.

Богоро́диченъ: Яко Богоро́дица, Краснѣ́йшаго всея́ тва́ри родила́ еси́, Бо́жіе бо была́ еси́ и́стинно оби́телище всесвято́е: благослове́на Ты́ въ жена́хъ, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Зако́номъ ты́ повину́яся Христо́вымъ, отве́рглъ еси́ вся́, всему́дре Селевкíе, я́ко во́инъ же бы́лъ еси́ и благоче́стія учи́тель, о сирота́хъ и вдова́хъ попече́ніе имѣ́я и взыва́я: благослови́те, вся́ дѣла́ Госпо́дня, Го́спода.

Заре́ю сія́я мы́сленною, ста́рче сла́вный и му́чениче Ѳеоду́ле, и ра́бъ и́скренній бы́лъ еси́ Влады́цѣ, подо́бяся, Его́же Кре́стъ жела́я, ра́дуяся, претерпѣ́лъ еси́, — благослови́те, — поя́, — вся́ дѣла́ Госпо́дня, Го́спода.

Хра́мъ яви́вся, Іуліа́не, Боже́ственнаго Ду́ха, нра́вовъ бла́гостію украси́лся еси́, испо́лнь у́бо благоговѣ́нія и свѣ́тлости, испо́лнь же вѣ́ры яви́вся, сожига́емь ве́сь, — благослови́те, — вопія́, — вся́ дѣла́ Госпо́дня, Го́спода.

Богоро́диченъ: Безма́терне Сло́во, изъ Отца́ Сы́й, пе́рвѣе, безо́тчее же бы́сть изъ Тебе́, второ́е, Всечи́стая, вопло́щься пе́рвѣе Безпло́тный, за милосе́рдіе восхотѣ́въ спасти́ пою́щія: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Еди́ну небе́сную имѣ́ти жи́знь жела́юще, страстоте́рпцы, привре́менную и тлѣ́нную велему́дренно преоби́дѣсте и ны́нѣ сла́дости лу́чшія и блаже́нныя наслажда́етеся.

Вну́трь ны́нѣ Боже́ственнаго рая́ лику́ете усе́рдно, озаре́ній Исто́чнику предстоя́ще, му́ченицы сла́вніи, отъ Него́же почерпа́юще, заря́ми просвѣща́етеся.

Всѣ́хъ вѣ́рою творя́щихъ пресвѣ́тлую твою́ па́мять, дванадеся́тный ли́че, ны́нѣ помина́я ко Влады́цѣ Христу́, съ тобо́ю, жили́ща сподо́битися помоли́ся.

Богоро́диченъ: Яко Ма́ти Еди́наго Влады́ки, всѣ́хъ тва́рей превы́шши была́ еси́, Дѣ́во Марíе. Тѣ́мже, вѣ́рніи, Тя́ вси́, Всенепоро́чная, ны́нѣ ра́дующеся и веселя́щеся, велича́емъ.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 148 – 151.

/ Къ оглавленію раздѣла /


Наверхъ / Къ титульной страницѣ

0