Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 25.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 14-й де́нь.
Преподо́бнаго отца́ на́шего Авксе́нтія.

[ВЕЧЕРЪ,]
На Го́споди воззва́хъ: стихи́ры окто́иха 3 и свята́го 3, гла́съ 4. Подо́бенъ: Да́лъ еси́ зна́меніе.

Благода́тію исцѣле́ній и чуде́съ обогати́лся еси́,* очи́щься умо́мъ,* страсте́й бо неду́ги, и пло́ти мра́къ,* и треволне́ніе оттря́слъ еси́* и свѣ́тло душе́вное содѣ́лалъ еси́ устрое́ніе.* Отону́дуже и возсія́лъ еси́* въ мона́шескихъ ли́цѣхъ,* моля́ Человѣколю́бца* о восхваля́ющихъ тя́.

Возрасти́лъ еси́ тала́нтъ,* ввѣ́ренный тебѣ́, прему́дре,* бога́тно дѣ́лавъ* и сѣ́явъ со слеза́ми,* въ ра́дости ны́нѣ, о́тче, жне́ши,* многосугу́бную ра́дость и утѣше́ніе и́стинно пожина́я.* Яко имѣ́я дерзнове́ніе у́бо ко Влады́цѣ,* моли́ся о пою́щихъ тя́,* богоно́сне Авксе́нтіе.

Сла́ва, гла́съ 8. Анато́лія:

Чи́стая Ду́ха Свята́го му́дрость, все́льшаяся въ чи́стое се́рдце твое́, всеблаже́нне Авксе́нтіе, преподо́бне о́тче, на ду́хи лука́вствія стра́шна тя́ гони́теля показа́, и не то́кмо стра́шна, но и сокрове́нныхъ неду́говъ врача́. Тѣ́мже, дерзнове́ніе стяжа́въ къ Человѣколю́бцу Бо́гу, непреста́нною моли́твою твое́ю душе́вныхъ страсте́й на́съ и тѣле́сныхъ свободи́.

И ны́нѣ, богоро́диченъ или́ крестобогоро́диченъ. Подо́бенъ: О, пресла́внаго чудесе́!

Агница Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше ма́терски,* болѣ́знующи съ пла́чемъ:* Сы́не Мо́й, что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Авксе́нтіе: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


[НА УТРЕНИ,]
Кано́нъ, его́же краегране́сіе: Авксе́нтія боже́ственнаго пою́ прему́дре. Творе́ніе Ѳеофа́ново. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Возрасти́въ ю́же къ Бо́гу любо́вь твою́, о́тче Авксе́нтіе, и мірску́ю любо́вь оста́вивъ, богоно́се, сосу́дъ вмѣсти́теленъ Ду́ха дарова́ній показа́лся еси́.

Подвше́лъ еси́ твои́ми хотѣ́ньми, о́тче Авксе́нтіе, ты́ подъ и́го Госпо́дне благо́е и зе́млю новодѣ́лалъ еси́, добродѣ́телей слеза́ми умаща́я, досточу́дне.

Устрани́вся жите́йскія молвы́, твою́ ду́шу и у́мъ къ Бо́гу сочета́въ усе́рдно, крѣ́пкими поще́ньми на земли́ я́ко безпло́тенъ пожи́лъ еси́, всеблаже́нне.

Богоро́диченъ: Въ Тебѣ́ ны́нѣ ви́дѣся, Влады́чице, непости́жное богому́жное соше́ствіе Христо́во, я́ко Бо́гъ бо и Человѣ́къ изъ Тебе́, Чи́стая, роди́ся, обновля́я существо́ мое́.

Пѣ́снь 3.

Ирмо́съ: Не му́дростію, и си́лою, и бога́тствомъ хва́лимся, но Тобо́ю, Отчею ѵпоста́сною Му́дростію, Христе́: нѣ́сть бо свя́тъ, па́че Тебе́, Человѣколю́бче.

Вжиля́емь креста́ си́лою, упраздни́лъ еси́ де́моновъ стремле́нія и кова́рства разруши́лъ еси́, поще́ніемъ побѣжда́я си́хъ наше́ствіе.

Ангельское житіе́ на земли́ подража́я, чи́стое въ моли́твахъ, во бдѣ́ніихъ благомо́щное, усе́рдно проше́лъ еси́, о́тче Авксе́нтіе.

Ядъ сме́ртный, душа́мъ происхода́тающъ, Авксе́нтіе, поразумѣ́въ сла́дость, воздержа́ніемъ умертви́лъ еси́ тоя́ движе́нія, богому́дре преподо́бне.

Богоро́диченъ: Созда́вый въ нача́лѣхъ отъ пе́рсти мя́ человѣ́ка, зи́ждется мене́ ра́ди во чре́вѣ Твое́мъ, Всенепоро́чная, дре́внее паде́ніе исправля́я.

Сѣда́ленъ, гла́съ 8. Подо́бенъ: Прему́дрости.

Земна́я вся́ оста́вивъ, и въ мíрѣ сы́й тѣле́снѣ, ду́хомъ бы́лъ еси́ а́нгеломъ собесѣ́дникъ, су́щія бо стра́сти умертви́въ тѣле́сныя, Тро́ицы показа́лся еси́ уго́дникъ, блаже́нне. Тѣ́мже неду́гующихъ исцѣля́еши стра́сти и сло́вомъ ду́хи отго́ниши благода́тію, богоно́се Авксе́нтіе. Моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ. Подо́бенъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное мое́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Или крестобогоро́диченъ. Подо́бенъ:

Агнца, и Па́стыря и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Побѣди́тель на ду́хи лука́вствія, Свята́го Ду́ха, о́тче, содѣ́йствомъ яви́лся еси́ и благода́тію, зовы́й, Авксе́нтіе: сла́ва си́лѣ Твое́й, Го́споди.

Отъ пото́ковъ, богоно́сне, беззако́нія моли́твою, всеблаже́нне, себе́ утверди́въ, убѣжа́лъ еси́ смуще́нія, сла́дости же пото́ка напи́лся еси́ досто́йно, всеблаже́нне.

Богоно́сецъ, вѣ́ру и любо́вь, ю́же къ Бо́гу, возрасти́въ, къ го́рнѣй высотѣ́ боже́ственнаго присвое́нія возвы́сился еси́, зовы́й: сла́ва си́лѣ Твое́й, Го́споди.

Богоро́диченъ: Бо́га Сло́ва Тя́ ро́ждшую, я́вѣ зна́юще тѣле́сно, вои́стинну Богоро́дицу, вѣ́рніи вси́, имену́емъ, зва́ніе по коему́ждо естеству́ веще́й принося́ще.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Бли́зъ су́щія твоего́ пути́, о́тче, собла́зны о́стрымъ умо́мъ невре́дно преше́лъ еси́ и душе́вною чистото́ю.

Житіе́ твое́ свѣ́тло, и вѣ́ра правосла́вна, воздержа́ніе чу́дно, растворе́нно сло́во благода́тію, Авксе́нтіе.

Ре́вностію мы́слей жи́знь преше́лъ еси́, привре́менная претека́я, вѣ́чнымъ же, о́тче, при́сно прилага́яся.

Богоро́диченъ: Умъ иму́ще пра́въ, уче́ній испо́лненъ, Тя́, Пречи́стая, Богоро́дицу имену́емъ вси́ и любо́вію ублажа́емъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Сы́на тя́ свѣ́та и дне́ показа́ житіе́ твое́, блаже́нне, благообра́зно вои́стинну ходя́ща и свѣти́льника въ мíрѣ жи́зни сло́во иму́ща. [Два́жды.]

Поуче́ніе сме́рти житіе́ твое́ положи́въ, преизя́щно предѣ́лъ му́дрости, о́тче, поразумѣ́въ, преложи́лся еси́ къ Прему́дрости Ѵпоста́снѣй.

Богоро́диченъ: Хра́мъ Тя́ Бо́жій и черто́гъ зна́емъ, ста́мну, и свѣ́щникъ, и скрижа́ль, иму́щую вну́трь напи́сано за милосе́рдіе вопло́щшееся Сло́во, Всенепоро́чная.

Конда́къ, гла́съ 2. Подо́бенъ: Въ моли́твахъ.

Наслади́вся, богому́дре, воздержа́нія и жела́нія пло́ти твоея́ обузда́въ, яви́лся еси́, вѣ́рою сія́я, я́коже са́дъ посреди́ рая́, процвѣ́лъ еси́, Авксе́нтіе о́тче свяще́нне.

Икосъ:

Кто́ по́двиги твоя́ ны́нѣ изрече́тъ или́ болѣ́зни твоя́, о́тче, и́хже подъя́лъ еси́ на земли́? за Боже́ственное наслажде́ніе зако́номъ Госпо́днимъ послѣ́довавъ и повелѣ́ніемъ Сего́ послужи́въ, но́въ на́мъ показа́лся еси́ Іовъ боре́ньми; мíрови яви́ся пришле́цъ и земли́ все́й, я́ко стра́ненъ, поще́ніемъ вѣ́рою процвѣ́лъ еси́, бдѣ́ніе и чистоту́ изобучи́лъ еси́, Авксе́нтіе о́тче свяще́нне.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Яко уя́звленъ Влады́чнею, о́тче, Боже́ственною любо́вію, все́ къ Нему́ неосла́бное жела́ніе се́рдца твоего́ преложи́лъ еси́, зовы́й: благослове́нъ еси́ въ хра́мѣ сла́вы Твоея́, Го́споди. [Два́жды.]

Просвѣще́нъ Спа́совою заре́ю, всему́дре, тмы́ предста́теля обличи́лъ еси́ терпѣли́вно, міроде́ржца же низложи́лъ еси́, — благослове́нъ еси́, — зовы́й, — въ хра́мѣ сла́вы Твоея́, Го́споди.

Богоро́диченъ: Истлѣ́вшее дре́вле, е́же къ лу́чшему возведе́нію, естество́ человѣ́ческое, Пречи́стая, восхотѣ́въ обнови́ти, всели́ся Содѣ́тель Бо́гъ во утро́бу Твою́, Еди́на Всепѣ́тая.

Пѣ́снь 8.

Ирмо́съ: Изба́вителю всѣ́хъ Всеси́льне, посредѣ́ пла́мене благоче́ствовавшія, снизше́дъ, ороси́лъ еси́ и научи́лъ еси́ пѣ́ти: вся́ дѣла́, благослови́те, по́йте Го́спода.

Ве́сь къ Бо́гу преложе́нъ, оттря́слъ еси́ плотско́е удобостра́стіе и чуде́съ прія́лъ еси́ дѣ́йство, поя́: благослови́те, вся́ дѣла́ Госпо́дня, Го́спода. [Два́жды.]

Стра́шенъ яви́лся еси́ де́мономъ, Христа́ стяжа́въ помо́щника, Его́же кре́стъ взе́мъ, послѣ́довалъ еси́, поя́: благослови́те, вся́ дѣла́ Госпо́дня, Го́спода.

Богоро́диченъ: Витíйствуетъ, я́влься, арха́нгелъ и возвѣща́етъ Рождества́ Твоего́, Пречи́стая, е́же па́че сло́ва, зача́тіе и спаси́тельное мíру: вся́ дѣла́, благослови́те, по́йте Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Всему́ Божеству́, о́тче, креще́ніемъ твои́мъ обѣща́лся еси́ и соблю́лъ еси́ чи́стѣ о́браза, блаже́нне, досто́инство, къ Трисія́ннѣй Свѣ́тлости съ весе́ліемъ вмѣсти́лся еси́.

Ны́нѣ не въ гада́ніи, о́тче, ниже́ въ зерца́лѣ зри́ши богонача́лія просвѣще́ніе, лице́мъ же, всему́дре, къ лицу́, па́че ума́ свѣ́тлости и боговидѣ́нія сподобля́емь.

Яко имѣ́я мно́го дерзнове́ніе ко всѣ́хъ Царю́, о́тче, изба́витися моли́ся твою́ па́мять соверша́ющимъ ны́нѣ отъ вся́каго обстоя́нія, да тя́ вси́ ублажа́емъ.

Богоро́диченъ: Плени́цы мои́хъ прегрѣше́ній разрѣши́, Дѣ́во Богоро́дице, Яже благоутро́бія исто́чникъ ро́ждши, еди́на Богоблаже́нная, и утѣше́нія испо́лни, я́ко да досто́йно Тя́ велича́ю.

Свѣти́ленъ. Подо́бенъ: Жены́, услы́шите.

Мірска́го благостра́стія, я́ко отъ скве́рны, уклони́лся еси́, и, неяде́ніемъ пло́ть увяди́въ, обнови́лъ еси́ душе́вную крѣ́пость, преподо́бне, и сла́вою обогати́лся еси́ небе́сною, сла́вне. Тѣ́мже моля́ся не преста́й о всѣ́хъ на́съ Го́сподеви.

Богоро́диченъ. Подо́бенъ:

Соединя́ется по Ѵпоста́си пло́тію Пресу́щное Сло́во души́ посредѣ́ и мы́сленнѣ и соверше́ннѣ, и Еди́нъ отъ двою́ прохо́дитъ изъ Тебе́ несмѣ́сно, Пречи́стая, обожи́въ, е́же прія́тъ. Тѣ́мже Тя́ прославля́етъ, вои́стинну Богоро́дицу.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 141 об. – 145.

/ Къ оглавленію раздѣла /


Наверхъ / Къ титульной страницѣ

0