Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 14-й де́нь.
Слу́жба преподо́бному Исаа́кію, затво́рнику Пече́рскому.

ВЕЧЕРЪ,
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Отче богому́дре Исаа́кіе, а́ще и прельсти́ тя́ вра́гъ, явле́йся свѣ́томъ, но послѣди́ твои́мъ исправле́ніемъ прельще́нъ паде́ся, бу́йствомъ бо свои́мъ улови́въ, того́ низложи́лъ еси́ въ коне́цъ кова́рства и, попра́въ нога́ма, возопи́лъ еси́: стра́ха ва́шего не и́мамъ убоя́тися, я́ко со мно́ю Бо́гъ, крѣ́пость же Его́ е́сть мнѣ́ проти́ву всѣ́хъ страхова́ній ва́шихъ утвержде́ніе.

Отче преблаже́нне Исаа́кіе, ты́, невѣ́дый, а́ще и поклони́лся еси́ бѣ́су, а́ки лицу́ Христо́ву, но по се́мъ паде́ніи па́ки испра́вився, бѣсо́вскія полки́ оплева́лъ еси́ и испо́лнилъ еси́ ли́ца и́хъ безче́стія, и́же постыжде́нни, я́ко ды́мъ, исчеза́ютъ и, я́ко огне́мъ, прогоня́ются, о́гнь бо твоея́ любве́ къ Бо́гу прого́нитъ тѣ́хъ нападе́нія и всѣ́мъ помога́етъ, и́мя твое́ призыва́ющимъ.

Сла́ва, гла́съ 2:

Отче Исаа́кіе, собо́ю о́бразъ да́лъ еси́ подвиза́ющимся: да не вѣ́руютъ привидѣ́ніямъ явля́ющимся, вѣ́сть бо сатана́ преобража́тися во а́нгела свѣ́тла, но да искуша́ютъ та́ зна́меніемъ крѣ́пкаго ору́жія, на не́же взира́ти не мо́гутъ лука́вствія ду́хи, но, я́ко пра́хъ вѣ́тромъ отъ земли́, прогоня́ется, та́ко сего́ луча́ми опаля́еми исчеза́ютъ. Того́ у́бо и мы́ держа́щеся, вра́жія кова́рства не убои́мся, па́че же стира́юще и́хъ ухищре́нія, пріи́мемъ отъ Христа́ Бо́га ми́ръ въ косте́хъ на́шихъ и ве́лію ми́лость.

И ны́нѣ, богоро́диченъ или́ крестобогоро́диченъ.

Тропа́рь, гла́съ 2:

Свѣ́тлости святы́хъ наслади́тися вожделѣ́въ, въ те́мную всели́лся еси́ пеще́ру, прехва́льне, и до́брѣ подвиза́лся еси́, Исаа́кіе, прельще́нъ же бы́въ отъ врага́, па́ки крѣ́пко попра́лъ еси́ того́ вся́ кова́рства. И ны́нѣ, я́ко побѣди́тель, въ весе́ліи предстоя́ Христу́ Бо́гу, проси́ на́мъ ми́ра и ве́лія ми́лости.

Сла́ва и ны́нѣ, богоро́диченъ.



НА УТРЕНИ,
Кано́нъ преподо́бному, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Влады́ко Всемогу́щій, Христе́, во глубинѣ́ щедро́тъ Твои́хъ, а́ки фарао́на, грѣхи́ моя́ потопи́, молю́ся, да бре́нными усты́ въ па́мяти Твоего́ уго́дника Тя́ сла́вящи, побѣ́дное досто́йно принесу́ воспѣва́ніе.

Настоя́ше крѣ́пкій міроде́ржецъ, и́щущій всѣ́хъ глубино́ю страсте́й покры́ти, но не возмо́же тебе́, о́тче, погрузи́ти, ты́ бо, увѣ́давъ многоплете́нныя его́ сѣ́ти, избѣ́глъ еси́ мíра, а́ки пти́ца тенета́, и побѣ́дное Бо́гу прине́слъ еси́ воспѣва́ніе.

Хи́тръ бы́лъ еси́ купе́цъ, преподо́бне: тлѣ́ннымъ бо нетлѣ́нная стяжа́лъ и ги́блющимъ неги́блющій купи́лъ еси́ би́серъ, и́мже вѣне́цъ украси́лъ еси́ своего́ терпѣ́нія, и, ны́нѣ веселя́ся, предстои́ши Христу́, побѣ́дное принося́щи воспѣва́ніе.

Разда́лъ еси́, блаже́нне, имѣ́ніе свое́ ни́щимъ и са́мыя во́ли своея́ не пощадѣ́лъ, но вручи́лъ о́ную вели́кому Анто́нію, отъ него́же пріе́мь во измѣне́ніе а́нгельскій о́бразъ, обогати́лся еси́ сокро́вищемъ небе́снымъ и пое́ши Христу́ непреста́нное воспѣва́ніе.

Богоро́диченъ: Грѣхо́внымъ и́гомъ обремене́нъ, къ Тебѣ́ прихожду́, Богоро́дице, моля́ся: изми́ стра́стное ми́ томле́ніе, да поне́ отны́нѣ покая́ніемъ испра́влюся и те́плыя моли́твы принесу́ Ти, Влады́чице, мое́ умиле́нное воспѣва́ніе.

Пѣ́снь 3.

Ирмо́съ: Съ высоты́ снизше́лъ еси́ во́лею на зе́млю, превы́ше вся́каго нача́ла, и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ па́че Тебе́, Человѣколю́бче.

Съ высоты́ пріе́мь зва́ніе, измѣне́ніемъ а́нгельскаго о́браза распя́лся еси́ мíру, сраспина́я того́ вся́ по́хотныя стра́сти, наступи́въ на ты́я житіе́мъ, преподо́бне, жесто́кимъ, иму́щи помо́щникомъ Бо́га, еди́наго Человѣколю́бца.

Съ ко́злищами ча́сти да не наслѣ́диши, о́тче, въ гряду́щемъ вѣ́цѣ, въ се́й жи́зни пло́ть твою́ умерщвля́я, обле́клся еси́ во еди́ну ми́лоть влася́ну и въ ко́зію ко́жу, въ не́йже прохожда́лъ еси́ и́ночества пу́ть тѣ́сный, Бо́га призыва́я въ по́мощь, Еди́наго Человѣколю́бца.

Въ горѣ́ всели́лся еси́, въ тѣ́сной себе́ затвори́лъ еси́ пеще́рѣ и, лѣ́ствицею добродѣ́телей, му́дре, къ го́рнимъ простира́яся, положи́лъ еси́ восхожде́ніе въ се́рдцѣ свое́мъ вы́ну пѣсносло́вити Бо́га Человѣколю́бца.

Тѣ́сный пу́ть смире́нія и нищеты́ проше́лъ еси́, му́дре, злохи́траго врага́, я́ко младе́нца, разби́въ о ка́мень любве́ Бо́жія, ея́же ища́, посто́мъ ду́шу очи́стилъ и бдѣ́ніемъ всено́щнымъ тѣ́ло смири́лъ еси́, да не лѣ́ностно предстои́тъ Бо́гу Человѣколю́бцу.

Богоро́диченъ: Лѣ́ностію побѣжде́нъ, не могу́ страсте́й, ражда́ющихся во мнѣ́, а́ки младе́нцевъ, о ка́мень за́повѣдей разби́ти, Тебе́ призыва́ю, Богоро́дице, въ по́мощь, помози́ ми, я́ко человѣколюби́вая Бо́га Ма́ти, и паду́тъ подъ нога́ма мои́ма Твое́ю си́лою побѣжде́нни.

Сѣда́ленъ, гла́съ 8:

Пло́ть твою́ воздержа́ніемъ умерщвля́я, о тлѣ́нной пи́щи нерадѣ́лъ еси́, но еди́ною просфоро́ю чрезъ де́нь удовля́яся, въ воздержа́ніи пребыва́лъ еси́ и на ре́брѣхъ не почива́лъ еси́; та́ко на неви́димаго врага́ подвиза́яся, взыва́лъ еси́: Христе́ Бо́же, да́ждь по́мощь су́щимъ во бра́ни.

Сла́ва, и ны́нѣ, богоро́диченъ:

Омраче́нъ сно́мъ лѣ́ности, ду́шу мою́ къ Тебѣ́, Чи́стая, простира́ю, бо́дренною Твое́ю моли́твою и неисче́тною благосты́нею воздви́гни мя́ на пѣ́ніе и да́ждь ми́ по́мощь, су́щему въ бра́ни.

Пѣ́снь 4.

Ирмо́съ: Любве́ ра́ди, Ще́дре, Твоего́ о́браза, на Крестѣ́ Твое́мъ ста́лъ еси́, и раста́яшася язы́цы: Ты́ бо еси́, Человѣколю́бче, крѣ́пость моя́ и хвале́ніе.

Любве́ ра́ди Бо́жія во мно́гихъ трудѣ́хъ и поще́ніихъ пребы́лъ еси́, преподо́бне, до седма́го лѣ́та изъ ке́лліи не исходя́; при́сно же исхо́дъ сво́й помина́я стра́шный, ко укрѣпля́ющему Тя́ Христу́ взыва́лъ еси́: крѣ́пость моя́ Ты́ еси́, Бо́же, и хвале́ніе.

Се́ ко́ль добро́ и ко́ль красно́ жи́ти съ бра́тіею вку́пѣ; бра́тъ, отъ бра́та помога́емь, быва́етъ, а́ки гра́дъ, тве́рдъ, еди́нъ же, боря́йся со враго́мъ, па́даетъ, — е́же и на тебѣ́ сбы́стся, о́тче, да не бу́деши надѣ́яся на ся́, но на Бо́га жи́ва, я́ко То́й Еди́нъ крѣ́пость всѣ́мъ и хвале́ніе.

Умъ тво́й, свя́те, хотя́ омрачи́ти діа́волъ, пріи́де со тмо́ю во́евъ свѣ́тлыхъ, са́мъ же просвѣти́ся, а́ки со́лнце, но тебе́ покры́ тмо́ю ле́сти, отъ нея́же изба́влься, взыва́лъ еси́ къ Бо́гу: крѣ́пость моя́ Ты́ еси́, Бо́же, и хвале́ніе.

Богоро́диченъ: Умъ имѣ́я, омраче́нъ страстьми́, содержи́мь е́смь грѣхи́ мно́гими, но къ Тебѣ́ молю́ся, па́че ума́ роди́вшей Свѣ́тъ всего́ мíра: пріими́, Ма́ти Бо́жія, ору́жіе си́лы Своея́ и предста́ни ми́ въ по́мощь, да узрю́ свѣ́тъ богоразу́мія и́стиннаго.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Возсія́вшіи во о́бразѣ свѣ́та, тмы́ вѣ́чныя сы́нове, кли́чъ ве́лій сотвори́ша, свои́мъ тя́ нарица́юще, о́тче Исаа́кіе, и обыдо́ша тя́, а́ки пси́ мно́зи, свои́ми навѣ́ты, отъ ни́хже изба́влься, прибѣ́глъ еси́ къ Бо́гу, Царю́ ми́ра.

Иже иногда́ предъ златокова́ннымъ тѣ́ломъ мусикíйскому гла́су устро́и бы́ти на прельще́ніе невѣ́дущихъ Бо́га, се́ то́йже въ сопѣ́ли и тимпа́ны возшумѣ́ти повелѣва́етъ на прельще́ніе твое́, отъ него́же а́ще и прельще́нъ бы́въ, изба́вился еси́ по́мощію Бо́га, Царя́ ми́ра.

Претружде́нна тя́ по́стническими труды́, пляса́ніемъ утруди́ти повелѣ́ діа́волъ, его́же велѣ́ніе исполня́юще, лука́віи ду́си на мно́гъ ча́съ скака́ша съ тобо́ю и, поруга́вшеся тебѣ́, ели́ жи́ва оста́виша; но ты́, послѣди́ испра́вився, поруга́лся ему́ и попра́лъ еси́ его́ до конца́ по́мощію Бо́га, Царя́ ми́ра.

Отвсю́ду тя́ враго́мъ уя́звленна, безгла́сна, то́кмо ма́ло ды́шуща, изнесо́ша преподо́бніи отцы́ предъ пеще́ру и, позна́вше, я́ко отъ бѣсо́вскаго дѣ́йства случи́ся сіе́, прилѣжа́ху, моли́твою тебѣ́ посо́бствующе, и услы́ша моли́тву и́хъ, и тя́ поми́лова Госпо́дь, Ца́рь ми́ра.

Богоро́диченъ: Тмо́ю бѣсо́вскихъ нападе́ній уя́звленно иму́щи се́рдце, Тебе́ молю́, Влады́чице: благíй приложи́ сему́ пла́стырь ми́лости и ду́шу мою́ омраче́нную спаси́ отъ паде́нія, Еди́ну бо Тя́ и́мамъ, ско́рое посѣще́ніе, Цари́цу Свѣ́та.

Пѣ́снь 6.

Ирмо́съ: Бу́рею грѣхо́вною погружа́емь, я́ко во чре́вѣ ки́товѣ содержи́мь, съ проро́комъ зову́ Ти: возведи́ отъ тли́ живо́тъ мо́й, Го́споди, и спаси́ мя.

Бу́рею искуше́ній бѣсо́вскихъ напа́ствованъ сы́й, блаже́нне, разсла́бился еси́ умо́мъ и тѣ́ломъ и, ничто́же вѣ́дый о себѣ́, лежа́лъ еси́ на одрѣ́ два́ лѣ́та, ни хлѣ́ба яды́й, ни воды́ пія́й, но, моли́твою преподо́бнаго Ѳеодо́сія умоля́емь, возведе́ Госпо́дь отъ тли́ живо́тъ тво́й и спасе́ тя.

Стра́нно чу́до: естеству́ человѣ́ческому безъ бра́шна бы́ти. На тебѣ́ же сіе́ сбы́стся, блаже́нне: Бо́гъ бо, идѣ́же хо́щетъ, премѣня́етъ естества́ уста́вы, я́ко въ Того́ руцѣ́ дыха́ніе все́й тва́ри, и То́й, е́же хо́щетъ, твори́тъ.

Кре́стъ Тво́й, Христе́, ору́жіе крѣ́пкое на враги́, и́мже а́ще не огради́мся, искуше́ни бу́демъ, я́коже Исаа́кій. Си́мъ у́бо огражда́ющеся, мо́лимся Тебѣ́: я́коже Исаа́кію не попусти́лъ еси́ искуше́нну бы́ти до конца́, та́ко и на́мъ не попусти́ искуси́тися вы́ше си́лы на́шея и спаси́ на́съ.

Тро́иченъ: Сла́ва Тебѣ́, Безнача́льная Тро́ицѣ, вино́вная бла́гости, и отъ паде́нія всѣ́хъ возводя́щая, щедро́тами Твои́ми уще́дри ны́, рабы́ Своя́, и возста́ви во тлю́ па́дшихъ, я́коже уго́дника Твоего́ Исаа́кія спасла́ еси́, пода́вши тому́ на бѣ́сы мно́жайшую крѣ́пость.

Богоро́диченъ: Сла́ва Тебѣ́, Ма́ти Бо́жія, вѣ́рнымъ прибѣ́жище: Тобо́ю бо па́дшіи востаю́тъ, умерщвле́нніи оживля́ются, крѣ́пость на діа́вола пріе́млютъ и вѣ́чному животу́ сподобля́ются въ сла́вѣ Сы́на и Бо́га Твоего́.

Конда́къ, гла́съ 5:

Вра́жію пре́лесть низложи́вша и въ по́стничествѣ свѣ́тло просія́вша, пріиди́те, вѣ́рніи, восхва́лимъ Исаа́кія побѣдоно́снаго, и́же, я́ко зла́то, во искуше́ніихъ просія́ и просвѣща́етъ сердца́ вѣ́рно къ нему́ притека́ющихъ, моля́ся Го́сподеви непреста́нно о душа́хъ на́шихъ.

Пѣ́снь 7.

Ирмо́съ: Не преда́ждь на́съ до конца́ и́мене Твоего́ ра́ди, и не разори́ завѣ́та Твоего́, и не отста́ви ми́лости Твоея́ отъ на́съ, Го́споди Бо́же оте́цъ на́шихъ, препѣ́тый во вѣ́ки.

Мно́гая искуше́нія проше́дъ, преподо́бне, мно́жае избы́точествовалъ еси́ во сла́ву Бо́жію и, ста́въ крѣ́пко проти́ву врага́, псало́мски воспѣ́лъ еси́: па́дшія въ тѣснотѣ́ поста́вилъ еси́ на простра́ннѣ но́зѣ мои́, Христе́ Бо́же, прехва́льный во вѣ́ки.

Тѣ́снѣе связа́лъ еси́ себе́ власяны́ми ру́бы, связа́въ крѣ́пко и врага́ послуша́ніемъ тве́рдымъ въ пова́рнѣ, и поруга́лся еси́ поруга́вшемуся тебѣ́, прогоня́я того́ моли́твою и предваря́я всѣ́хъ послуша́ніемъ и по́стническими труды́.

Па́дшій искуше́ніи, хра́мъ души́ своея́ возставля́я, къ хра́му Бо́жія Ма́тере пе́рвѣе всѣ́хъ прибѣга́лъ еси́ и, въ не́мъ нога́ми отъ зимы́ къ ка́мени примерза́емь, стоя́лъ еси́ до кончи́ны пра́вила, огню́ серде́чному въ любо́вь Бо́жію распаля́ющу тя́ си́льно.

Отбѣ́гшую пре́жде благода́ть за бѣсо́вскую пре́лесть, па́ки пости́глъ еси́, о́тче, е́же зна́меноваше пти́ца, я́тая тобо́ю, е́же ви́дѣвшіи позна́ша благода́ть Бо́жію, су́щую съ Тобо́ю, и вси́, уди́вльшеся, прославля́ху прославля́ющаго тя́ Христа́ и тебе́ я́ко уго́дника Христо́ва почита́ху.

Богоро́диченъ: Юро́дствую, омраче́нъ бѣсо́вскими ухищре́ньми, и, неподо́бная дѣ́ющи, за́повѣди Го́спода моего́ преступа́ю, но Ты́, Ма́ти Чи́стая, да́ждь ми́ ра́зумъ, да разумѣ́ю пу́ть пра́вый и, избѣ́гъ руки́ ловя́щаго мя́ Веліа́ра, восхвалю́ Тя́ во вѣ́ки.

Пѣ́снь 8.

Ирмо́съ: На Крестѣ́ пло́тію пригвожде́ннаго и показа́вшаго на́мъ ору́жіе во спасе́ніе, о́троцы, превозноси́те Христе́ Бо́га на́шего во вѣ́ки.

На кре́стъ терпѣ́нія возше́дъ, распя́лся еси́ мíру, преблаже́нне Исаа́кіе, пригвозди́лъ бо еси́ у́ды своя́ отсѣче́ніемъ страсте́й, и копіе́мъ поруга́нія, невѣ́дущіи бу́йства твоего́ Бо́га ра́ди, пробода́ху тя́, но ты́ вся́ ра́достнѣ претерпѣ́лъ еси́, хва́лящи Христа́ во вѣ́ки.

На пла́мень разгорѣ́вшіяся пе́щи обнаже́нными нога́ми наступи́въ, пребы́лъ еси́, стоя́ неподви́жимь, до́ндеже угасе́, и сіе́ зна́меноваше нападе́ній бѣсо́вскихъ угаше́ніе, я́же вско́рѣ устуди́лъ еси́ си́лою креста́ Христо́ва, и о се́мъ хва́лишися во вѣ́ки.

Мно́жицею напа́даху на тя́ бѣ́сове, о́тче, свои́мъ тя́ нарица́юще, я́ко поклони́лся еси́ кня́зю и́хъ, но ты́ си́лою Христо́вою прогоня́лъ еси́ и́хъ а́ки му́хи, и со студо́мъ отбѣга́ху тя́, досажде́нія своего́ не терпя́ще, и бы́сть твоя́ побѣ́да на ни́хъ послѣ́дняя бо́льша пе́рвыя.

Богоро́диченъ: Лю́тыхъ страсте́й прило́ги искуша́емь, къ Твоему́ покро́ву, Всенепоро́чная Дѣ́во, прибѣга́ю, преподо́бнаго ра́ди Твоего́ Исаа́кія, покры́й мя́ и спаси́ отъ си́хъ нападе́ній, да превозношу́ Тя со Христо́мъ во вѣ́ки.

Пѣ́снь 9.

Ирмо́съ: Велича́емъ вси́ человѣколю́біе Твое́, Христе́, Спа́се на́шъ, сла́во ра́бъ Твои́хъ и вѣ́нче вѣ́рныхъ, возвели́чивый па́мять Ро́ждшія Тя́.

Велича́емъ вси́ Человѣколю́бца Бо́га, та́ко раба́ Своего́ укрѣ́пльшаго, я́ко вся́ страхова́нія де́монская въ бѣ́гство претвори́, и пребы́сть про́чее никíимже ору́жіемъ одолѣ́нъ, а́ки адама́нтъ тве́рдъ, цѣ́лъ и неруши́мый.

Ослабѣ́ супоста́тъ тво́й, преподо́бне, а́ще и мно́гажды въ нощи́ мно́гія бѣ́сы приведе́ себѣ́ въ по́мощь съ моты́ками и за́ступами, и восклица́ху: раскопа́емъ пеще́ру сію́ и сего́ здѣ́ загребе́мъ, уже́ бо на́мъ одолѣва́етъ, неодолѣ́нное и́мя Вы́шняго и Ро́ждшую Его́ въ по́мощь призыва́я.

Нощну́ю тму́, въ нощи́ приходя́щую, разумѣ́въ, блаже́нне, свѣтоно́снымъ зна́меніемъ кре́стнымъ прогоня́лъ еси́, и́мже опаля́еми, не терпя́ще, претворя́хуся въ бѣ́гство, тебѣ́ вѣне́цъ побѣ́ды оставля́юще, я́ко до́брому во́ину и подви́жнику непреобори́мому.

Змíй и льсте́цъ, три́ лѣ́та боря́йся съ тобо́ю, о́тче, преобража́шеся въ четвероно́гая звѣ́ри, га́ды и мы́ши, но, не одолѣ́въ тебе́ мечта́ніи свои́ми, нево́лею побѣди́теля тя́ исповѣ́да: низложи́лъ бо еси́ его́ и́менемъ Христо́вымъ, Его́же съ Ро́ждшею велича́емъ.

Богоро́диченъ: Все́ вре́мя живота́ моего́, въ разли́чныя ви́ды преобра́жся, вра́гъ побѣжда́етъ мя́, сему́ немогíй проти́ву ста́ти, Тебе́, Богоро́дице, призыва́ю: посли́ ми си́лу, я́ко Си́льнаго Ро́ждшая, Его́же съ Тобо́ю велича́ю.

Свѣти́ленъ:

Мно́гія труды́ въ житіи́ подъе́мь, съ враги́ боря́ся, дости́гъ блаже́нныя кончи́ны, преста́вился еси́ къ вы́шнимъ въ поко́й преми́рный, но па́мять твоя́ въ на́съ пребыва́етъ, и труды́ твоя́ исповѣ́дуетъ Це́рковь, я́же помина́юще, мо́лимся тебѣ́: посѣти́ на́съ и да́ждь благослове́ніе, въ дне́шній де́нь преставле́ніе твое́ почита́ющимъ, о́тче на́шъ Исаа́кіе.

Богоро́диченъ:

Ско́рая Засту́пнице христіа́номъ, ускори́ предста́ти мно́гими напа́стьми томи́мымъ, да, на Тя́ надѣ́ющеся, не отпаде́мъ наде́жды, но, Тобо́ю изба́вльшеся отъ напа́стей, просла́вимъ, Всенепоро́чная, Честно́е Рождество́ Твое́.

На хвали́техъ стихи́ры, гла́съ 3:

Благоду́шствуя въ словеси́ Госпо́дни, небоя́зненно взе́мь Влады́ки своего́ яре́мъ, ра́ломъ тѣ́снаго житія́ твоего́, преподо́бне, воздѣ́лавъ ни́ву души́ своея́, напои́лъ еси́ ту́ пото́комъ сле́знымъ, посѣ́явъ труды́, а́ки пшени́цу чи́сту, возрасти́въ же кла́сы и́ноческихъ добродѣ́телей, пожа́лъ еси́ рукоя́ти непреста́нныхъ моли́твъ, я́же вне́слъ еси́ въ жи́тницу небе́сную; и ны́нѣ, съ благи́ми рабы́ похвалу́ пріе́мь, помяни́ на́съ, о́тче всеблаже́нне, любе́зно твою́ па́мять почита́ющихъ.

Ходи́въ тѣ́сною стезе́ю во вре́менномъ вѣ́цѣ, скорбьми́, и слеза́ми, и бдѣ́ніемъ непреста́ннымъ, стена́ньми и озлобле́ніи, достосла́вне, уклони́лся еси́ отъ простра́ннаго па́губнаго пути́, дости́глъ же еси́ широты́ небе́сныя, идѣ́же имы́й поко́й безболѣ́зненный, не забу́ди и на́съ въ твое́й бла́гости, я́ко моли́твенникъ о душа́хъ на́шихъ.

Ни́щъ бы́въ Бо́га ра́ди, презрѣ́въ вся́ су́етная стяжа́нія, обнища́вшему на́съ ра́ди Христу́ послѣ́довалъ еси́, отъ Него́же пріе́мь добродѣ́телей соверше́ніе, обогати́лся еси́ сокро́вищемъ нетлѣ́ннымъ; на́съ, благи́ми дѣя́ніи обнища́вшихъ, не забу́ди, но отъ исполне́нія твоего́ да́руй, о́тче преподо́бне, въ дне́шній де́нь твое́ честно́е успе́ніе почита́ющимъ.

Сла́ва, гла́съ 2:

Мíра отве́ргся и вся́каго любостра́стія, преподо́бне, ева́нгельски кре́стъ сво́й взе́мь на ра́мо, Христу́ послѣ́довалъ еси́: въ тѣ́сной пеще́рѣ пожи́въ, коне́чною острото́ю и́ноческихъ трудо́въ пе́рвѣе побѣди́вшаго тя́ побѣди́лъ еси́ и по кончи́нѣ сему́ та́ко стра́шенъ показа́лся еси́, я́ко и и́мене твоего́ трепе́щетъ, не терпя́ твоего́ преще́нія, и́бо на небеси́ живы́й, ду́хи прогоня́еши зло́бы поднебе́сныя, и́хже и отъ на́съ прожени́, Исаа́кіе блаже́нне, и испроси́ на́мъ отъ Христа́ Бо́га ве́лію ми́лость.

И ны́нѣ, богоро́диченъ:

Спаси́ отъ бѣ́дъ рабы́ Твоя́, Пресвята́я Богоро́дице, [я́ко вси́ по Бо́зѣ къ Тебѣ́ прибѣга́емъ, я́ко къ неруши́мой стѣнѣ́ и предста́тельству].

Славосло́віе вели́кое и отпу́стъ.



[НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Слу́жбы преподо́бнымъ отце́мъ Пече́рскимъ, и́хже мо́щи въ Бли́жней и Да́льней пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1855. — Л. 50 об. – 53 об.

/ Къ оглавленію раздѣла /


Наверхъ / Къ титульной страницѣ

0