Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 30 апрѣля 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 14-й де́нь.
Преподо́бнаго отца́ на́шего Константи́на Фило́софа, во мни́сѣхъ претворе́ннаго и́менемъ Кири́лла, учи́теля Слове́нскому язы́ку.

НА ВЕЧЕРНИ,
На Го́споди воззва́хъ.., пое́мъ стихи́ры, гла́съ 4. Подо́бенъ: Да́лъ еси́ зна́меніе.

Кро́токъ му́дростію, Бо́жія любве́ испо́лненъ, правовѣ́рными уче́ніи преукра́шенъ, Кири́лле блаже́нне, гра́ды же и страны́ уловля́я Бо́гомъ, блаже́нне, про́йде просвѣща́я благода́тію не у́ спаси́тельное пріе́мша разумѣ́ніе, сего́ ра́ди тя́ чти́мъ святы́ми пѣ́сньми.

Житіе́ твое́ безъ поро́ка и живо́тъ достохва́ленъ и сме́рть же честна́ предъ Бо́гомъ бы́сть вся́ческимъ, Ему́же въ ру́цѣ, о́тче, ду́шу предаде́ просвѣтле́нну исправле́ніемъ. Тѣ́мже тя́ мо́лимъ о на́съ къ Нему́ помоли́ся обрѣсти́ ми́лость вѣ́рно хва́лящимъ тя́.

Сла́ва, и ны́нѣ, богоро́диченъ.

На стихо́внѣ стихи́ра свято́му, гла́съ 8:

Чи́стая духо́вная святы́хъ па́мять, все́льшися въ чи́стѣ се́рдцы твое́мъ, всеблаже́нне Кири́лле, преподо́бне о́тче, и ду́ховомъ лука́вымъ стра́шна тя́ прогони́теля показа́, но и сокрове́ннымъ неду́гомъ врача́. Тѣ́мже, дерзнове́ніе имѣ́я къ Человѣколю́бцу Бо́гу, неосла́бно моли́ся и отъ душе́вныя на́съ скве́рны и тѣле́сныя свободи́.

Сла́ва, и ны́нѣ, богоро́диченъ.

По Ны́нѣ отпуща́еши.., тропа́рь, гла́съ 4:

Отъ пеле́нъ приле́жно прему́дрость сестру́ себѣ́ сотвори́въ, богогла́се, пресвѣ́тлую ви́дѣвъ, я́ко дѣви́цу чи́сту, ю́же пріе́мь, приведе́, я́ко мони́сты златы́ми, се́ю укра́сивъ свою́ ду́шу и у́мъ, и обрѣ́теся я́ко другíй Кири́ллъ, блаже́нне, ра́зумомъ и и́менемъ, му́дре.


НА УТРЕНИ,
По Бо́гъ Госпо́дь: Тропа́рь свято́му, [два́жды. Сла́ва и ны́нѣ, богоро́диченъ].

По 1-мъ стихосло́віи сѣда́ленъ, гла́съ 1. Подо́бенъ: Ли́къ а́нгельскій.

Бо́жіими мольба́ми просвѣти́въ се́рдце твое́, просвѣтова́ ду́шу богодохнове́нными уче́ніи, и ны́нѣ же пріи́де на Свѣ́тъ невече́рній. Тѣ́мъ дне́сь свѣтоно́сную па́мять твою́ пра́зднуемъ весе́ліемъ се́рдца, пресла́вне Кири́лле.

По 2-мъ стихосло́віи сѣда́ленъ въ окто́ихѣ.

По поліеле́и велича́ніе и сѣда́ленъ, и по 50-мъ псалмѣ́ стихи́ру, зри́
въ слу́жбѣ 11-го Ма́ія, св. Кири́ллу и Меѳо́дію.

Кано́нъ въ окто́ихѣ и свято́му, гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Въ ча́ши прему́дрости Боже́ственная твоя́ уста́ приложи́въ, напита́ся спаси́тельнаго питія́, ра́зумомъ свѣ́тъ явля́я язы́комъ, и сѣки́ра, посѣка́ющая непрія́зненну вся́ку ле́сть.

Просвѣти́въ тя́, я́ко свѣти́ло, Свѣтода́вецъ Христо́съ Бо́гъ на́шъ всему́ мíрови яви́ тя́ учи́теля и посла́ учи́ти те́мныя кни́гами законоу́чными язы́ки за́падныя.

Святы́мъ Ду́хомъ отъ пучи́ны извлече́ Бо́жіимъ сло́вомъ всему́ мíру учи́теля благовѣ́рія, му́дре, драгíй би́серъ, Бо́жія зако́на кни́гами, блаже́нне, язы́ки освяти́.

Богоро́диченъ: Кра́сный у́мъ преимѣ́ небе́снымъ си́ламъ, Бо́жій бо Тво́й бы́сть хра́мъ душе́вный, егда́ во чре́вѣ понесла́ еси́ Бо́га на́шего Дѣ́ва, горо́ пресвята́я.

Пѣ́снь 3.

Ирмо́съ: Съ высоты́ снизше́лъ еси́ во́лею на зе́млю, превы́ше вся́каго нача́ла, и смире́нное возне́слъ еси́ изъ а́да преиспо́дняго естество́ человѣ́ческое: нѣ́сть бо свя́тъ па́че Тебе́, Человѣколю́бче.

Сло́вомъ, и се́рдцемъ, и язы́комъ, Христа́, Сы́на Бо́жія, проповѣ́да, Прему́дрость же и Си́лу и Сло́во вопло́щшееся, блаже́нне, струя́ми при́точными посрами́въ тріязы́чники.

Цѣвни́ца при́точна свя́та во и́стинну яви́ся, блаже́нне Кири́лле, гла́съ на́мъ спасе́нія святы́мъ зву́комъ духо́внымъ бряца́я прекра́сно, ле́сть прогна́лъ еси́.

О, у́ме о́гненный, о доброгла́сна трубо́, о сла́вію пѣсни́вый, о ла́стовице златоглаго́ливая, о язы́че сла́ждшій ме́да въ при́тчахъ, Кири́лле прему́дре, всѣ́хъ на́съ помяни́.

Богоро́диченъ: Совѣ́томъ Отчимъ Безнача́льный Сы́нъ я́ко Сло́во въ ложесна́ Твоя́ осѣне́ніемъ Свята́го Ду́ха, Богоро́дице, всели́ся и пло́тію роди́ся изъ Тебе́, спаса́я ду́ши на́ша.

Сѣда́ленъ, гла́съ 8. Подо́бенъ: Прему́дрости словеси́.

Яко заря́, просвѣти́въ всю́ зе́млю, еретики́ го́ниши, взыска́я на восто́цѣ, и за́падѣ, и сѣ́верѣ, и ю́зѣ: тріязы́чники исправля́еши, проповѣ́дая страна́мъ, язы́ки свои́ми и́мъ глаго́ля и кни́ги предая́. Ри́ма же доше́дъ, ту́ тѣ́ло свое́ положи́, блаже́нне, въ ру́цѣ Госпо́дни ду́шу свою́ преда́въ: благовѣ́рія учи́телю, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю твою́ па́мять.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Другíй Авраа́мъ преселе́ніемъ, блаже́нне, бы́лъ еси́ отъ оте́чества, жела́ніемъ прему́дрости бо́льшія, я́ко златы́ми мони́сты укра́сился еси́, луча́ми пресвѣ́тлыми зѣло́ облиста́яся.

Копіе́мъ слове́съ твои́хъ я́ко За́мврія пронзи́лъ еси́, мадіа́нстѣй е́реси приложи́вшася го́рько, тѣле́снаго о́браза отмета́ющихся яви́вшагося во пло́ти Іису́са.

Равносу́щную проповѣ́далъ еси́ Свята́го Ду́ха си́лу Отцу́ и Сы́ну Трисо́лнечнаго Свѣ́та, Имже Бо́жіи быва́емъ по пода́нію сы́нове Свѣ́ту и и́стіи наслѣ́дницы.

Богоро́диченъ: Изба́вльшеся пе́рваго осужде́нія Ада́мова Тобо́ю, Дѣви́це, обрѣто́хомъ ра́дость неизглаго́ланную, благослове́ніе бо всѣ́мъ родила́ еси́, Сы́на Бо́жія въ на́шъ о́бразъ.

Пѣ́снь 5.

Ирмо́съ: Ны́нѣ воста́ну, — проро́чески рече́ Бо́гъ, — ны́нѣ просла́влюся, ны́нѣ вознесу́ся, па́дшаго пріе́мъ отъ Дѣ́вы и къ свѣ́ту у́мному вознося́й Моего́ Божества́.

Ма́стію свое́ю укра́сившуся тебе́, блаже́нне, до́брѣ, благода́ть излія́ся во устна́хъ твои́хъ, духовному́дре, и нече́ствующихъ глубину́ изсуши́ наводне́ну словесы́ твои́ми.

Стоя́ше крѣ́пко, посо́бствуя по вѣ́рѣ, му́дре, льсти́ претыка́нія посѣка́я сло́вомъ твои́мъ, равня́я вѣ́рнымъ Боже́ственную стезю́, наставля́я во гра́дъ Христо́въ послу́шливыя.

Преплыва́юще ди́вно бе́здну твои́мъ сло́вомъ и при́тчами, Кири́лле блаже́нне, отъ зимы́ мра́зныя благо́ю вѣ́рою въ тишину́ вы́шнихъ оби́телей вше́лъ еси́.

Богоро́диченъ: Спаса́я человѣ́ки, Отце́ви ра́венъ Сы́нъ Человѣ́къ быва́етъ: изъ Тебе́, Пречи́стая, пло́ть пріе́мь и земна́я Бо́гови сотвори́въ и небе́сному Ца́рствію человѣ́ки содѣ́лалъ е́сть.

Пѣ́снь 6.

Ирмо́съ: Пріидо́хъ во глубины́ морскíя, и потопи́ла мя́ е́сть бу́ря мно́гихъ грѣхо́въ, но я́ко Бо́гъ изъ глубины́ возведи́ живо́тъ мо́й, Многоми́лостиве.

Со́нмъ мертви́тся, приложи́вшся агаря́номъ, я́ко змíи, живу́щимъ, въ при́тчахъ твои́хъ Трисо́лнечнаго и Еди́наго Божества́ си́лою у́бо изнемога́я.

Яко избра́нна стрѣла́ яви́ся еретико́мъ враго́мъ, я́тая въ тѣ́лѣ святѣ́мъ, я́коже проро́чески пи́шется, храня́щаяся Божество́мъ и сострѣля́ющая враги́.

Возлюби́въ измла́да прему́дрость, сестру́ себѣ́ прія́лъ ю́ еси́ и, умудри́вся Бо́гомъ, блаже́нне, яви́лся еси́ фило́софъ.

Богоро́диченъ: Іезекіи́ль Тя́ врата́ ви́дѣ, и́миже про́йде еди́нъ Бо́гъ Вы́шній, ложесна́ свята́я Твоя́ проше́дъ пло́тію, Пречи́стая, и не отве́рста оста́вилъ е́сть и́хъ.

Конда́къ, гла́съ 2. Подо́бенъ: Тве́рдыя и богогла́сныя.

Тве́рдымъ и богодохнове́ннымъ уче́ніемъ просвѣща́я мíръ пресвѣ́тлыми заря́ми, обтече́, я́ко мо́лнія вселе́нную, Кири́лле блаже́нне, разсѣва́я пресвѣ́тлое Бо́жіе сло́во, на за́падѣ, и сѣ́верѣ, и ю́зѣ, мíръ просвѣща́я чудесы́.

Икосъ:

Пресвѣ́тлое житіе́ возлюби́въ, му́дре, заря́ми Трисо́лнечнаго Божества́ освѣще́нъ, прои́де, я́ко мо́лнія, вселе́нную, сѣ́верную и ю́жную просвѣти́въ страну́, за́паднымъ же свѣ́тъ незаходи́мъ возсія́. Тѣ́мже и мнѣ́, мра́къ грѣхо́вный прогна́въ, блаже́нне, свы́ше испроси́ посла́ти благода́ть духо́вную: и́маши бо дерзнове́ніе къ Бо́гу непреста́нно моли́тися за вся́.

Лю́діе: Мíръ просвѣща́я чудесы́.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Слове́сными пища́льми, блаже́нне, призыва́я о́вцы въ огра́ды святы́я, му́дрыми при́тчами, красото́ю и сла́стію слове́съ твои́хъ.

Не устраши́ся, учи́телю, во́ински еди́нъ вни́ти въ по́лкъ жидо́вскій, всѣ́хъ же наро́дъ и́хъ сто́лпъ му́дростію разве́рзе, я́ко и Онъ ханаа́нскій проро́ческими при́тчами.

Тебе́ дарова́ исто́чника знамена́на всѣ́мъ пра́вѣй вѣ́рѣ, блаже́нне, воды́ сладото́чныя напая́юща всегда́ сыны́ благовѣ́рія и исполня́юща, я́ко рѣку́, тече́ніемъ Це́рковь Госпо́дню.

Богоро́диченъ: Небе́съ ши́ршую содѣ́я Бо́гъ, Браконеиску́сная, въ ложесна́ Твоя́ всели́вся, Пречи́стая, тѣ́мже молю́ Ти ся стужа́юща мя́ прегрѣше́нія изба́ви широто́ю покая́нія моего́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Къ Свѣ́ту преложи́вся, свѣ́тъ яви́ся вня́тію е́же отъ Бо́га, о фило́софе, и́нъ бо обрѣ́теся Па́велъ добродѣ́тельми, прете́къ всю́ зе́млю въ язы́цѣхъ, со́лнца свѣ́тлѣе сія́я, сло́вомъ уче́нія твоего́ вопія́: Го́спода по́йте, дѣла́, [и превозноси́те Его́ во вся́ вѣ́ки].

Якоже прето́ржеся со́нмъ евре́йскій острото́ю слове́съ твои́хъ, блаже́нне, въ гра́дѣхъ Сѣ́верскихъ въ коза́рѣхъ приложи́ся къ тебѣ́. Ты́ бо мно́жество посѣче́, учи́телю святы́й, я́ко Голіа́ѳа Дави́дъ, въ пога́нѣхъ.

Вели́ка тя́ опло́та и тве́рдь земля́ Панно́нская и́мущи, блаже́нне, заблужде́нія ерети́ческая ру́шитъ кни́гами и тріязы́чниковъ, крѣ́пко науче́на тобо́ю, тѣ́мже тя́, учи́теля му́драго, помина́юще при́сно, Христа́ прославля́емъ.

Богоро́диченъ: Кни́гами уче́ній святы́хъ проро́къ, Дѣ́во, Богоро́дицу Тя́ вѣ́рою проповѣ́даемъ, Ты́ бо роди́ Отроча́, Ве́тхаго де́ньми, я́ко но́ва Человѣ́ка, тѣ́мже Тя́, Пресвята́я, пое́мъ и превозно́симъ.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Яко свѣти́ло, тя́ че́стно Христо́съ возложи́, бле́щущася въ конца́хъ, му́дре, въ вѣнци́ церко́внѣмъ, Его́же ра́ди до сме́рти подвиза́ся, умножа́я вѣ́рныхъ воспита́ніе ра́зумомъ и говѣ́ніемъ.

Па́влу Боже́ственному учени́къ бы́лъ еси́, его́же дѣ́тели послѣ́дуя, про́йде до кра́й за́падныхъ, сло́во разсѣва́я въ язы́цѣхъ (въ Као́нѣ), и въ Ри́мѣ ду́хъ сво́й въ ру́цѣ Бо́гу своему́ предаде́.

Яко со́лнце на земли́ возсія́, учи́телю, всю́ду при́тчами, луча́ми богогла́сія, просвѣща́я, пою́щія тя́ вѣ́рою и о ра́цѣ стоя́щихъ твоего́ тѣ́ла, помяни́, блаже́нне, своя́ ученики́.

Богоро́диченъ: Луча́ми Твоего́ свѣ́та, Пречи́стая, ду́шу мою́ ны́нѣ просвѣти́ лежа́щу въ ро́вѣ ги́бельнѣмъ, воздви́гни, враги́ сокруша́ющи, оскорбля́юще при́сно души́ мое́й и на грѣхи́ мя́ побужда́юща.

Свѣти́ленъ:

Яко свѣти́льника тя́ Христо́съ мíрови показа́ и учи́теля вселе́ннѣй, преблаже́нне Кири́лле, солу́нская о́трасле, тѣ́мъ и на́мъ, помина́ющимъ честну́ю твою́ па́мять, отъ Него́ про́симъ ми́лость.

На хвали́техъ стихи́ры и на литургíи блаже́нна, проки́менъ, аллилу́ія и прича́стенъ зри́
въ слу́жбѣ 11-го Ма́ія св. Кири́ллу и Меѳо́дію.

Источникъ: Избо́рникъ, слу́жбы, житія́, словеса́ похва́лна и ака́ѳистъ святы́мъ учи́телемъ Слове́нскимъ Кири́ллу и Меѳо́дію обдержа́й. — Издаде́ся въ па́мять о дни́ свята́го Меѳо́дія.  — СПб.: Въ Сѵнода́льной Тѵпогра́фіи, 1886. — С. 19-26.

/ Къ оглавленію раздѣла /


Наверхъ / Къ титульной страницѣ

0