Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 13-й де́нь.
Преподо́бнаго отца́ на́шего Мартиніа́на.

[ВЕЧЕРЪ,]
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Имѣ́я въ се́рдцы твое́мъ о́гнь, Мартиніа́не богоблаже́нне, Боже́ственнаго Ду́ха, Си́мъ опали́въ нечистоты́ о́бразъ отрокови́цы обрѣ́теся, уязви́въ сопротивоборца́ мече́мъ его́, отню́дуже прирази́вся тебѣ́, яви́ся смѣ́хъ предлежа́ и́стинно, и посра́мленъ всескве́рненый.

Огнь у́бо вже́глъ еси́ чу́вственнѣ проти́ву вра́жіимъ ополче́ніямъ, преблаже́нне, мы́сль стяжа́въ вѣ́чнаго огня́, сласте́й твои́хъ разжже́ніе увяди́лъ еси́ зѣло́, на ка́мени же но́зѣ твои́ поста́вль, преподо́бне, на се́мъ хра́мину созда́лъ еси́, по страна́мъ обходя́, о́тче, терпѣ́ніемъ твои́мъ вѣнча́лся еси́.

Сла́ва, гла́съ 2:

Ра́дуйся, честна́я и многочу́дная Палести́нская похвало́, возсія́ бо на́мъ, я́ко пресвѣ́тло со́лнце, и, врага́ опали́въ всю́ си́лу, у́ды твоя́ соже́глъ еси́ огне́мъ, блаже́нне, въ гора́хъ бо, и пусты́няхъ, и островѣ́хъ вся́ко искуше́ніе тебѣ́ принесе́: въ пусты́ни у́бо жену́ тебѣ́ предста́ви, на ка́мени же въ мо́ри искуси́тель искуси́ти тя́ покуша́шеся, му́дре. Но, о Мартиніа́не треблаже́нне! Христа́ непреста́нно о на́съ моля́ не преста́й, творя́щихъ вѣ́рою твою́ па́мять.

И ны́нѣ, богоро́диченъ или́ крестобогоро́диченъ. Подо́бенъ: Егда́ отъ дре́ва.

Гро́здъ всезрѣ́лый, Чи́стая, Его́же невоздѣ́ланно во утро́бѣ младоноси́ла еси́, на дре́вѣ я́ко узрѣ́ла еси́ Сего́ ви́сяща, рыда́ющи, восклица́ла еси́, взыва́ющи: Ча́до, сла́дость иска́пай, е́юже пія́нство вся́кое страсте́й отъе́млется, Благодѣ́телю, Мене́ ра́ди, Тебе́ ро́ждшія, боже́ственными утѣше́ньми, я́ко Благоутро́бенъ.

На стихо́внѣ окто́иха. Сла́ва, гла́съ 6. Самогла́сенъ:

Испещре́нъ оде́ждею чистоты́ и просвѣще́нъ моли́твою боже́ственною, живу́ща же имѣ́я Христа́ въ себѣ́, отъ Дѣ́вы ро́ждшагося, же́нскимъ украше́ніемъ не восхи́тися, ни сла́сти плотскíя прія́тъ, но взы́де усе́рдно на тождерабо́тный о́гнь, Боже́ственный о́гнь въ се́рдцы имѣ́я, и чу́вственнымъ и вре́меннымъ огне́мъ стра́стный о́гнь попали́лъ еси́, и гее́нскій пла́мень угаси́лъ еси́. Тѣ́мже моли́ся, Мартиніа́не блаже́нне, и на́мъ всепа́губнаго и вѣ́чнаго изба́витися огня́.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

Тропа́рь, гла́съ 8:

Пла́мень искуше́ній сле́зъ тече́ньми погаси́лъ еси́, блаже́нне, и, морска́я волне́нія, и звѣре́й стремле́нія обузда́вый, взыва́лъ еси́: препросла́вленъ еси́, Всеси́льне, огня́ и бу́ри спасы́й мя́.


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Та́йными пѣ́сньми согла́сно, пріиди́те, восхва́лимъ по́стника благоче́стія дне́сь, Мартиніа́на, вѣ́рно, я́ко до́брѣ и зако́нно пости́вшася, тѣ́мже и побѣ́ды прія́тъ отъ Христа́ вѣне́цъ.

Неукло́нно стра́хомъ Христо́вымъ, о́тче, огражда́емъ, стра́ха вра́жія, я́коже мо́лнія, отгна́лъ еси́, стра́шенъ бо бы́лъ еси́ на ни́хъ терпѣ́ніемъ воздержа́нія и мечта́ньми непоколеби́мь пребы́лъ еси́, прехва́льне.

Спаси́тельною си́лою Христо́вою искуше́ніе тебѣ́ де́монское наше́дшее удо́бь ми́мо тече́, жены́ наи́тіе, преподо́бне, ю́же спасы́й, уязви́лъ еси́ сея́ ра́ди злонача́льника.

Богоро́диченъ: Во чре́вѣ поноси́вши безъ му́жа, Чи́стая, и Дѣ́ва же Ма́ти въ жена́хъ еси́ нетлѣ́нна, Ду́хомъ Святы́мъ Сы́на Бо́жія заче́нши во утро́бѣ, Его́же по благоволе́нію Отца́ родила́ еси́ безъ сѣ́мене.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Пло́ти воздержа́ніемъ отмы́лъ еси́ ме́рзости зло́бу, я́коже ти́ну, и обрѣ́лъ еси́ чистото́ю ума́ стези́, преподо́бне, пра́ведныхъ, гла́дкихъ путе́й отбѣ́гъ грѣхо́вныхъ, му́дре.

Вжили́въ се́рдце твое́ и разже́гъ стра́хомъ и любо́вію Госпо́днею, пло́ть твою́ опали́лъ еси́ во́лею огне́мъ веще́ственнымъ, му́дре, си́мъ пропису́я на́мъ гее́нны, преподо́бне, негаси́мый о́гнь.

Ураня́я твое́ тѣ́ло огне́мъ всеяду́щимъ, гони́тель яви́лся еси́ и вѣне́чникъ, уязвля́я супоста́та терпѣ́ніемъ, очища́я же помышле́ній скве́рну, преподо́бне, и убѣля́я ду́хомъ, и дѣ́вствуя пло́тію.

Богоро́диченъ: Зача́тіе неискусому́жно, Боже́ственное Рожде́ніе несказа́нно, па́че ума́ бо, Бо́гъ же, ражда́емый вы́ше естества́. О, Рождества́ Твоего́! О, чистоты́ Твоея́! Тобо́ю бо яви́ся мнѣ́ Бо́гъ въ ра́біи о́бразѣ.

Сѣда́ленъ, гла́съ 4. Подо́бенъ: Ско́ро предвари́.

Преподо́бный Тво́й, Го́споди, въ поще́ніи свое́мъ по́двиги показу́я усе́рдіемъ мно́гимъ, Христе́ Бо́же на́шъ, имѣ́я бо крѣ́пость Твою́, преоби́дяше бѣ́сы, посѣче́ сло́вомъ некрѣ́пкую горды́ню. Тѣ́мже Тя́ мо́лимъ: спаси́ ду́ши на́ша.

Сла́ва, и ны́нѣ, богоро́диченъ. Подо́бенъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Или́ крестобогоро́диченъ. Подо́бенъ:

Дѣ́во Всенепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й, проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Умертви́ся томи́теля ле́сти обрѣ́теніе и побѣжде́ніе прія́тъ, ея́же бо ра́ди побѣди́ти надѣ́яшеся, се́ю низложи́ся и попира́ется до́блѣ нога́ми крѣ́пко.

Претерпѣ́лъ еси́ до́блественнымъ нра́вомъ Го́спода, стези́ упра́вилъ еси́ и на ка́мень всели́лся еси́, преподо́бне, безъ покро́ва лежа́щъ, я́ко на не́бо, возше́дъ въ ма́лый о́стровъ.

До́блественнѣи и кра́сніи твои́ но́зѣ, прехва́льне, къ тече́нію просте́рлъ еси́, отъ страны́ въ страну́ преходя́: бѣжа́лъ бо отъ гра́да страсте́й и въ безстра́стіе дости́глъ еси́.

Богоро́диченъ: Пребыла́ еси́ по Рождествѣ́ Дѣ́ва, Препѣ́тая, Бо́гъ бо Безнача́льный яви́ся, изъ Тебе́ проходя́, Ему́же вчеловѣ́чшуся, подо́бія о́бразъ цѣлу́емъ.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Две́рь обрѣ́тъ добродѣ́тели, кова́рство врага́, преподо́бне, яви́лся еси́ и жи́зни мое́й предста́тель, души́ же наста́вникъ, погруже́ннѣй лю́тѣ бу́рею.

Да́ръ Бо́жій я́ко прія́тъ моли́твъ твои́хъ крѣ́пость, вся́ соверша́еши, му́дре, пресла́вно, и спаса́еши отъ глубины́, и отъ бу́ри избавля́еши страсте́й ду́ши на́ша.

Богоро́диченъ: Во двою́ естеству́ и ѵпоста́си еди́ной бы́лъ еси́ и соверше́нъ Сы́й Человѣ́къ. Несмѣ́шенъ о́бразъ или́ зра́къ не пострада́, Сло́ве, воплоща́яся, Го́споди.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Си́лою Бо́жіею укрѣ́пль твою́ ду́шу, прехва́льне, не ужа́слся еси́, наде́ждею огражда́емь, непрепла́ваему глубину́, му́дре, преити́, но спасе́ся, дельфи́нми носи́мь.

Житіе́ твое́ а́нгелы и́стинно удиви́, де́моны посрами́ и человѣ́ки просвѣти́, и жену́ па́че спа́слъ еси́, и на стезю́ поще́нія привле́клъ еси́.

Подо́біе твои́мъ трудо́мъ и честны́мъ подвиго́мъ, му́дре, твое́ преи́тіе по достоя́нію и́стинно бы́сть, и взя́тъ на враги́ цѣлому́дрія побѣ́ду, воздержа́ніемъ змíя уби́въ.

Богоро́диченъ: Зако́ны о Тебѣ́ изнемого́ша вои́стинну естества́, Дѣ́во Чи́стая, дѣ́вствуеши бо, ро́ждши сопресто́льна Отцу́ и Боже́ственному Ду́ху Сло́во су́ща, Бо́га же и Человѣ́ка.

Конда́къ, гла́съ 2. Подо́бенъ: Тве́рдыя.

Яко подви́жника благоче́стія иску́сна, и страда́льца произволе́ніемъ честна́го, и пусты́ни жи́теля и все́льника, въ пѣ́снехъ досто́йно восхва́лимъ Мартиніа́на присночестна́го: то́й бо змíя попра́.

Икосъ:

Отъ коне́цъ да́же до коне́цъ про́йде вѣща́ніе кра́сныхъ добродѣ́телей и боже́ственныхъ по́двигъ твои́хъ: мла́дъ сы́й во́зрастомъ, въ пусты́няхъ возжела́лъ еси́ пожи́ти, пѣ́нія Христу́, псалмы́ и моли́твы воспуща́я при́сно, де́нь же и но́щь возраста́я въ болѣ́знехъ и слеза́хъ, чи́стѣ житіе́ твое́ сконча́лъ еси́ и, му́дрѣ, злонача́льнаго посрами́лъ еси́, ты́ бо змíя попра́лъ еси́.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Ве́щнаго житія́ уста́вль себе́, мона́шествуй, бѣ́гай крѣ́пко, гра́ды вся́ и страны́ обходи́, я́ко досто́йно, Мартиніа́нъ бо учи́тъ безъ печа́ли пѣ́ти: благослове́нъ Бо́гъ оте́цъ на́шихъ.

Тве́рдымъ хожде́ніемъ Па́влову бы́лъ еси́, му́дре, ше́ствію о́бразъ, любо́вію гоня́, его́же пости́глъ еси́ воздержа́нія тече́ніемъ твои́мъ, тѣ́мже и, я́ко стра́ненъ мíра, позна́лся еси́, прехва́льне, Царю́ Небе́сному и просла́вился еси́ вѣ́рно.

Тече́ніе скончава́я поще́нія твоего́, учени́къ Христо́въ, Ду́хомъ Боже́ственнымъ проувѣ́дѣвъ отше́ствіе е́же отъ тѣ́ла, поя́ше душе́ю несомнѣ́нною: я́ко въ ру́цѣ Твои́, Влады́ко, ду́хъ мо́й и ду́шу мою́ ны́нѣ предаю́.

Богоро́диченъ: Во́ду жи́ву подая́, отъ исто́чника Христо́съ источи́, въ Твою́ святу́ю, Пресла́вная, утро́бу всели́ся, пребы́въ неслія́ненъ, всѣ́хъ нетлѣ́нія напои́въ, вѣ́рою зову́щихъ: благослове́нна еси́, Бо́га пло́тію ро́ждши.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Совле́кшися чу́вственнѣ плотскíя немощны́я ри́зы и му́жества взе́мши оде́жду и ра́зумъ, отрокови́ца вопія́ше, постя́щися: Тя́ превозноша́ю, Іису́се, во вѣ́ки вся́.

Ра́дуется усе́рдно, вои́стинну на ка́мени Христо́вѣ утвержде́на и посто́мъ и вѣ́рою вооружи́вшися крѣ́пко, отрокови́ца вопія́ше въ пѣ́снехъ: Тя́ превозноша́ю, Іису́се, во вѣ́ки.

Яко преложе́нъ отъ тлѣ́нныхъ и вы́шняго нетлѣ́нія прича́стникъ бы́въ, богоно́се, и боже́ственное тече́ніе сконча́въ, вѣне́цъ пріе́мъ, вопія́лъ еси́: Тя́ превозноша́ю, Іису́се, во вѣ́ки.

Богоро́диченъ: Сше́дый съ небесе́ за милосе́рдіе, Ще́дре, Бо́же вся́ческихъ, и ро́ждься отъ Дѣ́вы, спаси́ пою́щія: по́йте, вся́ дѣла́, Го́спода и превозноси́те Его́ во вѣ́ки.

Пѣ́снь 9.

Ирмо́съ: Что́ о Тебѣ́ ве́лія и пресла́вная та́йна, Ада́мова дщи́ и Вы́шняго Ма́ти, Еди́ный къ Бо́гу небла́зненный вѣ́рныхъ мо́стъ? Тя́ немо́лчными пѣ́сньми, вѣ́рніи, Богоро́дицу велича́емъ.

Зако́ны превозше́дъ, о́тче, поще́нія, просія́лъ еси́, въ воздержа́ніи вся́цѣмъ и моли́твѣ бдя́, посто́мъ же, вку́пѣ и чистото́ю, и говѣ́ніемъ. Тѣ́мже тво́й Вѣнча́тель при кончи́нѣ страда́ній тя́ проповѣ́дуетъ — Христо́съ.

Досто́инъ Бо́гу яви́вся, я́ко до́брѣ подви́глся еси́, вся́ко бо бре́мя отве́ргъ, ле́гко преплы́лъ еси́, о́тче, вели́кую и тя́жкую житія́ сего́ пучи́ну и прише́лъ еси́ въ приста́нище ти́хо, преше́дъ твое́ тече́ніе, му́дре.

Богоро́диченъ: Ты́ еси́ и́стинно, Еди́на Богоро́дице Приснодѣ́во, христіа́нъ направле́ніе, грѣ́шниковъ Предста́тельница, изъ Тебе́ бо благоче́стно возсія́ Избавле́ніе. Съ Ни́мже Тебѣ́ по до́лгу въ вѣ́рѣ пѣ́снь скончава́ю.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лъ еси́ себе́ въ пусты́няхъ и, стра́сти покори́въ пло́ти, равноа́нгеленъ яви́лся еси́, Мартиніа́не богоно́се.

Богоро́диченъ. Подо́бенъ:

Гора́, ю́же предви́дѣ дре́вле боже́ственный Авваку́мъ, присѣ́нна, часта́, Ты́ яви́лася еси́, Дѣ́во, и Тя́ Дави́дъ имену́етъ усыре́ну и ту́чну.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 138 – 141 об.

/ Къ оглавленію раздѣла /


Наверхъ / Къ титульной страницѣ

0