Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяцы Февруа́рія въ 12-й де́нь.

Иже во святы́хъ отца́ на́шего Меле́тія, архіепи́скопа Антіохíи Вели́кія.

[ВЕЧЕРЪ,]
На Го́споди, воззва́хъ: стихи́ры окто́иха 3 и Меле́тія 3, гла́съ 4. Подо́бенъ: Яко до́бля.

Поучи́вся, блаже́нне,* святи́телю Меле́тіе, въ зако́нѣ Госпо́дни,* я́коже писа́ся,* дре́во яви́лся еси́, на вода́хъ поще́нія стоя́щее* и плоды́ добродѣ́телей предлага́ющее благода́тію* просвѣти́вшаго святу́ю ду́шу твою́* и вся́ческихъ прія́тельну* содѣ́лавша духо́вныхъ осія́ній.

Украси́шася, всему́дре,* писа́тельнѣ лани́ты твоя́,* я́ко го́рлицы, лю́бящія воздержа́ніе* и пи́щу оплева́ющія, жела́ніемъ, Меле́тіе,* пи́щи разу́мныя,* ю́же тебѣ́ Христо́съ да́руетъ,* пріе́мъ мно́гія твоя́ труды́* и ре́вность разжже́нную,* ю́же имѣ́лъ еси́, предбѣ́дствуя вѣ́ры ра́ди.

Сла́ва, и ны́нѣ, богоро́диченъ:

Яко моли́тву неусыпа́ющу* и мольбу́ пребыва́ющу* иму́щи, Пречи́стая, ко Го́споду,* напа́сти успи́,* во́лны укроти́ окая́нныя моея́ души́* и въ ско́рби су́щее се́рдце мое́ утѣ́ши,* Отрокови́це, молю́ Тя́,* и облагодати́ у́мъ мо́й,* я́ко да досто́йно Тя́ просла́влю.

Крестобогоро́диченъ, гла́съ и подо́бенъ то́йже:

Агнца и Па́стыря Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Тебѣ́ вѣща́ше:* Сы́не Возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля, яви́ тя ста́ду твоему́, я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Меле́тіе, моли́ Христа́ Бо́га спасти́ся ду́шамъ на́шимъ.


[НА УТРЕНИ,]
Кано́нъ, его́же краегране́сіе: Твоя́ похвалы́ изъявля́ю, всеблаже́нне. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Свѣтода́вцу предстоя́ ве́сь свѣ́телъ, свѣ́томъ ра́зума омраче́нное о́ко души́ моея́ просвѣти́ и мглу́ отжени́ страсте́й твои́ми моли́твами, я́ко святи́тель бо, преподо́бне, и́маши дерзнове́ніе, Меле́тіе.

Въ нѣ́дрѣхъ Отца́ сѣдя́й, Соприсносу́щное и Соесте́ственное Сло́во ро́ждшему, проповѣ́дника Своего́ Божества́ поставля́етъ еди́нъ, я́ко апо́столомъ единонра́вна тя́ ны́нѣ, о богоявле́нне Меле́тіе!

Боже́ственнымъ просвѣти́вся сія́ніемъ, отъ Безнача́льнаго Отца́ единоро́дна Сло́ва, несозда́нна, вѣ́чна, богосло́вилъ еси́, преподо́бне, Аріевы же побо́рники единомы́сленныя разгна́лъ еси́, боже́ственнымъ всеору́жіемъ огражда́емь.

Богоро́диченъ: Воплоще́ннаго, Пресвята́я, родила́ еси́, пре́жде безпло́тнаго, Богонача́льнаго Сло́ва: Еди́на бо отъ вѣ́ка луча́ми чистоты́, дѣ́вства же добро́тою и всенепоро́чными дарова́ніи была́ еси́ досто́йна, Всенепоро́чная.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Твердѣ́йшу ду́шу адама́нта имѣ́я, гнило́е ересе́й мнѣ́ніе ты́, уче́ньми благоче́стія просвѣ́щься, всеблаже́нне, оплева́лъ еси́. Тѣ́мже, вѣ́рніи, тя́ вси́ пѣ́сньми, богому́дре, почита́емъ.

Уподо́бився добродѣ́тельми Христо́вымъ апо́столомъ, о́нѣхъ вла́сть и престо́лъ наслѣ́довалъ еси́ я́вственно, Меле́тіе всесла́вне, правосла́вія сто́лпъ и благоче́стія побо́рниче бы́въ.

Всыновле́нъ Бо́гу, и́же отъ Бо́га Бо́га Сло́ва не низве́лъ еси́ въ тва́рь безу́мно, но просла́вилъ еси́, Отцу́ Собезнача́льна и Сопресто́льна, Содѣ́теля и Зижди́теля всѣ́хъ вѣко́въ, богопрія́тне.

Богоро́диченъ: Въ Твою́ святу́ю Бо́гъ утро́бу всели́вся, воплоти́ся, я́коже вѣ́сть, Богома́ти, и спасе́ на́съ живоно́сными Свои́ми страстьми́, тѣ́мже Тя́ спасе́нія две́рь, Дѣ́во, зна́емъ.

Сѣда́ленъ, гла́съ 8. Подо́бенъ: Прему́дрости.

Поучи́вся де́нь же и но́щь въ зако́нѣ Госпо́дни, о́тче му́дре, я́ко дре́во плодови́то, на вода́хъ духо́вныхъ насажде́но, яви́лся еси́, тѣ́мже, свяще́нствовавъ Бо́гу непоро́чно, Аріева хуле́нія и Саве́лліева злосла́внаго нра́ва я́вѣ возгнуша́вся, правосла́вною мы́слію, святи́телю Меле́тіе, моли́ Христа́ Бо́га грѣхо́въ оставле́ніе дарова́ти пра́зднующимъ любо́вію святу́ю па́мять твою́.

Сла́ва, и ны́нѣ, богоро́диченъ:

Плотски́мъ неду́гомъ многови́днымъ и душе́внымъ страсте́мъ многообра́знымъ исцѣле́ніе обрѣ́тъ Тобо́ю, Пренепоро́чная, печа́лемъ же разрѣше́ніе, бѣда́мъ и ско́рбемъ премѣне́ніе гото́во и ско́ро избавле́ніе, вѣ́рою несомнѣ́нною и те́плымъ се́рдцемъ исповѣ́даю Твоя́ ми́лости, Влады́чице, сыно́мъ же человѣ́ческимъ мно́гая Твоя́ чудеса́, и молю́ся, кро́вомъ кри́лъ Твои́хъ при́сно соблюсти́ и сохрани́ти мя́ всегда́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Явственно, священнота́инниче, преизя́ществовавъ, Петра́ престо́лъ наслѣ́довалъ еси́ верхо́внаго, отъ Христа́ рукоположе́ннаго, его́же и нра́ву порѣвнова́въ, Сы́на Бо́га жива́го Спа́са просла́вилъ еси́, уче́ніемъ о́наго послѣ́дуя.

Всеразли́чными укра́шенъ дарова́ньми, единонача́лія проповѣ́дникъ бы́лъ еси́, во Отцѣ́ и Единоро́днѣмъ Сло́вѣ познава́емаго и Боже́ственнѣмъ Ду́сѣ, всему́дре, Еди́ницу у́бо Существо́мъ, въ Тре́хъ Ли́цѣхъ су́щу, научи́лъ еси́, преподо́бне.

Воспита́вся добро́тами, богоуче́нне, и заре́ю тоя́ вообража́емь, и просвѣти́вся Боже́ственными блиста́ньми по прича́стію, Це́ркви свѣ́тъ вторы́й бы́лъ еси́, богоявле́нне, просвѣще́ніе благоче́стія явля́я вѣ́рою притека́ющимъ.

Богоро́диченъ: Да о́бразъ, погребе́нный страстьми́, взы́щеши бога́тствомъ бла́гости, въ Дѣви́ческую всели́лся еси́ утро́бу и изъ нея́же Ты́, Прему́дрость Бо́жія, хра́мъ созда́лъ еси́, и́мже по́жилъ еси́ съ человѣ́ки, Ще́дре, и спа́слъ еси́ мíра концы́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Жиру́ющей безмѣ́стно вся́кой е́реси, злоде́монстѣй, превше́лъ еси́, о́тче, благоро́діемъ души́, и свѣ́тлостію, и всесвяты́мъ нра́вомъ, и тве́рдымъ благоче́стіемъ, богоявле́нне преблаже́нне Меле́тіе.

Вся́кимъ усе́рдіемъ Аріевы единому́дренники отвраща́я, правосла́вною вѣ́рою, богоно́се, держа́ву утверди́лъ еси́ въ Тро́ицѣ Еди́наго Бо́га на́мъ проповѣ́дуя, всеблаже́нне о́тче Меле́тіе.

Пребоже́ственныя Тро́ицы таи́нникъ бы́лъ еси́ всеи́стиннѣйшій, Отцу́ Сло́во Единосу́щно честву́я и сопресто́льно и Боже́ственный Ду́хъ, единоесте́ственъ Отцу́ и Сло́ву, всечестны́й о́тче Меле́тіе.

Богоро́диченъ: Во́инства вы́шнихъ, Всечи́стая, си́лъ Тя́ ублажа́ютъ, ро́дове же вси́ человѣ́честіи досто́йно сла́вятъ, Тебе́ бо ра́ди еди́ныя, су́щи на земли́, съ небе́сными совоку́пльшеся, пою́тъ, Дѣ́во, Рождество́ Твое́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Изсуши́лъ еси́ пото́ки, богому́дре, ерети́ческія, отве́рзлъ же еси́ исто́чники догма́товъ пра́вости, непобѣди́мь побо́рникъ правосла́вія бы́въ, богоблаже́нне.

Изсуши́въ му́тный Аріевъ то́къ и безбо́жный, напои́лъ еси́ бога́тно благода́тными вода́ми вѣ́рныхъ собо́ры и церко́вное благолѣ́піе украси́лъ еси́.

Живы́й подо́бно боже́ственными начина́ньми, бы́лъ еси́ пресвѣ́телъ, о́тче, дѣ́латель, неукло́нно забра́ло благоче́стія и па́стырей наста́вникъ.

Богоро́диченъ: Просвѣща́ютъ ду́ши правосла́вно пою́щихъ Тя́ рече́нія проро́ческая, Твое́ провозвѣща́юще пречи́стое зача́тіе и е́же вы́ше сло́ва, Богоневѣ́сто, Твое́ Рождество́.

Конда́къ, гла́съ 6:

Духо́внаго твоего́ дерзнове́нія убоя́вся, отсту́пникъ бѣ́гаетъ Македо́ній, моли́твенное же служе́ніе соверша́юще, твои́ раби́, любо́вію притека́емъ, а́нгеломъ собесѣ́дниче, Меле́тіе, о́гненный мечу́ Христа́ Бо́га на́шего, вся́ безбо́жныя закала́яй: воспѣва́емъ тя́, свѣти́льника, просвѣти́вшаго вся́.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Святы́й тя́ собо́ръ первостоя́теля имя́ше, богопрія́тне, его́же Святы́й Ду́хъ отъ коне́цъ во еди́но собра́, пѣсносло́вящія Того́ Божество́: благослове́нъ еси́, Бо́же оте́цъ на́шихъ.

Равноче́стно получи́лъ еси́ предсѣда́тельство апо́столовъ Христо́выхъ, и боже́ственное си́хъ уче́ніе наслѣ́довалъ еси́ и, житію́ подо́бяся, пѣ́лъ еси́: благослове́нъ еси́, Бо́же оте́цъ на́шихъ.

Умъ имѣ́я острѣ́йшъ, къ боговидѣ́нію просте́ртъ, ерети́чествующихъ тупозрѣ́нію поруга́лся еси́, благочести́выя же уча́, взыва́лъ еси́: благослове́нъ еси́, Бо́же оте́цъ на́шихъ.

Богоро́диченъ: Яко зерца́ло чи́сто, Твоея́ чистоты́ блиста́ющася благода́тію, Свѣтороди́тельница Дѣ́во, и Богоро́дица Всечи́стая была́ еси́. Тѣ́мже согла́сно Рождеству́ Твоему́ пое́мъ: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пресвѣ́тло научи́лъ еси́ Еди́но чти́ти Божество́, е́же во Отцѣ́, и Сы́нѣ, и Ду́сѣ, и си́лу безмѣ́рну, и ца́рство еди́но я́вѣ сво́йствомъ, крѣ́пко соблюда́емымъ ко́ейждо Ѵпоста́си. Ему́же и поя́, вопія́лъ еси́: лю́діе, превозноси́те во вся́ вѣ́ки.

Святы́ни хра́мъ, святи́телю, бы́въ, вся́ освяща́еши, твое́ и́мя нарица́ти тща́щіяся, и о́бразъ, о́тче, тво́й, любо́вію я́же къ тебѣ́ напису́ющія, блаже́нне, и вѣ́рою пою́щія: благослови́те, вся́ дѣла́ Госпо́дня, Го́спода, по́йте и превозноси́те Его́ во вѣ́ки.

Тайнонаставле́ньми изря́днѣйшее твое́ ста́до просвѣти́лъ еси́, ны́нѣ же перворо́дныхъ Це́рковь возрасти́лъ еси́, приложе́ніе бы́въ отъ вѣ́ка просія́вшимъ святи́тельскими и та́йными слу́жбами. Съ ни́миже вопіе́ши непреста́нно: свяще́нніи, по́йте, лю́діе, превозноси́те Го́спода во вѣ́ки.

Богоро́диченъ: Науча́еми, Всечи́стая, е́же на Тебѣ́ та́инствомъ и бы́вшее Тобо́ю пожина́юще душа́мъ избавле́ніе и спасе́ніе, зове́мъ со арха́нгеломъ Гавріи́ломъ Тебѣ́, — ра́дуйся, — вопію́ще, — Богоро́дице, — и вѣ́рно пѣснопою́ще Тя́, и превознося́ще, Чи́стая, во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Невеще́ственно невеще́ственному предстоя́, Его́же, и Зижди́теля всѣ́хъ и Го́спода, и Отчее Сло́во, и Му́дрость, су́щественнѣ и соесте́ственнѣ су́ща, ты́ богосло́вилъ еси́ свѣ́тло, моля́, не преста́й спасти́ и́же вѣ́рою тя́, богоглаго́ливе, хва́лящія.

Труды́ потя́щася духо́вными и усе́рдно еще́ борю́щася за него́ съ духобо́рцы, тя́ зря́ Благíй и Святы́й Ду́хъ, вѣнча́въ я́ко побѣди́теля, прія́тъ досто́йно, и съ вы́шними, всеблаже́нне, ликостоя́ніи счисли́ тя.

По́двигъ соверши́въ благочести́вый, и тече́ніе сконча́въ добрѣ́йшее, и пра́вѣй вѣ́рѣ научи́въ всеблагоче́стно, пра́ведный вѣне́цъ отъ всѣ́хъ Содѣ́теля прія́лъ еси́, богоглаго́ливе, собо́ра учи́телей пѣ́снь отъ пѣ́сней предпосыла́я.

Богоро́диченъ: Удо́бно, Богоро́дице, преити́ житія́ пода́ждь ми́ бу́рю, напа́стей настоя́нія и страсте́й, я́ко бла́га укротя́щи и наставля́ющи къ добродѣ́тели и стези́ пра́вости, да я́ко Благодѣ́тельницу непреста́нно велича́ю Тя́.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 121 об. – 125 об.

/ Къ оглавленію раздѣла /


Наверхъ / Къ титульной страницѣ

0