Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяцы Февруа́рія въ 11-й де́нь.
Свята́го священному́ченика Вла́сія.

[ВЕЧЕРЪ,]
На Го́споди воззва́хъ: стихи́ры окто́иха 3 и свята́го 3, гла́съ 1. Подо́бенъ: Небе́сныхъ чино́въ.

Воста́въ явле́ніемъ* соборонача́льника Христа́,* собра́ніе беззако́нныхъ ви́дѣвъ, му́чениче,* усе́рдно на суди́ще прише́лъ еси́, му́дре,* сла́вы взе́мъ побѣди́тельная,* ны́нѣ на небесѣ́хъ водворя́ешися, преосвяще́нне.

Кро́вными ка́плями твои́ми, му́чениче Вла́сіе,* оде́жда Це́ркви истка́ся красно́,* благопома́заніи пе́стрыми укра́шься,* сугу́быми болѣ́зней обагре́ньми,* е́юже одѣва́ется я́ко красото́ю невѣ́стною,* воспѣва́ющи Жениха́ Христа́.

Сла́ва, гла́съ 4:

Яко до́бръ дѣтонаста́вникъ и учи́тель благоче́стія, дѣ́йственною си́лою боже́ственныхъ слове́съ твои́хъ жены́ боголюбе́зны приве́лъ еси́ къ подвиго́мъ му́ченическимъ, не́мощь естества́ тѣ́мъ укрѣпля́я о Христѣ́, съ ни́ми тече́ніе страда́ній до́брѣ сконча́въ, въ черто́зѣ небе́снѣмъ свѣ́тло ра́дуешися, сугу́бымъ вѣнце́мъ Боже́ственныя сла́вы украша́яся и прося́ съ ни́ми ми́ръ на́мъ дарова́ти и ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца* ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

На стихо́внѣ окто́иха. Сла́ва, гла́съ 6:

Прозя́бъ въ поще́ніи Боже́ственныхъ добродѣ́телей, тезоиме́нно, Вла́сіе, процвѣ́лъ еси́ Дави́дски, я́ко фи́никсъ, во дво́рѣхъ Госпо́днихъ и, я́ко ке́дръ, умно́жился еси́ исправле́ньми, я́ко виногра́дъ же плодови́тъ, въ дому́ Бо́жіи, во вре́мя муче́нія урѣза́емь му́къ томле́ньми, отъ плода́ по́двигъ твои́хъ источи́лъ еси́ на́мъ вино́ разу́мное, отъ него́же пію́ще, весе́лія боже́ственнаго сердца́ наполня́емъ и, согла́сно соше́дшеся къ честнѣ́й па́мяти твоего́ сконча́нія, ублажа́юще, восхваля́емъ тя́, прося́ще прія́ти тобо́ю ми́ръ и ве́лію ми́лость.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Лю́ди беззако́ннѣйшія, безъ пра́вды пригвожда́ющія Тя́ на дре́вѣ, Дѣ́ва и Чи́стая Ма́ти Твоя́ зря́щи, я́коже Симео́нъ прорече́, утро́бою, Спа́се, уязвля́шеся.

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́нія обрѣ́лъ еси́, богодохнове́нне, въ видѣ́нія восхо́дъ, сего́ ра́ди сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Вла́сіе. Моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Похвалу́ согла́сну дне́сь Христу́ прино́симъ, сла́вную Вла́сія му́драго творя́ще па́мять, Моисе́йски, празднолю́бцы, пою́ще пѣ́снь Бо́гу на́шему, я́ко просла́вися.

До́льнихъ презира́тель Вла́сій и Христо́въ рачи́тель, я́ко святи́тель, и му́ченикъ, и па́стырь, е́же дѣ́ломъ показа́ніе, и, предло́жь боже́ственную трапе́зу, на снѣде́ніе созыва́етъ на́съ.

Житіе́ добродѣ́тельми очи́стилъ еси́ и сосу́дъ яви́лся еси́, потре́бенъ боже́ственнаго мѵ́ра на воспрія́тіе честна́го служе́нія, му́дре, оде́жду же кровьми́ муче́нія испестри́лъ еси́.

Богоро́диченъ: Воста́ отъ о́тча паде́нія, Богороди́тельнице Чи́стая, и отъ кля́твы изба́вися я́вѣ прама́тернія, Пресвята́я, Твои́мъ Рождество́мъ ро́дъ ве́сь человѣ́ческій.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Яко вѣ́домъ Бо́гу, свяще́нствовати Христу́ пома́зался и научи́лся Ду́хомъ, са́мъ ся́ кро́вію освяти́лъ еси́.

Уче́ньми вои́стинну сбы́тіемъ му́дрыхъ дѣ́лъ твои́хъ Це́ркви бы́лъ еси́ му́ченикъ и учи́тель, Вла́сіе.

Образъ благоче́стія Це́ркве Христо́вы бы́лъ еси́, свяще́нную оде́жду твою́ кровьми́ уясни́лъ еси́ страда́ній твои́хъ.

Богоро́диченъ: Ро́ждши на земли́ пребога́таго Бо́га, Чи́стая, человѣ́ческое паде́ніе на небеса́ возвела́ еси́.

Конда́къ, гла́съ 2. Подо́бенъ: Вы́шнихъ ища́.

Боже́ственное прозябе́ніе, цвѣ́тъ неувяда́емый, лозы́ Христо́вы розго́ многострада́льная, богоно́се Вла́сіе, вѣ́рою чту́щія па́мять твою́ весе́лія твоего́ испо́лни, моля́ся непреста́нно о всѣ́хъ на́съ.

Сѣда́ленъ, гла́съ 8. Подо́бенъ: Прему́дрости.

Благоче́стія сы́й прозябе́ніе че́стно, нече́стія яви́лся еси́ потреби́тель, Вла́сіе прехва́льне, си́лою духо́вною: на суди́щи бо и́дольскую ле́сть обличи́лъ еси́ и благодерзнове́нно пѣ́ти Тро́ицу проповѣ́далъ еси́, тѣ́мже и беззако́ннымъ преда́вся, страстоте́рпче, звѣ́ря умори́лъ еси́, злонача́льнаго змíя. Сего́ ра́ди вопіе́мъ ти́: моли́ Христа́ Бо́га, согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, Нескве́рная, Небла́зная, Всенепоро́чная Влады́чице, омраче́нную ду́шу мою́ ослѣпле́ніемъ страсте́й, безстра́стія заре́ю просвѣти́, молю́ся, и оскверне́нное ми́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́, Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца, и Па́стыря и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя Стра́сти Твоя́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Утвержда́емь жезло́мъ и́стиннымъ, Моисе́йски низложи́лъ еси́ пре́лести змíя, Вла́сіе, уго́дниче Христо́въ, обличи́въ мучи́теля и наста́вль но́выя лю́ди.

Слове́снымъ тя́ и безслове́снымъ благодѣ́теля, е́же къ Бо́гу присвое́ніе показа́, блаже́нне, исправле́ній твои́хъ, тѣ́мже у́бо прія́лъ еси́ исцѣле́ній дарова́нія.

Во удо́лѣ, идѣ́же положи́ся болѣ́знь, су́щимъ о Христѣ́ твои́мъ овца́мъ пра́ведно, все́, о́тче, удави́лъ еси́ сло́вомъ благода́ти беззако́нія те́рніе.

Богоро́диченъ: Яко ра́й, посредѣ́ Це́ркве насажде́нъ, яви́ся ро́ждши Дре́во Жи́зни, Препѣ́тая, отъ Него́же у́бо вкуси́вше, позна́хомъ Христа́ Бо́га на́шего.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

На па́жити Боже́ственнѣй просте́ръ предѣ́лы ста́да твоего́, святи́телю, богому́дренно ле́сть отгна́лъ еси́ отъ всея́ земли́.

Уче́ньми, му́дре святи́телю, ста́до твое́ утверди́лъ еси́ въ вѣ́рѣ, се́ бо и жены́ ле́сть попра́ша.

Любо́вію Христо́вою утвержда́емы, жены́ къ подо́бію прихо́дятъ по́двигъ твои́хъ, о́тче, закала́емы усе́рдно Христо́ви.

Богоро́диченъ: Умертви́ся вои́стинну Рождество́мъ Твои́мъ, Влады́чице, наи́тіе сме́ртное, свѣ́томъ бо тма́ разоря́ема ви́дится.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Красото́ю разли́чныхъ ра́нъ тѣле́сныхъ та́йныя оде́жды твоея́ украси́лъ еси́ лѣ́поту и обою́ду, іера́рше, вѣнча́лся еси́ благода́тію.

Вѣ́рою Христо́вою я́ко стеко́шася, жены́ стра́ждущія съ тобо́ю, о́тче, усе́рдно уме́рша, Вла́сіе. Любо́вію творя́щихъ па́мять твою́ сохрани́.

Ре́вностію Христо́вою разже́гшеся му́ченицы, ласка́тельныя ле́сти пре́лесть отве́ргше, му́камъ томле́нія запали́ша кро́вію.

Богоро́диченъ: Крѣ́пость моя́ вои́стинну Ты́ и пѣ́ніе еси́, Богороди́тельнице, на Тя́ бо наде́жду мою́ возложи́хъ и возвы́сихъ Тобо́ю на враги́ моя́ ро́гъ мо́й.

Конда́къ, гла́съ 8. Подо́бенъ: Яко нача́тки.

Свяще́нія пома́заніемъ и муче́нія кро́вію украси́лся еси́, сла́вне Вла́сіе, и сія́еши всю́ду, въ вы́шнихъ лику́я и на́съ назира́я, въ хра́мъ тво́й прише́дшія и въ не́мъ тебѣ́ непреста́нно зову́щія: всѣ́хъ на́съ соблюди́.

Икосъ:

Со тща́ніемъ, бра́тіе, собери́теся и хра́мъ му́ченика дости́гните, я́ко да сего́ воспое́мъ дне́сь, я́ко да благода́тію его́ наслади́мся, ду́ши бо спаса́етъ и тѣлеса́ отъ страсте́й многоразли́чныхъ, я́ко му́ченикъ, я́ко преподо́бенъ, я́ко вѣ́ренъ святи́тель и побо́рникъ, вопію́щимъ ему́ отъ души́ чи́сты: всѣ́хъ на́съ соблюди́.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Дави́дски тебѣ́ взыва́емъ, о о́тче Вла́сіе, любо́вію: Го́споду яви́лся еси́ ты́ подо́бникъ, и стопы́ твоя́ не позна́шася, и́бо стези́ твоя́ о Го́сподѣ яви́шася на вода́хъ.

Спа́совою насла́ждшеся, му́ченицы, благода́тію, вои́стинну ра́дость вмѣни́сте напа́сти муче́ніе: чу́до же, я́ко превы́ше человѣ́ка, крове́мъ, прело́жшимся во млеко́, ужа́сно.

Ма́терне у́бо къ муче́нію дерзнове́ніе зря́ще вѣ́рою Христо́вою дѣ́ти и того́ благолѣ́пія наслажда́ются, ко Влады́цѣ, ра́дующеся, тща́хуся.

Богоро́диченъ: Вы́шняго освяще́нное Боже́ственное селе́ніе, ра́дуйся, Тобо́ю бо даде́ся ра́дость, Богоро́дице, вопію́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Ру́цѣ распросте́ръ псало́мски предъ лице́мъ Бо́жіимъ, о́тче, прине́слъ еси́, священнодѣ́йствуя, кро́вію твое́ю моли́твы твоя́ Христу́. Тѣ́мже ча́шу, му́дре, спаси́тельную испи́въ, вопія́лъ еси́: благослови́те, вся́ дѣла́ Госпо́дня, Го́спода.

Вдови́цѣ ревну́юще благоче́стно, боже́ственную па́мять твою́ соверша́емъ вѣ́рно, богора́дованне Вла́сіе, и са́мъ у́бо обѣща́ніе, е́же сотвори́лъ еси́ къ не́й, и съ не́ю къ на́мъ дарова́ніи благи́ми на́мъ бу́ди на по́мощь.

Богоро́диченъ: Бя́ше естество́ человѣ́ческое, е́же пре́жде осужде́нное паде́ніемъ преступле́нія, обрѣ́те же, Богоро́дице, Рождество́мъ Твои́мъ благослове́ніе вои́стинну и пое́тъ ра́достно: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Якоже въ сла́дости ра́йстѣй и въ не́й Ца́рствіе, Вла́сіе, му́дре святи́телю, наслѣ́діе уготовля́я, на заколе́ніе поте́клъ еси́, о Го́сподѣ ра́дуяся.

Горды́ню посѣ́клъ еси́ ты́, блаже́нне, духо́внымъ мече́мъ вознося́щихся су́етно на ста́до твое́ безбо́жныхъ, твои́ми кровьми́ украси́въ благоче́стіе.

Вла́сіе, му́дре святи́телю, со стра́ждущими съ тобо́ю жена́ми, вку́пѣ и съ дѣтьми́ боже́ственными благослове́ньми хва́лящія тя́ вѣнча́ти помоли́ся, я́ко отъ нача́ла тебѣ́ сло́во воспѣ́вшихъ.

Богоро́диченъ: Въ Рождествѣ́ Дѣ́ва яви́лася еси́, я́ко пре́жде Рождества́, Богоро́дице, и по Рождествѣ́ та́кожде уста́вленныя зако́ны естества́ преше́дши, Влады́чице. Тѣ́мже Тя́ вси́ велича́емъ.

Свѣти́ленъ. Подо́бенъ: Не́бо звѣзда́ми.

Святи́тель и му́ченикъ, преподо́бенъ, незло́бивъ я́влься, Вла́сіе, страсте́й Христо́выхъ ра́ны нося́, Да́вшаго ти́ благода́ть исцѣля́ти вся́ неду́ги.

Сла́ва, и ны́нѣ, богоро́диченъ:

Тя́ Даніи́лъ преднапису́етъ несѣко́мую го́ру, изъ нея́же честны́й Ка́мень отсѣче́ся, истнѣва́етъ и́дольскія хра́мы, Богороди́тельнице Марíе.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 97 – 101.

/ Къ оглавленію раздѣла /


Наверхъ / Къ титульной страницѣ

0