Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 10-й де́нь.
Слу́жба преподо́бному Про́хору, чудотво́рцу Пече́рскому.

ВЕЧЕРЪ,
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Про́хоре сла́вне,* ты́, человѣ́ческія убѣга́я сла́вы,* я́ко паря́щая пти́ца,* на хо́лмъ Пече́рскій устреми́лся еси́* и прелета́лъ еси́,* осо́бящися вѣ́дѣніемъ* и дѣя́ніемъ зако́на Госпо́дня,* отню́дуже, возше́дъ* на ве́рхъ добродѣ́телей,* прія́лъ еси́ да́ръ чудотворе́нія* отъ Іису́са Человѣколю́бца* и Спа́са ду́шъ на́шихъ.

Про́хоре преблаже́нне,* блаже́нныхъ оте́цъ стопа́мъ послѣ́дуя,* тѣ́сное стяжа́лъ еси́ въ мíрѣ се́мъ житіе́,* я́ко и обы́чнаго хлѣ́ба не вкуси́лъ еси́,* но расту́щимъ зе́ліемъ удоволя́лся еси́;* тѣ́мже въ блаже́нной жи́зни ны́нѣ пребыва́я,* пита́ешися пи́щею небе́сныя ра́дости,* ю́же подаде́ тебѣ́ отъ бла́гости Своея́* Іису́съ Человѣколю́бецъ* и Спа́съ ду́шъ на́шихъ.

Сла́ва, гла́съ 5:

Кто́ не удиви́тся житію́ твоему́, или́ кто́ не исповѣ́сть терпѣ́ніе твое́, преблаже́нне о́тче Про́хоре? Ты́ бо въ вели́цѣмъ воздержа́ніи житіе́ проходя́, о тѣлеси́ небре́глъ еси́, сластолюби́ваго змíя сте́рлъ еси́ до конца́, утверди́въ но́зѣ свои́ на степе́ни по́стническихъ добродѣ́телей. Тѣ́мъ, въ дне́шній де́нь па́мять твою́ почита́юще, исповѣ́дуемъ по́двиги твоя́ и мо́лимся, къ ра́цѣ моще́й твои́хъ припа́дающе: я́ко имы́й дерзнове́ніе у Христа́ Бо́га, проси́ ми́ра мíрови и душа́мъ на́шимъ ве́лія ми́лости.

И ны́нѣ, богоро́диченъ или́ крестобогоро́диченъ.

На стихо́внѣ въ окто́ихѣ. Сла́ва, преподо́бному, гла́съ 6:

Мона́ховъ мно́жество, въ па́мяти твое́й, преподо́бне, ли́къ похва́лъ соста́вльше, труды́ и по́двиги твоя́ почита́емъ и удивля́емся, ка́ко са́мъ житіе́ тѣ́сное и убо́гое проводя́, и́ныхъ, въ простра́нствѣ живу́щихъ, во вре́мя ну́жды сохрани́лъ еси́, та́ющія бо гла́домъ, хлѣ́бомъ отъ зе́лія сотворе́ннымъ, препита́лъ еси́ и тре́бующимъ со́ль отъ пе́пела подава́лъ еси́. И ны́нѣ душе́внымъ гла́домъ на́съ изнемога́ющихъ, мо́лимтися, Про́хоре чу́дне, моли́твами твои́ми укрѣпи́ и испроси́ отъ Христа́ Бо́га ве́лію ми́лость.

И ны́нѣ, богоро́диченъ или́ крестобогоро́диченъ.

Тропа́рь, гла́съ 4:

Преподо́бне и чудотво́рче, о́тче Про́хоре, препита́вый во гла́дѣ а́лчущія хлѣ́бомъ отъ бы́лія и со́лію отъ пе́пела, напита́й и на́съ пи́щею духо́вною, моля́ Христа́ Бо́га о душа́хъ на́шихъ.


[НА УТРЕНИ,]
Кано́нъ, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Препоя́ши на́съ, Влады́ко Христе́, ору́жіемъ духо́внымъ на неви́димыя враги́ и научи́, ка́ко подвиза́тися и одолѣ́ти си́лу и́хъ, да торже́ственную Тебѣ́, Бо́гу на́шему, пѣ́снь въ па́мяти уго́дника Твоего́ любо́вію возсыла́емъ.

Бо́дростію препоя́сана чре́сла иму́ще, и́ночествующихъ ли́цы тебе́, о́тче, помина́ютъ, и лѣ́тнюю па́мять твою́ въ похвалу́ тебѣ́ соверша́ютъ, пѣ́снь Бо́гови возсыла́юще.

Блаже́нство вѣ́чное воспомяну́въ, бла́женне, тлѣ́нная мíра сего́ оста́вилъ еси́ и а́нгеломъ совсе́льникъ да бу́деши, во а́нгельскій о́бразъ обле́клся еси́. Тѣ́мъ по́стническое житіе́ твое́ чте́мъ, пѣ́снь Бо́гови возсыла́юще.

Благо́е воздержа́нія и́го возложи́въ на ся́, жесто́кое житіе́ по́стническихъ дѣя́ній стяжа́лъ еси́, богому́дре, въ не́мже спле́тшися съ неви́димымъ враго́мъ, побѣди́лъ еси́ того́. Тѣ́мъ сла́вимъ тя́, пѣ́снь Бо́гови возсыла́юще.

Богоро́диченъ: Простра́ннымъ путе́мъ на́съ ходя́щихъ и во а́дову про́пасть сла́стію теку́щихъ, на тѣ́сный пу́ть, къ блаже́нному животу́ веду́щій, наста́ви, Богоро́дице: се́ бо, со́бранніи раби́ Твои́, въ дне́шній де́нь припа́даемъ къ Тебѣ́, моле́бная возсыла́юще.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Утверди́въ, о́тче, но́зѣ твои́ на ка́мени за́повѣдей Христо́выхъ, непоколеби́мь пребы́лъ еси́ отъ бѣсо́вскихъ навѣ́товъ, вы́ну хвале́ніе поя́ Бо́гу: нѣ́сть Свя́тъ, па́че Тебе́, Человѣколю́бче.

Страсте́й плотски́хъ разжже́нія ту́чею воздержа́нія угаси́лъ еси́, ни хлѣ́ба бо, но зе́ліе лобо́дное яды́й, пребы́лъ еси́, пи́щу имѣ́яй па́че Сло́во Бо́жіе, и сіе́ укрѣпля́ше тя́, преподо́бне.

Гла́дъ ни во что́же вмѣни́лъ еси́, блаже́нне, на Пита́ющаго пти́цы взира́я, и То́й даде́ тебѣ́ хлѣ́бъ не отъ сѣ́яннаго зе́лія я́сти, и́же бѣ́ сла́докъ тебѣ́, па́че ме́да и со́та.

Чу́дному твоему́ смире́нію удивля́емся, свя́те, я́ко и за лобо́дный хлѣ́бъ себе́ осужда́лъ еси́, недосто́йна творя́й и сицево́й пи́щи, о не́йже ле́гко проше́лъ еси́ по́стническій пу́ть приско́рбный.

Богоро́диченъ: Вознося́щіяся горды́нею вы́я на́ша во смире́ніе преклони́, Чи́стая Дѣ́во, Ты́ бо еди́на рекла́ еси́, — се́ раба́ Госпо́дня, — и ца́рствуеши во вѣ́ки надъ всѣ́ми, блажа́щими Тя́ ро́ды.

Сѣда́ленъ, гла́съ 4:

Вели́кимъ отце́мъ ревну́я, кра́йнее возлюби́лъ еси́ по́стничество, еди́нымъ бо зе́ліемъ и водо́ю пита́яся, не изнемо́глъ еси́ отъ поста́, но пребы́лъ еси́ крѣ́покъ, па́че адама́нта. И ны́нѣ воздержа́нія своего́ пріе́мь плоды́ — мздовоздая́ніе отъ Бо́га. Моли́ся о на́съ, преподо́бне, да пріи́мемъ и мы́ мзду́ тобо́ю, я́ко любо́вію блажа́щіи па́мять твою́, досточу́дне.

Сла́ва, и ны́нѣ, богоро́диченъ:

Блажи́мъ Тя́, ублажи́вшую ро́дъ человѣ́ческій, и сла́вимъ превозше́дшую вся́кое творе́ніе, пѣ́сньми чту́ще безсѣ́менное зача́тіе и несказа́нное Рождество́ Твое́, Марíе, Ма́ти Дѣ́во Чи́стая.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Ты́, о́тче, имѣ́яй отъ Бо́га благода́ть чудотворе́нія, мно́гія напита́лъ еси́ хлѣ́бомъ лобо́днымъ во вре́мя гла́да и, со́ль отъ пе́пела творя́, ту́не подава́лъ еси́ приходя́щимъ. О, сла́ва да́вшему тя́ на́мъ засту́пника Человѣколю́бцу!

Ты́, преподо́бне, моли́твою свое́ю подава́лъ еси́ лобо́дному хлѣ́бу сла́дость, бы́сть бо сла́докъ въ снѣ́дь, свѣ́телъ и чи́стъ, а́ки пшени́чный, со благослове́ніемъ пріе́млющимъ. Отъ о́наго твоего́ благослове́нія пода́ждь и на́мъ, о́тче свяще́ннѣйшій, я́ко и́мамы тя́ хода́тая ко Христу́ Человѣколю́бцу.

Тво́й, о́тче преблаже́нне, лобо́дный хлѣ́бъ бы́сть сла́докъ и свѣ́телъ со благослове́ніемъ пріе́млющимъ, взе́млющимъ же о́тай, че́рнъ, а́ки пе́рсть, пока́зовашеся и го́рекъ. Благослове́ніемъ твои́мъ благослови́ на́съ и пода́ждь отъ сла́дости твоея́, я́ко сѣдя́й на трапе́зѣ небе́снѣй, Про́хоре сла́вне.

Не о́тай, но ли́къ благохвале́ній веду́ще, душе́внымъ гла́домъ изнемога́ющіи, прихо́димъ къ тебѣ́, о́тче, въ дне́шній де́нь па́мяти твоея́ и мо́лимся: пода́ждь на́мъ отъ благода́ти твоея́, да просла́вимъ о тебѣ́ Христа́ Человѣколю́бца.

Богоро́диченъ: Кто́, притека́яй къ Тебѣ́, посра́мленъ отъ Тебе́ исхо́дитъ, Чи́стая Дѣ́во, или́ кто́ прося́й не пріе́млетъ отъ бла́гости Твоея́, Госпоже́? Еже и мы́, вѣ́рующе и исповѣ́дающе, мольбу́ прино́симъ Тебѣ́, Цари́це: да́руй на́мъ щедро́ты Твоя́, я́ко Блага́я, Блага́го су́щи Роди́тельница.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Про́хоре сла́вне, не укосни́ прійти́ и благослове́нія твоего́ сподо́би на́съ, я́коже иногда́ всѣ́мъ подава́лъ еси́ невозбра́нно, изря́днее же любо́вію сла́вящихъ тя́ пути́ къ за́повѣдемъ Госпо́днимъ напра́ви, мо́лимтися.

Смуща́яй зе́млю и потряса́яй лю́ди, бра́нь наведе́ на ны́ вра́гъ сопроти́вный, и отсю́ду приспѣ́ къ на́мъ гла́дъ душе́вный, но ты́, преблаже́нне, предвари́ ско́ро и моли́твою твое́ю напита́й на́съ мы́сленныя пи́щи, и напра́ви пути́ на́ша, мо́лимтися.

Благоутро́біе твое́, свя́те, ви́дяще, мно́зи къ тебѣ́ во вре́мя гла́да прихожда́ху, и́мже хлѣ́бъ отъ бы́лій и со́ль отъ пе́пела, твори́мый рука́ма твои́ма, неоску́дно подава́лъ еси́. Призри́ у́бо и ны́нѣ на ны́ и моли́твою твое́ю да́руй оби́тели на́шей изоби́ліе вся́ко, мо́лимтися, о́тче преподо́бне.

Мно́зи, ненави́дящіи на́съ, воста́ша на ны́ врази́, и́же тща́тся лиши́ти на́съ душе́вныя и тѣле́сныя пи́щи, но ты́ пріиди́ къ на́мъ и запрети́ тѣ́мъ, моли́твою же твое́ю да́руй оби́тели на́шей вся́, я́же на по́льзу, мо́лимтися, Про́хоре преподо́бне.

Богоро́диченъ: Вра́гъ сопроти́вный, зави́дя ста́ду Твоему́, бра́нь дви́жетъ на ны́ вы́ну, но Ты́, Пречи́стая, я́ко си́льнаго Царя́ Ма́ти, сего́ воспяти́, на́ша же пути́ къ за́повѣдемъ Госпо́днимъ напра́ви, мо́лимтися.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Очи́сти ка́лъ души́ моея́ моли́твою твое́ю, Про́хоре сла́вне, и согни́вшія стру́пы се́рдца моего́ пла́стыремъ благода́ти твоея́ исцѣли́, къ тебѣ́ бо въ дне́шній де́нь взыва́ю, я́ко къ моли́твеннику спасе́нія моего́.

Побѣжде́нъ кня́зь по́мысломъ лихоима́нія повелѣ́ всю́ со́ль, моли́твою твое́ю отъ пе́пела твори́мую, разгра́бити, я́же обраще́ніемъ въ пе́пелъ па́ки горька́ обрѣ́теся во устѣ́хъ его́. Отъ таковы́я зло́бы и стра́сти изба́ви мя́, о́тче, я́ко помо́щникъ спасе́нія моего́.

Покры́ срамота́ лице́ отъе́млющихъ пи́щу а́лчущимъ, и́бо ви́дяще претворе́ніе со́ли твоея́, о́тче, въ пе́пелъ, со студо́мъ во́нъ изсы́паша, но ты́ повелѣ́лъ еси́ пове́рженный пе́пелъ взима́ти, и бы́сть со́ль чиста́ па́ки моли́твою твое́ю, я́ко и пре́жде. Да́руй и мнѣ́ ны́нѣ моли́тву твою́, молю́тися, помо́щниче спасе́нія моего́.

Скры́ти мня́ще сту́дъ сво́й, повелѣ́ша со́ль, претвори́вшуюся въ пе́пелъ, изсы́пати въ нощи́ во́нъ, но но́щь вопія́ше, свидѣ́тельствуя чудеса́ твоя́, па́ки бо преложи́ся пе́пелъ въ со́ль, и повелѣ́ніемъ твои́мъ собира́ху тре́бующіи, блажа́ще тя́, преподо́бне, засту́пника своего́.

Богоро́диченъ: Но́щь мя́ обдержи́тъ лѣ́ности, и, во тмѣ́ отча́янія ходя́й, къ мы́сленному бо́дрости не приближа́ются свѣ́ту. Ма́ти Бо́жія, просвѣти́ ми́ ра́зумъ, къ славосло́вію наставля́я, да пою́ Ти́ вы́ну: ра́дуйся, Свѣще́, Боже́ственнымъ пла́менемъ возжже́нная.

Конда́къ, гла́съ 2:

Ве́ліимъ воздержа́ніемъ удруча́я пло́ть свою́, свя́те, лиши́вся пи́щи человѣ́ческія, зе́ліемъ и траво́ю вмѣ́сто хлѣ́ба, пе́пеломъ же, а́ки со́лію, пита́лся еси́, чудодѣ́йственне Про́хоре. Еже ви́дя, Госпо́дь преложи́ зе́ліе во хлѣ́бъ и пе́пелъ въ со́ль, и́миже ты́ мно́жество гла́дныхъ препита́лъ еси́, тѣ́мъ тя́ чте́мъ и ублажа́емъ.

Пѣ́снь 7.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Бо́жіе схожде́ніе и стра́шный су́дъ воспомяну́въ, кня́зь убоя́ся, я́ко озло́би тя́, Про́хоре преподо́бне, не вѣ́дый свы́ше въ тебѣ́ дѣ́йствуемыя благода́ти, но, прише́дъ въ себе́, воззва́: благослове́нъ Бо́гъ оте́цъ на́шихъ.

Бо́жія раба́ позна́въ тя́, о́тче, влады́чествуяй ублажа́ше послѣди́ чудодѣ́йствія твоя́, и, пріе́мь теплѣ́йшую любо́вь къ оби́тели многочуде́снѣй, ка́яшеся лихоима́нія своего́, и, прося́щи о содѣ́янномъ злѣ́ проще́нія, поя́ше: благослове́нъ Бо́гъ оте́цъ на́шихъ.

Яко и́стинный служи́тель и ра́бъ незло́биваго Агнца, Сы́на Бо́жія, незло́біе свое́ показу́я, озло́бившему тя́ проще́ніе да́лъ еси́, блаже́нне, и утверди́лъ съ ни́мъ сло́во: да еди́нъ друга́го вло́житъ во гро́бъ, внегда́ изы́ти отъ тѣ́ла еди́ному отъ ва́съ повели́тъ Бо́гъ оте́цъ на́шихъ.

Въ преподо́біи пожи́въ и свя́то жи́знь свою́ упра́вивъ, къ блаже́нной кончи́нѣ дости́глъ еси́, свя́те, тѣ́мъ, ра́достенъ, къ а́нгельскимъ ликостоя́ніемъ взира́я, воззва́лъ еси́: благослове́нъ Бо́гъ оте́цъ на́шихъ.

Богоро́диченъ: Въ преподо́біи пожи́вшимъ не поревнова́хъ, но въ лѣ́ности жи́знь мою́ проводи́хъ, къ кончи́нѣ приближа́ющися, къ кому́ воззри́ши, душе́ моя́? Еди́ну то́чію иму́щи наде́жду, Богома́терь, воззови́: Влады́чице, помози́ и изба́ви мя́ вѣ́чнаго осужде́нія.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Седмогла́внаго змíя закла́въ копіе́мъ по́стническихъ дѣя́ній и къ прія́тію вѣнца́ гото́вяся, съ ра́достію взыва́лъ еси́, Про́хоре: лю́діе, Творца́ и Изба́вителя Го́спода по́йте и превозноси́те во вѣ́ки.

Блаже́нную кончи́ну твою́, преподо́бне, отъ посла́нія твоего́ услы́шавъ, кня́зь оста́ви во́евъ и спѣ́шно прите́клъ къ тебѣ́, да благослове́нія твоего́ сподо́бится, и не лиши́ся, его́же жела́ше, пріе́мь твое́ благослове́ніе, воспѣ́тъ: лю́діе, превозноси́те Христа́ во вѣ́ки.

Яко пре́жде въ моли́твахъ простира́лъ еси́, преподо́бне, свои́ ру́цѣ, та́ко при кончи́нѣ, всѣ́мъ да́въ цѣлова́ніе, горѣ́ сотвори́въ воздѣя́ніе руку́ свое́ю, испусти́лъ еси́ ду́хъ сво́й, и вси́ воспѣ́ша: лю́діе, сла́вите засту́пника своего́ во вѣ́ки.

Весе́лое отше́ствіе твое́ къ сожи́тію небе́снымъ, весе́лаго испо́лни всѣ́хъ пла́ча, вси́ бо рыда́ху: ни́щіи — пита́теля, си́роты — отца́, мы́ же въ дне́шній де́нь, успе́ніе твое́ сла́вяще, о́тче, зове́мъ: лю́діе, превозноси́те Христа́ во вѣ́ки.

Богоро́диченъ: Весе́лія на́шего Вину́ и Ра́дость всѣ́хъ преподо́бныхъ ро́ждшая, ра́дости вѣ́чныя Твои́мъ хода́тайствомъ сподо́би мя́, Ма́ти Бо́жія, и сподо́би сла́вити Твое́ благоутро́біе во вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Удиви́ся вся́къ, помина́яй житіе́ твое́, о́тче, я́ко въ тѣ́лѣ живы́й, а́нгеломъ по́стническими дѣя́ніи уподо́бился еси́, тѣ́мже тя́ вси́, Про́хоре, велича́ютъ.

Ни́ща ду́хомъ тя́ су́ща, преподо́бне, не устыдѣ́ся нося́й діади́му рука́ма свои́ма во гро́бъ положи́ти, и мы́, ны́нѣ помина́юще успе́ніе твое́, ублажа́емъ тя́, его́же и а́нгельстіи ли́цы въ го́рнихъ селе́ніихъ ублажа́ютъ.

Тя́, въ жи́зни се́й кре́стъ на ра́му нося́щаго, кня́зь на плещу́ въ пеще́ру понести́ не устыдѣ́ся, и́же те́плыми слеза́ми облія́ше гро́бъ тво́й, ка́яся, я́ко озло́би тя́ пре́жде, но обое́ испра́ви твои́мъ благослове́ніемъ, его́же и на́съ сподо́би, я́ко отъ любве́ пѣ́сньми тя́ велича́емъ.

Тро́иченъ: Сла́ва Тебѣ́, Тро́ице Пресвята́я, Отче и Сы́не и Ду́ше, Еди́ный Бо́же! Ты́ бо бла́гостію Свое́ю дае́ши сла́ву вѣ́чную лю́бящимъ Тя́ отъ се́рдца, ея́же и на́съ сподо́би мольба́ми преподо́бнаго Про́хора и прича́стія святы́хъ, идѣ́же ли́ки и́хъ вы́ну Тя́ велича́ютъ.

Богоро́диченъ: Сла́ва Тебѣ́, Ма́ти Бо́жія, вѣ́рныхъ рабо́въ еди́но прибѣ́жище, еди́но упова́ніе, еди́на наде́жда и спасе́ніе ро́да христіа́нскаго, тѣ́мъ по до́лгу Тя́ вси́ велича́емъ.

Свѣти́ленъ:

Мíра тлѣ́нная оста́вль, къ премíрнымъ тѣ́снымъ путе́мъ дости́глъ еси́ и, съ ли́ки преподо́бныхъ Безнача́льному Свѣ́ту предстоя́, моли́, я́ко имѣ́яй дерзнове́ніе въ ну́ждахъ посо́бствовати, о умире́ніи мíра и о держа́вѣ Царе́й Христіа́нскихъ, па́мять твою́ сла́вящихъ.

Сла́ва, и ны́нѣ, богоро́диченъ:

Предста́тельнице Святѣ́й Тро́ицѣ, волну́ющимся въ пучи́нѣ жите́йскихъ страсте́й въ по́мощь ско́ро предста́ни и ти́хими благосе́рдія Твоего́ волна́ми, доведи́ въ блаже́нное приста́нище, я́ко ско́рая Помо́щница всѣ́мъ, и́мя Твое́ сла́вящимъ.

На стихо́внѣ, въ окто́ихѣ. Та́же, преподо́бному, гла́съ 1:

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

Ангельски, лю́діе, торжеству́имъ* и принесе́мъ пѣ́снь Бо́гу* въ лѣ́тней па́мяти богоно́снаго отца́,* пресвято́е и́мя Его́ вознося́ще* и серафи́мски зову́ще:* Свя́тъ еси́, Отче Безнача́льный,* Свя́тъ еси́, Сы́не Безлѣ́тный,* Свя́тъ еси́, и Ду́ше Соприсносу́щный.

Сла́ва, гла́съ то́йже:

Ли́къ честны́й соста́вльше, лико́мъ безпло́тныхъ подо́бящеся, пріиди́те, лю́діе, любе́зно ны́нѣ мы́сленныя да́ры принесе́мъ къ святѣ́й пеще́рѣ и, прини́кше во гро́бъ преблаже́ннаго отца́, восхва́лимъ, зову́ще: ра́дуйся, Про́хоре, славноимени́те и моли́твенниче о душа́хъ на́шихъ.

И ны́нѣ, богоро́диченъ или́ крестобогоро́диченъ.

Источникъ: Слу́жбы преподо́бнымъ отце́мъ Пече́рскимъ, и́хже мо́щи въ Бли́жней и Да́льней пеще́рѣ нетлѣ́нно почива́ютъ. — Кíевъ: Въ тѵпогра́фіи Кíево-Пече́рскія Ла́ѵры, 1855. — Л. 47 – 50.

/ Къ оглавленію раздѣла /


Наверхъ / Къ титульной страницѣ

0