Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 12 декабря 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 10-й де́нь.
Свята́го [священно]му́ченика Харала́мпія, [епи́скопа Магнезíйскаго].

[ВЕЧЕРЪ,]
На Го́споди воззва́хъ: стихи́ры, гла́съ 6. Подо́бенъ: Все́ отло́жше.

Гвоздьми́ пригвожда́емо* твое́ блаже́нное тѣ́ло терпѣли́вное,* страда́льче Харала́мпіе, и непобѣди́мое,* ду́шу непрело́жну и у́мъ некра́домь* соблю́дъ сокруша́емь* боже́ственное бо жела́ніе тя́, сла́вне,* бога́тно распаля́ше* и терпѣ́ти му́къ вся́кій ви́дъ поуща́ше,* му́чениче страстоте́рпче,* Христо́выхъ страда́ній о́бщниче.* Его́же со дерзнове́ніемъ моли́* о душа́хъ на́шихъ.

Ра́дость пресвѣ́тлую,* и пречестну́ю сла́ву,* пострада́въ, наслѣ́довалъ еси́* и вѣ́чнующее ра́дованіе,* свяще́нниче преподо́бне, страда́льче честны́й,* во́ине до́блественный,* и́же во́инства и ополче́нія зміи́на* крове́й твои́хъ тече́ньми я́вѣ потопи́лъ еси́, благода́тію* и боже́ственною моли́твою* ме́ртвыя воздви́глъ еси́ и́стинно,* со дерзнове́ніемъ моля́ся* о душа́хъ на́шихъ.

Сла́ва, и ны́нѣ, богоро́диченъ. Подо́бенъ то́йже:

Уя́звленнаго мя́* разбо́йническими де́моновъ нахо́ды,* и лежа́ща всего́ недѣ́йственна, Всенепоро́чная,* на пути́ всегда́ нестоя́ннаго житія́,* и ми́лости тре́бующа,* вско́рѣ посѣти́,* вино́ возлія́вши и еле́й* на неисцѣ́льныя ра́ны,* и ко благоздра́вію возведи́,* я́ко да Тя́ сла́влю* и любо́вію по до́лгу воспою́ вели́чія Твоя́,* Чи́стая еди́на Ма́ти Дѣ́во.

Крестобогоро́диченъ. Подо́бенъ то́йже:

Ору́жіе, я́коже рече́ Симео́нъ,* се́рдце Твое́ про́йде,* Пречи́стая Влады́чице,* егда́ узрѣ́ла еси́ изъ Тебе́ возсія́вшаго* неизрече́ннымъ сло́вомъ,* отъ беззако́нныхъ я́ко осужде́на возноси́ма на Кре́стъ,* о́цетъ и же́лчь вкуша́юща,* въ ре́бра же пробода́ема,* и ру́цѣ и но́зѣ пригвожда́емы,* и, рыда́ющи, восклица́ла еси́, ма́терски вопію́щи:* что́ сіе́, Ча́до сладча́йшее,* но́вое та́инство?]

Тропа́рь, гла́съ 4:

Му́ченикъ Тво́й, Го́споди, Харала́мпій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.

Сла́ва, и ны́нѣ, богоро́диченъ или́ крестобогоро́диченъ.



[НА УТРЕНИ,]
Кано́нъ, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Съ ли́ки ше́ствуя ве́село въ мы́сленныхъ небе́сныхъ се́лѣхъ и сія́я свѣ́томъ невече́рнимъ, изба́ви мя́ отъ страсте́й моли́твами твои́ми, му́дре, я́ко да пою́ тя́.

Свѣтоно́сная твоя́ па́мять со́лнечная облиста́етъ дарова́нія и просвѣща́етъ вѣ́рно въ не́й чту́щія тя́, ра́дости пресвѣ́тлыя вои́стинну, му́чениче тезоимени́те.

Крове́й твои́хъ ка́плями сла́ное невѣ́рія мо́ре потопи́лъ еси́, рѣка́ благоче́стія бы́лъ еси́, Христо́ву напоя́ющи вои́стинну Це́рковь при́сно.

Богоро́диченъ: Грѣхо́въ бу́ря, и помышле́ній проти́вныя во́лны, и страсте́й наше́ствія на мнѣ́ преидо́ша, но Твое́ю, Богоро́дице Дѣ́во, держа́вною моли́твою спаси́ мя́.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Нѣ́сть отню́дъ изрещи́ чуде́съ мно́жества, я́же содѣ́лалъ еси́, еще́ въ жи́зни ходя́ и къ Бо́гу преше́дъ, страстоте́рпче му́чениче досточу́дне.

Си́лою Боже́ственною укрѣ́плься, некрѣ́пкую на́глость беззако́нныхъ низложи́лъ еси́, я́коже во́инъ крѣ́покъ, Харала́мпіе страда́льче, я́ко ору́жникъ Боже́ственнаго ополче́нія.

Крове́й исте́кшія то́ки твоего́ тѣлесе́ ве́сь нече́стія пла́мень и лю́тое запале́ніе угаси́ша, сла́дости же пото́къ тебѣ́ исхода́таиша.

Богоро́диченъ: Святы́хъ Свята́го Бо́га родила́ еси́, Всесвята́я, свя́тости хра́мъ я́вльшися чи́стъ и две́рь, е́юже еди́нъ Христо́съ про́йде, спаса́я человѣ́чество.

Сѣда́ленъ, гла́съ 3. Подо́бенъ: Боже́ственныя вѣ́ры.

Сто́лпъ незы́бленъ Це́ркве, свѣти́льникъ неугаси́мый вселе́нныя, страстоте́рпче, яви́лся еси́, Харала́мпіе, и, просія́въ со́лнца свѣтлѣ́е, и́дольскую отгоня́еши тму́, му́чениче сла́вне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, богоро́диченъ:

Боже́ственная была́ еси́ ски́нія Сло́ва, еди́на Всечи́стая Дѣ́во Ма́ти, чистото́ю а́нгелы превозше́дшая, па́че всѣ́хъ мене́ пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́во Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, Матеролѣ́пно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?]

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Красе́нъ бы́лъ еси́, пома́зався кро́вію честна́го муче́нія и добро́тами сего́ украси́вся, Харала́мпіе, страда́льцевъ украше́ніе и утвержде́ніе.

Де́монская ка́пища твои́мъ сокруши́лъ еси́, страстоте́рпче, му́жествомъ, хра́мъ тебе́ сама́го Свята́го Ду́ха и терпѣ́нія нело́жнаго сто́лпъ показа́лъ еси́ и о́бразъ.

На высоту́ возне́сше ру́цѣ, сла́вне, тмы́ предста́теле твоя́ ре́бра строга́ху ноготьми́, вѣ́чное и́стинно исхода́таивше тебѣ́ наслажде́ніе.

Богоро́диченъ: Крѣ́пость моя́ и пѣ́ніе мое́ — Христо́съ Бо́гъ, изъ Тебе́ возсія́вый, премно́жествомъ, Чи́стая, бла́гости изба́ви ны́ пе́рваго преступле́нія.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Боже́ственную стра́сть на́съ ра́ди стра́сти Претерпѣ́вшаго тве́рдо, му́чениче Христо́въ, подража́въ, терпи́ши во все́мъ тѣ́лѣ, сла́вне, гвозде́й пригвожде́нія до́блественнѣ.

Безслове́сіе гони́телей, Сло́во, Собезнача́льное Отцу́, исправля́я, прему́дре, сло́во безслове́снымъ я́вѣ влага́етъ, разрѣши́ти отъ ю́зъ тя́ повелѣва́юща.

Рожны́ пронзе́нъ, уязви́лъ еси́ се́рдце лю́таго земноро́дныхъ бори́теля копіе́мъ му́жества и терпѣ́нія твоего́, богому́дре страстоте́рпче досточу́дне.

Богоро́диченъ: Боже́ственнымъ сія́ніемъ Твои́мъ, Блага́я, омраче́нную мою́ ду́шу сластьми́ просвѣти́, и ко спасе́нія стезя́мъ наста́ви, я́же еди́на, Спа́са Христа́ ро́ждшая.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Свѣти́льникъ бы́лъ еси́, страда́ній твои́хъ свѣ́томъ просвѣща́я концы́: исповѣ́дуеши и́мя Христо́во предъ мучи́тели, страстоте́рпче Христо́въ пресла́вне.

Боже́ственныя распаля́емь огне́мъ любве́, росо́ю вѣ́ры злоче́ствующихъ угаси́лъ еси́ запале́ніе, Христо́ва чудеса́ невѣ́рнымъ показу́я, досточу́дне.

Жи́зни жела́я безсме́ртныя, плотска́я, Харала́мпіе, умертви́лъ еси́ страстна́я движе́нія и моли́твою ме́ртвыя возста́вилъ еси́, воспѣва́ющія во всѣ́хъ тя́ просла́вльшаго.

Богоро́диченъ: Страсте́й мя́ коле́блющася сопроти́вными прило́ги, Ма́ти Бо́жія, утверди́, я́ко безстра́стія ро́ждши Исто́чникъ, къ Тебѣ́ бо прибѣго́хъ, человѣ́комъ вели́кому Прибѣ́жищу.

Конда́къ, гла́съ 8. Подо́бенъ: Яко нача́тки.

Подо́бствовавъ благода́тію свяще́нства, сла́вне, Це́рковь свѣ́тло украси́лъ еси́ Боже́ственнымъ страда́ніемъ, е́же за Христа́ прія́лъ еси́ до́блественно, ра́дуяся, Харала́мпіе, честны́й свѣти́льниче всемíрный, осіява́яй концы́, я́ко непобѣди́мый.

Икосъ:

Па́стыря, Христа́ Бо́га на́шего, я́ко Агнца, на зе́млю благоволи́вшаго пріити́, грѣхи́ взе́млющаго и неду́ги всѣ́хъ поне́сшаго, равнообразова́въ, му́чениче свя́те, ду́шу за о́вцы положи́лъ еси́, возвѣща́я Его́ стра́сти. Тѣ́мъ дне́сь вси́ пое́мъ тя́ пѣ́сньми, я́ко непобѣди́ма.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Пріобща́яся му́камъ и огне́мъ опаля́емь, страстоте́рпче Христо́въ, я́ко зла́то чи́сто бы́въ, и свяще́нно возложе́ніе Христо́во бы́лъ еси́.

Моли́твъ твои́хъ росо́ю пребеззако́ннующихъ пе́щь угасе́, му́дре, и изба́вленъ бы́лъ еси́, пѣснопоя́ Сотво́ршему: благослове́нъ еси́, Го́споди Бо́же оте́цъ на́шихъ.

Ополче́ніемъ страда́ній дре́во яви́лся еси́ высокора́слено, соосѣня́ющо вѣ́рныя отъ пла́меннаго грѣха́, зову́щія: благослове́нъ еси́, Го́споди Бо́же оте́цъ на́шихъ.

Богоро́диченъ: Ра́дость пріе́мшая въ Пречи́стѣмъ чре́вѣ Твое́мъ, Богоро́дице Чи́стая, весе́лія се́рдце мое́ испо́лни, печа́ль отгоня́щи страсте́й, Приснодѣ́во.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Тече́ніи крове́й нака́паемь, ра́нъ добро́тою украша́емь, побѣди́тельнымъ благолѣ́пно вѣнце́мъ удо́бренъ, Бо́гу предста́лъ еси́, му́чениче.

Му́къ о́блацы не покры́ша му́жества твоего́, му́чениче, и до́блестей, гони́телей не омрачи́ сопротивле́ніе твоего́ пресвѣ́тлаго, богому́дре, терпѣ́нія.

Свяще́нникъ же и му́ченикъ непобѣди́мь, во́инъ до́бль и сто́лпъ непоколеби́мь, утвержде́ніе вѣ́рныхъ, нече́стія противобо́рецъ, вои́стинну яви́лся еси́, богому́дре страстоте́рпче.

Богоро́диченъ: Вся́ческая сотвори́вый Боже́ственнымъ хотѣ́ніемъ, восхотѣ́въ, во чре́вѣ Твое́мъ всели́ся, Чи́стая, истлѣ́вшія ны́ обнови́ти хотя́. Его́же превозно́симъ во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Ни о́гнь, ни ме́чь, но ниже́ сме́рть, ни гоне́ніе, ни ско́рбь, ни гла́дъ, ниже́ бѣда́, ни му́къ вся́кихъ умышле́ніе возмо́же отъ любве́ Бо́жія вои́стинну отлучи́ти тя́ сотво́ршаго, страда́льче досточу́дне.

Строга́ньми ногте́й умерщвле́нія совле́къ ри́зы, оде́ждами отъ крове́й тебе́, страстоте́рпче, украси́лъ еси́, тѣ́мже со дерзнове́ніемъ, му́чениче непобѣди́ме, всѣ́хъ Влады́цѣ и Бо́гу, ра́дуяся, предстои́ши.

Ра́дости полна́ и Боже́ственныя свѣ́тлости пода́тельна, Харала́мпіе, па́мять твоя́ мíру возсія́, страсте́й зи́му отгоня́щи, вся́ просвѣща́ющи, ю́же пра́зднующе, обрѣта́емъ прегрѣше́ній очище́ніе моли́твами твои́ми.

Богоро́диченъ: Страсте́й бу́ря смуща́етъ мя́, и сласте́й погружа́етъ треволне́ніе, Всенепоро́чная, Ко́рмчія Христа́ ро́ждшая, ру́ку ми́ по́мощи простри́ и спаси́ мя́, еди́на спасе́ніе вѣ́рно блажа́щихъ Тя́.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 93 об. – 97.

/ Къ оглавленію раздѣла /


Наверхъ / Къ титульной страницѣ

0