Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 9-й де́нь.
Свята́го му́ченика Ники́фора.

[Зри́:] Въ сíй де́нь отдае́тся пра́здникъ Срѣ́тенія Госпо́дня. Аще же не случи́тся въ сíй де́нь отда́ніе пра́здника, пое́тся си́це:

[ВЕЧЕРЪ,]
На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Прекланя́еши вы́ю Бо́гу, Ему́же вся́ прекланя́ются колѣ́на, му́чениче чу́дне, во главу́ посѣка́емь и разлуча́емь отъ до́бляго твоего́ тѣлесе́, Христу́ же, всѣ́хъ Главѣ́, соединя́емь чистѣ́йшимъ умо́мъ. Его́же ны́нѣ свѣ́ту приближа́яся, испроси́ на́мъ, Ники́форе, всѣ́мъ просвѣще́ніе, хва́лящимъ тя́.

Струя́ми крове́й твои́хъ, му́дре, за Христа́ излія́нными, зе́млю освяти́лъ еси́, ду́хомъ же ду́хи возвесели́лъ еси́ безпло́тныхъ си́лъ, и му́чениковъ стада́ вся́ просвѣти́лъ еси́, съ си́ми соединя́яся, блаже́нне, я́ко до́бль ору́жникъ, я́ко непобѣди́мый му́ченикъ, и о на́съ Бо́гу моля́ся.

Сла́ва, гла́съ 6. Іоа́нна мона́ха:

Показа́лъ еси́ всѣ́мъ я́вѣ, страда́льче Ники́форе, я́ко бли́жняго не любя́й, ни Влады́ку возлюби́ти мо́жетъ, тѣ́мже у́бо самаго́ чи́стѣ возлюби́лъ еси́ Саприкíя бли́жняго. Отсю́ду и къ боже́ственному впери́лся еси́ жела́нію и ду́шу твою́ положи́лъ еси́ по Христо́вѣ исповѣ́даніи и вѣ́рѣ. Саприкíй же злоимени́тый, неприми́рну къ тебѣ́ не́нависть стяжа́въ, отме́тникъ показа́ся и Влады́ки Христа́, Ему́же ны́нѣ ты́ предстоя́, моли́ спасти́ся душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Ору́жіе, я́коже рече́ Симео́нъ,* се́рдце Твое́ про́йде, Пречи́стая Влады́чице,* егда́ узрѣ́ла еси́ изъ Тебе́ Возсія́вшаго* неизрече́ннымъ сло́вомъ,* отъ беззако́нныхъ я́ко осужде́на,* возноси́ма на кре́стъ,* о́цтомъ и же́лчію напая́емаго,* ре́бра же пробода́ема,* и ру́цѣ и но́зѣ пригвожда́емы,* и рыда́ющи восклица́ше,* ма́терски вопію́щи:* что́ сіе́, Ча́до Сладча́йшее, но́вое та́инство?

Тропа́рь, гла́съ 4:

Му́ченикъ Тво́й, Го́споди, Ники́форъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


[НА УТРЕНИ,]
Кано́нъ свята́го, его́же краегране́сіе: Сла́внаго въ страстоте́рпцѣхъ Ники́фора пѣ́сньми пою́. Творе́ніе Ѳеофа́ново. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Воздвиза́ема жите́йскаго мо́ря волну́ющься лю́тѣ душе́вный кора́бль напа́стьми и страстьми́, ми́ра Вино́вниче, къ тишинѣ́ глубо́цѣй, я́ко Благодѣ́тель, преложи́, му́ченика, Христе́, мольба́ми.

Разу́мною мы́слію, прему́дре, мы́сленнѣй души́ гнѣ́ва стра́сть благоче́стно покори́лъ еси́ и къ бли́жнему прите́клъ еси́ Саприкíю, тща́ся премѣни́ти, чу́дне, зако́номъ Спа́совымъ повину́яся.

Тро́иченъ: Равномо́щную, Единоесте́ственную, и Сопресто́льную, и Единосу́щную, Трисія́нную зарю́ Еди́наго Божества́ исповѣ́дающе, чти́мъ въ Тре́хъ Ли́цѣхъ, нераздѣ́льно проповѣ́дающе Сло́во со Отце́мъ и Ду́хомъ.

Богоро́диченъ: Умъ небе́сный Твое́ та́инство непости́жное разумѣ́ти и́стинно не мо́жетъ, Всепѣ́тая: Отцу́ бо Сопресто́льный, во чре́во Твое́ всели́вся, изъ Тебе́ роди́тися благоволи́, во двою́ естеству́ познава́емь.

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, еди́не Человѣколю́бче.

Ники́форъ прозва́нъ бы́въ, при дѣ́лѣхъ яви́ся побѣдоно́сецъ, пре́лести бо мра́къ, благода́ти свѣ́томъ разори́въ, отгна́, зовы́й: нѣ́сть свя́тъ, па́че Тебе́, еди́не Человѣколю́бче.

Умерщвле́нному тебе́ ра́ди вѣ́ровавъ Влады́цѣ, самово́льно къ сме́рти притека́еши, во́льныя Его́ возжела́въ ме́ртвости, я́ко побѣдоно́сецъ му́ченикъ, Боже́ственною си́лою укрѣпля́емь.

На земли́ подви́жникъ, на небесѣ́хъ вѣне́чникъ, уго́дникъ Христо́въ Ники́форъ показа́ся я́вѣ, съ безпло́тными чи́нми зовы́й: нѣ́сть свя́тъ, па́че Тебе́, еди́не Человѣколю́бче.

Тро́иченъ: Отъ Ума́ вели́каго — Отца́, устре́мльшееся Сло́во, исходя́ща же и Свята́го Ду́ха, просвѣща́еми вѣ́рно богодохнове́нными повелѣ́ніи, исповѣ́даемъ вси́ несозда́нное Еди́но Божество́.

Богоро́диченъ: Неискусобра́чно отъ Отца́ пре́жде вѣ́къ Ро́ждшагося, во чре́вѣ Твое́мъ заче́нши, Дѣ́во, породи́ла еси́ на́мъ Бо́га, вку́пѣ и Человѣ́ка, въ ко́емждо естествѣ́ соверше́нна, нераздѣ́льна.

Конда́къ, гла́съ 1. Подо́бенъ: Ли́къ а́нгельскій.

Любве́ сою́зомъ связа́вся, Ники́форе, разруши́лъ еси́ я́вѣ зло́бу не́нависти и мече́мъ во главу́ твою́ усѣ́ченъ бы́лъ еси́, му́ченикъ боже́ственный вопло́щшагося Спа́са, Его́же о на́съ моли́, пою́щихъ сла́вную па́мять твою́.

Сѣда́ленъ, гла́съ 1. Подо́бенъ: Ка́мени запеча́тану.

Багряни́цу твои́ми кровьми́ омочи́лъ еси́, и се́ю я́ко во́инъ одѣ́явся непобѣди́мь, и, я́коже ски́птръ, кре́стъ держа́, восте́клъ еси́ отъ земли́ къ небесе́мъ, Ники́форе блаже́нне, Царю́ вся́ческихъ предстои́ши. Сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Слава, и нынѣ, богородиченъ:

Ру́цѣ Твои́ боже́ственніи, и́миже Созда́теля понесла́ еси́, Дѣ́во Пресвята́я, вопло́щшагося благосты́нею, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва Все́льшемуся въ Тя́, сла́ва Проше́дшему изъ Тебе́, сла́ва Изба́вльшему на́съ рождество́мъ Твои́мъ.

Крестобогоро́диченъ:

Зря́щи Тя́, Христе́, Всенепоро́чная Ма́ти, ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Боже́ственную жи́знь, о Ники́форе, получи́лъ еси́, Боже́ственныя зари́, блаже́нне, сподо́бився, Боже́ственнымъ свѣ́томъ свѣтови́дно ны́нѣ озаря́еши творя́щія па́мять твою́, богому́дре, и вѣ́рою вопію́щія: си́лѣ Твое́й сла́ва, Человѣколю́бче.

Сія́еши, Христо́вымъ му́ченикомъ совоку́плься, разори́лъ бо еси́ ле́сть многобо́жную, мече́мъ усѣ́ченъ бы́въ во главу́ твою́, и кро́вными тече́ніи твои́ми всю́ потопи́лъ еси́ и́дольскую пре́лесть, Влады́цѣ зовя́: си́лѣ Твое́й сла́ва, Человѣколю́бче.

Иже зако́новъ Твои́хъ не сохрани́въ Саприкíй, Твоея́ обнажа́ется, Спа́се, Боже́ственныя благода́ти и, враго́мъ плещи́ пода́въ, Твои́хъ му́ченикъ лиша́ется сла́вы окая́нный. Тѣ́мже, Твоему́ пра́ведному уди́вльшеся промышле́нію, зове́мъ: си́лѣ Твое́й сла́ва, Человѣколю́бче.

Тро́иченъ: Свѣ́тъ Оте́цъ Безнача́льный и всѣ́хъ вино́вный, Свѣ́тъ Сло́во, Свѣ́тъ Ду́хъ Святы́й, отъ Отца́, я́коже отъ исто́чника, пре́жде всѣ́хъ вѣ́къ неизрече́нно сія́ющее Трисо́лнечное Божество́ во Еди́номъ Существѣ́, и си́лѣ, и сла́вѣ познава́ется.

Богоро́диченъ: Всего́ въ Тебѣ́ обновля́етъ человѣ́ка ве́сь, всему́, Пречи́стая, соединя́емь, Оте́ческихъ нѣ́дръ не оста́вль и въ Твою́ утро́бу всели́тися изво́ливъ, Иже бога́тствомъ милосе́рдія во́лею обнища́въ и обогати́въ мíръ Божество́мъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Тече́ньми твои́хъ крове́й церко́вный ра́й напои́лъ еси́, раздѣля́емыми въ нача́ла четверочи́сленная, блаже́нне, добродѣ́телей боже́ственныхъ, отъ ни́хже душа́мъ, о Ники́форе, почерпа́емъ Боже́ственная дарова́нія.

Сѣ́ятель зло́бы злопомнѣ́ніемъ окая́ннаго восхити́, бла́гости же и ми́ра Вино́вникъ привлече́ вмѣ́сто о́наго Боже́ственнымъ свѣтовидѣ́ніемъ укра́шена Ники́фора, богому́драго му́ченика.

Освяща́ется, Спа́се, Твое́й во́льнѣй стра́сти подо́бяся, изъ ре́бръ бо Твои́хъ богому́дрый ка́плями окропле́нъ, свои́хъ крове́й Тебѣ́ то́ки приноша́етъ, мече́мъ посѣка́емь, къ Тебѣ́ гряды́й.

Тро́иченъ: Спасе́нія основа́ніе правосла́віе вѣ́дуще, Собезнача́льна Отцу́ Сло́ва и Свята́го Ду́ха проповѣ́дуемъ въ Тре́хъ Ли́цѣхъ Еди́но Нача́ло, Еди́но Существо́, Еди́ну во́лю, Еди́но дѣ́йство.

Богоро́диченъ: Мы́сленно научи́ся проро́ковъ собо́ръ Твои́мъ та́йнамъ: небесе́ бо две́рь на земли́ Влады́ка Тя́ показа́, и изъ Тебе́, Дѣ́во, вопло́щься, пра́вды Со́лнце, су́щимъ во тмѣ́ возсія́.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю! и спаси́.

Исцѣли́ сокруше́ніе души́ моея́, Ники́форе богому́дре, и, страсте́й мра́къ разори́въ, отжени́ заря́ми су́щія въ тебѣ́ Боже́ственныя свѣ́тлости, моля́ Изба́вителя Христа́, блаже́нне.

Бу́рю и́дольскаго треволне́нія, страда́льче Ники́форе, кре́стнымъ вѣ́триломъ и дыха́ніи духо́вными ти́хо преплы́въ, му́чениче непобѣди́ме, въ приста́нище ти́хое Христо́во дости́глъ еси́.

Пострада́лъ еси́ му́ченически и вои́стинну побѣдоно́сецъ бы́лъ еси́, кова́рствія благомо́щно разори́въ змíева, и, страсте́мъ я́ко о́бщникъ, блаже́нне, бы́въ Влады́ки, ны́нѣ по достоя́нію спросла́вился еси́.

Богоро́диченъ: Ужаса́ются мы́сленніи а́нгельстіи чи́ни, дивя́щеся, со Отце́мъ Су́щаго пре́жде вѣ́къ и Ду́хомъ изъ чре́ва Твоего́ пло́тски Младе́нца ражда́ема зря́ще, Богороди́тельнице Пречи́стая.

Конда́къ, гла́съ 3. Подо́бенъ: Дѣ́ва дне́сь.

Впери́вся, сла́вне, Госпо́днею любо́вію и Сего́ сла́вный Кре́стъ на ра́мо взе́мъ, посрами́лъ еси́ діа́воли ко́зни, пострада́лъ еси́ да́же до сме́рти и и́стины яви́лся еси́ побѣдоно́сецъ, ору́жникъ и таи́нникъ Бо́жія благода́ти.

Икосъ:

Па́влово я́вѣ уче́ніе возлюби́лъ еси́ и въ пе́рсѣхъ твои́хъ, сла́вне, насади́лъ еси́, вопія́: любо́вь не безсту́дствуетъ, сія́ Зижди́теля Человѣ́ка соверше́нна на́мъ дарова́; любве́ ра́ди вся́ претерпѣ́: гво́здіе и кре́стъ, о́цетъ и оплева́нія, копіе́мъ прободе́нъ бы́сть въ ре́бра свята́я, и́миже источи́ на́мъ кро́вь и во́ду богодѣ́льную. Его́же возжела́въ, яви́лся еси́ побѣдоно́сецъ, и зва́ніемъ ору́жникъ, и таи́нникъ Бо́жія благода́ти.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Сме́рть бы́сть тебѣ́, Ники́форе, отше́ствіе отъ су́щихъ здѣ́, блаже́нне, къ небеси́ же и на небе́сная возше́лъ еси́, ны́нѣ лику́я, со а́нгелы пое́ши: благослове́нъ еси́, Бо́же оте́цъ на́шихъ.

Укрѣпля́емь страстьми́ Вседержи́теля, не́мощи превозвы́шенное о́ко и превзя́тую бро́вь низве́рглъ еси́ на зе́млю, богому́дре, взыва́я Созда́телю твоему́: благослове́нъ еси́, Бо́же оте́цъ на́шихъ.

Пу́ть свидѣ́тельства твоего́ Ники́форъ текíй соверши́, разшири́въ се́рдце дѣ́йствомъ Боже́ственнаго Ду́ха, ны́нѣ усе́рдно взыва́етъ Ти́, Влады́ко: благослове́нъ еси́, Бо́же оте́цъ на́шихъ.

Тро́иченъ: Ума́ пе́рваго и безнача́льнаго, ро́ждшаго Сло́во Собезнача́льное безстра́стно и безлѣ́тно и произве́дша Всесвята́го Ду́ха, Тя́, Отца́ вѣ́дуще, взыва́емъ: благослове́нъ еси́, Бо́же оте́цъ на́шихъ.

Богоро́диченъ: Обоя́ была́ еси́, Дѣвома́ти, Богороди́тельнице Чи́стая, во чре́вѣ заче́нши Бо́га несказа́нно, изъ Тебе́ воплоща́ема, во обои́хъ зра́цѣхъ познава́ема, богому́жно на земли́ пожи́вшаго.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Зна́менався благода́тію Спа́са, самозва́нъ ты́ къ подвиго́мъ му́жески отлучи́лся еси́ и, побѣ́ду взе́мъ на сопроти́вныя, му́чениче Христо́въ, побѣди́тельными украси́лся еси́ вѣнцы́, боже́ственнѣ воспѣва́я: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Освяти́вся водо́ю, Ники́форе, и Ду́хомъ и му́ченическими обагре́нъ кровьми́ стяжа́лъ еси́ я́ко му́ченикъ и́стинный Христа́ Бо́га свѣтови́дную свѣ́тлость, всеблаже́нне, въ не́йже ны́нѣ взыва́еши: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Тро́иченъ: Со безпло́тными чи́нми въ Тріе́хъ Ипоста́сѣхъ Еди́нъ бла́гости исто́чникъ приснотеку́щій, нерожде́но, безнача́льно и пресоверше́нно Божество́, содѣ́тельное и Царя́ всѣ́хъ, о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Святѣ́йши Ты́ была́ еси́, Богоро́дице Всепѣ́тая, премíрнаго а́нгельскаго чи́на, си́хъ бо родила́ еси́ Содѣ́теля и Го́спода отъ дѣ́вственна неискусобра́чна чре́ва во дву́ существа́хъ неслія́нно, непревра́тно, во еди́нѣй же ѵпо́стаси Бо́га воплоще́нна.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Преста́вился еси́, я́ко жени́хъ, украси́вся оде́ждами, истка́нными отъ кро́ве муче́нія, Боже́ственныя свѣ́тлости ко прича́стію украси́вшаго, сла́вне и, удобри́вшаго на Крестѣ́ стра́стію честно́ю всѣ́хъ Благодѣ́теля, о Ники́форе преблаже́нне!

Привле́клся еси́ Влады́ки добро́тами, и́хже ничто́же краснѣ́йше, сла́вне, и Того́ тща́ся наслади́тися непреста́нныя и благолѣ́пныя свѣ́тлости, мече́мъ отсѣщи́ твою́ главу́ поуща́лъ еси́ мучи́тели, разжига́емь любо́вію, о Ники́форе, Го́спода твоего́.

Свѣ́тло на ле́сть, му́чениче Христо́въ, до́блествовавъ и сію́ побѣди́въ, я́ко побѣди́тель, вѣне́цъ прія́лъ еси́ твое́й главѣ́ дарова́ній, сла́вне, и ны́нѣ лику́еши му́ченически съ му́ченическими ли́ки, всеблаже́нне Ники́форе, у престо́ла всѣ́хъ Царя́.

Тро́иченъ: Отъ нерожде́нна Отца́ боголѣ́пно Сы́на рожде́нна сла́вяще и Ду́ха Пра́ваго, пре́жде вѣ́къ исхо́днаго, Три́ Ѵпоста́си чти́мъ пресу́щныя и нача́льныя Тро́ицы, соедине́нныя еди́нствомъ неслія́ннымъ, богосло́вяще велича́емъ.

Богоро́диченъ: Яви́лася еси́, о Дѣ́во, Ма́ти Бо́жія, па́че естества́ ро́ждши пло́тію Преблаго́е Сло́во, Его́же Оте́цъ отры́гну отъ се́рдца Своего́ пре́жде всѣ́хъ вѣ́къ, я́ко Бла́гъ. Его́же ны́нѣ и тѣле́съ превы́шша разумѣва́емъ, а́ще и въ пло́ть облече́ся.

Свѣти́ленъ. Подо́бенъ: Не́бо звѣзда́ми.

Тезоимени́тъ показа́лся еси́ побѣ́ды, о Ники́форе, любо́вію и муче́ніемъ побѣди́въ мучи́тели. Тѣ́мже и побѣ́ды вѣне́цъ прія́лъ еси́ отъ Го́спода.

Богоро́диченъ:

Держа́внымъ Твои́мъ покро́вомъ отъ враго́въ навѣ́та на́съ, Чи́стая, Твоя́ рабы́, сохраня́й вся́ невреди́мы, Тя́ бо стяжа́хомъ Еди́ну прибѣ́жище въ ну́ждахъ.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 86 об. – 91.

/ Къ оглавленію раздѣла /


Наверхъ / Къ титульной страницѣ

0