Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 8-й де́нь.
Па́мять и́же во святы́хъ отца́ на́шего Са́ввы Втора́го, архіепи́скопа Се́рбскаго.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 4:

Зна́меньми и чудеса́ми тебе́ Влады́ка просла́ви, треблаже́нне Са́вво: прого́ниши бо ду́хи и врачу́еши стра́сти, ду́ши же вѣ́рныхъ просвѣща́еши, притека́ющихъ къ свято́му твоему́ гро́бу, а́нгеловъ равностоя́телю, архіере́омъ сопресто́льне, апо́столомъ единонра́вне, благовѣ́рія побо́рниче, моли́твенниче о душа́хъ на́шихъ.

Благочести́ваго ко́рене блага́я о́трасль, отъ нея́ же прозябе́ цвѣ́тъ благоуха́нный, мо́щи бо твоя́ проявля́ютъ добродѣ́тели, и́хже мы́ облагоуха́юще, восхваля́емъ Бо́га, тебе́ просла́вльшаго, Са́вво достоблаже́нне, моли́ся Го́сподеви о душа́хъ на́шихъ.

Сла́ва, гла́съ 1:

Свя́те и святи́телю всеблаже́нне Са́вво, посѣща́й ста́до твое́ и соблюда́й е́ невреди́мо отъ волко́въ напа́дающихъ, загражда́я и́мъ злокова́рная уста́, я́ко да въ ми́рѣ воспѣва́емъ сла́ву твою́.

И ны́нѣ, чудотво́рной ико́нѣ, [гла́съ то́йже: [1]

Пречи́стая Твоя́ ико́на, Богоро́дице Дѣ́во, врачевство́ всего́ мíра духо́вное: къ не́йже прибѣга́емъ, Тебѣ́ покланя́ющеся, почита́емъ и лобыза́емъ ю́, исцѣле́ній благода́ть почерпа́юще отъ нея́, и неду́говъ душе́вныхъ и тѣле́сныхъ страсте́й Твои́ми моли́твами свобожда́емся].

Или́ богоро́диченъ:

[Ра́дуйся, Богоро́дице Дѣ́во; ра́дуйся, похвало́ всея́ вселе́нныя; ра́дуйся, Пречи́стая Ма́ти Бо́жія, Благослове́нная.]

На стихо́внѣ стихи́ры, гла́съ 2:

Яви́лся еси́ отъ млады́хъ ногте́й, богоно́се, освяще́нъ сосу́дъ, Са́вво, и жили́ще Пресвята́го и Животворя́щаго Ду́ха.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Ра́дуйся, святи́телей похвало́, о́тче Са́вво, свяще́нникомъ сла́ва, пра́вило мона́хомъ, бѣльце́мъ украше́ніе и Це́ркве утвержде́ніе.

Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́.

Пріими́ ны́нѣ пѣ́ніе ча́дъ твои́хъ, о́тче святите́лю Са́вво, лю́бящихъ тя́, и подава́й серде́чная проше́нія сла́вящимъ тя́.

Сла́ва, гла́съ 6:

Излія́ся благода́ть во устна́хъ твои́хъ, преподо́бне о́тче святи́телю Са́вво, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную во еди́номъ Божествѣ́.

И ны́нѣ, чудотво́рной ико́нѣ, [гла́съ то́йже:

Безпомо́щнымъ По́мощь, Ты́ вои́стинну, Пречи́стая Богома́ти, отсю́ду смире́ніи Тобо́ю возвыша́емся, о Тебѣ́ Высо́цѣй держи́мся, всѣ́мъ Ты́ еси́ Прибѣ́жище и къ Бо́гу Всеми́лостивая Хода́таице].

Или́ богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

Тропа́рь [пи́санъ] на вели́цѣй вече́рни.



НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ.., 1-й антифо́нъ На Го́споди воззва́хъ: стихи́ры на 8, гла́съ 1:

О, ди́вное чу́до, исто́чникъ чудодѣя́ній, отъ гро́ба твоего́ возсія́ютъ святы́я мо́щи твоя́, святи́телю Христо́въ, Са́вво преподо́бне. Тѣ́мъ, чуде́съ свѣтлостьми́ просвѣти́въ твоя́ ча́да вѣ́рная и истреби́въ страсте́й омраче́ніе, святи́телю, Христа́ Бо́га моли́ дарова́ти на́мъ ве́лію ми́лость. [Два́жды.]

Преподо́бне о́тче Са́вво, испроси́ я́же къ Бо́гу моли́твами твои́ми Це́ркви утвержде́ніе, іера́рхи и кня́зя покры́ моли́твою твое́ю, спобори́ Се́рбскому наро́ду твоему́ и всѣ́мъ правосла́внымъ христіа́номъ, притека́ющимъ къ ра́цѣ моще́й твои́хъ и свѣ́тло творя́щихъ пра́зднство успе́нія твоего́, свя́те, мо́лимся.

Весели́ся и ра́дуйся, христоимени́тая патріа́рхіе Се́рбская, такова́ имѣ́вши святи́теля и проповѣ́дника благода́ти. Воспои́мъ, вѣ́рніи, Дави́да иму́ще ликонача́льника, — свяще́нницы бо Твои́ облеку́тся въ пра́вду, и преподо́бніи Твои́ возра́дуются, — прося́ще у Христа́ ми́ра и ве́лія ми́лости.

Ины стихи́ры свята́го, гла́съ 4:

Отче богоуго́дниче Са́вво, наказа́тель свяще́нниковъ и всея́ страны́ Се́рбскія, звѣзда́ пресвѣ́тлая, осіява́ющая чудеса́ми вся́ вѣ́рныя, тя́ бо Бо́гъ пре́жде избра́ отъ ю́ности, о́тче, па́стыря овца́мъ слове́снымъ. Тѣ́мже преподо́бныхъ ли́къ тя́ воспрія́тъ, съ ни́мже моли́ ста́ду твоему́ да́ти оставле́ніе грѣхо́въ и спасе́ніе вѣ́чное.

Гро́бъ тво́й держи́тъ честно́е тѣ́ло, а́ки бога́тство, обогаща́ющее чудеса́ми всѣ́хъ, и́же вѣ́рно притека́ютъ къ тебѣ́, блаже́нне святи́телю Са́вво, имѣ́ющему о́бласть вяза́ти и разрѣша́ти, преподо́бне, разрѣши́ вся́ согрѣше́нія пра́зднующимъ свѣ́тло твое́ успе́ніе и Ца́рствія небе́снаго сподо́би и́хъ моли́твами твои́ми.

Пріиди́те, вѣ́рныхъ собо́ри, псало́мски восплещи́те рука́ми, печа́льныхъ утѣ́шителя, отча́янныхъ засту́пника, Боже́ственнаго Са́вву воспѣва́юще, похвалу́ земли́ Се́рбскія, всего́ свяще́нства украше́ніе, рѣку́ ми́лости вои́стину, Боже́ственнаго Христо́ва смире́нія ревни́теля, подаю́щаго мíру ве́лію ми́лость.

Добродѣ́тельми свѣ́тло процвѣ́лъ еси́, я́ко ма́слина плодови́та, въ дому́ Бо́жіи, ту́чами твои́хъ пречи́стыхъ моли́твъ. Отону́дуже себе́ свѣщу́ вже́гъ свѣ́тло, вше́лъ еси́ въ небе́сныя оби́тели, идѣ́же воздаде́ся тебѣ́ вѣне́цъ воздая́нія: не да́лъ бо еси́ сна́ свои́ма очи́ма, ни вѣ́ждома свои́ма дрема́нія, до́ндеже усну́лъ еси́ сно́мъ о́бщимъ, преподо́бне святи́телю Са́вво. Христу́ моли́ся дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 8:

Весели́ся и ра́дуйся дне́сь, Се́рбская страно́, красу́йся и лику́й, вели́кая це́ркви, патріа́рхіе Се́рбская, ди́вна въ пра́вду, въ не́йже лежи́тъ свята́я ра́ка, иму́щая да́ръ благода́тнаго исцѣле́нія. Святи́телю вели́кій Са́вво, ты́ бо, смире́ніемъ стяжа́въ цѣлому́дріе, твои́ми моли́твами дае́ши посо́біе Благовѣ́рному Кня́зю къ побѣжде́нію супоста́товъ свои́хъ и наро́дныхъ. Тебе́ бо Христо́съ показа́ вели́кое свѣти́ло Се́рбскому ро́ду, ты́ ему́ похвала́, ты́ защище́ніе; тво́й гро́бъ безме́здна врачба́ предлежи́тъ, къ нему́ же приходя́щіи слѣпíи вѣ́рою просвѣща́ются, хро́міи, влеку́щеся, ска́чуще, отхо́дятъ, неду́жніи исцѣля́ются, бѣсну́ющіи бѣсо́въ избыва́ютъ. Тѣ́мъ и мы́ дне́сь вси́, почита́юще честно́е твое́ успе́ніе, мо́лимъ тя́, преподо́бне о́тче, мíру испроси́ и душа́мъ на́шимъ ве́лію ми́лость.

И ны́нѣ, пра́здника, гла́съ 5:

Ве́тхій де́ньми, младе́нствовавъ пло́тію, Ма́терію Дѣ́вою въ це́рковь прино́сится, Своего́ зако́на исполня́я обѣща́ніе, Его́же Симео́нъ пріи́мъ, глаго́лаше: ны́нѣ отпуща́еши съ ми́ромъ, по глаго́лу Твоему́, раба́ Твоего́, ви́дѣша бо о́чи мои́ спасе́ніе Твое́, Святы́й.

[Вхо́дъ.] Проки́менъ дне́. Чте́нія святи́тельская три́.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Яко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры самогла́сны, гла́съ 6:

Возсія́ дне́сь, я́ко со́лнце, и, я́ко мо́лнія, возблиста́, о́тче, вѣща́ніе твое́, и, я́коже гро́мъ, возгремѣ́ съ небесе́, имѣ́лъ бо еси́ свы́ше вдохнове́ніе и́стинно; ны́нѣ же честны́я мо́щи твоя́ неугаси́мыя лучи́ чуде́съ испуща́ютъ отъ гро́ба, я́ко отъ черто́га свѣ́тла, просвѣща́юще ду́ши пою́щихъ тя́.

Пресла́вно просла́вися свята́я це́рковь, въ не́йже положе́ны бы́ша честны́я мо́щи твоя́, къ ни́мъ же лю́ди благовѣ́рніи притека́юще, неисцѣ́льнымъ страсте́мъ пріе́млютъ исцѣле́нія о и́мени твое́мъ, святи́телю Са́вво, моли́ Христа́ Бо́га, да спасе́тъ ду́ши на́ша.

Святи́телей удобре́ніе, Са́вво прему́дре, сто́лпе и утвержде́ніе Це́ркве, богосло́вія труба́ златокова́нная, Тро́ицы побо́рниче, благоче́стія законопи́сче, на́мъ, пра́зднующимъ честно́е успе́ніе твое́, тѣ́мже лобыза́емъ честны́й гро́бъ тво́й и мо́лимся тебѣ́, святи́телю Христо́въ, Са́вво пребога́те, испроси́ па́ствѣ твое́й грѣхо́въ оставле́ніе и всѣ́хъ на́съ до́брѣ сохрани́, да вси́ ублажа́емъ тя́.

Сла́ва, гла́съ 8:

Наста́ свѣтоно́сный де́нь, чудотво́рца, архіепи́скопа Се́рбскаго Са́ввы, па́мять. Пріиди́те, соше́дшеся, пра́зднуемъ свѣ́тло, соста́вимъ ли́ки и похвала́ми почти́мъ: ра́дуйся, Симео́не, ко́рене благоче́стія; ра́дуйся, Са́вво святи́телю, первопресто́льный ро́да на́шего; ра́дуйся, Симео́не первовѣнча́нный, блага́я вѣ́тве; ра́дуйся, Са́вво вторы́й, лозо́ и́стинная, принося́щая на́мъ цвѣ́тъ весе́лія; ра́дуйся, честны́й свети́льниче Се́рбскія земли́, источа́еши бо чудеса́, излива́еши исцѣле́нія и мо́лишися о душа́хъ на́шихъ.

И ны́нѣ, чудотво́рной ико́нѣ, гла́съ то́йже:

Егда́ просвѣща́шеся Се́рбскій наро́дъ, [тогда́ Вседѣ́тель Бо́гъ благоволи́ посла́ти во святѣ́йшую патріа́рхію Се́рбскую и чудотво́рнаго и животворя́щаго о́браза Своего́ и Пречи́стыя Ма́тере Своея́, во просвѣще́ніе, и во защище́ніе, и во спасе́ніе Се́рбскаго язы́ка, во здра́віе и во исцѣле́ніе неду́говъ, во благополу́чіе и во изоби́ліе вся́кія благода́ти все́й земли́ Се́рбстѣй, я́ко Бла́гъ и Человѣколю́бецъ и Всеми́лостивъ Госпо́дь всея́ тва́ри].

На стихо́внѣ стихи́ры, гла́съ 8:

Что́ тя́ нарече́мъ, святи́телю Са́вво? Звѣзду́, озаря́ющую поднебе́сная, мíра ли красова́ніе всечестно́е, озаря́ющее лю́ди луча́ми велѣ́ній благовѣ́рія, ересе́й же тму́ отгоня́ющее. Моли́, преподо́бне, отъ тли́ и бѣ́дъ изба́витися вѣ́рою творя́щимъ святу́ю па́мять твою́.

Сти́хъ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

Что́ тя́ нарече́мъ, святи́телю Са́вво? Рѣку́ ли, излива́ющую исцѣле́нія незави́стно всѣ́мъ, вѣ́рою приходя́щимъ къ твоему́ свято́му гро́бу, или́ исто́чникъ, источа́ющь уче́нія медото́чная во вся́ концы́ и вѣ́рныя просвѣща́ющь. Моли́ся, преподо́бне, спасти́ся душа́мъ на́шимъ.

Сти́хъ: Честна́ предъ Го́сподемъ сме́рть преподо́бныхъ Его́.

Пріиди́те, торжеству́имъ свѣ́тло па́мять святи́теля Са́ввы чудотво́рца. Преста́вися бо отъ земли́ къ невеще́ственнымъ оби́телемъ, идѣ́же зри́тъ добро́ту неизрече́нную, а́нгельскимъ лико́мъ собесѣ́дникъ бы́въ. Тѣ́мже, со апо́столми и му́чениками лику́я, о́тче на́шъ, Са́вво пребога́те, моли́ся прилѣ́жно Христу́ Бо́гу о чту́щихъ вѣ́рою святу́ю па́мять твою́.

Сла́ва, гла́съ 5:

Благода́ть Свята́го Ду́ха дѣ́йствуетъ въ ра́цѣ моще́й твои́хъ на тѣ́хъ, и́же съ вѣ́рою притека́ютъ, испуща́ютъ бо онѣ мѵ́ро благово́нное и подава́ютъ неду́говъ исцѣле́ніе. Тѣ́мже, преосвяще́нне святи́телю Са́вво, имѣ́я дерзнове́ніе къ Бо́гу и со безпло́тными лику́я на небесѣ́хъ, моли́ся спасти́ся ста́ду твоему́ отъ вся́кихъ бѣ́дъ.

И ны́нѣ, пра́зднику, гла́съ 6:

На рука́хъ ста́рческихъ во дне́шній де́нь, я́ко на колесни́цѣ херуви́мстѣй, восклони́тися благоизво́ливый, Христе́ Бо́же, и на́съ, пою́щихъ Тя́, страсте́й мучи́тельства призыва́емый изба́ви и спаси́, я́ко Человѣколю́бецъ.

Ны́нѣ отпуща́еши... Трисвято́е.
[На благослове́ніи хлѣ́бовъ: Тропа́рь свята́го, два́жды. И ико́ны Богоро́дицы, еди́ножды.
Аще нѣ́сть бдѣ́нія, глаго́лемъ тропа́рь свята́го, еди́ножды. Сла́ва, и ны́нѣ, чудотво́рнѣй ико́нѣ, или́ богоро́диченъ, гла́са.]

Тропа́рь свято́му, гла́съ 4:

Исправле́ніе вѣ́ры и о́бразъ кро́тости, и я́коже са́дъ посредѣ́ рая́, преподо́бными дѣ́лы твои́ми мíръ просвѣща́еши, сего́ ра́ди къ честнѣ́й ра́цѣ моще́й твои́хъ любо́вію прикаса́емся, лобыза́емъ и́хъ и вѣ́рно вопіе́мъ: предста́ни въ по́мощь воспѣва́ющимъ па́мять святу́ю твою́ и свѣтоно́сную, святи́телю о́тче Са́вво пребога́те, мо́лимся, Христу́ Бо́гу моли́ся спасти́ся душа́мъ на́шимъ.

Сла́ва, и ны́нѣ, чудотво́рнѣй ико́нѣ, гла́съ 4:

Дне́сь свѣ́тло красу́ется [святѣ́йшая патріа́рхія Се́рбская, я́ко зарю́ со́лнечную воспріе́мши, Влады́чице, чудотво́рную Твою́ ико́ну. Къ не́йже мы́ притека́юще и моля́щеся Тебѣ́, взыва́емъ си́це: о, Всеми́лостивая и Всемогу́щая Госпоже́, Ма́ти Бо́жія, испо́лни проше́нія на́ша, да́руй на́мъ изоби́ліе во вся́цѣй благода́ти Бо́жіей].

Или́ богоро́диченъ, гла́са:

[Еже отъ вѣ́ка утае́нное, и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА УТРЕНИ,
На Бо́гъ Госпо́дь: Тропа́рь свято́му, два́жды. Сла́ва, и ны́нѣ, пра́зднику.

По 1-мъ стихосло́віи сѣда́ленъ, гла́съ 1:

Плоды́ слове́сныя принося́, му́дре Са́вво, Го́сподеви, восхваля́еши Его́ со архіере́йми и преподо́бными. Тѣ́мже съ ни́ми и ра́дуешися въ земли́ живы́хъ, зане́ сла́ву и́хъ возлюби́лъ еси́. Сего́ ра́ди, о́тче свяще́нне, непреста́й моли́ти Царя́ Небе́снаго за Благочести́ваго Кня́зя на́шего и ве́сь наро́дъ Се́рбскій, Еди́наго Человѣколю́бца. [Два́жды.]

Сла́ва, и ны́нѣ, пра́здника, гла́съ 3:

Отъ Дѣ́вы Тя́ воплоще́нна, Христе́, ра́дуяся, подъя́тъ свяще́нный Симео́нъ, — ны́нѣ отпуща́еши, — вопія́, — раба́ Твоего́, Влады́ко! Анна же непоро́чная, проро́чица и сла́вная, ны́нѣ исповѣ́даніе и пѣ́ніе прино́ситъ Тебѣ́. Мы́ же, Жизнода́вче, вопіе́мъ Ти́: сла́ва та́ко Благоволи́вшему.

По 2-мъ стихосло́віи сѣда́ленъ свята́го, гла́съ 3:

Ми́лостивому Христо́ву уго́днику, незло́бивому и кро́ткому, вси́ тебѣ́ зове́мъ, прилѣ́жно моля́щеся: разрѣши́ междоусо́бную страсте́й на́шихъ бра́нь, разруши́ злочести́вая ага́ряновъ кова́рства и покори́ и́хъ, присноблаже́нне, вся́ческихъ же искуше́ній изба́ви любо́вію воспѣва́ющихъ тя́. [Два́жды.]

Сла́ва, и ны́нѣ, пра́здника, гла́съ 8:

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

[Велича́ніе:

Велича́емъ тя́, святи́телю о́тче Са́вво, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ свято́му, гла́съ 8:

Проповѣ́дуетъ, о́тче, твоя́ чудеса́ ны́нѣ Се́рбская патріа́рхія и вся́ка страна́ оте́чествія, я́ко отъ болѣ́зней и скорбе́й избавля́еши вся́, богоблаже́нне Са́вво, пита́телю вдови́цъ, и си́рыхъ, а́ки оте́цъ, помо́щникъ въ ско́рбехъ всеизря́денъ, пла́чущихъ утѣше́ніе, па́стырь и наста́вникъ блужда́ющимъ, Са́вво преподо́бне, изба́ви на́съ отъ бѣ́дъ моли́твами твои́ми, прося́ у Христа́ Бо́га прегрѣше́ній оставле́ніе, вѣ́рою и любо́вію чту́щимъ святу́ю па́мять твою́. [Два́жды.]

Сла́ва, и ны́нѣ, чудотво́рной ико́нѣ, гла́съ 4:

Пречи́стый о́бразъ Тво́й, [и́мже посѣти́ла еси́ ны́, Богоотрокови́це, чту́ще, пра́зднуемъ сего́ ны́нѣ прише́ствіе, отъ него́ благода́тію Сы́на Твоего́ и ми́лостію Твое́ю пріе́млемъ отъ скорбе́й, и бѣ́дъ, и напа́стей избавле́ніе, Ма́ти Бо́га Вы́шняго].

Таже, степе́нна, 1-й антифо́нъ, 4-го гла́са. Проки́менъ, гла́съ 4: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Та́мо возращу́ ро́гъ Дави́дови, угото́вахъ свѣти́льникъ пома́занному Моему́. Вся́кое дыха́ніе... Ева́нгеліе отъ Матѳе́я, зача́ло 10.

По 50-мъ псалмѣ́ стихи́ра, гла́съ 6:

Ду́ха Свята́го благода́ть излія́ся во твои́хъ устна́хъ, о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу во еди́номъ Божествѣ́.

Кано́нъ свято́му на [8], [гла́съ 8]. [2]
Пѣ́снь 1.

[Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.]

Боже́ственными заря́ми и свяще́нными свѣтосія́ньми при́сно мою́ ду́шу озари́, о́тче, сла́вяща тво́й пра́здникъ, іера́рше.

Изъ ко́рене блага́го блажа́йшая о́трасль прозя́блъ еси́, Бо́жія ра́зума вода́ми напая́емь. Тѣ́мъ и пло́дъ благоуха́ненъ яви́лся еси́ житіе́мъ свои́мъ отъ ю́ности, веселя́ сердца́ и ду́ши пою́щихъ тя́.

Возлюби́въ му́дрости нача́ло, стра́хъ Бо́жій, и за́повѣдемъ Его́ при́сно поуча́яся, насади́лся еси́, а́ки дре́во, при исхо́дищихъ во́дъ духо́вныхъ, отъ ни́хже, о́тче, напая́емь, пло́дъ Христу́, Са́вво, прине́слся еси́ пресла́дкій.

Всесвѣ́тлую тя́ звѣзду́ Мы́сленное Со́лнце показа́, свѣ́тлость твои́хъ добродѣ́телей просвѣти́ зе́млю на́шу, святи́телю Христо́въ, о́тче Са́вво. [Два́жды.]

Чистото́ю любве́ одержи́мь, благоро́діемъ души́ порабо́тилъ еси́ плотолю́біе, тѣ́мъ ны́нѣ, вѣнцы́ чистоты́ пріе́мля, со а́нгелми у Христа́ весели́шися, Его́же моли́ за на́съ, о́тче Са́вво.

Житіе́, при́сно очище́нно и чи́сто и скве́рнѣ несмѣше́нно, яви́въ, показа́лся еси́ на земли́ Христо́въ свяще́нный сосу́дъ, прему́дре Са́вво блаже́нне.

Богоро́диченъ: Со Отце́мъ Сы́й Единоро́дный земны́я обожи́, Чи́стая, за мно́гія щедро́ты, я́ко Бо́гъ Преблагíй.

Катава́сія пра́здника.

Пѣ́снь 3.

[Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.]

Сы́нъ дне́ и свѣ́та яви́лся еси́, святи́телю, труда́ми твои́ми, ны́нѣ же во свѣ́тлостехъ святы́хъ я́сно сія́еши благода́тію.

Свѣти́льникъ души́ своея́ слеза́ми украша́я и ра́но у́тренюя ко Христу́ ру́къ свои́хъ просте́ртіемъ въ моли́твахъ, свое́ тѣ́ло, мы́сленнаго Амали́ка, умертви́лъ еси́ и на го́ру безстра́стія возше́лъ еси́.

Пу́ть нечести́ваго искуше́нія обличи́лъ еси́ всѣ́мъ прельще́ннымъ, приве́дъ и́хъ къ Сло́ву Пастыренача́льнику, я́ко па́стырь слове́сный и спаси́тельный.

Безстра́стія любо́вію подстрека́емь, плотска́я взыгра́нія изсуши́лъ еси́, ду́шу же свою́ Боже́ственными сія́ньми просвѣти́лъ еси́, тѣ́мже мо́лимся и на́мъ улучи́ти свѣ́тъ разу́мный, о́тче Са́вво. [Два́жды.]

Благоро́діемъ высо́къ, доброду́шіемъ изя́щенъ и ра́зума му́дростію удивле́нъ бы́лъ еси́, сія́я чистото́ю, я́ко цвѣ́тъ, украси́вся, Са́вво о́тче, свѣ́тлымъ смире́ніемъ.

Правовѣ́рно, преподо́бне, Це́рковь Христо́ву упа́слъ еси́, отгна́въ ерети́ческія пле́велы, ны́нѣ же во вы́шнихъ водворя́ешися, преблаже́нне.

Богоро́диченъ: Разу́мно въ купинѣ́ огнепа́льнѣй ви́дѣ Тя́ Моисе́й, я́сно образу́ющей Бо́га, хотя́ща роди́тися изъ Тебе́ неизрече́нно, Богоро́дице Приснодѣ́во.

Сѣда́ленъ, гла́съ 8:

Украша́яся прему́дростію ра́зума, низложи́лъ еси́ горды́ню плотскíя тяготы́ и бы́лъ еси́ оби́тель Ду́ха Пресвята́го, непреста́нно простира́яся ра́зумомъ къ Лю́бящему тя́. Тѣ́мъ, ре́вностію боже́ственною разгара́яся, сла́вне, яви́лся еси́ сирота́мъ и убо́гимъ утвержде́ніе и а́нгеломъ собесѣ́дникъ, Са́вво, моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, пра́зднику, гла́съ 4:

На горѣ́ Сина́йстѣй дре́вле ви́дѣ Моисе́й за́дняя Бо́жія и то́нкій Боже́ственный гла́съ сподо́бися во мра́цѣ и ви́хрѣ слы́шати; ны́нѣ же Симео́нъ воплоще́ннаго Бо́га непрело́жнѣ на́съ ра́ди на ру́ки прія́тъ и ра́достно тща́шеся ити́ отъ су́щихъ здѣ́ къ животу́ вѣ́чному. Тѣ́мже вопія́ше: Ны́нѣ отпуща́еши раба́ Твоего́, Влады́ко.

Пѣ́снь 4.

[Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.]

Предвѣ́дый Бо́гъ, блаже́нне, твоея́ души́ красоту́ и ра́зума чистоту́ священнопроповѣ́дника му́дра и учи́теля показа́ тя́.

Ду́хомъ просвѣще́нъ сы́й, су́щія во тмѣ́ пре́лести просвѣща́еши и твои́мъ сла́дкимъ поуче́ніемъ сы́ны дне́ соверша́еши, святи́телю Са́вво.

Отъ те́мъ звѣре́й изба́вилъ еси́, ста́до твое́ растерза́ти и́щущихъ, но ты́, я́ко бо́дръ архипа́стырь, и ны́нѣ ревну́еши о сохране́ніи ро́да и оте́чества твоего́.

Руко́ю вели́каго архіере́я Се́рбскаго Арсе́нія и освяще́ннаго собо́ра пріе́млеши пома́заніе архіере́йства и, Ду́хомъ воздвиза́емь, о́тче Са́вво, и па́стырь ро́ду Се́рбскому и оби́тели твое́й сто́лпъ бы́лъ еси́. [Два́жды.]

Ми́ръ утверди́ся въ оби́тели твое́й, іера́рше, и въ твое́мъ ро́дѣ и епи́скопствѣ моли́твами твои́ми, моли́ся прилѣ́жно въ ми́рѣ утверди́тися мíру, святи́телю Са́вво.

Твои́ роди́теліе бы́ша рачи́тели и те́пли подража́тели Христу́ Бо́гу, Ему́же созда́ша хра́мъ прекра́сный во и́мя пресла́внаго Вознесе́нія Госпо́дня. Тѣ́мже въ хра́мѣ Его́ тѣ́ло свое́ полага́еши, а́ки во дворы́ Спа́са своего́.

Богоро́диченъ: Имѣ́я Тя́ Помо́щницу, кого́ убою́ся когда́ или́ страшу́ся? Кто́ же, хотя́ ско́рбная навести́ рабу́ Твоему́, не устраши́тся Тебе́, Пречи́стая, и не па́даетъ на но́зѣ?

Пѣ́снь 5.

[Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.]

Прильпе́ любо́вію душа́ твоя́ ко Го́споду, святи́телю блаже́нне, тѣ́мже тѣ́ло твое́ честно́е въ честнѣ́мъ хра́мѣ Его́ нетлѣнно во мно́гая лѣ́та соблюде́ся.

Просла́ви тя́ Госпо́дь, Са́вво пребога́те, и тѣ́ло твое́ соблюде́ на мно́гая лѣ́та нетлѣ́нно, явля́я тя́ о́бщника рабо́мъ Свои́мъ, и́хже и по сме́рти досто́йно соублажа́ешися, блаже́нне.

Красота́ говѣ́нія твоего́, е́же ко Го́споду, привлече́ благода́ть благолѣ́пію души́ твоея́, свяще́нне, и возведе́ тя́ вели́кому ро́ду Се́рбскому отца́, и архипа́стыря показа́ тя́, преподо́бне.

Пѣ́сньми почти́лъ еси́ па́мять іера́рха Са́ввы пе́рваго и хвала́ми, я́ко досто́йно, ублажи́лъ еси́ того́. Ны́нѣ же са́мъ, іера́рше Са́вво, прича́ствуеши похвала́мъ его́ и по сотворе́нію твоему́ къ бли́жнему воспріе́млеши. [Два́жды.]

Приноси́мое а́ки честно́е возноше́ніе Бо́гу первопресто́льникомъ Се́рбскимъ Са́ввою твое́ свяще́нное па́стырства возведе́ніе, я́ко пасу́щу ти́ Госпо́дни лю́ди, Са́вво святи́телю, преподо́біемъ и кро́тостію.

Возлюби́лъ еси́, архіере́е, свяще́нныя му́жи пѣ́сньми восхваля́ти, я́ко рачи́тель добро́ты и́хъ и подража́тель дѣя́ній боголюбе́зныхъ.

Богоро́диченъ: Низложи́, Влады́чице, враго́въ мои́хъ шата́ніе, Тя́ бо и́мамъ и Предста́тельницу, и наде́жду, и по́мощь крѣ́пкую, Ты́ мя́ соблюди́, Чи́стая, навѣ́та вра́жія и ла́янія и́хъ.

Пѣ́снь 6.

[Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.]

Возвы́шенное смире́ніе, чистоту́ ума́, любо́вь нелицемѣ́рну, вѣ́ру и наде́жду имѣ́я и́стинну, Са́вво всесла́вне, Тро́ицы яви́лся еси́ жили́ще.

Се́, прему́дре, Ду́ха благода́тію быва́еши наста́вникъ слове́сныхъ ове́цъ, и́хже приво́диши къ же́ртвеннику добродѣ́телей.

Патріа́ршее сѣда́лище украси́ся тобо́ю, тя́ бо, прехва́льне, учи́тъ Ду́хъ Святы́й и тебе́ па́стыря руко́ю святи́тельскою соверша́етъ.

Ве́сь у́бо у́мъ впери́въ къ высотѣ́, земна́я же ни во что́же вмѣни́въ, смире́ніемъ, достоблаже́нне Са́вво, высо́кая воспрія́лъ еси́. [Два́жды.]

Хвала́ми да почти́мъ треблаже́ннаго отца́, и́же небе́сная возжела́въ, земна́я же оста́вивъ, усе́рдно потече́, я́ко еле́нь на исто́чникъ, послѣ́довавъ стопа́мъ роди́телей свои́хъ.

Святи́тельства пра́вило святи́телемъ показа́лся еси́, дѣ́тельнаго же подписа́ніе. Сло́во Твое́ обрѣ́те о́бразъ видѣ́нія, богосло́вія же твоего́ предѣ́лъ уче́нію яви́ся.

Богоро́диченъ: Сло́во Отчее, предочи́стившися, о Чи́стая, Ду́хомъ слове́снаго естества́, на благодѣя́ніе родила́ еси́.

Конда́къ, гла́съ 8:

Яко архіере́емъ сопресто́льникъ и святи́телемъ изря́дный побо́рникъ бы́лъ еси́, святи́телю Са́вво, сохраня́яй оте́чество, оби́тель, гра́дъ же и лю́ди, почита́ющія тя́ вѣ́рою и честны́мъ твои́мъ моще́мъ покланя́ющіяся, да велегла́сно тебѣ́ вопіе́мъ: ра́дуйся, Са́вво богому́дре.

Икосъ:

Отъ чре́ва ма́терня хва́литъ освяще́ннаго святи́теля Госпо́дня вся́ страна́ Се́рбская, преподо́бнаго Са́вву, своему́ оте́честву утвержде́ніе, пріе́мшаго благода́тныя да́ры Боже́ственныя сла́вы, къ нему́ же притека́емъ вси́ съ вѣ́рою и любе́зно цѣлу́емъ ра́ку моще́й его́. Тѣ́мже мы́, недосто́йніи и грѣ́шніи, надѣ́ющеся на моли́твы твоя́, святи́телю, я́же ко Влады́цѣ и Пречи́стѣй Его́ Ма́тери, жела́емъ, а́ки пси́, прія́ти насыще́ніе отъ крупи́цъ, па́дающихъ отъ трапе́зы господе́й свои́хъ, и е́же въ де́нь су́дный улучи́ти облегче́ніе содѣ́янныхъ ра́ди зо́лъ, да велегла́сно тебѣ́ вопіе́мъ: ра́дуйся, Са́вво богому́дре.

Пѣ́снь 7.

[Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.]

Процвѣ́лъ еси́, я́ко фи́никсъ, во дво́рѣхъ Бо́жіихъ и до́лжнымъ сно́мъ преподо́бныхъ усну́лъ еси́, сего́ ра́ди гро́бъ тво́й быва́етъ наслажде́ніе на́мъ, и са́мъ, проповѣ́дниче Са́вво, показу́еши чу́до ви́дящимъ.

Самово́льнѣ оста́вилъ еси́, о́тче на́шъ Са́вво, вся́ сла́вная, и сро́дная, и подру́жная, послѣ́довавъ Христу́ Бо́гу, по Ева́нгельскому глаго́лу. [Два́жды.]

Вопло́щшагося Сло́ва слуга́ бы́лъ еси́, Са́вво богогла́се, мно́гія бо лю́ди изба́вилъ еси́ безслове́сія, я́ко боже́ственный учени́къ Возсія́вшаго.

Тлѣ́нная оста́вивъ, треблаже́нне, воспрія́лъ еси́ нетлѣ́нная, насыща́яся Боже́ственныя свѣ́тлости во дво́рѣхъ Го́спода на́шего, Са́вво прему́дре.

Лю́діе твои́, о́тче, и ча́да Ду́хомъ Святы́мъ порожде́нна, жа́лостная оста́вльше, ра́достная тебѣ́ воспѣва́ютъ пѣ́нія, вопію́ще: не оста́ви на́съ, свя́те, въ ра́дости Го́спода твоего́, моля́ о душа́хъ на́шихъ.

Наслѣ́довавъ, я́ко сы́нъ возлю́бленный, оте́ческую му́дрость и добродѣ́тель, пріе́мникъ бы́лъ еси́ Боже́ственнаго престо́ла, стопа́мъ Евангели́ста послѣ́дуя.

Богоро́диченъ: Свы́ше Тебѣ́ гла́съ ра́достно возопи́, а́нгелъ, Богоро́дице, неизрече́нное Влады́ки возвѣща́я Тебѣ́ зача́тіе.

Пѣ́снь 8.

[Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.]

Вразумля́лъ еси́ неразу́мныя, обраща́лъ еси́ прельще́нныя, совраща́ющіяся же, о́тче, спа́слъ еси́, приве́дъ и́хъ къ Бо́гу, пою́щія: благослове́нъ еси́, Го́споди Бо́же оте́цъ на́шихъ. [Два́жды.]

Ны́нѣ лице́ Христо́во созерца́яй, ты́, о Са́вво, сою́зу бо тѣле́сному разрѣ́шшуся, соедини́лся еси́ съ твои́мъ жела́ніемъ.

Твое́ сло́во уподо́бися вои́стинну рѣцѣ́, о Са́вво, наводня́ющей свои́мъ тече́ніемъ сю́ду и сю́ду, злосла́вныхъ же ухищре́нія отвраща́ющей.

Хору́гвь Христо́ва, христіа́номъ хвала́, по апо́столу, о́тче Са́вво, взыва́лъ еси́, ничи́мъ же хваля́ся, то́кмо о Крестѣ́ Го́спода на́шего Іису́са Христа́.

Кро́ткое и молчали́вое нра́ва твоего́ воспріи́мъ, Госпо́дь, блаже́нне, поста́ви тя́ па́стыря лю́демъ Свои́мъ, на кого́ бо призира́етъ, а́ще не на кро́ткаго, и молчали́ваго, и трепе́щущаго слове́съ Его́.

Уста́ вдови́цъ благослови́ша тя́, заступле́нія твоего́ сподо́бльшися, іера́рше блаже́нне, ты́ бо благоугожда́лъ еси́ Бо́гу по непоро́чному Іову, изыма́вшему оби́димыя отъ наси́лія.

Богоро́диченъ: Боголѣ́пная Дѣ́во, озло́бленную мою́ ду́шу грѣхо́мъ, ублажи́ бла́гостію ро́ждшагося отъ Тебе́ Го́спода Бо́га.

Пѣ́снь 9.

[Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.]

Яко свѣ́тъ, я́ко свѣ́щникъ, я́ко вели́кое со́лнце, я́ко мо́лнія, Христо́вы Це́ркве возсія́лъ еси́, и вѣ́рныхъ ра́зумы просвѣти́лъ еси́, и въ невече́рняя мѣста́ всели́лся еси́, поя́ трисвяты́ми гла́сми Тро́ицу Несозда́нную.

Возду́хъ у́бо освяти́ся благово́ніемъ моще́й твои́хъ, Са́вво блаже́нне, Христо́въ святи́телю, Це́рковь же и оби́тель твоя́ патріа́рхія, веселя́щися, вопіе́тъ: благослове́нъ Бо́гъ оте́цъ на́шихъ.

Пло́тію мíра кромѣ́ бы́въ, святи́телю, и въ прекра́сныхъ чи́на своего́ обита́я, обогаща́еши ро́дъ на́шъ творе́ніемъ свѣ́тлымъ. Тѣ́мже па́мять твою́ вѣ́рою соверша́емъ на земли́, Са́вво прему́дре.

Ца́рскій цвѣ́тъ Це́ркви цвѣте́тъ, Кре́стъ и́стинный, ты́ же, святи́телю Са́вво досточу́дне, взе́мь то́й кре́стъ, поте́клъ еси́ ца́рскимъ путе́мъ, вопія́: благослови́те, вся́ дѣла́ Госпо́дня, Го́спода. [Два́жды.]

Земля́ тѣ́ло твое́ блаже́нное скрыва́етъ, я́ко исцѣле́нія точа́щее вѣ́рнымъ, не́бо же ду́хъ со избра́нными отъ вѣ́ка но́ситъ, Боже́ственными сія́ньми озаре́нъ вои́стину.

Красно́ у́бо Це́рковь весели́тся въ па́мяти твое́й, о святи́телю треблаже́нне Са́вво, Се́рбскіи же ро́дове стека́ются, пра́зднственная тебѣ́ принося́ще и восхваля́юще Христа́, тебе́ просла́вльшаго.

Богоро́диченъ: Дѣ́во Преблаже́нная, ублажа́емъ Тя́, ро́ди человѣ́честіи, я́ко родила́ еси́ Спаси́теля ду́шъ на́шихъ.

Свѣти́ленъ свято́му:

Чу́днаго и сла́внаго святи́теля Са́вву вели́каго, пріиди́те, Се́рбстіи ро́ди и собо́ри, пѣ́сньми Боже́ственными и свяще́нными гла́сми восхва́лимъ, я́ко сопресто́льна патріа́рхіи Се́рбской и а́нгельскимъ чино́мъ сослуже́бника.

Сла́ва, свято́му:

Сла́вно краси́тся дне́сь свѣтоза́рное Се́рбское торжество́, и́же во свѣ́тѣ сла́вы Бо́жія предстоя́, святи́телю Са́вво блаже́нне, помяни́ на́съ, хва́лящихъ твою́ па́мять.

И ны́нѣ, пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

На хвали́техъ стихи́ры свято́му на 6, гла́съ 6:

Руко́ю вели́каго архіере́я Се́рбского, Арсе́нія, ку́пно со судо́мъ освяще́ннаго Собо́ра пріе́млеши пома́заніе архіере́йское и, Ду́хомъ воздвиза́емь, о́тче Са́вво, полага́ешися въ па́стыря Се́рбскому ро́ду и патріа́рхіи.

Отъ те́мъ звѣре́й, и́щущихъ разтерза́ти ста́до твое́, Се́рбскій ро́дъ изба́вилъ еси́, я́ко бо́дръ архипа́стырь, сохраня́я старѣ́йшинство свое́.

Мíръ умири́ся, іера́рше, твои́ми моли́твами. Проси́ и на́мъ утверди́тися въ ми́рѣ моли́твами твои́ми, святи́телю.

Свои́мъ роди́телемъ те́плый рачи́тель и подража́тель бы́лъ еси́, тíи бо созда́ша прекра́сный хра́мъ во и́мя пресла́внаго Вознесе́нія Госпо́дня, тѣ́мже въ то́мже хра́мѣ полага́ешися, а́ки во дворы́ Спа́са своего́.

Просла́ви тя́ Госпо́дь, Са́вво пребога́те, и тѣ́ло твое́ соблюде́ на мно́гая лѣ́та нетлѣ́нно, тѣ́мъ бо бы́лъ еси́ о́бщникъ рабо́мъ Его́, подража́я и́мъ житіе́мъ, сего́ ра́ди соублажа́ешися съ ни́ми и по сме́рти.

Красота́ говѣ́нія твоего́ ко Го́споду привлече́ благода́ть благолѣ́пія души́ твоея́, свяще́нне, и поста́ви тя́ бы́ти Се́рбскому ро́ду отца́ архипа́стыря и святи́теля.

Сла́ва, гла́съ 1:

Дне́сь свѣ́тло красу́ется святѣ́йшая патріа́рхія Се́рбская въ па́мяти треблаже́ннаго отца́ Са́ввы, дне́сь и мы́, обстоя́ще и облобыза́юще ра́ку его́, а́ки боголюби́вая его́ ча́да, и хва́ляще его́, вопіе́мъ: ди́венъ Бо́гъ во святы́хъ Свои́хъ; въ це́рквахъ благослови́мъ Тя́, Го́споди.

И ны́нѣ, пра́зднику, гла́съ 5:

Испыта́йте писа́нія, я́коже рече́ во Ева́нгеліихъ Христо́съ Бо́гъ на́шъ, въ ни́хъ бо обрѣта́емъ Того́, ражда́ема и пелена́ми повива́ема, въ я́слехъ полага́ема и млеко́мъ пита́ема, обрѣ́заніе пріе́млюща и Симео́номъ носи́ма, не мнѣ́ніемъ, ни привидѣ́ніемъ, но и́стиною мíрови я́вльшася, къ Нему́же возопіи́мъ: превѣ́чный Бо́же, сла́ва Тебѣ́.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на пра́зднику и свято́му. Тропари́ и кондаки́ пра́зднику и свято́му. Проки́менъ, гла́съ 7: Честна́ предъ Го́сподемъ сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ ко Евре́омъ, зача́ло 318. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. [Сти́хъ: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ.] Ева́нгеліе отъ Іоа́нна, зача́ло [35] отъ полу́. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

[Зри:] Аще случи́тся па́мять свята́го Са́ввы Втора́го, архіепи́скопа Се́рбскаго въ кíй-ли́бо де́нь пе́рвыя седми́цы Вели́каго поста́, или́ въ ку́ю-ли́бо недѣ́лю свята́го Вели́каго поста́, слу́жбу его́ соверша́емъ по глава́мъ хра́ма. Того́же пра́вила подоба́етъ держа́тися и егда́ случи́тся въ недѣ́лю фарисе́еву, блу́днаго, мясопу́стную и пр. Моле́бенъ предъ о́бразомъ [3].

Примѣчанія:
[1] Изъ службы чудотворной Печской иконы Божіей Матери — главной святыни Сербіи. Икона пребываетъ въ Косово, въ женскомъ монастырѣ Печь Патріаршая. Эта обитель съ 1253 года до XVIII вѣка была резиденціей сербскихъ патріарховъ и архіепископовъ, нетлѣнныя мощи которыхъ (въ томъ числѣ и свт. Саввы II Сербскаго) и нынѣ почиваютъ въ этомъ монастырѣ.
[2] Гласъ и ирмосы канона приводятся по «зеленой» Минеи (Мѣсяцъ Февраль, 2002, с. 271-276); во всѣхъ сербскихъ изданіяхъ отсутствуютъ.
[3] Запись на полѣ книги.

Источникъ: Кни́га Се́рблякъ, содержа́щая въ себѣ́ богослуже́бная моле́бная пра́вила святы́мъ се́рбскаго ро́да. — Бѣ́лградъ, 1861. — Л. 180 об. – 186.

/ Къ оглавленію раздѣла /


Наверхъ / Къ титульной страницѣ

0