Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 30.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 7-й де́нь.
Слу́жба [бдѣ́нная] преподо́бному отцу́ на́шему Парѳе́нію, епи́скопу Лампсакíйскому.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 5. Подо́бенъ: Ра́дуйся.

Ра́дуйся, преблаже́нне Парѳе́ніе,* пла́чь неутѣ́шный де́мономъ наведы́й:* лю́діе бо, и́мъ служи́вшіи иногда́,* апо́стольски тобо́ю науче́нніи,* поплева́ша горды́ню и́хъ* и боголѣ́пно просла́виша въ душа́хъ свои́хъ и тѣлесѣ́хъ* еди́наго и́стиннаго Христа́ Бо́га,* подаю́щаго мíрови ве́лію ми́лость.

Ра́дуйся, преподо́бне Парѳе́ніе,* во́лею Христу́ сораспны́йся,* страсте́й умерщвле́ніемъ пострада́вый,* уме́рый всеконе́чно грѣху́,* нетлѣ́нію же и безсме́ртію воскресы́й* и а́нгельски во пло́ти пожи́вый,* мíръ чудесы́ просвѣща́я* и при́сно Го́сподеви моля́ся* дарова́ти мíрови ми́ръ и душа́мъ на́шимъ ве́лію ми́лость.

Сла́ва, гла́съ 1:

Треблаже́ннѣйшій о́тче,* чистоты сокро́вище,* погиба́ющихъ помо́щниче,* да́ждь на́мъ ру́ку по́мощи,* и, грѣхми́ погружа́емыхъ при́сно,* отъ смертоно́сныхъ глуби́нъ возведи́,* и про́чее вре́мя живота́* въ покая́ніи сконча́ти на́мъ помози́* и отъ вѣ́чнаго гнѣ́ва спасти́ся.

И ны́нѣ, пра́здника, гла́съ то́йже:

Дне́сь дре́вле Моисе́ю въ Сина́и зако́нъ пода́вый* зако́ннымъ повину́ется велѣ́ніемъ,* на́съ ра́ди, я́ко Милосе́рдъ, по на́мъ бы́въ.* Ны́нѣ Чи́стый Бо́гъ* я́ко Отроча́ Свя́то,* ложесна́ разве́рзъ Чи́стыя,* Себѣ́ Самому́ я́ко Бо́гъ прино́сится,* зако́нныя кля́твы свобожда́я* и просвѣща́я ду́ши на́ша.

Аще же отда́ніе пра́здника бы́сть уже́, пое́мъ на И ны́нѣ, богоро́диченъ, гла́съ то́йже:

Марíе непоро́чная* и ума́ вся́каго превосходя́щая* честнѣ́йшая колесни́це,* обдержи́ма мя́ мно́гими грѣхми́ и стѣсня́ема,* къ широтѣ́ покая́нія наста́ви мя́* всеси́льнѣйшимъ Твои́мъ предста́тельствомъ,* и́бо мо́жеши, я́ко Ма́ти вся́ Могу́щаго.

На стихо́внѣ стихи́ры, гла́съ 6. Подо́бенъ: Тридне́венъ.

Отче Парѳе́ніе,* по́стничества украше́ніе* и воздержа́нія вѣ́нче,* отъ злы́хъ воздержа́тися* на́мъ, лю́бящимъ тя́* и къ тебѣ́ при́сно притека́ющимъ, да́руй.

Сти́хъ: Свяще́нницы Твои́ облеку́тся въ пра́вду,* и преподо́бніи Твои́ возра́дуются.

Пла́кати ми́ да́руй,* о́тче преподо́бне,* о грѣсѣ́хъ мои́хъ непреста́нно,* мучи́тельства же вра́жія* и ра́бства стра́стнаго* свободи́тися сподо́би.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Па́стырю до́брый,* прожени́ душегу́бныя звѣ́ри,* и́же ду́шу ско́рбную* и лю́тѣ смуща́ему,* восхи́тити тща́тся,* о чудотво́рче!

Сла́ва, гла́съ и подо́бенъ то́йже:

Росо́ю небе́сною,* прохлади́ мое́ тѣ́ло,* воспале́нное лю́тѣ* уязвле́ніемъ зміи́нымъ,* и а́да грѣхо́внаго осла́би жже́ніе.

И ны́нѣ, пра́здника, гла́съ то́йже:

На рука́хъ ста́рческихъ во дне́шній де́нь,* я́ко на колесни́цѣ херуви́мстѣй,* восклони́тися благоизво́ливый, Христе́ Бо́же,* и на́съ, пою́щихъ Тя́,* страсте́й мучи́тельства призыва́емый изба́ви* и спаси́, я́ко Человѣколю́бецъ.

Или́ богоро́диченъ, гла́съ и подо́бенъ то́йже:

Никто́же, притека́яй къ Тебѣ́,* посра́мленъ отъ Тебѣ́ исхо́дитъ,* Пречи́стая Богоро́дице Дѣ́во,* но про́ситъ благода́ти* и пріе́млетъ дарова́ніе* къ поле́зному проше́нію.

Тропа́рь, гла́съ 4:

Пра́вило вѣ́ры и о́бразъ кро́тости,* воздержа́нія учи́теля,* яви́ тя ста́ду твоему́,* я́же веще́й и́стина,* сего́ ра́ди стяжа́лъ еси́ смире́ніемъ высо́кая,* нището́ю бога́тая,* о́тче Парѳе́ніе,* моли́ Христа́ Бо́га* спасти́ся ду́шамъ на́шимъ.

Сла́ва, и ны́нѣ, пра́здника:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.

Или́ богоро́диченъ, во гла́съ тропаря́:

Еже отъ вѣ́ка утае́нное,* и а́нгеломъ несвѣ́домое та́инство:* Тобо́ю, Богоро́дице, су́щимъ на земли́ яви́ся, Бо́гъ* въ несли́тнѣмъ соедине́ніи воплоща́емь,* и кре́стъ во́лею на́съ ра́ди воспріи́мъ,* и́мже воскреси́въ первозда́ннаго,* спасе́ отъ сме́рти ду́ши на́ша.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 6. Аще ли попра́зднство и по́слѣ пра́зднику стихи́ры 3 и свято́му 5, гласъ 1.

Дѣ́вства тезоимени́тый,* Лампсакíйскій свѣти́льникъ,* чудодѣ́йствъ свѣ́тлая денни́ца,* Парѳе́ній вели́кій* всѣ́хъ на́съ созыва́етъ па́мятію свое́ю* торжество́ соверша́ти духо́вное,* воспѣва́ющихъ Спа́са Христа́.

Изъ мла́да во́зраста Бо́га въ себѣ́ нося́,* де́монскія полки́* огне́мъ моли́твъ твои́хъ попали́лъ еси́, преблаже́нне,* напра́вилъ еси́, му́дре,* Лампсакíйское ста́до,* и́бо, тре́бища и́дольская низложи́въ,* обнови́лъ еси́ себе́ Бо́гу.

Проповѣ́дуетъ твое́ чу́до изве́ргшаяся ры́ба,* ожи́вшая недыха́ющая,* пло́дъ непло́дныя ни́вы и виногра́да,* до́ждь дово́льный,* омака́ющихъ обѣща́ніе.* Чуде́сна твоя́ дѣла́, священнодѣ́йственне,* тѣ́мже моли́ спасти́ся на́мъ.

Гла́съ 4. Подо́бенъ: Яко до́бля.

Пе́рстною пло́тію обложе́нъ,* ду́хъ моли́твою воскриля́лъ еси́* и, къ Бо́гу вознося́ся,* го́рнія добро́ты узрѣ́лъ еси́ сла́ву,* отону́дуже на тлѣ́нную мíра сего́ красоту́* и безу́мный мяте́жъ человѣ́ческій* ско́рбно взира́лъ еси́* и, воздыха́я, сле́зы пролива́лъ еси́,* въ небе́сное оте́чество пресели́тися жела́я.

Де́мономъ стра́шная твоя́ моли́тва* вели́чія твоего́ вино́вна бы́сть,* тоя́ бо свѣ́томъ просвѣти́вся,* у́мъ Христо́въ стяжа́лъ еси́* и, еди́ное на потре́бу позна́вый,* я́ко Марíя при ногу́ Іису́сову,* неотторже́нною присѣдѣ́лъ еси́ любо́вію,* неизглаго́ланная та́инства познава́я* о спасе́ніи ду́шъ на́шихъ.

Вели́кую твою́ святы́ню* всѣ́мъ возвѣща́ютъ чудеса́ твоя́:* ка́ко бо можа́ше человѣ́къ грѣ́шникъ,* сицева́я зна́менія сотвори́ти?* Вои́стину свя́тъ еси́, Парѳе́ніе,* и́бо и́мя твое́, я́ко со́лнца луча́,* сквозѣ́ вѣко́въ тму́ блиста́етъ,* се́ бо прославля́етъ Госпо́дь прославля́ющія Его́* предъ человѣ́ки и предъ Отце́мъ Свои́мъ.

Сла́ва, гла́съ 8:

Ему́же всего́ себе́ отъ младе́нства возложи́лъ еси́,* Его́же во умѣ́ твое́мъ при́сно обноси́лъ еси́,* Его́же ра́ди вся́ сла́дкая мíра отри́нулъ еси́,* и́же святы́хъ Святѣ́йшій Іису́съ,* о́гнь паля́щій творя́й слу́ги Своя́,* То́й тебѣ́ пла́мень въ се́рдце вложи́,* те́рніе страсте́й пожига́ющій,* тму́ же неразу́мія просвѣща́ющій* и всѣ́мъ вѣ́рнымъ указу́ющій пу́ть* въ Ца́рство небе́сное.

И ны́нѣ, пра́здника, гла́съ то́йже:

Иже на херуви́мѣхъ носи́мый* и пѣва́емый отъ серафи́мъ,* дне́сь въ Боже́ственное святи́лище по зако́ну приноси́мь,* на ста́рческихъ, я́ко на престо́лѣ, сѣди́тъ рука́хъ* и отъ Іо́сифа пріе́млетъ да́ры боголѣ́пно,* я́ко супру́гъ го́рличищъ,* нескве́рную Це́рковь* и отъ язы́къ новоизбра́нныя лю́ди,* голуби́на же два птенца́,* я́ко Нача́льникъ Ве́тхаго же и Но́ваго.* Еже къ Нему́ обѣща́нія Симео́нъ коне́цъ пріе́мъ,* благословя́ Дѣ́ву Марíю Богоро́дицу,* страсте́й о́бразы, Иже изъ Нея́, провозгласи́* и отъ Него́ проша́ше отпуще́нія, вопія́:* ны́нѣ отпусти́ мя, Влады́ко,* я́коже пре́жде возвѣсти́ ми,* я́ко ви́дѣхъ Тя́, первовѣ́чнаго Свѣ́та* и Спа́са Го́спода христоимени́тымъ лю́демъ.

Или́ богоро́диченъ, гла́съ то́йже:

Ца́рь Небе́сный за человѣколю́біе на земли́ яви́ся* и съ человѣ́ки поживе́,* от Дѣ́вы бо Чи́стыя пло́ть пріе́мый* и изъ Нея́ проше́дый съ воспрія́тіемъ,* еди́нъ е́сть Сы́нъ, сугу́бъ естество́мъ,* но не ѵпоста́сію.* Тѣ́мже, соверше́нна Того́ Бо́га* и соверше́нна Человѣ́ка вои́стинну проповѣ́дающе,* исповѣ́дуемъ Христа́ Бо́га на́шего:* Его́же моли́, Ма́ти Безневѣ́стная,* поми́ловатися душа́мъ на́шимъ.

Та́же вхо́дъ. Проки́менъ дне́ и чте́нія три́ святи́тельская.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́ни чте́ніе. [Глава́ 10.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́ни чте́ніе. [Глава́ 4.]

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На литíи стихи́ры хра́ма, та́же святи́телю, гла́съ 6:

Дне́сь, вѣ́рніи, свяще́нное соверша́имъ торжество́,* па́мять чту́ще Парѳе́нія чу́днаго,* а́нгела бы́вша невеще́ственнымъ житіе́мъ,* апо́стола, я́ко ле́сть и́дольскую упраздни́,* проро́ка же, я́ко бу́дущая прозира́ше,* до́бляго му́ченика,* я́ко вся́ ра́дости мíра сего́ отве́рже,* и пло́ть свою́ умертви́.* Тѣ́мже и со дерзнове́ніемъ мо́лится* дарова́ти мíрови ми́ръ* и душа́мъ на́шимъ ве́лію ми́лость.

Пріиди́те, вси́ вѣ́рніи, дне́сь* воспои́мъ вели́каго Парѳе́нія,* и́же, я́ко о́блакъ свѣ́телъ и росоно́сенъ, на́мъ яви́ся,* пла́мень гнѣ́ва небе́снаго на грѣ́шныя* сѣ́нію свое́ю утиша́ющій,* страсте́й же зно́й охлажда́ющій* излія́ніемъ умиле́нныя моли́твы* и изсо́хшія на́ша сердца́ оживля́ющій,* плоды́ же добродѣ́ланія приноси́ти помога́ющій всѣ́мъ,* съ вѣ́рою и любо́вію притека́ющимъ къ нему́.

Человѣ́ческое естество́* я́ко вои́стину превосше́дый,* воздая́ніе неизглаго́ланное воспрія́лъ еси́,* вся́ бо неду́ги человѣ́ковъ цѣли́ши,* бѣсо́мъ же и и́мя твое́ еди́но губи́тельно бы́сть.* И ны́нѣ а́нгеловъ равностоя́тель яви́лся еси́,* трисвяту́ю Бо́гови пѣ́снь вопія́* и моля́ся о душа́хъ на́шихъ.

Сла́ва, гла́съ 7:

Чистото́ю со́вѣсти твоея́ сія́я,* сме́рти тѣле́сныя не страши́лся еси́,* сего́ ра́ди и свои́хъ си́ всеконе́чно отве́ргся* и апо́стольски во язы́цѣхъ благовѣству́я,* просвѣти́лъ еси́ помраче́нныя человѣ́ки* и Христо́ви приве́лъ еси́ пре́жде діа́вольскую лови́тву.* Оба́че не я́ко госпо́дствуяй, но я́ко служа́й,* во обраще́нныхъ тобо́ю пожи́лъ еси́,* смире́ніемъ и кро́тостію украша́емь;* тѣ́мже и Бо́гъ тебе́ превознесе́* и дарова́ тебѣ́ благода́ть моли́тися за ны́.

И ны́нѣ, пра́здника, гла́съ то́йже:

Украси́ тво́й черто́гъ, Сіо́не,* и подыми́ Царя́ Христа́,* цѣлу́й Марíю, небе́сную Две́рь:* Та́ бо престо́лъ херуви́мскій яви́ся,* Та́ но́ситъ Царя́ сла́вы.* Облакъ свѣ́та е́сть Дѣ́ва,* нося́щи на рука́хъ Сы́на пре́жде денни́цы,* Его́же пріе́мь Симео́нъ на ру́ки своя́, проповѣ́дуя лю́демъ* Влады́ку Сего́ бы́ти живота́ и сме́рти,* и Спа́са мíру.

Или́ богоро́диченъ, гла́съ то́йже:

Подъ кро́въ Тво́й, Влады́чице,* вси́ земноро́дніи притека́юще,* вопіе́мъ Ти́: Богоро́дице, упова́ніе на́ше,* изба́ви ны́ отъ безмѣ́рныхъ прегрѣше́ній* и спаси́ ду́ши на́ша.

На стихо́внѣ стихи́ры, гла́съ 6: Подо́бенъ: Всю́ отложи́вше.

Яко му́дрый строи́тель,* не на песцѣ́ самонадѣ́янія,* но на ка́мени Христо́вы вѣ́ры* до́мъ добродѣ́тели смире́ніемъ созида́лъ еси́,* тѣ́мже ника́яже ско́рбь и тѣснота́,* ниже́ ко́е искуше́ніе и бѣда́* не возмого́ша тебе́ поколеба́ти* и разлучи́ти отъ любве́ Го́спода твоего́,* Ему́же не преста́й моля́ся,* о́тче на́шъ Парѳе́ніе,* спасти́ и просвѣти́ти ду́ши на́ша.

Сти́хъ: Восхва́лятся преподо́бніи во сла́вѣ* и возра́дуются на ло́жахъ свои́хъ.

До́брою земле́ю твоего́ се́рдца* сѣ́мя любве́ Бо́жія воспріи́мь,* отъ пути́ су́етнаго отбѣга́лъ еси́* и въ безмо́лвіи возраща́лъ еси́ да́ръ,* терпѣ́ніемъ ко́рени добродѣ́тели углубля́я въ себѣ́,* вся́ же собла́зны отрѣва́я моли́твою.* Сего́ ра́ди и пло́дъ Боже́ственный прине́слъ еси́,* и́мже насыща́еши гла́дныя ду́ши на́ша.

Сти́хъ: Честна́ предъ Го́сподемъ* сме́рть преподо́бныхъ Его́.

Вся́ пристра́стія мірска́я отря́слъ еси́, о́тче,* ни имѣ́нія когда́ стяжа́въ,* ни сла́достей житія́ вожделѣ́въ,* ни сла́вы су́етныя возлюби́въ.* Тѣ́мже, егда́ тебе́ Госпо́дь возгласи́,* ра́достно преше́лъ еси́ къ Нему́* и въ черто́зѣ Агнчемъ возле́глъ еси́,* я́ко еди́нъ отъ пе́рвенцевъ земли́* и блаже́нный сонаслѣ́дникъ Христо́въ,* Ему́же не преста́й моля́ся,* о́тче Парѳе́ніе чу́дне,* спасти́ и просвѣти́ти ду́ши на́ша.

Сла́ва, гла́съ то́йже:

Ве́ліе вои́стину чу́до зри́мъ:* ка́ко ты́, въ мíрѣ живы́й* и собла́зны отовсю́ду окруже́нъ,* и́ноковъ равноа́нгельныя добродѣ́тели испо́лнилъ еси́* и, проти́ву духо́въ зло́бы безпло́тныхъ* во пло́ти подвиза́вся,* тѣ́хъ крѣ́пость низложи́лъ еси́.* Тѣ́мже и безсме́ртія сла́вою увѣнча́нный* отъ Подвигополо́жника Іису́са,* не преста́й моля́ся Тому́,* о́тче пречу́дне Парѳе́ніе,* о и́же вѣ́рою и любо́вію чту́щихъ тя́.

И ны́нѣ, пра́здника, гла́съ то́йже:

Да отве́рзется две́рь небе́сная дне́сь:* Безнача́льное бо Сло́во Отчее,* нача́ло пріи́мъ подъ лѣ́ты,* не отсту́пль Своего́ Божества́,* отъ Дѣ́вы я́ко Младе́нецъ четыредесятодне́венъ* Ма́терію во́льнѣ прино́сится въ це́рковь зако́нную,* и Сего́ на ру́ки пріе́млетъ ста́рецъ, —* отпусти́, — зовы́й, — раба́, Влады́ко,* и́бо о́чи мои́ ви́дѣста спасе́ніе Твое́.* Прише́дый въ мíръ спасти́ ро́дъ человѣ́чь,* Го́споди, сла́ва Тебѣ́.

Или́ богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На благослове́ніи хлѣ́бовъ: Тропа́рь: Пра́вило вѣ́ры... [пи́санъ на ма́лѣй вече́рни], два́жды. Та́же пра́здника или́ Богоро́дице Дѣ́во...



НА УТРЕНИ,
На Бо́гъ Госпо́дь: Тропа́рь святи́теля, два́жды. Сла́ва, и ны́нѣ, пра́здника или́ Еже отъ вѣ́ка...

По 1-мъ стихосло́віи, сѣда́ленъ, гла́съ 4:

Аще и въ молвѣ́ пребыва́лъ еси́ пло́тію,* я́ко па́стырь многопопечи́тельный,* но отъ Бо́га мы́слію не отлуча́лся еси́,* и То́й отъ тебе́ никогда́же отступи́, о свяще́нне!* Тѣ́мже мо́лимтися, о́тче Парѳе́ніе,* не оста́ви на́съ, немощны́хъ,* но привлецы́ на ны́ ми́лость Іису́сову* и просвѣти́ на́ша смы́слы,* прило́ги стра́стными помраче́нныя. [Два́жды.]

Сла́ва, и ны́нѣ, пра́здника, то́йже:

Младе́нствуеши мене́ ра́ди, Ве́тхій де́ньми,* чище́ніемъ пріобща́ешися, чистѣ́йшій Бо́же,* да пло́ть увѣ́риши мнѣ́,* ю́же отъ Дѣ́вы.* И си́мъ Симео́нъ, поуча́яся,* позна́ Тя, Бо́га, я́вльшагося пло́тію,* и, я́ко Жи́знь, лобза́ше* и, ра́дуяся, ста́рчески взыва́ше:* отпусти́ мене́, Тебе́ бо ви́дѣхъ, Живота́ вся́ческихъ.

Или́ богоро́диченъ, гла́съ то́йже:

Услы́ши, Влады́чице,* отъ болѣ́зненныя души́ вопію́щаго раба́ Твоего́* и мно́гихъ мои́хъ зо́лъ пода́ждь ми́ оставле́ніе,* Тебе́ бо и́мамъ Предста́тельницу въ де́нь и но́щь,* изба́ви, Богоро́дице, отъ огня́ гее́нскаго* и поста́ви мя́ одесну́ю Сы́на Твоего́ и Бо́га.

По 2-мъ стихосло́віи сѣда́ленъ, гла́съ 1:

Погуби́хъ тала́нтъ мо́й, его́же прія́хъ, —* увы́ мнѣ́! — что́ сотворю́?* Гдѣ́ обря́щу другíй?* Ка́ко явлю́ся Влады́цѣ?* Что́ ли отвѣща́ю Ему́?* Къ тебѣ́ у́бо притека́ю, святи́телю,* да бу́деши засту́пникъ мо́й,* съ Богоро́дицею моля́ся Го́сподеви* да́ти ми́ оставле́ніе грѣхо́въ* и ве́лію ми́лость. [Два́жды.]

Сла́ва, и ны́нѣ, пра́здника, то́йже.

Сы́й со Отце́мъ на престо́лѣ святѣ́мъ,* прише́дъ на зе́млю, отъ Дѣ́вы роди́ся* и Младе́нецъ бы́сть, лѣ́ты Сы́й неопи́санъ,* Его́же прíимъ Симео́нъ на ру́ки, ра́дуяся глаго́лаше:* ны́нѣ отпуща́еши, Ще́дре,* возвесели́въ раба́ Твоего́.

Или́ богоро́диченъ, гла́съ то́йже:

Упра́ви, Чи́стая,* окая́нную мою́ ду́шу, и уще́дри ю́,* отъ мно́жества прегрѣше́ній* во глубину́ попо́лзшуюся поги́бели,* Всенепоро́чная,* и въ ча́съ мя́ стра́шный, сме́ртный* Ты́ исхити́ оглаго́лующихъ де́моновъ* и вся́кія му́ки.

По поліеле́и сѣда́ленъ, гла́съ 2:

Очи́ма мои́ма ослѣпи́хся,* и тма́ обдержи́тъ ду́шу мою́,* и недоумѣ́ніемъ лю́тымъ объя́тъ е́смь,* не имы́й же ктому́ жезла́ по́мощи,* о ка́меніе вы́ну претыка́юся,* и но́зѣ мои́ острупи́шася отъ я́звъ,* въ ро́въ же страсте́й впадо́хъ* и, ка́ко изы́ти, не вѣ́мъ.* Помози́ у́бо ми́, о́тче,* изведи́ мя отъ сѣ́ти сея́,* ю́же врази́ соста́виша ми́,* бу́ди же наста́вникъ мо́й,* да си́це сподо́блюся дости́гнути* го́рняго о́наго Іерусали́ма,* Ца́рства небе́снаго. [Два́жды.]

Сла́ва, и ны́нѣ, пра́здника, то́йже:

Дне́сь Симео́нъ ста́рецъ во хра́мъ вхо́дитъ,* ра́дуяся ду́хомъ,* Законода́вца Моисее́ва и Исполни́теля зако́на* на ру́ки воспрія́ти.* Онъ у́бо мра́комъ и гла́сомъ неявле́ннымъ* богови́децъ сподо́бися бы́ти,* покрове́ннымъ лице́мъ* евре́евъ невѣ́рная сердца́ изобличи́,* се́й же первовѣ́чное Сло́во Отчее воплоще́нное понесе́* и язы́комъ откры́ Свѣ́тъ, Кре́стъ и Воскресе́ніе.* И Анна проро́чица показа́ся,* Спа́са Изба́вителя Изра́илю проповѣ́дающи.* Тому́ возопіи́мъ, Христу́ Бо́гу на́шему:* Богоро́дицы ра́ди поми́луй на́съ.

Или́ богоро́диченъ, гла́съ то́йже:

Богоро́дице, не пре́зри мя́,* тре́бующа заступле́нія Твоего́,* на Тя́ бо упова́ душа́ моя́,* поми́луй мя́.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Іоа́нна, зача́ло 35 отъ полу́.

По 50-мъ псалмѣ́ стихи́ра, гла́съ 6:

Дне́сь, вѣ́рніи, свяще́нное соверша́имъ торжество́,* [па́мять чту́ще Парѳе́нія чу́днаго,* а́нгела бы́вша невеще́ственнымъ житіе́мъ,* апо́стола, я́ко ле́сть и́дольскую упраздни́,* проро́ка же, я́ко бу́дущая прозира́ше,* до́бляго му́ченика,* я́ко вся́ ра́дости мíра сего́ отве́рже,* и пло́ть свою́ умертви́.* Тѣ́мже и со дерзнове́ніемъ мо́лится* дарова́ти мíрови ми́ръ* и душа́мъ на́шимъ ве́лію ми́лость].

Пе́рвый кано́нъ по уста́ву: пра́здника или́ Богоро́дицы. Та́же святи́теля два́ кано́на.

Кано́нъ святи́теля, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Уясня́ютъ добродѣ́телей благода́тію дне́сь всѣ́хъ на́съ, въ свѣ́тлое торжество́ му́драго святи́теля, я́коже зарю́, испуща́я свѣтоно́сная чуде́съ сія́нія.

На го́ру безстра́стія, преподо́бне, возне́слъ еси́ у́мъ и, во мра́къ писа́ній вше́дъ, невеще́ственнаго, Парѳе́ніе, свѣ́та, преподо́бне, испо́лненъ яви́лся еси́, сла́вне.

Ору́жіе, я́ко вои́стинну извле́къ, и́же е́сть глаго́лъ Бо́жій, вра́жію уязви́лъ еси́ крѣ́пость, святи́телю Парѳе́ніе, тѣ́мже побѣди́тельная на де́моны ты́ прія́лъ еси́.

Богоро́диченъ: Роди́тель въ раи́ бы́сть за́висть сме́рти человѣ́комъ, его́же, ро́ждься, Дѣ́во, изъ Тебе́ Сы́нъ Бо́жій Оте́чь съ шу́момъ потреби́, безсме́ртіе пода́въ ро́ду на́шему.

Инъ кано́нъ, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Моле́бное тебѣ́ пѣ́ніе предначина́я, смуща́юся, о́тче, ка́ко досто́йно е́сть воспѣва́ти тя́. Оба́че е́же отъ любве́ приноше́ніе мое́ пріими́ и устнѣ́ моя́ отве́рзи, я́ко да возвѣщу́ хвалу́ твою́, Парѳе́ніе святи́телю.

Мо́ре страсте́й ты́ немо́кренно мину́лъ еси́, сла́вне, отъ вра́гъ невреди́вся, и́хже ополче́нія во глубину́ преиспо́днія низве́рглъ еси́, поя́ Го́сподеви, сла́вно бо просла́вися.

Погуби́ супоста́ты, гоня́щія мя́, чудоно́сче, се́ бо настиза́ютъ уже́, и нѣ́сть ми́ избавле́нія, а́ще кто́ не защити́тъ мя́ отъ ни́хъ или́ а́біе не погря́знутъ, я́коже дре́вле еги́птяновъ полцы́.

Богоро́диченъ: Рождество́мъ Твои́мъ ле́сть бѣсо́вскую упраздни́вшая, Многомо́щная Всемогу́щаго Ма́ти, и мене́, враго́мъ прельща́ема, при́сно на бре́гъ спасе́нія возведи́, пою́щаго Го́сподеви, сла́вно бо просла́вися.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Якоже фи́никсъ цвѣтоно́сенъ, добродѣ́тели на земли́, преподо́бне, безсме́ртія плоды́ на небесѣ́хъ скры́лъ еси́.

Хра́мъ тя́ всѣ́хъ Бо́гу живу́щая въ тебѣ́ показа́ благода́ть себѣ́, преподо́бне, ея́же ра́ди просла́вился еси́, Парѳе́ніе.

Пречестны́мъ отъ Бо́га архіере́йства укра́шься, сла́вне, одѣя́ніемъ, священнодѣ́йственникъ досто́инъ Того́ яви́лся еси́ благосты́ни.

Богоро́диченъ: Разруши́ся кля́твы на́шея средогра́діе, Чи́стая Влады́чице, па́че ума́ Рождество́мъ Твои́мъ, и Боже́ственному естеству́ совокупи́хомся.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Обнища́вшее лю́тѣ се́рдце мое́ предста́тельствомъ твои́мъ обогати́, свя́те, и́маши бо вои́стину ве́ліе къ Бо́гу дерзнове́ніе, я́ко Іису́совъ подви́жникъ до́блій, Парѳе́ніе.

Душа́ моя́ изнемо́же въ боре́ніихъ и напа́стехъ и на гно́ищи стра́стнѣмъ ны́нѣ низлежи́тъ, но да возведе́тся отъ а́да преиспо́дняго, си́лою же Бо́жіею да препоя́шется, моли́ся, святи́телю.

Расшири́шася уста́ твоя́ на враги́ ро́да человѣ́ча, моли́твъ бо твои́хъ не терпя́ще, я́ко огне́мъ опаля́еми, стеня́ще, отъ тебе́ бѣжа́ху. Тѣ́мъ и е́же на на́съ неи́стовство и́хъ упраздни́.

Богоро́диченъ: Тебѣ́ Симео́нъ ду́шу ору́жію проити́ глаго́лаше, е́же и сбы́стся при Крестѣ́ Сы́на Твоего́. Ско́рбемъ у́бо на́шимъ спострада́ти могу́щи, я́ко Сама́ тѣ́хъ вкуси́вшая го́речи, услади́ и́хъ на́мъ, Пречи́стая.

Сѣда́ленъ, гла́съ 3. [Подо́бенъ: Боже́ственныя вѣ́ры.]

Испо́лнь Ду́ха Боже́ственнаго сы́й, дѣ́лы просія́ благоче́стія, свяще́нне чудотво́рче Парѳе́ніе, отъ ле́сти человѣ́ки обрати́лъ еси́, боля́щихъ стра́сти исцѣля́я. Отче преподо́бне, Христа́ Бо́га моли́ спасти́ся душа́мъ на́шимъ. [Два́жды.]

Сла́ва, и ны́нѣ, пра́здника, гла́съ то́йже: Подо́бенъ: Свирѣ́лей па́стырскихъ.

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

Или́ богоро́диченъ, гла́съ то́йже:

Ра́бски ны́нѣ притека́ю къ покро́ву Твоему́, Пренепоро́чная, изба́ви мя́, Богороди́тельнице, слія́нія страсте́й, я́ко безстра́стія Вино́внаго ро́ждшая.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Та́инъ неизглаго́ланныхъ насла́ждься Бо́жіихъ, треблаже́нне, науча́яся боже́ственно Того́ сокрове́ннымъ, тѣ́мже и ра́зума рѣ́ки, Парѳе́ніе, источи́лъ еси́.

Ве́сь взе́мся, богоно́се, мы́слію къ небеси́ боже́ственнѣ, сла́ву ви́дѣлъ еси́ мы́сленно неизрече́нную, тѣ́мже и равноа́нгеленъ на земли́ яви́лся еси́, Парѳе́ніе.

Весели́тся со а́нгелы вся́ тва́рь, я́же па́че ума́ зря́щи соверша́ема, о́тче, тобо́ю зна́менія, тѣ́мже и вино́внаго си́мъ воспѣва́етъ, я́ко Бо́га си́льна.

Богоро́диченъ: Яко пресла́вна и неизглаго́ланна, Богоро́дице, но́ваго Твоего́ Рождества́ и́стинно су́ть, Чи́стая, та́инства стра́шна и ужа́сна, въ ни́хже мы́сль и у́мъ побѣжда́ется, Пречи́стая.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

На стра́жи па́стырстѣй стоя́лъ еси́, іера́рше, бо́дрымъ о́комъ ста́до твое́ озира́я, во уны́ніи спя́щихъ возбужда́я, заблужда́ющія возвраща́я, хи́щники же дале́че отгоня́я устраше́ніемъ Боже́ственныхъ глаго́лъ.

О пи́щѣ тѣле́снѣй небре́глъ еси́, Бо́жія любве́ насыща́яся при́сно жела́ніемъ ненасы́тнымъ. — Моя́ бо пи́ща е́сть, — вопія́лъ еси́, досточу́дне, — е́же твори́ти во́лю Го́спода моего́ и дѣ́ло Его́ соверши́ти.

Огра́да ми́ бу́ди отъ вся́каго прило́га и напа́сти сопроти́вныя, да ника́ко лука́ваго снѣ́дію бу́ду, но да же́ртва сотворю́ся Бо́гови прія́тная твои́ми, свя́те, моли́твами.

Богоро́диченъ: Очище́нія не тре́бующая, дне́сь по зако́ну очища́ешися и, Сы́на нося́щи, во хра́мъ вхо́диши. Срѣта́етъ же Тебе́ Симео́нъ, вели́чіе Тебѣ́ возвѣща́я и ско́рбь несказа́нную.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Пома́зался еси́ вои́стинну еле́емъ Ду́ха, Парѳе́ніе, по достоя́нію служи́ти Го́споду, сла́вою тя́ украси́вшему.

Глубину́ испыта́я писа́нія, пресла́вне, многоцѣ́нный би́серъ — Христа́ — избра́въ, Его́же ста́ду разда́лъ еси́.

Яко имѣ́я отъ Бо́га неистощи́му благода́ть, му́дре, пресла́вна источа́еши чуде́са всѣ́мъ, чудотво́рче Парѳе́ніе.

Богоро́диченъ: Да кропи́тъ не́бо весе́ліе и благода́ть на земли́, воздаде́ бо Ей ны́нѣ весе́ліе въ высоту́, Еди́ну Богороди́тельницу.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Но́щь глубока́ грѣхо́внаго помраче́нія на мя́ нападе́, но твои́ми, свѣтоно́сче, моли́твами свѣ́тъ невече́рній да возсія́етъ ми́, стопы́ моя́ на и́стинный пу́ть направля́я.

Стра́ха ра́ди Бо́жія ду́хъ любве́ въ се́рдце твое́ прія́лъ еси́, па́ствѣ твое́й спасе́ніе породи́въ, а́ще же и мно́го болѣ́зновалъ еси́, оба́че сугу́бо и возвесели́ тя всесладча́йшій Іису́съ, Госпо́дь на́шъ.

Ме́ртвыя воскреси́лъ еси́, бѣ́сы изгна́лъ еси́ и вся́ человѣ́ковъ неду́ги цѣли́лъ еси́ въ житіи́ твое́мъ, чудотво́рче, но и ны́нѣ притека́ющихъ къ тебѣ́ спаса́еши отъ вся́каго озлобле́нія.

Богоро́диченъ: Безболѣ́зненно Христа́ Бо́га пло́тію ро́ждшая, но и ма́тернихъ скорбе́й не избѣ́гшая, на́ша, я́же въ совлече́ніи дре́вняго человѣ́ка, болѣ́зни утиши́ и въ но́ваго облещи́ся помози́ на́мъ, Всепѣ́тая.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Труби́тъ вселе́ннѣй все́й, Парѳе́ніе, богоно́сное твое́ житіе́, кра́сныхъ чуде́съ дарова́ніи, пресла́вне, вѣща́ніемъ Ду́ха. [Два́жды.]

Кропи́лъ еси́ сыноположе́нія во́ду ста́ду твоему́, нече́стія скве́рну омыва́я уче́ніи твои́ми, Парѳе́ніе, и просвѣща́я свѣ́томъ благода́ти.

Богоро́диченъ: Ра́зума нетлѣ́ннаго пло́дъ прозябла́ еси́, Богороди́тельнице, мíру, при́сно живы́й Хода́тай нетлѣ́нія явля́емь вѣ́рою и любо́вію чту́щимъ Тя́.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Бе́здну милосе́рдія Бо́жія беззако́ній мои́хъ бе́здною преогорчи́хъ, и покры́ мя́ сѣ́нь сме́ртная, ко Го́споду же воззрѣ́ти отню́дъ не могу́, но моли́твами твои́ми, о́тче, ко исправле́нію житія́ да возведу́ся.

Смуще́ніе по́мыслъ мои́хъ укроти́, святи́телю, тишину́ Боже́ственную, я́же въ се́рдцы твое́мъ почива́ше, и мнѣ́ низводя́ въ ду́шу, пребога́те.

Въ тимѣ́ніе страсте́й преслуша́ніемъ я́коже низверго́хся иногда́, та́ко, лю́тѣ смири́выйся ны́нѣ, на спасе́нія стези́ да возста́влюся, о́тче Парѳе́ніе, предста́тельствомъ твои́мъ.

Богоро́диченъ: Поноше́ніе нападе́ на ду́шу мою́, и жда́хъ соскорбя́щаго, и не бѣ́, и утѣша́ющихъ и не обрѣто́хъ, у́бо къ Тебѣ́ притека́ю, Богома́ти, да всеси́льнымъ покро́вомъ Твои́мъ умири́ши лю́тѣ мя́ обурева́ема, въ приста́нище безстра́стія наставля́ющи.

Конда́къ святи́теля, гла́съ 3: Подо́бенъ: Дѣ́ва дне́сь.

Чуде́съ прія́лъ еси́ Боже́ственную благода́ть, богому́дре свяще́нне Парѳе́ніе, чудотво́рче богоно́се, вся́ вѣ́рныхъ стра́сти очища́я, ду́хи лука́вства, о́тче, изгоня́я, сего́ ра́ди тя́ воспѣва́емъ, я́ко ве́лія таи́нника Бо́жія благода́ти.

Икосъ:

Чистото́ю, я́коже тайнови́децъ и дру́гъ Христо́въ богосло́въ Іоа́ннъ, у́мныя о́чи уясни́въ, зрѣ́лъ еси́, богому́дре Парѳе́ніе, сокрове́нная и та́йная, я́же познава́я, мíра непостоя́нная презрѣ́лъ еси́, ника́коже къ си́мъ прилѣпи́тися восхотѣ́лъ еси́, еще́ же и ча́да твоя́ отъ су́етныхъ отвраща́лъ еси́, лу́чшимъ жела́ніемъ тѣ́хъ разжиза́я, тѣ́мже и по все́й вселе́ннѣй сла́вно бы́сть и́мя твое́, я́ко вели́каго таи́нника Бо́жія благода́ти.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ду́ха въ тебѣ́ все́льшаяся Боже́ственная благода́ть, му́дре, хра́мъ и це́рковь тя́ сла́вы я́ко вои́стинну устро́и, Парѳе́ніе: въ ню́же Оте́цъ, и Сы́нъ, и Са́мъ Утѣ́шитель всели́ся.

Огне́мъ Боже́ственнымъ нече́стія попали́лъ еси́, преподо́бне, всю́ терно́вную ле́сть на земли́ и всѣ́ялъ еси́ ста́ду твоему́ Боже́ственная уче́нія, присноживо́тны плоды́ принося́щая.

Удицею язы́ка изъ глубины́ пре́лести, Парѳе́ніе, дре́вле твое́ ста́до извле́клъ еси́ къ жи́зни; ны́нѣ же, о́тче, моли́твами твои́ми уловля́еши отъ вся́каго ро́да ры́бна благода́тію.

Богоро́диченъ: Ви́дѣша а́нгели, Богороди́тельнице, стра́нно Рождество́мъ Твои́мъ естество́ тлѣ́нное ро́да пе́рстнаго, къ нетлѣ́нному па́ки прите́кшее житію́ и сла́вѣ небе́снѣй.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Послѣ́довалъ еси́ Христо́ви всѣ́мъ се́рдцемъ твои́мъ по всѣ́мъ путе́мъ Его́ ско́рбнымъ и за́повѣди Его́ преступи́ти па́че вся́каго зла́ убоя́лся еси́. Тѣ́мже и яви́ тебѣ́ лице́ Свое́ возлюби́вый Тя́, благослове́нный Бо́гъ оте́цъ на́шихъ.

Въ седмери́цею разже́нной пе́щи искуше́ній неврежде́нъ сохрани́выйся, о́тче Парѳе́ніе, и мене́ изъ пла́мене грѣхо́внаго неопа́льна изми́, да па́ки въ чудесѣ́хъ твои́хъ просла́вится благослове́нный Бо́гъ оте́цъ на́шихъ.

Душе́ю сокруше́нною и се́рдцемъ смире́ннымъ Іису́сови моли́твы принося́ въ житіи́ твое́мъ, до́брѣ услы́шанъ бы́лъ еси́, у́бо и о мнѣ́ ны́нѣ помоли́ся, да уще́дритъ мя́ благослове́нный Бо́гъ оте́цъ на́шихъ.

Богоро́диченъ: Огнь Божества́ во чре́вѣ неопа́льно пріе́мшая, Дѣ́во, и мене́ пріима́ти Сего́ пло́ти и кро́ви сподобля́й при́сно, да стра́сти моя́ попали́тъ благослове́нный Бо́гъ оте́цъ на́шихъ.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Жезло́мъ вѣ́ры, му́дре, е́ллинскія хра́мы разори́лъ еси́ и хра́мы воздви́глъ еси́, преподо́бне, Спа́су и Бо́гу на́шему, въ ни́хже же́ртвы чи́сты прине́слъ еси́, поя́ Ему́: благослови́те, вся́ дѣла́ Госпо́дня, Го́спода.

Заколе́ніе благово́нно са́мъ себе́ прине́слъ еси́, му́дре, воздержа́нія огне́мъ уха́ніе возпосла́лъ еси́ непоро́чно въ Боже́ственный и непристу́пный же́ртвенникъ Бо́жій, поя́, Парѳе́ніе: благослови́те, вся́ дѣла́ Госпо́дня, Го́спода.

Имѣ́я Боже́ственную благода́ть отъ Бо́га, о́тче Парѳе́ніе, источа́еши исцѣле́нія приступа́ющимъ къ тебѣ́, преподо́бне, очища́я неду́ги и отгоня́ крѣ́пко де́моновъ полки́, вино́внаго си́мъ пѣ́ти я́ко Бо́га, науча́я при́сно.

Богоро́диченъ: Иже естество́мъ Непристу́пный вездѣ́, Сы́нъ и Сло́во Бо́жіе, въ Тя́ все́лься, Чи́стая, и одѣ́явся, Пресвята́я, въ на́шъ о́бразъ, я́ко Милосе́рдъ, яви́ся, благопристу́пенъ пло́тію, и поживе́ съ на́ми. Сего́ ра́ди любо́вію Тя́ чту́, и пою́, и хвалю́.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Зла́та и бога́тства не поклони́лся еси́ кумíру, сокро́вище се́рдца твоего́ въ Бо́зѣ полага́я, нестяжа́ніе же возлюби́въ, кро́тостію и нищелю́біемъ преукраси́лся еси́, сла́вне.

Аще и препя́тія вы́ну полага́ше тебѣ́ въ до́брыхъ твои́хъ дѣ́лѣхъ кня́зь тмы́, оба́че ника́коже тебе́ вреди́въ, са́мъ посрамля́емь быва́ше, всезло́бный, и твое́ю, о́тче, моли́твою опаля́емь.

Пу́ть житія́ простра́нный, сла́достію прельща́ющій на́съ, облича́й, му́дре, я́ко лжи́вый и ско́рбь вели́кую нанося́щій душа́мъ, я́ко да ра́достно сотвори́мъ у́зкаго пути́ терно́вное ше́ствіе.

Богоро́диченъ: Две́ре благослове́нная, Еюже спасе́ніе въ мíръ вни́де, Цари́це блага́я, отве́рзи ми́ вхо́ды небе́снаго жи́тельства, преступле́ніемъ заключе́нныя иногда́.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Тимѣ́ніе оттря́съ и́стинно плотски́хъ страсте́й, треблаже́нне, всего́ себе́ къ Боже́ственнѣй пресели́ жи́зни и наслажде́нію невеще́ственному, идѣ́же, лику́я, назира́еши ны́.

Цвѣ́ты мы́сленныя, богоно́сне, я́ко въ наслажде́ніи нетлѣ́нне во святѣ́й твое́й па́мяти, чуде́съ добро́ту пожина́юще, разли́чно исплете́нъ вѣне́цъ, дѣ́йствія обноси́мъ.

Ты́, прете́къ, я́же въ мíрѣ, и съ небе́сными, о богоно́сне, безпло́тными ли́ки лику́я, о́тче Парѳе́ніе, о на́съ моли́ся, творя́щихъ твою́ па́мять вѣ́рно.

Богоро́диченъ: Пою́ Твою́ благода́ть, Дѣ́во, и велича́ю Твою́ сла́ву, Ты́ бо просвѣще́ніе души́ мое́й еси́ вои́стинну и утѣше́ніе, ско́рая по́мощь, и спасе́ніе, и заступле́ніе.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Святи́телей сла́во, о́тче Парѳе́ніе, уче́ньми твои́ми низложи́вый иногда́ злосла́вія вознесе́нную горды́ню, и мои́хъ страсте́й воста́ніе укроти́, смире́ніе ми́ подая́ и се́рдце сокруше́нное.

Поще́ніемъ крѣ́пкимъ и моли́твою ору́жіе, бѣсо́мъ стра́шное, воспрія́лъ еси́, о́тче, ро́дъ бо се́й ничи́мъ же, кромѣ́ си́хъ, побѣжда́ется. Тѣ́мже и мнѣ́ въ добродѣ́телехъ преуспѣва́ти пода́ждь.

Тро́ицы бо́дрый служи́телю и покая́нія проповѣ́дниче, уны́нія моего́ дрема́ніе отжени́ и бо́дрствовати помози́ ми, свя́те Парѳе́ніе, сего́ же прося́, моле́ніе мое́ убо́гое скончава́ю.

Богоро́диченъ: Всеблаже́нная Дѣ́во и но́выя благода́ти свяще́нный киво́те, завѣ́тъ Тво́й и обѣтова́ніе ро́ду христіа́нскому помяни́ и ско́ро помощи́ мнѣ́ потщи́ся, моля́щу Ти ся.

Свѣти́ленъ:

Свѣтоно́сное Іису́сово и́мя, возлю́бленное и вожделѣ́нное тебѣ́ отъ млада́го во́зраста, но́ваго тя́, Моисе́ю подо́бнаго, богови́дца содѣ́ла, во мра́къ та́инственный входя́щаго. Тѣ́мже, Парѳе́ніе небоявле́нне, и мою́ ду́шу, мра́комъ грѣхо́внымъ покрове́нную, озари́ любве́ Іису́совы заре́ю и на безстра́стія го́ру смире́ніемъ возведи́. [Два́жды.]

Сла́ва, и ны́нѣ, пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

Или́ богоро́диченъ:

Свѣтоза́рная Бо́жія пала́то и недоумѣ́нный Свѣтода́вца престо́ле, Мати́ безневѣ́стная, просвѣти́ ны свѣ́томъ добродѣ́тели, да о́бразъ Бо́жій, помраче́нный страстьми́, па́ки сла́вою дре́влею просія́етъ въ на́съ, вѣ́рою и любо́вію Тя́ воспѣва́ющихъ.

На хвали́техъ стихи́ры святи́теля на 4. Аще ли попра́зднство, пое́мъ ему́ 3 стихи́ры и свято́му 3.
Стихи́ры пра́здника, гла́съ 2. Подо́бенъ: До́ме Евфра́ѳовъ.

Нося́щи Чи́стая* и Пречи́cтая Дѣ́ва* Содѣ́теля и Влады́ку,* я́ко Младе́нца на рука́хъ,* въ це́рковь вхо́дитъ.

Пріими́, о Симео́не,* Го́спода сла́вы,* я́коже извѣсти́лся еси́* отъ Ду́ха Свята́го:* се́ бо пріи́де.

Ны́нѣ ви́дѣша,* Благíй Бо́же, о́чи мои́* Твое́ обѣща́ніе:* разрѣши́ мя ско́ро,* раба́ Твоего́, Человѣколю́бче.

Стихи́ры святи́теля, гла́съ 8:

Не уче́ніи то́кмо,* но и дѣ́лы боже́ственными* собира́лъ еси́ ста́до Христо́во,* и́мже лю́ди науча́лъ еси́,* та́яжде са́мъ твори́лъ еси́,* о́бразъ бы́въ добродѣ́тельнаго житія́,* и́го Іису́сово ра́достно нося́,* тѣ́мже ны́нѣ блаже́ннаго поко́я* наслажда́ешися* во Ца́рствіи Бо́жіи. [Два́жды.]

Увяда́ютъ пле́велы и́дольскаго злосла́вія* возсія́вшу со́лнцу Христо́выя про́повѣди,* апо́стольски тобо́ю возглаша́емыя,* кла́сы же благовѣ́рія прозяба́ютъ,* и жа́тва собира́ется въ небе́сную жи́тницу,* ея́ же неизринове́нымъ обрѣсти́ся и на́мъ,* мо́лимъ ти ся, Парѳе́ніе богоблаже́нне.

Не́бо, людски́ми грѣхи́ заключе́нное,* до́ждь оби́льный пролива́етъ,* ни́вы и вся́ сѣ́янія пло́дъ прино́сятъ,* ско́рбніи лю́ди ра́дуются,* Парѳе́ній чу́дный мо́лится,* вси́ же, лику́юще, восхваля́ютъ его́* и чудя́тся таково́й благода́ти,* человѣ́ку дарова́ннѣй отъ Бо́га.

Сла́ва, гла́съ то́йже:

Тро́ицы побо́рниче сла́вный* и держа́вы бѣсо́вскія низложи́телю,* помози́ на́мъ трисвѣ́тлыми добродѣ́тельми украша́тися,* вѣ́рою чи́стою, я́ко свѣти́льникомъ путево́днымъ,* и наде́ждею несумнѣ́нною,* лю́таго отча́янія губи́тельною,* соу́зъ же соверше́нства — святу́ю любо́вь,* я́ко хлѣ́бъ насу́щный, на́мъ пода́ждь,* о Парѳе́ніе, о́тче на́шъ,* тебѣ́ бо даде́ся благода́ть моли́тися за ны́.

И ны́нѣ, пра́здника, гла́съ 2. Подо́бенъ: До́ме Евфра́ѳовъ.

Ра́дуйся, Яже ра́дость* мíру пріе́мшая,* Христа́ Жизнода́вца,* и уста́вльшая печа́ль,* Дѣ́во, прама́терню.

Или́ богоро́диченъ, гла́съ 8:

Влады́чице, пріими́ моли́твы ра́бъ Твои́хъ* и изба́ви на́съ* отъ вся́кія ну́жды и печа́ли.


НА ЛИТУРГІИ,

Блаже́нна отъ кано́на пѣ́сни 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 335. Аллилу́ія, гла́съ 4: Воззва́ша пра́ведніи, и Госпо́дь услы́ша и́хъ, [и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе отъ Луки́, зача́ло 24, или́ отъ Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба съ ака́ѳистомъ преподо́бному отцу́ на́шему Парѳе́нію, епи́скопу Лампсакíйскому, его́же па́мять соверша́ется мѣ́сяца Февруа́рія въ 7-й де́нь. — М.: Сѵнода́льная Тѵпогра́фія, 1913. — Л. 2 – 20 об., 37 – 43.

/ Къ оглавленію раздѣла /


Наверхъ / Къ титульной страницѣ

0