Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 13.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 7-й де́нь.
Преподо́бного отца́ на́шего Парѳе́нія, епи́скопа Лампсакíйскаго, и преподо́бнаго отца́ на́шего Луки́, и́же во Елла́дѣ.

[ВЕЧЕРЪ,]
На Го́споди воззва́хъ: стихи́ры святи́теля 3 и преподо́бнаго 3.
Стихи́ры святи́теля, гла́съ 1. Подо́бенъ: Небе́сныхъ чино́въ.

Изъ мла́да во́зраста Бо́га въ себѣ́ нося́,* де́монскія полки́* огне́мъ моли́твъ твои́хъ попали́лъ еси́, преблаже́нне,* напра́вилъ еси́, му́дре, Лампсакíйское ста́до,* и́бо, тре́бища и́дольская низложи́въ,* обнови́лъ еси́ себе́ Бо́гу.

Проповѣ́дуетъ твое́ чу́до изве́ргшаяся ры́ба,* ожи́вшая недыха́ющая,* пло́дъ непло́дныя ни́вы и виногра́да,* до́ждь дово́льный, омака́ющихъ обѣща́ніе.* Чуде́сна твоя́ дѣла́, священнодѣ́йственне,* тѣ́мже моли́ спасти́ся на́мъ.

Ины стихи́ры преподо́бнаго, гла́съ 6. Подо́бенъ: Всю́ отло́жше.

Ве́сь отъ ю́ности послѣ́довавъ Го́сподеви,* роди́телей оста́вилъ еси́, сла́вне,* пристра́стіе и любо́вь мірску́ю* и въ пусты́няхъ пожи́лъ еси́,* по́стныхъ житіе́ держа́ во смире́ніи,* е́же и сконча́лъ еси́,* горя́ ду́хомъ, преподо́бне,* до́брѣ ку́плю содѣ́лавъ,* расточи́въ твоя́ имѣ́нія ни́щимъ* и би́серъ честны́й купи́въ — Христа́.* Его́же и получи́въ жела́нія,* почи́лъ еси́, достосла́вне.

Терпѣ́лъ еси́, біе́мь,* укоря́емь, о́тче,* ураня́емь отъ роди́телей за Го́спода,* Его́же жела́лъ еси́, сла́вне,* Его́же ра́ди уязви́вся жела́ніемъ,* кра́сная въ ничто́же вмѣни́лъ еси́,* ма́тере же лише́ніе* и стра́нничество возлюби́лъ еси́,* во о́бразъ обле́клся еси́ мона́шескій, свяще́ннѣйше.* Но явля́етъ тя́ Бо́гъ и не хотя́ща,* моли́твамъ ма́тернимъ, Луко́ преподо́бне,* прекло́нься я́ко Человѣколю́бецъ.

Житіе́ сконча́въ твое́ свяще́нное, всесвяще́нне,* чудеса́ соверши́лъ еси́, свяще́нне,* изря́дна и пресла́вна,* и Бо́гу, тебѣ́ пода́вшу зало́гъ Боже́ственъ* и пре́жде воздая́нія боже́ственныхъ трудо́въ твои́хъ,* подае́тъ же и вѣне́цъ нетлѣ́ненъ тебѣ́* и сла́ву вѣ́чнующую,* егда́ я́ко Судія́ пріи́детъ.* Того́ у́бо моли́* изба́витися пою́щимъ тя́ при́сно* отъ вся́каго озлобле́нія,* Луко́ пречу́дне.

Сла́ва, и ны́нѣ, пра́здника, гла́съ то́йже. Самогла́сенъ. Ге́рманово:

На рука́хъ ста́рческихъ во дне́шній де́нь, я́ко на колесни́цѣ херуви́мстѣй, восклони́тися благоизво́ливый, Христе́ Бо́же, и на́съ, пою́щихъ Тя́, страсте́й мучи́тельства призыва́емый изба́ви и спаси́, я́ко Человѣколю́бецъ.

Аще е́сть по́стъ: Сла́ва, и ны́нѣ, богоро́диченъ. Аще ли во вто́рникъ или́ въ четверто́къ ве́чера, крестобогоро́диченъ. [Пи́саны въ 10-й де́нь.]
[Сла́ва, и ны́нѣ, богоро́диченъ, гла́съ 6. Подо́бенъ: Всю́ отло́жше.

Уя́звленнаго мя́* разбо́йническими де́моновъ нахо́ды,* и лежа́ща всего́ недѣ́йственна, Всенепоро́чная,* на пути́ всегда́ нестоя́ннаго житія́,* и ми́лости тре́бующа,* вско́рѣ посѣти́,* вино́ возлія́вши и еле́й* на неисцѣ́льныя ра́ны,* и ко благоздра́вію возведи́,* я́ко да Тя́ сла́влю* и любо́вію по до́лгу воспою́ вели́чія Твоя́,* Чи́стая Еди́на Ма́ти Дѣ́во.

Крестобогоро́диченъ. Подо́бенъ то́йже:

Ору́жіе, я́коже рече́ Симео́нъ,* се́рдце Твое́ про́йде,* Пречи́стая Влады́чице,* егда́ узрѣ́ла еси́ изъ Тебе́ возсія́вшаго* неизрече́ннымъ сло́вомъ,* отъ беззако́нныхъ я́ко осужде́на возноси́ма на Кре́стъ,* о́цетъ и же́лчь вкуша́юща,* въ ре́бра же пробода́ема,* и ру́цѣ и но́зѣ пригвожда́емы,* и, рыда́ющи, восклица́ла еси́, ма́терски вопію́щи:* что́ сіе́, Ча́до сладча́йшее,* но́вое та́инство?]

На стихо́внѣ стихи́ры, гла́съ 6. Подо́бенъ: Тридне́венъ.

Воспріими́, — рече́, — Симео́не, Зижди́теля вся́ческихъ рука́ма. О, ста́рче, подыми́ Христа́, Его́же Дѣ́ва Отрокови́ца роди́ безъ сѣ́мене на ра́дость ро́ду на́шему.

Сти́хъ: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ.

Зако́ну Творца́ и Бо́га, Его́же трепе́щутъ а́нгельская мно́жества, соше́дшеся, воспои́мъ, лю́діе, Еди́наго Благодѣ́теля и зако́на Законода́теля во спасе́ніе ду́шъ на́шихъ.

Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля.

Ны́нѣ отпуща́еши, Влады́ко, раба́ Твоего́, я́коже ре́клъ еси́, съ ми́ромъ, я́ко ви́дѣхъ Тя́, Христе́, Свѣ́та Первовѣ́чнаго, соу́зъ мя́ плотски́хъ, во открове́ніе язы́ковъ и Изра́илю.

Сла́ва, и ны́нѣ, гла́съ 6. Іоа́нна мона́ха:

Да отве́рзется две́рь небе́сная дне́сь: Безнача́льное бо Сло́во Отчее, нача́ло пріи́мъ подъ лѣ́ты, не отсту́пль Своего́ Божества́, отъ Дѣ́вы я́ко Младе́нецъ четыредесятодне́венъ Ма́терію во́льнѣ прино́сится въ це́рковь зако́нную, и Сего́ на ру́ки пріе́млетъ ста́рецъ, — отпусти́, — зовы́й, — раба́, Влады́ко, и́бо о́чи мои́ ви́дѣста спасе́ніе Твое́. Прише́дый въ мíръ спасти́ ро́дъ человѣ́чь, Го́споди, сла́ва Тебѣ́.

Тропа́рь святы́хъ, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.

Сла́ва, и ны́нѣ, пра́здника, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, святы́хъ. И ны́нѣ, пра́здника.

По 1-й стихоло́гіи сѣда́ленъ, гла́съ 4. Подо́бенъ: Удиви́ся Іо́сифъ.

Младе́нствуеши мене́ ра́ди, Ве́тхій де́ньми, чище́ніемъ пріобща́ешися, чистѣ́йшій Бо́же, да пло́ть увѣ́риши мнѣ́, ю́же отъ Дѣ́вы. И си́мъ Симео́нъ, поуча́яся, позна́ Тя, Бо́га, я́вльшагося пло́тію, и, я́ко Жи́знь, лобза́ше и, ра́дуяся, ста́рчески взыва́ше: отпусти́ мене́, Тебе́ бо ви́дѣхъ, Живота́ вся́ческихъ.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Сы́й со Отце́мъ на престо́лѣ святѣ́мъ, прише́дъ на зе́млю, отъ Дѣ́вы роди́ся и Младе́нецъ бы́сть, лѣ́ты Сы́й неопи́санъ, Его́же прíимъ Симео́нъ на ру́ки, ра́дуяся глаго́лаше: ны́нѣ отпуща́еши, Ще́дре, возвесели́въ раба́ Твоего́.

Сла́ва, и ны́нѣ, то́йже.

Кано́нъ пра́здника, со ирмосо́мъ на 6, и святы́хъ на 8.

Кано́нъ пра́здника, гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Кано́нъ святи́теля, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Уясня́ютъ добродѣ́телей благода́тію дне́сь всѣ́хъ на́съ, въ свѣ́тлое торжество́ му́драго святи́теля, я́коже зарю́, испуща́я свѣтоно́сная чуде́съ сія́нія.

На го́ру безстра́стія, преподо́бне, возне́слъ еси́ у́мъ и, во мра́къ писа́ній вше́дъ, невеще́ственнаго, Парѳе́ніе, свѣ́та, преподо́бне, испо́лненъ яви́лся еси́, сла́вне.

Ору́жіе, я́ко вои́стинну извле́къ, и́же е́сть глаго́лъ Бо́жій, вра́жію уязви́лъ еси́ крѣ́пость, святи́телю Парѳе́ніе, тѣ́мже побѣди́тельная на де́моны ты́ прія́лъ еси́.

Богоро́диченъ: Роди́тель въ раи́ бы́сть за́висть сме́рти человѣ́комъ, его́же, ро́ждься, Дѣ́во, изъ Тебе́ Сы́нъ Бо́жій Оте́чь съ шу́момъ потреби́, безсме́ртіе пода́въ ро́ду на́шему.

Инъ кано́нъ преподо́бнаго, гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Сло́во ми́ да́ждь, богови́дче, предстоя́ престо́лу Влады́ки твоего́, воспѣ́ти свѣ́тлое и свѣтоно́сное житіе́ твое́, Луко́, разори́въ мглу́ ума́ моего́.

Всекрѣ́пко тя́ возлюби́въ, свяще́нный, Спа́се, къ по́стничеству приступи́ твѣ́рдо, ско́рби, и труды́, и болѣ́зни терпя́, и́миже обрѣ́те сла́дость неконча́ему.

Утружда́я тѣ́ло, о́тче Луко́, воздержа́ніемъ всегда́, бдѣ́ніемъ ча́стымъ и озлобле́ніемъ вся́цѣмъ, му́дре, стремле́нія страсте́й лю́тыхъ уста́вилъ еси́.

Богоро́диченъ: Господороди́тельнице Дѣ́во, Яже Бо́га пло́тію ро́ждши, неразлу́чнаго Отцу́, воплоще́нна за милосе́рдіе земны́хъ, томле́нія мя́ страсте́й покажи́ превы́шша.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Якоже фи́никсъ цвѣтоно́сенъ, добродѣ́тели на земли́, преподо́бне, безсме́ртія плоды́ на небесѣ́хъ скры́лъ еси́.

Хра́мъ тя́ всѣ́хъ Бо́гу живу́щая въ тебѣ́ показа́ благода́ть себѣ́, преподо́бне, ея́же ра́ди просла́вился еси́, Парѳе́ніе.

Пречестны́мъ отъ Бо́га архіере́йства укра́шься, сла́вне, одѣя́ніемъ, священнодѣ́йственникъ досто́инъ Того́ яви́лся еси́ благосты́ни.

Богоро́диченъ: Разруши́ся кля́твы на́шея средогра́діе, Чи́стая Влады́чице, па́че ума́ Рождество́мъ Твои́мъ, и Боже́ственному естеству́ совокупи́хомся.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Воскрили́вся те́плымъ раче́ніемъ Спа́са, роди́телей любо́вь презрѣ́лъ еси́, Его́же ра́ди и бы́лъ еси́, о Луко́, стра́ненъ всѣ́хъ сла́дкихъ, блаже́нне.

Хра́мъ Госпо́день себе́ содѣ́лати хотя́, въ пусты́няхъ всели́лся еси́, я́коже дре́вле Илія́, съ де́моны боря́ся, тѣ́мже обрѣ́лъ еси́ кончи́ну блаже́нную.

Вся́кой Боже́ственнѣй за́повѣди, я́коже благопокори́въ ра́бъ, яви́лся еси́, всеблаже́нне, до́брѣ сія́ соверша́я и смиря́я себе́: тѣ́мже высоту́ прія́лъ еси́ небе́сную.

Богоро́диченъ: Дѣ́во Ма́ти Бо́жія, ро́ждшая Сло́во па́че сло́ва, я́вльшееся на́съ ра́ди, моли́ прилѣ́жно безслове́сія вся́каго мя́ изба́вити.

Конда́къ Парѳе́нія, гла́съ 3: Подо́бенъ: Дѣ́ва дне́сь.

Чуде́съ прія́лъ еси́ Боже́ственную благода́ть, богому́дре свяще́нне Парѳе́ніе, чудотво́рче богоно́се, вся́ вѣ́рныхъ стра́сти очища́я, ду́хи лука́вства, о́тче, изгоня́я, сего́ ра́ди тя́ воспѣва́емъ, я́ко ве́лія таи́нника Бо́жія благода́ти.

Сѣда́ленъ, гла́съ 3. Подо́бенъ: Боже́ственныя вѣ́ры.

Испо́лнь Ду́ха Боже́ственнаго сы́й, дѣ́лы просія́ благоче́стія, свяще́нне чудотво́рче Парѳе́ніе, отъ ле́сти человѣ́ки обрати́лъ еси́, боля́щихъ стра́сти исцѣля́я. Отче преподо́бне, Христа́ Бо́га моли́ спасти́ся душа́мъ на́шимъ.

Сла́ва, сѣда́ленъ преподо́бнаго, гла́съ 8. Подо́бенъ: Прему́дрости.

Отъ младе́нства возлюби́въ добродѣ́тель, сла́дкихъ всѣ́хъ оша́ялся еси́, му́дре, поще́ніе и воздержа́ніе извѣ́стно показу́я, и, ма́терне жела́ніе ни вочто́же вмѣни́въ, стра́нничеству себе́ та́й вда́лъ еси́. Па́ки же возвѣща́етъ тя́ Бо́гъ ма́тери твое́й, рыда́ющей лише́нія твоего́ пра́ведно всеизря́днѣйше. Съ не́юже ны́нѣ живы́й моли́ Христа́ Бо́га прегрѣше́ній оставле́ніе пода́ти пра́зднующимъ любо́вію святу́ю па́мять твою́.

И ны́нѣ, пра́здника, гла́съ то́йже: Подо́бенъ: Свирѣ́лей па́стырскихъ.

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

Аще е́сть по́стъ: Сла́ва, и ны́нѣ, богоро́диченъ. Аще среда́ или́ пято́къ, крестобогоро́диченъ. [Пи́саны сего́ мѣ́сяца въ 11-й де́нь.]
[Сла́ва, и ны́нѣ, богоро́диченъ, гла́съ 8:

Со́лнца о́блаче разу́мнаго, Боже́ственнаго Свѣ́та свѣти́льниче златокова́нный, нескве́рная, небла́зная, всенепоро́чная Влады́чице, омраче́нную ду́шу мою́ ослѣпле́ніемъ страсте́й безстра́стія заре́ю просвѣти́, молю́ся, и оскверне́нное ми́ се́рдце омы́й пото́ки умиле́нія, покая́нія же слеза́ми, и отъ тимѣ́нія мя́ очи́сти дѣ́лъ мои́хъ, да любо́вію зову́ Ти: Богоро́дице Приснодѣ́во, моли́ Христа́ Бо́га прегрѣше́ній оставле́ніе пода́ти ми́: Тебе́ бо имѣ́ю наде́жду, ра́бъ Тво́й.

Крестобогоро́диченъ:

Агнца и Па́стыря, и Изба́вителя, Агница зря́щи на Крестѣ́, восклица́ше, пла́чущи, и го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе, вѣ́рою пою́щимъ боже́ственныя Стра́сти Твоя́.]

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Та́инъ неизглаго́ланныхъ насла́ждься Бо́жіихъ, треблаже́нне, науча́яся боже́ственно Того́ сокрове́ннымъ, тѣ́мже и ра́зума рѣ́ки, Парѳе́ніе, источи́лъ еси́.

Ве́сь взе́мся, богоно́се, мы́слію къ небеси́ боже́ственнѣ, сла́ву ви́дѣлъ еси́ мы́сленно неизрече́нную, тѣ́мже и равноа́нгеленъ на земли́ яви́лся еси́, Парѳе́ніе.

Весели́тся со а́нгелы вся́ тва́рь, я́же па́че ума́ зря́щи соверша́ема, о́тче, тобо́ю зна́менія, тѣ́мже и вино́внаго си́мъ воспѣва́етъ, я́ко Бо́га си́льна.

Богоро́диченъ: Яко пресла́вна и неизглаго́ланна, Богоро́дице, но́ваго Твоего́ Рождества́ и́стинно су́ть, Чи́стая, та́инства стра́шна и ужа́сна, въ ни́хже мы́сль и у́мъ побѣжда́ется, Пречи́стая.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Незло́бивъ, преподо́бенъ, пра́веденъ, и кро́токъ, и цѣ́лъ яви́лся еси́, о́тче Луко́, тѣ́мже ублажи́лся еси́ отъ всѣ́хъ Творца́ и Влады́ки, всеблаже́нне.

Ви́дѣвъ зави́дяй тя́ до́брѣ проходя́ща житіе́, разжже́ся и напа́стей мно́жество тебѣ́ воздви́же, но изобличи́ся то́щъ во́лкъ, всу́е сло́вомъ зи́нувъ.

Ума́ пра́востію житіе́ упра́вилъ еси́ къ лу́чшимъ, всеблаже́нне, жела́ній всѣ́хъ кра́йнѣйшее жела́я, о́тче, ви́дѣти, е́же благополу́чно и получи́лъ еси́.

Богоро́диченъ: Красну́ добро́тою Тя́ па́че всѣ́хъ обрѣ́тъ же́нъ, Кра́сный, Дѣ́во Чи́стая, въ Твою́ утро́бу всели́ся и злообра́зія мя́ страсте́й и тмы́ изба́ви.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Пома́зался еси́ вои́стинну еле́емъ Ду́ха, Парѳе́ніе, по достоя́нію служи́ти Го́споду, сла́вою тя́ украси́вшему.

Глубину́ испыта́я писа́нія, пресла́вне, многоцѣ́нный би́серъ — Христа́ — избра́въ, Его́же ста́ду разда́лъ еси́.

Яко имѣ́я отъ Бо́га неистощи́му благода́ть, му́дре, пресла́вна источа́еши чуде́са всѣ́мъ, чудотво́рче Парѳе́ніе.

Богоро́диченъ: Да кропи́тъ не́бо весе́ліе и благода́ть на земли́, воздаде́ бо Ей ны́нѣ весе́ліе въ высоту́, Еди́ну Богороди́тельницу.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Трудо́въ твои́хъ воздая́ніе отъ Богатода́вца воспріе́мъ, о́тче преподо́бне, пучи́на чуде́съ всѣ́мъ яви́лся еси́, неду́ги отгоня́я приступа́ющимъ къ тебѣ́.

Не поколеба́лся еси́, о́тче, врага́ премно́гими прило́ги, не ужаса́лся еси́ возвыше́нія его́, ста́лъ же еси́, я́ко сто́лпъ тве́рдъ, непоколе́бленъ, во смире́ніе, я́ко во броня́, одѣ́явся.

До́брѣ соверши́въ свяще́нное житіе́ твое́, всеблаже́нне, и пріе́мъ отъ Бо́га Вседержи́теля благода́ть исцѣле́ній, слѣпы́я просвѣти́лъ еси́, хромы́я и разсла́бленныя здра́вы содѣва́я.

Богоро́диченъ: Лю́діе, по́йте, Юже вои́стинну ро́ждшую Сло́во Бо́жіе несказа́нно и пребы́вшую па́ки по рождествѣ́ Дѣ́ву нетлѣ́нну, я́ко всѣ́мъ предста́тельство и спасе́ніе на́ше.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Тру́битъ вселе́ннѣй все́й, Парѳе́ніе, богоно́сное твое́ житіе́, кра́сныхъ чуде́съ дарова́ніи, пресла́вне, вѣща́ніемъ Ду́ха.

Кропи́лъ еси́ сыноположе́нія во́ду ста́ду твоему́, нече́стія скве́рну омыва́я уче́ніи твои́ми, Парѳе́ніе, и просвѣща́я свѣ́томъ благода́ти.

Богоро́диченъ: Ра́зума нетлѣ́ннаго пло́дъ прозябла́ еси́, Богороди́тельнице, мíру, при́сно живы́й Хода́тай нетлѣ́нія явля́емь вѣ́рою и любо́вію чту́щимъ Тя́.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Разори́ся дре́вняя твоя́, льстивому́дре, я́же на ны́, крѣ́пость, и безъ вѣ́сти бы́ша мно́гая твоя́ кова́рства, лука́вне: се́ бо про́стъ и незло́бивъ ю́ноша тя́ низложи́.

Не да́лъ еси́, преподо́бне, твои́ма очи́ма дрема́нія, ни вѣ́ждома поко́я, до́ндеже всю́ низложи́лъ еси́ хи́трость лестца́, разли́чныя тебѣ́ напа́сти на вся́къ де́нь воздвиза́ющаго.

Цѣлому́дренно соверши́лъ еси́ твое́ житіе́ и до́брѣ стра́нныя пріе́мля всегда́, ми́луя же бога́тно и дово́льно, тѣ́мже и получи́лъ еси́ нетлѣ́нную сла́ву и наслажде́ніе.

Богоро́диченъ: Отъ Тро́ицы родила́ еси́ Ты́ Еди́наго пло́тски, Богороди́тельнице Пречи́стая, па́че ума́ же и сло́ва. Тѣ́мже вопію́: Тро́ицы Боже́ственныя мя́ моли́твами Твои́ми покажи́ жили́ще.

Конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Ду́ха въ тебѣ́ все́льшаяся Боже́ственная благода́ть, му́дре, хра́мъ и це́рковь тя́ сла́вы я́ко вои́стинну устро́и, Парѳе́ніе: въ ню́же Оте́цъ, и Сы́нъ, и Са́мъ Утѣ́шитель всели́ся.

Огне́мъ Боже́ственнымъ нече́стія попали́лъ еси́, преподо́бне, всю́ терно́вную ле́сть на земли́ и всѣ́ялъ еси́ ста́ду твоему́ Боже́ственная уче́нія, присноживо́тны плоды́ принося́щая.

Удицею язы́ка изъ глубины́ пре́лести, Парѳе́ніе, дре́вле твое́ ста́до извле́клъ еси́ къ жи́зни; ны́нѣ же, о́тче, моли́твами твои́ми уловля́еши отъ вся́каго ро́да ры́бна благода́тію.

Богоро́диченъ: Ви́дѣша а́нгели, Богороди́тельнице, стра́нно Рождество́мъ Твои́мъ естество́ тлѣ́нное ро́да пе́рстнаго, къ нетлѣ́нному па́ки прите́кшее житію́ и сла́вѣ небе́снѣй.

Инъ.

Ирмо́съ: Отроцы въ Вавило́нѣ пе́щнаго пла́мене не убоя́шася, но, посредѣ́ пла́мене вве́ржени, ороша́еми, поя́ху: благослове́нъ еси́, Го́споди, Бо́же оте́цъ на́шихъ.

Ра́ка твои́хъ моще́й, Луко́, исто́чникъ показа́ся исцѣле́ній, къ не́йже вся́къ притека́я, избавля́ется вся́ческихъ страсте́й, тя́ блажа́, преподо́бне, и поя́ Влады́ку твоего́.

Зна́меніи велича́йшими, о́тче, просла́ви тя́ Госпо́дь, Его́же просла́вилъ еси́ ты́ болѣ́зньми воздержа́нія пе́рвѣе, — благослове́нъ бо, — взыва́лъ еси́, — Бо́гъ оте́цъ на́шихъ.

Въ житіи́ пресвѣ́телъ, и въ чудесѣ́хъ велича́йшъ, и во всѣ́хъ до́брыхъ яви́лся еси́ непрело́женъ, преподо́бне, тѣ́мже трудо́въ обрѣ́лъ еси́ воздая́ніе — Ца́рствіе Бо́жіе.

Богоро́диченъ: Лю́ди и гра́дъ Тво́й спаса́й, Богороди́тельнице Всенепоро́чная, предста́тельство на́ше, вѣ́рою несомнѣ́нною вопію́щихъ Ти́: благослове́нъ, Всечи́стая, Пло́дъ чре́ва Твоего́.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Жезло́мъ вѣ́ры, му́дре, е́ллинскія хра́мы разори́лъ еси́ и хра́мы воздви́глъ еси́, преподо́бне, Спа́су и Бо́гу на́шему, въ ни́хже же́ртвы чи́сты прине́слъ еси́, поя́ Ему́: благослови́те, вся́ дѣла́ Госпо́дня, Го́спода.

Заколе́ніе благово́нно са́мъ себе́ прине́слъ еси́, му́дре, воздержа́нія огне́мъ уха́ніе возпосла́лъ еси́ непоро́чно въ Боже́ственный и непристу́пный же́ртвенникъ Бо́жій, поя́, Парѳе́ніе: благослови́те, вся́ дѣла́ Госпо́дня, Го́спода.

Имѣ́я Боже́ственную благода́ть отъ Бо́га, о́тче Парѳе́ніе, источа́еши исцѣле́нія приступа́ющимъ къ тебѣ́, преподо́бне, очища́я неду́ги и отгоня́ крѣ́пко де́моновъ полки́, вино́внаго си́мъ пѣ́ти я́ко Бо́га, науча́я при́сно.

Богоро́диченъ: Иже естество́мъ Непристу́пный вездѣ́, Сы́нъ и Сло́во Бо́жіе, въ Тя́ все́лься, Чи́стая, и одѣ́явся, Пресвята́я, въ на́шъ о́бразъ, я́ко Милосе́рдъ, яви́ся, благопристу́пенъ пло́тію, и поживе́ съ на́ми. Сего́ ра́ди любо́вію Тя́ чту́, и пою́, и хвалю́.

Инъ.

Ирмо́съ: За зако́ны оте́ческія блаже́нніи въ Вавило́нѣ ю́ноши, предбѣ́дствующе, царю́ющаго оплева́ша повелѣ́ніе безу́мное, и совоку́плени, и́мже, не свари́шася огне́мъ, Держа́вствующему досто́йную воспѣва́ху пѣ́снь: Го́спода по́йте, дѣла́, и превозноси́те во вся́ вѣ́ки.

Вре́дъ вся́кій стра́сти, преподо́бне, отгоня́еши, о́тче Луко́ блаже́нне, прокаже́нныя очища́я, укрѣпля́я немощны́я и сля́ченныя, разрѣша́я содержи́мыя у́зы и хромы́я вку́пѣ и слѣпы́я исцѣля́я, — Го́спода по́йте, — зовы́й, — и превозноси́те во вся́ вѣ́ки.

Неболѣ́зненну обрѣ́лъ еси́ сла́ву, преподо́бне, болѣ́зни мно́ги подъе́мъ и по́двиги, бдѣ́ніе и изможде́ніе тѣлесе́, поще́ніе, и озлобле́ніе, и низулега́ніе, и вся́ко и́но друче́ніе пло́ти любве́ ра́ди Содѣ́теля Твоего́, съ Ни́мже ны́нѣ живы́й весели́шися. Того́ у́бо моли́ спасти́ся всѣ́мъ, вѣ́рою и любо́вію тя́ велича́ющимъ.

Разли́чныхъ ра́ди болѣ́зней, преподо́бне, и добродѣ́телей вше́лъ еси́ въ небе́сное Ца́рство, веселя́ся ны́нѣ вѣ́чно, и Влады́ки всегда́ наслажда́яся добро́тами, со а́нгелы пѣ́ніе трисвято́е пое́ши: Го́спода по́йте, дѣла́, и превозноси́те во вся́ вѣ́ки.

Богоро́диченъ: Не отсту́пльша Неразлу́чнаго отъ Оте́ческаго нѣ́дра, Чи́стая, родила́ еси́ неискусому́жно, несказа́нно же Человѣ́ка соверше́нна су́ща. Его́же моли́ да́ти ми́ крѣ́пость лука́выхъ помышле́ній прило́гъ вся́кій низложи́ти до конца́ и во́лю Боже́ственную Того́ дѣ́лати всегда́, да Тя́ велича́ю.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Тимѣ́ніе оттря́съ и́стинно плотски́хъ страсте́й, треблаже́нне, всего́ себе́ къ Боже́ственнѣй пресели́ жи́зни и наслажде́нію невеще́ственному, идѣ́же, лику́я, назира́еши ны́.

Цвѣ́ты мы́сленныя, богоно́сне, я́ко въ наслажде́ніи нетлѣ́нне во святѣ́й твое́й па́мяти, чуде́съ добро́ту пожина́юще, разли́чно исплете́нъ вѣне́цъ, дѣ́йствія обноси́мъ.

Ты́, прете́къ, я́же въ мíрѣ, и съ небе́сными, о богоно́сне, безпло́тными ли́ки лику́я, о́тче Парѳе́ніе, о на́съ моли́ся, творя́щихъ твою́ па́мять вѣ́рно.

Богоро́диченъ: Пою́ Твою́ благода́ть, Дѣ́во, и велича́ю Твою́ сла́ву, Ты́ бо просвѣще́ніе души́ мое́й еси́ вои́стинну и утѣше́ніе, ско́рая по́мощь, и спасе́ніе, и заступле́ніе.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Твоя́ болѣ́зни, о́тче, и по́двиги кто́ изрещи́ возмо́жетъ зе́мленъ? и́хже ра́ди досто́йну мзду́ воспрія́лъ еси́ отъ Бо́га, бы́лъ бо еси́ прія́телище Боже́ственнаго Ду́ха, преподо́бенъ, пра́въ, и́стиненъ, пра́веденъ и непоро́ченъ.

Во оби́телехъ о́ныхъ я́ко водворя́яся жела́нныхъ и добро́тъ Боже́ственныхъ насыща́яся, рая́ же Боже́ственнаго цвѣто́въ ны́нѣ наслажда́яся въ сы́тость и ра́дуяся, па́мять къ Бо́гу о на́съ сотвори́, всеблаже́нне.

Тро́иченъ: Еди́но Естество́ Тріѵпоста́сное, трисія́нное Существо́ и неразлу́чная Си́ло, Отче, Сы́не и Святы́й Ду́ше, Еди́но Божество́, спаса́й вѣ́рою Тя́ Еди́наго велича́ющія, Бо́га въ Тріе́хъ Ли́цѣхъ.

Богоро́диченъ: Разумѣ́ти не мо́жетъ Твоего́ та́инства зе́мленъ у́мъ, Дѣ́во Богоро́дице Всепѣ́тая, пре́жде бо Рождества́ безму́жно зачала́ еси́, пребыла́ же еси́ Дѣ́ва и по Рождествѣ́, родила́ же еси́ Сло́во, Отцу́ Соприсносу́щное.

Свѣти́ленъ пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

Сла́ва, и ны́нѣ, то́йже.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Нося́щи Чи́стая* и Пречи́cтая Дѣ́ва* Содѣ́теля и Влады́ку,* я́ко Младе́нца на рука́хъ,* въ це́рковь вхо́дитъ.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Пріими́, о Симео́не,* Го́спода сла́вы,* я́коже извѣсти́лся еси́* отъ Ду́ха Свята́го:* се́ бо пріи́де.

Сти́хъ: Свѣ́тъ во открове́ніе язы́ковъ,* и сла́ву люде́й Твои́хъ Изра́иля.

Ны́нѣ ви́дѣша,* Благíй Бо́же, о́чи мои́* Твое́ обѣща́ніе:* разрѣши́ мя ско́ро,* раба́ Твоего́, Человѣколю́бче.

Сла́ва, и ны́нѣ, гла́съ и подо́бенъ то́йже:

Ра́дуйся, Яже ра́дость* мíру пріе́мшая,* Христа́ Жизнода́вца,* и уста́вльшая печа́ль,* Дѣ́во, прама́терню.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 67 об. – 76 об.

/ Къ оглавленію раздѣла /


Наверхъ / Къ титульной страницѣ

0