Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 6-й де́нь.
Слу́жба Пресвятѣ́й Богоро́дицѣ, ико́ны ра́ди Ея́ Еле́цкія, я́же во Ха́рьковѣ гра́дѣ.

[НА ВЕЛИЦѢЙ ВЕЧЕРНИ,]
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры пра́здника 3, и Богоро́дицы на 5, гла́съ 2:

Вои́стину блаже́ни су́ть изгна́нніи пра́вды ра́ди: та́ко бо Моисе́й уго́денъ Бо́гу въ земли́ изгна́нія своего́ яви́ся, ему́ же бы́въ подража́тель Анто́ній преподо́бный, отъ кня́зя непра́ведно гони́мый, и́же, къ предѣ́ломъ Черни́говскимъ прише́дъ, видѣ́нія Богоро́дицы въ о́гненнѣй купинѣ́ сподо́бися, и сіе́ на дщи́цѣ написа́ти повелѣ́въ, на́ше упова́ніе на Ма́терь Бо́жію умножа́етъ и науча́етъ отъ Тоя́ проси́ти мíрови ми́ра и душа́мъ на́шимъ ве́лія ми́лости.

Вѣ́мы, о Влады́чице Преблага́я, я́ко рабо́мъ Бо́жіимъ Помо́щница неуста́нная явля́ешися и тѣ́мъ ре́вность и́хъ о Бо́зѣ укрѣпля́еши, оба́че и на́съ, таковы́я ре́вности не иму́щихъ, и то́чію грѣха́ми богатѣ́ющихъ, не отри́ни отъ Твоего́ заступле́нія, но покая́ніе на́ше пріими́ и, сіе́ къ престо́лу Сы́на Твоего́ возне́сши, сердца́ на́ша утѣше́нія испо́лни, и ниспосли́ душа́мъ на́шимъ ми́ръ и ве́лію ми́лость.

Пріиди́те, христоимени́тіи лю́діе, чудотво́рному о́бразу Бо́жія Ма́тери поклони́мся и видѣ́ніемъ Ея́ умили́мся: ка́ко, во огни́ неврежде́нно пребыва́ющи, Огнь Божества́ на руку́ Свое́ю но́ситъ. Блаже́ни о́чи, ви́дѣвшія сіе́ чу́до, блаже́ни есмы́ и мы́, о се́мъ преда́ніе вѣ́рное пріи́мше. О, Влады́чице, не оста́ви ро́дъ на́шъ и Твое́ предста́тельство всегда́ явля́й на́мъ, подаю́щи душа́мъ на́шимъ ми́ръ и ве́лію ми́лость.

Сла́ва, гла́съ 8:

Огнь купины́ Моисе́овы неизсуши́вый, ниже́ о́троки въ пещи́ Вавило́нстѣй опали́вый, а́ще и преди́вное яви́ся чу́до, но па́че сего́ Огнь Божества́, въ Тя́ всели́выйся и утро́бы Твоея́ не опали́вый, ужа́сное открыва́етъ лю́демъ та́инство. О, ка́ко Невмѣсти́маго небесы́ понесла́ еси́? Ка́ко на руку́ Того́ прія́ла еси́, на Него́же херуви́мы взира́ти не смѣ́ютъ? Мы́ же, со стра́хомъ на Тво́й взира́юще о́бразъ, упова́ніемъ на милосе́рдіе Твое́ ду́ши своя́ ободря́емъ и арха́нгельскій гла́съ съ любо́вію Тебѣ́ возно́симъ: ра́дуйся, Благода́тная, Госпо́дь съ Тобо́ю.

И ны́нѣ, пра́здника.
Вхо́дъ и чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Исхо́да чте́ніе. [Глава́ 3.]

Вни́де Моисе́й въ го́ру Бо́жію Хори́въ. Яви́ же ся ему́ Ангелъ Госпо́день въ пла́мени о́гненнѣ изъ купины́. И ви́дѣ, я́ко купина́ горя́ше огне́мъ, и купина́ не сгара́ше. Рече́ же Моисе́й: преше́дъ, узрю́ видѣ́ніе вели́кое сіе́, что́ я́ко не сгара́етъ купина́? Якоже ви́дѣ Госпо́дь, я́ко приступа́етъ ви́дѣти, призва́ его́ Госпо́дь изъ купины́, глаго́ля: Моисе́е, Моисе́е. Онъ же рече́: что́ е́сть? И рече́: не прибли́жися сѣ́мо; изу́й сапо́гъ отъ ногу́ твое́ю: мѣ́сто бо, на не́мже ты́ стои́ши, земля́ свята́ е́сть. И рече́ ему́: Азъ е́смь Бо́гъ отца́ твоего́, Бо́гъ Авраа́мовъ, и Бо́гъ Исаа́ковъ, и Бо́гъ Іа́ковль. Отврати́ же Моисе́й лице́ свое́: стыдя́ше бо ся зрѣ́ти предъ Бо́гомъ. Рече́ же Госпо́дь къ Моисе́ю: ви́дя, ви́дѣхъ озлобле́ніе люде́й Мои́хъ, и́же во Еги́птѣ, и во́пль и́хъ услы́шахъ отъ наси́льствующихъ въ дѣ́лѣхъ, вѣ́мъ бо болѣ́знь и́хъ, и снидо́хъ, е́же изъя́ты и́хъ отъ руки́ еги́птянъ, и извести́ и́хъ отъ земли́ о́ныя, и ввести́ и́хъ въ зе́млю бла́гу и мно́гу, въ зе́млю, точа́щу ме́дъ и млеко́.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ра хра́ма или́ пра́здника Срѣ́тенія, и сія́, гла́съ 3:

Дне́сь въ хра́мѣ Влады́чицы, вѣ́рніи, соше́дшеся и ду́ши своя́ па́мятію чуде́съ Ея́ умиля́юще, ревни́тели до́брымъ дѣло́мъ бы́ти потщи́мся. Вѣ́сть бо Пречи́стая таковы́мъ утѣше́ніе подава́ти и пострада́вшія пра́вды ра́ди заступа́ти, сего́ бо ра́ди преподо́бному Анто́нію на дре́вѣ яви́ся, егда́ во изгна́ніи сы́й моли́тву возноша́ше. Съ ни́мъ же и мы́ Влады́чицѣ возопіи́мъ: да бу́детъ ми́лость Твоя́ съ на́ми, о Дѣ́во Пренепоро́чная.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Ужасе́ся преподо́бный Анто́ній, во изгна́ніи пребыва́я, егда́ на ело́вомъ дре́вѣ узрѣ́ Ма́терь Бо́жію, Младе́нца Предвѣ́чнаго на руку́ нося́щую.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Разумѣ́въ Богома́тере видѣ́ніе Христо́въ изгна́нникъ преподо́бный Анто́ній Пече́рскій, а́біе ко иконопи́сцу поспѣша́етъ и видѣ́нія бы́вшаго ему́ подо́біе написа́ти тому́ повелѣва́етъ.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйтеся, лю́діе, и весели́теся, о́бразъ сего́ видѣ́нія дне́сь зря́ще, не оскудѣ́ бо и поны́нѣ, и николи́же оскудѣ́ти мо́жетъ Пресвяты́я Богоро́дицы заступле́ніе.

Сла́ва, гла́съ 6:

Якоже преподо́бному Анто́нію печа́ли разрѣше́ніе обѣтова́ла еси́ Твои́мъ видѣ́ніемъ, Пречи́стая, и любо́вь держа́вствующаго къ тому́ па́ки обрати́ла еси́, та́ко и на́мъ благода́тный ми́ръ отъ Сы́на Твоего́ низпосли́ и вся́кія раздо́ры отъ ста́да Твоего́ отжени́, любо́вь же Христо́ву среди́ на́съ Твое́ю моли́твою утверди́ и да́руй на́мъ пре́жде конца́ покая́ніе.

И ны́нѣ, пра́здника.

Тропа́рь, гла́съ 6:

Твоего́ милосе́рдія дарова́нія воспомина́юще, Влады́чице, и Тво́й чудотво́рный о́бразъ благоговѣ́йно лобыза́юще, упова́ніемъ же Твоея́ по́мощи сердца́ на́ша веселя́ще, а́ки среди́ на́съ пребыва́ющую Тя́ помышля́емъ и вѣ́рою Тебѣ́ вопіе́мъ: Твоего́ моли́ Сы́на и Го́спода, да научи́тъ на́съ за́повѣди Его́ всегда́ твори́ти и злы́я искуше́нія побѣжда́ти, и Тебе́, Предста́тельницу на́шу, досто́йно пѣ́ти и сла́вити во вѣ́ки. [Два́жды.]

И пра́здника: Ра́дуйся, Благода́тная Богоро́дице Дѣ́во... [Еди́ножды.]



НА УТРЕНИ,
По Бо́гъ Госпо́дь: Тропа́рь пра́здника, два́жды. Сла́ва, и ны́нѣ, Богоро́дицы.

По 1-й каѳи́смѣ сѣда́ленъ, гла́съ 7:

Се́ и́мамы, бра́тіе, сокро́вище ве́ліе — чудотво́рный Пречи́стыя ли́къ, повелѣ́ніемъ преподо́бнаго Анто́нія напи́санный, и та́ко прича́стницы видѣ́нія уго́дника я́вльшеся, того́ вѣ́рѣ и терпѣ́нію научи́мся и Ма́терь Бо́жію досто́йно почита́ти потщи́мся. [Два́жды.]

Сла́ва, и ны́нѣ, пра́здника.

По 2-й каѳи́смѣ сѣда́ленъ, гла́съ 6:

Не уныва́йте у́бо, о бра́тіе, а́ще пра́вды ра́ди гоне́ніе претерпи́те, таковы́хъ бо утѣша́етъ Дѣ́ва Чи́стая, я́ко Сама́ со Христо́мъ отъ Ирода въ изгна́ніи пребы́вшая. Сего́ ра́ди и мы́ вся́кую ско́рбь ра́достно претерпи́мъ и то́чію терпѣ́нія да́ръ непреста́нно проси́ти потщи́мся. [Два́жды.]

Сла́ва, и ны́нѣ, пра́здника.

По поліеле́и сѣда́ленъ, гла́съ 3:

Богоро́дице, изгна́нныхъ утѣ́шительнице, наги́хъ и си́рыхъ засту́пнице, боля́щихъ исцѣле́ніе и немощны́хъ покро́ве, на́шего не посрами́ упова́нія, но прося́щихъ Твоея́ по́мощи предъ чудотво́рнымъ о́бразомъ укрѣпи́ и земну́ю жи́знь на́шу умири́, па́че же небе́снаго Ца́рствія предста́тельствомъ Твои́мъ рабы́ Твоя́ сподо́би. [Два́жды.]

Проки́менъ и Ева́нгеліе Богоро́дичны: [Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе да хва́литъ Го́спода. Ева́нгеліе отъ Луки́, зача́ло 4.]

По Ева́нгеліи стихи́ра, гла́съ 2:

Дне́сь чудеса́ отъ Еле́цкія ико́ны Влады́чицы воспомина́ются, дне́сь отъ Тоя́ исцѣлѣ́нніи благодаре́ніе прино́сятъ, дне́сь во хра́мъ Ея́ благовѣ́рніи лю́діе стека́ются, си́лы небе́сныя о заступле́ніи Пречи́стыя ра́дуются, и преподо́бный Анто́ній съ ни́ми на небеси́ ликовству́етъ, мы́ же непреста́нно вопіе́мъ: ра́дуйся, Предста́тельнице на́ша, и на́шихъ скве́рнъ не возгнуша́вшися, моли́твою Твое́ю ду́ши на́ша просвѣти́ и ра́дости благода́тныя испо́лни.

Кано́нъ пра́здника со ирмосо́мъ на 6 [и Богоро́дицы на 8].

Кано́нъ Богоро́дицѣ, гла́съ 2, его́же краегране́сіе: Ра́дуйся, Благода́тная, Госпо́дь съ Тобо́ю. Ами́нь.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Ра́дуйся, Богоро́дице Всепѣ́тая! — восклица́емъ вѣ́рніи, на чудотво́рную Твою́ ико́ну взира́юще, я́же ра́дость пе́рвѣе преподо́бному Анто́нію Пече́рскому видѣ́ніемъ Твои́мъ дарова́ла еси́, и поны́нѣ подо́біемъ видѣ́нія того́, на дщи́цѣ напи́санномъ, всѣ́мъ моля́щимся ра́дость подае́ши, моле́нія и́хъ бла́гостно пріе́млющи.

Анто́ній преподо́бный во изгна́ніи непра́веднѣмъ томя́ся, видѣ́ніемъ же Богоро́дицы соверше́нное пріе́мый утѣше́ніе, сіе́ на дщи́цѣ написа́ти повелѣва́етъ и, во святу́ю ла́вру возвраща́яся, ико́ну Ея́ оби́тели Черни́говской вруча́етъ, я́же и до дне́сь во гра́дѣ Ха́рьковѣ отъ всѣ́хъ со благоговѣ́ніемъ зри́тся и чудеса́ исцѣле́ній источа́етъ.

Дре́вле злы́мъ тата́ромъ, на гра́дъ Черни́говъ наше́дшимъ, ико́на Ма́тери Бо́жія чуде́снѣ въ стѣнѣ́ сокрыва́ется и, мно́гимъ лѣ́томъ проше́дшимъ, па́ки христіа́номъ на поклоне́ніе открыва́ется. Зри́те у́бо, о лю́діе, Богома́тере вели́кую си́лу, Ей же не возмо́гутъ невѣ́рніи противоста́ти.

Уго́дника Твоего́, Влады́чице, видѣ́ніемъ утѣ́шила еси́, на́съ же, грѣ́шныхъ, не лиши́ Твоего́ заступле́нія, а́ще и недосто́йни сего́ явля́емся: покая́ніе бо те́плое предъ святы́нею Твое́ю вознося́ще, а́ки жена́ ханане́йская, неотсту́пно Твоея́ про́симъ по́мощи.

Катава́сія: Су́шу глубороди́тельную, зе́млю...

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Инíи, Правосла́вныя вѣ́ры врази́, на предѣ́лы Черни́говскія чрезъ мно́го лѣ́тъ наше́дше, подвиго́ша воево́ду гра́да того́ ико́ну Еле́цкую съ собо́ю во ца́рствующій гра́дъ поя́ти, пре́дану бы́вшу Черни́говскому предѣ́лу язы́ку чужде́му.

Сія́ бѣды́, о Влады́чице, ро́дъ на́шъ изба́ви, да святы́ня Твоя́ во гра́дѣ Ха́рьковѣ утверди́вшися, въ то́мъ непоколе́блена пребу́детъ во вѣ́ки и сердца́ на́ша умиле́ніемъ исполня́ти не преста́нетъ.

Яже въ ро́дѣ воево́ды того́ я́ко сто́ лѣ́тъ ико́на Влады́чицы пребы́вши, завѣща́ніемъ вну́ка его́ въ собо́рную це́рковь гра́да Ха́рькова поставля́ется и отто́лѣ моли́твы люде́й Бо́жіихъ сію́, а́ки крыла́ херуви́мовъ, при́сно окружа́ютъ.

Богоро́дице Пречи́стая, а́ще и многогрѣ́шни су́ть лю́діе, въ Тво́й святы́й хра́мъ притека́ющіи, но я́коже Сы́нъ Тво́й спасе́нія ра́ди грѣ́шникъ отъ небе́съ къ на́мъ прише́лъ е́сть, та́ко и Ты́ отъ небе́сныхъ круго́въ на моле́нія на́ша при́зри и проше́ній люде́й Твои́хъ не пре́зри, Всепѣ́тая.

Конда́къ пра́здника, гла́съ 1: Утро́бу Дѣви́чу... и и́косъ.
Та́же сѣда́ленъ, гла́съ 8:

Вои́стину бли́зъ е́сть Госпо́дь сокруше́ннымъ се́рдцемъ, вои́стину смире́нныя ду́хомъ Всеблагíй Тво́й, о Влады́чице, Сы́нъ спаса́етъ, поне́же а́ще и еди́ному Анто́нію уго́днику видѣ́ніе Твое́ яви́ти сподо́би, но того́ подо́біемъ и до дне́сь раби́ Твои́ упова́нія на Бо́га исполня́ются, и утвержде́ніе въ Правосла́вной вѣ́рѣ обрѣта́ютъ, и о пра́вдѣ ре́вностію озаря́ются.

Сла́ва, и ны́нѣ, пра́здника.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Лю́діе Бо́жіи, ми́лости отъ Ма́тере Госпо́дней пріе́млющіи, ду́ши своя́ похвала́ми Пречи́стѣй насыща́ютъ, но насы́тити не могу́ще, — ра́дуйся, Благода́тная, — па́ки къ Не́й взыва́ютъ и, та́ко творя́ще, искуше́нія грѣхо́вная отъ себе́ отгоня́ютъ.

Аще и премно́го укрѣпи́ся на христіа́ны діа́волъ, овогда́ у́бо враги́ на ня́ посыла́яй, овогда́ же обы́чаи растлѣ́нныя посредѣ́ на́съ разсѣева́яй, но мы́ на Твое́ заступле́ніе, Влады́чице, упова́юще, сего́ де́рзости противля́тися не преста́немъ.

Го́ре ва́мъ, злочести́віи, отъ почита́нія Ма́тере Бо́жія и отъ Це́ркве Христо́вой отпа́дшіи ерети́цы, себе́ бо самѣ́хъ сія́ ра́дости лиши́ли есте́, е́же Пречи́стую Богома́терь прославля́ти и тѣ́мъ сердца́ своя́ умиле́ніемъ исполня́ти. Пока́йтеся у́бо и къ на́шему ли́ку сопричти́теся.

Оле еретико́въ безу́мія, отъ свята́го Ева́нгелія научи́тися не хотя́щихъ, ка́ко Христо́съ пе́рвое чу́до милосе́рдія Своего́ предста́тельствомъ Ма́тере Своея́ яви́, вѣ́рныя же научи́, да моле́нія своя́ къ Не́й несомнѣ́нною вѣ́рою возно́сятъ.

Пѣ́снь 5.

Ирмо́съ: Угль Иса́іи проявле́йся, Со́лнце изъ дѣ́вственныя утро́бы возсія́, во тьмѣ́ заблу́ждшимъ, Богоразу́мія просвѣще́ніе да́руя.

Да утвержда́ется Правосла́вная вѣ́ра умноже́ніемъ исцѣле́ній отъ Твоея́ чудотво́рныя ико́ны, о Влады́чице, быва́емыхъ, да прославля́ется въ лю́дѣхъ Твое́ предста́тельство, па́че же надъ страстьми́ побѣ́дою увѣнча́й на́ша здѣ́ возноси́мыя Тебѣ́ моли́твы.

Аще и не вско́рѣ услы́шана бу́детъ моли́тва ва́ша, бра́тіе, я́коже Па́вла объ отступле́ніи сатанина́ а́нгела моли́вшагося, но сію́ долготерпѣли́вно повторя́юще, си́це восклица́йте: О, Влады́чице, грѣ́шнаго раба́ Твоего́ не возгнуша́йся, но отпуще́ніе грѣхо́въ мнѣ́ у Сы́на Твоего́ испроси́.

Твое́й чудотво́рнѣй ико́нѣ, Пречи́стая, покланя́яся, и сію́ благоговѣ́йно лобыза́я, о свои́хъ же грѣхопаде́ніихъ ужаса́яся, си́це реку́: а́ще подоба́етъ мнѣ́ и́хъ ра́ди ско́рби пріима́ти, не́гли терпѣ́нія да́ръ моли́твою Твое́ю мнѣ́ ниспосли́.

На сіе́ у́бо, о бра́тіе, скорбя́ми испыту́ются ду́ши на́ша, да не горды́нѣ жите́йстѣй, ни жестосе́рдію порабо́тимся, но да смиреному́дрію преподо́бнаго Анто́нія подража́юще, утѣше́нія отъ Ма́тере Бо́жія, я́ко ра́дости всѣ́хъ скорбя́щихъ да испо́лнимся.

Пѣ́снь 6.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Азъ недосто́йный ни благи́мъ дѣло́мъ, ниже́ терпѣ́нію навыко́хъ, окая́нный, — увы́ мнѣ́! — и моли́тва моя́ не испра́вися по достоя́нію предъ Тобо́ю, но, Влады́чице, Твоея́ ми́лости бе́здна мое́ да покры́етъ неможе́ніе и благода́тнаго покая́нія да́ръ да ниспосле́тъ ми́.

Язы́ки а́нгельскими и человѣ́ческими а́ще бы возмо́гъ а́зъ глаго́лати, но и тогда́ Твои́хъ щедро́тъ мно́жества, пра́веднымъ и грѣ́шнымъ человѣ́комъ даро́ваннаго, воспѣ́ти нѣ́сть возмо́жно: душа́мъ бо и тѣлесе́мъ здра́віе подае́ши, Блага́я, и ка́ющіяся ми́луеши те́плѣ.

Го́споди, Го́споди, се́ милосе́рдія Твою́ бе́здну въ то́мъ позна́хомъ, я́ко не то́чію ро́дъ человѣ́ческій отъ кля́твы зако́нныя искупи́лъ еси́, но и Предста́тельницу те́плую тому́ дарова́лъ еси́, Твою́ Пречи́стую Ма́терь, Ей же дне́сь благода́рное прино́симъ поклоне́ніе.

Оному поклоне́нію да пріобща́тся язы́цы, Твоего́ Сы́на до дне́сь не увѣ́дѣвшіи, или́ отъ моли́твы, я́же къ Тебѣ́, отпа́дшіи, да всѣ́мъ человѣ́комъ увѣ́ровавшимъ Твоя́ ниспосыла́ется благода́тная по́мощь.

Конда́къ, гла́съ 5:

На неувяда́емомъ дре́вѣ уго́днику яви́вшися, Твое́ же предста́тельство всѣ́мъ моля́щимся при́сно явля́ющи, Влады́чице, и на́шего не отврати́ смире́ннаго моле́нія, но прегрѣше́ній на́шихъ проще́нія испроси́ и, ско́рби ду́шъ на́шихъ отъе́мши, благода́рственное на́ше пріими́ поклоне́ніе, да любо́вію Тя́ во вѣ́ки сла́вимъ, Всепѣ́тая.

Икосъ:

Якоже дре́вле видѣ́ніемъ Пресвяты́я Богоро́дицы прія́тъ утѣше́ніе преподо́бный Анто́ній и отъ го́рькаго изгна́нія па́ки во святу́ю ла́вру свою́ ра́достно всели́ся, та́ко и о́бразъ Влады́чицы, сего́ видѣ́нія па́мять явля́яй, отъ тата́рскаго плѣне́нія во́лею Ея́ спасе́нъ бы́сть. Дне́сь же въ вели́комъ гра́дѣ Ха́рьковѣ посредѣ́ собо́рныя це́ркве водруже́нный, си́лу моли́твъ Бо́жія Ма́тере исцѣле́ньми мно́гими свидѣ́тельствуетъ, къ Не́й же возопіи́мъ: О, Всеблага́я, изгна́нныхъ и скорбя́щихъ Засту́пнице, проше́нія на́ша во благи́хъ испо́лни, да любо́вію Тя́ во вѣ́ки сла́вимъ, Всепѣ́тая.

Пѣ́снь 7.

Ирмо́съ: Да пресла́вное рождество́ Твое́, Христе́, е́же отъ Дѣ́вы, прообрази́ши я́вѣ, неопали́мы въ пещи́ о́троки сохрани́лъ еси́, пѣ́сньми пою́щія Тебѣ́: отце́въ Бо́же, благослове́нъ еси́.

Се́, пріи́де, Влады́чице, вре́мя Твоего́ о вѣ́рныхъ заступле́нія, зане́ отвсю́ду отъ враго́въ благоче́стія тѣсни́ми быва́ютъ, та́же и отъ де́монскихъ искуше́ній злѣ́ обурева́ются, уго́дника же Твоего́ Анто́нія крѣ́пости не иму́ще, озаре́ній свы́ше недосто́йни явля́ются. Имиже у́бо вѣ́си судьба́ми, по́мощь Бо́жію на́мъ испроси́ти потщи́ся.

По́мощи Богоро́дицы Пречи́стыя, о бра́тіе, мно́зи свидѣ́теліе здѣ́ обрѣта́ются, на́шему же нерадѣ́нію обличи́теліе, тѣ́мъ же чудотво́рнѣй ико́нѣ Влады́чицы предстоя́ще, къ покая́нію те́плому устреми́мъ ду́шъ на́шихъ ше́ствіе.

Огнь небе́снаго свѣ́та объе́млетъ Тя́, Богоро́дице, въ видѣ́ніи Анто́нію Пече́рскому я́вльшуюся, а́зъ же себе́ огню́ гее́нскому грѣхми́ свои́ми предугото́вахъ, но въ ско́рби души́ моея́ вопію́ Ти́: поми́луй мя́, Пречи́стая, и покая́нію те́плому научи́ мя, о мнѣ́ милосе́рдовавши.

Дѣло́мъ благи́мъ ревни́теля покажи́ мя, Пречи́стая, гнѣ́въ на стра́сти грѣхо́вныя вложи́вши въ мою́ ду́шу, да ты́я возненави́дѣвъ, бли́жнія же своя́ возлюби́въ, стезя́мъ Госпо́днимъ послѣ́дую неукло́нно.

Святосла́въ, Черни́гова кня́зь, на мѣ́стѣ явле́нія Влады́чицы це́рковь благолѣ́пную созда́ти потща́ся и ико́ну Пречи́стыя, отъ преподо́бнаго Анто́нія устро́енную, та́мо поста́ви, е́й же во гра́дъ Ха́рьковъ дне́сь пренесе́ннѣй, предстоя́ще мо́лимся, да и на́съ хра́мы Сы́на Своего́ бы́ти устро́итъ.

Пѣ́снь 8.

Ирмо́съ: Въ купинѣ́ Моисе́ю Дѣ́вы чу́до, на Сина́йстѣй горѣ́, прообрази́вшаго иногда́, по́йте, благослови́те и превозноси́те во вся́ вѣ́ки.

Тріе́ о́троцы, во огни́ неопа́льны пребыва́юще, Богоро́дицы прообрази́ша та́инство, я́ко Огнь Божества́ во чре́вѣ поне́сшей, ны́нѣ же Сама́ во огни́ на зеленѣ́ющемъ дре́вѣ свято́му я́вльшися, въ долготерпѣ́ніи того́ и тѣ́мъ на́съ утвержда́етъ.

Оте́чество на́ше, Влады́чице, па́че всѣ́хъ стра́нъ земли́ чудотво́рными ико́нами Твои́ми просвѣти́ла еси́, я́же, а́ки звѣ́зды небе́сныя, но́щь земна́го житія́ на́шего освѣща́ютъ и по пути́ пра́вому ходи́ти на́съ науча́ютъ.

Блаже́ни есмы́ вои́стину Предста́тельницу Тя́, Влады́чице, иму́ще, но вя́щшему осужде́нію пови́нни бу́демъ, а́ще, о толи́цѣмъ спасе́ніи Бо́жіемъ небре́гше, житія́ на́шего испра́вити не потщи́мся.

Онаго на́шея о святы́нѣ се́й ра́дости вино́вника, кня́зя Даніи́ла Баря́тинскаго, дре́влему же Святосла́ву пра́внука, и́же ико́ну Влады́чицы отъ дѣ́да пріе́мъ, сію́ предъ кончи́ною свое́ю здѣ́ хра́му съ моли́твою вдаде́, Го́споди, ду́шу упоко́й, на́мъ же пребыва́ніе святы́ни сія́ сотвори́ на по́льзу.

Юноши въ Вавило́нстѣй пещи́ спасы́й, Го́споди, а́нгеломъ во о́гнь соше́дшимъ, на́съ моли́твами Ма́тере Твоея́ отъ огня́ страсте́й свободи́, пою́щихъ: благослове́нъ еси́ въ хра́мѣ сла́вы Твоея́, Го́споди.

Пѣ́снь 9.

Ирмо́съ: Отъ земноро́дныхъ кто́ слы́ша таково́е? Или́ кто́ ви́дѣ когда́, я́ко Дѣ́ва обрѣ́теся, во чре́вѣ иму́щая и безболѣ́зненно Младе́нца поро́ждшая? Таково́е Твое́ чу́до, и Тя́, Чи́стая Богоро́дице, велича́емъ.

Ангели Твоему́, Богоро́дице, заступле́нію о на́съ ра́дуются, бѣ́си же Твои́ми моли́твами дале́че отъ на́съ отгоня́ются; а́зъ же еда́ глу́хъ се́рдцемъ пребу́ду, Твое́й покланя́яйся святы́нѣ? Сего́ да не бу́детъ, но умиле́ніемъ душа́ моя́ да раствори́тся.

Мно́жеству люде́й, сѣ́мо притека́ющему, мно́гія дарова́нія отъ чудотво́рныя ико́ны Бо́жія Ма́тере подаю́тся, отъ ни́хъ же лу́чшее е́сть, е́же въ чу́вство покая́нія себе́ привести́ и на дѣя́нія блага́я устреми́тися. Въ се́мъ у́бо по́мощь Твою́ яви́ мнѣ́, Пречи́стая.

Искупи́лъ ны́ е́сть Госпо́дь на́шъ, Тво́й же, Богоро́дице, Сы́нъ отъ вла́сти діа́вола, Твоя́ же моли́тва нападе́нія сего́ врага́ на́шего отго́нитъ, у́бо и ны́нѣ о душа́хъ на́шихъ предста́тельствуй, да приближе́нія святы́ни Твоея́ досто́йны яви́мся.

Никто́же возмо́жетъ досто́йно Ма́терь Го́спода на́шего просла́вити, но мы́ слеза́ми те́плыми ску́дость слове́съ на́шихъ воспо́лнимъ, красотѣ́ добродѣ́телей Влады́чицы на́шея дивя́щеся, и та́ко Сію́ досто́йно возвели́чимъ.

Свѣти́ленъ. Подо́бенъ: Ду́хомъ во святи́лищи.

Дре́вле Моисе́ю на горѣ́ Хори́встѣй, по́слѣжде на Бо́лдинскихъ гора́хъ Приснодѣ́вы та́инство пра́веднымъ яви́ся и о се́мъ па́мять ико́ною Благода́тной лю́демъ дарова́ся, Ей́ же покланя́ющеся, вѣ́рою чу́до воспѣва́емъ. [Два́жды.]

Сла́ва, и ны́нѣ, пра́здника.

На хвали́техъ стихи́ры пра́здника 3 и и настоя́щія 3, гла́съ 6. Подо́бенъ: Все́ отло́жше.

Сокро́вище неоцѣни́мое — Влады́чицы чудотво́рный о́бразъ, два́жды отъ человѣ́къ надо́лзѣ сокры́тъ, въ на́шемъ гра́дѣ посредѣ́ це́ркве отъ лѣ́тъ мно́гихъ возсія́, тѣ́мже подно́жію сего́ покланя́ющеся, си́це рце́мъ: О, Влады́чице, при́сно да храни́тся здѣ́ сія́ святы́ня и въ душа́хъ на́шихъ ре́вностію о спасе́ніи да отпечатлѣва́ется, во е́же благода́рнѣ воспѣва́ти Твоя́ благодѣя́нія.

Егда́ Боже́ственнаго Младе́нца Твоего́ на руку́ Свое́ю носи́ла еси́, Влады́чице, тогда́ волхво́въ покланя́ющихся словеса́ и па́стырей исповѣ́даніе въ се́рдцы Твое́мъ слага́ла еси́, мы́ же Твои́хъ чуде́съ и видѣ́ній па́мять въ сердца́хъ свои́хъ непреста́нно носи́ти бу́демъ, Твоему́ же Сы́ну, моля́щеся, глаго́лати: О, Влады́ко, Твоея́ Ма́тере о на́съ моли́тву пріими́, и да́ръ благода́ти Твоея́ ниспосли́ на́мъ, да и мы́ Тебѣ́ при́сніи яви́мся покая́ніемъ, я́коже благоразу́мный разбо́йникъ, возопи́вый: помяни́ мя, Го́споди, во Ца́рствіи Твое́мъ.

Зако́ны естества́ побѣжде́ни бы́ша, егда́ Непоро́чная Дѣ́ва во чре́вѣ зача́тъ, но о се́мъ чудеса́ въ житіи́ Тоя́ не сконча́шася, зане́ и съ пло́тію на не́бо, по кончи́нѣ жи́зни Своея́, принесе́ся и па́ки съ небе́съ моля́щимся чуде́сную посыла́етъ по́мощь, па́че же и Сама́ пра́веднымъ въ видѣ́ніяхъ явля́ется, мы́ же, отъ обою́ свидѣ́тельство въ святѣ́й ико́нѣ се́й зря́ще, ра́дуемся и предъ не́ю благода́рныя сле́зы пролива́емъ.

Сла́ва, гла́съ 2:

Дне́сь на небеси́ предстои́тъ Пречи́стая Дѣ́ва, и непрестаю́щее моле́ніе о лю́дѣхъ возно́ситъ, дне́сь Тоя́ видѣ́ніе, пра́веднику бы́вшее, воспомина́ется, и милосе́рдіе Ея́ прославля́ется, си́лы небе́сныя ра́дуются, мы́ же предъ Тоя́ ико́ною умиле́нныя возно́симъ моли́твы, глаго́люще: о́гнь Твоея́ святы́ни да освѣти́тъ ду́ши на́ша и пу́ть къ небе́сному Ца́рствію пѣвце́мъ Твои́мъ да пока́жетъ, Пречи́стая.

И ны́нѣ, пра́здника.
Славосло́віе вели́кое. По трисвято́мъ: Тропа́рь Богоро́дицѣ. Сла́ва, и ны́нѣ, пра́здника. Та́же ектеніи́ и отпу́стъ.



НА ЛИТУРГІИ,

Слу́жба пра́здника и Богоро́дицы: [Блажéнна отъ кано́на пра́здника пѣ́снь рядова́я и Богоро́дицы пѣ́снь 6-я. Проки́менъ, пѣ́снь Богоро́дицы, гла́съ 3: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо, отъ ны́нѣ ублажа́тъ Мя́ вси́ ро́ди. Апо́столъ ко Евре́емъ, зача́ло 320. Аллилу́ія пра́здника, гла́съ 8: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ. Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля. И Богоро́дицы, гла́съ 2: Воскресни́, Го́споди, въ поко́й Тво́й, Ты́ и киво́тъ святы́ни Твоея́. Ева́нгеліе Луки́, зача́ло 54. Прича́стенъ: Ча́шу спасе́нія пріиму́ и и́мя Госпо́дне призову́.]


Моли́тва.

Премилосе́рдая на́ша Засту́пнице, и ду́шъ на́шихъ блага́я Храни́тельнице, и тѣле́съ на́шихъ милосе́рдая Цѣли́тельнице, Богоро́дице Дѣ́во! Вѣ́мы, я́ко недосто́йни есмы́, не то́чію Твои́хъ дарова́ній прича́стницы бы́ти, но и оче́й свои́хъ на чудотво́рный Тво́й о́бразъ возвести́, зане́ ду́ши на́ша грѣхо́въ испо́лнены су́ть и о́чи зави́стными и блу́дными воззрѣ́ньми оскверне́ни су́ть. Оба́че Твое́ сострада́ніе человѣ́комъ, въ ну́ждахъ и ско́рбѣхъ пребыва́ющимъ, воспомина́юще, и́мъ же Твоего́ Боже́ственнаго Сы́на на пе́рвое чу́до въ Ка́нѣ Галиле́йстѣй преклони́ла еси́, и да́же до дне́сь Того́ пра́ведный гнѣ́въ отъ грѣ́шниковъ отвраща́еши, па́ки и па́ки на мольбу́ Тебѣ́, предъ чудотво́рнымъ Твои́мъ о́бразомъ, подвиза́емся и со смире́ннымъ упова́ніемъ Тебе́ про́симъ: испроси́ грѣхо́мъ на́шимъ проще́ніе, отъ па́губныхъ страсте́й исцѣле́ніе, отъ нечу́вствія и отъ сна́ духо́внаго пробужде́ніе и о добродѣ́телехъ христіа́нскихъ ре́вность. Си́ми у́бо дарова́ньми ду́ши на́ша украси́вши, изба́ви на́съ отъ го́рестей, въ уны́ніе некрѣ́пкая сердца́ на́ша поверга́ющихъ, исцѣли́ болѣ́зни моля́щихся и о ни́хже моли́тву тíи прино́сятъ, отъ напра́сныя сме́рти жи́знь на́шу сохрани́ и сію́ христіа́нскою кончи́ною во вре́мя подо́бно увѣнча́ти сподо́би. Но и земно́е на́ше пребыва́ніе отъ взаи́мныя зло́бы и за́висти огради́, и въ любви́ Христо́вой сіе́ препровожда́ти на́мъ помози́. Це́рковь Сы́на Твоего́ во все́й вселе́ннѣй умно́жи и утверди́, еретико́мъ обраще́ніе ко и́стинѣ испроси́, язы́комъ же невѣ́рнымъ вѣ́ры и́стинное позна́ніе. Та́кожде и ца́рство Россíйское соблюди́, Царю́ одолѣ́ніе на враги́ и супоста́ты да́руй, и всѣ́хъ на́съ научи́, я́коже во дни́ весе́лія, та́ко и во дни́ печа́ли Тебе́ прославля́ти и о всѣ́хъ Сы́на Твоего́ благодари́ти, житіе́ свое́ въ Его́ святу́ю во́лю вруча́ти со упова́ніемъ вѣ́чнаго спасе́нія ожида́ти, да и та́мо просла́вимъ Его́ пресвято́е и́мя и Твое́ милосе́рдое предста́тельство во вѣ́ки вѣко́въ. Ами́нь.


[Зри́:] Аще случи́тся пра́здновавіе Бо́жіей Ма́тери ико́ны ра́ди Ея́ Еле́цкія внѣ́ попра́зднства Срѣ́тенія Госпо́дня.

[На вели́цѣй вече́рни,] ста́вимъ на Го́споди, воззва́хъ: стихи́ръ 8, повторя́юще я́. Сла́ва, и ны́нѣ, Огнь купины́... Та́кожде и я́же въ стихо́вныхъ и въ хвали́тныхъ стихи́ра на сла́ву здѣ́ писа́ся, пое́тся тогда́ на Сла́ва, и ны́нѣ. Сѣда́льны же пою́тся еди́ножды, Сла́ва, и ны́нѣ, втори́цею. Тропа́рь же на вече́рни три́жды.

На у́трени, по Бо́гъ Госпо́дь: Тропа́рь, два́жды. Сла́ва, и ны́нѣ, трети́цею. Кано́нъ же пое́мъ на 8, ирмо́съ втора́го гла́са, два́жды. Катава́сія: Отве́рзу уста́ моя́... По вели́комъ славосло́віи: тропа́рь Богоро́дицѣ, еди́ножды.

Аще ли случи́тся се́й пра́здникъ въ недѣ́лю мытаре́ву или́ ину́ю, а́ще ли въ суббо́ту мясопу́стную, или́ сыропу́стную, или́ во дни́ седми́цы сы́рныя, или́ пе́рвыя седми́цы святы́я Четыредеся́тницы, то зри́ уста́въ о хра́мѣхъ отъ главы́ 25-я до главы́ 32-я.

Источникъ: Слу́жба Пресвятѣ́й Богоро́дицѣ, ико́ны ра́ди Ея́ Еле́цкія, я́же во Ха́рьковѣ гра́дѣ. [Твори́мъ же Ей пра́зднество мѣ́сяца Февруа́рія въ 6-й де́нь.] — М.: Сѵнода́льная Тѵпогра́фія, 1917. — 12 л.

/ Къ оглавленію раздѣла /


Наверхъ / Къ титульной страницѣ

0