Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 27 мая 2017 г. Сейчасъ на порталѣ посѣтителей - 12.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 6-й де́нь.
Преподо́бнаго отца́ на́шего Вуко́ла, епи́скопа Сми́рнскаго.

[ВЕЧЕРЪ,]
На Го́споди воззва́хъ: стихи́ры пра́здника, гла́съ 1. Подо́бенъ: Небе́сныхъ чино́въ.

Симео́нъ, на ру́ки отъ Дѣ́вы пріе́мъ* пре́жде всѣ́хъ вѣ́къ рожде́ннаго* Спа́са ви́дѣхъ, вопія́ше:* просвѣще́ніе Твоея́ сла́вы конце́мъ;* ны́нѣ отпуща́еши раба́ Твоего́, Бла́же, съ ми́ромъ,* я́ко ви́дѣхъ Тя́ дне́сь.

Напослѣ́докъ вѣко́въ рожде́на на спасе́ніе человѣ́ковъ,* Симео́нъ, понесы́й на рука́хъ Спа́са,* ра́дуяся, вопія́ше:* ви́дѣхъ Свѣ́тъ язы́ковъ и сла́ву Изра́иля,* ны́нѣ отпуща́еши, я́коже ре́клъ еси́, я́ко Бо́гъ,* отъ су́щихъ здѣ́ веле́ніемъ Твои́мъ.

Ины стихи́ры преподо́бнаго, гла́съ 6. Подо́бенъ: Тридне́венъ.

Свѣ́томъ богодѣ́тельныхъ добродѣ́телей блиста́яся, свяще́ннѣйше, свѣ́тъ положи́лся еси́ на свѣ́щницѣ та́инственно Боже́ственныя Це́ркве, уясня́я сію́, о́тче, свяще́нными уче́ніи твои́ми.

Ду́хъ тя́ Святы́й, Вуко́ле свяще́нне, освяти́въ, тобо́ю святы́ню вѣ́рою приступа́ющимъ подае́тъ, богоно́се, и просвѣще́ніе, и избавле́ніе.

Кра́йнюю бла́гость проповѣ́дая Бо́га на́шего, озло́бленныя ублажа́еши лю́ди, му́дре, благода́тно приводя́ Спа́су, я́ко свяще́нникъ свяще́ннѣйшій.

Сла́ва, и ны́нѣ, пра́здника, гла́съ 5:

Испыта́йте писа́нія, я́коже рече́ во Ева́нгеліихъ Христо́съ Бо́гъ на́шъ, въ ни́хъ бо обрѣта́емъ Того́ ражда́ема и пелена́ми повива́ема, въ я́слехъ полага́ема и млеко́мъ пита́ема, обрѣ́заніе пріе́млюща и Симео́номъ носи́ма, не мнѣ́ніемъ, ни привидѣ́ніемъ, но и́стиною мíрови я́вльшася. Къ Нему́же возопіи́мъ: Превѣ́чный Бо́же, сла́ва Тебѣ́.

Аще е́сть по́стъ: Сла́ва, и ны́нѣ, богоро́диченъ. Аще ли среда́ или́ пято́къ, крестобогоро́диченъ. [Пи́саны сего́ мѣ́сяца въ 10-й де́нь [1].]
[Сла́ва, и ны́нѣ, богоро́диченъ, гла́съ 6. Подо́бенъ: Всю́ отло́жше.

Уя́звленнаго мя́* разбо́йническими де́моновъ нахо́ды,* и лежа́ща всего́ недѣ́йственна, Всенепоро́чная,* на пути́ всегда́ нестоя́ннаго житія́,* и ми́лости тре́бующа,* вско́рѣ посѣти́,* вино́ возлія́вши и еле́й* на неисцѣ́льныя ра́ны,* и ко благоздра́вію возведи́,* я́ко да Тя́ сла́влю* и любо́вію по до́лгу воспою́ вели́чія Твоя́,* Чи́стая Еди́на Ма́ти Дѣ́во.

Крестобогоро́диченъ. Подо́бенъ то́йже:

Ору́жіе, я́коже рече́ Симео́нъ,* се́рдце Твое́ про́йде,* Пречи́стая Влады́чице,* егда́ узрѣ́ла еси́ изъ Тебе́ возсія́вшаго* неизрече́ннымъ сло́вомъ,* отъ беззако́нныхъ я́ко осужде́на возноси́ма на Кре́стъ,* о́цетъ и же́лчь вкуша́юща,* въ ре́бра же пробода́ема,* и ру́цѣ и но́зѣ пригвожда́емы,* и, рыда́ющи, восклица́ла еси́, ма́терски вопію́щи:* что́ сіе́, Ча́до сладча́йшее,* но́вое та́инство?]

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Нося́щи Чи́стая* и Пречи́cтая Дѣ́ва* Содѣ́теля и Влады́ку,* я́ко Младе́нца на рука́хъ,* въ це́рковь вхо́дитъ.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Пріими́, о Симео́не,* Го́спода сла́вы,* я́коже извѣсти́лся еси́* отъ Ду́ха Свята́го:* се́ бо пріи́де.

Сти́хъ: Свѣ́тъ во открове́ніе язы́ковъ,* и сла́ву люде́й Твои́хъ Изра́иля.

Ны́нѣ ви́дѣша,* Благíй Бо́же, о́чи мои́* Твое́ обѣща́ніе:* разрѣши́ мя ско́ро,* раба́ Твоего́, Человѣколю́бче.

Сла́ва, и ны́нѣ, гла́съ 5. Ге́рманово:

Ве́тхій де́ньми, младе́нствовавъ пло́тію, Ма́терію Дѣ́вою въ це́рковь прино́сится, Своего́ зако́на исполня́я обѣща́ніе, Его́же Симео́нъ пріи́мъ, глаго́лаше: ны́нѣ отпуща́еши съ ми́ромъ, по глаго́лу Твоему́, раба́ Твоего́, ви́дѣша бо о́чи мои́ спасе́ніе Твое́, Святы́й.

Тропа́рь, гла́съ 4:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ я́же веще́й и́стина, сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Вуко́ле, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, пра́здника, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.


НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Въ це́рковь прине́слся еси́, Жи́знь вся́ческихъ, мене́ ра́ди младе́нствовавъ, подъ зако́номъ бы́лъ еси́, дре́вле начерта́въ на скрижа́лѣхъ зако́нъ на горѣ́ Сина́йстѣй, да вся́ измѣни́ши отъ зако́нныя дре́внія рабо́ты. Сла́ва милосе́рдію Твоему́, Спа́се, сла́ва ца́рствію Твоему́, сла́ва смотре́нію Твоему́, Еди́не Человѣколю́бче.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 5. Подо́бенъ: Собезнача́льное Сло́во.

Въ це́рковь прине́слся еси́, обы́чная исполня́я, Творе́цъ, и Влады́ка, и зако́на Да́тель, Спа́се, и на рука́хъ Симео́на благоволе́ніемъ Твои́мъ носи́тися пло́тію, Иже всѣ́мъ стра́шный и всю́ тва́рь содержа́й, восхотѣ́лъ еси́, Еди́не Ще́дре, свѣ́тъ Тво́й всѣ́мъ откры́ти на́мъ.

Сла́ва, и ны́нѣ, то́йже.

Кано́нъ пра́здника со ирмосо́мъ на 8 и свята́го на 4.

Кано́нъ пра́здника, гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Кано́нъ свята́го, его́же краегране́сіе: Вуко́ла вели́каго воспою́ сла́ву. Іо́сифъ. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Боже́ственными свѣтлостьми́ и свяще́нными и свѣтоно́сными сія́ньми просвѣща́емь при́сно, мою́ озари́ ду́шу, свѣ́тлый тво́й пра́здникъ, о́тче, чту́щаго.

Всесвѣ́тлу тя́ звѣзду́ мы́сленное показа́въ Со́лнце, свѣтлостьми́ твои́хъ добродѣ́телей уясни́ зе́млю, святи́телю Христо́въ, Вуко́ле всему́дре.

Житіе́ при́сно освяще́нно, и чи́сто, и скве́рнамъ несмѣ́сно показу́я, Христо́въ свяще́нъ сосу́дъ, му́дре, позна́лся еси́ на земли́, Вуко́ле пресла́вне.

Богоро́диченъ: Иже Отцу́ Сы́й Единоро́денъ па́че ума́ во чре́вѣ Твое́мъ вопло́щься боголѣ́пно, человѣ́ки обожи́, Чи́стая, за мно́жество щедро́тъ Преблагíй.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Сы́нъ дне́ и свѣ́та бы́въ, святи́телю, труды́ боже́ственными, всели́лся еси́ я́вѣ во свѣ́тлостехъ ны́нѣ святы́хъ, благода́тію сія́я.

Проповѣ́дая Еди́но благоче́стно Тро́ицы Существо́, многобо́жную ле́сть искорени́лъ еси́ отъ земли́, я́ко святи́тель че́стенъ, я́ко Сло́ва и́стинный служи́тель.

Пу́ть показа́лъ еси́ жи́зни всѣ́мъ прельще́ннымъ отъ враго́въ навѣ́та и приве́лъ еси́ ты́я, я́ко па́стырь слове́сенъ, спасе́ны, Сло́ву, Первопа́стырю.

Богоро́диченъ: Приста́нище бу́ди ми́ и стра́жъ, лю́тыми треволне́ніи страсте́й неосла́бно обурева́ему при́сно, въ мо́ри, Чи́стая, житія́, Еди́на Приснодѣ́во.

Сѣда́ленъ свята́го, гла́съ 4. Подо́бенъ: Вознесы́йся.

Свяще́нства свѣ́томъ сія́я, просвѣти́лъ еси́ лю́ди, святи́телю, и и́дольскую тму́ потреби́лъ еси́, заре́ю же исцѣле́ній страсте́й мглу́ разори́въ, преше́лъ еси́ къ незаходи́мому сія́нію, о на́съ моля́, прилѣ́жно тя́ чту́щихъ, Вуко́ле блаже́нне.

Сла́ва, и ны́нѣ, пра́здника, гла́съ то́йже. Подо́бенъ: Удиви́ся Іо́сифъ.

Младе́нствуеши мене́ ра́ди, Ве́тхій де́ньми, чище́ніемъ пріобща́ешися, Чистѣ́йшій Бо́же, да пло́ть увѣ́риши мнѣ́, ю́же отъ Дѣ́вы. И си́мъ Симео́нъ поуча́яся, позна́ Тя, Бо́га, я́вльшагося пло́тію, и, я́ко Жи́знь, лобза́ше и, ра́дуяся, ста́рчески взыва́йте: отпусти́ мене́, Тебе́ бо ви́дѣхъ, Живота́ вся́ческихъ.

Аще е́сть по́стъ: Сла́ва, и ны́нѣ, богоро́диченъ. Аще среда́ или́ пято́къ, крестобогоро́диченъ. [Пи́саны въ 17-й де́нь.]
[Сла́ва, и ны́нѣ, богоро́диченъ, гла́съ 4. Подо́бенъ: Вознесы́йся.

Иже на престо́лѣ херуви́мстѣмъ сѣдя́й, и въ нѣ́дрѣхъ Отчихъ водворя́яся, я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ; вопло́щься бо, Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́. Его́же умоли́ спасти́ся рабо́мъ Твои́мъ.

Крестобогоро́диченъ:

Иже отъ Безнача́льнаго Отца́ рожде́ннаго, напослѣ́докъ Тя́ пло́тію ро́ждшая, на Крестѣ́ ви́сяща, зря́щи, Христе́, — увы́ Мнѣ́, любе́знѣйшій Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя, Долготерпѣли́ве.]

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Предвѣ́даяй Бо́гъ твоея́, богоблаже́нне, души́ красоту́ и ума́ чистоту́, священнопроповѣ́дника му́дра свяще́нно тя́ рукополага́етъ.

Отъ Ду́ха просвѣща́емь, су́щія во тмѣ́ пре́лести просвѣща́еши и креще́ніемъ сы́ны дне́ соверша́еши, святи́телю пресла́вне.

Обрѣ́тъ тя́, благода́тію сія́юща, сла́вный Богосло́въ, ру́ку возлага́етъ боже́ственными вожде́ньми и свяще́нника соверша́етъ свяще́нна, Вуко́ле всему́дре.

Богоро́диченъ: Разу́мно въ купинѣ́ Тя́ Моисе́й узрѣ́, священнообразу́ему, Огня́, хотя́щаго бы́ти во утро́бѣ, явля́етъ та́инственно, Богоро́дице Приснодѣ́во.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Святи́тельскую свяще́нную оде́жду носи́въ свяще́нно, нечести́выя просвѣти́лъ еси́, честны́й святи́телю, Еди́ницу Несозда́нную въ Тріе́хъ Ли́цѣхъ, Вуко́ле, проповѣ́дая.

Отъ у́стъ во́лка мы́сленнаго исхи́тилъ еси́ лю́ди, уче́ньми богогла́сныхъ твои́хъ у́стъ, и ерети́чествующая незатворе́нная уста́ твои́ми богосло́віи загради́лъ еси́, о́тче.

Ме́рзкій побѣди́ся твои́ми свяще́нными словесы́ Маркіо́нъ и изри́неся вся́каго безмѣ́стія изрыга́яй ти́ну злосмра́дну, Вуко́ле сла́вне.

Богоро́диченъ: Зако́ны естества́ Іису́съ, Пресу́щественный Бо́гъ, обновля́етъ, Всенепоро́чная, изъ Твоея́ утро́бы ражда́яся, Еди́нъ, осуществова́вый вся́ во́лею.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Вознося́щее смире́ніе, чистоту́ ума́, любо́вь нелицемѣ́рну, вѣ́ру и наде́жду имѣ́я чи́сту, Вуко́лъ сла́вный Тро́ицѣ яви́ся жили́ще.

Вельми́ украси́вша Сми́рняномъ свяще́нное сѣда́лище, тя́, прехва́льне, тайново́ждствуетъ Ду́хъ, Су́щаго по тебѣ́ па́стыря Полика́рпа, руко́ю твое́ю, Вуко́ле, соверша́ема.

Разумѣ́въ зва́ніе твое́ Ду́хомъ, прему́дре, су́щаго по тебѣ́ благода́тію слове́снымъ овца́мъ наста́вника приво́диши къ престо́лу, добродѣ́телей сія́ніемъ блиста́юща.

Богоро́диченъ: Две́рь благода́ти, отве́рзшая человѣ́комъ две́рь небе́сную, покая́нія две́ри ми́ пресвѣ́тло отве́рзи, Влады́чице, и отъ вра́тъ сме́ртныхъ свободи́.

Конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Вразумля́я неразу́мныя, исправля́я же ле́стію попо́лзшіяся, о́тче, спа́слъ еси́ и Бо́гу приве́лъ еси́ чи́сты, Тому́ пѣснопою́щія благоче́стно: благослове́нъ еси́, Бо́же оте́цъ на́шихъ.

Украси́шася, всеблаже́нне, лани́ты твоя́, воплоще́ніе проповѣ́дающія, за неизрече́нное милосе́рдіе Возсія́вшаго на́мъ, къ Нему́же вопія́лъ еси́ прилѣ́жно: благослове́нъ еси́, Бо́же оте́цъ на́шихъ.

Облада́въ воздержа́ніемъ тѣлесе́, страстьми́, сла́вне, необлада́нъ льсти́ваго яви́лся еси́ прило́гами и ны́нѣ воспѣва́еши неле́стно: благослове́нъ еси́, Бо́же оте́цъ на́шихъ.

Богоро́диченъ: Изба́вльшеся дре́вняго осужде́нія Рождество́мъ Твои́мъ, Всенепоро́чная, я́ко Влады́чицу воспѣва́емъ Тя́, спа́сшіися, Дѣ́во, Тебе́ ра́ди, вопію́ще и глаго́люще вѣ́рно: благослове́на, Яже Бо́га пло́тію ро́ждшая.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Процвѣ́лъ еси́, я́ко фи́никсъ, во дво́рѣхъ Бо́жіихъ, до́лжнымъ пра́ведныхъ сно́мъ усну́лъ еси́; прино́ситъ же наслажде́ніе боже́ственный тво́й гро́бъ чу́до зря́щимъ, Вуко́ле богопроповѣ́дниче.

Бо́жіе Бо́гъ Сло́во Ѵпоста́сное свяще́нна святи́теля тя́ поставля́етъ, помазу́юща лю́ди свяще́нно, святи́телю наста́вниче Сми́рняномъ, свѣти́льниче вселе́нныя.

Вопло́щшагося Сло́ва богосло́вилъ еси́ и мно́ги отъ безслове́сія лю́ди спа́слъ еси́, боже́ственъ бы́въ учени́къ возсія́вшаго въ богосло́віи, Вуко́ле богоно́се.

Богоро́диченъ: Свяще́нно науча́шеся Твои́мъ та́инствомъ проро́ковъ, Богоро́дице, боже́ственное сосло́віе, издале́ча разумѣ́въ и я́сно излага́я богозна́менія Боже́ственнаго Рождества́ Твоего́.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Яко свѣ́тъ, я́ко заря́, я́ко вели́кое со́лнце, я́ко мо́лнія, Христо́ву Це́рковь облиста́лъ еси́, и вѣ́рныхъ мы́сли просвѣти́лъ еси́, и въ невече́рнихъ мѣ́стѣхъ всели́лся еси́, поя́ трисвяты́ми гла́сы Тро́ицу несозда́нную.

Пло́ти и мíра внѣ́ бы́въ священнодѣ́йственне, ко премíрнымъ, ра́дуяся, преше́лъ еси́ чино́мъ, обожа́емь положе́ніемъ свѣтлѣ́йшимъ, тѣ́мже па́мять твою́ вѣ́рою соверша́емъ на земли́, Вуко́ле всему́дре.

Земля́ тѣ́ло твое́ блаже́нное покрыва́етъ, я́вѣ исцѣле́нія точа́що и дарова́нія, не́бо же ду́хъ со избра́нными но́ситъ и́же отъ вѣ́ка, Боже́ственными сія́ньми укра́шенъ вои́стинну, Вуко́ле сла́вне.

Богоро́диченъ: Гла́сомъ а́нгеловымъ вели́каго совѣ́та Ангела, Чи́стая, Христа́ Емману́ила породила́ еси́, ко а́нгеломъ до́льныя совокупля́юща, еди́на Благослове́нная, еди́на Всепѣ́тая, еди́на вино́вна на́шего, Дѣ́во, обоже́нія.

Свѣти́ленъ пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

Сла́ва, и ны́нѣ, то́йже.

На стихо́внѣ стихи́ры пра́здника, гла́съ 2. Подо́бенъ: До́ме Евфра́ѳовъ.

Дне́сь Спаси́тель* я́ко Младе́нецъ принесе́нъ бы́сть* въ це́рковь Госпо́дню,* и рука́ми престарѣ́лыми* ста́рецъ Того́ подъе́млетъ.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Младе́нецъ пло́тію,* Ве́тхій де́ньми,* ви́димь е́сть пресла́вно* во дне́шній де́нь* и въ це́рковь прино́сится.

Сти́хъ: Свѣ́тъ во открове́ніе язы́ковъ,* и сла́ву люде́й Твои́хъ Изра́иля.

Пріими́, о Симео́не, —* Всечи́стая вопія́ше, —* во объя́тія я́ко Младе́нца* Го́спода Сла́вы* и мíра спасе́ніе.

Сла́ва, и ны́нѣ, гла́съ и подо́бенъ то́йже:

Ве́ліе и стра́шное та́инство* и стра́нное смотре́нія,* Иже вся́ объе́мля* и младе́нцы созида́яй,* я́ко Младе́нецъ на рука́хъ но́сится.

Примѣчаніе:
[1] Въ текстѣ ошибочно стоитъ: въ 11-й день.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 61 об. – 67 об.

/ Къ оглавленію раздѣла /


Наверхъ / Къ титульной страницѣ

0