Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 29 iюня 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 5-й де́нь.
Пра́зднованіе Пресвятѣ́й Богоро́дицѣ въ че́сть Ея́ ико́ны, имену́емыя «Взыска́ніе поги́бшихъ».

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ.., стихи́ры на 8: пра́здника 3, и Богоро́дицы 5.
Стихи́ры пра́здника, гла́съ 1. Подо́бенъ: Небе́сныхъ чино́въ.

Богоявле́нія неизрече́ннаго* ны́нѣ пра́зднуемъ спаси́тельную благода́ть:* отъ Дѣ́вы бо Отрокови́цы непрело́жно младе́нствовавъ, Христо́съ Бо́гъ* въ це́рковь Бо́гу и Отцу́* Ма́терію ны́нѣ прино́сится,* Его́же пріе́мъ, Симео́нъ рука́ми объя́тъ.

Во проро́цѣхъ ви́дѣнъ бы́лъ еси́,* я́коже мо́щно бя́ше, Іису́се,* Тебе́ ви́дѣти дре́вле,* но ны́нѣ, Бо́жій Сло́ве,* пло́тію всему́ мíру яви́лся еси́ во́лею* отъ Дѣ́вы Марíи, Христе́,* Твое́ спасе́ніе всѣ́мъ* су́щимъ отъ Ада́ма яви́лъ еси́,* я́ко Человѣколю́бецъ.

На Сина́йстѣй горѣ́* зако́нъ учини́вый дре́вле,* ны́нѣ въ Сіо́нѣ гра́дѣ исполня́я зако́нная,* рука́ми Богоро́дицы* Младе́нецъ, Христе́, со всесожже́ніи* на рука́хъ Симео́на* во хра́мъ внести́ся восхотѣ́лъ еси́ пло́тію.

Стихи́ры Богоро́дицы, гла́съ 1:

Сія́ніе сла́вы Отчія,* Сы́нъ отъ Свѣ́та, Свѣ́те присносу́щный,* озари́, мо́лимъ Тя́, у́мъ и се́рдце на́ше, Іису́се,* и напо́лни на́съ Ду́ха,* да воспѣва́емъ, ра́дующеся,* ро́ждшую Тя́ Дѣ́ву Чи́стую* и воспѣва́емъ ди́вная Ея́ чудеса́.

Свѣ́тлый составля́етъ ли́къ* ико́на Твоя́, Влады́чице,* къ Не́йже мы́ взира́юще,* се́рдцемъ и усты́ благослови́мъ,* пое́мъ и велича́емъ Твое́ Ма́тернее благоутро́біе* и ку́пно отъ Тебе́ ро́ждшагося Бо́га сла́вимъ.

Пое́мъ се́рдцемъ и усты́* не дре́внюю злату́ю ста́мну,* въ не́йже бѣ́ ма́нна,* но пое́мъ Дѣ́ву Богоро́дицу,* Христа́ во чре́вѣ носи́вшую,* и сла́вимъ Твоего́ о́браза* богосоверша́емая чудеса́.

Якоже луна́ свѣтоза́рная,* яви́ся Твоя́, Влады́чице, ико́на,* озаря́я су́щія во тмѣ́* и приводя́ къ свѣ́ту богоразу́мія;* и на́съ, во грѣсѣ́хъ погиба́ющихъ,* мо́лимъ Тя́ со слеза́ми:* спаси́ отъ тмы́ неразу́мія* и Твоя́ пѣвцы́ вѣ́чной сла́вы сподо́би.

Тя́, Еди́ну въ жена́хъ благослове́нную,* мы́, грѣ́шніи, пою́ще, мо́лимъ:* изба́ви на́съ, Пречи́стая, отъ страсте́й грѣхо́вныхъ* благода́тію Сы́на Твоего́* и укрѣпи́ на́съ въ за́повѣдехъ Его́* ходи́ти вре́мя про́чее непоро́чно,* спаса́я въ ми́рѣ ду́ши на́ша.

Сла́ва, гла́съ 5:

Исполне́ніе зако́на и проро́ковъ, Ро́ждшая Христа́ Бо́га, испо́лни ра́дости и весе́лія всѣ́хъ, чту́щихъ святу́ю ико́ну Твою́, Влады́чице, да, свѣ́тло дне́сь пра́зднующе, Тя́ ра́достно воспое́мъ и любо́вію и́мя Твое́ просла́вимъ, я́ко Ты́ еси́ еди́на, отъ всѣ́хъ родо́въ избра́нная, Благослове́нная и Препросла́вленная.

И ны́нѣ, пра́здника, гла́съ 5. Ге́рманово:

Ве́тхій де́ньми, младе́нствовавъ пло́тію, Ма́терію Дѣ́вою въ це́рковь прино́сится, Своего́ зако́на исполня́я обѣща́ніе, Его́же Симео́нъ пріи́мъ, глаго́лаше: ны́нѣ отпуща́еши съ ми́ромъ, по глаго́лу Твоему́, раба́ Твоего́, ви́дѣша бо о́чи мои́ спасе́ніе Твое́, Святы́й.

Вхо́дъ. Проки́менъ дне́. И чте́нія.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 4:

Торжеству́юще ны́нѣ ра́достно во хра́мѣ Твое́мъ, Пречи́стая, и Твоему́ припа́дающе честно́му о́бразу, мо́лимъ Тя́ умиле́нно: сотвори́ на́съ досто́йны бы́ти ли́ка пра́зднующихъ и въ торжествѣ́ избра́нныхъ Сы́на Твоего́.

Сердца́ на́ша привлекла́ еси́, Дѣ́во Чи́стая, и ди́внымъ о́браза Твоего́ благолѣ́піемъ и боголѣ́пными о́наго чудесы́; тѣ́мже, пою́ще, мо́лимъ Тя́: и на́ши ду́ши свѣ́тлы содѣ́лай, Влады́чице.

Въ премíрномъ лику́я свѣ́тѣ, не пре́зри на́съ, до́лу су́щихъ во тмѣ́ земно́й, но, осѣня́я ико́ною, при́зри Ма́тернимъ благоутро́біемъ на рабы́ Твоя́ и свѣ́томъ Сы́на Твоего́, Влады́чице, отжени́ отъ на́съ мра́чныя прило́ги лука́ваго.

Утверди́, просла́ви, вознеси́ вѣ́рныя лю́ди Твоя́, вѣ́рныхъ Помо́щнице, гра́дъ се́й и вся́ гра́ды и страны́ въ ми́рѣ сохрани́ и всѣ́хъ, лю́бящихъ сла́вити честны́й о́бразъ Тво́й, вѣнце́въ сла́вы сподо́би.

Сла́ва, гла́съ 6:

Не надѣ́емся на кня́зи, на сы́ны человѣ́ческія, но все́ на́ше упова́ніе на Твоего́ Сы́на, Богоро́дице, возлага́емъ и вѣ́руемъ непрело́жно, я́ко То́й е́сть спасе́ніе на́ше, и да не постыди́мся.

И ны́нѣ пра́здника, гла́съ 6:

Да отве́рзется две́рь небе́сная дне́сь: Безнача́льное бо Сло́во Отчее, нача́ло пріи́мъ подъ лѣ́ты, не отсту́пль Своего́ Божества́, отъ Дѣ́вы я́ко Младе́нецъ четыредесятодне́венъ Ма́терію во́льнѣ прино́сится въ це́рковь зако́нную, и Сего́ на ру́ки пріе́млетъ ста́рецъ, — отпусти́, — зовы́й, — раба́, Влады́ко, и́бо о́чи мои́ ви́дѣста спасе́ніе Твое́. Прише́дый въ мíръ спасти́ ро́дъ человѣ́чь, Го́споди, сла́ва Тебѣ́.

Стихо́вна Богоро́дицы, гла́съ 5:

Неисповѣди́мое чуде́съ мо́ре,* вѣ́мы Тя́, Богоро́дице,* па́че бо херуви́мовъ* и серафи́мовъ просла́вилася еси́,* тѣ́мже и ны́нѣ Тя́* я́ко Ма́терь Бо́жію* въ пѣ́снѣхъ велича́емъ,* раби́ Твои́, благода́рственно.

Сти́хъ: Слы́ши, Дщи́, и ви́ждь,* и приклони́ у́хо Твое́.

Не тва́ри преклоня́емъ колѣ́на,* падо́ша бо истука́ны,* но Тебѣ́, Пренепоро́чная Дѣ́во,* и, о́бразъ Тво́й лобыза́юще, мо́лимся:* спаси́ лю́ди Твоя́ отъ огня́ страсте́й,* отъ бѣ́дъ и напа́стей* руко́ю Бо́га благослове́ннаго.

Сти́хъ: Приведу́тся Царю́ дѣ́вы въ слѣ́дъ Ея́,* и́скренніи Ея́ приведу́тся Тебѣ́.

Ты́ ти́хое обурева́емымъ,* Богоро́дице, приста́нище,* Ты́ ра́дость въ печа́ль погруже́ннымъ,* боля́щимъ Ты́ исцѣле́ніе* и покро́въ всѣ́мъ,* къ Тебѣ́ прибѣга́ющимъ, Влады́чице,* Еди́на Чи́стая и Благослове́нная.

Сти́хъ: Приведу́тся въ весе́ліи и ра́дованіи,* введу́тся въ хра́мъ Царе́въ.

Тобо́ю возстаю́тъ разсла́бленіи,* неду́гующіи исцѣля́ются,* слѣпíи прозира́ютъ,* отъ бѣсо́въ томи́міи свобожда́ются.* Ра́дуйся, исто́чниче дарова́ній, Богоблагода́тная.

Сла́ва, гла́съ 6:

Собери́ разстоя́щія во еди́но, Ми́ръ мíрови Ро́ждшая, Правосла́віе утверди́ непоколеби́мо и всѣ́хъ на́съ соблюди́ непреткнове́нныхъ бы́ти во исповѣ́даніи Сы́на Твоего́, я́ко еди́на вѣ́рныхъ Помо́щнице.

И ны́нѣ, пра́здника, гла́съ 6:

На рука́хъ ста́рческихъ во дне́шній де́нь, я́ко на колесни́цѣ херуви́мстѣй, восклони́тися благоизво́ливый, Христе́ Бо́же, и на́съ, пою́щихъ Тя́, страсте́й мучи́тельства призыва́емый изба́ви и спаси́, я́ко Человѣколю́бецъ.

Стихо́вна пра́здника, гла́съ 6. Подо́бенъ: Тридне́венъ.

Воспріими́, — рече́, — Симео́не, Зижди́теля вся́ческихъ рука́ма. О, ста́рче, подыми́ Христа́, Его́же Дѣ́ва Отрокови́ца роди́ безъ сѣ́мене на ра́дость ро́ду на́шему.

Сти́хъ: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ.

Зако́ну Творца́ и Бо́га, Его́же трепе́щутъ а́нгельская мно́жества, соше́дшеся, воспои́мъ, лю́діе, Еди́наго Благодѣ́теля и зако́ну Законода́теля во спасе́ніе ду́шъ на́шихъ.

Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля.

Ны́нѣ отпуща́еши, Влады́ко, раба́ Твоего́, я́коже ре́клъ еси́, съ ми́ромъ, я́ко ви́дѣхъ Тя́, Христе́, Свѣ́та Первовѣ́чнаго, соу́зъ мя́ плотски́хъ, во открове́ніе язы́ковъ и Изра́илю.

Сла́ва, и ны́нѣ, гла́съ 2. Андре́я Пи́рра:

Ему́же вы́шніи служи́теліе съ тре́петомъ мо́лятся, до́лу ны́нѣ Симео́нъ ве́щными рука́ми пріе́мь, Бо́га человѣ́комъ соедини́тися проповѣ́да, и Человѣ́ка небе́сна Бо́га ви́дяй, отлуча́яся су́щихъ на земли́, ра́достно взыва́ше: Иже во тмѣ́ су́щимъ невече́рній Свѣ́тъ открыва́яй, Го́споди, сла́ва Тебѣ́.

Тропа́рь, гла́съ 7:

Ра́дуйся, Благода́тная Богоро́дице Дѣ́во, во объя́тіяхъ Свои́хъ Превѣ́чнаго Младе́нца и Бо́га носи́вшая, проси́ Его́ да́ти мíру умире́ніе и душа́мъ на́шимъ спасе́ніе. Сы́нъ бо Тебѣ́, Богома́ти, вѣща́етъ, я́ко вся́ проше́нія Твоя́ во благо́е испо́лнитъ. Сего́ ра́ди и мы́, припа́дающе, мо́лимся и, надѣ́ющіися на Тя́, да не поги́бнемъ, и́мя Твое́ имену́емъ: Ты́ бо еси́, Влады́чице, Взыска́ніе поги́бшихъ.

Инъ тропа́рь, гла́съ 4:

Взыщи́ на́съ, погиба́ющихъ, Пресвята́я Дѣ́во, не по грѣхо́мъ бо на́шимъ наказу́еши на́съ, но по человѣколю́бію ми́луеши, изба́ви на́съ отъ а́да, болѣ́зни и ну́жды и спаси́ на́съ.

Тропа́рь пра́здника, гла́съ 1:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.


НА УТРЕНИ,
На Бо́гъ Госпо́дь: Тропа́рь пра́здника, два́жды. Сла́ва, Богоро́дицы. И ны́нѣ, пра́здника.

По 1-мъ стихоло́гіи сѣда́ленъ, гла́съ 1. Самоподо́бенъ:

Ли́къ а́нгельскій да удиви́тся чудеси́, земнíи же гла́сы, возопіе́мъ пѣ́ніе, зря́ще неизрече́нное Бо́жіе снизхожде́ніе, Его́же бо трепе́щутъ небе́сныя си́лы, ны́нѣ ста́рчи объе́млютъ ру́цѣ Еди́наго Человѣколю́бца.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Свирѣ́лей па́стырскихъ.

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

Сла́ва, и ны́нѣ, то́йже:

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Младе́нствуеши мене́ ра́ди, Ве́тхій де́ньми, чище́ніемъ пріобща́ешися, чистѣ́йшій Бо́же, да пло́ть увѣ́риши мнѣ́, ю́же отъ Дѣ́вы. И си́мъ Симео́нъ, поуча́яся, позна́ Тя, Бо́га, я́вльшагося пло́тію, и, я́ко Жи́знь, лобза́ше и, ра́дуяся, ста́рчески взыва́ше: отпусти́ мене́, Тебе́ бо ви́дѣхъ, Живота́ вся́ческихъ.

Сла́ва, и ны́нѣ, то́йже.

Та́же степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Отры́гну се́рдце мое́ сло́во бла́го, [глаго́лю а́зъ дѣла́ моя́ Царе́ви]. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра литíйная на Сла́вѣ, гла́съ 6:

[Не надѣ́емся на кня́зи, на сы́ны человѣ́ческія, но все́ на́ше упова́ніе на Твоего́ Сы́на, Богоро́дице, возлага́емъ и вѣ́руемъ непрело́жно, я́ко То́й е́сть спасе́ніе на́ше, и да не постыди́мся.]

Кано́ны пра́здника съ ирмосо́мъ на 6, ирмосы́ по два́жды, и Богоро́дицы на 8.

Кано́нъ пра́здника, гла́съ 3.
[Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.]

Кано́нъ Пресвяты́я Богоро́дицы, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Умилосе́рдися о на́съ, грѣ́шныхъ, погиба́ющихъ, Пресвята́я Богоро́дице, но вмѣ́сто печа́ли да́руй на́мъ ра́дость, да воспѣва́емъ Тя́, Всесвята́я Влады́чице.

Утиши́ ду́шъ на́шихъ свирѣ́пство, поне́же мно́гія ско́рби и печа́ли нападо́ша на на́съ, грѣ́шныхъ, да не поги́бнемъ во злѣ́, окая́нніи.

Ты́ еси́ на́ша крѣ́пость и утвержде́ніе и отъ враго́въ защище́ніе, и сего́ ра́ди не бои́мся вра́жія навѣ́та, но при́сно пое́мъ Тя́ и сла́вимъ, Всесла́вная.

Напа́сти, и бѣ́ды, и ско́рби мно́ги пріидо́ша на на́съ и отяготи́ша на́съ, и отъ всего́ се́рдца мо́лимъ Тя́, вопію́ще: изба́ви, Богороди́тельнице, отъ обдержа́щихъ на́съ зо́лъ и весе́лія испо́лни.

Катава́сія пра́здника.

Пѣ́снь 3.

[Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.]

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ты́ еси́ те́плая Предста́тельница и тве́рдое заступле́ніе, изба́ви на́съ, Всесвята́я, отъ наше́дшихъ на на́съ напа́стей, Ты́ бо еси́, Влады́чице, па́дшихъ исправле́ніе.

Изба́ви на́съ, Пречи́стая, отъ напа́стей, и бѣ́дъ, и омраче́нія душе́внаго, и уны́нія, вся́ стра́сти отжени́ отъ на́съ, Чи́стая, да при́сно Тя́ сла́вимъ.

Къ Тебѣ́ притека́емъ, Пречи́стая, не пре́зри на́шея болѣ́зни и воздыха́нія, но при́зри на на́съ, су́щихъ въ ско́рби, и сію́ на́шу печа́ль на ра́дость преложи́, Богоблаже́нная.

Ви́ждь, Влады́чице, бѣду́ на́шу и ско́рби, я́ко въ тѣ́хъ лука́вый вра́гъ поглоти́ти на́съ тщи́тся, но Ты́, Пречи́стая, препни́ его́ злохи́трое кова́рство, да, изба́вльшися, сла́вимъ Тя́, тве́рдую Засту́пницу за ны́, во грѣсѣ́хъ погиба́ющихъ.

[Конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.]

Инъ конда́къ [Богоро́дицы], гла́съ 6:

Не и́мамы ины́я по́мощи, не и́мамы ины́я наде́жды, ра́звѣ Тебе́, Влады́чице, Ты́ на́мъ помози́, на Тебе́ надѣ́емся и Тобо́ю хва́лимся, Твои́ бо есмы́ раби́, да не постыди́мся.

Сѣда́ленъ [Богоро́дицы], гла́съ 2:

Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́, и отъ бѣ́дъ изба́ви на́съ, Еди́на вско́рѣ предста́тельствующая.

[Сла́ва, и ны́нѣ, пра́здника, гла́съ 3:

Отъ Дѣ́вы Тя́ воплоще́нна, Христе́, ра́дуяся, подъя́тъ свяще́нный Симео́нъ, — ны́нѣ отпуща́еши, — вопія́, — раба́ Твоего́, Влады́ко! Анна же непоро́чная, проро́чица и сла́вная, ны́нѣ исповѣ́даніе и пѣ́ніе прино́ситъ Тебѣ́. Мы́ же, Жизнода́вче, вопіе́мъ Ти́: сла́ва та́ко благоволи́вшему.]

Пѣ́снь 4.

[Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.]

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ты́ еси́, Пречи́стая Дѣ́во, наде́ждо и утвержде́ніе на́ше неруши́мое, и лю́тыхъ бѣ́дъ освобожде́ніе, и отъ печа́ли утѣше́ніе, и ду́шъ на́шихъ просвѣще́ніе, и во упова́ніи на́шемъ непоколеби́мый сто́лпе.

Въ си́хъ печа́лехъ бу́ди сла́дкое утѣше́ніе, и въ бѣда́хъ ско́рая Помо́щница, и въ моли́твахъ Предста́тельница, Тя́ бо, Ма́ти Бо́жія, стяжа́вши, отъ вся́кихъ бѣ́дъ избавля́емся и ко спасе́нію Тобо́ю наставля́емся.

Ты́ еси́, Пречи́стая Дѣ́во, су́щимъ въ бѣда́хъ прибѣ́жище, немощны́мъ помога́еши, грѣ́шныхъ исправля́еши и ко спасе́нію наставля́еши, я́ко Ма́ти Бо́жія су́щая.

Суди́ оби́дящихъ, и побори́ борю́щихъ на́съ, и отъ напра́снаго оскорбле́нія изба́ви на́съ, осужде́нныхъ, я́ко Ты́ Судію́ Пра́веднаго родила́ еси́, Всенепоро́чная, Иже хо́щетъ суди́ти кому́ждо по дѣло́мъ его́.

Пѣ́снь 5.

[Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.]

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Преклони́ся къ мольба́мъ рабо́въ Твои́хъ, Влады́чице, и не закосни́ изба́вити на́съ отъ всѣ́хъ скорбе́й и бѣ́дъ, я́же обдержа́тъ на́съ, ви́димыхъ и неви́димыхъ враго́въ отжени́ отъ на́съ, да не злѣ́ поги́бнемъ, окая́нніи.

Ты́ въ напа́стехъ и ско́рбехъ ми́лостиво защища́еши, и́же подъ кро́въ Тво́й прибѣга́ютъ; пріими́, Пречи́стая, и на́ше сіе́ ма́лое отъ уны́лаго се́рдца моле́ніе, да не злѣ́ въ отча́яніи поги́бнемъ.

Ми́лостивымъ и кро́ткимъ о́комъ, Богороди́тельнице, и милосе́рдіемъ Твои́мъ при́зри на на́съ, недосто́йныхъ, и отъ обстоя́щія напа́сти на́съ свободи́, призыва́ющихъ Тя́ на по́мощь, Всепречи́стая.

Первозда́нный Ада́мъ и Ева Тобо́ю, Влады́чице, изба́вистася отъ сле́зъ, съ ни́ми же и на́съ, припа́дающихъ и моля́щихся Ти́, изба́ви сле́зъ, печа́лей и скорбе́й и пода́ждь поле́зное на́мъ утѣше́ніе о Бо́зѣ, Спа́сѣ на́шемъ.

Пѣ́снь 6.

[Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.]

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Услы́ши печа́льный во́пль ра́бъ Твои́хъ, тре́бующихъ по́мощи Твоея́, Богома́ти, Ты́ бо еси́ упова́ніе на́ше, потщи́ся печа́ль на́шу на ра́дость преложи́ти.

Изба́ви на́съ, Влады́чице, отъ язы́ка льсти́ва и отъ человѣ́ка непра́ведна изми́ на́съ, вся́ бо Ты́ мо́жеши, я́ко Ма́ти Зижди́теля на́шего су́щи.

Вѣ́мы Тя́, Богоблагода́тная, ско́рое поги́бшихъ взыска́ніе, на́съ, немощны́хъ, крѣ́пость и утвержде́ніе; ду́хомъ, усты́ и се́рдцемъ зове́мъ Ти́: отъ напа́стей и печа́ли свободи́ на́съ, Влады́чице, къ Тебѣ́ прибѣга́ющихъ.

Изба́ви на́съ отъ напа́стей и бѣ́дъ, Богоневѣ́сто, Тя́ бо устро́и Бо́гъ на спасе́ніе и заступле́ніе на́ше Хода́таицу, сего́ ра́ди и на́мъ, недосто́йнымъ, исхода́тайствуй отъ печа́ли избавле́ніе.

Конда́къ, гла́съ 6:

Предста́тельство христіа́нъ непосты́дное, хода́тайство ко Творцу́ непрело́жное, не пре́зри грѣ́шныхъ моле́ній гла́сы, но предвари́, я́ко Блага́я, на по́мощь на́съ, вѣ́рно зову́щихъ Ти́: ускори́ на моли́тву и потщи́ся на умоле́ніе, предста́тельствующи при́сно, Богоро́дице, чту́щихъ Тя́.

[Икосъ:

Простри́ дла́ни Твоя́, и́миже всѣ́хъ Влады́ку я́ко младе́нца прія́ла еси́, за мно́жество бла́гости; не оста́ви на́съ, всегда́ надѣ́ющихся на Тя́, бо́дренною Твое́ю моли́твою и неисче́тною просты́нею уще́дри на́съ, и пода́ждь душа́мъ на́шимъ милосе́рдіе Твое́, во вѣ́ки источа́ющи: Тебе́ бо и́мамы, грѣ́шніи, Засту́пницу отъ находя́щихъ на ны́ бѣ́дъ и зо́лъ. Но, я́ко иму́щи милосе́рдія щедро́ты, ускори́ на моли́тву, и потщи́ся на умоле́ніе, предста́тельствующи при́сно, Богоро́дице, чту́щихъ Тя́.]

Пѣ́снь 7.

[Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.]

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ты́ еси́, Пречи́стая Дѣ́во, Покрови́тельница на́ша и непреста́нное ра́дованіе ду́шъ на́шихъ, не пре́зри на́съ, одержи́мыхъ лю́тою бѣдо́ю и неутѣши́мою печа́лію, но заступи́ и поми́луй рабы́ Твоя́.

Ты́ еси́ крѣ́пость на́ша, Пречи́стая Влады́чице, и въ наше́дшихъ неча́емыхъ ско́рбехъ утѣше́ніе, и сего́ ра́ди мы́, недосто́йніи раби́ Твои́, всенаде́жно вопіе́мъ Ти́: поми́луй на́съ, па́дшихъ.

Исцѣли́ душе́вныя я́звы, Влады́чице, и заступи́ на́съ, рабо́въ Твои́хъ, изба́ви на́съ отъ па́губныя сѣ́ти лука́ваго, отъ вся́каго паде́нія и отъ развраще́нія изми́ на́съ, Преблагослове́нная.

Сокруши́ совѣ́ты непра́ведныя, и́же изощре́ны су́ть на ны́, мы́ бо ины́я по́мощи не и́мамы, ра́звѣ Тебе́, Чи́стая, и къ Тебѣ́ прибѣга́емъ: не попусти́ поги́бнути, я́ко вся́ Тебѣ́ возмо́жна су́ть.

Пѣ́снь 8.

[Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.]

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Ду́ши на́ша сохрани́ подъ кро́вомъ Твои́мъ, Преблагослове́нная Богоро́дице, и отъ разли́чныхъ належа́щихъ на на́съ бѣ́дъ и скорбе́й изба́ви на́съ, да не пора́дуется вра́гъ на́шъ о на́шей поги́бели, но да сла́вимъ Тя́, Бо́жію Ма́терь, во вѣ́ки.

Убоя́хомся по́мощи человѣ́ческія иска́ти, прибѣго́хомъ къ Тебѣ́, Всенепоро́чная, Ты́ еси́ Храни́тельница христіа́номъ, дне́сь къ покро́ву притеко́хомъ, надѣ́яся на ми́лость благоутро́бія Твоего́; матери́нски поми́луй на́съ, да сла́вимъ Тя́ во вѣ́ки.

Ты́ еси́, Пречи́стая Дѣ́во, просвѣще́ніе и избавле́ніе, Ты́ еси́ Помо́щница на́ша всера́достная и стѣна́ неруши́мая, сла́ва и хвала́ на́ша, Всенепоро́чная, да просла́вимъ Тя́ во вѣ́ки.

На Тя́ всю́ наде́жду спасе́нія на́шего возложи́хомъ, Неискусобра́чная Богороди́тельнице, и на по́мощь призыва́емъ Тя́: спаси́ на́съ отъ печа́ли сія́ и напа́сти и отъ всѣ́хъ скорбе́й изба́ви на́съ, да сла́вимъ Тя́ во вѣ́ки.

На 9-й пѣ́сни пое́мъ припѣ́вы пра́здника.
Пѣ́снь 9.

[Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.]

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Изсше, я́ко скуде́ль, отъ печа́ли крѣ́пость на́ша, и ко а́ду прибли́жихомся; отъ язы́къ душепа́губныхъ предвари́, Ма́ти Бо́жія, заступле́ніемъ Твои́мъ и отъ обдержа́щихъ на́съ скорбе́й руко́ю, Ма́ти, Твое́ю изба́ви на́съ, да сла́вимъ Тя́, Чи́стая Приснодѣ́во.

Всенепоро́чная Отрокови́це, всѣ́мъ вѣ́рнымъ крѣ́пкая Помо́щнице, и упова́ніе христіа́номъ, бу́ди и о на́съ неотсту́пная Моле́бница къ Сы́ну Твоему́ и Бо́гу о освобожде́ніи отъ наше́дшія сія́ напа́сти, да вопіе́мъ Ти́: ра́дуйся, Чи́стая Приснодѣ́во.

Ты́ еси́ крѣ́пость на́ша, прибѣ́жище и стѣна́ необори́мая, Ты́ еси́ те́плая къ Бо́гу Моли́твенница, вся́кихъ напа́стей и бѣ́дъ свободи́, еди́на Благослове́нная, да вопіе́мъ Ти́: ра́дуйся, Преблаже́нная Богоро́дице, Приснодѣ́во!

Свѣти́ленъ пра́здника:

[Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

Сла́ва, и ны́нѣ, то́йже.]

На хвали́техъ стихи́ры пра́здника 3 и Богоро́дицы 3, литíйныя.
Стихи́ры пра́здника, гла́съ 2. Подо́бенъ: До́ме Евфра́ѳовъ.

Стра́хомъ же и ра́достію* на рука́хъ Влады́ку* Симео́нъ держа́,* живота́ проша́ше разрѣше́нія,* поя́ Богома́терь.

Ны́нѣ мя́ къ жи́зни* отпусти́ и́стиннѣй, —* Симео́нъ вопія́ше, — Спа́се мо́й,* ви́дѣхъ бо Тя́,* Свѣ́та мíра, Влады́ко.

Анна проро́чески,* цѣлому́дренная и преподо́бная,* ны́нѣ исповѣ́дашеся* отъ Дѣ́вы Прозя́бшему* земны́хъ на избавле́ніе.

[Стихи́ры Богоро́дицы, литíйныя, гла́съ 4:

Торжеству́юще ны́нѣ ра́достно* во хра́мѣ Твое́мъ, Пречи́стая,* и Твоему́ припа́дающе честно́му о́бразу,* мо́лимъ Тя́ умиле́нно:* сотвори́ на́съ досто́йны бы́ти* ли́ка пра́зднующихъ* и въ торжествѣ́ избра́нныхъ Сы́на Твоего́.

Сердца́ на́ша* привлекла́ еси́, Дѣ́во Чи́стая,* и ди́внымъ о́браза Твоего́ благолѣ́піемъ* и боголѣ́пными о́наго чудесы́;* тѣ́мже, пою́ще, мо́лимъ Тя́:* и на́ши ду́ши свѣ́тлы содѣ́лай, Влады́чице.

Въ премíрномъ лику́я свѣ́тѣ,* не пре́зри на́съ, до́лу су́щихъ во тмѣ́ земно́й,* но, осѣня́я ико́ною,* при́зри Ма́тернимъ благоутро́біемъ на рабы́ Твоя́* и свѣ́томъ Сы́на Твоего́, Влады́чице,* отжени́ отъ на́съ мра́чныя прило́ги лука́ваго.]

Сла́ва, Богоро́дицы, [гла́съ 6:

Не надѣ́емся на кня́зи,* на сы́ны человѣ́ческія,* но все́ на́ше упова́ніе* на Твоего́ Сы́на, Богоро́дице, возлага́емъ* и вѣ́руемъ непрело́жно,* я́ко То́й е́сть спасе́ніе на́ше,* и да не постыди́мся.]

И ны́нѣ, гла́съ 2. Подо́бенъ: До́ме Евфра́ѳовъ.

Ра́дуйся, Яже ра́дость* мíру пріе́мшая,* Христа́ Жизнода́вца,* и уста́вльшая печа́ль,* Дѣ́во, прама́тернюю.

[Славосло́віе вели́кое. Ектеніи́, и отпу́стъ.



НА ЛИТУРГІИ,

Блажéнна отъ кано́на пра́здника, пѣ́снь 4-я, на 4 и Богоро́дицы, пѣ́снь 6-я, на 4. Проки́менъ пра́здника и Богоро́дицы еди́нъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ Богоро́дицы, къ Филипписíемъ, зача́ло 240. Аллилу́ія пра́здника, гла́съ 8: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ. Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля. И Богоро́дицы, гла́съ то́йже: Слы́ши Дщи́ и ви́ждь, и приклони́ у́хо Твое́. Ева́нгеліе Богоро́дицы, отъ Луки́, зача́ло 54. Прича́стенъ еди́нъ: Ча́шу спасе́нія пріиму́ и и́мя Госпо́дне призову́.]

Источникъ: Мине́я Янва́рь. Ча́сть пе́рвая. — М.: Издательскій совѣтъ Русской Православной Церкви, 2002. — С. 175 –186.

/ Къ оглавленію раздѣла /


Наверхъ / Къ титульной страницѣ

0