Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 5-й де́нь.
Святы́я му́ченицы Ага́ѳіи.

[ВЕЧЕРЪ,]
На Го́споди воззва́хъ: стихи́ры пра́здника 3 и му́ченицы 3.
Стихи́ры пра́здника, гла́съ 1. Подо́бенъ: Небе́сныхъ чино́въ.

Во проро́цѣхъ ви́дѣнъ бы́лъ еси́,* я́коже мо́щно бя́ше, Іису́се,* Тебе́ ви́дѣти дре́вле,* но ны́нѣ, Бо́жій Сло́ве,* пло́тію всему́ мíру яви́лся еси́ во́лею* отъ Дѣ́вы Марíи, Христе́,* Твое́ спасе́ніе всѣ́мъ* су́щимъ отъ Ада́ма яви́лъ еси́,* я́ко Человѣколю́бецъ.

На Сина́йстѣй горѣ́* зако́нъ учини́вый дре́вле,* ны́нѣ въ Сіо́нѣ гра́дѣ исполня́я зако́нная,* рука́ми Богоро́дицы* Младе́нецъ, Христе́, со всесожже́ніи* на рука́хъ Симео́на* во хра́мъ внести́ся восхотѣ́лъ еси́ пло́тію.

Ины стихи́ры святы́я, гла́съ 4. Подо́бенъ: Да́лъ еси́ зна́меніе.

Нетлѣ́нно соблюла́ еси́ тѣ́ло* Христу́, Жениху́ твоему́,* дѣ́вства добро́тами,* Ага́ѳіе богоневѣ́сто, укра́шена* и просвѣще́на му́ченическими блиста́ньми,* и въ черто́гъ Боже́ственный вмѣсти́лася еси́.* Тѣ́мже твое́ всемíрное соверша́емъ торжество́,* Спа́са сла́вяще,* при́сно Тя́ сла́вящаго.

Сосце́въ отрѣ́заніе,* и огня́ опале́ніе,* и строга́нія тѣлесе́ претерпѣ́ла еси́, сла́вная,* вѣ́чнующая, очи́ма серде́чныма смотря́я воздая́нія,* и отону́дное блаже́нство,* и вѣне́цъ неувяда́емый,* е́же тебѣ́ Христо́съ ны́нѣ дарова́,* за Него́же пострада́вши,* страстоте́рпице многострада́льная.

Стремле́ніе неуде́ржное* огня́ свирѣ́паго уста́вила еси́,* моли́твами твои́ми, благоимени́тая,* и гра́дъ спасла́ еси́,* честны́я твоя́, му́ченице, мо́щи чту́щій,* отъ ни́хже объе́млетъ рѣ́ки исцѣле́ній* Боже́ственнымъ Ду́хомъ.* Въ се́мъ бо пострада́вши, врага́ смири́ла еси́* и побѣ́ды вѣне́цъ прія́ла еси́, всехва́льная.

Аще е́сть по́стъ: Сла́ва, и ны́нѣ, богоро́диченъ или́ Крестобогоро́диченъ. [Пи́саны въ 28-й де́нь.]
[Сла́ва, и ны́нѣ, богоро́диченъ, гла́съ 4. Подо́бенъ: Да́лъ еси́ зна́меніе.

Де́монскими преклоне́на прило́ги* и въ ро́въ поги́бели вве́ржена* уще́дри, Влады́чице,* и утверди́ мя на ка́мени добродѣ́телей,* и, навѣ́ты вра́жія разори́вши,* сподо́би мя́ твори́ти повелѣ́нія* Твоего́ Сы́на и Бо́га на́шего,* я́ко да улучу́* оставле́ніе въ де́нь суда́.

Крестобогоро́диченъ. Подо́бенъ то́йже:

Распина́ема Христа́ Человѣколю́бца* ви́дящи, Пречи́стая,* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ?* И тщи́шися безча́дствовати Мя́, вселюбе́знѣйшій,* удивля́юся, Благоутро́бне,* Твоему́ во́льному распя́тію.]

Аще ли нѣ́сть поста́: Пое́мъ самогла́сенъ святы́я. Сла́ва, гла́съ 8. Сикео́та:

Пресла́вно чу́до бы́сть во страда́ніи всесла́вныя Ага́ѳіи и му́ченицы Христа́ Бо́га, подо́бно Моисе́ови. Онъ бо, лю́демъ законополага́я, на горѣ́ напи́сана на скрижа́лехъ богоначерта́нная пи́смена прія́тъ; здѣ́ же а́нгелъ съ небесе́ на гро́бъ скрижа́ль принесе́ напи́сану, у́мъ преподо́бенъ самоизво́ленъ, че́сть отъ Бо́га и оте́честву избавле́ніе.

И ны́нѣ пра́здника, гла́съ то́йже. Андре́я Кри́тскаго:

Иже на херуви́мѣхъ носи́мый и пѣва́емый отъ серафи́мъ, дне́сь въ Боже́ственное святи́лище по зако́ну приноси́мь, на ста́рческихъ, я́ко на престо́лѣ, сѣди́тъ рука́хъ и отъ Іо́сифа пріе́млетъ да́ры боголѣ́пно, я́ко супру́гъ го́рличищъ, нескве́рную Це́рковь и отъ язы́къ новоизбра́нныя лю́ди, голуби́на же два птенца́, я́ко Нача́льникъ Ве́тхаго же и Но́ваго. Еже къ Нему́ обѣща́нія Симео́нъ коне́цъ пріе́мъ, благословя́ Дѣ́ву Марíю Богоро́дицу, страсте́й о́бразы, Иже изъ Нея́, провозгласи́ и отъ Него́ проша́ше отпуще́нія, вопія́: ны́нѣ отпусти́ мя, Влады́ко, я́коже пре́жде возвѣсти́ ми, я́ко ви́дѣхъ Тя́, первовѣ́чнаго Свѣ́та и Спа́са Го́спода христоимени́тымъ лю́демъ.

На стихо́внѣ стихи́ры, гла́съ 6. Подо́бенъ: Тридне́венъ.

Воспріими́, — рече́, — Симео́не, Зижди́теля вся́ческихъ рука́ма. О, ста́рче, подыми́ Христа́, Его́же Дѣ́ва Отрокови́ца роди́ безъ сѣ́мене на ра́дость ро́ду на́шему.

Сти́хъ: Ны́нѣ отпуща́еши раба́ Твоего́, Влады́ко, по глаго́лу Твоему́, съ ми́ромъ.

Зако́ну Творца́ и Бо́га, Его́же трепе́щутъ а́нгельская мно́жества, соше́дшеся, воспои́мъ, лю́діе, Еди́наго Благодѣ́теля и зако́ну Законода́теля во спасе́ніе ду́шъ на́шихъ.

Сти́хъ: Свѣ́тъ во открове́ніе язы́ковъ и сла́ву люде́й Твои́хъ Изра́иля.

Ны́нѣ отпуща́еши, Влады́ко, раба́ Твоего́, я́коже ре́клъ еси́, съ ми́ромъ, я́ко ви́дѣхъ Тя́, Христе́, Свѣ́та Первовѣ́чнаго, соу́зъ мя́ плотски́хъ, во открове́ніе язы́ковъ и Изра́илю.

Сла́ва, и ны́нѣ, гла́съ 2. Андре́я Пи́рра:

Ему́же вы́шніи служи́теліе съ тре́петомъ мо́лятся, до́лу ны́нѣ Симео́нъ ве́щными рука́ми пріе́мь, Бо́га человѣ́комъ соедини́тися проповѣ́да, и Человѣ́ка небе́сна Бо́га ви́дяй, отлуча́яся су́щихъ на земли́, ра́достно взыва́ше: Иже во тмѣ́ су́щимъ невече́рній Свѣ́тъ открыва́яй, Го́споди, сла́ва Тебѣ́.

Тропа́рь, гла́съ 4:

Агница Твоя́, Іису́се, Ага́ѳія, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Сла́ва, и ны́нѣ, пра́здника:

Ра́дуйся, Благода́тная Богоро́дице Дѣ́во, изъ Тебе́ бо возсія́ Со́лнце пра́вды — Христо́съ, Бо́гъ на́шъ, просвѣща́яй су́щія во тмѣ́. Весели́ся и ты́, ста́рче пра́ведный, пріе́мый во объя́тія Свободи́теля ду́шъ на́шихъ, да́рующаго на́мъ воскресе́ніе.


НА УТРЕНИ,
По 1-мъ стихоло́гіи сѣда́ленъ, гла́съ 1. Самоподо́бенъ:

Ли́къ а́нгельскій да удиви́тся чудеси́, земнíи же гла́сы, возопіе́мъ пѣ́ніе, зря́ще неизрече́нное Бо́жіе снизхожде́ніе, Его́же бо трепе́щутъ небе́сныя си́лы, ны́нѣ ста́рчи объе́млютъ ру́цѣ Еди́наго Человѣколю́бца.

Сла́ва, и ны́нѣ, то́йже.

По 2-й стихоло́гіи сѣда́ленъ, гла́съ 8. Подо́бенъ: Свирѣ́лей па́стырскихъ.

Роди́лся еси́ на земли́ Собезнача́льный Отцу́, прине́слся еси́ въ це́рковь Непостижи́мый. Ра́дуяся же, ста́рецъ на ру́ки Тя́ воспріе́мъ, зовы́й: ны́нѣ отпуща́еши, его́же посѣти́лъ еси́, по глаго́лу Твоему́, благоизво́ливый спасти́ я́ко Бо́гъ ро́дъ человѣ́ческій.

Сла́ва, и ны́нѣ, то́йже:

Кано́нъ пра́здника на 8 и святы́я на 4.

Кано́нъ пра́здника, гла́съ 3.
Пѣ́снь 1.

Ирмо́съ: Су́шу глубороди́тельную зе́млю со́лнце наше́ствова иногда́: я́ко стѣна́ бо, огустѣ́ обапо́лы вода́ лю́демъ пѣшомореходя́щимъ и богоуго́дно пою́щимъ: пои́мъ Го́сподеви, сла́вно бо просла́вися.

Да ка́плютъ во́ду о́блацы, Со́лнце бо, на о́блацѣ ле́гцѣ носи́мо, наста́ло е́сть, на нетлѣ́нную руку́, Христо́съ въ це́ркви я́ко Младе́нецъ. Тѣ́мже, вѣ́рніи, возопіи́мъ: пои́мъ Го́сподеви, сла́вно бо просла́вися.

Крѣпи́теся, ру́цѣ Симео́ни, ста́ростію осла́бленніи, лы́ста же претружде́нна ста́рча правобыстро́ движи́тася Христу́ на срѣ́теніе, ли́къ со безпло́тными соста́вльше, пои́мъ Го́сподеви, сла́вно бо просла́вися.

Ра́зумомъ просте́ртая небеса́, весе́литеся, и ра́дуйся, земле́, изъ Пребоже́ственныхъ бо нѣ́дръ Хитре́цъ проше́дъ Христо́съ, Ма́терію Дѣ́вою Бо́гу Отцу́ прино́сится Младе́нецъ, Иже пре́жде всѣ́хъ, сла́вно бо просла́вися.

Кано́нъ святы́я, его́же краегране́сіе: Благу́ю благи́ми воспои́мъ пѣ́сньми. Ѳеофа́ново. Гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Благи́хъ пе́рвую вину́ возжела́вши, благоимени́таго зва́нія, му́ченице, сподо́билася еси́, несказа́ннаго промышле́нія, нра́вовъ твои́хъ проразумѣ́вши благосты́ню.

Взяла́ся еси́, чи́стая, къ житію́ пресвѣ́тлому, плотско́е мудрова́ніе презрѣ́вши и къ жела́ннѣйшему Жениху́ твоему́ крѣ́пко взира́ющи.

Невѣ́ста Христо́ва, Боже́ственною бла́гостію украси́лася еси́, и дѣ́вства добро́тами, и боже́ственными кровьми́ честна́го муче́нія, сугу́быми вѣнцы́ вѣнча́ема, сла́вная.

Богоро́диченъ: Боголѣ́пное селе́ніе, Чи́стая, Ты́ была́ еси́, небе́съ простра́ннѣйшее и чистѣ́йшее, Богоро́дице Дѣ́во, и ны́нѣ о Тебѣ́ ра́дуется дѣ́вственный ли́къ.

Пѣ́снь 3.

Ирмо́съ: Утвержде́ніе на Тя́ надѣ́ющихся, утверди́, Го́споди, Це́рковь, Юже стяжа́лъ еси́ честно́ю Твое́ю кро́вію.

Перворожде́нъ изъ Отца́ пре́жде вѣ́къ, перворожде́нъ Младе́нецъ изъ Дѣ́вы нетлѣ́нныя, Ада́му ру́ку простира́я, яви́ся.

Младоу́мна бы́вша пре́лестію первозда́ннаго па́ки исправля́яй Бо́гъ Сло́во, младе́нствовавъ, яви́ся.

Земли́ исча́діе, па́ки поте́кшее въ ню́, Божества́ сообра́зное естество́ Зижди́тель я́ко непрело́жнѣ, младе́нствовавъ, яви́.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Ага́ѳіе, я́сный и краснѣ́йшій боже́ственныхъ му́ченикъ цвѣ́тъ и сла́ва, души́ моея́ ты́ озлобле́ніе исцѣли́вши, му́ченице, удобри́.

Ро́дными добродѣ́тельми себе́ уясни́ла еси́, Ага́ѳіе, и му́ченица пронарекла́ся еси́, о привре́менныхъ небре́гши и Бо́жіе Ца́рство возлюби́вши.

Всѣ́хъ кра́сныхъ Христа́ предпочла́ еси́, Ага́ѳіе, привлечена́ боже́ственнымъ жела́ніемъ, и мучи́телей свирѣ́пства благоде́рзостно и му́жески попра́ла еси́.

Богоро́диченъ: Богоневѣ́сто Чи́стая, Бо́га, Его́же родила́ еси́, моли́ изба́вити Тя́ пою́щія отъ искуше́ній, и обстоя́ній, и страсте́й, и бѣ́дъ, Всеблаже́нная.

Конда́къ, гла́съ 4. Подо́бенъ: Яви́лся еси́.

Да украси́тся дне́сь Це́рковь порфи́рою сла́вною, омоче́ною отъ чи́стыхъ крове́й Ага́ѳіи му́ченицы, — ра́дуйся, — вопію́щи, — Ката́нская похвало́.

Сѣда́ленъ святы́я, гла́съ 3. Подо́бенъ: Боже́ственныя вѣ́ры.

Сла́вою вѣ́ры и благоче́стіемъ, преподо́бствомъ, и дѣ́вствомъ, и усе́рдіемъ укра́шена страда́нія, нарекла́ся еси́ у́мъ преподо́бенъ, самоизво́ленъ, вои́стинну че́сть къ Бо́гу, оте́честву избавле́ніе, Христу́ я́ко невѣ́ста моля́щися дарова́ти на́мъ ве́лію ми́лость.

Сла́ва, и ны́нѣ, пра́здника, гла́съ то́йже:

Отъ Дѣ́вы Тя́ воплоще́нна, Христе́, ра́дуяся, подъя́тъ свяще́нный Симео́нъ, — ны́нѣ отпуща́еши, — вопія́, — раба́ Твоего́, Влады́ко! Анна же непоро́чная, проро́чица и сла́вная, ны́нѣ исповѣ́даніе и пѣ́ніе прино́ситъ Тебѣ́. Мы́ же, Жизнода́вче, вопіе́мъ Ти́: сла́ва та́ко благоволи́вшему.

Аще е́сть по́стъ: Сла́ва, и ны́нѣ, богоро́диченъ. Аще ли среда́ или́ пято́къ, крестобогоро́диченъ. [Пи́саны сего́ мѣ́сяца въ 18-й де́нь.]
[Сла́ва, и ны́нѣ, богоро́диченъ:

Боже́ственнаго естества́ не отлу́чься, пло́ть бы́въ во чре́вѣ Твое́мъ, но Бо́гъ вочеловѣ́чься и пребы́сть, Иже по Рождествѣ́ Ма́терь Тя́ Дѣ́ву, я́ко пре́жде Рождества́, сохрани́въ Всенепоро́чну, Еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница, Сло́ва нетлѣ́нная Дѣ́ва Ма́ти, на Крестѣ́ зря́щи повѣ́шена, изъ Нея́ безъ болѣ́зни прозя́бшаго, ма́терски подо́бно, рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?]

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Ра́дуйся, Симео́не, неизрече́нныхъ таи́нниче, — Богоро́дица вопія́ше, — о Не́мже отъ Свята́го дре́вле извѣсти́ся тебѣ́ Ду́ха, младе́нствовавшаго Сло́ва Христа́ на ру́ки пріими́, зовы́й Ему́: испо́лнишася вся́ Твоего́ хвале́нія.

На Него́же упова́лъ еси́, Симео́не, во́зрастъ дѣ́тищный, ра́дуяся, подыми́ Христа́, Изра́иля боже́ственнаго утѣше́ніе, зако́на Творца́ и Влады́ку, исполня́ющаго зако́на чи́нъ, зовы́й Ему́: испо́лнишася вся́ Твоего́ хвале́нія.

Ви́дя Симео́нъ Сло́во безнача́льное, съ пло́тію, я́ко на престо́лѣ херуви́мстѣмъ, Дѣ́вою носи́мо, вино́внаго е́же бы́ти вся́ческихъ, я́ко Младе́нцу дивя́ся, вопія́ше Ему́: испо́лнишася вся́ Твоего́ хвале́нія.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Посрами́ся льсти́ваго змíя безу́міе и обличи́ся, дѣ́вы бо сего́ ны́нѣ свирѣ́пство попира́ютъ, Христу́, отъ Дѣ́вы возсія́вшу на земли́ и всѣ́хъ озари́вшу.

Зако́нно цѣлому́дріе нескве́рно удержа́вши, страстоте́рпице, ду́хи, ра́дующися, низложи́ла еси́ лука́вствія, Христо́вою вооружи́вшися благода́тію и кре́стъ Сего́ на ра́мѣхъ взе́мши.

Бу́ди ми́ предста́тельница всему́драя, лю́тыхъ мя́ изыма́ющи и напа́стей, бу́ри же, и ско́рби, и наси́лія изба́ви вра́жія, я́ко да изба́влься, воспою́ тя, я́ко благу́ю предста́тельницу, благоимени́тая.

Богоро́диченъ: Неизмѣ́рно а́нгельскія, Пречи́стая, свѣ́тлости превозшла́ еси́, мы́сленнаго Со́лнца ро́ждши несказа́нно, Христа́, заря́ми Божества́ вѣ́рныхъ мы́сли озаря́ющаго.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, — о, окая́нный, — вопія́ше, — а́зъ! Прови́дѣхъ бо воплоща́ема Бо́га, Свѣ́та невече́рня, и ми́ромъ влады́чествующа.

Разумѣ́въ боже́ственный ста́рецъ проявле́нную дре́вле проро́ку сла́ву, рука́ми Сло́во зря́ Ма́терними держи́мо, — о, ра́дуйся, — вопія́ше, — Чи́стая! Яко престо́лъ, бо держи́ши Бо́га, Свѣ́та невече́рняго и ми́ромъ влады́чествующа.

Покло́нься ста́рецъ, и стопа́мъ боже́ственнѣ прикосну́вся неискусобра́чныя и Богома́тере, — Огнь, — рече́, — но́сиши, Чи́стая: Младе́нца бою́ся объя́ти Бо́га, Свѣ́та невече́рняго и ми́ромъ влады́чествующа.

Очища́ется Иса́ія, отъ серафи́ма у́гль пріе́мъ, — ста́рецъ вопія́ше Богома́тери, — Ты́, я́коже клеща́ми, рука́ми просвѣща́еши мя́, пода́вши, Его́же но́сиши, Свѣ́та невече́рняго и ми́ромъ влады́чествующа.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Боже́ственными велѣ́ніи пра́вима сла́вная, обра́зно плотска́го пристра́стія разрѣши́ла еси́ ю́зъ Ага́ѳіе, ма́слина я́вльшися плодови́та.

Все́ю любо́вію Христо́вою свѣтлѣ́йшая, блиста́нія зря́щи, я́же на земли́ до́лу влеку́щія презрѣ́ла еси́ сла́сти, Онаго и Еди́наго жела́ющи красоты́.

Да неизрече́нную сподо́бишися жи́знь, сла́вная, избра́нныхъ ви́дѣти, му́ки претерпѣ́ла еси́ крѣ́пко, ра́дующися Ага́ѳіе всехва́льная.

Богоро́диченъ: Тебѣ́, ро́ждшей Христа́, всѣ́хъ Содѣ́теля, зове́мъ: ра́дуйся, Чи́стая, ра́дуйся, Свѣ́тъ возсія́вшая на́мъ; ра́дуйся, вмѣсти́вшая Бо́га Невмѣсти́маго.

Пѣ́снь 6.

Ирмо́съ: Возопи́ къ Тебѣ́, ви́дѣвъ ста́рецъ очи́ма спасе́ніе, е́же лю́демъ пріи́де отъ Бо́га: Христе́, Ты́ Бо́гъ мо́й.

Сіо́ну Ты́ ка́мень возложи́лся еси́, непокори́вымъ претыка́ніе и собла́зна ка́мень, неруши́мое вѣ́рныхъ спасе́ніе.

Извѣ́стнѣ нося́ начерта́ніе Иже пре́жде вѣ́къ Тя́ израсти́вшаго, земны́хъ за милосе́рдіе ны́нѣ не́мощію обложи́ся.

Сы́ну Вы́шняго, Сы́ну Дѣ́вы, Бо́гу, Отроча́ти бы́вшему, покло́ньшася Тебѣ́ ны́нѣ отпусти́ съ ми́ромъ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Суему́дренъ сы́й мучи́тель тя́, до́брую дѣ́ву, укра́сти надѣ́яшеся, но безсту́денъ обличи́ся, прирази́вся тве́рдому твоему́ ра́зуму.

Излія́ся благода́ть во устна́хъ твои́хъ, му́ченице благоимени́тая, я́сно бо обличи́ла еси́ я́вѣ безсту́днаго, богонауче́ннымъ сло́вомъ обогати́вшися.

Ка́мень всече́стенъ яви́лася еси́, всехва́льная, у́мъ самоизво́ленъ преподо́бенъ иму́щи и оте́честву избавле́ніе тве́рдо бы́вши, Ага́ѳіе честна́я.

Богоро́диченъ: Псало́мски, восхваля́юще, вопіе́мъ Ти́: ра́дуйся, ту́чнѣйшая горо́ Христа́ Бо́га, въ ню́же всели́тися благоволи́ за на́ше спасе́ніе, Богоневѣ́сто.

Конда́къ пра́здника, гла́съ 1:

Утро́бу Дѣви́чу освяти́вый Рождество́мъ Твои́мъ и ру́цѣ Симео́нѣ благослови́вый, я́коже подоба́ше, предвари́въ, и ны́нѣ спа́слъ еси́ на́съ, Христе́ Бо́же, но умири́ во бранѣ́хъ жи́тельство и укрѣпи́ Импера́тора, Его́же возлюби́лъ еси́, Еди́не Человѣколю́бче.

Икосъ:

Къ Богоро́дицѣ притеце́мъ, хотя́щіи Сы́на Ея́ ви́дѣти, къ Симео́ну носи́ма, Его́же съ небесе́ безпло́тніи ви́дяще, дивля́хуся, глаго́люще: чу́дная зри́мъ ны́нѣ и пресла́вная, непостижи́мая, несказа́нная! Иже бо Ада́ма созда́вый но́сится я́ко Младе́нецъ, Невмѣсти́мый вмѣща́ется на рука́хъ ста́рчихъ, Иже въ нѣ́дрѣхъ неопи́санныхъ Сы́й Отца́ Своего́ во́лею опису́ется пло́тію, а не Божество́мъ, Еди́нъ Человѣколю́бецъ.

Пѣ́снь 7.

Ирмо́съ: Тебе́ во огни́ ороси́вшаго о́троки богосло́вившія, и въ Дѣ́ву нетлѣ́нну все́льшагося Бо́га Сло́ва пои́мъ, благоче́стно пою́ще: благослове́нъ Бо́гъ оте́цъ на́шихъ.

Ада́му извѣсти́ти хотя́й иду́, во а́дѣ живу́щу, и Евѣ принести́ благовѣ́стіе, — Симео́нъ вопія́ше, со проро́ки лику́я: благослове́нъ Бо́гъ оте́цъ на́шихъ.

Ро́да зе́мна избавля́яй Бо́гъ да́же до а́да пріи́детъ, плѣ́ннымъ же пода́стъ всѣ́мъ оставле́ніе и прозрѣ́ніе слѣпы́мъ, я́ко и нѣмы́мъ вопи́ти: благослове́нъ Бо́гъ оте́цъ на́шихъ.

И Твое́ се́рдце, Нетлѣ́нная, ору́жіе про́йдетъ, — Симео́нъ Богоро́дицѣ провозгласи́, — на Крестѣ́ зря́щи Твоего́ Сы́на, Ему́же вопіе́мъ: благослове́нъ Бо́гъ оте́цъ на́шихъ.

Инъ.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Яко зѣло́ свѣ́тло вѣща́ющи и я́вѣ мучи́теля устраши́ла еси́ сло́вомъ прему́дрости и благода́ти, терпѣ́ніемъ же му́къ у́гліе о́гненное неболѣ́зненно терпя́щи, взыва́ла еси́: благослове́нъ еси́, Бо́же оте́цъ на́шихъ.

Неи́стовствомъ лю́тымъ содержи́мь, злосе́рдый недоумѣва́ше лю́тѣ, твою́ ви́дя ю́ность и сосце́въ твои́хъ прозябе́ніе, ра́дующи бо ся, му́ченице, вопія́ла еси́ твоему́ Жениху́, взыва́ющи: благослове́нъ еси́, Бо́же оте́цъ на́шихъ.

Предста́ свѣ́тло Христо́въ учени́къ тебѣ́, стрего́мѣй, твоя́ исцѣля́я лю́тыя ра́ны, я́же подъя́ла еси́, непобѣди́мая му́ченице, Спа́сова дѣви́це, ра́дующися и глаго́лющи: благослове́нъ еси́, Бо́же оте́цъ на́шихъ.

Богоро́диченъ: Умерщвля́ется Ада́мъ, преступи́въ за́повѣдь Вседержи́теля, Ты́ же, ро́ждши вѣ́чную Жи́знь, Дѣ́во Всенепоро́чная, сего́ изба́вила еси́ отъ сме́рти, Сы́ну Твоему́ взыва́юща: благослове́нъ еси́, Бо́же оте́цъ на́шихъ.

Пѣ́снь 8.

Ирмо́съ: Нестерпи́мому огню́ соедини́вшеся, богоче́стія предстоя́ще, ю́ноши, пла́менемъ же неврежде́ни, Боже́ственную пѣ́снь поя́ху: благослови́те, вся́ дѣла́ Госпо́дня Го́спода, и превозноси́те во вся́ вѣ́ки.

Лю́діе Изра́илевы, Твою́ сла́ву Емману́ила зря́ще Отроча́ изъ Дѣ́вы, предъ лице́мъ Боже́ственнаго ковче́га ны́нѣ лику́йте: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Се́, Симео́нъ вопія́ше, — прерѣка́емое зна́меніе Се́й бу́детъ, Бо́гъ Сы́й и Отроча́, — Сему́, вѣ́рніи, возопіи́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Живо́тъ Сы́й, Се́й бу́детъ паде́ніе непокори́вымъ, младе́нствовавъ Бо́гъ Сло́во, я́ко воста́ніе всѣ́мъ вѣ́рою пою́щимъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Въ весе́ліи и ра́дости превѣ́чнѣй жи́ти сподо́бившися, неизрече́нною твое́ю сла́вою озари́тися чту́щимъ тя́, Ага́ѳіе, Го́сподеви помоли́ся и нетлѣ́нныя жи́зни наслади́тися.

Умо́мъ, и се́рдцемъ, и душе́ю возлю́бльши Христа́ па́че сло́ва, Многорачи́тельнаго, Еди́наго, впери́лася еси́ Тому́, вопію́щи: теку́ въ слѣ́дъ Тебе́ и вселю́ся съ Тобо́ю во вѣ́ки.

Преесте́ственными ря́снами и кра́сною оде́ждею укра́шена, я́ко царе́ва дщи́, въ че́сти Христо́вѣ предстои́ши, Ага́ѳіе, взыва́ющи: Тя́ превозно́симъ, Го́спода, во вѣ́ки.

Богоро́диченъ: Мѵ́ро излія́нное на́мъ, Богоро́дице, Христа́ во чре́вѣ нося́щи, облагоуха́ла еси́ мíръ богодохнове́нными воня́ми. Тѣ́мже Тебѣ́, Дѣ́во, взыва́емъ: ра́дуйся, мѵрополо́жнице мѵрово́ннаго мѵ́ра.

Пѣ́снь 9.

Ирмо́съ: Въ зако́нѣ сѣ́ни и писа́ній о́бразъ ви́димъ, вѣ́рніи: вся́къ му́жескій по́лъ, ложесна́ разверза́я, свя́тъ Бо́гу. Тѣ́мъ перворожде́нное Сло́во Отца́ Безнача́льна, Сы́на, первородя́щася Ма́терію неискусому́жно, велича́емъ.

Иже дре́внимъ новорожде́нныхъ го́рличищъ супру́гъ дво́ица же бя́ше птенце́въ, въ ни́хже мѣ́сто боже́ственный ста́рецъ и цѣлому́дренная Анна проро́чица отъ Дѣ́вы рожде́нному и Сы́ну Единоро́дному Отчу, въ це́рковь приноси́му, слу́жатъ, велича́юще.

Возда́лъ еси́ мнѣ́, — вопія́ше Симео́нъ, — спасе́нія Твоего́, Христе́, ра́дованіе, воспріими́ Твоего́ служи́теля, сѣ́нію претружде́ннаго, но́выя благода́ти священнопроповѣ́дника та́йнаго, во хвале́ніи велича́юща.

Священнолѣ́пно исповѣ́дашеся Анна, прорица́ющи, цѣлому́дренная, и преподо́бная, и ста́рица, Влады́цѣ въ це́ркви я́вственно, Богоро́дицу же, проповѣ́дающи всѣ́мъ су́щимъ, велича́ше.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Побѣди́тельными вѣнцы́ украси́вшися, богому́драя Ага́ѳіе, десни́цею живонача́льною ны́нѣ изба́витися помоли́ся, я́коже оте́честву твоему́, отъ бу́ри, я́ко пе́рвѣе огня́ уста́вила еси́ стремле́ніе, да вси́ тя́ пѣ́сньми непреста́нно велича́емъ.

Боже́ственнымъ про́мысломъ снабдѣва́я вся́ческая, Христо́съ, ны́нѣ воздая́ твое́й, му́ченице, до́блести, вселя́етъ тя́ въ се́лѣхъ небе́сныхъ я́ко невѣ́сту всенепоро́чную Свою́ и ра́доватися со а́нгелы и съ му́ченики сподо́билъ е́сть.

Ми́лостивна, о страстоте́рпице, Судію́ вся́ческихъ — Христа́ сотвори́ мнѣ́, честна́я, мольба́ми твои́ми, пресла́вная, и прегрѣше́ній мои́хъ мно́жество очи́стити Благоутро́бнаго при́сно моля́щи не преста́й, му́чениковъ удобре́ніе.

Богоро́диченъ: Вопло́щься неизрече́нно отъ чи́стыхъ Твои́хъ крове́й, я́ко со́лнце, яви́ся на́мъ, Пречи́стая Ма́ти безневѣ́стная, пре́жде вѣ́къ всѣ́хъ Отцу́ Собезнача́льный Сы́нъ и, тму́ отгна́въ, просвѣти́ вся́ческая.

Свѣти́ленъ му́ченицѣ. Подо́бенъ: Жены́, услы́шите.

Сосце́въ твои́хъ отъя́тія претерпѣ́ла еси́, до́брая дѣви́це, и вся́ки ины́я му́ки Христа́ ра́ди, страстоте́рпице, тѣ́мъ и въ черто́гъ тя́ кра́сный всели́ тво́й Жени́хъ, сла́вная, лику́ющу со а́нгелы, дѣ́во му́ченице Ага́ѳіе.

Сла́ва, и ны́нѣ, пра́здника:

Ду́хомъ во святи́лищи предста́въ, ста́рецъ на ру́ки воспрія́тъ зако́на Влады́ку, вопія́: ны́нѣ соу́зъ мя́ плотски́хъ разрѣши́, я́коже ре́клъ еси́, съ ми́ромъ: ви́дѣхъ бо очи́ма открове́ніе язы́ковъ и Изра́илю спасе́ніе.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Стра́хомъ же и ра́достію* на рука́хъ Влады́ку* Симео́нъ держа́,* живота́ проша́ше разрѣше́нія,* поя́ Богома́терь.

Сти́хъ: Ны́нѣ отпуща́еши раба́ Твоего́, Влады́ко,* по глаго́лу Твоему́, съ ми́ромъ.

Ны́нѣ мя́ къ жи́зни* отпусти́ и́стиннѣй, —* Симео́нъ вопія́ше, — Спа́се мо́й,* ви́дѣхъ бо Тя́,* Свѣ́та мíра, Влады́ко.

Сти́хъ: Свѣ́тъ во открове́ніе язы́ковъ* и сла́ву люде́й Твои́хъ Изра́иля.

Анна проро́чески,* цѣлому́дренная и преподо́бная,* ны́нѣ исповѣ́дашеся* отъ Дѣ́вы Прозя́бшему* земны́хъ на избавле́ніе.

Сла́ва, и ны́нѣ, гла́съ и подо́бенъ то́йже:

Ра́дуйся, Яже ра́дость* мíру пріе́мшая,* Христа́ Жизнода́вца,* и уста́вльшая печа́ль,* Дѣ́во, прама́тернюю.

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 55 – 61 об.

/ Къ оглавленію раздѣла /


Наверхъ / Къ титульной страницѣ

0