Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 27 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Февруа́рія въ 4-й де́нь.
Слу́жба преподо́бнаго отца́ на́шего Кири́лла, Новоезе́рскаго чудотво́рца.

[НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 2. Подо́бенъ: Егда́ отъ дре́ва.

Украше́ніе и́нокомъ бы́въ,* собра́лъ еси́ неизче́тно мно́жество* пѣ́ти Го́спода, преподо́бне Кири́лле,* и къ небеси́ всѣ́хъ наста́вилъ еси́ до́брѣ,* послѣ́дующихъ боже́ственнымъ твои́мъ уче́ніемъ* и подо́бящихся твоему́ житію́ добродѣ́тельному,* о́тче Кири́лле.* Съ ни́миже тя́ почита́емъ,* свяще́нно въ преставле́ніи твое́мъ ра́дующеся.

Гла́съ 1:

Преподо́бне о́тче Кири́лле,* любве́ ра́ди Учи́теля твоего́,* вся́, я́же на земли́, преоби́дѣлъ еси́* и, въ пусты́ню всели́вся,* пло́ть твою́ воздержа́ніемъ умертви́лъ еси́,* и по́стническими труды́* твое́ житіе́ уясни́лъ еси́;* отону́дуже и ученики́ себѣ́ собра́въ,* ревну́ющихъ твоему́ житію́,* си́хъ Христу́ приве́лъ еси́.* Его́же моли́ спасти́ всѣ́хъ на́съ,* тя́ почита́ющихъ.

Отче богому́дре Кири́лле,* воздержа́ніемъ Бо́гу соединя́яся,* непобѣжде́нъ пребы́сть кова́рствіи бори́теля* и ра́бъ яви́лся еси́ Вседержи́теля;* отону́дуже почита́емъ тя́* и, боже́ственную твою́ па́мять восхваля́юще,* ра́достно вѣ́рою пра́зднуемъ.

Преподо́бне о́тче Кири́лле,* въ пусты́няхъ при́сно,* и въ пеще́рахъ, и въ гора́хъ вѣ́рою пребыва́я,* Бо́га взыска́лъ еси́* и Сего́ ра́ди обрѣ́лъ еси́, я́коже возжелѣ́,* невозвра́тною душе́ю* восхожде́ніи до́брыми всегда́* и́нокъ мно́жество приве́лъ еси́* Христу́ спаса́емыхъ.

Преподо́бне о́тче, прему́дре Кири́лле,* боля́щимъ ты́ яви́лся еси́ исцѣле́ніе,* и хромы́мъ хожде́ніе ми́лостивно сотворя́еши,* и всѣ́мъ, притека́ющимъ съ вѣ́рою* къ цѣльбоно́сному гро́бу твоему́,* прося́щимъ по́мощи и заступле́нія.* Ты́ же моли́твами твои́ми* исцѣле́ніе неду́гующимъ неоску́дно подава́еши.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію я́ко мо́щно возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее, и ны́нѣ на небесѣ́хъ зерца́ломъ разрѣ́шшимся, о́тче на́шъ Кири́лле, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. И чте́нія три́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8, самогла́сны:

Преподо́бне о́тче Кири́лле, да́ръ Бо́жій избра́въ са́мъ себе́, и прине́слъ еси́ бдѣ́ніе всено́щное, и умиле́ніе стяжа́въ, поуче́ніе боже́ственно, коне́чное смире́ніе, наде́жду, вѣ́ру, любо́вь нерастворе́ну, трезвѣ́ніе и милосе́рдіе, и́стинное безстра́стіе, моли́тву, сто́лпъ тя́ показа́вше свѣтови́днѣйшій.

Гла́съ 2:

По успе́ніи твое́мъ, блаже́нне, учи́тельница быва́етъ на́мъ твоя́ ра́ка, при́сно бо излива́ющимися чудесы́ вопія́ и возводя́ къ трудо́мъ и подвиго́мъ, глаго́ля: возлюби́те Го́спода, да обря́щете благода́ть вѣ́чную, ничто́же па́че Его́ почти́те, да, егда́ пріи́детъ, и обря́щете поко́й со избра́нными. Его́же да и мы́ улучи́мъ твои́ми моли́твами.

Гла́съ 4:

Житіе́ нескве́рно, терпѣ́ніе, и кро́тость, и любо́вь нелицемѣ́рну, воздержа́ніе, и стоя́ніе всено́щное, и умиле́ніе Боже́ственное, вѣ́ру и наде́жду и́стинную и ми́лованіе, о́тче, стяжа́въ, я́ко а́нгелъ, пожи́лъ еси́ на земли́ съ пло́тію, Кири́лле блаже́нне, моли́твенниче о душа́хъ на́шихъ.

Земны́й а́нгеле, небе́сный человѣ́че бы́лъ еси́, преподо́бне, исто́чникъ умиле́нія и ми́лованія, струя́ пучи́ны, грѣ́шникомъ пору́чникъ, ма́слина вои́стинну Бо́жія плодови́та и трудо́въ твои́хъ, утѣ́ши ли́ца, Кири́лле чу́дне, вѣ́рно восхваля́ющимъ тя́.

Сла́ва, гла́съ 6:

Преподо́бне о́тче Кири́лле, явле́ніемъ Бо́жія Ма́тере наставля́емь и того́ сія́ніемъ озаря́емь, и пусты́ню, на ню́же зва́нъ бы́сть, дости́глъ еси́ и, въ не́й трудолю́бно подвиза́вся, вше́лъ еси́ въ незаходи́мый свѣ́тъ ра́зума, идѣ́же мно́гихъ Го́сподеви ревни́телей твоему́ житію́ устро́илъ еси́. Тѣ́мже и по сме́рти отъ Бо́га дарова́нія прія́лъ еси́, бѣ́сы прогони́ти и исцѣле́нія разли́чныхъ неду́говъ человѣ́комъ дарова́ти, вѣ́рою отъ души́ притека́ющимъ ко хра́му твоему́ всечестно́му. Моли́ спасти́ почита́ющихъ любо́вію святу́ю па́мять твою́.

И ны́нѣ, богоро́диченъ:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

На стихо́внѣ стихи́ры, гла́съ 1. Подо́бенъ: Прехва́льніи.

Отче преподо́бне Кири́лле,* твоя́ кра́сная па́мять —* по́стникомъ собра́ніе и весе́ліе,* чуде́съ бо благода́тію* просла́вился еси́ отъ Бо́га,* Его́же моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Отче Кири́лле преподо́бне,* твоего́ уста́ва по́стнаго* проти́вніи убоя́шася* и про́кляти бы́ша* твои́ми непреста́нными моли́твами, всехва́льне,* и́бо сожи́тельствующа Бо́га стяжа́въ въ себѣ́.* Его́же моли́* дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Отче преподо́бне Кири́лле,* Христа́ возлюби́въ вся́ко* и Того́ Боже́ственнымъ стопа́мъ послѣ́довалъ еси́,* кре́стъ на ра́мо взе́мъ, неосла́бно ше́ствовалъ еси́,* и живе́ши, богоно́се, ду́хомъ.* И ны́нѣ моли́* дарова́ти душа́мъ на́шимъ* ми́ръ и ве́лію ми́лость.

Сла́ва, гла́съ 6:

Тезоимени́то зва́ніе Пречи́стыя я́ко услы́шавъ, по́стническими труды́ себе́ обложи́въ, мíрови и страсте́мъ себе́ умертви́въ, и со Христо́мъ изво́лилъ еси́ жи́ти; тѣ́мъ и по сме́рти исцѣле́нія источа́етъ гро́бъ тво́й, преподо́бне Кири́лле, вѣ́рою притека́ющимъ. Но, я́ко имѣ́я дерзнове́ніе къ прославля́емому во святы́хъ Христу́, моли́ся о и́же вѣ́рою соверша́ющихъ па́мять твою́, и чту́щихъ труды́ твоя́, я́же за Него́ претерпѣ́лъ еси́, и на́мъ улучи́ти дерзнове́ніе въ де́нь суда́, мо́лимся.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь, гла́съ 8:

Бо́жіимъ Ду́хомъ подвиза́емь, сле́зъ твои́хъ ту́чами изсо́хшее напои́лъ еси́, и безпло́тное въ пусты́ни житіе́ показа́лъ еси́, и е́же изъ глубины́ се́рдца бо́дренными моли́твами и посто́мъ, благодѣя́нія труды́ уплодоноси́лъ еси́, и вселе́нную всю́ просвѣти́лъ еси́ сія́ніемъ чуде́съ твои́хъ, о́тче на́шъ Кири́лле, моли́ Христа́ Бо́га, спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
По 1-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Яко безпло́тенъ, о́тче, пожи́лъ еси́ на земли́, превознося́щагося врага́ смири́лъ еси́, тѣ́мже ны́нѣ съ невеще́ственными ли́ки, блаже́нне, водворя́яся, та́мо блаже́нства наслажда́яся, помина́й па́мять твою́ дне́сь пра́зднующихъ, да вси́ ра́достными пѣ́сньми воспѣва́емъ Христа́ Бо́га на́шего, такову́ю тебѣ́ благода́ть да́вшаго. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-й каѳи́смѣ сѣда́ленъ, гла́съ 8. Подо́бенъ: Повелѣ́нное та́йно.

Страсте́й тму́ моли́твами твои́ми, о́тче, отгна́лъ еси́, се́рдце твое́ въ чу́вствіи чи́сто Бо́гу предста́вивъ, тѣ́мже въ тя́ всели́ся благода́ть Ду́ха Пресвята́го, е́же вѣ́дѣти бу́дущая, я́ко бли́зъ су́щая ты́ проявля́я, и проси́вшимъ у тебе́ съ вѣ́рою непло́дствія соу́зъ разрѣши́лъ еси́. Тѣ́мже и мы́ мо́лимся: проси́ на́мъ отъ Христа́ ми́ра и ве́лія ми́лости. [Два́жды.]

Сла́ва, и ны́нѣ, богоро́диченъ:

Отъ крове́й Твои́хъ, Чи́стая, воплоще́ннаго Бо́га ро́ждшая, измѣне́на мя́ при́сно грѣха́ми, и прило́ги лука́ваго, Богоблагода́тная, утверди́ се́рдце мое́, Блага́я, Твои́ми моли́твами, я́ко да и а́зъ благода́рственно зову́ Ти: Богороди́тельнице Марíе, поми́луй ста́до Твое́, е́же стяжа́ла еси́, Всенепоро́чная.

[Велича́ніе:

Ублажа́емъ тя́, преподо́бне о́тче Кири́лле, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ. Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 8. Подо́бенъ: Прему́дрости.

Въ пусты́ню, преблаже́нне, всели́вся, и въ не́й пречестны́й хра́мъ Бо́жія Ма́тере воздви́глъ еси́ и мно́жество и́ночествующихъ та́мо собра́лъ еси́ Го́сподеви и съ тобо́ю рабо́тающихъ, и́хже сохрани́ отъ вся́каго вре́да лука́ваго, да вси́ благода́рственно вопіе́мъ ти́: преблаже́нне Кири́лле, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га, пло́тію, вси́ ублажа́емъ, ро́ди человѣ́честіи: Огнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пи́сана на стихо́внѣ, Сла́ва: [Тезоимени́то зва́ніе Пречи́стыя я́ко услы́шавъ, по́стническими труды́ себе́ обложи́въ, мíрови и страсте́мъ себе́ умертви́въ, и со Христо́мъ изво́лилъ еси́ жи́ти; тѣ́мъ и по сме́рти исцѣле́нія источа́етъ гро́бъ тво́й, преподо́бне Кири́лле, вѣ́рою притека́ющимъ. Но, я́ко имѣ́я дерзнове́ніе къ прославля́емому во святы́хъ Христу́, моли́ся о и́же вѣ́рою соверша́ющихъ па́мять твою́, и чту́щихъ труды́ твоя́, я́же за Него́ претерпѣ́лъ еси́, и на́мъ улучи́ти дерзнове́ніе въ де́нь суда́, мо́лимся.]

Кано́нъ Богоро́дицѣ со ирмосо́мъ на 6 и свято́му два́ кано́на на 8.

[Кано́нъ пе́рвый], гла́съ 2.
Пѣ́снь 1.

Ирмо́съ: Во глубинѣ́ постла́ иногда́ фараони́тское всево́инство преоруже́нная си́ла, вопло́щшееся же Сло́во всезло́бный грѣ́хъ потреби́ло е́сть, препросла́вленный Госпо́дь, сла́вно бо просла́вися.

Слуга́ Бо́жій бы́въ, о́тче Кири́лле, сохрани́лъ еси́ я́ко свяще́нникъ спаси́тельная повелѣ́нія, мірско́е смуще́ніе оста́вилъ еси́ и, кре́стъ сво́й взе́мъ, живоно́снымъ стопа́мъ, всеблаже́нне, послѣ́довалъ еси́.

Спасе́нію Хода́тая свѣ́дый, ра́зумъ богодохнове́нный и все́ Писа́ніе благоче́стно проше́лъ еси́, о́тче преподо́бне Кири́лле, свяще́нства отону́ду пріе́мъ сано́вное.

Отъ ю́ности твоея́, о́тче, у́мъ къ Бо́гу впери́въ, тлѣ́нными нетлѣ́нная, я́ко до́брый купе́цъ, искупи́лъ еси́. Тѣ́мже, ны́нѣ соше́дшеся, па́мять твою́ почита́емъ.

Богоро́диченъ: Возсія́въ, я́ко со́лнце, изъ Тебе́, Ма́ти Приснодѣ́во, Иже отъ Отца́ пре́жде вѣ́къ неви́димый, Имже пресла́вно тѣ́ломъ опису́емь, благоче́стія заре́ю человѣ́ки просвѣти́лъ е́сть.

Другíй кано́нъ, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Пѣсносло́вити достохва́льную па́мять твою́ усе́рдно, преподо́бне, благода́ть пода́ждь, Кири́лле. Моли́ о на́съ и о всѣ́хъ, согрѣши́вшихъ, о оставле́ніи.

Иноческій сво́й кре́стъ взе́мъ, преподо́бне, послѣ́довалъ еси́ Христу́ Вседержи́телю и, умертви́въ пло́ть, жи́зни вѣ́чныя сподо́бился еси́, преподо́бне.

Зако́ну Бо́жію повину́яся, досточу́дне, страстна́я взыгра́нія увяди́лъ еси́ воздержа́нія по́двигомъ и безстра́стія благода́тію обогати́лся еси́.

Богоро́диченъ: Иже Тебе́ ра́ди нетлѣ́ніемъ обога́щшеся, Богороди́тельнице Пречи́стая, — ра́дуйся, Обра́дованная, — вопіе́мъ Ти́, — преподо́бныхъ и пра́ведныхъ украше́ніе.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Отъ на́съ ны́нѣ сло́во похвале́нія плето́мо пріе́мля, богоно́се, весели́ся, твои́ми болѣ́зньми наслажда́яся, зовы́й, преподо́бне: Ты́ еси́ Бо́гъ на́шъ.

Словеса́ услы́шавъ Влады́чня, оста́вилъ еси́ мíръ и я́же въ не́мъ, и приве́лъ еси́ сѣ́мя твое́ Го́сподеви, зовы́й: Ты́ еси́ Бо́гъ на́шъ.

Ра́йскую жи́знь и та́мо святы́хъ весе́ліе всегда́ во умѣ́ твое́мъ помина́я, преподо́бне, тѣ́мже и во слеза́хъ, и въ воздыха́ніихъ всю́ свою́ жи́знь, о́тче Кири́лле, проше́лъ еси́ и сего́ ра́ди и по сме́рти отъ Христа́ чудесы́ просла́вился еси́.

Богоро́диченъ: Ты́ еди́на па́че всѣ́хъ, я́же отъ вѣ́ка вели́кихъ, сподо́билася еси́ и вы́ше естества́, Бо́га бо, Невмѣсти́маго все́ю тва́рію, во утро́бѣ Твое́й понесла́ и воплоти́ла еси́. Тѣ́мъ Тя́, Богоро́дицу, вси́ велича́емъ.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Во́дъ живо́тныхъ испо́лншися Боже́ственнаго Ду́ха, богоно́се, душа́ твоя́ рѣ́ки чуде́съ то́читъ, неду́жнымъ исцѣле́ніе подая́.

Къ широтѣ́ ра́йстей всели́лся еси́, всеблаже́нне Кири́лле, тѣ́сную ше́ствовавъ стезю́, и бѣсо́въ кова́рствія, и ше́ствія безчи́сленная утѣсни́лъ еси́.

Тече́ніемъ твои́хъ сле́зъ напая́емь, я́ко дре́во плодоно́сно, Кири́лле, благопло́днѣ поле́зныя прине́слъ еси́ добродѣ́тели, чуде́съ Боже́ственную благода́ть пріе́мь.

Богоро́диченъ: Еди́нъ Благíй про́йде утро́бу, воплоща́емь, и Человѣ́къ ви́дѣнъ бы́сть соверше́нъ, Его́же моли́ спасти́ пою́щія Тя́.

Сѣда́ленъ, гла́съ 1:

Мона́шествовавъ богоуго́днѣ и добродѣ́тельно пожи́въ, благода́ть исцѣле́нія прія́лъ еси́, блаже́нне Кири́лле, зна́менія соверши́въ стра́шна; оби́тель же совокупи́въ свяще́нную, приве́лъ еси́ мно́жество спаса́емыхъ Го́сподеви, пребога́те. Сла́ва Бо́гу, просвѣти́вшему тя́, сла́ва вѣнча́вшему тя́, сла́ва святу́ю твою́ па́мять просла́вльшему. [Два́жды.]

Сла́ва, и ны́нѣ, богоро́диченъ:

Ру́цѣ Твои́ Боже́ственнѣи, и́маже Созда́теля понесла́ еси́, Дѣ́во Пречи́стая, вопло́щшагося благосты́нею, просте́рши, умоли́ Его́ изба́вити на́съ отъ искуше́ній, и страсте́й, и бѣ́дъ, хва́лящихъ Тя́ любо́вію и вопію́щихъ: сла́ва все́льшемуся въ Тя́, сла́ва проше́дшему изъ Тебе́, сла́ва изба́вльшему на́съ Рождество́мъ Твои́мъ.

Пѣ́снь 4.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Отве́рзлъ еси́, Кири́лле, две́ри своя́, Авраа́му уподо́блься, всѣ́мъ тре́бующимъ, преподо́бне Кири́лле, тѣ́мъ Христо́съ отверза́етъ ти́ небе́сная врата́, преблаже́нне.

Во всечестны́й и во свяще́нническій са́нъ украси́лся еси́, Кири́лле блаже́нне, и и́ноческому три́знищу, ра́дуяся, прите́клъ еси́, всѣ́мъ до́момъ, преблаже́нне, приводи́мь.

Посто́мъ и моли́твами тѣ́ло твое́, о́тче Кири́лле, изнури́лъ еси́ и сего́ ра́ди сподо́бился еси́ ви́дѣти неизрече́нная блага́я, я́же святы́мъ угото́ванная, съ ни́миже, о́тче Кири́лле, о на́съ моли́.

Богоро́диченъ: Исцѣля́я Евино дре́внее преступле́ніе, въ Тебе́, Пренепоро́чную и Пречи́стую, всели́ся и всего́ мя, человѣ́ка, вообрази́въ па́дшаго, Пребоже́ственный.

Инъ.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Распе́нъ себе́ самого́ страсте́мъ и мíрови, богому́дре о́тче, на Крестѣ́ распросте́ршему дла́ни Христу́ угоди́лъ еси́, Кири́лле, Его́же моли́ спасти́ ду́ши на́ша.

По́двигомъ страда́нія плотскíя умертви́лъ еси́ у́ды, ме́ртвыя же моли́твою возста́вилъ еси́, и приходя́щія усе́рдно вѣ́рою чу́дно оправда́лъ еси́, и вся́къ неду́гъ, о́тче, исцѣли́лъ еси́.

Ду́ха Свята́го присво́илъ еси́ твое́й души́ и́скренно, Имже па́стырь избра́нъ показа́лся еси́, о́тче богому́дре, и и́нокующимъ украше́ніе прекра́сное.

Богоро́диченъ: Яко до́ждь на руно́, Чи́стая, въ честно́е чре́во Твое́ Сло́во сни́де воплоща́емо, и погуби́ многобо́жія одожде́ніемъ, Всенепоро́чная, и го́рькую зи́му разори́лъ е́сть.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Христокра́сному одержа́лся еси́ житію́, Кири́лле блаже́нне, всѣ́мъ че́стенъ яви́ся. Вѣ́сть бо вои́стинну добродѣ́тель, сла́вне, соверша́ти сію́ иму́щихъ, яви́лъ бо ся еси́ свяще́нникъ Христо́въ достопрія́тенъ.

Си́лою Боже́ственною укрѣпля́емь, блаже́нне Кири́лле, мірску́ю любо́вь крѣ́пко отве́рглъ еси́, и Влады́цѣ, ра́дуяся, прише́лъ еси́ во́льнымъ твои́мъ нра́вомъ, и сохрани́въ вѣ́ру невреди́му, и вѣне́цъ сла́вы, богому́дре, прія́лъ еси́.

Дне́сь воспѣва́ема свяще́нная па́мять твоя́, преподо́бне Кири́лле, весели́тъ ученики́ твоя́ и, честно́е твое́ успе́ніе сла́вяще, глаго́лютъ: моли́твами твои́ми, о́тче, соблюди́ воспѣва́ющихъ тя́.

Богоро́диченъ: Еди́ну на́мъ во двою́ существу́ ви́диму Ѵпоста́сь Еди́на Благослове́нная ражда́еши неизрече́нно, Бо́жіе Сло́во, воплоти́вшееся за ми́лость неизрече́нную, Того́ моли́ сохрани́тися пою́щимъ Тя́.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Иже въ ми́лость Бо́га моля́, о́тче преподо́бне Кири́лле, напо́лнилъ еси́, я́коже Илія́ чва́нецъ, еле́я, сосу́дъ вели́къ, отъ зря́щихъ удивля́емь вѣ́рно.

Яко чи́стъ душе́ю, ты́, во изступле́ніи бы́въ, ви́дѣлъ еси́ всю́ зе́млю, я́ко подъ заре́ю сія́ющу, Еди́наго Бо́га почита́ющу, всеблаже́нне Кири́лле.

Чудодѣ́йствуя о Христѣ́, водѣ́ истещи́ моли́твою, преподо́бне Кири́лле, мо́лиши Подвигополо́жника, я́же, пребыва́ющи, проповѣ́даетъ чудеса́.

Богоро́диченъ: Живы́й на небесѣ́хъ восхотѣ́ всели́тися въ ложесна́ Твоя́, Чи́стая, я́ко да на́съ хра́мы Тро́ицѣ сотвори́тъ, Тя́, Богоро́дицу, проповѣ́дающихъ.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же мя́ возведи́.

Жите́йскихъ веще́й, о́тче Кири́лле, нестоя́щее свѣ́дый, сіе́ оста́вилъ еси́ и къ воздая́нію потща́ся го́рняго жре́бія, пребога́те.

Благоче́стно и́нокъ мно́жество пита́ти не оста́вилъ еси́, о́тче блаже́нне Кири́лле, тѣ́мъ пи́щи бо́льшія во оби́телехъ небе́сныхъ сподо́бился еси́.

Мѣ́сто, е́же сподо́бися прія́ти честны́я мо́щи твоя́, преподо́бне, освяти́ся и по мно́гимъ страна́мъ прославля́емо е́сть, я́ко въ себѣ́ мо́щи твоя́ имѣ́етъ.

Богоро́диченъ: Неискусому́жная Пречи́стая, родила́ еси́ и пребыва́еши Дѣ́вою, явля́ющи Божества́ и́стиннаго Сы́на и Бо́га Твоего́ о́бразы.

Инъ.

Ирмо́съ: Во глубинѣ́ грѣхо́внѣй содержи́мь е́смь, Спа́се, и въ пучи́нѣ жите́йстѣй обурева́емь, но, я́коже Іо́ну отъ звѣ́ря, и мене́ отъ страсте́й возведи́ и спаси́ мя.

Свѣтосія́ніи просвѣща́емь Свята́го Ду́ха, чудотво́рче Кири́лле, и́нокующимъ свѣти́льникъ свѣ́телъ яви́лся еси́.

Яко пресла́вно житіе́ твое́, и́мже ста́до и́нокъ приве́лъ еси́ къ ра́зуму спаси́тельному.

Жи́тель бы́въ Ца́рства небе́снаго, богому́дре Кири́лле, сего́ улучи́ти моли́ вѣ́рою тя́ при́сно ублажа́ющимъ.

Богоро́диченъ: Изъ утро́бы Твоея́, Чи́стая, возсія́въ Пра́вды невече́рнее Со́лнце и вѣ́рныхъ просвѣти́, Богоро́дице, Дѣ́во Всепѣ́тая.

Конда́къ, гла́съ 8:

Взбра́нному и крѣ́пкому адама́нту, прогони́телю бѣсо́въ, но́вому чудотво́рцу, побѣди́тельная, страсте́й злы́хъ свободи́вшеся, благода́рственная воспису́емъ ти́, о́тче на́шъ Кири́лле. Но я́ко имѣ́я дерзнове́ніе у престо́ла Христо́ва, вѣ́рою чту́щихъ тя́, гра́дъ же и лю́ди, моли́твою твое́ю сохраня́й, ты́ бо еси́ Импера́тору Крестоно́сному, и ста́ду твоему́ похвала́ и утвержде́ніе.

Икосъ:

Услы́шавъ Христо́въ глаго́лъ и оста́вивъ плотска́я мудрова́нія, бога́тство и сла́ву, я́ко пра́хъ, вмѣни́въ и на стра́сти, я́ко безпло́тенъ, подвиза́вся, и безпло́тныхъ ликостоя́нію чистото́ю уподо́бися, ра́зума дарова́нія прія́лъ еси́. Тѣ́мъ въ пѣ́снехъ си́це ти́ вопіе́мъ, реку́ще: ра́дуйся, Кири́лле преподо́бне и богоно́се, небе́сный человѣ́че, земны́й а́нгеле; ра́дуйся, кромѣ́ мíра су́етнаго пусты́ню содѣ́лавый въ Кра́снѣмъ о́стровѣ и въ не́мъ оби́тель соста́вивъ. Ра́дуйся, я́ко въ не́й и́нокъ мно́жество собра́лъ еси́ и отъ ни́хъ слы́шиши си́це реку́щихъ: ра́дуйся, и́нокующимъ о спасе́ніи хода́тай; ра́дуйся, уныва́ющимъ о́бразъ утѣше́нія; ра́дуйся, и́нокомъ отъ навѣ́тъ вра́жіихъ изба́вителю; ра́дуйся, ско́рбемъ губи́телю на́шего естества́, я́ко отгоня́я по́мыслы зло́бныя; ра́дуйся, скорбя́щимъ душе́ю сла́дкое утѣше́ніе и ра́дости Боже́ственныя пода́телю; ра́дуйся, на́шъ предста́телю и изба́вителю. Ра́дуйся, преподо́бне о́тче Кири́лле, и́нокомъ удобре́ніе.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Избра́ніемъ суда́ украси́лся еси́, свяще́нникъ бы́въ, Кири́лле, о́тче преподо́бне. Тѣ́мъ вше́лъ еси́ вну́трь вы́шняго хра́ма незаходи́мыя зари́, своего́ священнотворе́нія плодо́въ наслажда́яся, поя́: благослове́нъ Бо́гъ оте́цъ на́шихъ.

Оте́ческая возлюби́лъ еси́ ликостоя́нія, и въ ли́цѣхъ оте́цъ ра́достно просла́вился и, Христу́ предстоя́, всеблаже́нне преподо́бне Кири́лле, пріе́млеши своего́ служе́нія всего́ воздая́нія, воспѣва́я: благослове́нъ Бо́гъ оте́цъ на́шихъ.

Источа́етъ чудеса́ честна́я ра́ка твоя́, преподо́бне, преизоби́лующи благода́тію, и вѣ́рою приходя́щимъ здра́віе подае́тъ, Христу́ отъ души́ вопію́щимъ: благослове́нъ Бо́гъ оте́цъ на́шихъ.

Богоро́диченъ: Изъ утро́бы Ты́, Дѣ́во, Пра́вды Со́лнце породила́ еси́, Христа́, дебельство́мъ пло́ти пріобщи́вшася человѣ́комъ, и Дѣ́вою пребыла́ еси́, Тѣ́мъ воспѣва́емъ: благослове́нъ, Пречи́стая, пло́дъ Твоего́ чре́ва.

Инъ.

Ирмо́съ: Вѣтíи яви́шася о́троцы любомудрѣ́йшіи дре́вле, отъ богопрія́тныя бо души́, богосло́вяще устна́ми, поя́ху: Пребоже́ственный отце́въ и на́шъ Бо́же, благослове́нъ еси́.

Ме́ртвость живоно́сную стяжа́въ сласте́й отложе́ніемъ, тѣ́мже больны́я исцѣля́ти сподо́бился еси́, Кири́лле, — Пребоже́ственный отце́въ, — вопія́, — Бо́же, благослове́нъ еси́.

Непщева́вше умори́ти безъ ума́ чародѣя́ньми, о́тче, лука́выми тебе́, блюдо́маго Боже́ственною всѣ́хъ Зижди́теля дла́нію, несмы́сленно постыдѣ́вшеся, обличе́ни бы́ша су́щимъ въ тебѣ́ проразумѣ́ніемъ.

Богоро́диченъ: Исцѣли́ души́ моея́ стра́сти, безстра́стія исто́чникъ ро́ждшая несказа́нно, и умиле́нія ту́чу пода́ждь ми́, хода́тайствуя мнѣ́ утѣше́нія, Свята́я Богоро́дице.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Соверше́нною чистото́ю, и любо́вію Христа́ возжелѣ́лъ еси́, священнотаи́нниче о́тче, непреста́нными гла́сы вопія́: по́йте Го́спода, вся́ дѣла́, и превозноси́те Его́ во вѣ́ки.

Мірску́ю красоту́ оста́вивъ во́лею, Христу́, блаже́нне, прише́лъ еси́, благолѣ́пія Того́ жела́я зрѣ́ти, и во оби́тели святы́я всели́лся еси́, — по́йте Го́спода, — вопія́, — вся́ дѣла́, и превозноси́те Его́ во вѣ́ки.

Ны́нѣ пусты́ня весе́ліемъ, о́тче, красу́ется, имѣ́я мо́щи твоя́, Кири́лле преподо́бне; ученицы́ же, твоему́ житію́ ревну́юще и о твое́й па́мяти ра́дующеся, Творцу́ вопію́тъ: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Свяще́нными Тя́ гла́сы Бо́жіи проро́цы, Чи́стая, быва́ющу Ма́терь провозгласи́ша я́сно всѣ́ми владѣ́ющаго, Пречи́стая, Его́же превозно́симъ Го́спода во вѣ́ки.

Инъ.

Ирмо́съ: Пе́щь иногда́ о́гненная въ Вавило́нѣ дѣ́йства раздѣля́ше, Бо́жіимъ велѣ́ніемъ халде́и опаля́ющая, вѣ́рныя же ороша́ющая, пою́щія: благослови́те вся́ дѣла́ Госпо́дня Го́спода.

Надъ страстьми́ тлетво́рными ца́рствовавъ о Христѣ́, богому́дре о́тче, въ Ца́рствіи небе́снѣмъ сподо́бился еси́ жи́ти со всѣ́ми святы́ми, до́брѣ пожи́въ и Всеви́дца Бо́га возлюби́въ.

Твоя́ святы́я моли́твы пріе́мля, Бо́гъ су́щимъ во оскудѣ́ніи съ тобо́ю подава́ше я́же къ животу́ вы́ну, вельми́ на земли́ прославля́я тя́, чудодѣ́йственный Кири́лле всеблаже́нне.

Укра́шся добро́тами боже́ственными, ко кра́снымъ черто́гомъ преста́вился еси́, съ Бо́гомъ, о́тче, пребыва́я, и Сего́ Боже́ственныя красоты́ въ непроходи́мыя вѣ́ки наслажда́ешися.

Богоро́диченъ: Живы́й исто́чникъ, я́ко во́ду жи́зни поро́ждши, ду́шу мою́, иста́явшую грѣхо́внымъ пла́менемъ, Богоро́дице Дѣ́во, напо́й, да Тя́ сла́влю во вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Ду́хомъ, о́тче, обнища́въ, небе́сное Ца́рство воспрія́лъ еси́ со всѣ́ми избра́нными, сла́вы неизрече́нныя исполня́емь, болѣ́зней по́честь пріе́мля, блаже́нне Кири́лле, воздая́нія, сего́ ра́ди тя́ вѣ́рою и любо́вію ублажа́емъ.

Моще́й твои́хъ ра́ка вѣ́рно приступа́ющимъ источа́етъ исцѣле́ній рѣ́ки, стра́сти ду́шъ потопля́ющи и тѣле́съ болѣ́зни отъе́млющи, блаже́нне Кири́лле, моли́твенниче вѣ́рою при́сно блажа́щихъ тя́.

Совокупля́яся съ преподо́бными свѣ́тлыми ста́ды, сія́ніемъ невече́рнимъ мы́сленно, о́тче Кири́лле, озаря́емь, боже́ственную твою́ па́мять творя́щія просвѣти́ вѣ́рныя и улучи́ти спасе́ніе моли́твами твои́ми сподо́би.

Богоро́диченъ: Облиста́еши всѣ́хъ чуде́съ заря́ми Твои́ми, Богоблагода́тная Чи́стая, страсте́й и скорбе́й отъе́млющи мглу́ и свѣ́тъ весе́лія мы́сленный простира́ющи. Ма́терь Бо́гу, Тя́ велича́емъ.

Инъ.

Ирмо́съ: Яже пре́жде со́лнца Свѣти́льника Бо́га возсія́вшаго, пло́тски къ на́мъ прише́дшаго, изъ боку́ Дѣви́чу неизрече́нно воплоти́вшая, Благослове́нная Всечи́стая, Тя́, Богоро́дице, велича́емъ.

Ми́лостивно вмѣсти́лся еси́, о́тче, вся́ческихъ Благода́телю, незло́бія добро́тою украша́емь и кро́тостію и красото́ю добродѣ́телей сія́я, тѣ́мже тя́ вси́ ублажа́емъ.

Пѣ́снь Бо́гу возсыла́ти съ безпло́тными сподо́бися, я́ко соблю́дъ о́нѣхъ житія́ чистоту́, терпѣ́ніемъ сла́ву воспрія́лъ еси́.

Пріими́ отъ на́съ, богоно́се, приноси́мое ти́ моле́ніе отъ чи́ста се́рдца и возда́ждь мольба́ми твои́ми согрѣше́ній оставле́ніе и спасе́ніе, всече́стне.

Богоро́диченъ: Яко ко́рень су́щимъ вои́стинну, Нетлѣ́нная Дѣ́во, вси́ вѣ́рніи, надѣ́ющеся, хвала́ми почита́емъ.

Свѣти́ленъ. Подо́бенъ: Не́бо звѣзда́ми.

Ангельскаго житія́ жела́я, удали́лся еси́, Кири́лле, въ пусты́ню и стра́сти плотскíя покори́лъ еси́, равноа́нгеленъ яви́лся еси́, о́тче на́шъ Кири́лле богоно́се. [Два́жды.]

Сла́ва, и ны́нѣ, богоро́диченъ:

Держа́ва на́ша, Чи́стая, Твоя́ рабы́ сохрани́ вся́ невре́дны, Тя́ бо стяжа́хомъ еди́ну прибѣ́жище душа́мъ на́шимъ.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Кири́лле многонаро́читый,* мірско́е украше́ніе оста́вль, му́дре,* болѣ́зньми воздержа́нія крѣ́пкими* стра́сти покори́лъ еси́ плотскíя, низложи́въ* и многоко́зненнаго побѣди́въ врага́,* вѣне́цъ съ пра́ведными прія́лъ еси́.* Того́ моли́твами, Го́споди,* всѣ́мъ на́мъ пода́ждь* ми́ръ и ве́лію ми́лость. [Два́жды.]

Свы́ше дарова́ній чуде́съ* отъ Бо́га сподо́бился еси́,* блаже́нне Кири́лле,* отъ приходя́щихъ съ вѣ́рою человѣ́къ,* бѣ́сы прогоня́я* и разли́чныя неду́ги исцѣля́я* моли́твами твои́ми, преподо́бне.* Тѣ́мже вси́ па́мять твою́,* соше́дшеся, любо́вію почита́емъ.

Воздержа́ніе изря́дное,* стоя́ніе всено́щное,* бдѣ́нно о́ко,* усмотря́ющо Боже́ственныя добро́ты,* имѣ́лъ еси́, блаже́нне Кири́лле,* тѣ́мже исцѣле́нія благода́ть прія́тъ,* стра́сти лю́тыя исцѣля́ти.* Сего́ ра́ди тя́ мо́лимъ:* испроси́, о́тче, всѣ́мъ ве́лію ми́лость.

Сла́ва, гла́съ 2:

Пусты́ня, пре́жде бѣсо́вская жили́ща имѣ́ющи, ны́нѣ же, Кири́лле, учени́къ твои́хъ мно́жествомъ испо́лнена, украша́ется, хра́мъ бо прече́стенъ Бо́жія Ма́тере въ себѣ́ имѣ́ющи, разли́чными добро́тами укра́шенъ. Тѣ́мже, въ не́мъ соше́дшеся и честны́й гро́бъ тво́й обстоя́ще, любе́зно покланя́емся и мо́лимся Це́ркви единомы́сліе дарова́ти и Правосла́вному Импера́тору на́шему на враги́ спосо́бствовати моли́твами твои́ми, и на́мъ испроси́ ми́ръ, и душа́мъ на́шимъ ве́лію ми́лость.

И ны́нѣ, богоро́диченъ:

[Все́ упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.]

Славосло́віе вели́кое, [ектеніи́] и отпу́стъ.



НА ЛИТУРГІИ,

Слу́жба преподо́бническая: [Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Феѵруа́рій. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 45 об. –54 об.

/ Къ оглавленію раздѣла /


Наверхъ / Къ титульной страницѣ

0